زمرہ جات کے محفوظات: غزل

کوفت گذرے ہے فراق یار میں جی پر بہت

اکتوبر 6, 2015میر تقی میر،اساتذہ،غزللشکر،مرکر،ور،گوہر،گھر،پتھر،پر،پرور،ایدھرadmin

دیوان دوم غزل 786

دیکھیے کب ہو وصال اب تو لگے ہے ڈر بہت

کوفت گذرے ہے فراق یار میں جی پر بہت

دل کی ویسی ہے خرابی کثرت اندوہ سے

جیسے رہ پڑتا ہے دشمن کا کہیں لشکر بہت

ہم نشیں جا بیٹھ محنت کش کوئی دل چاہیے

عشق تیرا کام ہے تو ہے بغل پرور بہت

بس نہیں مجھ ناتواں کا ہائے جو کچھ کرسکوں

مدعی پُرچَک سے اس کی پڑ گیا ہے ور بہت

سخت کر جی کیونکے یک باری کریں ہم ترک شہر

ان گلی کوچوں میں ہم نے کھائے ہیں پتھر بہت

دیکھ روے زرد پر بھی میرے آنسو کی ڈھلک

اے کہ تونے دیکھی ہے غلطانی گوہر بہت

ہم نفس کیا مجھ کو تو رویا کرے ہے روز و شب

رہ گئے ہیں مجھ سے کوے یار میں مرکر بہت

کم مجھی سے بولنا کم آنکھ مجھ پر کھولنا

اب عنایت یار کی رہتی ہے کچھ ایدھر بہت

کیا سبب ہے اب مکاں پر جو کوئی پاتا نہیں

میر صاحب آگے تو رہتے تھے اپنے گھر بہت

میر تقی میر

سر بھی اس کا کھپ گیا آخر کو یاں افسر سمیت

اکتوبر 6, 2015میر تقی میر،اساتذہ،غزلمنبر،محشر،افسر،تر،خنجر،در،زرadmin

دیوان دوم غزل 785

ہے زباں زد جو سکندر ہو چکا لشکر سمیت

سر بھی اس کا کھپ گیا آخر کو یاں افسر سمیت

چشمے آب شور کے نکلا کریں گے واں جہاں

رکھیں گے مجھ تلخ کام غم کو چشم تر سمیت

ہم اٹھے روتے تو لی گردوں نے پھر راہ گریز

بیٹھ جاوے گا یہ ماتم خانہ بام و در سمیت

مستی میں شرم گنہ سے میں جو رویا ڈاڑھ مار

گر پڑا بے خود ہو واعظ جمعہ کو منبر سمیت

بعث اپنا خاک سے ہو گا گر اس شورش کے ساتھ

عرش کو سر پر اٹھالیوں گے ہم محشر سمیت

کب تلک یوں لوہو پیتے ہاتھ اٹھا کر جان سے

وہ کمر کولی میں بھرلی ہم نے کل خنجر سمیت

گنج قاروں کا سا یاں کس کے کنے تھا سو تو میر

خاک میں ملتا ہے اب تک اپنے مال و زر سمیت

میر تقی میر

پر ہم سے تو تھمے نہ کبھو منھ پر آئی بات

اکتوبر 6, 2015میر تقی میر،اساتذہ،غزللگائی،چلائی،پائی،اڑائی،آئی،اٹھائی،بنائی،بڑھائی،بتائی،سنائیadmin

دیوان دوم غزل 784

ہوتی ہے گرچہ کہنے سے یارو پرائی بات

پر ہم سے تو تھمے نہ کبھو منھ پر آئی بات

جانے نہ تجھ کو جو یہ تصنع تو اس سے کر

تس پر بھی تو چھپی نہیں رہتی بنائی بات

لگ کر تدرو رہ گئے دیوار باغ سے

رفتار کی جو تیری صبا نے چلائی بات

کہتے تھے اس سے ملیے تو کیا کیا نہ کہیے لیک

وہ آگیا تو سامنے اس کے نہ آئی بات

اب تو ہوئے ہیں ہم بھی ترے ڈھب سے آشنا

واں تونے کچھ کہا کہ ادھر ہم نے پائی بات

بلبل کے بولنے میں سب انداز ہیں مرے

پوشیدہ کب رہے ہے کسو کی اڑائی بات

بھڑکا تھا رات دیکھ کے وہ شعلہ خو مجھے

کچھ رو سیہ رقیب نے شاید لگائی بات

عالم سیاہ خانہ ہے کس کا کہ روز و شب

یہ شور ہے کہ دیتی نہیں کچھ سنائی بات

اک دن کہا تھا یہ کہ خموشی میں ہے وقار

سو مجھ سے ہی سخن نہیں میں جو بتائی بات

اب مجھ ضعیف و زار کو مت کچھ کہا کرو

جاتی نہیں ہے مجھ سے کسو کی اٹھائی بات

خط لکھتے لکھتے میر نے دفتر کیے رواں

افراط اشتیاق نے آخر بڑھائی بات

میر تقی میر

پر منھ پہ آ ہی جاتی ہے بے اختیار بات

اکتوبر 6, 2015میر تقی میر،اساتذہ،غزلہزار،قرار،یار،گنوار،گذار،پیچدار،پکار،اختیار،اشتہار،بارadmin

دیوان دوم غزل 783

سنتا نہیں اگرچہ ہمارا نگار بات

پر منھ پہ آ ہی جاتی ہے بے اختیار بات

بلبل کے بولنے سے ہے کیوں بے دماغ گل

آپس میں یوں تو ہوتی ہے یارو ہزار بات

منھ تک رہو جو ہو وہ فریبندہ حرف زن

اس تھوڑے سن و سال میں یہ پیچدار بات

بوسہ دے چپکے لب کا کہ تب کچھ مزہ نہیں

پاوے گی سارے شہر میں جب اشتہار بات

ہے کس کی صوت انکر اصوات واعظا

کب آدمی کی جنس کرے ہے پکار بات

آہو کو اس کی چشم سخن گو سے مت ملا

شہری سے کرسکے ہے کہیں بھی گنوار بات

یوں بار گل سے اب کے جھکے ہیں نہال باغ

جھک جھک کے جیسے کرتے ہیں دوچار یار بات

آزردہ دل کو حرف پہ لانے کا لطف کیا

کرتی ہے خونچکاں مرے لب سے گذار بات

مرجاں کوئی کہے ہے کوئی ان لبوں کو لعل

کچھ رفتہ رفتہ پا ہی رہے گی قرار بات

یوں چپکے چپکے میر تلف ہو گا کب تلک

کچھ ہووے بھڑ کر اس سے بھی کر ایک بار بات

میر تقی میر

گویا وفا ہے عہد میں اس کے کبھو کی بات

اکتوبر 6, 2015میر تقی میر،اساتذہ،غزلمو،کبھو،کسو،گو،خو،رو،روبروadmin

دیوان دوم غزل 782

کیا پوچھتے ہو آہ مرے جنگجو کی بات

گویا وفا ہے عہد میں اس کے کبھو کی بات

اس باغ میں نہ آئی نظر خرمی مری

گر سبز بھی ہوا ہوں تو جیسے کسو کی بات

آئینہ پانی پانی رہا اس کے سامنے

کہیے جہاں کہوں یہ تو ہے روبرو کی بات

سر گل نے پھر جھکا کے اٹھایا نہ شرم سے

گلزار میں چلی تھی کہیں اس کے رو کی بات

حرمت میں مے کی کہنے سے واعظ کے ہے فتور

کیا اعتبار رکھتی ہے اس پوچ گو کی بات

ہم سوختوں میں آتش سرکش کا ذکر کیا

چل بھی پڑی ہے بات تو اس تند خو کی بات

کیا کوئی زلف یار سے حرف و سخن کرے

رکھتی ہے میر طول بہت اس کے مو کی بات

میر تقی میر

سینہ چاکی اپنی میں بیٹھا کیا کرتا تھا رات

اکتوبر 6, 2015میر تقی میر،اساتذہ،غزلکہا،کیا،بہا،بکا،جلا،دعا،سناadmin

دیوان دوم غزل 781

کام کیا تھا جیب و دامن سے مجھے پیش از جنوں

سینہ چاکی اپنی میں بیٹھا کیا کرتا تھا رات

جن دنوں کھینچا تھا سر اس بادشاہ حسن نے

ہر گلی میں اک فقیر اس کو دعا کرتا تھا رات

اب جہاں کچھ بات چھیڑی سوچ لایا پیش ازیں

میں کہا کرتا غم دل وہ سنا کرتا تھا رات

ہجر میں کیا کیا سمیں دیکھے ہیں ان آنکھوں سے میں

زرد رخ پر لالہ گوں آنسو بہا کرتا تھا رات

کیا کہوں پھر کیسے کیسے دن دکھاتا سالہا

وہ سخن نشنو جو ٹک میرا کہا کرتا تھا رات

دیکھنے والے ترے دیکھے میں سب اے رشک شمع

جوں چراغ وقف دل سب کا جلا کرتا تھا رات

بعد میرے اس غزل پر بھی بہت روویں گے لوگ

میں بھی ہر ہر بیت پر اس کی بکا کرتا تھا رات

دیکھ خالی جا کہیں گے برسوں اہل روزگار

میر اکثر دل کا قصہ یاں کہا کرتا تھا رات

میر تقی میر

شور و شر سے میرے اک فتنہ رہا کرتا تھا رات

اکتوبر 6, 2015میر تقی میر،اساتذہ،غزلراتadmin

دیوان دوم غزل 780

یاد ایامے کہ ہنگامہ رہا کرتا تھا رات

شور و شر سے میرے اک فتنہ رہا کرتا تھا رات

میر تقی میر

سو التفات کم ہے دل آزاریاں بہت

اکتوبر 6, 2015میر تقی میر،اساتذہ،غزلپیاریاں،آزاریاں،بیماریاں،خواریاں،ستمگاریاںadmin

دیوان دوم غزل 779

ہم تم سے چشم رکھتے تھے دلداریاں بہت

سو التفات کم ہے دل آزاریاں بہت

دیکھیں تو کیا دکھائے یہ افراط اشتیاق

لگتی ہیں تیری آنکھیں ہمیں پیاریاں بہت

جب تک ملی جلی سی جفائیں تھیں اٹھ سکیں

کرنے لگے ہو اب تو ستمگاریاں بہت

آزار میں تو عشق کے جاتا ہے بھول جی

یوں تو ہوئیں تھیں یاد میں بیماریاں بہت

شکوہ خراب ہونے کا کیا چاہنے میں میر

ایسی تو اے عزیز ہیں یاں خواریاں بہت

میر تقی میر

ملنا اپنا جو ہوا اس سے سو وہ بات کی بات

اکتوبر 6, 2015میر تقی میر،اساتذہ،غزلمساوات،گھات،بات،خرابات،ذات،رات،طاماتadmin

دیوان دوم غزل 778

دیر کچھ کھنچتی تو کہتے بھی ملاقات کی بات

ملنا اپنا جو ہوا اس سے سو وہ بات کی بات

گفتگو شاہد و مے سے ہے نہ غیبت نہ گلہ

خانقہ کی سی نہیں بات خرابات کی بات

سن کے آواز سگ یار ہوئے ہم خاموش

بولتے واں ہیں جہاں ہووے مساوات کی بات

منھ ادھر اور سخن زیرلبی غیر کے ساتھ

اس فریبندہ کی ناگفتنی ہے گھات کی بات

اس لیے شیخ ہے چپکا کہ پڑے شہر میں شور

ہم سمجھتے ہیں یہ شیادی و طامات کی بات

یہ کس آشفتہ کی جمعیت دل تھی منظور

بال بکھرے ترے منھ پر کہیں ہیں رات کی بات

گفتگو وصفوں سے اس ماہ کے کریے اے میر

کاہش افزا ہے کروں اس کی اگر ذات کی بات

میر تقی میر

رخسار تیرے پیارے ہیں آفتاب مہتاب

اکتوبر 6, 2015میر تقی میر،اساتذہ،غزلمہتاب،ناب،کمیاب،گرداب،پرتاب،احباب،اسباب،خوناب،خواب،سیلابadmin

دیوان دوم غزل 777

برقع میں کیا چھپیں وے ہوویں جنھوں کی یہ تاب

رخسار تیرے پیارے ہیں آفتاب مہتاب

اٹکل ہمیں کو ان نے آخر ہدف بنایا

ہرچند ہم بلاکش تھے ایک تیر پرتاب

کچھ قدر میں نہ جانی غفلت سے رفتگاں کی

آنکھیں سی کھل گئیں اب جب صحبتیں ہوئیں خواب

ان بن ہی کے سبب ہیں اس لالچی سے سارے

یاں ہے فقیری محض واں چاہیے ہے اسباب

اس بحر حسن کے تیں دیکھا ہے آپ میں کیا

جاتا ہے صدقے اپنے جو لحظہ لحظہ گرداب

اچرج ہے یہ کہ مطلق کوئی نہیں ہے خواہاں

جنس وفا اگرچہ ہے گی بہت ہی کمیاب

تھی چشم یہ رکے گا پلکوں سے گریہ لیکن

ہوتی ہے بند کوئی تنکوں سے راہ سیلاب

تو بھی تو مختلط ہو سبزے میں ہم سے ساقی

لے کر بغل میں ظالم میناے بادئہ ناب

نکلی ہیں اب کے کلیاں اس رنگ سے چمن میں

سر جوڑ جوڑ جیسے مل بیٹھتے ہیں احباب

کیا لعل لب کسو کے اے میر چت چڑھے ہیں

چہرے پہ تیرے ہر دم بہتا رہے ہے خوناب

میر تقی میر

جہاں ٹک آن بیٹھے ہم کہا آرام کریے اب

اکتوبر 6, 2015میر تقی میر،اساتذہ،غزلنام،کام،انجام،آرام،اتمام،ارقام،عامadmin

دیوان دوم غزل 776

عجب صحبت ہے کیونکر صبح اپنی شام کریے اب

جہاں ٹک آن بیٹھے ہم کہا آرام کریے اب

ہزاروں خواہش مردہ نے سر دل سے نکالا ہے

قیامت جی پہ ہے دیدار کو ٹک عام کریے اب

بلا آشوب تھا گو جان پر آغاز الفت میں

ہوا سو تو ہوا اندیشۂ انجام کریے اب

بہت کی یاصنم گوئی ہوئے مشہور کافر ہم

وظیفہ کوئی دن اپنا خدا کا نام کریے اب

زباں خامہ کے ہلتے ہی ہزاروں اشک گرتے ہیں

حقیقت اپنے دل کی آہ کیا ارقام کریے اب

کہاں تک کام ناکام اس جفا جو کے لیے مریے

اگر تلوار ہاتھ آوے تو اپنا کام کریے اب

فسانہ شاخ در شاخ اس نہال حسن کے غم کا

کہاں اے میر بے برگ و نوا اتمام کریے اب

میر تقی میر

ہم برے ہی سہی بھلا صاحب

اکتوبر 6, 2015میر تقی میر،اساتذہ،غزلہوا،لکھا،مرا،وا،کہا،کیا،آشنا،بھلا،خدا،رہاadmin

دیوان دوم غزل 775

جو کہو تم سو ہے بجا صاحب

ہم برے ہی سہی بھلا صاحب

سادہ ذہنی میں نکتہ چیں تھے تم

اب تو ہیں حرف آشنا صاحب

نہ دیا رحم ٹک بتوں کے تئیں

کیا کیا ہائے یہ خدا صاحب

بندگی ایک اپنی کیا کم ہے

اور کچھ تم سے کہیے کیا صاحب

مہرافزا ہے منھ تمھارا ہی

کچھ غضب تو نہیں ہوا صاحب

خط کے پھٹنے کا تم سے کیا شکوہ

اپنے طالع کا یہ لکھا صاحب

پھر گئیں آنکھیں تم نہ آن پھرے

دیکھا تم کو بھی واہ وا صاحب

شوق رخ یاد لب غم دیدار

جی میں کیا کیا مرے رہا صاحب

بھول جانا نہیں غلام کا خوب

یاد خاطر رہے مرا صاحب

کن نے سن شعر میر یہ نہ کہا

کہیو پھر ہائے کیا کہا صاحب

میر تقی میر

میں اٹھ گیا ولے نہ اٹھا بیچ سے حجاب

اکتوبر 6, 2015میر تقی میر،اساتذہ،غزلکتاب،انتخاب،آب،اضطراب،جواب،حباب،حجاب،حساب،خواب،خراب،شتاب،شراب،عذابadmin

