ٹیگ کے محفوظات: آتے

اب اُس پیڑ کے پتے جھڑتے جاتے ہیں

اگست 4, 2018ناصر کاظمی،دیوانِ ناصر،غزلہلاتے،آتے،بلاتے،جاتےadmin

ہم جس پیڑ کی چھاؤں میں بیٹھا کرتے تھے

اب اُس پیڑ کے پتے جھڑتے جاتے ہیں

ایک انوکھی بستی دھیان میں بستی ہے

اُس بستی کے باسی مجھے بلاتے ہیں

میں تو آنکھیں بند کیے بیٹھا ہوں مگر

دل کے دروازے کیوں کھلتے جاتے ہیں

تو آنکھوں سے اوجھل ہوتا جاتا ہے

دُور کھڑے ہم خالی ہاتھ ہلاتے ہیں

جب بھی نئے سفر پر جاتا ہوں ناصر

پچھلے سفر کے ساتھی دھیان میں آتے ہیں

ناصر کاظمی

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

چکر مارو جیسے بگولا خاک اڑاتے آتے رہو

اکتوبر 6, 2015میر تقی میر،اساتذہ،غزلماتے،چھپاتے،آتے،بناتے،بتاتے،جلاتے،جاتےadmin

دیوان پنجم غزل 1706

عاشق ہو تو اپنے تئیں دیوانہ سب میں جاتے رہو

چکر مارو جیسے بگولا خاک اڑاتے آتے رہو

دوستی جس کو لوگ کہیں ہیں جان سے اس کو خصومت ہے

ہوجاوے جو تم کو کسی سے تا مقدور چھپاتے رہو

دل لگنے کی چوٹ بری ہے اس صدمے سے خدا حافظ

بارے سعی و کشش کوشش سے جی کو اپنے بچاتے رہو

آئی بہار جنوں ہو مبارک عشق اللہ ہمارے لیے

نعل جڑے سینوں پہ پھرو تم داغ سروں پہ جلاتے رہو

شاعر ہو مت چپکے رہو اب چپ میں جانیں جاتی ہیں

بات کرو ابیات پڑھو کچھ بیتیں ہم کو بتاتے رہو

ابر سیہ قبلے سے آیا تم بھی شیخو پاس کرو

تخفیفے ٹک لٹ پٹے باندھو ساختہ ہی مدھ ماتے رہو

کیا جانے وہ مائل ہووے کب ملنے کا تم سے میر

قبلہ و کعبہ اس کی جانب اکثر آتے جاتے رہو

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

آنکھیں مندیں اب جاچکے ہم وے دیکھو تو آتے ہیں ہنوز

اکتوبر 6, 2015میر تقی میر،اساتذہ،غزلکھاتے،آتے،بہلاتے،جاتے،شرماتےadmin

دیوان پنجم غزل 1626

کب سے آنے کہتے ہیں تشریف نہیں لاتے ہیں ہنوز

آنکھیں مندیں اب جاچکے ہم وے دیکھو تو آتے ہیں ہنوز

کہتا ہے برسوں سے ہمیں تم دور ہو یاں سے دفع بھی ہو

شوق و سماجت سیر کرو ہم پاس اس کے جاتے ہیں ہنوز

راتوں پاس گلے لگ سوئے ننگے ہوکر ہے یہ عجب

دن کو بے پردہ نہیں ملتے ہم سے شرماتے ہیں ہنوز

ساتھ کے پڑھنے والے فارغ تحصیل علمی سے ہوئے

جہل سے مکتب کے لڑکوں میں ہم دل بہلاتے ہیں ہنوز

گل صد رنگ چمن میں آئے بادخزاں سے بکھر بھی گئے

عشق و جنوں کی بہار کے عاشق میر جی گل کھاتے ہیں ہنوز

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

آتے ہو تمکین سے ایسے جیسے کہیں کو جاتے ہو

اکتوبر 6, 2015میر تقی میر،اساتذہ،غزللاتے،ماتے،گھبراتے،آتے،جاتے،سمجھاتے،شرماتےadmin

