ٹیگ کے محفوظات: بنائو

کیا کہیے نہ ہماری سنی اب بیٹھے رنج اٹھائو تم

اکتوبر 6, 2015میر تقی میر،اساتذہ،غزلفرمائو،لٹائو،لائو،مٹائو،آئو،اٹھائو،بنائو،بندھائو،جائوadmin

دیوان پنجم غزل 1679

ہم تو یہی کہتے تھے ہمیشہ دل کو کہیں نہ لگائو تم

کیا کہیے نہ ہماری سنی اب بیٹھے رنج اٹھائو تم

جھوٹ کہا کیا ہم نے اس میں طور جو اس سے ظاہر ہے

ہاتھ چلے تو عاشق زار کو خاک و خوں میں لٹائو تم

صبر کرو بیتاب رہو خاموش پھرو یا شور کرو

کس کو یاں پروا ہے کسو کی ٹھہرو آئو جائو تم

ناز غرور تبختر سارا پھولوں پر ہے چمن کا سو

کیا مرزائی لالہ و گل کی کچھ خاطر میں نہ لائو تم

وائے کہ اس ہجراں کشتے نے باغ سے جاتے ٹک نہ سنا

گل نے کہا جو خوبی سے اپنی کچھ تو ہمیں فرمائو تم

دست و پا بہتیرے مارے سر بھی پھوڑے حیرت ہے

کیا کریے جو بے دست و پا ہم سوں کے ہاتھ آئو تم

غم میں تمھاری صورت خوش کے سینکڑوں شکلیں گوبگڑیں

بیٹھے ناز و غرور سے بکھرے بال اپنے نہ بنائو تم

در پہ حرم کے کشود نہیں تو دیر میں جاکر کافر ہو

قشقہ کھینچو پوتھی پڑھو زنار گلے سے بندھائو تم

بود نبود ثبات رکھے تو یہ بھی اک بابت ہے میر

اس صفحے میں حرف غلط ہیں کاشکے ہم کو مٹائو تم

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

جیسے مصاحب ابر کی ہوتی ہے کوئی بائو

اکتوبر 6, 2015میر تقی میر،اساتذہ،غزلچڑھائو،چائو،گھائو،آئو،بنائو،بڑھائو،بائو،جمائو،جائو،دکھائوadmin

دیوان سوم غزل 1236

رہتا ہے پیش دیدئہ تر آہ کا سبھائو

جیسے مصاحب ابر کی ہوتی ہے کوئی بائو

برسے گی برف عرصۂ محشر میں دشت دشت

گر میری سرد آہوں کا واں ہو گیا جمائو

حاصل کوئی امید ہوئی ہو تو میں کہوں

خوں ہی ہوا کیے ہیں مرے دل میں سارے چائو

آنکھوں کے آگے رونے سے میرے محیط ہے

ابروں سے جا کہے کوئی پانی پیو تو آئو

رہتی تھی اشک خونیں میں ڈوبی سب آستیں

اس چشم بحرخوں کے کبھو دیکھے ہیں چڑھائو

اظہار درد اگرچہ بہت بے نمک ہے پر

ٹک بیٹھو تو دکھاویں تمھیں چھاتیوں کے گھائو

آ عاشقوں کی آنکھوں میں ٹک اے بہ دل قریب

ان منظروں سے بھی ہے بہت دور تک دکھائو

صحبت جو اس سے رہتی ہے کیا نقل کریے ہائے

جب آگئے ہیں ہم تو کہا ان نے یاں سے جائو

صد چاک اپنے دل سے تو بگڑا ہی کی وہ زلف

افسوں کیا ہے شانے نے جو اس سے ہے بنائو

اس ہی زمیں میں میر غزل اور ایک کہہ

گو خوش نہ آوے سامعوں کو بات کا بڑھائو

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

ٹک آپ بھی تو آیئے یاں زور بائو ہے

اکتوبر 6, 2015میر تقی میر،اساتذہ،غزلچھپائو،چائو،گھائو،بہائو،بنائو،بائو،دکھائو،دائو،سبھائوadmin

دیوان اول غزل 569

دل کی طرف کچھ آہ سے دل کا لگائو ہے

ٹک آپ بھی تو آیئے یاں زور بائو ہے

اٹھتا نہیں ہے ہاتھ ترا تیغ جور سے

ناحق کشی کہاں تئیں یہ کیا سبھائو ہے

باغ نظر ہے چشم کے منظر کا سب جہاں

ٹک ٹھہرو یاں تو جانو کہ کیسا دکھائو ہے

تقریب ہم نے ڈالی ہے اس سے جوئے کی اب

جو بن پڑے ہے ٹک تو ہمارا ہی دائو ہے

ٹپکا کرے ہے آنکھ سے لوہو ہی روز و شب

چہرے پہ میرے چشم ہے یا کوئی گھائو ہے

ضبط سرشک خونیں سے جی کیونکے شاد ہو

اب دل کی طرف لوہو کا سارا بہائو ہے

اب سب کے روزگار کی صورت بگڑ گئی

لاکھوں میں ایک دو کا کہیں کچھ بنائو ہے

چھاتی کے میری سارے نمودار ہیں یہ زخم

پردہ رہا ہے کون سا اب کیا چھپائو ہے

عاشق کہیں جو ہو گے تو جانوگے قدر میر

اب تو کسی کے چاہنے کا تم کو چائو ہے

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