دیوان دوم غزل 774

تابوت پر بھی میرے نہ آیا وہ بے نقاب

میں اٹھ گیا ولے نہ اٹھا بیچ سے حجاب

اس آفتاب حسن کے جلوے کی کس کو تاب

آنکھیں ادھر کیے سے بھر آتا ہے ووہیں آب

اس عمر برق جلوہ کی فرصت بہت ہے کم

جو کام پیش آوے تجھے اس میں ہو شتاب

غفلت سے ہے غرور تجھے ورنہ ہے بھی کچھ

یاں وہ سماں ہے جیسے کہ دیکھے ہے کوئی خواب

اس موج خیز دہر نے کس کے اٹھائے ناز

کج بھی ہوا نہ خوب کلہ گوشۂ حباب

یہ بستیاں اجڑ کے کہیں بستیاں بھی ہیں

دل ہو گیا خراب جہاں پھر رہا خراب

بیتابیاں بھری ہیں مگر کوٹ کوٹ کر

خرقے میں جیسے برق ہمارے ہے اضطراب

ٹک دل کے نسخے ہی کو کیا کر مطالعہ

اس درس گہ میں حرف ہمارا ہے اک کتاب

مجنوں نے ریگ بادیہ سے دل کے غم گنے

ہم کیا کریں کہ غم ہیں ہمارے تو بے حساب

کاش اس کے روبرو نہ کریں مجھ کو حشر میں

کتنے مرے سوال ہیں جن کا نہیں جواب

شاید کہ ہم کو بوسہ بہ پیغام دست دے

پھرتا ہے بیچ میں تو بہت ساغر شراب

ہے ان بھوئوں میں خال کا نقطہ دلیل فہم

کی ہے سمجھ کے بیت کسو نے یہ انتخاب

گذرے ہے میر لوٹتے دن رات آگ میں

ہے سوز دل سے زندگی اپنی ہمیں عذاب

میر تقی میر

ہے فرض عین رونا دل کا گداز واجب

اکتوبر 6, 2015میر تقی میر،اساتذہ،غزلنماز،گداز،امتیاز،احتراز،سازadmin

دیوان دوم غزل 773

عشاق کے تئیں ہے عجز و نیاز واجب

ہے فرض عین رونا دل کا گداز واجب

یوں سرفرو نہ لاوے ناداں کوئی وگرنہ

رہنا سجود میں ہے جیسے نماز واجب

ناسازی طبیعت ایسی پھر اس کے اوپر

ہے ہر کسو سے مجھ کو ناچار ساز واجب

لڑکا نہیں رہا تو جو کم تمیز ہووے

عشق و ہوس میں اب ہے کچھ امتیاز واجب

صرفہ نہیں ہے مطلق جان عزیز کا بھی

اے میر تجھ سے ظالم ہے احتراز واجب

میر تقی میر

ہر روز دل کو سوز ہے ہر شب تعب ہے اب

اکتوبر 6, 2015میر تقی میر،اساتذہ،غزلڈھب،بلب،تعب،سبب،شب،طلب،عجب،غضبadmin

دیوان دوم غزل 772

جیسا مزاج آگے تھا میرا سو کب ہے اب

ہر روز دل کو سوز ہے ہر شب تعب ہے اب

سدھ کچھ سنبھالتے ہی وہ مغرور ہو گیا

ہر آن بے دماغی و ہر دم غضب ہے اب

دوری سے اس کی آہ عجب حال میں ہیں لوگ

کچھ بھی جو پاس وہ نہ کرے تو عجب ہے اب

طاقت کہ جس سے تاب جفا تھی سو ہوچکی

تھوڑی سی کوفت میں بھی بہت سا تعب ہے اب

دریا چلا ہے آج تو بوس و کنار کا

گر جی چلاوے کوئی دوانہ تو ڈھب ہے اب

جاں بخشیاں جو پیشتر از خط کیا کیے

ان ہی لبوں سے خلق خدا جاں بلب ہے اب

رنجش کی وجہ آگے تو ہوتی بھی تھی کوئی

روپوش ہم سے یار جو ہے بے سبب ہے اب

نے چاہ وہ اسے ہے نہ مجھ کو ہے وہ دماغ

جانا مرا ادھر کو بشرط طلب ہے اب

جاتا ہوں دن کو ملنے تو کہتا ہے دن ہے میر

جو شب کو جایئے تو کہے ہے کہ شب ہے اب

میر تقی میر

دیکھ اس کو بھر بھر آوے ہے سب کے دہن میں آب

اکتوبر 6, 2015میر تقی میر،اساتذہ،غزللگن،چمن،یمن،کفن،بن،جلن،دہن،ذقن،سخنadmin

دیوان دوم غزل 771

شبنم سے کچھ نہیں ہے گل و یاسمن میں آب

دیکھ اس کو بھر بھر آوے ہے سب کے دہن میں آب

لو سدھ شتاب فاختۂ گریہ ناک کی

آیا نہیں ہے دیر سے جوے چمن میں آب

سوزش بہت ہو دل میں تو آنسو کو پی نہ جا

کرتا ہے کام آگ کا ایسی جلن میں آب

تھا گوش زد کہ گوروں میں لگ لگ اٹھے ہے آگ

یاں دل بھرے ہوئے کے سبب ہے کفن میں آب

جی ڈوب جائے دیکھیں جہاں بھر نظر ادھر

تم کہتے ہو نہیں مرے چاہ ذقن میں آب

لب تشنگان عشق کے ہیں کام کے وہ لعل

کیا آپ کو جو ہووے عقیق یمن میں آب

تب قیس جنگلوں کے تئیں آگ دے گیا

ہم بھر چلے ہیں رونے سے اب سارے بن میں آب

سن سوز دل کو میرے بہت روئی رات شمع

بیرون بزم لائے ہیں بھر بھر لگن میں آب

دیکھو تو کس روانی سے کہتے ہیں شعر میر

در سے ہزار چند ہے ان کے سخن میں آب

میر تقی میر

تیر و کماں ہے ہاتھ میں سینہ نشاں ہے اب

اکتوبر 6, 2015میر تقی میر،اساتذہ،غزلناتواں،نشاں،اماں،جہاں،جواں،رواں،زباں،سماں،عیاںadmin

دیوان دوم غزل 770

وہ جو کشش تھی اس کی طرف سے کہاں ہے اب

تیر و کماں ہے ہاتھ میں سینہ نشاں ہے اب

اتنا بھی منھ چھپانا خط آئے پہ وجہ کیا

لڑکا نہیں ہے نام خدا تو جواں ہے اب

پھول اس چمن کے دیکھتے کیا کیا جھڑے ہیں ہائے

سیل بہار آنکھوں سے میری رواں ہے اب

جن و ملک زمین و فلک سب نکل گئے

بارگران عشق و دل ناتواں ہے اب

نکلی تھی اس کی تیغ ہوئے خوش نصیب لوگ

گردن جھکائی میں تو سنا یہ اماں ہے اب

زردی رنگ ہے غم پوشیدہ پر دلیل

دل میں جو کچھ ہے منھ سے ہمارے عیاں ہے اب

پیش از دم سحر مرا رونا لہو کا دیکھ

پھولے ہے جیسے سانجھ وہی یاں سماں ہے اب

نالاں ہوئی کہ یاد ہمیں سب کو دے گئی

گلشن میں عندلیب ہماری زباں ہے اب

برسوں ہوئے گئے اسے پر بھولتا نہیں

یادش بخیر میر رہے خوش جہاں ہے اب

میر تقی میر

دیکھیے کیا گل کھلے ہے اور اب

اکتوبر 6, 2015میر تقی میر،اساتذہ،غزلاور،دور،غورadmin

دیوان دوم غزل 769

داغ ہوں جلتا ہے دل بے طور اب

دیکھیے کیا گل کھلے ہے اور اب

زخم دل غائر ہو پہنچا تا جگر

تم لگے کرنے ہماری غور اب

شعر پڑھتے پھرتے ہیں سب میر کے

اس قلمرو میں ہے ان کا دور اب

میر تقی میر

مجھ دل زدہ کو نیند نہ آئی تمام شب

اکتوبر 6, 2015میر تقی میر،اساتذہ،غزللڑائی،نمائی،آئی،اٹھائی،دکھائی،درائی،سرائیadmin

دیوان دوم غزل 768

اندوہ سے ہوئی نہ رہائی تمام شب

مجھ دل زدہ کو نیند نہ آئی تمام شب

جب میں شروع قصہ کیا آنکھیں کھول دیں

یعنی تھی مجھ کو چشم نمائی تمام شب

چشمک چلی گئی تھی ستاروں کی صبح تک

کی آسماں نے دیدہ درائی تمام شب

بخت سیہ نے دیر میں کل یاوری سی کی

تھی دشمنوں سے اس کو لڑائی تمام شب

بیٹھے ہی گذری وعدے کی شب وہ نہ آپھرا

ایذا عجب طرح کی اٹھائی تمام شب

سناہٹے سے دل سے گذر جائیں سو کہاں

بلبل نے گو کی نالہ سرائی تمام شب

تارے سے میری پلکوں پہ قطرے سرشک کے

دیتے رہے ہیں میر دکھائی تمام شب

میر تقی میر

اس سیہ خانے میں چراغ جلا

اکتوبر 6, 2015میر تقی میر،اساتذہ،غزلچراغ،دماغadmin

دیوان دوم غزل 767

عشق سے دل پہ تازہ داغ جلا

اس سیہ خانے میں چراغ جلا

میر کی گرمی تم سے اچرج ہے

کس سے ملتا ہے یہ دماغ جلا

میر تقی میر

رہ گیا دیکھ رفو چاک مرے سینے کا

اکتوبر 6, 2015میر تقی میر،اساتذہ،غزلکینے،پینے،جینے،سینےadmin

دیوان دوم غزل 766

رکھتا تھا ہاتھ میں سررشتہ بہت سینے کا

رہ گیا دیکھ رفو چاک مرے سینے کا

اے طپش لوہو پیے میرا جو تو جھوٹ کہے

کس سے یہ قاعدہ سیکھا ہے لہو پینے کا

اس میں حیران ہوں کس کس کا گلہ تجھ سے کروں

بدگمانی کا تغافل کا ترے کینے کا

میر کی نبض پہ رکھ ہاتھ لگا کہنے طبیب

آج کی رات یہ بیمار نہیں جینے کا

میر تقی میر

نہیں کیا سیل اشک اس پر بہوں گا

اکتوبر 6, 2015میر تقی میر،اساتذہ،غزلہوں،مررہوں،کہوں،بہوں،رہوںadmin

دیوان دوم غزل 765

سمندر کا میں کیوں احساں سہوں گا

نہیں کیا سیل اشک اس پر بہوں گا

نہ تو آوے نہ جاوے بے قراری

یوں ہی اک دن سنا میں مر رہوں گا

ترے غم کے ہیں خواہاں سب نہ کھا غم

کمی کیا ہو گی جو اک میں نہ ہوں گا

نہ وہ آوے نہ جاوے بے قراری

کسو دن میر یوں ہی مررہوں گا

اگر جیتا رہا میں میر اے یار

تو شب کو موبمو قصہ کہوں گا

میر تقی میر

یعنی جدائی کا ہم صدمہ بڑا اٹھایا

اکتوبر 6, 2015میر تقی میر،اساتذہ،غزلقضایا،لگایا،چھپایا،کھایا،پایا،آیا،اٹھایا،بنایا،جگایا،دکھایا،سلایا،سکھایاadmin

دیوان دوم غزل 764

یہ چوٹ کھائی ایسی دل پر کہ جی گنوایا

یعنی جدائی کا ہم صدمہ بڑا اٹھایا

مدت میں وہ ہوا شب ہم بستر آ کے میرا

خوابیدہ طالعوں نے اک خواب سا دکھایا

الجھائو پڑ گیا سو سلجھی نہ اپنی اس کی

جھگڑے رہے بہت سے گذرے بہت قضایا

آئینہ رو ہمارا آیا نہ نزع میں بھی

وقت اخیر ان نے کیا خوب منھ چھپایا

اس بے مروتی کو کیا کہتے ہیں بتائو

ہم مارے بھی گئے پر وہ نعش پر نہ آیا

وہ روے خوب اب کے ہرگز گیا نہ دل سے

جب گل کھلا چمن میں تب داغ ہم نے کھایا

خلطہ ہمارا اس کا حیرت ہی کی جگہ ہے

ڈھونڈا جہاں ہم اس کو واں آپ کو ہی پایا

طرز نگہ سے اس کی بے ہوش کیا ہوں میں ہی

ان مست انکھڑیوں نے بہتیروں کو سلایا

آنکھیں کھلیں تو دیکھا جو کچھ نہ دیکھنا تھا

خواب عدم سے ہم کو کاہے کے تیں جگایا

باقی نہیں رہا کچھ گھٹتے ہی گھٹتے ہم میں

بیماری دلی نے چنگا بہت بنایا

تونے کہ پائوں دل سے باہر نہیں رکھا ہے

عیارپن یہ کن نے تیرے تئیں سکھایا

کس دن ملائمت کی اس بت نے میر ہم سے

سختی کھنچے نہ کیونکر پتھر سے دل لگایا

میر تقی میر

ہو گئی عید تو گلے نہ ملا

اکتوبر 6, 2015میر تقی میر،اساتذہ،غزلملا،چھلا،کھلا،پلاadmin

دیوان دوم غزل 763

عید آئندہ تک رہے گا گلا

ہو گئی عید تو گلے نہ ملا

ڈوبے لوہو میں دیکھتے سرخار

حیف کوئی بھی آبلہ نہ چھلا

ابر جاتا رہا رہیں بوندیں

اب تو ساقی مجھے شراب پلا

میر افسردہ دل چمن میں پھرا

غنچۂ دل کہیں نہ اس کا کھلا

میر تقی میر

چلا عشق خواری کو ممتاز کرتا

اکتوبر 6, 2015میر تقی میر،اساتذہ،غزلممتاز،ناز،انداز،آواز،اعجاز،جانباز،سازadmin

دیوان دوم غزل 762

رہا میں تو عزت کا اعزاز کرتا

چلا عشق خواری کو ممتاز کرتا

نہ ہوتا میں حسرت میں محتاج گریہ

جو کچھ آنسوئوں کو پس انداز کرتا

نہ ٹھہرا مرے پاس دل ورنہ اب تک

اسے ایسا ہی میں تو جانباز کرتا

جو جانوں کہ درپے ہے ایسا وہ دشمن

تو کاہے کو الفت سے میں ساز کرتا

تو تمکین سے کچھ نہ بولا وگرنہ

مسیحا صنم ترک اعجاز کرتا

گلوگیر ہی ہو گئی یاوہ گوئی

رہا میں خموشی کو آواز کرتا

زیارت گہ کبک تو ہو بلا سے

ٹک آ میر کی خاک پر ناز کرتا

میر تقی میر

کھب گئی جی میں تیری بانکی ادا

اکتوبر 6, 2015میر تقی میر،اساتذہ،غزلکی،بانکیadmin

دیوان دوم غزل 761

اے نکیلے یہ تھی کہاں کی ادا

کھب گئی جی میں تیری بانکی ادا

جادو کرتے ہیں اک نگاہ کے بیچ

ہائے رے چشم دلبراں کی ادا

بات کہنے میں گالیاں دے ہے

سنتے ہو میرے بدزباں کی ادا

دل چلے جائے ہیں خرام کے ساتھ

دیکھی چلنے میں ان بتاں کی ادا

خاک میں مل کے میر ہم سمجھے

بے ادائی تھی آسماں کی ادا

میر تقی میر

پردہ رہا ہے کون سا ہم سے حجاب کیا

اکتوبر 6, 2015میر تقی میر،اساتذہ،غزلکباب،پرآب،اضطراب،جواب،حباب،حجاب،حساب،خراب،شتاب،عذابadmin