دیوان چہارم غزل 1474

ناز کی کوئی یہ بھی ٹھسک ہے جی کاہے کو کڑھاتے ہو

آتے ہو تمکین سے ایسے جیسے کہیں کو جاتے ہو

غیر کی ہمراہی کی عزت جی مارے ہے عاشق کا

پاس کبھو جو آتے ہو تو ساتھ اک تحفہ لاتے ہو

مست نہیں پر بال ہیں بکھرے پیچ گلے میں پگڑی کے

ساختہ ایسے بگڑے رہو ہو تم جیسے مدھ ماتے ہو

پردہ ہم سے کر لیتے ہو جب آتے ہو مجلس میں

آنکھیں سب سے ملاتے ہو کچھ ہم ہی سے شرماتے ہو

سوچ نہیں یہ فقیر ہے اپنا جیب دریدہ دیوانہ

ٹھوکر لگتے دامن کو کس ناز سے تم یاں آتے ہو

رفتۂ عشق کسو کا یارو راہ چلے ہے کس کے کہے

کون رہا ہے آپ میں یاں تم کس کے تئیں سمجھاتے ہو

صبر بلا پر کرتے صاحب بیتابی کا حاصل کیا

کوئی مقلب قلبوں کا ہے میر عبث گھبراتے ہو

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

آپ میں ہم سے بے خود و رفتہ پھر پھر بھی کیا آتے ہیں

اکتوبر 6, 2015میر تقی میر،اساتذہ،غزللاتے،آتے،اٹھاتےadmin

دیوان چہارم غزل 1452

دل کی لاگ بری ہے ہوتی چنگے بھلے مرجاتے ہیں

آپ میں ہم سے بے خود و رفتہ پھر پھر بھی کیا آتے ہیں

رنگ نہ بدلے چہرہ کیونکر آنکھیں بیٹھی جائیں نہ کیوں

کیسے کیسے غم کھاتے ہیں کیا کیا رنج اٹھاتے ہیں

جی ہی جائے ہے میر جو اپنا دیر کی جانب کیا کریے

یوں تو مزاج طرف کعبے کے بہتیرا ہم لاتے ہیں

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

کس کس ناز سے وے آتے پر آنکھ نہ ان سے ملاتے ہم

اکتوبر 6, 2015میر تقی میر،اساتذہ،غزلملاتے،ماتے،کھاتے،آتے،بندھاتےadmin

دیوان چہارم غزل 1443

صبر بہت تھا ایک سمیں میں جا سے اپنی نہ جاتے ہم

کس کس ناز سے وے آتے پر آنکھ نہ ان سے ملاتے ہم

کعبے سے کر نذر اٹھے سو خرج راہ اے وائے ہوئے

ورنہ صنم خانے میں جا زنار گلے سے بندھاتے ہم

ہاتھی مست بھی آوے چلا تو اس سے منھ کو پھیر نہ لیں

پھرتے ہیں سرمست محبت مے ناخوردہ ماتے ہم

ہائے جوانی وہ نہ گلے لگتا تو خشم عشقی سے

نعل جڑی جاتی چھاتی پر گل ہاتھوں پر کھاتے ہم

عشق تو کارخوب ہے لیکن میر کھنچے ہے رنج بہت

کاش کے عالم ہستی میں بے عشق و محبت آتے ہم

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

رحلت کرنے سے آگے مجھ کو دیکھتے آتے جاتے تم

اکتوبر 6, 2015میر تقی میر،اساتذہ،غزللگاتے،لاتے،پاتے،آتے،اٹھاتے،جاتے،دکھاتےadmin

دیوان چہارم غزل 1442

چاہیے یوں تھا بگڑی صحبت آپھی آ کے بناتے تم

رحلت کرنے سے آگے مجھ کو دیکھتے آتے جاتے تم

چلتے کہا تھا جائو سفر کر آئوگے تو ملیے گا

وعدئہ وصل نہ ہوتا تو پھر کس کو جیتا پاتے تم

کیا دن تھے وے دیکھتے تم کو نیچی نظر میں کرلیتا

شرما شرما لوگوں سے جب آنکھیں مجھ کو دکھاتے تم

بستر پر میں مردہ سا تھا جان سی مجھ میں آجاتی

کیا ہوتا جو رنجہ قدم کر میرے سرہانے آتے تم

دل کے اوپر ہاتھ رکھے ہی شام و سحر یاں گذرے ہے

حال یہ تھا تو دل عاشق کا ہاتھ میں ٹک تو لاتے تم

خاک ہے اصل طینت آدم چاہیے اس کو عجز کرے

بات کی تہ کو کچھ پاتے تو اتنا سر نہ اٹھاتے تم

چہرہ زرد بجا ہے سارا عشق میں غم کا مارا ہوں

رنگ یہ دیکھا ہوتا تو دل میر کہیں نہ لگاتے تم

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

بہت اس طرف کو تو جاتے ہیں لوگ

اکتوبر 6, 2015میر تقی میر،اساتذہ،غزلچھپاتے،پاتے،آتے،اٹھاتے،بناتے،بتاتے،جاتےadmin

دیوان دوم غزل 849

رہ مرگ سے کیوں ڈراتے ہیں لوگ

بہت اس طرف کو تو جاتے ہیں لوگ

مظاہر سب اس کے ہیں ظاہر ہے وہ

تکلف ہے یاں جو چھپاتے ہیں لوگ

عجب کی جگہ ہے کہ اس کی جگہ

ہمارے تئیں ہی بتاتے ہیں لوگ

رہے ہم تو کھوئے گئے سے سدا

کبھو آپ میں ہم کو پاتے ہیں لوگ

اس ابرو کماں پر جو قرباں ہیں ہم

ہمیں کو نشانہ بناتے ہیں لوگ

نہ سویا کوئی شور شب سے مرے

قیامت اذیت اٹھاتے ہیں لوگ

ان آنکھوں کے بیمار ہیں میر ہم

بجا دیکھنے ہم کو آتے ہیں لوگ

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

پھر عمر چاہیے گی اس کو بحال آتے

اکتوبر 6, 2015میر تقی میر،اساتذہ،غزلہلاتے،لگاتے،ملاتے،پاتے،آتے،اٹھاتے،دکھاتے،سناتےadmin

