منصور آفاق ۔ غزل نمبر 373

الفاظ پہن کر ہمی اوراق نشیں ہیں

پروازِ مسلسل میں ہیں ، براق نشیں ہیں

یہ بات الگ روشنی ہوتی ہے کہیں اور

ہم مثلِ چراغِ شبِ غم طاق نشیں ہیں

سورج کی طرف دیکھنے والوں کی قسم ہم

اک خوابِ عشاء اوڑھ کے اشراق نشیں ہیں

چاہیں تو زباں کھینچ لیں انکار کی ہم لوگ

بس خوفِ خدا ہے ہمیں ، اشفاق نشیں ہیں

آتی ہیں شعاعوں سے انا الحق کی صدائیں

ہم نورِ ہیں منصور ہیں آفاق نشیں ہیں

منصور آفاق