دیوان دوم غزل 760

منھ پر اس آفتاب کے ہے یہ نقاب کیا

پردہ رہا ہے کون سا ہم سے حجاب کیا

اے ابرتر یہ گریہ ہمارا ہے دیدنی

برسے ہے آج صبح سے چشم پرآب کیا

دم گنتے گنتے اپنی کوئی جان کیوں نہ دو

وہ پاس آن بیٹھے کسو کے حساب کیا

سو بار اس کے کوچے تلک جاتے ہیں چلے

دل ہے اگر بجا تو یہ ہے اضطراب کیا

بس اب نہ منھ کھلائو ہمارا ڈھکے رہو

محشر کو ہم سوال کریں تو جواب کیا

دوزخ سو عاشقوں کو تو دوزخ نہیں رہا

اب واں گئے پہ ٹھہرے ہے دیکھیں عذاب کیا

ہم جل کے ایک راکھ کی ڈھیری بھی ہو گئے

ہے اب تکلف آگے جلے گا کباب کیا

ہستی ہے اپنے طور پہ جوں بحر جوش میں

گرداب کیسا موج کہاں ہے حباب کیا

دیکھا پلک اٹھاکے تو پایا نہ کچھ اثر

اے عمر برق جلوہ گئی تو شتاب کیا

ہر چند میر بستی کے لوگوں سے ہے نفور

پر ہائے آدمی ہے وہ خانہ خراب کیا

میر تقی میر

اب کے مجھے بہار سے آگے جنوں ہوا

اکتوبر 6, 2015میر تقی میر،اساتذہ،غزلفسوں،نموں،نیلگوں،جنوں،خوں،زبوں،شگوںadmin

دیوان دوم غزل 759

اندوہ و غم کے جوش سے دل رک کے خوں ہوا

اب کے مجھے بہار سے آگے جنوں ہوا

اچھا نہیں ہے رفتن رنگیں بھی اس قدر

سنیو کہ اس کی چال پر اک آدھ خوں ہوا

جی میں تھا خوب جاکے خرابے میں رویئے

سیلاب آیا آ کے چلا کیا شگوں ہوا

نخچیرگاہ عشق میں افراط صید سے

روح الامیں کا نام شکار زبوں ہوا

ہوں داغ نازکی کہ کیا تھا خیال بوس

گلبرگ سا وہ ہونٹ جو تھا نیلگوں ہوا

میں دور ہوں اگرچہ برابر ہوں خاک سے

اس رہ میں نقش پا ہی مرا رہ نموں ہوا

میر ان نے سرگذشت سنی ساری رات کو

افسانہ عاشقی کا ہماری فسوں ہوا

میر تقی میر

کھینچے ایذا ہمیشہ کس کی بلا

اکتوبر 6, 2015میر تقی میر،اساتذہ،غزلوفا،بلا،رہاadmin

دیوان دوم غزل 758

چاک کر سینہ دل میں پھینک دیا

کھینچے ایذا ہمیشہ کس کی بلا

تم کو جیتا رکھے خدا اے بتاں

مر گئے ہم تو کرتے کرتے وفا

اٹھ گیا میر وہ جو بالیں سے

پھر مری جان مجھ میں کچھ نہ رہا

میر تقی میر

ہوکے عاشق بہت میں پچھتایا

اکتوبر 6, 2015میر تقی میر،اساتذہ،غزللایا،پچھتایا،آیا،سایاadmin

دیوان دوم غزل 757

دل گیا مفت اور دکھ پایا

ہوکے عاشق بہت میں پچھتایا

مر گئے پر بھی سنگ سار کیا

نخل ماتم مرا یہ پھل لایا

صحن میں میرے اے گل مہتاب

کیوں شگوفہ تو کھلنے کا لایا

یہ شب ہجر ہے کھڑی نہ رہے

ہو سفیدی کا جس جگہ سایا

جب سے بے خود ہوا ہوں اس کو دیکھ

آپ میں میر پھر نہیں آیا

میر تقی میر

گل سرخ اک زرد رخسار تھا

اکتوبر 6, 2015میر تقی میر،اساتذہ،غزلیار،گنہگار،گرفتار،پیار،خریدار،رخسار،سروکارadmin

دیوان دوم غزل 756

چمن بھی ترا عاشق زار تھا

گل سرخ اک زرد رخسار تھا

گئی نیند شیون سے بلبل کی رات

کہیں دل ہمارا گرفتار تھا

قد یار کے آگے سرو چمن

کھڑا دور جیسے گنہگار تھا

یہی جنس دل کی گراں قدر تھی

ولے جب تلک تو خریدار تھا

بہت روئے ہم شبنم و گل کو دیکھ

کہ چسپاں ہمیں بھی کہیں پیار تھا

مجھے اے دل چاک کیا شانہ سا

کسو زلف سے کچھ سروکار تھا

گیا میر یاں سے کروگے جو یاد

کہو گے کہ مسکیں عجب یار تھا

میر تقی میر

گردن شیشہ ہی میں دست رہا

اکتوبر 6, 2015میر تقی میر،اساتذہ،غزلمست،پست،بست،خست،دست،شکستadmin

دیوان دوم غزل 755

میں جوانی میں مے پرست رہا

گردن شیشہ ہی میں دست رہا

در میخانہ میں مرے سر پر

ظل ممدود دار بست رہا

سر پہ پتھر جنوں میں کب نہ پڑے

یہ سبو ثابت شکست رہا

ہاتھ کھینچا سو پیر ہوکر جب

تب گنہ کرنے کا نہ دست رہا

آنسو پی پی گیا جو برسوں میں

دل درونے میں آب خست رہا

جب کہو تب بلند کہیے اسے

قد خوباں کا سرو پست رہا

میر کے ہوش کے ہیں ہم عاشق

فصل گل جب تلک تھی مست رہا

میر تقی میر

طاق بلند پر اسے سب نے اٹھا رکھا

اکتوبر 6, 2015میر تقی میر،اساتذہ،غزللکھا،لگا،مزہ،پا،اٹھا،بنا،جدا،دبا،روا،سلاadmin

دیوان دوم غزل 754

حلقہ ہوئی وہ زلف کماں کو چھپا رکھا

طاق بلند پر اسے سب نے اٹھا رکھا

اس مہ سے دل کی لاگ وہی متصل رہی

گو چرخ نے بہ صورت ظاہر جدا رکھا

گڑوا دیا ہو مار کر اک دو کو تو کہوں

کب ان نے خون کر نہ کسو کا دبا رکھا

ٹک میں لگا تھا اس نمکی شوخ کے گلے

چھاتی کے میرے زخموں نے برسوں مزہ رکھا

کاہے کو آئے چوٹ کوئی دل پہ شیخ کے

اس بوالہوس نے اپنے تئیں تو بچا رکھا

ہم سر ہی جاتے عشق میں اکثر سنا کیے

اس راہ خوفناک میں کیوں تم نے پا رکھا

آزار دل نہیں ہے کسو دین میں درست

کیا جانوں ان بتوں نے ستم کیوں روا رکھا

کیا میں ہی محو چشمک انجم ہوں خلق کو

اس مہ نے ایک جھمکی دکھاکر لگا رکھا

کیا زہر چشم یار کو کوئی بیاں کرے

جس کی طرف نگاہ کی اس کو سلا رکھا

ہر چند شعر میر کا دل معتقد نہ تھا

پر اس غزل کو ہم نے بھی سن کر لکھا رکھا

میر تقی میر

طرف ہوا نہ کبھو ابر دیدئہ تر کا

اکتوبر 6, 2015میر تقی میر،اساتذہ،غزلقلندر،لاغر،گھر،پر،پرور،بستر،تر،دلبر،در،سمندر،ستمگر،شناورadmin

دیوان دوم غزل 753

ٹپکتی پلکوں سے رومال جس گھڑی سرکا

طرف ہوا نہ کبھو ابر دیدئہ تر کا

کبھو تو دیر میں ہوں میں کبھو ہوں کعبے میں

کہاں کہاں لیے پھرتا ہے شوق اس در کا

غم فراق سے پھر سوکھ کر ہوا کانٹا

بچھا جو پھول اٹھا کوئی اس کے بستر کا

اسیر جرگے میں ہوجائوں میں تو ہوجائوں

وگرنہ قصد ہو کس کو شکار لاغر کا

ہمیں کہ جلنے سے خوگر ہیں آگ میں ہے عیش

محیط میں تو تلف ہوتا ہے سمندر کا

قریب خط کا نکلنا ہوا سو خط موقوف

غبار دور ہو کس طور میرے دلبر کا

بتا کے کعبے کا رستہ اسے بھلائوں راہ

نشاں جو پوچھے کوئی مجھ سے یار کے گھر کا

کسو سے مل چلے ٹک وہ تو ہے بہت ورنہ

سلوک کاہے کو شیوہ ہے اس ستمگر کا

شکستہ بالی و لب بستگی پر اب کی نہ جا

چمن میں شور مرا اب تلک بھی ہے پر کا

تلاش دل نہیں کام آتی اس زنخ میں گئے

کہ چاہ میں تو ہے مرنا برا شناور کا

پھرے ہے خاک ملے منھ پہ یا نمد پہنے

یہ آئینہ ہے نظر کردہ کس قلندر کا

نہ ترک عشق جو کرتا تو میر کیا کرتا

جفا کشی نہیں ہے کام ناز پرور کا

میر تقی میر

سختیاں جو میں بہت کھینچیں سو دل پتھر ہوا

اکتوبر 6, 2015میر تقی میر،اساتذہ،غزلمسطر،چکر،کر،گھر،پتھر،پر،اودھر،اکثر،بہتر،باہر،ترadmin

دیوان دوم غزل 752

پندگو مشفق عبث میرا نصیحت گر ہوا

سختیاں جو میں بہت کھینچیں سو دل پتھر ہوا

گاڑ کر مٹی میں روے عجز کیا ہم ہی موئے

خون اس کے رہگذر کی خاک پر اکثر ہوا

اب اٹھا جاتا نہیں مجھ پاس پھر ٹک بیٹھ کر

گرد اس کے جو پھرا سر کو مرے چکر ہوا

کب کھبا جاتا تھا یوں آنکھوں میں جیسا صبح تھا

پھول خوش رنگ اور اس کے فرش پر بچھ کر ہوا

کیا سنی تم نے نہیں بدحالی فرہاد و قیس

کون سا بیمار دل کا آج تک بہتر ہوا

کون کرتا ہے طرف مجھ عاشق بیتاب کی

صورت خوش جن نے دیکھی اس کی سو اودھر ہوا

جل گیا یاقوت اس کے لعل لب جب ہل گئے

گوہر خوش آب انداز سخن سے تر ہوا

کیا کہوں اب کے جنوں میں گھر کا بھی رہنا گیا

کام جو مجھ سے ہوا سو عقل سے باہر ہوا

شب نہ کرتا شور اس کوچے میں گر میں جانتا

اس کی بے خوابی سے ہنگامہ مرے سر پر ہوا

ہووے یارب ان سیہ رو آنکھوں کا خانہ خراب

یک نظر کرتے ہی میرے دل میں اس کا گھر ہوا

استخواں سب پوست سے سینے کے آتے ہیں نظر

عشق میں ان نوخطوں کے میر میں مسطر ہوا

میر تقی میر

ایسی طپش سے دل کی کوئی جگر رہے گا

اکتوبر 6, 2015میر تقی میر،اساتذہ،غزلنظر،کر،گھر،اگر،اثر،بھر،جگر،خبر،دوپہرadmin

دیوان دوم غزل 751

بے طاقتی میں تو تو اے میر مر رہے گا

ایسی طپش سے دل کی کوئی جگر رہے گا

کیا ہے جو راہ دل کی طے کرتے مر گئے ہم

جوں نقش پا ہمارا تا دیر اثر رہے گا

مت کر لڑکپن اتنا خونریزی میں ہماری

اس طور لوہو میں تو دامن کو بھر رہے گا

آگاہ پائے ہم نے کھوئے گئے سے یعنی

پہنچی خبر ادھر کی دل بے خبر رہے گا

فردا کا سوچ تجھ کو کیا آج ہی پڑا ہے

کل کی سمجھیو کل ہی کل تو اگر رہے گا

لوگوں کا پاس ہم کو مارے رکھے ہے ورنہ

ماتم میں دل کے شیون دو دوپہر رہے گا

پایان کار دیکھیں کیا ہووے دل کی صورت

ایسا ہی جو وہ چہرہ پیش نظر رہے گا

اب رفتگی رویہ اپنا کیا ہے میں نے

میرا یہ ڈھب دلوں میں کچھ راہ کر رہے گا

ہم کوئی بیت جاکر اس ہی کے منھ سنیں گے

وحشت زدہ کسو دن گر میر گھر رہے گا

میر تقی میر

سگ یار آدم گری کر گیا

اکتوبر 6, 2015میر تقی میر،اساتذہ،غزلمر،ور،کیدھر،کر،گھرadmin

دیوان دوم غزل 750

شب رفتہ میں اس کے در پر گیا

سگ یار آدم گری کر گیا

شکستہ دل عشق کی جان کیا

نظر پھیری تونے تو وہ مر گیا

ہوئے یار کیا کیا خراب اس بغیر

وہ کس خانہ آباد کے گھر گیا

کشندہ تھا لڑکا ہی ناکردہ خوں

مجھے دیکھ کر محتضر ڈر گیا

بہت رفتہ رہتے ہو تم اس کے اب

مزاج آپ کا میر کیدھر گیا

میر تقی میر

کام اس شوق کے ڈوبے ہوئے کا پار کیا

اکتوبر 6, 2015میر تقی میر،اساتذہ،غزلہموار،یار،گرفتار،پار،اظہار،بیمار،بیزار،بار،خریدارadmin

دیوان دوم غزل 749

جس پہ اس موج سی شمشیر کا اک وار کیا

کام اس شوق کے ڈوبے ہوئے کا پار کیا

آگیا عشق میں جو پیش نشیب اور فراز

ہوکے میں خاک برابر اسے ہموار کیا

کیا کروں جنس وفا پھیرے لیے جاتا ہوں

بخت بد نے نہ اسے دل کا خریدار کیا

اتفاق ایسے پڑے ہم تو منافق ٹھہرے

چرخ ناساز نے غیروں سے اسے یار کیا

ایسے آزار اٹھانے کا ہمیں کب تھا دماغ

کوفت نے دل کی تو جینے سے بھی بیزار کیا

جی ہی جاتے سنے ہیں عشق کے مشہور ہوئے

کیا کیا ہم نے کہ اس راز کو اظہار کیا

دیکھے اس ماہ کو جو کتنے مہینے گذرے

بڑھ گئی کاہش دل ایسی کہ بیمار کیا

نالۂ بلبل بے دل ہے پریشان بہت

موسم گل نے مگر رخت سفر بار کیا

میر اے کاش زباں بند رکھا کرتے ہم

صبح کے بولنے نے ہم کو گرفتار کیا

میر تقی میر

اس قدر حال ہمارا نہ پریشاں ہوتا

اکتوبر 6, 2015میر تقی میر،اساتذہ،غزلمسلماں،نقصاں،ویراں،گریباں،پریشاں،انساں،جنباں،حیراں،طوفاںadmin

دیوان دوم غزل 748

ربط دل زلف سے اس کی جو نہ چسپاں ہوتا

اس قدر حال ہمارا نہ پریشاں ہوتا

ہاتھ دامن میں ترے مارتے جھنجھلاکے نہ ہم

اپنے جامے میں اگر آج گریباں ہوتا

میری زنجیر کی جھنکار نہ کوئی سنتا

شور مجنوں نہ اگر سلسلہ جنباں ہوتا

ہر سحر آئینہ رہتا ہے ترا منھ تکتا

دل کی تقلید نہ کرتا تو نہ حیراں ہوتا

وصل کے دن سے بدل کیونکے شب ہجراں ہو

شاید اس طور میں ایام کا نقصاں ہوتا

طور اپنے پہ جو ہم روتے تو پھر عالم میں

دیکھتے تم کہ وہی نوح کا طوفاں ہوتا

دل میں کیا کیا تھا ہمارے جو نہ ہوجاتی یاس

یہ نگر کاہے کو اس طرح سے ویراں ہوتا

خاک پا ہو کے ترے قد کا چمن میں رہتا

سرو اتنا نہ اکڑتا اگر انساں ہوتا

میر بھی دیر کے لوگوں ہی کی سی کہنے لگا

کچھ خدا لگتی بھی کہتا جو مسلماں ہوتا

میر تقی میر

ہوا وہ بے مروت بے وفا ہرگز نہ یار اپنا

اکتوبر 6, 2015میر تقی میر،اساتذہ،غزلمار،یار،گذار،انتظار،اختیار،اشتہار،اعتبار،بار،روزگار،غبارadmin

