قمر جلالوی ۔ غزل نمبر 60

میں ڈھونڈ لوں تجھے میری بس کی بات کہاں

نہ جانے چھوڑ دے مجھ کو مری حیات کہاں

قفس میں یاد نہ کر آشیاں کی آزادی

وہ اپنا گھر تھا یہاں اپنے گھر کی بات کہاں

شباب آنے سے تجھ سے عبث امیدِ وفا

رہے گی تیرے زمانے میں کائنات کہاں

تلاش کرنے کو آئے گا کون صحرا میں

مرے جنوں کے ہیں ایسے تعلقات کہاں

قمر وہ رات کو بہرِ عیادت آئیں گے

مگر مریض کی قسمت میں آج، رات کہاں

قمر جلالوی

مصطفٰی خان شیفتہ ۔ غزل نمبر 16

جب سے عطا ہوا ہمیں خلعت حیات کا

کچھ اور رنگ ڈھنگ ہوا کائنات کا

شیشہ اتار، شکوے کو بالائے طاق رکھ

کیا اعتبار زندگیِ بے ثبات کا

لڑتے ہو جب رقیب سے کرتے ہو مجھ سے صلح

مشتاق یاں نہیں کوئی اس التفات کا

گر تیرے تشنہ کام کو دے خضر مرتے دم

پانی ہو خشک چشمۂ آبِ حیات کا

یاں خار و خس کو بے ادبی سے نہ دیکھنا

ہاں عالمِ شہود ہے آئینہ ذات کا

کہتے ہیں جان، جانتے ہیں بے وفا مجھے

کیا اعتبار ہے انہیں دشمن کی بات کا

واعظ جنوں زدوں سے نہیں باز پرسِ حشر

بس آپ فکر کیجئے اپنی نجات کا

جوشِ سرشکِ خوں کے سبب سے دمِ رقم

نامہ نہیں رہا یہ ورق ہے برات کا

اے مرگ آ ، کہ میری بھی رہ جائے آبرو

رکھا ہے اس نے سوگ عدو کی وفات کا

ایسے کے آگے شیفتہ کیا چل سکے جہاں

احسان ایک عمر رہے، ایک رات کا

مصطفٰی خان شیفتہ

دیوانِ غالب ۔ غزل نمبر 180

کرم ہی کچھ سببِ لطف و التفات نہیں

انہیں ہنساکے رلانا بھی کوئ بات نہیں

کہاں سے لاکے دکھاۓ گی عمرِ کم مایہ

سیہ نصیب کو وہ دن کہ جس میں رات نہیں

زبان حمد کی خوگر ہوئ تو کیا حاصل

کہ تیری ذات میں شامل تری صفات نہیں

خوشی، خوشی کو نہ کہہ، غم کو غم نہ جان اسدؔ

قرار داخلِ اجزاۓ کائنات نہیں

نوٹ از مولانا مہر: یہ غزل مولانا عبد الباری آسی کی کتاب سے منقول ہے لیکن اہلِ نظر مجموعۂ آسی میں میں شائع شدہ پورے غیر مطبوعہ کلام کا انتساب صحیح نہیں سمجھتے

