شعاعِ حسن ترے حسن کو چھپاتی تھی

وہ روشنی تھی کہ صورت نظر نہ آتی تھی

کسے ملیں کہاں جائیں کہ رات کالی ہے

وہ شکل ہی نہ رہی جو دِیے جلاتی تھی

وہی تو دِن تھے حقیقت میں عمر کا حاصل

خوشا وہ دِن کہ ہمیں روز موت آتی تھی

ذرا سی بات سہی تیرا یاد آجانا

ذرا سی بات بہت دیر تک رُلاتی تھی

اُداس بیٹھے ہو کیوں ہاتھ توڑ کر ناصر

وہ نے کہاں ہے جو تاروں کی نیند اُڑاتی تھی

ناصر کاظمی

دیوان اول غزل 554

آہ جس وقت سر اٹھاتی ہے

عرش پر برچھیاں چلاتی ہے

ناز بردار لب ہے جاں جب سے

تیرے خط کی خبر کو پاتی ہے

اے شب ہجر راست کہہ تجھ کو

بات کچھ صبح کی بھی آتی ہے

چشم بد دور چشم تر اے میر

آنکھیں طوفان کو دکھاتی ہے

میر تقی میر