دیوان دوم غزل 747

ہوئیں رسوائیاں جس کے لیے چھوٹا دیار اپنا

ہوا وہ بے مروت بے وفا ہرگز نہ یار اپنا

خدا جانے ہمیں اس بے خودی نے کس طرف پھینکا

کہ مدت ہو گئی ہم کھینچتے ہیں انتظار اپنا

ذلیل اس کی گلی میں ہوں تو ہوں آزردگی کیسی

کہ رنجش اس جگہ ہووے جہاں ہو اعتبار اپنا

اگرچہ خاک اڑائی دیدئہ تر نے بیاباں کی

ولے نکلا نہ خاطر خواہ رونے سے غبار اپنا

کہا بد وضع لوگوں نے جو دیکھا رات کو ملتے

ہوا صحبت میں ان لڑکوں کی ضائع روزگار اپنا

کریں جو ترک عزلت واسطے مشہور ہونے کے

مگر شہروں میں کم ہے جیسے عنقا اشتہار اپنا

دل بے تاب و بے طاقت سے کچھ چلتا نہیں ورنہ

کھڑا بھی واں نہ جاکر ہوں اگر ہو اختیار اپنا

عجب ہم بے بصیرت ہیں کہاں کھولا ہے بار آکر

جہاں سے لوگ سب رخت سفر کرتے ہیں بار اپنا

نہ ہو یوں میکدہ مسجد سا پر واں ہوش جاتے ہیں

ہوا ہے دونوں جاگہ ایک دو باری گذار اپنا

سراپا آرزو ہم لوگ ہیں کاہے کو رندوں میں

رہے ہیں اب تلک جیتے ولے دل مار مار اپنا

گیا وہ بوجھ سب ہلکے ہوئے ہم میر آخر کو

مناسب تھا نہ جانا اس گلی میں بار بار اپنا

میر تقی میر

اگرچہ آسماں تک شور جاوے ہم فقیروں کا

اکتوبر 6, 2015میر تقی میر،اساتذہ،غزلفقیروں،چیروں،گیروں،اسیروں،تیروں،صفیروںadmin

دیوان دوم غزل 746

فرو آتا نہیں سر ناز سے اب کے امیروں کا

اگرچہ آسماں تک شور جاوے ہم فقیروں کا

تبسم سحر ہے جب پان سے لب سرخ ہوں اس کے

دلوں میں کام کر جاتا ہے یاں جادو کے تیروں کا

سرکنا اس کے درباں پاس سے ہے شب کو بھی مشکل

سر زنجیر زیر سر رکھے ہے ہم اسیروں کا

گئے بہتوں کے سر لڑکوں نے جو یہ باندھنوں باندھے

شہید اک میں نہیں ان باندھنوں کے سرخ چیروں کا

قفس کے چاک سے دیکھوں ہوں میں تو تنگ آتا ہوں

چمن میں غنچہ ہو آنا گلوں پر ہم صفیروں کا

ہمارے دیکھتے زیرنگیں تھا ملک سب جن کے

کوئی اب نام بھی لیتا نہیں ان ملک گیروں کا

دل پر کو تو ان پلکوں ہی نے سب چھان مارا تھا

کیا میر ان نے خالی یوں ہی ترکش اپنے تیروں کا

میر تقی میر

اے نقش وہم آیا کیدھر خیال تیرا

اکتوبر 6, 2015میر تقی میر،اساتذہ،غزللال،ملال،مآل،بال،جمال،حال،خیال،خال،سالadmin

دیوان دوم غزل 745

کیا تو نمود کس کی کیسا کمال تیرا

اے نقش وہم آیا کیدھر خیال تیرا

کیا ہے جو ہو زنخ زن مہ پاس کا ستارہ

ہے داغ جان عالم ٹھوڑی کا خال تیرا

اے گل مغل بچہ وہ مرزا ہے اس کے آگے

کچھ بھی بھلا لگے ہے منھ لال لال تیرا

تجھ روے خوے فشاں سے انجم ہی کیا خجل ہیں

ہے آفتاب کو بھی اے ماہ سال تیرا

اب صبح پاس گل کے ہوکر نہیں نکلتی

دیکھا نسیم نے بھی شاید جمال تیرا

پہلا قدم ہے انساں پامال مرگ ہونا

کیا جانے رفتہ رفتہ کیا ہو مآل تیرا

ہو گی جو چل سرمو پنہاں نہیں رہے گی

اک دن زبان ہو گا ایک ایک بال تیرا

تفصیل حال میری تھی باعث کدورت

سو جی کو خوش نہ آیا ہرگز ملال تیرا

کچھ زرد زرد چہرہ کچھ لاغری بدن میں

کیا عشق میں ہوا ہے اے میر حال تیرا

میر تقی میر

دل پر رکھا تھا ہاتھ سو منھ زرد ہو گیا

اکتوبر 6, 2015میر تقی میر،اساتذہ،غزلفرد،مرد،گرد،زرد،سردadmin

دیوان دوم غزل 744

سینے میں شوق میر کے سب درد ہو گیا

دل پر رکھا تھا ہاتھ سو منھ زرد ہو گیا

نکلا تھا آج صبح بہت گرم ہو ولے

خورشید اس کو دیکھتے ہی سرد ہو گیا

بے پردہ اس کی شوخی قیامت ہے دیکھیو

یاں خاک سی اڑا دی فلک گرد ہو گیا

کشتی ہر اک فقیر کی بھردی شراب سے

اس دور میں کلال عجب مرد ہو گیا

دفتر لکھے ہیں میر نے دل کے الم کے یہ

یاں اپنے طور و طرز میں وہ فرد ہو گیا

میر تقی میر

ابرو کی تیغ دیکھ مہ عید کٹ گیا

اکتوبر 6, 2015میر تقی میر،اساتذہ،غزلہٹ،لپٹ،کٹ،گھٹ،پھٹ،الٹ،اچٹ،اٹ،بٹ،سمٹadmin

دیوان دوم غزل 743

سنبل تمھارے گیسوئوں کے غم میں لٹ گیا

ابرو کی تیغ دیکھ مہ عید کٹ گیا

عالم میں جاں کے مجھ کو تنزہ تھا اب تو میں

آلودگی جسم سے ماٹی میں اٹ گیا

ظلم و جفا و جور پر اصرار اس قدر

ہٹ دیکھ دیکھ تیری دل اپنا بھی ہٹ گیا

اب وہ سماں نہیں ہے کہ وہ کام جان خلق

مغموم ہم کو دیکھ کے دوڑا لپٹ گیا

دشوار سیتے ہیں گے جو بے ڈھب پھٹے ہے جیب

بے طوریوں سے اس کی دل اپنا تو پھٹ گیا

دامان و جیب دونوں ہوئے ٹکڑے ایک جا

اب کے یہ کام ہاتھ سے میرے سمٹ گیا

خاطر اگر ہو جمع پریشانی بھی نبھے

سو دل تو دو طرف تری زلفوں سے بٹ گیا

ٹک رات اس کے منھ سے ہوا تھا مقابلہ

پھر ماہ چاردہ کو جو دیکھا تو گھٹ گیا

کیا پوچھو ہو نصیب ہمارے الٹ گئے

چل کر ادھر کو یار پھر اودھر الٹ گیا

بلبل کی اور گل کی جو صحبت کی سیر میر

دل اپنا دلبروں کی طرف سے اچٹ گیا

میر تقی میر

واں کام ہی رہا تجھے یاں کام ہوچکا

اکتوبر 6, 2015میر تقی میر،اساتذہ،غزلہنگام،کام،پیغام،آرام،بدنامadmin

دیوان دوم غزل 742

آتے ہی آتے تیرے یہ ناکام ہوچکا

واں کام ہی رہا تجھے یاں کام ہوچکا

یا خط چلے ہی آتے تھے یا حرف ہی نہیں

شاید کہ سادگی کا وہ ہنگام ہوچکا

موسم گیا وہ ترک محبت کا ناصحا

میں اب تو خاص و عام میں بدنام ہوچکا

ناآشناے حرف تھا وہ شوخ جب تبھی

ہم سے تو ترک نامہ و پیغام ہوچکا

تڑپے ہے جب کہ سینے میں اچھلے ہے دو دو ہاتھ

گر دل یہی ہے میر تو آرام ہوچکا

میر تقی میر

دل نے جگر کی اور اشارت کی یاں گرا

اکتوبر 6, 2015میر تقی میر،اساتذہ،غزلمکاں،ناتواں،یاں،آسماں،آشیاں،جہاں،جواںadmin

دیوان دوم غزل 741

کل میں کہا وہ طور کا شعلہ کہاں گرا

دل نے جگر کی اور اشارت کی یاں گرا

منظر خراب ہونے کو ہے چشم تر کا حیف

پھر دید کی جگہ نہیں جو یہ مکاں گرا

روح القدس کو سہل کیا یار نے شکار

اک تیر میں وہ مرغ بلند آشیاں گرا

پہنچایا مجھ کو عجز نے مقصود دل کے تیں

یعنی کہ اس کے در ہی پہ میں ناتواں گرا

شور اک مری نہاد سے تجھ بن اٹھا تھا رات

جس سے کیا خیال کہ یہ آسماں گرا

کیا کم تھا شعلہ شوق کا شعلے سے طور کے

پتھر بھی واں کے جل گئے جاکر جہاں گرا

ڈوبا خیال چاہ زنخداں میں اس کے میر

دانستہ کیوں کنوئیں میں بھلا یہ جواں گرا

میر تقی میر

سوز دروں سے نامہ کباب ورق ہوا

اکتوبر 6, 2015میر تقی میر،اساتذہ،غزلفق،قلق،نسق،ورق،حق،سبق،شفقadmin

دیوان دوم غزل 740

ہنگام شرح غم جگر خامہ شق ہوا

سوز دروں سے نامہ کباب ورق ہوا

بندہ خدا ہے پھر تو اگر گذرے آپ سے

مرتا ہے جو کوئی اسے کہتے ہیں حق ہوا

دل میں رہا نہ کچھ تو کیا ہم نے ضبط شوق

یہ شہر جب تمام لٹا تب نسق ہوا

وہ رنگ وہ روش وہ طرح سب گئی بباد

آتے ہی تیرے باغ میں منھ گل کا فق ہوا

برسوں تری گلی میں چمن ساز جو رہا

سو دیدہ اب گداختہ ہوکر شفق ہوا

لے کر زمیں سے تابہ فلک رک گیا ہے آہ

کس دردمندعشق کو یارب قلق ہوا

اس نو ورق میں میر جو تھا شرح و بسط سے

بیٹھا جو دب کے میں تو ترا اک سبق ہوا

میر تقی میر

پر یہ تیرا نہ امتحان گیا

اکتوبر 6, 2015میر تقی میر،اساتذہ،غزلمکان،مان،چھان،نشان،گمان،امتحان،جوان،جانadmin

دیوان دوم غزل 739

سینکڑوں بیکسوں کا جان گیا

پر یہ تیرا نہ امتحان گیا

واے احوال اس جفاکش کا

عاشق اپنا جسے وہ جان گیا

داغ حرماں ہے خاک میں بھی ساتھ

جی گیا پر نہ یہ نشان گیا

کل نہ آنے میں ایک یاں تیرے

آج سو سو طرف گمان گیا

حرف نشنو کوئی اسے بھی ملا

تب تو میں نے کہا سو مان گیا

دل سے مت جا کہ پھر وہ پچھتایا

ہاتھ سے جس کے یہ مکان گیا

پھرتے پھرتے تلاش میں اس کی

ایک میرا ہی یوں نہ جان گیا

اب جو عیسیٰ ؑ فلک پہ ہے وہ بھی

شوق میں برسوں خاک چھان گیا

کون جی سے نہ جائے گا اے میر

حیف یہ ہے کہ تو جوان گیا

میر تقی میر

جو رفتۂ محبت واقف ہے اس کے ڈھب کا

اکتوبر 6, 2015میر تقی میر،اساتذہ،غزللب،ڈھب،کب،ادب،سب،شب،غضبadmin

دیوان دوم غزل 738

حیراں ہے لحظہ لحظہ طرز عجب عجب کا

جو رفتۂ محبت واقف ہے اس کے ڈھب کا

کہتے ہیں کوئی صورت بن معنی یاں نہیں ہے

یہ وجہ ہے کہ عارف منھ دیکھتا ہے سب کا

نسبت درست جس کی اس رو و مو سے پائی

ہے درہم اور برہم حال اس کے روز و شب کا

افسوس ہے نہیں تو انصاف دوست ورنہ

شایان لطف دشمن شائستہ میں غضب کا

سودائی ایک عالم اس کا بنا پھرے ہے

ہر چند عزلتی ہے وہ خال کنج لب کا

منھ اس کے منھ کے اوپر شام و سحر رکھوں ہوں

اب ہاتھ سے دیا ہے سررشتہ میں ادب کا

کیا آج کل سے اس کی یہ بے توجہی ہے

منھ ان نے اس طرف سے پھیرا ہے میر کب کا

میر تقی میر

ہوا ابر رحمت گنہگار سا

اکتوبر 6, 2015میر تقی میر،اساتذہ،غزلہشیار،یار،گنہگار،پیار،آزار،بیمار،بازار،خار،دیوار،دار،دشوار،عیارadmin

دیوان دوم غزل 737

بندھا رات آنسو کا کچھ تار سا

ہوا ابر رحمت گنہگار سا

کوئی سادہ ہی اس کو سادہ کہے

لگے ہے ہمیں تو وہ عیار سا

محبت ہے یا کوئی جی کا ہے روگ

سدا میں تو رہتا ہوں بیمار سا

گل و سرو اچھے سبھی ہیں ولے

نہ نکلا چمن میں کوئی یار سا

جو ایسا ہی تم ہم کو سمجھو ہو سہل

ہمیں بھی یہ جینا ہے دشوار سا

فلک نے بہت کھینچے آزار لیک

نہ پہنچا بہم اس دل آزار سا

مگر آنکھ تیری بھی چپکی کہیں

ٹپکتا ہے چتون سے کچھ پیار سا

چمن ہووے جو انجمن تجھ سے واں

لگے آنکھ میں سب کی گل خار سا

کھڑے منتظر ضعف جو آگیا

گرا اس کے در پر میں دیوار سا

دکھائوں متاع وفا کب اسے

لگا واں تو رہتا ہے بازار سا

عجب کیا جو اس زلف کا سایہ دار

پھرے راتوں کو بھی پری دار سا

نہیں میر مستانہ صحبت کا باب

مصاحب کرو کوئی ہشیار سا

میر تقی میر

کہ مجھ کو اس کی گلی کا خدا گدا کرتا

اکتوبر 6, 2015میر تقی میر،اساتذہ،غزللگا،چڑھا،وفا،کہا،کیا،گدا،پھرا،اٹھا،بھلا،برا،جلا،جا،دوا،رہا،صداadmin