دیوان اول غزل 494

تجھ سے دوچار ہو گا جو کوئی راہ جاتے

پھر عمر چاہیے گی اس کو بحال آتے

گر دل کی بے قراری ہوتی یہی جو اب ہے

تو ہم ستم رسیدہ کاہے کو جینے پاتے

وے دن گئے کہ اٹھ کر جاتے تھے اس گلی میں

اب سعی چاہیے ہے بالیں سے سر اٹھاتے

کب تھی ہمیں تمنا اے ضعف یہ کہ تڑپیں

پر زیر تیغ اس کی ہم ٹک تو سر ہلاتے

گر جانتے کہ یوں ہی برباد جائیں گے تو

کاہے کو خاک میں ہم اپنے تئیں ملاتے

شاید کہ خون دل کا پہنچا ہے وقت آخر

تھم جاتے ہیں کچھ آنسو راتوں کو آتے آتے

اس سمت کو پلٹتی تیری نگہ تو ساقی

حال خراب مجلس ہم شیخ کو دکھاتے

جی دینا دل دہی سے بہتر تھا صدمراتب

اے کاش جان دیتے ہم بھی نہ دل لگاتے

شب کوتہ اور قصہ ان کا دراز ورنہ

احوال میر صاحب ہم تجھ کو سب سناتے

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

آنکھ اٹھاکر جب دیکھے ہیں اوروں میں ہنستے جاتے ہو

اکتوبر 6, 2015میر تقی میر،اساتذہ،غزللاتے،ماتے،چلاتے،آتے،اٹھاتے،بتاتے،جاتے،دکھلاتےadmin

دیوان اول غزل 391

ہم سے تو تم کو ضد سی پڑی ہے خواہ نخواہ رلاتے ہو

آنکھ اٹھاکر جب دیکھے ہیں اوروں میں ہنستے جاتے ہو

جب ملنے کا سوال کروں ہوں زلف و رخ دکھلاتے ہو

برسوں مجھ کو یوں ہی گذرے صبح و شام بتاتے ہو

بکھری رہیں ہیں منھ پر زلفیں آنکھ نہیں کھل سکتی ہے

کیونکے چھپے مے خواری شب جب ایسے رات کے ماتے ہو

سرو تہ و بالا ہوتا ہے درہم برہم شاخ گل

ناز سے قد کش ہوکے چمن میں ایک بلا تم لاتے ہو

صبح سے یاں پھر جان و دل پر روز قیامت رہتی ہے

رات کبھو آ رہتے ہو تو یہ دن ہم کو دکھلاتے ہو

جن نے تم کو نہ دیکھا ہووے اس سے آنکھیں مارو تم

ایک نگاہ مفتن کر تم سو سو فتنے اٹھاتے ہو

چشم تو ہے اک دید کی جا پر کب تکلیف کے لائق ہے

دل جو ہے دلچسپ مکاں تم اس میں کب کب آتے ہو

راحت پہنچی ٹک تم سے تو رنج اٹھایا برسوں تک

سر سہلاتے ہو جو کبھو تو بھیجا بھی کھا جاتے ہو

ہو کے گداے کوے محبت زور صدا یہ نکالی ہے

اب تو میر جی راتوں کو تم ہر در پر چلاتے ہو

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

گو رقیباں کچھ اور گاتے ہیں

اکتوبر 6, 2015میر تقی میر،اساتذہ،غزللاتے،نہاتے،گاتے،پاتے،آتے،جاتے،سناتےadmin

دیوان اول غزل 325

ہم تو مطرب پسرکے جاتے ہیں

گو رقیباں کچھ اور گاتے ہیں

خاک میں لوٹتے تھے کل تجھ بن

آج لوہو میں ہم نہاتے ہیں

اے عدم ہونے والو تم تو چلو

ہم بھی اب کوئی دم میں آتے ہیں

ایک کہتا ہوں میں تو منھ پہ رقیب

تیری پشتی سے سو سناتے ہیں

دیدہ و دل کا کیا کیا تھا میں

روز آفت جو مجھ پہ لاتے ہیں

کوئی رووے ہے کوئی تڑپے ہے

کیا کروں میرے گھر سے آتے ہیں

ورنہ میں میر ہوں مرے آگے

دشت غم بھی نہ ٹکنے پاتے ہیں

کھود گاڑوں زمیں میں دونوں کو

گرچہ یہ آسماں پہ جاتے ہیں

دیدہ و دل شتاب گم ہوں میر

سر پہ آفت ہمیشہ لاتے ہیں

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