مرزا اسد اللہ خان غالب

دیوان چہارم غزل 1314

قصہ کہیں تو کیا کہیں ملنے کی رات کا

پہروں چوائو ان نے رکھا بات بات کا

جرأت سے گرچہ زرد ہوں پر مانتا ہے کون

منھ لال جب تلک نہ کروں پانچ سات کا

کیونکر بسر کرے غم و غصہ میں ہجر کے

خوگر جو ہو کسو کے کوئی التفات کا

جاگہ سے لے گیا ہمیں اس کا خرام ناز

ٹھہرائو ہوسکا نہ قرار و ثبات کا

ڈرتا ہوں مالکان جزا چھاتی دیکھ کر

کہنے لگیں نہ واہ رے زخم اس کے ہاتھ کا

واعظ کہے سو سچ ہے ولے مے فروش سے

ہم ذکر بھی سنا نہیں صوم و صلوٰت کا

بھونکا کریں رقیب پڑے کوے یار میں

کس کے تئیں دماغ عفف ہے سگات کا

ان ہونٹوں کا حریف ہو ظلمات میں گیا

پردے میں رو سیاہ ہے آب حیات کا

عالم کسو حکیم کا باندھا طلسم ہے

کچھ ہو تو اعتبار بھی ہو کائنات کا

گر یار میر اہل ہے تو کام سہل ہے

اندیشہ تجھ کو یوں ہی ہے اپنی نجات کا

میر تقی میر

دیوان دوم غزل 664

ہر ذی حیات کا ہے سبب جو حیات کا

نکلے ہے جی ہی اس کے لیے کائنات کا

بکھری ہے زلف اس رخ عالم فروز پر

ورنہ بنائو ہووے نہ دن اور رات کا

در پردہ وہ ہی معنی مقوم نہ ہوں اگر

صورت نہ پکڑے کام فلک کے ثبات کا

ہیں مستحیل خاک سے اجزاے نوخطاں

کیا سہل ہے زمیں سے نکلنا نبات کا

مستہلک اس کے عشق کے جانیں ہیں قدر مرگ

عیسیٰ و خضر کو ہے مزہ کب وفات کا

اشجار ہوویں خامہ و آب سیہ بحار

لکھنا نہ تو بھی ہوسکے اس کی صفات کا

اس کے فروغ حسن سے جھمکے ہے سب میں نور

شمع حرم ہو یا کہ دیا سومنات کا

بالذات ہے جہاں میں وہ موجود ہر جگہ

ہے دید چشم دل کے کھلے عین ذات کا

ہر صفحے میں ہے محو کلام اپنا دس جگہ

مصحف کو کھول دیکھ ٹک انداز بات کا

ہم مذنبوں میں صرف کرم سے ہے گفتگو

مذکور ذکر یاں نہیں صوم و صلوٰت کا

کیا میر تجھ کو نامہ سیاہی کا فکر ہے

ختم رسل سا شخص ہے ضامن نجات کا

میر تقی میر

دیوان اول غزل 469

غم سے یہ راہ میں نے نکالی نجات کی

سجدہ اس آستاں کا کیا پھر وفات کی

نسبت تو دیتے ہیں ترے لب سے پر ایک دن

ناموس یوں ہی جائے گی آب حیات کی

صد حرف زیر خاک تہ دل چلے گئے

مہلت نہ دی اجل نے ہمیں ایک بات کی

ہم تو ہی اس زمانے میں حیرت سے چپ نہیں

اب بات جاچکی ہے سبھی کائنات کی

پژمردہ اس کلی کے تئیں وا شدن سے کیا

آہ سحر نے دل پہ عبث التفات کی

حور و پری فرشتہ بشر مار ہی رکھا

دزدیدہ تیرے دیکھنے نے جس پہ گھات کی

اس لب شکر کے ہیں گے جہاں ذائقہ شناس

اس جا دعا پہنچتی نہیں ہے نبات کی

عرصہ ہے تنگ چال نکلتی نہیں ہے اور

جو چال پڑتی ہے سو وہ بازی کی مات کی

برقع اٹھا تھا یار کے منھ کا سو میر کل

سنتے ہیں آفتاب نے جوں توں کے رات کی

میر تقی میر

مجید امجد ۔ غزل نمبر 25

گہرے سُروں میں عرضِ نوائے حیات کر

سینے پہ ایک درد کی سل رکھ کے بات کر

یہ دوریوں کا سیلِ رواں، برگِ نامہ بھیج

یہ فاصلوں کے بندِ گراں، کوئی بات کر

تیرا دیار، رات، مری بانسری کی لے

اس خوابِ دل نشیں کو مری کائنات کر

میرے غموں کو اپنے خیالوں میں بار دے

ان الجھنوں کو سلسلۂ واقعات کر

آ، ایک دن، میرے دلِ ویراں میں بیٹھ کر

اس دشت کے سکوتِ سخن جُو سے بات کر

امجد نشاطِ زیست اسی کشمکش میں ہے

مرنے کا قصد، جینے کا عزم، ایک سات کر!