دیوان دوم غزل 736

کوئی فقیر یہ اے کاشکے دعا کرتا

کہ مجھ کو اس کی گلی کا خدا گدا کرتا

کبھو جو آن کے ہم سے بھی تو ملا کرتا

تو تیرے جی میں مخالف نہ اتنی جا کرتا

چمن میں پھول گل اب کے ہزار رنگ کھلے

دماغ کاش کہ اپنا بھی ٹک وفا کرتا

فقیر بستی میں تھا تو ترا زیاں کیا تھا

کبھو جو آن نکلتا کوئی صدا کرتا

علاج عشق نے ایسا کیا نہ تھا اس کا

جو کوئی اور بھی مجنوں کی کچھ دوا کرتا

قدم کے چھونے سے استادگی مجھی سے ہوئی

کبھو وہ یوں تو مرے ہاتھ بھی لگا کرتا

بدی نتیجہ ہے نیکی کا اس زمانے میں

بھلا کسو سے جو کرتا تو تو برا کرتا

تلاطم آنکھ کے صد رنگ رہتے تھے تجھ بن

کبھو کبھو جو یہ دریاے خوں چڑھا کرتا

کہاں سے نکلی یہ آتش نہ مانتا تھا میں

شروع ربط میں اس کے جو دل جلا کرتا

گلی سے یار کی ہم لے گئے سر پر شور

وگرنہ شام سے ہنگامہ ہی رہا کرتا

خراب مجھ کو کیا دل کی لاگ نے ورنہ

فقیر تکیے سے کاہے کو یوں اٹھا کرتا

گئے پہ تیرے نہ تھا ہم نفس کوئی اے گل

کبھو نسیم سے میں درد دل کہا کرتا

کہیں کی خاک کوئی منھ پہ کب تلک ملتا

خراب و خوار کہاں تک بھلا پھرا کرتا

موئی ہی رہتی تھی عزت مری محبت میں

ہلاک آپ کو کرتا نہ میں تو کیا کرتا

ترے مزاج میں تاب تعب تھی میر کہاں

کسو سے عشق نہ کرتا تو تو بھلا کرتا

میر تقی میر

اس لب خاموش کا قائل ہوا

اکتوبر 6, 2015میر تقی میر،اساتذہ،غزلقائل،گھائل،حائل،زائل،سائلadmin

دیوان دوم غزل 735

لعل پر کب دل مرا مائل ہوا

اس لب خاموش کا قائل ہوا

لڑ گئیں آنکھیں اٹھائی دل نے چوٹ

یہ تماشائی عبث گھائل ہوا

ناشکیبی سے گئی ناموس فقر

عاقبت بوسے کا میں سائل ہوا

ایک تھے ہم وے نہ ہوتے ہست اگر

اپنا ہونا بیچ میں حائل ہوا

میر ہم کس ذیل میں دیکھ اس کی آنکھ

ہوش اہل قدس کا زائل ہوا

میر تقی میر

یوناں کی طرح بستی یہ سب میں ڈبو رہا

اکتوبر 6, 2015میر تقی میر،اساتذہ،غزلڈبو،کھو،گومگو،جو،رو،سو،شوadmin

دیوان دوم غزل 734

طوفان میرے رونے سے آخر کو ہورہا

یوناں کی طرح بستی یہ سب میں ڈبو رہا

بہتوں نے چاہا کہیے پہ کوئی نہ کہہ سکا

احوال عاشقی کا مری گومگو رہا

آخر موا ہی واں سے نکلتا سنا اسے

کوچے میں اس کے جا کے ستم دید جو رہا

آنسو تھما نہ جب سے گیا وہ نگاہ سے

پایان کار آنکھوں کو اپنی میں رو رہا

کیا بے شریک زندگی کی شیخ شہر نے

نبّاش بھی وہی تھا وہی مردہ شو رہا

یاروں نے جل کے مردے سے میرے کیا خطاب

روتے تھے ہم تو دل ہی کو تو جی بھی کھو رہا

جب رات سر پٹکنے نے تاثیر کچھ نہ کی

ناچار میر منڈکری سی مار سو رہا

میر تقی میر

سب درد ہو شدت کا اس دل ہی کو دل ڈالا

اکتوبر 6, 2015میر تقی میر،اساتذہ،غزلمل،مسل،بل،خلل،دلadmin

دیوان دوم غزل 733

اب چھاتی کے جلنے نے کچھ طور بدل ڈالا

سب درد ہو شدت کا اس دل ہی کو دل ڈالا

ہم عاجزوں کا کھونا مشکل نہیں ہے ایسا

کچھ چونٹیوں کو لے کر پائوں تلے مل ڈالا

اٹھکھیلی کی بھی اس کی دل تاب نہیں لاتا

کیا پگڑی کے پیچوں میں لے بالوں کو بل ڈالا

تشویش سے اب خالی کس دن ہے مزاج اپنا

اس دل کی خلش نے بھی کیا آہ خلل ڈالا

مجھ مست کو کیا نسبت اے میر مسائل سے

منھ شیخ کا مسجد میں میں رک کے مسل ڈالا

میر تقی میر

چپکے ہی چپکے ان نے ہمیں جاں بلب کیا

اکتوبر 6, 2015میر تقی میر،اساتذہ،غزلکڈھب،ادب،بلب،تب،جب،سبب،شب،طلب،عجب،غضبadmin

دیوان دوم غزل 732

اس بد زباں نے صرف سخن آہ کب کیا

چپکے ہی چپکے ان نے ہمیں جاں بلب کیا

طاقت سے میرے دل کی خبر تجھ کو کیا نہ تھی

ظالم نگاہ خشم ادھر کی غضب کیا

یکساں کیا نہیں ہے ہمیں خاک رہ سے آج

ایسا ہی کچھ سلوک کیا ان نے جب کیا

عمامہ لے کے شیخ کہیں میکدے سے جا

بس مغبچوں نے حد سے زیادہ ادب کیا

اس رخ سے دل اٹھایا تو زلفوں میں جا پھنسا

القصہ اپنے روز کو ہم نے بھی شب کیا

ظاہر ہوا نہ مجھ پہ کچھ اس ظلم کا سبب

کیا جانوں خون ان نے مرا کس سبب کیا

کچھ آگے آئے ہوتے جو منظور لطف تھا

ہم جی سے اپنے جاچکے تم قصد تب کیا

بچھڑے تمھارے اپنا عجب حال ہو گیا

جس کی نگاہ پڑ گئی ان نے عجب کیا

برسوں سے اپنے دل کی ہے دل میں کہ یار نے

اک دن جدا نہ غیر سے ہم کو طلب کیا

کی زندگی سو وہ کی موئے اب سو اس طرح

جو کام میر جی نے کیا سو کڈھب کیا

میر تقی میر

گوہر تر جوں سرشک آنکھوں سے سب کی گر گیا

اکتوبر 6, 2015میر تقی میر،اساتذہ،غزلچر،کر،گھر،گر،پھر،آخر،سرadmin

دیوان دوم غزل 731

خندئہ دنداں نما کرتا جو وہ کافر گیا

گوہر تر جوں سرشک آنکھوں سے سب کی گر گیا

کیا گذر کوے محبت میں ہنسی ہے کھیل ہے

پائوں رکھا جس نے ٹک اودھر پھر اس کا سر گیا

کیا کوئی زیرفلک اونچا کرے فرق غرور

ایک پتھر حادثے کا آلگا سر چر گیا

نیزہ بازان مژہ میں دل کی حالت کیا کہوں

ایک ناکسبی سپاہی دکھنیوں میں گھر گیا

بعد مدت اس طرف لایا تھا اس کو جذب عشق

بخت کی برگشتگی سے آتے آتے پھر گیا

تیز دست اتنا نہیں وہ ظلم میں اب فرق ہے

یعنی لوہا تھا کڑا تیغ ستم کا کر گیا

سخت ہم کو میر کے مرجانے کا افسوس ہے

تم نے دل پتھر کیا وہ جان سے آخر گیا

میر تقی میر

دامن پکڑ کے رویئے یک دم سحاب کا

اکتوبر 6, 2015میر تقی میر،اساتذہ،غزلکباب،انقلاب،انتخاب،آفتاب،جواب،حباب،خواب،خراب،سحاب،شباب،شراب،عتابadmin

دیوان دوم غزل 730

بالقوہ ٹک دکھایئے چشم پرآب کا

دامن پکڑ کے رویئے یک دم سحاب کا

جو کچھ نظر پڑے ہے حقیقت میں کچھ نہیں

عالم میں خوب دیکھو تو عالم ہے خواب کا

دریا دلی جنھیں ہے نہیں ہوتے کاسہ لیس

دیکھا ہے واژگوں ہی پیالہ حباب کا

شاید کہ قلب یار بھی ٹک اس طرف پھرے

میں منتظر زمانے کے ہوں انقلاب کا

بارے نقاب دن کو جو رکھتا ہے منھ پہ تو

پردہ سا رہ گیا ہے کچھ اک آفتاب کا

تلوار بن نکلتے نہیں گھر سے ایک دم

خوں کر رہو گے تم کسو خانہ خراب کا

یہ ہوش دیکھ آگے مرے ساتھ غیر کے

رکھتا ہے پائوں مست ہو جیسے شراب کا

مجنوں میں اور مجھ میں کرے کیوں نہ فرق عشق

چھپتا نہیں مزہ تو جلے سے کباب کا

رو فرصت جوانی پہ جوں ابر بے خبر

انداز برق کا سا ہے عہد شباب کا

واں سے تو نامہ بر کو ہے کب کا جواب صاف

میں سادگی سے لاگو ہوں خط کے جواب کا

ٹپکاکرے ہے زہر ہی صرف اس نگاہ سے

وہ چشم گھر ہے غصہ و ناز و عتاب کا

لائق تھا ریجھنے ہی کے مصراع قد یار

میں معتقد ہوں میر ترے انتخاب کا

میر تقی میر

تو کام مرا اچھا پردے میں چلا جاتا

اکتوبر 6, 2015میر تقی میر،اساتذہ،غزللگا،چلا،چھپا،کہا،کھپا،کھا،اٹھا،جلا،دکھا،رہاadmin

دیوان دوم غزل 729

آنسو مری آنکھوں میں ہر دم جو نہ آجاتا

تو کام مرا اچھا پردے میں چلا جاتا

اصلح ہے حجاب اس کا ہم شوق کے ماروں سے

بے پردہ جو وہ ہوتا تو کس سے رہا جاتا

طفلی کی ادا تیری جاتی نہیں یہ جی سے

ہم دیکھتے تجھ کو تو تو منھ کو چھپا جاتا

صد شکر کہ داغ دل افسردہ ہوا ورنہ

یہ شعلہ بھڑکتا تو گھر بار جلا جاتا

کہتے تو ہو یوں کہتے یوں کہتے جو وہ آتا

یہ کہنے کی باتیں ہیں کچھ بھی نہ کہا جاتا

ان آنکھوں سے ہم چشمی برجاہے جو میں جل کر

بادام کو کل یارو مجلس ہی میں کھا جاتا

صحبت سگ و آہو کی یک عمر رہی باہم

وہ بھاگتا مجھ سے تو میں اس سے لگا جاتا

گر عشق نہیں ہے تو یہ کیا ہے بھلا مجھ کو

جی خودبخود اے ہمدم کاہے کو کھپا جاتا

جوں ابر نہ تھم سکتا آنکھوں کا مری جھمکا

جوں برق اگر وہ بھی جھمکی سی دکھا جاتا

تکلیف نہ کی ہم نے اس وحشی کو مرنے کی

تھا میر تو ایسا بھی دل جی سے اٹھا جاتا

میر تقی میر

مطلق نہیں ہم سے ساز تیرا

اکتوبر 6, 2015میر تقی میر،اساتذہ،غزلگداز،امتیاز،احتراز،راز،سازadmin

دیوان دوم غزل 728

اللہ رے غرور و ناز تیرا

مطلق نہیں ہم سے ساز تیرا

ہم سے کہ تجھی کو جانتے ہیں

جاتا نہیں احتراز تیرا

مل جن سے شراب تو پیے ہے

کہہ دیتے ہیں وہ ہی راز تیرا

کچھ عشق و ہوس میں فرق بھی کر

کیدھر ہے وہ امتیاز تیرا

کہتے نہ تھے میر مت کڑھاکر

دل ہو نہ گیا گداز تیرا

میر تقی میر

مجھے سیدھیاں وہ سنانے لگا

اکتوبر 6, 2015میر تقی میر،اساتذہ،غزلٹھکانے،آنے،اٹھانے،جانے،دوانے،دکھانے،سنانےadmin

دیوان دوم غزل 727

کجی اس کی جو میں جتانے لگا

مجھے سیدھیاں وہ سنانے لگا

تحمل نہ تھا جس کو ٹک سو وہ میں

ستم کیسے کیسے اٹھانے لگا

رندھے عشق میں کوئی یوں کب تلک

جگر آہ منھ تک تو آنے لگا

پریشاں ہیں اس وقت میں نیک و بد

موا جو کوئی وہ ٹھکانے لگا

کروں یاد اسے ہوں جو میں آپ میں

سو یاں جی ہی اب بھول جانے لگا

پس از عمر اودھر گئی تھی نگاہ

سو آنکھیں وہ مجھ کو دکھانے لگا

نہیں رہتے عاقل علاقے بغیر

کہیں میر دل کو دوانے لگا

میر تقی میر

اب تو چپ بھی رہا نہیں جاتا

اکتوبر 6, 2015میر تقی میر،اساتذہ،غزلنہا،بہا،دہا،رہا،سہاadmin

دیوان دوم غزل 726

کیا کہیں کچھ کہا نہیں جاتا

اب تو چپ بھی رہا نہیں جاتا

غم میں جاتی ہے عمر دہ روزہ

اپنے ہاں سے دہا نہیں جاتا

طاقت دل تلک تعب کھینچے

اب ستم ٹک سہا نہیں جاتا

اس در تر کا حیرتی ہے بحر

تب تو اس سے بہا نہیں جاتا

کب تری رہ میں میر گرد آلود

لوہو میں آ نہا نہیں جاتا

میر تقی میر

ماہ تمام یارو کیا ناتمام نکلا

اکتوبر 6, 2015میر تقی میر،اساتذہ،غزلنام،ناتمام،کام،تھام،خامadmin

دیوان دوم غزل 725

روکش ہوا جو شب وہ بالاے بام نکلا

ماہ تمام یارو کیا ناتمام نکلا

ہو گوشہ گیر شہرت مدنظر اگر ہے

عنقا کی طرح اپنا عزلت سے نام نکلا

تھا جن کو عاشقی میں دعواے پختہ مغزی

سودا انھوں کا آخر دیکھا تو خام نکلا

نومید قیس پایا ناکام کوہکن کو

اس عشق فتنہ گر سے وہ کس کا کام نکلا

کیونکر نہ مر رہے جو بیتاب میر سا ہو

ایک آدھ دن تو گھر سے دل تھام تھام نکلا

میر تقی میر

شاعری تو شعار ہے اپنا

اکتوبر 6, 2015میر تقی میر،اساتذہ،غزلانتظار،اختیار،اشتہار،روزگار،زار،شعار،غبارadmin

دیوان دوم غزل 724

نکتہ مشتاق و یار ہے اپنا

شاعری تو شعار ہے اپنا

بے خودی لے گئی کہاں ہم کو

دیر سے انتظار ہے اپنا

روتے پھرتے ہیں ساری ساری رات

اب یہی روزگار ہے اپنا

دے کے دل ہم جو ہو گئے مجبور

اس میں کیا اختیار ہے اپنا

کچھ نہیں ہم مثال عنقا لیک

شہر شہر اشتہار ہے اپنا

جس کو تم آسمان کہتے ہو

سو دلوں کا غبار ہے اپنا

صرفہ آزار میر میں نہ کرو

خستہ اپنا ہے زار ہے اپنا

میر تقی میر

اس آگ نے بھڑک کر دربست گھر جلایا

اکتوبر 6, 2015میر تقی میر،اساتذہ،غزللگایا،چھپایا،پایا،آیا،اٹھایا،بنایا،بکایا،جلایا،دکھایا،سایاadmin

دیوان دوم غزل 723

سوز دروں سے آخر بھسمنت دل کو پایا

اس آگ نے بھڑک کر دربست گھر جلایا

جی دے کے لیتے ایسے معشوق بے بدل کو

یوسفؑ عزیز دلہا سستا بہت بکایا

زلف سیاہ اس کی جاتی نہیں نظر سے

اس چشم رو سیہ نے روز سیہ دکھایا

نام اس کا سن کے آنسو گر ہی پڑے پلک سے

دل کا لگائو یارو چھپتا نہیں چھپایا

تھا لطف زیست جن سے وے اب نہیں میسر

مدت ہوئی کہ ہم نے جینے سے ہاتھ اٹھایا

مہندی لگی تھی تیرے پائوں میں کیا پیارے

ہنگام خون عاشق سر پر جو تو نہ آیا

یہ پیروی کسو سے کاہے کو ہوسکے ہے

رکھتا ہے داغ ہم کو قامت کا اس کی سایا

دیکھی نہ پیش جاتے ہرگز خردوری میں

دانستہ بائولا ہم اپنے تئیں بنایا

رہتی تھی بے دماغی اک شور ما و من میں

آنکھوں کے مند گئے پر آرام سا تو پایا

گل پھول سے بھی تو جو لیتا ہے منھ کو پھیرے

مکھڑے سے کس کے تونے اے میر دل لگایا

میر تقی میر

کل حال میر دیکھ کے غش مجھ کو آگیا

اکتوبر 6, 2015میر تقی میر،اساتذہ،غزلگیا،آگیاadmin

دیوان دوم غزل 722

یہ رفتگی بھی ہوتی ہے جی ہی چلا گیا

کل حال میر دیکھ کے غش مجھ کو آگیا

کیا کہیے ایک عمر میں وے لب ہلے تھے کچھ

سو بات پان کھاتے ہوئے وہ چبا گیا

ثابت ہے اس کے پہلو سے پہنچے ہے ہم کو رنج

دیکھا نہ درد دل کے کہے سر جھکا گیا

نالاں ہے عندلیب گل آشفتہ رفتہ سرو

ٹک بیٹھ کر چمن میں وہ فتنہ اٹھا گیا

پڑھتا تھا میں تو سجہ لیے ہاتھ میں درود

صلواتیں مجھ کو آ کے وہ ناحق سنا گیا

رکھنا نشان قبر کا میری نہ خوش کیا

آیا سو اور خاک میں مجھ کو ملا گیا

منصف ہو تو ہی شیخ کہ اس مست ناز بن

ہم آپ سے بھلا گئے تجھ سے رہا گیا

ہرگز بجھی نہ سر سے لگی آہ عشق میں

مانند شمع داغ ہی سب ہم کو کھا گیا

کیوں میں کہا کہ ہنس کے نمک زخم پر چھڑک

بے لطف اس کے ہونے میں سارا مزہ گیا

آنسو تو ڈر سے پی گئے لیکن وہ قطرہ آب

اک آگ تن بدن میں ہمارے لگا گیا

وقت اخیر کیا یہ ادا تھی کہ غش سے میں

جب آنکھ کھولی بالوں میں منھ کو چھپا گیا

کیا پوچھتے ہو داغ کیا مرگ میر نے

مر کر وہ سینہ سوختہ چھاتی جلا گیا

میر تقی میر

نہ پیش آوے اگر مرحلہ جدائی کا

اکتوبر 6, 2015میر تقی میر،اساتذہ،غزلپائی،اوائی،آئی،آزمائی،بیوفائی،جدائی،حنائی،خدائی،رہنمائی،رہائی،سائیadmin

دیوان دوم غزل 721

طریق خوب ہے آپس میں آشنائی کا

نہ پیش آوے اگر مرحلہ جدائی کا

ہوا ہے کنج قفس ہی کی بے پری میں خوب

کہ پر کے سال تلک لطف تھا رہائی کا

یہیں ہیں دیر و حرم اب تو یہ حقیقت ہے

دماغ کس کو ہے ہر در کی جبہہ سائی کا

نہ پوچھ مہندی لگانے کی خوبیاں اپنی

جگر ہے خستہ ترے پنجۂ حنائی کا

نہیں جہان میں کس طرف گفتگو دل سے

یہ ایک قطرئہ خوں ہے طرف خدائی کا

کسو پہاڑ میں جوں کوہکن سر اب ماریں

خیال ہم کو بھی ہے بخت آزمائی کا

بجا رہا نہ دل شیخ شور محشر سے

جگر بھی چاہے ہے کچھ تھامنا اوائی کا

رکھا ہے باز ہمیں در بدر کے پھرنے سے

سروں پہ اپنے ہے احساں شکستہ پائی کا

ملا کہیں تو دکھا دیں گے عشق کا جنگل

بہت ہی خضر کو غرہ ہے رہنمائی کا

نہ انس مجھ سے ہوا اس کو میں ہزار کہا

جگر میں داغ ہے اس گل کی بیوفائی کا

جہاں سے میر ہی کے ساتھ جانا تھا لیکن

کوئی شریک نہیں ہے کسو کی آئی کا

میر تقی میر

رات جو تھی چاند سا گھر سے نکل کر رہ گیا

اکتوبر 6, 2015میر تقی میر،اساتذہ،غزلمل،نکل،نگل،ٹل،اچھل،اگل،بچل،جل،دہلadmin

دیوان دوم غزل 720

مکث طالع دیکھ وہ ایدھر کو چل کر رہ گیا

رات جو تھی چاند سا گھر سے نکل کر رہ گیا

خواب میں کل پائوں اپنے دوست کے ملتا تھا میں

آنکھ دشمن کھل گئی سو ہاتھ مل کر رہ گیا

ہم تو تھے سرگرم پابوسی خدا نے خیر کی

نیمچہ کل خوش غلاف اس کا اگل کر رہ گیا

ہم بھی دنیا کی طلب میں سر کے بل ہوتے کھڑے

بارے اپنا پائوں اس رہ میں بچل کر رہ گیا

کیا کہوں بیتابی شب سے کہ ناچار اس بغیر

دل مرے سینے میں دو دو ہاتھ اچھل کر رہ گیا

کیا ہمیں کو یار کے تیغے نے کھاکر دم لیا

ایسے بہتیروں کو یہ اژدر نگل کر رہ گیا

دو قدم ساتھ اس جفا جو کے چلا جاتا ہے جی

بوالہوس عیار تھا دیکھا نہ ٹل کر رہ گیا

آنکھ کچھ اپنی ہی اس کے سامنے ہوتی نہیں

جن نے وہ خونخوار سج دیکھی دہل کر رہ گیا

ایک ڈھیری راکھ کی تھی صبح جاے میر پر

برسوں سے جلتا تھا شاید رات جل کر رہ گیا

میر تقی میر

یا تن آدمی میں دل نہ بنایا ہوتا

اکتوبر 6, 2015میر تقی میر،اساتذہ،غزللگایا،چھپایا،ڈھایا،آیا،اٹھایا،بنایا،بندھایا،بسایا،جتایا،دکھایاadmin

