آفتاب اقبال شمیم ۔ غزل نمبر 4

گھر کو اتنا بھی نہیں تاریک رکھنا چاہئے

وا ذرا سا روزنِ تشکیک رکھنا چاہئے

ہے اُسی کے بھید سے حاضر میں غائب کی نمود

دُور کو ہر حال میں نزدیک رکھنا چاہئے

در پئے آزار ہے سنجیدگی کا پیشہ ور

پاس اپنے دشنۂ تضحیک رکھنا چاہئے

پردۂ حیرت میں رہنا اُس کا منشا ہی سہی

پر اُسے پردہ ذرا باریک رکھنا چاہئے

خود بخود آ جائے گا کعبہ جبیں کی سیدھ میں

بس ذرا اندر کا قبلہ ٹھیک رکھنا چاہئے

آفتاب اقبال شمیم