مجید امجد

منصور آفاق ۔ غزل نمبر 465

اک ایک سایہ ء ہجراں کے ساتھ پوری کی

پھر ایک پوری دیانت سے رات پوری کی

میں ایک کُن کی صدا تھا سو عمر بھر میں نے

ادھوری جو تھی پڑی کائنات پوری کی

عجیب عالمِ وحشت، عجیب دانائی

کبھی بکھیرا، کبھی اپنی ذات پوری کی

تھلوں کی ریت میں بو بو کے پیاس کے کربل

پھر آبِ سندھ نے رسمِ فرات پوری کی

پلک پلک پہ ستارے رکھے سہاگ کی رات

نہ پوچھ چاند کی کیسے برات پوری کی

کئی برس سے ادھوری پڑی تھی، سو میں نے

یہ مانگ تانگ کے سانسیں ، حیات پوری کی

یہ اور بات کہ دل میں اتر گیا پھر بھی

کسی سے ملتے ہوئے احتیاط پوری کی

یہ اور بات کہ آنسو ورق ورق پہ رکھے

کتابِ فلسفہء انبساط پوری کی

یہ اور بات کہ کام آ گئی کوئی نیکی

اُس اجنبی نے مگر واردات پوری کی

ہزار کہہ کے بھی میں کچھ نہ کہہ سکا منصور

کہا نہ کچھ بھی مگر اس نے بات پوری کی

منصور آفاق

منصور آفاق ۔ غزل نمبر 28

جب بھی میں کشفِ ذات سے گزرا

اک نئی کائنات سے گزرا

ہاتھ میں لالٹین لے کر میں

جبر کی کالی رات سے گزرا

آتی جاتی ہوئی کہانی میں

کیا کہوں کتنے ہاتھ سے گزرا

موت کی دلکشی زیادہ ہے

میں مقامِ ثبات سے گزرا

جستہ جستہ دلِ تباہ مرا

جسم کی نفسیات سے گزرا

لمحہ بھر ہی وہاں رہا لیکن

میں بڑے واقعات سے گزرا

لفظ میرا ترے تعاقب میں

حوضِ آبِ حیات سے گزرا

ایک تُو ہی نہیں ہے غم کا سبب

دل کئی حادثات سے گزرا

یہ بھی اِنکار کی تجلی ہے

ذہن لات و منات سے گزرا

دستِ اقبال تھام کر منصور

کعبہ و سومنات سے گزرا

منصور آفاق

منصور آفاق ۔ غزل نمبر 3

چل رہے ہیں ایک ساتھ

میں خدا اور کائنات

عرش پر بس بیٹھ کر

کن فکاں کا چرخہ کات

مرد و زن کا اجتماع

بیچ صدیوں کی قنات

دو وجودوں میں جلی

سردیوں کی ایک رات

بند ذرے میں کوئی

کائناتی واردات

آسیا میں قطب کی

سو گئیں سولہ جہات

پانیوں پر قرض ہے

فدیۂ نہر فرات

تُو پگھلتی تارکول

میں سڑک کا خشک پات

تیرا چہرہ جاوداں

تیری زلفوں کو ثبات

رحمتِ کن کا فروغ

جشن ہائے شب برات

شب تھی خالی چاند سے

دل رہا اندیشوں وات

نت نئے مفہوم دے

تیری آنکھوں کی لغات

آنکھ سے لکھا گیا

قصۂ نا ممکنات

گر پڑی ہے آنکھ سے

اک قیامت خیز بات

تیرے میرے درد کا

ایک شجرہ، ایک ذات

کٹ گئے ہیں روڈ پر

دو ہوا بازوں کے ہاتھ

لکھ دی اک دیوار پر

دل کی تاریخِ وفات

موت تک محدود ہیں

ڈائری کے واقعات

منصور آفاق

باقی صدیقی ۔ غزل نمبر 255

ہر نظر ایک گھات ہوتی ہے

دل میں جب کوئی بات ہوتی ہے

شمع بجھتی ہے، زلف کھلتی ہے

تب کہیں رات، رات ہوتی ہے

حسن سرشار، عشق وا رفتہ

کس سے ایسے میں بات ہوتی ہے

زیست لے بیٹھتی ہے اپنے گلے

غم سے جب کچھ نجات ہوتی ہے

بے رخی، اختلاف، روکھا پن

یوں بھی کیا کوئی بات ہوتی ہے

زخم کھا کر نظر جب اٹھتی ہے

حاصل کائنات ہوتی ہے

غم کا احساس تک نہیں باقیؔ

یوں بھی غم سے نجات ہوتی ہے

باقی صدیقی

باقی صدیقی ۔ غزل نمبر 173

ترے حضور ہوں، فکر حیات ہے پھر بھی

مرے لبوں پہ زمانے کی بات ہے پھر بھی

اگرچہ اس میں تری کوششیں بھی شامل ہیں

یہ کائنات مری کائنات ہے پھر بھی

کہاں حقیقت جلوہ، کہاں فریب شرار

ہزار شمعیں جلیں رات رات ہے پھر بھی

باقی صدیقی

باقی صدیقی ۔ غزل نمبر 154

وہ پو پھٹی، وہ سحر آئی، رات ختم ہوئی

پھر ایک بات چھڑی، ایک بات ختم ہوئی

رہ حیات کے ہر موڑ پر یہ غم توبہ

ابھی حیات، ابھی کائنات ختم ہوئی

مریض عشق نے لو شرح زندگی کر دی

چھڑی تھی آہ سے، ہچکی پہ بات ختم ہوئی

مرے جنوں ہی نے بحث حیات چھیڑی تھی

مرے جنوں ہی پہ بحث حیات ختم ہوئی

ہمیں نے عشق کیا اختیار جب باقیؔ

جہاں سے رسم و رہ التفات ختم ہوئی

باقی صدیقی