دیوان دوم غزل 719

عشق کو بیچ میں یارب تو نہ لایا ہوتا

یا تن آدمی میں دل نہ بنایا ہوتا

دل نہ تھا ایسی جگہ جس کی نہ سدھ لیجے کبھو

اجڑی اس بستی کو پھر تونے بسایا ہوتا

عزت اسلام کی کچھ رکھ لی خدا نے ورنہ

زلف نے تیری تو زنار بندھایا ہوتا

گھر کے آگے سے ترے نعش گئی عاشق کی

اپنے دروازے تلک تو بھی تو آیا ہوتا

جو ہے سو بے خود رفتار ہے تیرا اے شوخ

اس روش سے نہ قدم تونے اٹھایا ہوتا

اب تو صد چند ستم کرنے لگے تم اے کاش

عشق اپنا نہ تمھیں میں نے جتایا ہوتا

دل سے خوش طرح مکاں پھر بھی کہیں بنتے ہیں

اس عمارت کو ٹک اک دیکھ کے ڈھایا ہوتا

دل پہ رکھتا ہوں کبھو سر سے کبھو ماروں ہوں

ہاتھ پائوں کو نہ میں تیرے لگایا ہوتا

کم کم اٹھتا وہ نقاب آہ کہ طاقت رہتی

کاش یک بار ہمیں منھ نہ دکھایا ہوتا

میر اظہار محبت میں گیا جی نہ ترا

ہائے نادان بہت تونے چھپایا ہوتا

میر تقی میر

انداز سخن کا سبب شور و فغاں تھا

اکتوبر 6, 2015میر تقی میر،اساتذہ،غزلفغاں،نہاں،نگراں،نشاں،کہاں،بیاں،تواں،جہاں،رواںadmin

دیوان دوم غزل 718

یہ میر ستم کشتہ کسو وقت جواں تھا

انداز سخن کا سبب شور و فغاں تھا

جادو کی پڑی پرچۂ ابیات تھا اس کا

منھ تکیے غزل پڑھتے عجب سحر بیاں تھا

جس راہ سے وہ دل زدہ دلی میں نکلتا

ساتھ اس کے قیامت کا سا ہنگامہ رواں تھا

افسردہ نہ تھا ایسا کہ جوں آب زدہ خاک

آندھی تھی بلا تھا کوئی آشوب جہاں تھا

کس مرتبہ تھی حسرت دیدار مرے ساتھ

جو پھول مری خاک سے نکلا نگراں تھا

مجنوں کو عبث دعوی وحشت ہے مجھی سے

جس دن کہ جنوں مجھ کو ہوا تھا وہ کہاں تھا

غافل تھے ہم احوال دل خستہ سے اپنے

وہ گنج اسی کنج خرابی میں نہاں تھا

کس زور سے فرہاد نے خارا شکنی کی

ہر چند کہ وہ بے کس و بے تاب و تواں تھا

گو میر جہاں میں کنھوں نے تجھ کو نہ جانا

موجود نہ تھا تو تو کہاں نام و نشاں تھا

میر تقی میر

زلفوں کی درہمی سے برہم جہان مارا

اکتوبر 6, 2015میر تقی میر،اساتذہ،غزلچھان،ندان،کاروان،آن،آسمان،بان،جہان،جوان،درمیانadmin

دیوان دوم غزل 717

اس کام جان و دل نے عالم کا جان مارا

زلفوں کی درہمی سے برہم جہان مارا

بلبل کا آتشیں دم دل کو لگا ہمارے

ایسا کنھوں نے جیسے چھاتی میں بان مارا

خوں کچھ نہ تھا ہمارا مرکوز خاطر اس کو

للہ اک ہمیں بھی یوں درمیان مارا

سرچشمہ حسن کا وہ آیا نظر نہ مجھ کو

اس راہزن نے غافل کیا کاروان مارا

صبر و حواس و دانش سب عشق کے زبوں ہیں

میں کاوش مژہ سے عالم کو چھان مارا

کیا خون کا مزہ ہے اے عشق تجھ کو ظالم

ایک ایک دم میں تونے سو سو جوان مارا

ہم عاجزوں پر آکر یوں کوہ غم گرا ہے

جیسے زمیں کے اوپر اک آسمان مارا

کب جی بچے ہے یارو خوش رو و مو بتاں سے

گر صبح بچ گیا تو پھر شام آن مارا

کہتے نہ تھے کہ صاحب اتنا کڑھا نہ کریے

اس غم نے میر تم کو جی سے ندان مارا

میر تقی میر

بلبل نے کیا سمجھ کر یاں آشیاں بنایا

اکتوبر 6, 2015میر تقی میر،اساتذہ،غزلمکاں،نشاں،یاں،کہاں،آسماں،آستاں،آشیاں،جہاں،خاکداں،دہاں،رواںadmin

دیوان دوم غزل 716

لے رنگ بے ثباتی یہ گلستاں بنایا

بلبل نے کیا سمجھ کر یاں آشیاں بنایا

اڑتی ہے خاک یارب شام و سحر جہاں میں

کس کے غبار دل سے یہ خاکداں بنایا

اک رنگ پر نہ رہنا یاں کا عجب نہیں ہے

کیا کیا نہ رنگ لائے تب یہ جہاں بنایا

آئینے میں کہاں ہے ایسی صفا کہے تو

جبہوں سے راستوں کے وہ آستاں بنایا

سرگشتہ ایسی کس کی ہاتھ آگئی تھی مٹی

جو چرخ زن قضا نے یہ آسماں بنایا

نقش قدم سے اس کے گلشن کی طرح ڈالی

گرد رہ اس کی لے کر سرو رواں بنایا

ہونے پہ جمع اپنے پھولا بہت تھا لیکن

کیا غنچہ تنگ آیا جب وہ دہاں بنایا

اس صحن پر یہ وسعت اللہ رے تیری صنعت

معمار نے قضا کے دل کیا مکاں بنایا

دل ٹک ادھر نہ آیا ایدھر سے کچھ نہ پایا

کہنے کو ترک لے کر اک سوانگ یاں بنایا

دریوزہ کرتے گذری گلیوں میں عمر اپنی

درویش کب ہوئے ہم تکیہ کہاں بنایا

وہ تو مٹا گیا تھا تربت بھی میر جی کی

دو چار اینٹیں رکھ کر پھر میں نشاں بنایا

میر تقی میر

بسان جام لیے دیدئہ پرآب پھرا

اکتوبر 6, 2015میر تقی میر،اساتذہ،غزلکتاب،پرآب،آفتاب،آب،جواب،خراب،شتابadmin

دیوان دوم غزل 715

تمام روز جو کل میں پیے شراب پھرا

بسان جام لیے دیدئہ پرآب پھرا

اثر بن آہ کے وہ منھ ادھر نہ ہوتا تھا

ہوا پھری ہے مگر کچھ کہ آفتاب پھرا

نہ لکھے خط کی نمط ہو گئیں سفید آنکھیں

تجھے بھی عشق ہے قاصد بھلا شتاب پھرا

وہ رشک گنج ہی نایاب تھا بہت ورنہ

خرابہ کون سا جس میں نہ میں خراب پھرا

کسو سے حرف محبت کا فائدہ نہ ہوا

بغل میں میں تو لیے یاں بہت کتاب پھرا

لکھا تو دیکھ کہ قاصد پھرا جو مدت میں

جواب خط کا مرے صاف بے جواب پھرا

کہیں ٹھہرنے کی جا یاں نہ دیکھی میں نے میر

چمن میں عالم امکاں کے جیسے آب پھرا

میر تقی میر

تجھ پر کوئی اے کام جاں دیکھا نہ یوں مرتا ہوا

اکتوبر 6, 2015میر تقی میر،اساتذہ،غزلمرتا،وا،کیا،اچھا،بہکا،برپا،دریا،رسوا،سوداadmin

دیوان دوم غزل 714

عاشق ترے لاکھوں ہوئے مجھ سا نہ پھر پیدا ہوا

تجھ پر کوئی اے کام جاں دیکھا نہ یوں مرتا ہوا

مدت ہوئی الفت گئی برسوں ہوئے طاقت گئی

دل مضطرب ایسا نہ تھا کیا جانیے اب کیا ہوا

کل صبح سیر باغ میں دل اور میرا رک گیا

بلبل نہ بولا منھ سے کچھ گل ٹک نہ مجھ سے وا ہوا

وے دن گئے جو یاں کبھو اٹھتا تھا دل سے جوش سا

اب لگ گئے رونے جہاں پل مارتے دریا ہوا

کتنوں کے دل بے جاں ہوئے کتنے نہ جانا کیا ہوئے

چلنے میں اس کے دو قدم ہنگامہ اک برپا ہوا

مستی میں لغزش ہو گئی معذور رکھا چاہیے

اے اہل مسجد اس طرف آیا ہوں میں بہکا ہوا

جوں حسن ہے اک فتنہ گر توں عشق بھی ہے پردہ در

وہ شہرئہ عالم ہوا میں خلق میں رسوا ہوا

فرہاد و مجنوں ووں گئے ہم اور وامق یوں چلے

اس عارضے سے چاہ کے وہ کون سا اچھا ہوا

یا حرف خط ہے درمیاں یا گیسوئوں کا ہے بیاں

کیا میر صاحب کے تئیں پھر ان دنوں سودا ہوا

میر تقی میر

کام اپنا اس جنوں میں ہم نے بھی یک سو کیا

اکتوبر 6, 2015میر تقی میر،اساتذہ،غزللوہو،پہلو،ابرو،اتو،بو،بازو،بدخو،جادو،سوadmin

دیوان دوم غزل 713

پھریے کب تک شہر میں اب سوے صحرا رو کیا

کام اپنا اس جنوں میں ہم نے بھی یک سو کیا

عشق نے کیا کیا تصرف یاں کیے ہیں آج کل

چشم کو پانی کیا سب دل کو سب لوہو کیا

نکہت خوش اس کے پنڈے کی سی آتی ہے مجھے

اس سبب گل کو چمن کے دیر میں نے بو کیا

کام میں قدرت کے کچھ بولا نہیں جاتا ہے ہائے

خوبرو اس کو کیا لیکن بہت بدخو کیا

جانا اس آرام گہ سے ہے بعینہ بس یہی

جیسے سوتے سوتے ایدھر سے ادھر پہلو کیا

عزلتی اسلام کے کیا کیا پھرے ہیں جیب چاک

تونے مائل کیوں ادھر کو گوشۂ ابرو کیا

وہ اتوکش کا مجھی پر کیا ہے سرگرم جفا

مارے تلواروں کے ان نے بہتوں کو اتو کیا

ہاتھ پر رکھ ہاتھ اب وہ دو قدم چلتا نہیں

جن نے بالش خواب کا برسوں مرا بازو کیا

پھول نرگس کا لیے بھیچک کھڑا تھا راہ میں

کس کی چشم پرفسوں نے میر کو جادو کیا

میر تقی میر

دیکھا نہ بدگمان ہمارا بھلا پھرا

اکتوبر 6, 2015میر تقی میر،اساتذہ،غزللگا،مزہ،چلا،گیا،بہا،بھلا،بھرا،بارہا،جا،جدا،خداadmin

دیوان دوم غزل 712

یاں اپنی آنکھیں پھر گئیں پر وہ نہ آ پھرا

دیکھا نہ بدگمان ہمارا بھلا پھرا

آیا نہ پھر وہ آئینہ رو ٹک نظر مجھے

میں منھ پر اپنے خاک ملے جا بہ جا پھرا

کیا اور جی رندھے کسو کا تیرے ہجر میں

سو بار اپنے منھ سے جگر تو گیا پھرا

اللہ رے دلکشی کہیں دیکھا جو گرم ناز

جوں سایہ اس کے ساتھ ملک پھر لگا پھرا

سن لیجو ایک بار مسافر ہی ہو گیا

بیمار عشق گور سے گو بارہا پھرا

کہہ وہ شکستہ پا ہمہ حسرت نہ کیونکے جائے

جو ایک دن نہ تیری گلی میں چلا پھرا

طالع پھرے سپہر پھرا قلب پھر گئے

چندے وہ رشک ماہ جو ہم سے جدا پھرا

پر بے نمک ہے ملنے کی اس وقت میں تلاش

بارے وہ ربط و دوستی سب کا مزہ پھرا

آنسو گرا نہ راز محبت کا پاس کر

میں جیسے ابر برسوں تئیں دل بھرا پھرا

بے صرفہ رونے لگ گئے ہم بھی اگر کبھو

تو دیکھیو کہ بادیہ سارا بہا پھرا

بندہ ہے پھر کہاں کا جو صاحب ہو بے دماغ

اس سے خدائی پھرتی ہے جس سے خدا پھرا

خانہ خراب میر بھی کتنا غیور تھا

مرتے موا پر اس کے کبھو گھر نہ جا پھرا

میر تقی میر

مستی کے ذوق میں ہیں آنکھیں بہت ہی خیرا

اکتوبر 6, 2015میر تقی میر،اساتذہ،غزلہیرا،قشعریرا،چیرا،وتیرا،کبیرا،گیرا،حظیرا،خیرا،شیراadmin

دیوان دوم غزل 711

آیا ہے ابر جب کا قبلے سے تیرا تیرا

مستی کے ذوق میں ہیں آنکھیں بہت ہی خیرا

خجلت سے ان لبوں کے پانی ہوبہ چلے ہیں

قند و نبات کا بھی نکلا ہے خوب شیرا

مجنوں نے حوصلے سے دیوانگی نہیں کی

جاگہ سے اپنی جانا اپنا نہیں وتیرا

اس راہزن سے مل کر دل کیونکے کھو نہ بیٹھیں

انداز و ناز اچکّے غمزہ اٹھائی گیرا

کیا کم ہے ہولناکی صحراے عاشقی کی

شیروں کو اس جگہ پر ہوتا ہے قشعریرا

آئینے کو بھی دیکھو پر ٹک ادھر بھی دیکھو

حیران چشم عاشق دمکے ہے جیسے ہیرا

نیت پہ سب بنا ہے یاں مسجد اک بڑی تھی

پیر مغاں موا سو اس کا بنا حظیرا

ہمراہ خوں تلک ہو ٹک پائوں کے چھوئے سے

ایسا گناہ مجھ سے وہ کیا ہوا کبیرا

غیرت سے میر صاحب سب جذب ہو گئے تھے

نکلا نہ بوند لوہو سینہ جو ان کا چیرا

میر تقی میر

دامن گل گریۂ خونیں سے سب افشاں ہوا

اکتوبر 6, 2015میر تقی میر،اساتذہ،غزلمہماں،نالاں،ویراں،گریاں،پاں،افشاں،آساں،جاں،حیراں،داماں،طوفاںadmin

