منصور آفاق ۔ غزل نمبر 506

صدیوں کے آسیب زدہ دیوار ودر آباد ہوئے

دار ورسن کی منزل پر کچھ بخت آور آباد ہوئے

دریا تیرے ساحل تو جاگیر ہیں تیری گاؤں کا کیا

گاؤں ادھر برباد ہوئے تو گاؤں ادھر آباد ہوئے

خواب سنانے والوں کا اب دیس میں رہنا جرم ہوا

سات سمندر پار کہیں جا شہر بدر آباد ہوئے

شام کی بھیگی نرم ہوا نے لہروں سے سرگوشی کی

اور پرندوں کے کچھ جوڑے ساحل پر آباد ہوئے

جب بھی اپنے گاؤں گئے ہم ، بند مکاں کا دروازہ

پوری تیس برس تک دیکھا آخر گھر آباد ہوئے

عمر گزاری جا سکتی تھی خاک نگر منصور مگر

عرش پہ ہونگے ہم آوارہ گرد اگر آباد ہوئے

منصور آفاق