دیوان دوم غزل 710

وارد گلشن غزل خواں وہ جو دلبر یاں ہوا

دامن گل گریۂ خونیں سے سب افشاں ہوا

طائران باغ کو تھا بیت بحثی کا دماغ

پر ہر اک درد سخن سے میر کے نالاں ہوا

دل کی آبادی کو پہنچا اپنے گویا چشم زخم

دیکھتے ہی دیکھتے یہ شہر سب ویراں ہوا

سبز بختی پر ہے اس کی طائر سدرہ کو رشک

جو شکار اس تیغ کے سائے تلے بے جاں ہوا

خاک پر بھی دوڑتی ہے چشم مہر و ماہ چرخ

کس دنی الطبع کے گھر جا کے میں مہماں ہوا

تھا جگر میں جب تلک قطرہ ہی تھا خوں کا سرشک

اب جو آنکھوں سے تجاوز کر چلا طوفاں ہوا

اس کے میرے بیچ میں آئینہ آیا تھا ولے

صورت احوال ساری دیکھ کر حیراں ہوا

دل نے خوں ہو عشق خوباں میں بھی کیا بدلے ہیں رنگ

چہروں کو غازہ ہوا ہونٹوں کا رنگ پاں ہوا

تم جو کل اس راہ نکلے برق سے ہنستے گئے

ابر کو دیکھو کہ جب آیا ادھر گریاں ہوا

جی سے جانا بن گیا اس بن ہمیں پل مارتے

کام تو مشکل نظر آتا تھا پر آساں ہوا

جب سے ناموس جنوں گردن بندھا ہے تب سے میر

جیب جاں وابستۂ زنجیر تا داماں ہوا

میر تقی میر

آگ لینے مگر آئے تھے یہ آنا کیا تھا

اکتوبر 6, 2015میر تقی میر،اساتذہ،غزللگانا،مانا،چھپانا،کھانا،آنا،جانا،زمانہadmin

دیوان دوم غزل 709

گرم مجھ سوختہ کے پاس سے جانا کیا تھا

آگ لینے مگر آئے تھے یہ آنا کیا تھا

برسوں یک بوسۂ لب مانگتے جاتے ہیں ہمیں

رات آتے ہی کہا تم نے جو مانا کیا تھا

دیکھنے آئے دم نزع لیے منھ پہ نقاب

آخری وقت مرے منھ کا چھپانا کیا تھا

جب نہ تب مرنے کو تیار رہے عشق میں ہم

جی کے تیں اپنے کبھو ہم نے نہ جانا کیا تھا

مدعی ہوتے ہیں اک آن میں اب تو دلدار

مہر جب رسم تھی یارب وہ زمانہ کیا تھا

عزت و عشق کہاں جمع ہوئے اے ہمدم

ننگ خواری تھا اگر دل کا لگانا کیا تھا

گر خط سبز سے اس کے نہ تمھیں تھی کچھ لاگ

پھر بھلا میر جی یہ زہر کا کھانا کیا تھا

میر تقی میر

دیکھے سے طور اس کے خدا یاد آگیا

اکتوبر 6, 2015میر تقی میر،اساتذہ،غزلفرہاد،یاد،بیداد،زاد،صیادadmin

دیوان دوم غزل 708

ناگہ جو وہ صنم ستم ایجاد آگیا

دیکھے سے طور اس کے خدا یاد آگیا

پھوڑا تھا سر تو ہم نے بھی پر اس کو کیا کریں

جو چشم روزگار میں فرہاد آگیا

اپنا بھی قصد تھا سردیوار باغ کا

توڑا ہی تھا قفس کو پہ صیاد آگیا

جور و ستم اٹھانے ہی اس سے بنیں گے شیخ

مسجد میں گر وہ عاشق بیداد آگیا

دیکھیں گے آدمی کی روش میر ہم تری

گر سامنے سے ٹک وہ پری زاد آگیا

میر تقی میر

پیغمبر کنعاں نے دیکھا نہ کہ کیا دیکھا

اکتوبر 6, 2015میر تقی میر،اساتذہ،غزلمزہ،نیا،کیا،اٹھا،بھلا،جا،خفاadmin

دیوان دوم غزل 707

دل عشق میں خوں دیکھا آنکھوں کو گیا دیکھا

پیغمبر کنعاں نے دیکھا نہ کہ کیا دیکھا

مجروح ہے سب سینہ تس پر ہے نمک پاشی

آنکھوں کے لڑانے کا ہم خوب مزہ دیکھا

یک بار بھی آنکھ اپنی اس پر نہ پڑی مرتے

سو مرتبہ بالیں سے ہم سر کو اٹھا دیکھا

کاہش کا مری اب یہ کیا تجھ کو تعجب ہے

بیماری دل والا کوئی بھی بھلا دیکھا

آنکھیں گئیں پھر تجھ بن کیا کیا نہ عزیزوں کی

پر تونے مروت سے ٹک ان کو نہ جا دیکھا

جی دیتے ہیں مرنے پر سب شہر محبت میں

کچھ ساری خدائی سے یہ طور نیا دیکھا

کہہ دل کو گنوایا ہے یا رنج اٹھایا ہے

اے میر تجھے ہم نے کچھ آج خفا دیکھا

میر تقی میر

ہنس کے اس پرچے کو میرے ہی گلے بندھوا گیا

اکتوبر 6, 2015میر تقی میر،اساتذہ،غزلمارا،کھا،گھبرا،ٹھہرا،پھندلا،پا،بہلا،بندھوا،شرماadmin

دیوان دوم غزل 706

تیغ کی اپنی صفت لکھتے جو کل وہ آگیا

ہنس کے اس پرچے کو میرے ہی گلے بندھوا گیا

دست و پا گم کرنے سے میرے کھلے اسرار عشق

دیکھ کر کھویا گیا سا مجھ کو ہر یک پا گیا

داغ محجوبی ہوں اس کا میں کہ میرے روبرو

عکس اپنا آرسی میں دیکھ کر شرما گیا

ہم بشر عاجز ثبات پا ہمارا کس قدر

دیکھ کر اس کو ملک سے بھی نہ یاں ٹھہرا گیا

یار کے بالوں کا بندھنا قہر ہے پگڑی کے ساتھ

ایک عالم دوستاں اس پیچ میں مارا گیا

ہم نہ جانا اختلاط اس طفل بازی کوش کا

گرم بازی آگیا تو ہم کو بھی بہلا گیا

کیا کروں ناچار ہوں مرنے کو اب تیار میں

دل کی روز و شب کی بیتابی سے جی گھبرا گیا

جی کوئی لگتا ہے اس کے اٹھ گئے پر باغ میں

گل نے بہتیرا کہا ہم سے نہ ٹک ٹھہرا گیا

ہو گئے تحلیل سب اعضا مرے پاکر گداز

رفتہ رفتہ ہجر کا اندوہ مجھ کو کھا گیا

یوں تو کہتا تھا کوئی ویسے کو باندھے ہے گلے

پر وہ پھندنا سا جو آیا میر بھی پھندلا گیا

میر تقی میر

اندرونے میں جیسے باغ لگا

اکتوبر 6, 2015میر تقی میر،اساتذہ،غزلفراغ،چراغ،باغ،دماغ،سراغadmin

دیوان دوم غزل 705

ایک دل کو ہزار داغ لگا

اندرونے میں جیسے باغ لگا

اس سے یوں گل نے رنگ پکڑا ہے

شمع سے جیسے لیں چراغ لگا

خوبی یک پیچہ بند خوباں کی

خوب باندھوں گا گر دماغ لگا

پائوں دامن میں کھینچ لیں گے ہم

ہاتھ گر گوشۂ فراغ لگا

میر اس بے نشاں کو پایا جان

کچھ ہمارا اگر سراغ لگا

میر تقی میر

گل اشتیاق سے میرے گلے کا ہار ہوا

اکتوبر 6, 2015میر تقی میر،اساتذہ،غزلہار،قرار،یار،پار،اشکبار،خوار،شکارadmin

دیوان دوم غزل 704

چمن میں جاکے جو میں گرم وصف یار ہوا

گل اشتیاق سے میرے گلے کا ہار ہوا

تمھارے ترکش مژگاں کی کیا کروں تعریف

جو تیر اس سے چلا سو جگر کے پار ہوا

ہماری خاک پہ اک بیکسی برستی ہے

ادھر سے ابر جب آیا تب اشکبار ہوا

کریں نہ کیونکے یہ ترکاں بلندپروازی

انھوں کا طائر سدرہ نشیں شکار ہوا

کبھو بھی اس کو تہ دل سے ملتے پایا پھر

فریب تھا وہ کوئی دن جو ہم سے یار ہوا

بہت دنوں سے درونے میں اضطراب سا تھا

جگر تمام ہوا خون تب قرار ہوا

شکیب میر جو کرتا تو وقر رہ جاتا

ادھر کو جاکے عبث یہ حبیب خوار ہوا

میر تقی میر

کہ سحر نالہ کش ہے بلبل سا

اکتوبر 6, 2015میر تقی میر،اساتذہ،غزلکاکل،بلبل،تامل،ترسل،تسلسل،تساہل،تغافل،جھل،غلadmin

دیوان دوم غزل 703

یار ہے میر کا مگر گل سا

کہ سحر نالہ کش ہے بلبل سا

یاں کوئی اپنی جان دو دشوار

واں وہی ہے سو ہے تساہل سا

دود دل کو ہمارے ٹک دیکھو

یہ بھی پر پیچ اب ہے کاکل سا

شوق واں اس کے لمبے بالوں کا

یاں چلا جائے ہے تسلسل سا

کب تھی جرأت رقیب کی اتنی

تم نے بھی کچھ کیا تغافل سا

اک نگہ ایک چشمک ایک سخن

اس میں بھی تم کو ہے تامل سا

بارے مستوں نے ہوشیاری کی

دے کے کچھ محتسب کا منھ جھلسا

شرم آتی ہے پہنچتے اودھر

خط ہوا شوق سے ترسل سا

ٹوٹی زنجیر پاے میر مگر

رات سنتے رہے ہیں ہم غل سا

میر تقی میر

اب ضبط کریں کب تک منھ تک تو جگر آیا

اکتوبر 6, 2015میر تقی میر،اساتذہ،غزلہنر،نظر،کر،گھر،ادھر،بسر،تر،ثمر،جگر،خبر،خطرadmin

دیوان دوم غزل 702

جی رک گئے اے ہمدم دل خون ہو بھر آیا

اب ضبط کریں کب تک منھ تک تو جگر آیا

تھی چشم دم آخر وہ دیکھنے آوے گا

سو آنکھوں میں جی آیا پر وہ نہ نظر آیا

بے سدھ پڑے ہیں سارے سجادوں پہ اسلامی

دارو پیے وہ کافر کاہے کو ادھر آیا

ہر خستہ ترا خواہاں یک زخم دگر کا تھا

کی مشق ستم تونے پر خون نہ کر آیا

گل برگ ہی کچھ تنہا پانی نہیں خجلت سے

جنبش سے ترے لب کی یاقوت بھی تر آیا

بالفعل تو ہے قاصد محو اس خط و گیسو کا

ٹک چیتے تو ہم پوچھیں کیا لے کے خبر آیا

تابوت پہ بھی میرے پتھر پڑے لے جاتے

اس نخل میں ماتم کے کیا خوب ثمر آیا

ہے حق بہ طرف اس کے یوں جس کے گیا ہو تو

سج ایسی تری دیکھی ہم کو بھی خطر آیا

کیا کہیے کہ پتھر سے سر مارتے ہم گذرے

یوں اپنا زمانہ تو بن یار بسر آیا

صنعت گریاں ہم نے کیں سینکڑوں یاں لیکن

جس سے کبھو وہ ملتا ایسا نہ ہنر آیا

در ہی کے تئیں تکتے پتھراگئیں آنکھیں تو

وہ ظالم سنگیں دل کب میر کے گھر آیا

میر تقی میر

زیر لب جب کچھ کہا وہ مر گیا

اکتوبر 6, 2015میر تقی میر،اساتذہ،غزلمر،ور،کر،گھر،اودھر،بھر،برadmin

دیوان دوم غزل 701

تیغ لے کر کیوں تو عاشق پر گیا

زیر لب جب کچھ کہا وہ مر گیا

تڑپے زیر تیغ ہم بے ڈول آہ

دامن پاک اس کا خوں میں بھر گیا

خاک ہے پکڑے اگر سونا بھی پھر

ہاتھ سے جس کے وہ سیمیں بر گیا

کیا بندھا ہے اس کے کوچے میں طلسم

پھر نہ آیا جو کوئی اودھر گیا

خانداں اس بن ہوئے کیا کیا خراب

آج تک وہ شوخ کس کے گھر گیا

ابرو و مژگاں ہی میں کاٹی ہے عمر

کیا سنان و تیغ سے میں ڈر گیا

کہتے ہیں ضائع کیا اپنے تئیں

میر تو دانا تھا یہ کیا کر گیا

میر تقی میر

بالیں کی جاے ہر شب یاں سنگ زیر سر تھا

اکتوبر 6, 2015میر تقی میر،اساتذہ،غزلہنر،مختصر،گھر،گذر،گر،پیشتر،پر،ابرتر،بشر،جگر،خبر،دہر،سرadmin

دیوان دوم غزل 700

ان سختیوں میں کس کا میلان خواب پر تھا

بالیں کی جاے ہر شب یاں سنگ زیر سر تھا

ان ابرو و مژہ سے کب میرے جی میں ڈر تھا

تیغ و سناں کے منھ پر اکثر مرا جگر تھا

ان خوبصورتوں کا کچھ لطف کم ہے مجھ پر

یک عمر ورنہ اس جا پریوں ہی کا گذر تھا

تیشے سے کوہکن کے کیا طرفہ کام نکلا

اپنے تو ناخنوں میں اس طور کا ہنر تھا

عصمت کو اپنی واں تو روتے ملک پھریں ہیں

لغزش ہوئی جو مجھ سے کیا عیب میں بشر تھا

کل ہم وہ دونوں یکجا ناگاہ ہو گئے تھے

وہ جیسے برق خاطف میں جیسے ابرتر تھا

ہوش اڑ گئے سبھوں کے شور سحر سے اس کے

مرغ چمن اگرچہ یک مشت بال و پر تھا

پھر آج یہ کہانی کل شب پہ رہ گئی ہے

سوتا نہ رہتا ٹک تو قصہ ہی مختصر تھا

رشک اس شہید کا ہے خضر و مسیح کو بھی

جو کشتہ اس کی جانب دوگام پیشتر تھا

ہشیاری اس کی دیکھو کیفی ہو مجھ کو مارا

تا سن کے سب کہیں یہ وہ مست و بے خبر تھا

صد رنگ ہے خرابی کچھ تو بھی رہ گیا ہے

کیا نقل کریے یارو دل کوئی گھر سا گھر تھا

تھا وہ بھی اک زمانہ جب نالے آتشیں تھے

چاروں طرف سے جنگل جلتا دہر دہر تھا

جب نالہ کش ہوا وہ تب مجلسیں رلائیں

تھا میر دل شکستہ یا کوئی نوحہ گر تھا

میر تقی میر

ہونٹ پر رنگ پان ہے گویا

اکتوبر 6, 2015میر تقی میر،اساتذہ،غزلمہربان،پان،آسمان،بان،جہان،جوان،جان،زبانadmin

دیوان دوم غزل 699

غنچہ ہی وہ دہان ہے گویا

ہونٹ پر رنگ پان ہے گویا

میرے مردے سے بھی وہ چونکے ہے

اب تلک مجھ میں جان ہے گویا

چاہیے جیتے گذرے اس کا نام

منھ میں جب تک زبان ہے گویا

سربسر کیں ہے لیک وہ پرکار

دیکھو تو مہربان ہے گویا

حیرت روے گل سے مرغ چمن

چپ ہے یوں بے زبان ہے گویا

مسجد ایسی بھری بھری کب ہے

میکدہ اک جہان ہے گویا

جائے ہے شور سے فلک کی طرف

نالۂ صبح بان ہے گویا

بسکہ ہیں اس غزل میں شعر بلند

یہ زمین آسمان ہے گویا

وہی شور مزاج شیب میں ہے

میر اب تک جوان ہے گویا

میر تقی میر

اس وہم کی نمود کا ہے اعتبار کیا

اکتوبر 6, 2015میر تقی میر،اساتذہ،غزلقرار،پیار،انار،انتظار،اختیار،اعتبار،بہار،خار،روزگار،زار،شمار،شکار،غبارadmin

دیوان دوم غزل 698

پھرتا ہے زندگی کے لیے آہ خوار کیا

اس وہم کی نمود کا ہے اعتبار کیا

کیا جانیں ہم اسیر قفس زاد اے نسیم

گل کیسے باغ کہتے ہیں کس کو بہار کیا

آنکھیں برنگ نقش قدم ہو گئیں سفید

پھر اور کوئی اس کا کرے انتظار کیا

سیکھی ہے طرح سینہ فگاری کی سب مری

لائے تھے ساتھ چاک دل ایسا انار کیا

سرکش کسو سے ایسی کدورت رکھے وہ شوخ

ہم اس کی خاک راہ ہیں ہم سے غبار کیا

نے وہ نگہ چبھی ہے نہ وے پلکیں گڑ گئیں

کیا جانیے کہ دل کو ہے یہ خار خار کیا

لیتا ہے ابر اب تئیں اس ناحیے سے آب

روئے ہیں ہم بھی برسوں تئیں زار زار کیا

عاشق کے دل سے رکھ نہ تسلی کی چشم داشت

ہے برق پارہ یہ اسے آوے قرار کیا

صحبت رہی بگڑتی ہی اس کینہ ور سے آہ

ہم جانتے نہیں ہیں کہ ہوتا ہے پیار کیا

مارا ہو ایک دو کو تو ہو مدعی کوئی

کشتوں کا اس کے روز جزا میں شمار کیا

مدت سے جرگہ جرگہ سرتیر ہیں غزال

کم ہو گیا ہے یاروں کا ذوق شکار کیا

پاتے ہیں اپنے حال میں مجبور سب کو ہم

کہنے کو اختیار ہے پر اختیار کیا

آخر زمانہ سازی سے کھویا نہ وقر میر

یہ اختیار تم نے کیا روزگار کیا

میر تقی میر

سن گلہ بلبل سے گل کا اور بھی جی رک گیا

اکتوبر 6, 2015میر تقی میر،اساتذہ،غزلچک،ٹپک،پھک،جھک،رکadmin

دیوان دوم غزل 697

دل کی واشد کے لیے کل باغ میں میں ٹک گیا

سن گلہ بلبل سے گل کا اور بھی جی رک گیا

عشق کی سوزش نے دل میں کچھ نہ چھوڑا کیا کہیں

لگ اٹھی یہ آگ ناگاہی کہ گھر سب پھک گیا

ہم نہ کہتے تھے کہ غافل خاک ہو پیش از فنا

دیکھ اب پیری میں قد تیرا کدھر کو جھک گیا

خدمت معقول ہی سب مغبچے کرتے رہے

شیخ آیا میکدے کی اور جب تب ٹھک گیا

میر اس قاضی کے لونڈے کے لیے آخر موا

سب کو قضیہ اس کے جینے کا تھا بارے چک گیا

میر تقی میر

دیکھی کہاں وہ زلف کہ سودا سا ہو گیا

اکتوبر 6, 2015میر تقی میر،اساتذہ،غزلکانٹا،تماشا،دریا،سودا،صحراadmin

دیوان دوم غزل 696

دل دفعتہ جنوں کا مہیا سا ہو گیا

دیکھی کہاں وہ زلف کہ سودا سا ہو گیا

ٹک جوش سا اٹھا تھا مرے دل سے رات کو

دیکھا تو ایک پل ہی میں دریا سا ہو گیا

بے رونقی باغ ہے جنگل سے بھی پرے

گل سوکھ تیرے ہجر میں کانٹا سا ہو گیا

جلوہ ترا تھا جب تئیں باغ و بہار تھا

اب دل کو دیکھتے ہیں تو صحرا سا ہو گیا

کل تک تو ہم وے ہنستے چلے آئے تھے یوں ہی

مرنا بھی میر جی کا تماشا سا ہو گیا

میر تقی میر

رونا مرا سنوگے کہ طوفان کر رہا

اکتوبر 6, 2015میر تقی میر،اساتذہ،غزلمر،کمر،کر،پر،اتر،خبر،سفر،سحر،سرadmin

دیوان دوم غزل 695

جوں ابرقبلہ دل ہے نہایت ہی بھر رہا

رونا مرا سنوگے کہ طوفان کر رہا

شب میکدے سے وارد مسجد ہوا تھا میں

پر شکر ہے کہ صبح تئیں بے خبر رہا

مل جس سے ایک بار نہ پھر تو ہوا دوچار

رک رک کے وہ ستم زدہ ناچار مر رہا

تسکین دل ہو تب کہ کبھو آگیا بھی ہو

برسوں سے اس کا آنا یہی صبح پر رہا

اس زلف و رخ کو بھولے مجھے مدتیں ہوئیں

لیکن مرا نہ گریۂ شام و سحر رہا

رہتے تو تھے مکاں پہ ولے آپ میں نہ تھے

اس بن ہمیں ہمیشہ وطن میں سفر رہا

اب چھیڑ یہ رکھی ہے کہ پوچھے ہے بار بار

کچھ وجہ بھی کہ آپ کا منھ ہے اتر رہا

اک دم میں یہ عجب کہ مرے سر پہ پھر گیا

جو آب تیغ برسوں تری تا کمر رہا

کاہے کو میں نے میر کو چھیڑا کہ ان نے آج

یہ درد دل کہا کہ مجھے درد سر رہا

میر تقی میر

ٹک نظر ایدھر نہیں کہہ اس سے ہے منظور کیا

اکتوبر 6, 2015میر تقی میر،اساتذہ،غزلفغفور،مقدور،منظور،مذکور،معمور،چور،ناسور،گھور،دور،رنجورadmin

دیوان دوم غزل 694

اس قدر آنکھیں چھپاتا ہے تو اے مغرور کیا

ٹک نظر ایدھر نہیں کہہ اس سے ہے منظور کیا

وصل و ہجراں سے نہیں ہے عشق میں کچھ گفتگو

لاگ دل کی چاہیے ہے یاں قریب و دور کیا

ہو خرابی اور آبادی کی عاقل کو تمیز

ہم دوانے ہیں ہمیں ویران کیا معمور کیا

اٹھ نہیں سکتا ترے در سے شکایت کیا مری

حال میں اپنے ہوں عاجز میں مجھے مقدور کیا

سب ہیں یکساں جب فنا یک بارگی طاری ہوئی

ٹھیکرا اس مرتبے میں کیا سر فغفور کیا

لطف کے حرف و سخن پہلے جو تھے بہر فریب

مدتیں جاتی ہیں ان باتوں کا اب مذکور کیا

دیکھ بہتی آنکھ میری ہنس کے بولا کل وہ شوخ

بہ نہیں اب تک ہوا منھ کا ترے ناسور کیا

میں تو دیکھوں ہوں تمھارے منھ کو تم نے دل لیا

تم مجھے رہتے ہو اکثر مجلسوں میں گھور کیا

ابر سا روتا جو میں نکلا تو بولا طنز سے

آرسی جا دیکھ گھر برسے ہے منھ پر نور کیا

سنگ بالیں میر کا جو باٹ کا روڑا ہوا

سخت کر جی کو گیا اس جا سے وہ رنجور کیا

میر تقی میر

گل لگے کہنے کہو منھ نہ ادھر ہم نے کیا

اکتوبر 6, 2015میر تقی میر،اساتذہ،غزلہنر،مگر،گھر،ادھر،بسر،جگر،حذر،سفر،سپر،سحرadmin

دیوان دوم غزل 693

کل دل آزردہ گلستاں سے گذر ہم نے کیا

گل لگے کہنے کہو منھ نہ ادھر ہم نے کیا

کر گئی خواب سے بیدار تمھیں صبح کی بائو

بے دماغ اتنے جو ہو ہم پہ مگر ہم نے کیا

سیدھے تلوار کے منھ پر تری ہم آئے چلے

کیا کریں اس دل خستہ کو سپر ہم نے کیا

نیمچہ ہاتھ میں مستی سے لہو سی آنکھیں

سج تری دیکھ کے اے شوخ حذر ہم نے کیا

پائوں کے نیچے کی مٹی بھی نہ ہو گی ہم سی

کیا کہیں عمر کو اس طرح بسر ہم نے کیا

کھا گیا ناخن سر تیز جگر دل دونوں

رات کی سینہ خراشی میں ہنر ہم نے کیا

کام ان ہونٹوں سے وہ لے جو کوئی ہم سا ہو

دیکھتے دیکھتے ہی آنکھوں میں گھر ہم نے کیا

جیسے حسرت لیے جاتا ہے جہاں سے کوئی

آہ یوں کوچۂ دلبر سے سفر ہم نے کیا

بارے کل ٹھہر گئے ظالم خونخوار سے ہم

منصفی کیجے تو کچھ کم نہ جگر ہم نے کیا

اس رخ و زلف کی تسبیح ہے یاں اکثر میر

ورد اپنا یہی اب شام و سحر ہم نے کیا

میر تقی میر

دیکھا پھر اس کو خاک میں ہم نے ملا ہوا

اکتوبر 6, 2015میر تقی میر،اساتذہ،غزللٹا،ملا،مدعا،نشہ،کہا،کھڑا،آشنا،اٹھا،بہا،بلا،بھلا،دہاadmin

دیوان دوم غزل 692

اس کام جان و دل سے جو کوئی جدا ہوا

دیکھا پھر اس کو خاک میں ہم نے ملا ہوا

کر ترک گرچہ بیٹھے ہیں پر ہے وہی تلاش

رہتا نہیں ہے ہاتھ ہمارا اٹھا ہوا

کھینچا بغل میں میں جو اسے مست پا کے رات

کہنے لگا کہ آپ کو بھی اب نشہ ہوا

نے صبر ہے نہ ہوش ہے نے عقل ہے نہ دین

آتا ہے اس کے پاس سے عاشق لٹا ہوا

اٹھتا ہے میرے دل سے کبھو جوش سا تو پھر

جاتا ہے دونوں آنکھوں سے دریا بہا ہوا

جوں صید نیم کشتہ تڑپتا ہے ایک سا

کیا جانیے کہ دل کو مرے کیا بلا ہوا

خط آئے پر جو گرم وہ پرکار مل چلا

میں سادگی سے جانا کہ اب آشنا ہوا

ہم تو لگے کنارے ہوئے غیر ہم کنار

ایکوں کی عید ایکوں کے گھر میں دہا ہوا

جوں برق مجھ کو ہنستے نہ دیکھا کسو نے آہ

پایا تو ابر سا کہیں روتا کھڑا ہوا

جس شعر پر سماع تھا کل خانقاہ میں

وہ آج میں سنا تو ہے میرا کہا ہوا

پایا مجھے رقیب نے آ اس کی زیر تیغ

دل خواہ بارے مدعی کا مدعا ہوا

بیمار مرگ سا تو نہیں روز اب بتر

دیکھا تھا ہم نے میر کو کچھ تو بھلا ہوا

میر تقی میر

کیا جانیے کہ میر زمانے کو کیا ہوا

اکتوبر 6, 2015میر تقی میر،اساتذہ،غزللڑا،لکھا،لگا،چھپا،ناخدا،کیا،گیا،پڑھا،پھٹا،بندھا،بھرا،بجا،جلا،رہاadmin

دیوان دوم غزل 691

ایک آن اس زمانے میں یہ دل نہ وا ہوا

کیا جانیے کہ میر زمانے کو کیا ہوا

دکھلاتے کیا ہو دست حنائی کا مجھ کو رنگ

ہاتھوں سے میں تمھارے بہت ہوں جلا ہوا

سوزش وہی تھی چھاتی میں مرنے تلک مرے

اچھا ہوا نہ داغ جگر کا لگا ہوا

سر ہی چڑھا رہے ہے ہر اک بادہ خوار کے

ہے شیخ شہر یا کوئی ہے جن پڑھا ہوا

ظاہر کو گو درست رکھا مر کے میں ولے

دل کا لگائو کوئی رہا ہے چھپا ہوا

ازخویش رفتہ میں ہی نہیں اس کی راہ میں

آتا نہیں ہے پھر کے ادھر کا گیا ہوا

یوں پھر اٹھا نہ جائے گا اے ابر دشت سے

گر کوئی رونے بیٹھ گیا دل بھرا ہوا

لے کر جواب خط کا نہ قاصد پھرا کبھو

کیا جانے سرنوشت میں کیا ہے لکھا ہوا

گو پیس مارے مہندی کے رنگوں فلک ولے

چھوٹے نہ اس سے اس کا لگا یا بندھا ہوا

اٹھتے تعب فراق کے جی سے کہاں تلک

دل جو بجا رہا نہ ہمارا بجا ہوا

دامن سے منھ چھپائے جنوں کب رہا چھپا

سو جا سے سامنے ہے گریباں پھٹا ہوا

دیکھا نہ ایک گل کو بھی چشمک زنی میں ہائے

جب کچھ رہا نہ باغ میں تب میں رہا ہوا

کیا جانیے ملاپ کسے کہتے ہیں یہ لوگ

برسوں ہوئے کہ ہم سے تو وہ ہے لڑا ہوا

بحر بلا سے کوئی نکلتا مرا جہاز

بارے خداے عزَّوجل ناخدا ہوا

اس بحر میں اک اور غزل تو بھی میر کہہ

دریا تھا تو تو تیری روانی کو کیا ہوا

میر تقی میر

کوئی خاک سے ہو یکساں وہی ان کو ناز کرنا

اکتوبر 6, 2015میر تقی میر،اساتذہ،غزلنماز،نیاز،ناز،امتیاز،احتراز،باز،درازadmin

دیوان دوم غزل 690

یہ روش ہے دلبروں کی نہ کسو سے ساز کرنا

کوئی خاک سے ہو یکساں وہی ان کو ناز کرنا

کوئی عاشقوں بتاں کی کرے نقل کیا معیشت

انھیں ناز کرتے رہنا انھیں جی نیاز کرنا

رہیں بند میری آنکھیں شب و روز ضعف ہی میں

نہ ہوا مجھے میسر کبھو چشم باز کرنا

یہ بھی طرفہ ماجرا ہے کہ اسی کو چاہتا ہوں

مجھے چاہیے ہے جس سے بہت احتراز کرنا

نہیں کچھ رہا تو لڑکا تجھے پر ضرور ہے اب

ہوس اور عاشقی میں ٹک اک امتیاز کرنا

کوئی عاشقوں کی پھپٹ کنھوں نے اٹھائی بھی ہے

انھیں بات ہو جو تھوڑی اسے بھی دراز کرنا

یہی میر کھینچے قشقہ در دیر پر تھے ساجد

نہیں اعتماد قابل انھوں کا نماز کرنا

میر تقی میر

برسوں ملے پر ہم سے صرفہ ہی سخن کا تھا

اکتوبر 6, 2015میر تقی میر،اساتذہ،غزلمن،چلن،چمن،وطن،کفن،ٹھن،بدن،دکن،سخنadmin

دیوان دوم غزل 689

کب لطف زبانی کچھ اس غنچہ دہن کا تھا

برسوں ملے پر ہم سے صرفہ ہی سخن کا تھا

اسباب مہیا تھے سب مرنے ہی کے لیکن

اب تک نہ موئے ہم جو اندیشہ کفن کا تھا

بلبل کو موا پایا کل پھولوں کی دوکاں پر

اس مرغ کے بھی جی میں کیا شوق چمن کا تھا

بے ڈول قدم تیرا پڑتا تھا لڑکپن میں

رونا ہمیں اول ہی اس تیرے چلن کا تھا

مرغان قفس سارے تسبیح میں تھے گل کی

ہر چند کہ ہر اک کا ڈھلکا ہوا منکا تھا

سب سطح ہے پانی کا آئینے کا سا تختہ

دریا میں کہیں شاید عکس اس کے بدن کا تھا

خوگر نہیں ہم یوں ہی کچھ ریختہ کہنے سے

معشوق جو اپنا تھا باشندہ دکن کا تھا

بھوئوں تئیں تم جس دن سج نکلے تھے اک پیچہ

اس دن ہی تمھیں دیکھے ماتھا مرا ٹھنکا تھا

رہ میر غریبانہ جاتا تھا چلا روتا

ہر گام گلہ لب پر یاران وطن کا تھا

میر تقی میر

آنکھیں کھلیں تری تو یہ عالم ہے خواب سا

اکتوبر 6, 2015میر تقی میر،اساتذہ،غزلکباب،آب،اضطراب،جواب،حجاب،خواب،خراب،سراب،شراب،عذابadmin

دیوان دوم غزل 688

اس موج خیز دہر میں تو ہے حباب سا

آنکھیں کھلیں تری تو یہ عالم ہے خواب سا

برقع اٹھاکے دیکھے ہے منھ سے کبھو ادھر

بارے ہوا ہے ان دنوں رفع حجاب سا

وہ دل کہ تیرے ہوتے رہے تھا بھرا بھرا

اب اس کو دیکھیے تو ہے اک گھر خراب سا

دس روز آگے دیکھا تھا جیسا سو اب نہیں

دل رہ گیا ہے سینے میں جل کر کباب سا

اس عمر میں یہ ہوش کہ کہنے کو نرم گرم

بگڑا رہے ہے ساختہ مست شراب سا

ہے یہ فریب شوق کہ جاتے ہیں خط چلے

واں سے وگرنہ کب کا ہوا ہے جواب سا

کیا سطر موج اشک روانی کے ساتھ ہے

مشتاق گریہ ابر ہے چشم پر آب سا

دوزخ ہوا ہے ہجر میں اس کے جہاں ہمیں

سوز دروں سے جان پہ ہے اک عذاب سا

مدت ہوئی کہ دل سے قرار و سکوں گئے

رہتا ہے اب تو آٹھ پہر اضطراب سا

مواج آب سا ہے ولیکن اڑے ہے خاک

ہے میر بحربے تہ ہستی سراب سا

میر تقی میر

اس دل نے کس بلا میں ہمیں مبتلا کیا

اکتوبر 6, 2015میر تقی میر،اساتذہ،غزلمبتلا،چلا،پلا،بھلا،جلاadmin

دیوان دوم غزل 687

وہ شوخ ہم کو پائوں تلے ہے ملا کیا

اس دل نے کس بلا میں ہمیں مبتلا کیا

چھاتی کبھو نہ ٹھنڈی کی لگ کر گلے سے آہ

دل اس سے دور سینے میں اکثر جلا کیا

کس وقت شرح حال سے فرصت ہمیں ہوئی

کس دن نیا نہ قاصد ادھر سے چلا کیا

ہم تو گمان دوستی رکھتے تھے پر یہ دل

دشمن عجب طرح کا بغل میں پلا کیا

کیا لطف ہے جیے جو برے حال کوئی میر

جینے سے تونے ہاتھ اٹھایا بھلا کیا

میر تقی میر

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: