زمرہ جات کے محفوظات: غزل

کیا تمھیں یاں سے چلے جاتے ہو ہم بھی جاچکے

اکتوبر 6, 2015میر تقی میر،اساتذہ،غزلچکے،جاچکےadmin

دیوان دوم غزل 986

بے خودی جو یہ ہے تو ہم آپ میں اب آچکے

کیا تمھیں یاں سے چلے جاتے ہو ہم بھی جاچکے

تم یہی کہتے رہے یہ اور گل تازہ کھلا

زخم بھی ہم نے اٹھائے داغ بھی ہم کھا چکے

ایک بوسہ دے نہ منھ برسوں لگایا واہ واہ

اب تو ٹک بولو جزا ہم اس عمل کی پا چکے

یاں تلک آنے میں جتنا مکث کرتے ہو کرو

اب تو جانا جان سے ناچار ہم ٹھہرا چکے

اب چمن میں جا نکلتے ہیں تو جی لگتا نہیں

پھول گل سے میر اس بن دل بہت بہلا چکے

میر تقی میر

وحشت بہت تھی طاقت دل ہائے کھو چکے

اکتوبر 6, 2015میر تقی میر،اساتذہ،غزلہو،کھو،سوadmin

دیوان دوم غزل 985

دیوانگی میں گاہ ہنسے گاہ رو چکے

وحشت بہت تھی طاقت دل ہائے کھو چکے

افراط اشتیاق میں سمجھے نہ اپنا حال

دیکھے ہیں سوچ کرکے تو اب ہم بھی ہوچکے

کہتا ہے میر سانجھ ہی سے آج درد دل

ایسی کہانی گرچہ نندھی ہے تو سو چکے

میر تقی میر

واں میں بھی ہوں مدام شہادت کے واسطے

اکتوبر 6, 2015میر تقی میر،اساتذہ،غزلارادت،سعادت،شہادت،عیادت،عبادتadmin

دیوان دوم غزل 984

کھینچے جہاں تو تیغ جلادت کے واسطے

واں میں بھی ہوں مدام شہادت کے واسطے

سجدہ کوئی کرے تو در یار پر کرے

ہے جاے پاک شرط عبادت کے واسطے

آئے نہ تم تو درپس دیوار مجھ تلک

کھینچے ہیں لوگ رنج عیادت کے واسطے

خوش طالعی صبح جو اس منھ پہ ہے سفید

پھرتا ہے مہ بھی اس ہی سعادت کے واسطے

ہے میر پیر لیک سوے میکدہ مدام

جاتا ہے مغبچوں کی ارادت کے واسطے

میر تقی میر

یہی ہے طور اس کا ساتھ اپنے خورد سالی سے

اکتوبر 6, 2015میر تقی میر،اساتذہ،غزلقالی،لالی،لاابالی،مثالی،نہالی،پائمالی،برشگالی،خیالی،خالی،زارنالی،سالیadmin

دیوان دوم غزل 983

برا کیا مانیے اب چھیڑ سے یا اس کی گالی سے

یہی ہے طور اس کا ساتھ اپنے خورد سالی سے

کلی بیرنگ مرجھائی نظر آتی ہے ظاہر ہے

ہماری بے کلی گل ہاے تصویر نہالی سے

بھری آنکھیں کسو کی پونچھتے جو آستیں رکھتے

ہوئی شرمندگی کیا کیا ہمیں اس دست خالی سے

جو مر رہیے بھی تنگ آکر تو پروا کچھ نہ ہو اس کو

پڑا ہے کام مجھ ناکام کو کس لاابالی سے

جہاں رونے لگے ٹک بے دماغی وہ لگا کرنے

قیامت ضد ہے اس کو عاشقی کی زارنالی سے

دماغ حرف لعل ناب و برگ گل سے ہے تم کو

ہمیں جب گفتگو ہے تب کسو کے لب کی لالی سے

ریاضات محبت نے رکھا ہے ہم میں کیا باقی

نمود اک کرتے ہیں ہم یوں ہی اب شکل مثالی سے

ہم اس راہ حوادث میں بسان سبزہ واقع ہیں

کہ فرصت سر اٹھانے کی نہیں ٹک پائمالی سے

سرہانے رکھ کے پتھر خاک پر ہم بے نوا سوئے

پڑے سر ماریں طالع مند اپنا سنگ قالی سے

کبھو میں عین رونے میں جگر سے آہ کرتا ہوں

کہ دل اٹھ جائیں یاروں کے ہواے برشگالی سے

یہی غم اس دہن کا ہے کہ فکر اس کی کمر کی ہے

کہے سو کیا کوئی ہیں میر صاحب کچھ خیالی سے

میر تقی میر

فراموش آپ کو کرنا محبت میں ہے یاد اس سے

اکتوبر 6, 2015میر تقی میر،اساتذہ،غزلفساد،نامراد،یاد،کشاد،اتحاد،اعتماد،جماد،داد،عنادadmin

دیوان دوم غزل 982

مرا دل پیر و مرشد ہے مجھے ہے اعتقاد اس سے

فراموش آپ کو کرنا محبت میں ہے یاد اس سے

بلا انداز ہے اس کا قیامت ناز ہے اس کا

اٹھے فتنے ہزار اس سے ہوئے لاکھوں فساد اس سے

نزاکت جیسی ہے ویسا ہی دل بھی سخت ہے اس کا

اگرچہ شیشۂ جاں ہے پہ بہتر ہے جماد اس سے

کسے ہیں بند ان نے کیسے کس درویش سے ملیے

جو ایسے سخت عقدوں کی طلب کریے کشاد اس سے

بھلا یوں گھٹ کے مریے کب تلک دل خوں ہوا سارا

جو کوئی دادگر ہووے تو کریے جاکے داد اس سے

لگے ہی ایک دو رہتے ہیں مہلت بات کی کیسی

ہوا ہے دشمنوں کو کچھ قیامت اتحاد اس سے

پہنچ کر تہ کو ہم تو محض محرومی ہی پاتے ہیں

مراد دل کو پہنچا ہو گا کوئی نامراد اس سے

لیے ہی میان سے رہتا ہے کوئی یہ نہیں کہتا

نکالا ہے کہاں کا تونے اے ظالم عناد اس سے

ادھر توبہ کرے ہے میر ادھر لگتا ہے مے پینے

کہاں تک اب تو اپنا اٹھ گیا ہے اعتماد اس سے

میر تقی میر

ابر کیا کیا اٹھے ہنگامے سے کیا کیا برسے

اکتوبر 6, 2015میر تقی میر،اساتذہ،غزلبرسے،سےadmin

دیوان دوم غزل 981

وہ کہاں دھوم جو دیکھی گئی چشم تر سے

ابر کیا کیا اٹھے ہنگامے سے کیا کیا برسے

ہو برافروختہ وہ بت جو مئے احمر سے

آگ نکلے ہے تماشے کے تئیں پتھر سے

ڈھب کچھ اچھا نہیں برہم زدن مژگاں کا

کاٹ ڈالے گا گلا اپنا کوئی خنجر سے

تھا نوشتے میں کہ یوں سوکھ کے مریے اس بن

استخواں تن پہ نمودار ہیں سب مسطر سے

یوں تو دس گز کی زباں ہم بھی بتاں رکھتے ہیں

بات کو طول نہیں دیتے خدا کے ڈر سے

سیر کرنے جو چلے ہے کبھو وہ فتنہ خرام

شہر میں شور قیامت اٹھے ہے ہر گھر سے

عشق کے کوچے میں پھر پائوں نہیں رکھنے کے ہم

اب کے ٹل جاتی ہے کلول یہ اگر سر پر سے

مہر کی اس سے توقع غلطی اپنی تھی

کہیں دلداری ہوئی بھی ہے کسو دلبر سے

کوچۂ یار ہے کیا طرفہ بلاخیز مقام

آتے ہیں فتنہ و آشوب چلے اودھر سے

ساتھ سونا جو گیا اس کا بہت دل تڑپا

برسوں پھر میر یہ پہلو نہ لگے بستر سے

میر تقی میر

کاہش مجھے جو ہے وہی ہوتی ہے شام سے

اکتوبر 6, 2015میر تقی میر،اساتذہ،غزلمقام،نام،ناتمام،کام،ازدحام،خرام،دھام،دام،سلام،شام،غلامadmin

دیوان دوم غزل 980

برسوں ہوئے گئے ہوئے اس مہ کو بام سے

کاہش مجھے جو ہے وہی ہوتی ہے شام سے

تڑپے اسیر ہوتے جو ہم یک اٹھا غبار

سوجھا نہ ہم کو دیر تلک چشم دام سے

دنبال ہر نگاہ ہے صد کاروان اشک

برسے ہے چشم ابر بڑی دھوم دھام سے

محو اس دہان تنگ کے ہیں کوئی کچھ کہو

رہتا ہے ہم کو عشق میں کام اپنے کام سے

یوسفؑ کے پیچھے خوار زلیخا عبث ہوئی

کب صاحبی رہی ہے مل ایسے غلام سے

لڑکے ہزاروں جھولی میں پتھر لیے ہیں ساتھ

مجنوں پھرا ہے کاہے کو اس ازدحام سے

وہ ناز سے چلا کہیں تو حشر ہوچکے

پھر بحث آپڑے گی اسی کے خرام سے

جھک جھک سلام کرنے سے سرکش ہوا وہ اور

ہو بیٹھے ناامید جواب سلام سے

وے دن گئے کہ رات کو یک جا معاش تھی

آتا ہے اب تو ننگ اسے میرے نام سے

سرگرم جلوہ بدر ہو ہر چند شب کو لیک

کب جی لگیں ہیں اپنے کسو ناتمام سے

دل اور عرش دونوں پہ گویا ہے ان کی سیر

کرتے ہیں باتیں میر جی کس کس مقام سے

میر تقی میر

مانا ہے حضور اس کے چراغ سحری سے

اکتوبر 6, 2015میر تقی میر،اساتذہ،غزلگری،پری،تری،جگری،خبری،سحری،سریadmin

دیوان دوم غزل 979

کیا خور ہو طرف یار کے روشن گہری سے

مانا ہے حضور اس کے چراغ سحری سے

سبزان چمن ہوویں برابر ترے کیوں کر

لگتا ہے ترے سائے کو بھی ننگ پری سے

ہشیار کہ ہے راہ محبت کی خطرناک

مارے گئے ہیں لوگ بہت بے خبری سے

ایک آن میں رعنائیاں تیری تو ہیں سو سو

کب عہدہ برآئی ہوئی اس عشوہ گری سے

زنجیر تو پائوں میں لگی رہنے ہمارے

کیا اور ہو رسوا کوئی آشفتہ سری سے

جب لب ترے یاد آتے ہیں آنکھوں سے ہماری

تب ٹکڑے نکلتے ہیں عقیق جگری سے

عشق آنکھوں کے نیچے کیے کیا میر چھپے ہے

پیدا ہے محبت تری مژگاں کی تری سے

میر تقی میر

اثبات ہوا جرم محبت کا اسی سے

اکتوبر 6, 2015میر تقی میر،اساتذہ،غزللبی،کسی،کشی،گری،پری،ابھی،اسی،تبھی،جی،خفگی،رسیadmin

دیوان دوم غزل 978

تابوت مرا دیر اٹھا اس کی گلی سے

اثبات ہوا جرم محبت کا اسی سے

تم چھیڑتے ہو بزم میں مجھ کو تو ہنسی سے

پر مجھ پہ جو ہو جائے ہے پوچھو مرے جی سے

آتش بہ جگر اس در نایاب سے سب ہیں

دریا بھی نظر آئے اسی خشک لبی سے

گر ٹھہرے ملک آگے انھوں کے تو عجب ہے

پھرتے ہیں پڑے دلی کے لونڈے جو پری سے

نکلا جو کوئی واں سے تو پھر مر ہی کے نکلا

اس کوچے سے جاتے ہوئے دیکھا کسے جی سے

ہمسائے مجھے رات کو رویا ہی کرے ہیں

سوتے نہیں بے چارے مری نالہ کشی سے

تم نے تو ادھر دیکھنے کی کھائی ہے سوگند

اب ہم بھی لڑا بیٹھتے ہیں آنکھ کسی سے

چھاتی کہیں پھٹ جائے کہ ٹک دل بھی ہوا کھائے

اب دم تو لگے رکنے ہماری خفگی سے

اس شوخ کا تمکین سے آنا ہے قیامت

اکتانے لگے ہم نفساں تم تو ابھی سے

نالاں مجھے دیکھے ہیں بتاں تس پہ ہیں خاموش

فریاد ہے اس قوم کی فریاد رسی سے

تالو سے زباں رات کو مطلق نہیں لگتی

عالم ہے سیہ خانہ مری نوحہ گری سے

بے رحم وہ تجھ پاس لگا بیٹھنے جب دیر

ہم میر سے دل اپنے اٹھائے تھے تبھی سے

میر تقی میر

گفتار اس کی کبر سے رفتار ناز سے

اکتوبر 6, 2015میر تقی میر،اساتذہ،غزلنماز،ناز،گداز،امتیاز،باز،دراز،سازadmin

دیوان دوم غزل 977

کرتا ہے کب سلوک وہ اہل نیاز سے

گفتار اس کی کبر سے رفتار ناز سے

یوں کب ہمارے آنسو پچھیں ہیں کہ تونے شوخ

دیکھا کبھو ادھر مژئہ نیم باز سے

خاموش رہ سکے نہ تو بڑھ کر بھی کچھ نہ کہہ

سر شمع کا کٹے ہے زبان دراز سے

اب جا کسو درخت کے سائے میں بیٹھیے

اس طور پھریے کب تئیں بے برگ و ساز سے

یہ کیا کہ دشمنوں میں مجھے ساننے لگے

کرتے کسو کو ذبح بھی تو امتیاز سے

مانند شمع ٹپکے ہی پڑتے ہیں اب تو اشک

کچھ جلتے جلتے ہو گئے ہیں ہم گداز سے

شاید کہ آج رات کو تھے میکدے میں میر

کھیلے تھا ایک مغبچہ مہر نماز سے

میر تقی میر

آئے ہیں پھر کے یارو اب کے خدا کے ہاں سے

اکتوبر 6, 2015میر تقی میر،اساتذہ،غزلہاں،فغاں،کہاں،آسماں،آشیاں،جواں،جاں،دہاں،زباںadmin

دیوان دوم غزل 976

کعبے میں جاں بہ لب تھے ہم دوری بتاں سے

آئے ہیں پھر کے یارو اب کے خدا کے ہاں سے

تصویر کے سے طائر خاموش رہتے ہیں ہم

جی کچھ اچٹ گیا ہے اب نالہ و فغاں سے

جب کوندتی ہے بجلی تب جانب گلستاں

رکھتی ہے چھیڑ میرے خاشاک آشیاں سے

کیا خوبی اس کے منھ کی اے غنچہ نقل کریے

تو تو نہ بول ظالم بو آتی ہے دہاں سے

آنکھوں ہی میں رہے ہو دل سے نہیں گئے ہو

حیران ہوں یہ شوخی آئی تمھیں کہاں سے

سبزان باغ سارے دیکھے ہوئے ہیں اپنے

دلچسپ کاہے کو ہیں اس بے وفا جواں سے

کی شست و شو بدن کی جس دن بہت سی ان نے

دھوئے تھے ہاتھ میں نے اس دن ہی اپنی جاں سے

خاموشی ہی میں ہم نے دیکھی ہے مصلحت اب

ہر یک سے حال دل کا مدت کہا زباں سے

اتنی بھی بدمزاجی ہر لحظہ میر تم کو

الجھائو ہے زمیں سے جھگڑا ہے آسماں سے

میر تقی میر

نہال سبز جھومے ہیں گلستاں میں شرابی سے

اکتوبر 6, 2015میر تقی میر،اساتذہ،غزلجوابی،حجابی،حسابی،خوابی،خرابی،شتابی،شرابیadmin

دیوان دوم غزل 975

بہار آئی ہے غنچے گل کے نکلے ہیں گلابی سے

نہال سبز جھومے ہیں گلستاں میں شرابی سے

گروں ہوں ہر قدم پر میں ڈھہا جاتا ہے جی ہر دم

پہنچتا ہوں کبھو در پر ترے سو اس خرابی سے

نہ ٹھہری ایک چشمک بھی بسان برق آنکھوں میں

کلیجہ جل گیا اے عمر تیری تو شتابی سے

نکل آتے ہو گھر سے چاند سے یہ کیا طرح پکڑی

قیامت ہورہے گی ایک دن اس بے حجابی سے

یہ جھگڑا تنگ آ کر میں رکھا روزشمار اوپر

کروں کیا تم تو لڑنے لگتے ہو حرف حسابی سے

بہت رویا نوشتے پر میں اپنے دیکھ قاصد کو

کہ سر ڈالے غریب آتا تھا خط کی بے جوابی سے

مبادا کارواں جاتا رہے تو صبح سوتا ہو

بہت ڈرتا ہوں میں اے میر تیری دیر خوابی سے

میر تقی میر

ہما کے آشیانے میں جلیں ہیں استخواں میرے

اکتوبر 6, 2015میر تقی میر،اساتذہ،غزلمہرباں،کہاں،کارواں،آسماں،استخواں،جہاں،جواں،خارآشیاں،داستاں،رواں،عیاںadmin

دیوان دوم غزل 974

وہی شورش موئے پر بھی ہے اب تک ساتھ یاں میرے

ہما کے آشیانے میں جلیں ہیں استخواں میرے

عزیزاں غم میں اپنے یوسفؑ گم گشتہ کے ہر دم

چلے جاتے ہیں آنسو کارواں در کارواں میرے

تمھاری دشمنی ہم دوستوں سے لا نہایت ہے

وگرنہ انتہا کینے کو بھی ہے مہرباں میرے

لب و لہجہ غزل خوانی کا کس کو آج کل ایسا

گھڑی بھر کو ہوئے مرغ چمن ہم داستاں میرے

نظر مت بے پری پر کر کہ آں سوے جہاں پھر ہوں

ہوئے پرواز کے قابل یہ ٹوٹے پر جہاں میرے

کہاں تک سر کو دیواروں سے یوں مارا کرے کوئی

رکھوں اس در پہ پیشانی نصیب ایسے کہاں میرے

مجھے پامال کر یکساں کیا ہے خاک سے تو بھی

وہی رہتا ہے صبح و شام درپے آسماں میرے

خزاں کی بائو سے حضرت میں گلشن کے تطاول تھا

تبرک ہو گئے یک دست خارآشیاں میرے

کہا میں شوق میں طفلان تہ بازار کے کیا کیا

سخن مشتاق ہیں اب شہر کے پیر و جواں میرے

زمیں سر پر اٹھا لی کبک نے رفتار رنگیں سے

خراماں ناز سے ہو تو بھی اے سرو رواں میرے

سخن کیا میر کریے حسرت و اندوہ و حرماں سے

بیاں حاجت نہیں حالات ہیں سارے عیاں میرے

میر تقی میر

ہاتھ لگتے میلے ہوتے ہو لطافت ہائے رے

اکتوبر 6, 2015میر تقی میر،اساتذہ،غزلقیامت،قامت،لطافت،محنت،مدت،سماجت،عزتadmin

دیوان دوم غزل 973

بو کیے کمھلائے جاتے ہو نزاکت ہائے رے

ہاتھ لگتے میلے ہوتے ہو لطافت ہائے رے

یار بے پروا و مفتر اور میں بے اختیار

پیش کچھ جاتی نہیں منت سماجت ہائے رے

سختی کھینچی کوہکن نے قیس نے رنج و تعب

کیا گئی برباد ان یاروں کی محنت ہائے رے

شور اٹھتا ہے جو ہوتے جلوہ گر ہو ناز سے

کھینچنا قد کا بلا آفت قیامت ہائے رے

خانقہ والے ہی کچھ تنہا نہیں الفت میں خوار

کیسے کیسوں کی گئی ہے مفت عزت ہائے رے

عشق میں افسوس سا افسوس اپنا کرچکے

زیر لب کہتے رہے ہم ایک مدت ہائے رے

ریجھنے ہی کے ہے قابل یار کی ترکیب میر

واہ وا رے چشم و ابرو قد و قامت ہائے رے

میر تقی میر

ظاہر تو پاس بیٹھے ہیں پر ہیں بہت پرے

اکتوبر 6, 2015میر تقی میر،اساتذہ،غزلہرے،منگرے،مسخرے،ورے،کرے،پرے،بھرےadmin

دیوان دوم غزل 972

مت سہل سمجھو ایسے ہیں ہم کیا ورے دھرے

ظاہر تو پاس بیٹھے ہیں پر ہیں بہت پرے

سختی بہت ہے پاس و مراعات عشق میں

پتھر کے دل جگر ہوں تو کوئی وفا کرے

خالی کروں ہوں رو رو کے راتوں کو دل کے تیں

انصاف کر کہ یوں کوئی دن کب تلک بھرے

رندھنے نے جی کے خاک میں ہم کو ملا دیا

گویا کہ آسمان بہت آگیا ورے

داڑھی کو تیری دیکھ کے ہنستے ہیں لڑکے شیخ

اس ریش خند کو بھی سمجھ ٹک تو مسخرے

جل تھل فقط نہیں مرے رونے سے بھر گئے

جنگل پڑے تھے سوکھے سو وہ بھی ہوئے ہرے

جی کو بچا رکھیں گے تو جانیں گے عشق میں

ہر چند میر صاحب قبلہ ہیں منگرے

میر تقی میر

گاڑ دیویں کاش مجھ کو بیچ میں در کے ترے

اکتوبر 6, 2015میر تقی میر،اساتذہ،غزلمعنبر،پر،اکثر،احمر،بستر،تر،خنجر،دلبر،در،زر،سرadmin

دیوان دوم غزل 971

آہ روکوں جانے والے کس طرح گھر کے ترے

گاڑ دیویں کاش مجھ کو بیچ میں در کے ترے

لالہ و گل کیوں نہ پھیکے اپنی آنکھوں میں لگیں

دیکھنے والے ہیں ہم تو رنگ احمر کے ترے

بے پرو بالی سے اب کے گوکہ بلبل تو ہے چپ

یاد ہیں سب کے تئیں وے چہچہے پر کے ترے

آج کا آیا تجھے کیا پاوے ہم حیران ہیں

ڈھونڈنے والے جو ہیں اے شوخ اکثر کے ترے

دیکھ اس کو حیف کھا کر سب مجھے کہنے لگے

واے تو گر ہیں یہی اطوار دلبر کے ترے

تازہ تر ہوتے ہیں نوگل سے بھی اے نازک نہال

صبح اٹھتے ہیں بچھے جو پھول بستر کے ترے

مشک عنبر طبلہ طبلہ کیوں نہ ہو کیا کام ہے

ہم دماغ آشفتہ ہیں زلف معنبر کے ترے

جی میں وہ طاقت کہاں جو ہجر میں سنبھلے رہیں

اب ٹھہرتے ہی نہیں ہیں پائوں ٹک سر کے ترے

داغ پیسے سے جو ہیں بلبل کے دل پر کس کے ہیں

یوں تو اے گل ہیں ہزاروں آشنا زر کے ترے

کوئی آب زندگی پیتا ہے یہ زہراب چھوڑ

خضر کو ہنستے ہیں سب مجروح خنجر کے ترے

نوح کا طوفاں ہمارے کب نظر چڑھتا ہے میر

جوش ہم دیکھے ہیں کیا کیا دیدئہ تر کے ترے

میر تقی میر

پسند اس کی ہے وہ جس طرح پسند کرے

اکتوبر 6, 2015میر تقی میر،اساتذہ،غزلفند،چھچھند،پسند،بلند،بند،خند،دردمند،سپندadmin

دیوان دوم غزل 970

اسیر زلف کرے قیدی کمند کرے

پسند اس کی ہے وہ جس طرح پسند کرے

ہمیشہ چشم ہے نمناک ہاتھ دل پر ہے

خدا کسو کو نہ ہم سا بھی دردمند کرے

بڑوں بڑوں کو جھکاتے ہی سر بنے اس دم

پکڑ کے تیغ وہ اپنی اگر بلند کرے

بیان دل کے بھی جلنے کو کریے مجلس میں

اچھلنے کودنے کو ترک اگر سپند کرے

نہ مجھ کو راہ سے لے جائے مکر دنیا کا

ہزار رنگ یہ فرتوت گو چھچھند کرے

سواے اس کے بڑی داڑھی میں ہے کیا اے شیخ

کہ جو کوئی تجھے دیکھے سو ریش خند کرے

دکھاوے آنکھ کبھو زلف کھولے منھ پہ کبھو

کبھو خرام سے رستے کے رستے بند کرے

اگرچہ سادہ ہے لیکن ربودن دل کو

ہزار پیچ کرے لاکھ لاکھ فند کرے

سخن یہی ہے جو کہتے ہیں شعر میر ہے سحر

زبان خلق کو کس طور کوئی بند کرے

میر تقی میر

پھر جو دیکھا تو کچھ نہیں پیارے

اکتوبر 6, 2015میر تقی میر،اساتذہ،غزلنہیں،وہیں،بہیں،رہیںadmin

دیوان دوم غزل 969

سیر کی ہم نے ہر کہیں پیارے

پھر جو دیکھا تو کچھ نہیں پیارے

خشک سال وفا میں اک مدت

پلکیں لوہو میں تر رہیں پیارے

یک نظر دیکھنے کی حسرت میں

آنکھیں تو پانی ہو بہیں پیارے

پہنچی ہے ضعف سے یہ اب حالت

جہاں پہنچا رہا وہیں پیارے

تجھ گلی میں رہے ہے میر مگر

دیکھیں ہیں جب نہ تب نہیں پیارے

میر تقی میر

کیا کہہ کے تجھ کو روویں یہ کیا کیا پیارے

اکتوبر 6, 2015میر تقی میر،اساتذہ،غزللیا،کیا،پیا،دیا،سیاadmin

دیوان دوم غزل 968

میر ایک دم نہ اس بن تو تو جیا پیارے

کیا کہہ کے تجھ کو روویں یہ کیا کیا پیارے

رنگین ہم تو تجھ کو ایسا نہ جانتے تھے

تو نے تو عاشقوں کا لوہو پیا پیارے

دل کے تو زخم کا کچھ ہوتا نہیں تدارک

گو چاک سینہ تو نے میرا سیا پیارے

اس دام گاہ میں ہم جوں صید نیم بسمل

تڑپے بہت پہ تو نے کب دل لیا پیارے

ہو داغ میر تجھ بن مر بھی گیا ولے تو

آیا نہ گور پر ٹک لے کر دیا پیارے

میر تقی میر

حیرت سے ہم تو چپ ہیں کچھ تم بھی بولو پیارے

اکتوبر 6, 2015میر تقی میر،اساتذہ،غزلمارے،وارے،کنارے،پیارے،پکارے،پسارے،تمھارے،تارے،سارے،سدھارےadmin

دیوان دوم غزل 967

اک شور ہورہا ہے خوں ریزی میں ہمارے

حیرت سے ہم تو چپ ہیں کچھ تم بھی بولو پیارے

زخم اس کے ہاتھ کے جو سینے پہ ہیں نمایاں

چھاتی لگے رہیں گے زیر زمیں بھی سارے

ہیں بدمزاج خوباں پر کس قدر ہیں دلکش

پائے کہاں گلوں نے یہ مکھڑے پیارے پیارے

بیٹھیں ہیں رونے کو تو دریا ہی رو اٹھیں ہیں

جوش و خروش یہ تھے تب ہم لگے کنارے

لاتے نہیں ہو مطلق سر تم فرو خدا سے

یہ ناز خوبرویاں بندے ہیں ہم تمھارے

کوئی تو ماہ پارہ اس بھی رواق میں ہے

چشمک زنی میں شب کو یوں ہی نہیں ہیں تارے

لگ کر گلے نہ سوئے اس منھ پہ منھ نہ رکھا

جی سے گئے ہم آخر ان حسرتوں کے مارے

بیتابی ہے دنوں کو بے خوابی ہے شبوں کو

آرام و صبر دونوں مدت ہوئی سدھارے

آفاق میں جو ہوتے اہل کرم تو سنتے

ہم برسوں رعد آسا بیتاب ہو پکارے

جل بجھیے اب تو بہتر مانند برق خاطف

جوں ابر کس کے آگے دامن کوئی پسارے

ہم نے تو عاشقی میں کھویا ہے جان کو بھی

صدقے ہیں میر جی کے وے ڈھونڈتے ہیں وارے

میر تقی میر

منزل کو عاشق اپنے مقصد کی جا نہ پہنچے

اکتوبر 6, 2015میر تقی میر،اساتذہ،غزلہوا،گیا،جا،دوا،دعا،سزا،صداadmin

دیوان دوم غزل 966

گر ناز سے وہ سر پر لے تیغ آ نہ پہنچے

منزل کو عاشق اپنے مقصد کی جا نہ پہنچے

جیتے رہیں گے کیونکر ہم اے طبیب ناداں

بیمار ایسے تس پر مطلق دوا نہ پہنچے

لائق ترے نہیں ہے خصمی غیر لیکن

وہ باز کیونکے آوے جب تک سزا نہ پہنچے

ہر چند بہر خوباں سر مسجدوں میں مارے

پر ان کے دامنوں تک دست دعا نہ پہنچے

بن آہ دل کا رکنا بے جا نہیں ہمارا

کیا حال ہووے اس کا جس کو ہوا نہ پہنچے

اپنے سخن کی اس سے کس طور راہ نکلے

خط اس طرف نہ جاوے قاصد گیا نہ پہنچے

وہ میر شاہ خوبی پھر قدر دور اس کی

درویش بے نوا کی اس تک صدا نہ پہنچے

میر تقی میر

چشم بیمار کے دیکھ آنے کی رخصت دیجے

اکتوبر 6, 2015میر تقی میر،اساتذہ،غزلمہلت،تہمت،راحت،رخصت،طاقت،عزتadmin

دیوان دوم غزل 965

یک مژہ اے دم آخر مجھے فرصت دیجے

چشم بیمار کے دیکھ آنے کی رخصت دیجے

نو گرفتار ہوں اس باغ کا رحم اے صیاد

موسم گل رہے جب تک مجھے مہلت دیجے

خوار و خستہ کئی پامال تری راہ میں ہیں

کیجیے رنجہ قدم ان کو بھی عزت دیجے

اپنے ہی دل کا گنہ ہے جو جلاتا ہے مجھے

کس کو لے مریے میاں اور کسے تہمت دیجے

چھوٹے ہیں قید قفس سے تو چمن تک پہنچیں

اتنی اے ضعف محبت ہمیں طاقت دیجے

مر گیا میر نہ آیا ترے جی میں اے شوخ

اپنے محنت زدہ کو بھی کبھی راحت دیجے

میر تقی میر

آسماں کو سیاہ کر لیجے

اکتوبر 6, 2015میر تقی میر،اساتذہ،غزلنگاہ،گناہ،سیاہadmin

دیوان دوم غزل 964

صبح ہے کوئی آہ کر لیجے

آسماں کو سیاہ کر لیجے

چشم گل باغ میں مندی جا ہے

جو بنے اک نگاہ کر لیجے

ابر رحمت ہے جوش میں مے دے

یعنی ساقی گناہ کر لیجے

میر تقی میر

کوئی دن ہی میں خاک سی یاں اڑا دی

اکتوبر 6, 2015میر تقی میر،اساتذہ،غزلہا،لگا،منا،وا،اڑا،اٹھا،با،جا،دوا،شاadmin

دیوان دوم غزل 963

متاع دل اس عشق نے سب جلا دی

کوئی دن ہی میں خاک سی یاں اڑا دی

دلیل اس بیاباں میں دل ہی ہے اپنا

نہ خضر و بلد یاں نہ رہبر نہ ہادی

مزاجوں میں یاس آگئی ہے ہمارے

نہ مرنے کا غم ہے نہ جینے کی شادی

نہ پوچھو کہ چھاتی کے جلنے نے آخر

عجب آگ دل میں جگر میں لگا دی

وفا لوگ آپس میں کرتے تھے آگے

یہ رسم کہن آہ تم نے اٹھا دی

جدا ان غزالان شہری سے ہوکر

پھرے ہم بگولے سے وادی بہ وادی

صبا اس طرف کو چلی جل گئے ہم

ہوا یہ سبب اپنے مرنے کا بادی

وہ نسخہ جو دیکھا بڑھا روگ دل کا

طبیب محبت نے کیسی دوا دی

ملے قصر جنت میں پیر مغاں کو

ہمیں زیر دیوار میخانہ جا دی

نہ ہو عشق کا شور تا میر ہرگز

چلے بس تو شہروں میں کریے منادی

میر تقی میر

کاہشیں کیا کیا اٹھا جاتا ہے جی

اکتوبر 6, 2015میر تقی میر،اساتذہ،غزلچلا،چھپا،ڈھہا،یا،کھا،گھلا،ا،اٹھا،جلا،رہا،رکاadmin

دیوان دوم غزل 962

تجھ کنے بیٹھے گھٹا جاتا ہے جی

کاہشیں کیا کیا اٹھا جاتا ہے جی

یوں تو مردے سے پڑے رہتے ہیں ہم

پر وہ آتا ہے تو آجاتا ہے جی

ہائے اس کے شربتی لب سے جدا

کچھ بتاشا سا گھلا جاتا ہے جی

اب کے اس کی راہ میں جو ہو سو ہو

یا دب ہی آتا ہے یا جاتا ہے جی

کیا کہیں تم سے کہ اس شعلے بغیر

جی ہمارا کچھ جلا جاتا ہے جی

عشق آدم میں نہیں کچھ چھوڑتا

ہولے ہولے کوئی کھا جاتا ہے جی

اٹھ چلے پر اس کے غش کرتے ہیں ہم

یعنی ساتھ اس کے چلا جاتا ہے جی

آ نہیں پھرتا وہ مرتے وقت بھی

حیف ہے اس میں رہا جاتا ہے جی

رکھتے تھے کیا کیا بنائیں پیشتر

سو تو اب آپھی ڈھہا جاتا ہے جی

آسماں شاید ورے کچھ آگیا

رات سے کیا کیا رکا جاتا ہے جی

کاشکے برقع رہے اس رخ پہ میر

منھ کھلے اس کے چھپا جاتا ہے جی

میر تقی میر

اللہ رے اثر سب کے تئیں رفتگی آئی

اکتوبر 6, 2015میر تقی میر،اساتذہ،غزلہوائی،لگائی،چلائی،نمائی،پائی،اڑائی،آئی،اٹھائی،بنائی،بتائی،جلائی،خدائی،درائیadmin

دیوان دوم غزل 961

مطرب سے غزل میر کی کل میں نے پڑھائی

اللہ رے اثر سب کے تئیں رفتگی آئی

اس مطلع جاں سوز نے آ اس کے لبوں پر

کیا کہیے کہ کیا صوفیوں کی چھاتی جلائی

خاطر کے علاقے کے سبب جان کھپائی

اس دل کے دھڑکنے سے عجب کوفت اٹھائی

گو اس رخ مہتابی سے واں چاندنی چھٹکی

یاں رنگ شکستہ سے بھی چھٹتی ہے ہوائی

ہر بحر میں اشعار کہے عمر کو کھویا

اس گوہر نایاب کی کچھ بات نہ پائی

بھیڑیں ٹلیں اس ابروے خم دار کے ہلتے

لاکھوں میں اس اوباش نے تلوار چلائی

دل اور جگر جل کے مرے دونوں ہوئے خاک

کیا پوچھتے ہو عشق نے کیا آگ لگائی

قاصد کے تصنع نے کیا دل کے تئیں داغ

بیتاب مجھے دیکھ کے کچھ بات بنائی

چپکی ہے مری آنکھ لب لعل بتاں سے

اس بات کے تیں جانتی ہے ساری خدائی

میں دیر پہنچ کر نہ کیا قصد حرم پھر

اپنی سی جرس نے کی بہت ہرزہ درائی

فریاد انھیں رنگوں ہے گلزار میں ہر صبح

بلبل نے مری طرز سخن صاف اڑائی

مجلس میں مرے ہوتے رہا کرتے ہو چپکے

یہ بات مری ضد سے تمھیں کن نے بتائی

گردش میں جو ہیں میر مہ و مہر و ستارے

دن رات ہمیں رہتی ہے یہ چشم نمائی

میر تقی میر

طرف ہے مجھ سے اب ساری خدائی

اکتوبر 6, 2015میر تقی میر،اساتذہ،غزلملائی،نوائی،چھپائی،وفائی،آئی،آزمائی،آشنائی،جلائی،جدائی،خدائی،صفائیadmin

دیوان دوم غزل 960

بتوں سے آنکھ کیوں میں نے لڑائی

طرف ہے مجھ سے اب ساری خدائی

نرا دھوکا ہی ہے دریاے ہستی

نہیں کچھ تہ سے تجھ کو آشنائی

بگڑتی ہی گئی صورت ہماری

گئے پر دل کے پھر کچھ بن نہ آئی

نہ نکلا ایک شب اس راہ وہ ماہ

بہت کی ہم نے طالع آزمائی

کہا تھا میں نہ دیکھو غیر کی اور

سو تم نے آنکھ مجھ سے ہی چھپائی

نہ ملیے خاک میں کہہ کیونکے پیارے

گذرتی ہے کڑی تیری جدائی

جفا اس کی نہ پہنچی انتہا کو

دریغا عمر نے کی بے وفائی

گلے اس مہ نے لگ کر ایک دو رات

مہینوں تک مری چھاتی جلائی

نہ تھا جب درمیاں آئینہ تب تک

تھی یک صورت کہ ہو جاوے صفائی

نظر اس کی پڑی چہرے پر اپنے

نمدپوشوں سے آنکھ اب کب ملائی

بڑھائی کس قدر بات اس کے قد کی

قیامت میر صاحب ہیں چوائی

میر تقی میر

اب کے جو آئے سفر سے خوب مہمانی ہوئی

اکتوبر 6, 2015میر تقی میر،اساتذہ،غزلمہمانی،نادانی،ویرانی،پیشانی،پانی،پشیمانی،افشانی،آسانی،بانی،جانی،خداخوانی،دیوانی،طوفانیadmin

دیوان دوم غزل 959

قوت کو پیرانہ سر دلی میں حیرانی ہوئی

اب کے جو آئے سفر سے خوب مہمانی ہوئی

بائولے سے جب تلک بکتے تھے سب کرتے تھے پیار

عقل کی باتیں کیاں کیا ہم سے نادانی ہوئی

لوہو پانی ایک دونوں نے کیا میرا ندان

یعنی دل لوہو ہوا سب چشم سب پانی ہوئی

کیا چھپا کچھ رہ گیا ہے مدعاے خط شوق

رقعہ وار اب اشک خونیں سے تو افشانی ہوئی

آنکھ اٹھاکر ٹک جو دیکھا گھر کے گھر بٹھلا دیے

اک نگہ میں سینکڑوں کی خانہ ویرانی ہوئی

مرتبہ واجب کا سمجھے آدمی ممکن نہیں

فہم سودائی ہوا یاں عقل دیوانی ہوئی

چاہ کر اس بے وفا کو آخر اپنی جان دی

دوستی اس کی ہماری دشمن جانی ہوئی

بلبل اس خوبی سے گل ہے سِیَّما سیماے یار

تو عبث اے بے حقیقت غنچہ پیشانی ہوئی

شیخ مت یاد بتاں کو رات کا سا ذکر جان

یاصنم گوئی ہماری کیا خداخوانی ہوئی

غنچۂ گل ہے گلابی پھول ہے جام شراب

توڑتے تو توڑی توبہ اب پشیمانی ہوئی

چشم ہوتے ہوتے تر کچھ سب بھری رہنے لگی

اب ہوئی خطرے کی جاگہ کشتی طوفانی ہوئی

دل تڑپتا تھا نہایت جان دے تسکین کی

بارے اپنی ایسی مشکل کی بھی آسانی ہوئی

جب سے دیکھا اس کو ہم نے جی ڈھہا جاتا ہے میر

اس خرابی کی یہ چشم روسیہ بانی ہوئی

میر تقی میر

آخر آخر جان دی یاروں نے یہ صحبت ہوئی

اکتوبر 6, 2015میر تقی میر،اساتذہ،غزلفرصت،قدرت،لت،مہلت،مدت،وحشت،کثرت،الفت،بابت،حالت،راحت،رخصت،صورت،صحبت،طاقتadmin

دیوان دوم غزل 958

عشق میں ذلت ہوئی خفت ہوئی تہمت ہوئی

آخر آخر جان دی یاروں نے یہ صحبت ہوئی

عکس اس بے دید کا تو متصل پڑتا تھا صبح

دن چڑھے کیا جانوں آئینے کی کیا صورت ہوئی

لوح سینہ پر مری سو نیزئہ خطی لگے

خستگی اس دل شکستہ کی اسی بابت ہوئی

کھولتے ہی آنکھیں پھر یاں موندنی ہم کو پڑیں

دید کیا کوئی کرے وہ کس قدر مہلت ہوئی

پائوں میرا کلبۂ احزاں میں اب رہتا نہیں

رفتہ رفتہ اس طرف جانے کی مجھ کو لت ہوئی

مر گیا آوارہ ہوکر میں تو جیسے گردباد

پر جسے یہ واقعہ پہنچا اسے وحشت ہوئی

شاد و خوش طالع کوئی ہو گا کسو کو چاہ کر

میں تو کلفت میں رہا جب سے مجھے الفت ہوئی

دل کا جانا آج کل تازہ ہوا ہو تو کہوں

گذرے اس بھی سانحے کو ہم نشیں مدت ہوئی

شوق دل ہم ناتوانوں کا لکھا جاتا ہے کب

اب تلک آپھی پہنچنے کی اگر طاقت ہوئی

کیا کف دست ایک میداں تھا بیاباں عشق کا

جان سے جب اس میں گذرے تب ہمیں راحت ہوئی

یوں تو ہم عاجزترین خلق عالم ہیں ولے

دیکھیو قدرت خدا کی گر ہمیں قدرت ہوئی

گوش زد چٹ پٹ ہی مرنا عشق میں اپنے ہوا

کس کو اس بیماری جانکاہ سے فرصت ہوئی

بے زباں جو کہتے ہیں مجھ کو سو چپ رہ جائیں گے

معرکے میں حشر کے گر بات کی رخصت ہوئی

ہم نہ کہتے تھے کہ نقش اس کا نہیں نقاش سہل

چاند سارا لگ گیا تب نیم رخ صورت ہوئی

اس غزل پر شام سے تو صوفیوں کو وجد تھا

پھر نہیں معلوم کچھ مجلس کی کیا حالت ہوئی

کم کسو کو میر کی میت کی ہاتھ آئی نماز

نعش پر اس بے سر و پا کی بلا کثرت ہوئی

میر تقی میر

اس بے وفا کو ہم سے کچھ الفت نہیں رہی

اکتوبر 6, 2015میر تقی میر،اساتذہ،غزلفرصت،قدرت،مت،مدت،الفت،صحبت،عزتadmin

دیوان دوم غزل 957

وہ رابطہ نہیں وہ محبت نہیں رہی

اس بے وفا کو ہم سے کچھ الفت نہیں رہی

دیکھا تو مثل اشک نظر سے گرا دیا

اب میری اس کی آنکھ میں عزت نہیں رہی

رندھنے سے جی کے کس کو رہا ہے دماغ حرف

دم لینے کی بھی ہم کو تو فرصت نہیں رہی

تھی تاب جی میں جب تئیں رنج و تعب کھنچے

وہ جسم اب نہیں ہے وہ قدرت نہیں رہی

منعم امل کا طول یہ کس جینے کے لیے

جتنی گئی اب اتنی تو مدت نہیں رہی

دیوانگی سے اپنی ہے اب ساری بات خبط

افراط اشتیاق سے وہ مت نہیں رہی

پیدا کہاں ہیں ایسے پراگندہ طبع لوگ

افسوس تم کو میر سے صحبت نہیں رہی

میر تقی میر

دوستی مدعی جانی تھی

اکتوبر 6, 2015میر تقی میر،اساتذہ،غزلمہربانی،مانی،چھانی،ناگہانی،کہانی،پانی،جوانی،جانی،زندگانی،زعفرانیadmin

دیوان دوم غزل 956

یار بن تلخ زندگانی تھی

دوستی مدعی جانی تھی

سر سے اس کی ہوا گئی نہ کبھو

عمر برباد یوں ہی جانی تھی

لطف پر اس کے ہم نشیں مت جا

کبھو ہم پر بھی مہربانی تھی

ہاتھ آتا جو تو تو کیا ہوتا

برسوں تک ہم نے خاک چھانی تھی

شیب میں فائدہ تامل کا

سوچنا تب تھا جب جوانی تھی

میرے قصے سے سب کی گئیں نیندیں

کچھ عجب طور کی کہانی تھی

عاشقی جی ہی لے گئی آخر

یہ بلا کوئی ناگہانی تھی

اس رخ آتشیں کی شرم سے رات

شمع مجلس میں پانی پانی تھی

پھر سخن نشنوی ہے ویسی ہی

رات ایک آدھ بات مانی تھی

کوے قاتل سے بچ کے نکلا خضر

اسی میں اس کی زندگانی تھی

فقر پر بھی تھا میر کے اک رنگ

کفنی پہنی سو زعفرانی تھی

میر تقی میر

اس لوٹتے دامن کو پاس آ کے اٹھانا بھی

اکتوبر 6, 2015میر تقی میر،اساتذہ،غزللگانا،چھپانا،اٹھانا،جتانا،دکھاناadmin

دیوان دوم غزل 955

دزدیدہ نگہ کرنا پھر آنکھ ملانا بھی

اس لوٹتے دامن کو پاس آ کے اٹھانا بھی

پامالی عاشق کو منظور رکھے جانا

پھر چال کڈھب چلنا ٹھوکر نہ لگانا بھی

برقع کو اٹھا دینا پر آدھے ہی چہرے سے

کیا منھ کو چھپانا بھی کچھ جھمکی دکھانا بھی

دیکھ آنکھیں مری نیچی اک مارنا پتھر بھی

ظاہر میں ستانا بھی پردے میں جتانا بھی

صحبت ہے یہ ویسی ہی اے جان کی آسائش

ساتھ آن کے سونا بھی پھر منھ کو چھپانا بھی

میر تقی میر

کیا ہی مست شراب ہے وہ بھی

اکتوبر 6, 2015میر تقی میر،اساتذہ،غزلکباب،پرشتاب،تاب،جواب،خراب،سراب،شرابadmin

دیوان دوم غزل 954

آج کچھ بے حجاب ہے وہ بھی

کیا ہی مست شراب ہے وہ بھی

میں ہی جلتا نہیں جدا دل سے

دور مجھ سے کباب ہے وہ بھی

سائل بوسہ سب گئے محروم

ایک حاضر جواب ہے وہ بھی

وہم جس کو محیط سمجھا ہے

دیکھیے تو سراب ہے وہ بھی

کم نہیں کچھ صبا سے اشک گرم

قاصد پرشتاب ہے وہ بھی

حسن سے دود دل نہیں خالی

زلف پرپیچ و تاب ہے وہ بھی

خانہ آباد کعبے میں تھا میر

کیا خدائی خراب ہے وہ بھی

میر تقی میر

کیا کہیے آج صبح عجب کچھ ہوا چلی

اکتوبر 6, 2015میر تقی میر،اساتذہ،غزلہوا،لگا،چلا،وفا،جاadmin

دیوان دوم غزل 953

جی رشک سے گئے جو ادھر کو صبا چلی

کیا کہیے آج صبح عجب کچھ ہوا چلی

کیا رنگ و بو و بادسحر سب ہیں گرم راہ

کیا ہے جو اس چمن میں ہے ایسی چلا چلی

تو دو قدم جو راہ چلا گرم اے نگار

مہندی کفک کی آگ دلوں میں لگا چلی

فتنہ ہے اس سے شہر میں برپا ہزار جا

تلوار اس کی چال پہ کیا ایک جا چلی

یہ جور و جورکش تھے کہاں آگے عشق میں

تجھ سے جفا و میر سے رسم وفا چلی

میر تقی میر

مارا خراب کر کر تعزیر کیا نکالی

اکتوبر 6, 2015میر تقی میر،اساتذہ،غزلتقریر،تحریر،تدبیر،تصویر،تعزیر،زنجیر،شمشیرadmin

دیوان دوم غزل 952

رکھا گنہ وفا کا تقصیر کیا نکالی

مارا خراب کر کر تعزیر کیا نکالی

رہتی ہے چت چڑھی ہی دن رات تیری صورت

صفحے پہ دل کے میں نے تصویر کیا نکالی

چپ بھی مری جتائی اس سے مخالفوں نے

بات اور جب بنائی تقریر کیا نکالی

بس تھی ہمیں تو تیری ابرو کی ایک جنبش

خوں ریزی کو ہماری شمشیر کیا نکالی

کی اس طبیب جاں نے تجویز مرگ عاشق

آزار کے مناسب تدبیر کیا نکالی

دل بند ہے ہمارا موج ہواے گل سے

اب کے جنوں میں ہم نے زنجیر کیا نکالی

نامے پہ لوہو رو رو خط کھینچ ڈالے سارے

یہ میر بیٹھے بیٹھے تحریر کیا نکالی

میر تقی میر

سر ہمارے ہیں گوے میداں کی

اکتوبر 6, 2015میر تقی میر،اساتذہ،غزلمہماں،میداں،گریباں،انساں،ایماں،بان،درباںadmin

دیوان دوم غزل 951

ٹپہ بازی سے چرخ گرداں کی

سر ہمارے ہیں گوے میداں کی

جی گیا اس کے تیر کے ہمراہ

تھی تواضع ضرور مہماں کی

ہیں لیے آبروے خنجر و تیغ

ترچھی پلکیں تری بھویں بانکی

پھوڑ ڈالیں گے سر ہی اس در پر

منت اٹھتی نہیں ہے درباں کی

سر دامن سے گفتگو کریے

بات بگڑی لب گریباں کی

اس بت شوخ کی ہے طینت میں

دشمنی میرے دین و ایماں کی

آدمی سے ملک کو کیا نسبت

شان ارفع ہے میر انساں کی

میر تقی میر

اس تختے نے بھی اب کے قیامت بہار کی

اکتوبر 6, 2015میر تقی میر،اساتذہ،غزلنثار،یار،کنار،گذار،پیار،پار،بہار،خار،شکارadmin

دیوان دوم غزل 950

کی سیر ہم نے سینۂ یکسر فگار کی

اس تختے نے بھی اب کے قیامت بہار کی

دریاے حسن یار تلاطم کرے کہیں

خواہش ہے اپنے جی میں بھی بوس و کنار کی

اپنا بھی جی اسیر تھا آواز عندلیب

دل میں چبھا کی رات کو جوں نوک خار کی

آنکھیں غبار لائیں مری انتظار میں

دیکھوں تو گرد کب اٹھے اس رہ گذار کی

مقدور تک تو ضبط کروں ہوں پہ کیا کروں

منھ سے نکل ہی جاتی ہے اک بات پیار کی

اب گرد سر پھروں ترے ہوں میں فقیر محض

رکھتا تھا ایک جان سو تجھ پر نثار کی

کیا صید کی تڑپ کو اٹھائے دماغ یار

نازک بہت ہے طبع مرے دل شکار کی

رکھتا نہیں طریق وفا میں کبھو قدم

ہم کچھ نہ سمجھے راہ و روش اپنے یار کی

کیا جانوں چشم تر سے ادھر دل پہ کیا ہوا

کس کو خبر ہے میر سمندر کے پار کی

میر تقی میر

اللہ اللہ رے طبیعت کی روانی اس کی

اکتوبر 6, 2015میر تقی میر،اساتذہ،غزلفشانی،مانی،نشانی،کہانی،اڑانی،بیانی،ثانی،جوانی،جانی،خزانی،دوانی،روانیadmin

دیوان دوم غزل 949

میر دریا ہے سنے شعر زبانی اس کی

اللہ اللہ رے طبیعت کی روانی اس کی

خاطر بادیہ سے دیر میں جاوے گی کہیں

خاک مانند بگولے کے اڑانی اس کی

ایک ہے عہد میں اپنے وہ پراگندہ مزاج

اپنی آنکھوں میں نہ آیا کوئی ثانی اس کی

مینھ تو بوچھار کا دیکھا ہے برستے تم نے

اسی انداز سے تھی اشک فشانی اس کی

بات کی طرز کو دیکھو تو کوئی جادو تھا

پر ملی خاک میں کیا سحر بیانی اس کی

کرکے تعویذ رکھیں اس کو بہت بھاتی ہے

وہ نظر پائوں پہ وہ بات دوانی اس کی

اس کا وہ عجز تمھارا یہ غرور خوبی

منتیں ان نے بہت کیں پہ نہ مانی اس کی

کچھ لکھا ہے تجھے ہر برگ پہ اے رشک بہار

رقعہ واریں ہیں یہ اوراق خزانی اس کی

سرگذشت اپنی کس اندوہ سے شب کہتا تھا

سو گئے تم نہ سنی آہ کہانی اس کی

مرثیے دل کے کئی کہہ کے دیے لوگوں کو

شہر دلی میں ہے سب پاس نشانی اس کی

میان سے نکلی ہی پڑتی تھی تمھاری تلوار

کیا عوض چاہ کا تھا خصمی جانی اس کی

آبلے کی سی طرح ٹھیس لگی پھوٹ بہے

دردمندی میں گئی ساری جوانی اس کی

اب گئے اس کے جز افسوس نہیں کچھ حاصل

حیف صد حیف کہ کچھ قدر نہ جانی اس کی

میر تقی میر

دھوم ہے پھر بہار آنے کی

اکتوبر 6, 2015میر تقی میر،اساتذہ،غزلکھانے،ٹھکانے،آنے،جلانے،جانے،خانے،زمانے،شانےadmin

دیوان دوم غزل 948

کچھ کرو فکر مجھ دوانے کی

دھوم ہے پھر بہار آنے کی

دل کا اس کنج لب سے دے ہیں نشاں

بات لگتی تو ہے ٹھکانے کی

وہ جو پھرتا ہے مجھ سے دور ہی دور

ہے یہ تقریب جی کے جانے کی

تیز یوں ہی نہ تھی شب آتش شوق

تھی خبر گرم اس کے آنے کی

خضر اس خط سبز پر تو موا

دھن ہے اب اپنے زہر کھانے کی

دل صد چاک باب زلف ہے لیک

بائو سی بندھ رہی ہے شانے کی

کسو کم ظرف نے لگائی آہ

تجھ سے میخانے کے جلانے کی

ورنہ اے شیخ شہر واجب تھی

جام داری شراب خانے کی

جو ہے سو پائمال غم ہے میر

چال بے ڈول ہے زمانے کی

میر تقی میر

ایک دل قطرئہ خوں تس پہ جفا کیا کیا کی

اکتوبر 6, 2015میر تقی میر،اساتذہ،غزلوفا،کہا،بہا،جفا،جلا،دوا،دعاadmin

دیوان دوم غزل 947

ہم سے دیکھا کہ محبت نے ادا کیا کیا کی

ایک دل قطرئہ خوں تس پہ جفا کیا کیا کی

کس کو لاگی کہ نہ لوہو میں ڈبایا اس کو

اس کی شمشیر کی جدول بھی بہا کیا کیا کی

جان کے ساتھ ہی آخر مرض عشق گیا

جی بھلا ٹک نہ ہوا ہم نے دوا کیا کیا کی

ان نے چھوڑی نہ طرف جور و جفا کی ہرگز

ہم نے یوں اپنی طرف سے تو وفا کیا کیا کی

سجدہ اک صبح ترے در کا کروں اس خاطر

میں نے محراب میں راتوں کو دعا کیا کیا کی

آگ سی پھنکتی ہی دن رات رہا کی تن میں

جان غمناک ترے غم میں جلا کیا کیا کی

میر نے ہونٹوں سے اس کے نہ اٹھایا جی کو

خلق اس کے تئیں یہ سن کے کہا کیا کیا کی

میر تقی میر

ہم تک نہیں پہنچتی گل کی خبر عطر کچھ

اکتوبر 6, 2015میر تقی میر،اساتذہ،غزلہنر،نظر،ور،کر،پہر،اگر،اثر،خبر،سحر،عطرadmin

دیوان دوم غزل 946

اب تو صبا چمن سے آتی نہیں ادھر کچھ

ہم تک نہیں پہنچتی گل کی خبر عطر کچھ

ذوق خبر میں ہم تو بے ہوش ہو گئے تھے

کیا جانے کب وہ آیا ہم کو نہیں خبر کچھ

یہ طشت و تیغ ہے اب یہ میں ہوں اور یہ تو

ہے ساتھ میرے ظالم دعویٰ تجھے اگر کچھ

وے دن گئے کہ بے غم کوئی گھڑی کٹے تھی

تھمتے نہیں ہیں آنسو اب تو پہر پہر کچھ

ان اجڑی بستیوں میں دیوار و در ہیں کیا کیا

آثار جن کے ہیں یہ ان کا نہیں اثر کچھ

واعظ نہ ہو معارض نیک و بد جہاں سے

جو ہوسکے تو غافل اپنا ہی فکر کر کچھ

آنکھوں میں میری عالم سارا سیاہ ہے اب

مجھ کو بغیر اس کے آتا نہیں نظر کچھ

ہم نے تو ناخنوں سے منھ سارا نوچ ڈالا

اب کوہکن دکھاوے رکھتا ہے گر ہنر کچھ

تلوار کے تلے ہی کاٹی ہے عمر ساری

ابروے خم سے اس کے ہم کو نہیں ہے ڈر کچھ

گہ شیفتہ ہیں مو کے گہ بائولے ہیں رو کے

احوال میر جی کا ہے شام کچھ سحر کچھ

میر تقی میر

جاں بہ لب رہتے ہیں پر کہتے نہیں ہیں حال کچھ

اکتوبر 6, 2015میر تقی میر،اساتذہ،غزلمال،اشکال،بال،حال،رال،سالadmin

دیوان دوم غزل 945

آوے کہنے میں رہا ہو غم سے گر احوال کچھ

جاں بہ لب رہتے ہیں پر کہتے نہیں ہیں حال کچھ

بے زری سے داغ ہیں لیکن لبوں پر مہر ہے

کہیے حاجت اپنی لوگوں سے جو وے ہوں مال کچھ

کام کو مشکل دل پر آرزو نے کردیا

یاس کلی ہوچکے تو پھر نہیں اشکال کچھ

دل ترا آیا کسو کے پیچ میں جو سدھ گئی

متصل بکھرے رہا کرتے ہیں منھ پر بال کچھ

ماہ سے ماہی تلک اس داغ میں ہیں مبتلا

کیا بلاے جان ہے میرا تمھارا حال کچھ

ایک دن کنج قفس میں ہم کہیں رہ جائیں گے

بے کلی گل بن بہت رہتی ہے اب کے سال کچھ

کیا اس آتش باز کے لونڈے کا اتنا شوق میر

بہ چلی ہے دیکھ کر اس کو تمھاری رال کچھ

میر تقی میر

صورت اک اعتبار سا ہے کچھ

اکتوبر 6, 2015میر تقی میر،اساتذہ،غزلپیار،انتظار،اختیار،اشتہار،اعتبار،بار،خار،غبارadmin

دیوان دوم غزل 944

بود نقش و نگار سا ہے کچھ

صورت اک اعتبار سا ہے کچھ

یہ جو مہلت جسے کہیں ہیں عمر

دیکھو تو انتظار سا ہے کچھ

منھ نہ ہم جبریوں کا کھلوائو

کہنے کو اختیار سا ہے کچھ

منتظر اس کی گرد راہ کے تھے

آنکھوں میں سو غبار سا ہے کچھ

ضعف پیری میں زندگانی بھی

دوش پر اپنے بار سا ہے کچھ

کیا ہے دیکھو ہو جو ادھر ہر دم

اور چتون میں پیار سا ہے کچھ

اس کی برہم زنی مژگاں سے

دل میں اب خار خار سا ہے کچھ

جیسے عنقا کہاں ہیں ہم اے میر

شہروں میں اشتہار سا ہے کچھ

میر تقی میر

ہے مزاجوں میں اپنے سودا کچھ

اکتوبر 6, 2015میر تقی میر،اساتذہ،غزلکیا،کیسا،ٹھہرا،پروا،پردہ،اچھا،دنیا،دریا،سمجھا،سوداadmin

دیوان دوم غزل 943

کھینچتا ہے دلوں کو صحرا کچھ

ہے مزاجوں میں اپنے سودا کچھ

دل نہیں جمع چشم تر سے اب

پھیلتا سا چلا یہ دریا کچھ

شہر میں حشر کیوں نہ برپا ہو

شور ہے میرے سر میں کیسا کچھ

ویسے ظاہر کا لطف ہے چھپنا

کم تماشا نہیں یہ پردہ کچھ

خلق کی کیا سمجھ میں وہ آیا

آپ سے تو گیا نہ سمجھا کچھ

یاس سے مجھ کو بھی ہو استغنا

گو نہ ہو اس کو میری پروا کچھ

کچھ نہ دیکھا تھا ہم نے پر تو بھی

آنکھ میں آئی ہی نہ دنیا کچھ

اب تو بگڑے ہی جاتے ہیں خوباں

رنگ صحبت نہیں ہے اچھا کچھ

کچھ کہو دور ہے بہت وہ شوخ

اپنے نزدیک تو نہ ٹھہرا کچھ

وصل اس کا خدا نصیب کرے

میر دل چاہتا ہے کیا کیا کچھ

میر تقی میر

کج طبیعت جو مخالف ہیں انھوں سے جا سمجھ

اکتوبر 6, 2015میر تقی میر،اساتذہ،غزللڑکا،مرتا،کیا،اچھا،جا،حلوا،ساadmin

دیوان دوم غزل 942

ہم سے کیوں الجھا کرے ہے آ سمجھ اے ناسمجھ

کج طبیعت جو مخالف ہیں انھوں سے جا سمجھ

یار کی ان بھولی باتوں پر نہ جا اے ہم نشیں

ایک فتنہ ہے وہ اس کو آہ مت لڑکا سمجھ

خوبرو عشاق سے بد پیش آتے ہی سنے

گرچہ خوش ظاہر ہیں یہ پر ان کو مت اچھا سمجھ

باغباں بے رحم گل بے دید موسم بے وفا

آشیاں اس باغ میں بلبل نے باندھا کیا سمجھ

میں جو نرمی کی تو دونا سر چڑھا وہ بدمعاش

کھانے ہی کو دوڑتا ہے اب مجھے حلوا سمجھ

دور سے دیکھی جو بدحالی وہیں سے ٹل گیا

دو قدم آگے نہ آیا مجھ کو وہ مرتا سمجھ

میر کی عیاریاں معلوم لڑکوں کو نہیں

کرتے ہیں کیا کیا ادائیں اس کو سادہ سا سمجھ

میر تقی میر

چاہ وہ ہے جو ہو نباہ کے ساتھ

اکتوبر 6, 2015میر تقی میر،اساتذہ،غزلماہ،نگاہ،نباہ،کلاہ،آہ،خیرخواہ،راہadmin

دیوان دوم غزل 941

لطف کیا ہر کسو کی چاہ کے ساتھ

چاہ وہ ہے جو ہو نباہ کے ساتھ

وقت کڑھنے کے ہاتھ دل پر رکھ

جان جاتی رہے نہ آہ کے ساتھ

عشق میں ترک سر کیے ہی بنے

مشورت تو بھی کر کلاہ کے ساتھ

ہو اگرچند آسماں پہ ولے

نسبت اس مہ کو کیا ہے ماہ کے ساتھ

سفری وہ جو مہ ہوا تا دیر

چشم اپنی تھی گرد راہ کے ساتھ

جاذبہ تو ان آنکھوں کا دیکھا

جی کھنچے جاتے ہیں نگاہ کے ساتھ

میر سے تم برے ہی رہتے ہو

کیا شرارت ہے خیرخواہ کے ساتھ

میر تقی میر

رہتا ہے آب دیدہ یاں تا گلے ہمیشہ

اکتوبر 6, 2015میر تقی میر،اساتذہ،غزلملے،چلے،ڈھلے،گلے،بلے،جلے،رلےadmin

دیوان دوم غزل 940

پھرتی ہیں اس کی آنکھیں آنکھوں تلے ہمیشہ

رہتا ہے آب دیدہ یاں تا گلے ہمیشہ

تصدیع ایک دو دن ہووے تو کوئی کھینچے

تڑپے جگر ہمیشہ چھاتی جلے ہمیشہ

اک اس مغل بچے کو وعدہ وفا نہ کرنا

کچھ جا کہیں تو کرنا آرے بلے ہمیشہ

کب تک وفا کرے گا یوں حوصلہ ہمارا

دل پیسے درد اکثر غم جی ملے ہمیشہ

اس جسم خاکی سے ہم مٹی میں اٹ رہے ہیں

یوں خاک میں کہاں تک کوئی رلے ہمیشہ

آئندہ و روندہ باد سحر کبوتر

قاصد نیا ادھر کو کب تک چلے ہمیشہ

مسجد میں چل کے ملیے جمعے کے دن بنے تو

ہوتے ہیں میر صاحب واں دن ڈھلے ہمیشہ

میر تقی میر

گویا کہ ہیں یہ لڑکے پیر زمانہ دیدہ

اکتوبر 6, 2015میر تقی میر،اساتذہ،غزلچیدہ،ناخلیدہ،کبیدہ،بریدہ،جریدہ،دیدہ،رمیدہ،رسیدہ،شنیدہadmin

دیوان دوم غزل 939

ٹک پاس آ کے کیسے صرفے سے ہیں کشیدہ

گویا کہ ہیں یہ لڑکے پیر زمانہ دیدہ

اب خاک تو ہماری سب سبز ہو چلی ہے

کب منھ ادھر کرے گا وہ آہوے رمیدہ

یوسف سے کوئی کیونکر اس ماہ کو ملاوے

ہے فرق رات دن کا از دیدہ تا شنیدہ

بندے کے درد دل کو کوئی نہیں پہنچتا

ہر ایک بے حقیقت یاں ہے خدا رسیدہ

کیا وسوسہ ہے مجھ کو عزت سے جینے کا یاں

نکلا نہ میرے دل سے یہ خار ناخلیدہ

ہم کاڑھ کر جگر بھی آگے تمھارے رکھا

پھر یا نصیب اس پر تم جو ہوئے کبیدہ

سائے سے اپنے وحشت ہم کو رہی ہمیشہ

جوں آفتاب ہم بھی کیسے رہے جریدہ

منصور کی نظر تھی جو دار کی طرف سو

پھل وہ درخت لایا آخر سر بریدہ

ذوق سخن ہوا ہے اب تو بہت ہمیں بھی

لکھ لیں گے میر جی کے کچھ شعر چیدہ چیدہ

میر تقی میر

مانند برق ہیں یاں وے لوگ جستہ جستہ

اکتوبر 6, 2015میر تقی میر،اساتذہ،غزلبستہ،جستہ،خستہ،دستہ،شکستہadmin

دیوان دوم غزل 938

پیدا نہیں جہاں میں قید جہاں سے رستہ

مانند برق ہیں یاں وے لوگ جستہ جستہ

ظالم بھلی نہیں ہے برہم زنی مژگاں

مر جائے گا کسو دن یوں کوئی سینہ خستہ

پاے حنائی اس کے ہاتھوں ہی پر رکھے ہیں

پر اس کو خوش نہ آیا یہ کار دست بستہ

شہر چمن سے کچھ کم دشت جنوں نہیں ہے

یاں گل ہیں رستہ رستہ واں باغ دستہ دستہ

معمار کا وہ لڑکا پتھر ہے اس کی خاطر

کیوں خاک میں ملا تو اے میر دل شکستہ

میر تقی میر

اس چال پر چلے گی تلوار رفتہ رفتہ

اکتوبر 6, 2015میر تقی میر،اساتذہ،غزلہموار،ناچار،یار،اظہار،بیمار،تلوار،تکرار،خار،زنارadmin

دیوان دوم غزل 937

ظالم یہ کیا نکالی رفتار رفتہ رفتہ

اس چال پر چلے گی تلوار رفتہ رفتہ

ہر آن ہم کو تجھ بن ایک اک برس ہوئی ہے

کیا آ گیا زمانہ اے یار رفتہ رفتہ

کیا کہیے کیونکے جانیں بے پردہ جاتیاں ہیں

اس معنی کا بھی ہو گا اظہار رفتہ رفتہ

یہ ہی سلوک اس کے اکثر چلے گئے تو

بیٹھیں گے اپنے گھر ہم ناچار رفتہ رفتہ

پامال ہوں کہ اس میں ہوں خاک سے برابر

اب ہو گیا ہے سب کچھ ہموار رفتہ رفتہ

چاہت میں دخل مت دے زنہار آرزو کو

کردے ہے دل کی خواہش بیمار رفتہ رفتہ

خاطر نہ جمع رکھو ان پلکوں کی خلش سے

سر دل سے کاڑھتے ہیں یاں خار رفتہ رفتہ

تھے ایک ہم وے دونوں سو اتحاد کیسا

ہر بات پر اب آئی تکرار رفتہ رفتہ

گر بت کدے میں جانا ایسا ہے میر جی کا

تو تار سبحہ ہو گا زنار رفتہ رفتہ

میر تقی میر

سانپ سا چھاتی پہ پھر جاتا ہے آہ

اکتوبر 6, 2015میر تقی میر،اساتذہ،غزلماہ،نگاہ،ناف،نباہ،واہ!،کلاہ،گناہ،گاہ،آہ،باہ،خواہ،راہ،سراہadmin

دیوان دوم غزل 936

یاد جب آتی ہے وہ زلف سیاہ

سانپ سا چھاتی پہ پھر جاتا ہے آہ

کھل گیا منھ اب تو اس محجوب کا

کچھ سخن کی بھی نکل آوے گی راہ

شرم کرنی تھی مرا سر کاٹ کر

سو تو ان نے اور ٹیڑھی کی کلاہ

یار کا وہ ناز اپنا یہ نیاز

دیکھیے ہوتا ہے کیونکر یوں نباہ

دین میں اس کافر بے رحم کے

اجر اک رکھتا ہے خون بے گناہ

پتھروں سے سینہ کوبی میں نے کی

دل کے ماتم میں مری چھاتی سراہ

مول لے چک مجھ کو آنکھیں موند کر

دیکھ تو قیمت ہے میری اک نگاہ

لذت دنیا سے کیا بہرہ ہمیں

پاس ہے رنڈی ولے ہے ضعف باہ

روٹھ کر کیا آپ سے ملنے میں لطف

ہووے وہ بھی تو کبھو ٹک عذر خواہ

ضبط بہتیرا ہی کرتے ہیں ولے

آہ اک منھ سے نکل جاتی ہے گاہ

اس کے رو کے رفتہ ہی آئے ہیں یاں

آج سے تو کچھ نہیں یہ جی کی چاہ

دیکھ رہتے دھوکے اس رخسار کے

دایہ منھ دھوتے جو کہتی ماہ ماہ

شیخ تونے خوب سمجھا میر کو

واہ وا اے بے حقیقت واہ واہ

میر تقی میر

دو باتیں گر لکھوں میں دل کو ٹک اک لگالو

اکتوبر 6, 2015میر تقی میر،اساتذہ،غزللو،لگالو،نکالو،والو،ٹالو،جالو،سنبھالوadmin

دیوان دوم غزل 935

یوں کب ہوا ہے پیارے پاس اپنے تم بلالو

دو باتیں گر لکھوں میں دل کو ٹک اک لگالو

اب جو نصیب میں ہے سو دیکھ لوں گا میں بھی

تم دست لطف اپنا سر سے مرے اٹھا لو

جنبش بھی اس کے آگے ہونٹوں کو ہو تو کہیو

یوں اپنے طور پر تم باتیں بہت بنا لو

دو نعروں ہی میں شب کے ہو گا مکان ہو کا

سن رکھو کان رکھ کر یہ بات بستی والو

نام خدا ستم میں تم نامور تو ہو ہی

پر ایک دو کو یوں ہی للہ مار ڈالو

زلف اور خال و خط کا سودا نہیں ہے اچھا

یارو بنے تو سر سے جلد اس بلا کو ٹالو

یاران رفتہ ایسے کیا دورتر گئے ہیں

ٹک کرکے تیزگامی اس قافلے کو جالو

بازاری سارے وے ہی کہتے ہیں راز بیٹھے

جن کو ہمیں کہا ہے تم منھ سے مت نکالو

یوں رفتہ اور بے خود کب تک رہا کروگے

تم اب بھی میر صاحب اپنے تئیں سنبھالو

میر تقی میر

صبح کی بائو سے لگ لگنے نہ دیتی گل کو

اکتوبر 6, 2015میر تقی میر،اساتذہ،غزلمل،کل،کاکل،گل،سنبلadmin

دیوان دوم غزل 934

ہوتی کچھ عشق کی غیرت بھی اگر بلبل کو

صبح کی بائو سے لگ لگنے نہ دیتی گل کو

میں نے سر اپنا دھنا تھا تبھی اس شوخ نے جب

پگڑی کے پیچ سے باندھا تھا اٹھا کاکل کو

مستی ان آنکھوں سے نکلے ہے اگر دیکھو خوب

خلق بدنام عبث کرتی ہے جام مل کو

جیسے ہوتی ہے کتاب ایک ورق بن ناقص

نسبت تام اسی طور ہے جز سے کل کو

ایک لحظے ہی میں بل سارے نکل جاتے میر

پیچ اس زلف کے دینے تھے دکھا سنبل کو

میر تقی میر

محل شکر ہے آتا نہیں گلہ مجھ کو

اکتوبر 6, 2015میر تقی میر،اساتذہ،غزلملا،مساہلہ،گلہ،پلا،جلا،دلا،سلا،سلسلہadmin

دیوان دوم غزل 933

عنایت ازلی سے جو دل ملا مجھ کو

محل شکر ہے آتا نہیں گلہ مجھ کو

تنک شراب ضعیف الدماغ ہوں ساقی

دم سحر مئے پرزور مت پلا مجھ کو

پڑا رہے کوئی مردہ سا کب تلک خاموش

ہلا کہیں لب جاں بخش کو جلا مجھ کو

جنوں میں سخت ہے اس زلف سے علاقۂ دل

خوش آگیا ہے نہایت یہ سلسلہ مجھ کو

فلک کی چرخ زنی برسوں ہو تو مجھ سا ہو

سمجھ سمجھ کے تنک خاک میں ملا مجھ کو

رہا تھا خوں تئیں ہمرہ سو آپھی خون ہے حیف

رفیق تجھ سا ملے گا کہاں دلا مجھ کو

درستی جیب کی اتنی نہیں ہے اے ناصح

بنے تو سینۂ صدچاک دے سلا مجھ کو

ہوا ہوں خاک پہ دل کی وہی ہے ناصافی

ابھی اس آئینے کی کرنی ہے جلا مجھ کو

مگر کہ مردن دشوار میر سہل ہے شوخ

ہلاک کرتا ہے تیرا مساہلہ مجھ کو

میر تقی میر

دینا تھا تنک رحم بھی بیدادگروں کو

اکتوبر 6, 2015میر تقی میر،اساتذہ،غزلنوسفروں،نظروں،پروں،بیدادگروں،تروں،جگروں،جانوروں،خبروں،دروں،سروںadmin

دیوان دوم غزل 932

کیا چہرے خدا نے دیے ان خوش پسروں کو

دینا تھا تنک رحم بھی بیدادگروں کو

آنکھوں سے ہوئی خانہ خرابی دل اے کاش

کر لیتے تبھی بند ہم ان دونوں دروں کو

پرواز گلستاں کے تو شائستہ نہ نکلے

پروانہ نمط آگ ہم اب دیں گے پروں کو

سب طائر قدسی ہیں یہ جو زیر فلک ہیں

موندا ہے کہاں عشق نے ان جانوروں کو

زنہار ترے دل کی توجہ نہ ہو ایدھر

آگے ترے ہم کاڑھ رکھیں گر جگروں کو

پیراہن صدچاک سلاتے ہیں مرا لوگ

تہ سے نہیں مطلق خبر ان بے خبروں کو

جوں اشک جہاں جاتے رہیں گے تو گئے پھر

دیکھا کرو ٹک آن کے ہم دیدہ تروں کو

اس باغ کے ہر گل سے چپک جاتی ہیں آنکھیں

مشکل بنی ہے آن کے صاحب نظروں کو

آداب جنوں چاہیے ہم سے کوئی سیکھے

دیکھا ہے بہت یاروں نے آشفتہ سروں کو

اندیشہ کی جاگہ ہے بہت میرجی مرنا

درپیش عجب راہ ہے ہم نوسفروں کو

میر تقی میر

کہ افشاں کیجے خون اپنے سے اس کے دامن زیں کو

اکتوبر 6, 2015میر تقی میر،اساتذہ،غزلگرچیں،بالیں،تمکیں،تسکیں،خونیں،دیں،دیریں،رنگیں،زیں،سیمیں،شیریںadmin

دیوان دوم غزل 931

ملا یا رب کہیں اس صید افگن سربسر کیں کو

کہ افشاں کیجے خون اپنے سے اس کے دامن زیں کو

گئے وے سابقے سارے خصوصیت رہے پیارے

کبھو در تک تو آ بارے ہمارے دل کی تسکیں کو

پیے جاتے نہیں بس اب لہو کے گھونٹ یہ مجھ سے

بہت پی پی گیا ڈر سے ترے میں اشک خونیں کو

نہ لکھیں یار کو محضر ہمارے خون ناحق کا

دکھا دیویں گے ہم محشر میں اس کے دست رنگیں کو

بجز حیرت نہ بن آوے گی کوئی شکل پھر اس سے

دکھایا ہم نے گر چہرہ ترا صورت گرچیں کو

ابھر کر سنگ کے تختے سے پھر دیکھا کیا اودھر

محبت ہو گئی تھی کوہکن سے نقش شیریں کو

ہم اس کے چاند سے منھ کے ہیں عاشق مہ سے کیا ہم کو

سر اپنا کبک ہی مارا کرے اس خشت سیمیں کو

ہوئے کیا کیا مقدس لوگ آوارہ ترے غم میں

سبک پا کر دکھایا شوخ تونے اہل تمکیں کو

بہت مدت ہوئی صحرا سے مجنوں کی خبر آئے

نہیں معلوم پیش آیا ہے کیا اس یار دیریں کو

لیے تسبیح ہاتھوں میں جو تو باتیں بناتا ہے

نہیں دیکھا ہے واعظ تونے اس غارت گر دیں کو

گیا کوچے سے تیرے اٹھ کے میر آشفتہ سر شاید

پڑا دیکھا تھا میں نے رہ میں اس کے سنگ بالیں کو

میر تقی میر

مجلس میں بہت وجد کی حالت رہی سب کو

اکتوبر 6, 2015میر تقی میر،اساتذہ،غزلقصب،لب،نسب،ڈھب،تعب،سب،سبب،طلب،غضبadmin

دیوان دوم غزل 930

مطرب نے پڑھی تھی غزل اک میر کی شب کو

مجلس میں بہت وجد کی حالت رہی سب کو

پھرتے ہیں چنانچہ لیے خدام سلاتے

درویشوں کے پیراہن صد چاک قصب کو

کیا وجہ کہیں خوں شدن دل کی پیارے

دیکھو تو ہو آئینے میں تم جنبش لب کو

برسوں تئیں جب ہم نے تردد کیے ہیں تب

پہنچایا ہے آدم تئیں واعظ کے نسب کو

ہے رحم کو بھی راہ دل یار میں بارے

جاگہ نہیں یاں ورنہ کہیں اس کے غضب کو

کیا ہم سے گنہگار ہیں یہ سب جو موئے ہیں

کچھ پوچھو نہ اس شوخ کی رنجش کے سبب کو

دل دینے سے اس طرح کے جی کاش کے دیتے

یوں کھینچے کوئی کب تئیں اس رنج و تعب کو

حیرت ہے کہ ہے مدعی معرفت اک خلق

کچھ ہم نے تو پایا نہیں اب تک ترے ڈھب کو

ہو گا کسو دیوار کے سائے میں پڑا میر

کیا ربط محبت سے اس آرام طلب کو

میر تقی میر

قدرت سے اس کے دل کی کل پھیر دے ادھر کو

اکتوبر 6, 2015میر تقی میر،اساتذہ،غزلگہر،ادھر،تر،جگر،سفر،سحر،شجرadmin

دیوان دوم غزل 929

لا میری اور یارب آج ایک خوش کمر کو

قدرت سے اس کے دل کی کل پھیر دے ادھر کو

بے طاقتی میں شب کی پوچھو نہ ضبط میرا

ہاتھوں میں دل کو رکھا دانتوں تلے جگر کو

پھولا پھلا نہ اب تک ہرگز درخت خواہش

برسوں ہوئے کہ دوں ہوں خون دل اس شجر کو

ہے روزگار میرا ایسا سیہ کہ یارو

مشکل ہے فرق کرنا ٹک شام سے سحر کو

ہرچند ہے سخن کو تشبیہ در سے لیکن

باتیں مری سنو تو تم پھینک دو گہر کو

نزدیک ہے کہ جاویں ہم آپ سے اب آئو

ملتے ہیں دوستوں سے جاتے ہوئے سفر کو

کب میر ابر ویسا برساوے کر اندھیری

جیسا کہ روتے ہم نے دیکھا ہے چشم تر کو

میر تقی میر

گل پھول دیکھنے کو بھی ٹک اٹھ چلا کرو

اکتوبر 6, 2015میر تقی میر،اساتذہ،غزللیا،چلا،وفا،ادا،جفا،جدا،خفا،دوا،دعا،رہا،سناadmin

دیوان دوم غزل 928

جوں غنچہ میر اتنے نہ بیٹھے رہا کرو

گل پھول دیکھنے کو بھی ٹک اٹھ چلا کرو

جوں نے نہ زارنالی سے ہم ایک دم رہیں

تم بند بند کیوں نہ ہمارا جدا کرو

سوتے کے سوتے یوں ہی نہ رہ جائیں ہم کبھو

آنکھیں ادھر سے موند نہ اپنی لیا کرو

سودے میں اس کے بک گئے ایسے کئی ہزار

یوسفؑ کا شور دور ہی سے تم سنا کرو

ہوتے ہو بے دماغ تو دیکھو ہو ٹک ادھر

غصے ہی ہم پہ کاش کے اکثر رہا کرو

یہ اضطراب دیکھ کہ اب دشمنوں سے بھی

کہتا ہوں اس کے ملنے کی کچھ تم دعا کرو

دم رکتے ہیں سیاہی مژگاں ہی دیکھ کر

سرمہ لگا کے اور ہمیں مت خفا کرو

پورا کریں ہیں وعدے کو اپنے ہم آج کل

وعدے کے تیں وصال کے تم بھی وفا کرو

دشمن ہیں اپنے جی کے تمھارے لیے ہوئے

تم بھی حقوق دوستی کے کچھ ادا کرو

اپنا چلے تو آپھی ستم سب اٹھایئے

تم کون چاہتا ہے کسو پر جفا کرو

ہر چند ساتھ جان کے ہے عشق میر لیک

اس درد لاعلاج کی کچھ تو دوا کرو

میر تقی میر

اس کنے بیٹھنے پائو تو مباہات کرو

اکتوبر 6, 2015میر تقی میر،اساتذہ،غزلملاقات،مباہات،کرامات،بات،خیالاتadmin

دیوان دوم غزل 927

مت سگ یار سے دعواے مساوات کرو

اس کنے بیٹھنے پائو تو مباہات کرو

صحبت آخر ہے ہماری نہ کرو پھر افسوس

متصل ہوسکے تو ہم سے ملاقات کرو

دیدنی ہے یہ ہوا شیخ جی سے کوئی کہے

کہ چلو میکدے ٹک تم تو کرامات کرو

تم تو تصویر ہوئے دیکھ کے کچھ آئینہ

اتنی چپ بھی نہیں ہے خوب کوئی بات کرو

بس بہت وقت کیا شعر کے فن میں ضائع

میر اب پیر ہوئے ترک خیالات کرو

میر تقی میر

پر ہے یہی ہمارے کیے کی سزا کہو

اکتوبر 6, 2015میر تقی میر،اساتذہ،غزللکھا،ماجرا،مدعا،وفا،کیا،بھلا،جدا،دعا،سڑا،سزاadmin

دیوان دوم غزل 926

لائق نہیں تمھیں کہ ہمیں ناسزا کہو

پر ہے یہی ہمارے کیے کی سزا کہو

چپکے رہے بھی چین نہیں تب کہے ہے یوں

لب بستہ بیٹھے رہتے جو ہو مدعا کہو

پیغام بر تو یارو تمھیں میں کروں ولے

کیا جانوں جاکے حق میں مرے اس سے کیا کہو

اب نیک و بد پہ عشق میں مجھ کو نظر نہیں

اس میں مجھے برا کہو کوئی بھلا کہو

سر خاک آستاں پہ تمھاری رہا مدام

اس پر بھی یا نصیب جو تم بے وفا کہو

برسوں تلک تو گھر میں بلا گالیاں دیاں

اب در پہ سن کے کہنے لگے ہیں دعا کہو

صحبت ہماری اس کی جو ہے گفتنی نہیں

کیا کہیے گر کہے کوئی یہ ماجرا کہو

یارو خصوصیت تو رہے اپنی اس کے ساتھ

میرا کہو جو حال تو اس سے جدا کہو

آشفتہ مو حواس پریشاں خراب حال

دیکھو مجھے تو خبطی دوانہ سڑا کہو

کب شرح شوق ہوسکے پر تو بھی میرجی

خط تم نے جو لکھا اسے کیا کیا لکھا کہو

میر تقی میر

آخر ہوئی کہانی مری تم بھی سو رہو

اکتوبر 6, 2015میر تقی میر،اساتذہ،غزلڈبو،کھو،تو،جو،دھو،رفو،سوadmin

دیوان دوم غزل 925

سب سرگذشت سن چکے اب چپکے ہو رہو

آخر ہوئی کہانی مری تم بھی سو رہو

جوش محیط عشق میں کیا جی سے گفتگو

اس گوہر گرامی سے اب ہاتھ دھو رہو

فندق تو ہے پہ یہ بھی تماشے کا رنگ ہے

ٹک انگلیوں کو خون میں میرے ڈبو رہو

اتنا سیاہ خانۂ عاشق سے ننگ کیا

کتنے دنوں میں آئے ہو یاں رات تو رہو

ٹھہرائو تم کو شوخی سے جوں برق ٹک نہیں

ٹھہرے تو ٹھہرے دل بھی مرا نچلے جو رہو

ہم خواب تجھ سے ہوکے رہا جاوے کس طرح

ملتے ہوئے سمجھ کے کہا کر رہو رہو

خطرہ بہت ہے میر رہ صعب عشق میں

ایسا نہ ہو کہیں کہ دل و دیں کو کھو رہو

میر تقی میر

وہ چاند سا جو نکلے تو رفع حجاب ہو

اکتوبر 6, 2015میر تقی میر،اساتذہ،غزلکباب،کتاب،آفتاب،آب،جواب،حباب،حجاب،حساب،خواب،خراب،شتاب،شرابadmin

دیوان دوم غزل 924

تاچند انتظار قیامت شتاب ہو

وہ چاند سا جو نکلے تو رفع حجاب ہو

احوال کی خرابی مری پہنچی اس سرے

اس پر بھی وہ کہے ہے ابھی ٹک خراب ہو

یاں آنکھیں مندتے دیر نہیں لگتی میری جاں

میں کان کھولے رکھتا ہوں تیرے شتاب ہو

پھولوں کے عکس سے نہیں جوے چمن میں رنگ

گل بہ چلے ہیں شرم سے اس منھ کی آب ہو

یاں جرم گنتے انگلیوں کے خط بھی مٹ گئے

واں کس طرح سے دیکھیں ہمارا حساب ہو

غفلت ہے اپنی عمر سے تم کو ہزار حیف

یہ کاروان جانے پہ تم مست خواب ہو

شان تغافل اس کی لکھی ہم سے کب گئی

جب نامہ بر ہلاک ہو تب کچھ جواب ہو

لطف شراب ابر سے ہے سو نصیب دیکھ

جب لیویں جام ہاتھ میں تب آفتاب ہو

ہستی پر ایک دم کی تمھیں جوش اس قدر

اس بحرموج خیز میں تم تو حباب ہو

جی چاہتا ہے عیش کریں ایک رات ہم

تو ہووے چاندنی ہو گلابی شراب ہو

پرپیچ و تاب دود دل اپنا ہے جیسے زلف

جب اس طرح سے جل کے درونہ کباب ہو

آگے زبان یار کے خط کھینچے سب نے میر

پہلی جو بات اس کی کہیں تو کتاب ہو

میر تقی میر

کہ پھر موئے ہی بنے ہے اگر جدائی ہو

اکتوبر 6, 2015میر تقی میر،اساتذہ،غزلہنسائی،ہوائی،لڑائی،نوائی،آئی،بھائی،جدائی،خودنمائی،رہائی،سمائی،سائیadmin

دیوان دوم غزل 923

خدا کرے کہ بتوں سے نہ آشنائی ہو

کہ پھر موئے ہی بنے ہے اگر جدائی ہو

بدن نما ہے ہر آئینہ لوح تربت کا

نظر جسے ہو اسے خاک خودنمائی ہو

بدی نوشتے کی تحریر کیا کروں اپنے

کہ نامہ پہنچے تو پھر کاغذ ہوائی ہو

فرو نہ آوے سر اس کا طواف کعبہ سے

نصیب جس کے ترے در کی جبہہ سائی ہو

ہماری چاہ نہ یوسفؑ ہی پر ہے کچھ موقوف

نہیں ہے وہ تو کوئی اور اس کا بھائی ہو

گلی میں اس کی رہا جا کے جو کوئی سو رہا

وہی تو جاوے ہے واں جس کسو کی آئی ہو

لب سوال نہ اک بوسے کے لیے کھولوں

ہزار مہر و محبت میں بے نوائی ہو

زمانہ یار نہیں اپنے بخت سے اتنا

کہ مدعی سے اسے ایک دن لڑائی ہو

جفا و جور و ستم اس کے آپ ہی سہیے

جو اپنے حوصلہ میں کچھ بھی اب سمائی ہو

ہزار موسم گل تو گئے اسیری میں

دکھائی دے ہے موئے ہی پہ اب رہائی ہو

چمکتے دانتوں سے اس کے ہوئی ہے روکش میر

عجب نہیں ہے کہ بجلی کی جگ ہنسائی ہو

میر تقی میر

بے رحمی اتنی عیب نہیں بے وفا نہ ہو

اکتوبر 6, 2015میر تقی میر،اساتذہ،غزلہوا،لگا،وفا،یا،آسرا،بھلا،جدا،خفا،خداadmin

دیوان دوم غزل 922

ظالم ہو میری جان پہ ناآشنا نہ ہو

بے رحمی اتنی عیب نہیں بے وفا نہ ہو

کرتی ہے عشق بازی کو بے مائگی وبال

کیا کھیلے وہ جوا جسے کچھ آسرا نہ ہو

ہجر بتاں میں طبع پراگندہ ہی رہی

کافر بھی اپنے یار سے یارب جدا نہ ہو

آزار کھینچنے کے مزے عاشقوں سے پوچھ

کیا جانے وہ کہ جس کا کہیں دل لگا نہ ہو

کھینچا ہے آدمی نے بہت دور آپ کو

اس پردے میں خیال تو کر ٹک خدا نہ ہو

رک جائے دم گر آہ نہ کریے جہاں کے بیچ

اس تنگناے میں کریں کیا جو ہوا نہ ہو

طرزسخن تو دیکھ ٹک اس بدمعاش کی

دل داغ کس طرح سے ہمارا بھلا نہ ہو

شکوہ سیاہ چشمی کا سن ہم سے یہ کہا

سرمہ نہیں لگانے کا میں تم خفا نہ ہو

جی میں تو ہے کہ دیکھیے آوارہ میر کو

لیکن خدا ہی جانے وہ گھر میں ہو یا نہ ہو

میر تقی میر

جی میں ہم نے یہ کیا ہے اب مقرر ہو سو ہو

اکتوبر 6, 2015میر تقی میر،اساتذہ،غزلقلندر،مقرر،میسر،کر،پتھر،پرور،بہتر،تر،سرadmin

دیوان دوم غزل 921

رکھیے گردن کو تری تیغ ستم پر ہو سو ہو

جی میں ہم نے یہ کیا ہے اب مقرر ہو سو ہو

قطرہ قطرہ اشک باری تو کجا پیش سحاب

ایک دن تو ٹوٹ پڑ اے دیدئہ تر ہو سو ہو

بند میں ناز و نعم ہی کے رہے کیونکر فقیر

یہ فضولی ہے فقیری میں میسر ہو سو ہو

آ کے کوچے سے ترے جاتا ہوں کب جوں ابرشب

تیر باراں ہو کہ برسے تیغ یک سر ہو سو ہو

صاحبی کیسی جو تم کو بھی کوئی تم سا ملا

پھر تو خواری بے وقاری بندہ پرور ہو سو ہو

کب تلک فریاد کرتے یوں پھریں اب قصد ہے

داد لیجے اپنی اس ظالم سے اڑ کر ہو سو ہو

بال تیرے سر کے آگے تو جیوں کے ہیں وبال

سر منڈاکر ہم بھی ہوتے ہیں قلندر ہو سو ہو

سختیاں دیکھیں تو ہم سے چند کھنچواتا ہے عشق

دل کو ہم نے بھی کیا ہے اب تو پتھر ہو سو ہو

کہتے ہیں ٹھہرا ہے تیرا اور غیروں کا بگاڑ

ہیں شریک اے میر ہم بھی تیرے بہتر ہو سو ہو

میر تقی میر

سو تب تلک کہ مجھ کو ہجراں سے تیرے خو ہو

اکتوبر 6, 2015میر تقی میر،اساتذہ،غزلگفتگو،گو،آرزو،اتو،بقدرمو،بو،تو،خو،رفو،روبروadmin

دیوان دوم غزل 920

ٹک لطف سے ملاکر گو پھر کبھو کبھو ہو

سو تب تلک کہ مجھ کو ہجراں سے تیرے خو ہو

کیا کیا جوان ہم نے دنیا سے جاتے دیکھے

اے عشق بے محابا دنیا ہو اور تو ہو

ایسے کہو گے کچھ تو ہم چپکے ہو رہیں گے

ہر بات پر کہاں تک آپس میں گفتگو ہو

کیا ہے جواب ظالم پرسش کے روز کہیو

جو روسیاہ یہ بھی واں آ کے روبرو ہو

پرخوں ہمارے دل سے کتنی ہے تو مشابہ

شاید کلی تجھے بھی اس گل کی آرزو ہو

خط اس کے پشت لب کا ساکت کرے گا تجھ کو

کہیو اگر تفاوت اس میں بقدرمو ہو

کھولے تھے بال کن نے ہنگام صبح اپنے

آئی ہے اے صبا تو ایسی جو مشک بو ہو

درویشی سے بھی اپنی نکلے ہے میرزائی

نقش حصیر تن پر ایسے ہیں جوں اتو ہو

مت التیام چاہے پھر دل شکستگاں سے

ممکن نہیں کہ شیشہ ٹوٹا ہوا رفو ہو

کہتے ہو کانپتا ہوں جوں بید عاشقی سے

تم بھی تو میر صاحب کتنے خلاف گو ہو

میر تقی میر

ایسا نہ ہو کہ کام ہی اس کا اخیر ہو

اکتوبر 6, 2015میر تقی میر،اساتذہ،غزلفقیر،مشیر،پیر،پذیر،اخیر،اسیر،تیر،حقیر،دستگیر،شیر،شریر،صفیر،صریر،عبیرadmin

دیوان دوم غزل 919

ہر صبح شام تو پئے ایذاے میر ہو

ایسا نہ ہو کہ کام ہی اس کا اخیر ہو

ہو کوئی بادشاہ کوئی یاں وزیر ہو

اپنی بلا سے بیٹھ رہے جب فقیر ہو

جنت کی منت ان کے دماغوں سے کب اٹھے

خاک رہ اس کی جن کے کفن کا عبیر ہو

کیا یوں ہی آب و تاب سے ہو بیٹھیں کار عشق

سوکھے جگر کا خوں تو رواں جوے شیر ہو

چھاتی قفس میں داغ سے ہو کیوں نہ رشک باغ

جوش بہار تھا کہ ہم آئے اسیر ہو

یاں برگ گل اڑاتے ہیں پرکالۂ جگر

جا عندلیب تو نہ مری ہم صفیر ہو

اس کے خیال خط میں کسے یاں دماغ حرف

کرتی ہے بے مزہ جو قلم کی صریر ہو

زنہار اپنی آنکھ میں آتا نہیں وہ صید

پھوٹا دوسار جس کے جگر میں نہ تیر ہو

ہوتے ہیں میکدے کے جواں شیخ جی برے

پھر درگذر یہ کرتے نہیں گوکہ پیر ہو

کس طرح آہ خاک مذلت سے میں اٹھوں

افتادہ تر جو مجھ سے مرا دستگیر ہو

حد سے زیادہ جور و ستم خوشنما نہیں

ایسا سلوک کر کہ تدارک پذیر ہو

دم بھر نہ ٹھہرے دل میں نہ آنکھوں میں ایک پل

اتنے سے قد پہ تم بھی قیامت شریر ہو

ایسا ہی اس کے گھر کو بھی آباد دیکھیو

جس خانماں خراب کا یہ دل مشیر ہو

تسکین دل کے واسطے ہر کم بغل کے پاس

انصاف کریے کب تئیں مخلص حقیر ہو

یک وقت خاص حق میں مرے کچھ دعا کرو

تم بھی تو میر صاحب و قبلہ فقیر ہو

میر تقی میر

پھر برسوں تئیں پیارے جی سے نہیں جاتے ہو

اکتوبر 6, 2015میر تقی میر،اساتذہ،غزلچھپاتے،اٹھاتے،بناتے،بندھاتے،بٹھاتے،بتاتے،جاتے،رلاتے،سناتےadmin

دیوان دوم غزل 918

برسوں میں کبھو ایدھر تم ناز سے آتے ہو

پھر برسوں تئیں پیارے جی سے نہیں جاتے ہو

آتے ہو کبھو یاں تو ہم لطف نہیں پاتے

سو آفتیں لاتے ہو سو فتنے اٹھاتے ہو

رہتے ہو تم آنکھوں میں پھرتے ہو تمھیں دل میں

مدت سے اگرچہ یاں آتے ہو نہ جاتے ہو

ایسی ہی زباں ہے تو کیا عہدہ برآ ہوں گے

ہم ایک نہیں کہتے تم لاکھ سناتے ہو

خوش کرنے سے ٹک ایسے ناخوش ہی رکھا کریے

ہنستے ہو گھڑی بھر تو پہروں ہی رلاتے ہو

اک خلق تلاشی ہے تم ہاتھ نہیں لگتے

لڑکے تو ہو پر سب کو ٹالے ہی بتاتے ہو

مدت سے تمھارا کب ایدھر کو تہ دل ہے

کاہے کو تصنع سے یہ باتیں بناتے ہو

کچھ عزت کفر آخر اے دیر کے باشندو

مجھ سہل سے کو کیوں تم زنار بندھاتے ہو

آوارہ اسے پھرتے پھر برسوں گذرتے ہیں

تم جس کسو کو اپنے ٹک پاس بٹھاتے ہو

دل کھول کے مل چلیے جو میر سے ملنا ہے

آنکھیں بھی دکھاتے ہو پھر منھ بھی چھپاتے ہو

میر تقی میر

ابھی کیا جانیے یاں کیا سماں ہو

اکتوبر 6, 2015میر تقی میر،اساتذہ،غزلمہرباں،مکاں،نشاں،کہاں،اماں،آستاں،جواں،جاں،درمیاں،زباں،سماںadmin

دیوان دوم غزل 917

نہ میرے باعث شور و فغاں ہو

ابھی کیا جانیے یاں کیا سماں ہو

یہی مشہور عالم ہیں دوعالم

خدا جانے ملاپ اس سے کہاں ہو

جہاں سجدے میں ہم نے غش کیا تھا

وہیں شاید کہ اس کا آستاں ہو

نہ ہووے وصف ان بالوں کا مجھ سے

اگر ہر مو مرے تن پر زباں ہو

جگر تو چھن گیا تیروں کے مارے

تمھاری کس طرح خاطر نشاں ہو

نہ دل سے جا خدا کی تجھ کو سوگند

خدائی میں اگر ایسا مکاں ہو

تم اے نازک تناں ہو وہ کہ سب کے

تمناے دل و آرام جاں ہو

ہلے ٹک لب کہ اس نے مار ڈالا

کہے کچھ کوئی گر جی کی اماں ہو

سنا ہے چاہ کا دعویٰ تمھارا

کہو جو کچھ کہ چاہو مہرباں ہو

کنارہ یوں کیا جاتا نہیں پھر

اگر پاے محبت درمیاں ہو

ہوئے ہم پیر سو ساکت ہیں اب میر

تمھاری بات کیا ہے تم جواں ہو

میر تقی میر

درمیاں تو ہو سامنے گل ہو

اکتوبر 6, 2015میر تقی میر،اساتذہ،غزلقل،کاکل،گل،بلبل،بالکل،تامل،تحمل،ترسل،تغافل،غلadmin

دیوان دوم غزل 916

منعقد کاش مجلس مل ہو

درمیاں تو ہو سامنے گل ہو

گرمیاں متصل رہیں باہم

نے تساہل ہو نے تغافل ہو

اب دھواں یوں جگر سے اٹھتا ہے

جیسے پرپیچ کوئی کاکل ہو

نہ تو طالع نہ جذب پھر دل کو

کس بھروسے پہ ٹک تحمل ہو

لگ نہ چل اے نسیم باغ کہ میں

رہ گیا ہوں چراغ سا گل ہو

ادھ جلا لالہ ساں رہا تو کیا

داغ بھی ہو تو کوئی بالکل ہو

طول رکھتا ہے درد دل میرا

لکھنے بیٹھوں تو خط ترسل ہو

ہوجو مجھ بادہ کش کے عرس میں تو

جبکہ قلقل سے شیشے کی قل ہو

دیر رہنے کی جا نہیں یہ چمن

بوے گل ہو صفیر بلبل ہو

مجھ دوانے کی مت ہلا زنجیر

کہیں ایسا نہ ہو کہ پھر غل ہو

منکشف ہو رہا ہے حال میر

کاش ٹک یار کو تامل ہو

میر تقی میر

کیا کہیں جو کچھ کہ ہو تم خوب ہو

اکتوبر 6, 2015میر تقی میر،اساتذہ،غزلمجذوب،محبوب،محجوب،مرغوب،مطلوب،معیوب،خوبadmin

دیوان دوم غزل 915

بدزباں ہو جیسے خوش اسلوب ہو

کیا کہیں جو کچھ کہ ہو تم خوب ہو

بے نقابی اس کی ہے ہم پر ستم

لایئے منھ پر تو وہ محجوب ہو

ایسا شہر حسن ہی ہے تازہ رسم

دوستی باہم جہاں معیوب ہو

مطلب عمدہ ہے دل لے تو رکھو

گاہ باشد تم کو بھی مطلوب ہو

چاہیے ہے اور کچھ عاشق کو کیا

جان کا خواہاں اگر محبوب ہو

لوہو پینا جان کھانا دیکھیے

کیا مزاج عشق میں مرغوب ہو

جو کہو ہو سو مخالف عقل کے

میر صاحب تم مگر مجذوب ہو

میر تقی میر

کیا ہے جھمک کفک کی رنگ حنا تو دیکھو

اکتوبر 6, 2015میر تقی میر،اساتذہ،غزلہوا،لگا،وفا،ا،آشنا،ادا،بنا،جگا،جا،حنا،سواadmin

دیوان دوم غزل 914

گل برگ سے ہیں نازک خوبی پا تو دیکھو

کیا ہے جھمک کفک کی رنگ حنا تو دیکھو

ہر بات پر خشونت طرزجفا تو دیکھو

ہر لمحہ بے ادائی اس کی ادا تو دیکھو

سائے میں ہر پلک کے خوابیدہ ہے قیامت

اس فتنۂ زماں کو کوئی جگا تو دیکھو

بلبل بھی گل گئے پر مرکر چمن سے نکلی

اس مرغ شوق کش کی ٹک تم وفا تو دیکھو

طنزیں عبث کرو ہو غش رہنے پر ہمارے

دو چار دن کسو سے دل کو لگا تو دیکھو

ہونا پڑے ہے دشمن ہر گام اپنی جاں کا

کوچے میں دوستی کے ہر کوئی آ تو دیکھو

پیری میں مول لے ہے منعم حویلیوں کو

ڈھہتا پھرے ہے آپھی اس پر بنا تو دیکھو

ڈوبی ہے کشتی میری بحر عمیق غم میں

بیگانے سے کھڑے ہو تم آشنا تو دیکھو

آئے جو ہم تو ان نے آنکھوں میں ہم کو رکھا

اہل ہوس سے کوئی اودھر کو جا تو دیکھو

ہے اس چمن میں وہ گل صد رنگ محو جلوہ

دیکھو جہاں وہی ہے کچھ اس سوا تو دیکھو

اشعار میر پر ہے اب ہائے وائے ہر سو

کچھ سحر تو نہیں ہے لیکن ہوا تو دیکھو

میر تقی میر

تھا ہمارا بھی چمن میں اے صبا مسکن کبھو

اکتوبر 6, 2015میر تقی میر،اساتذہ،غزلمسکن،پلٹن،پیراہن،افگن،دامن،دشمن،شیونadmin

دیوان دوم غزل 913

اب اسیری سے بچیں تو دیکھیں گے گلشن کبھو

تھا ہمارا بھی چمن میں اے صبا مسکن کبھو

ہم بھی ایک امید پر اس صید گہ میں ہیں پڑے

کہتے ہیں آتا ہے ایدھر وہ شکار افگن کبھو

بند پایا جیب میں یا سر سے مارا تنگ ہو

دست کوتہ میں نہ آیا اپنے وہ دامن کبھو

یار کی برگشتہ مژگاں سے نہ دل کو جمع رکھ

بد بلا ہے پھر کھڑی ہووے جو یہ پلٹن کبھو

جان کوئی کیوں نہ دو اس بے مروت کے لیے

آشنا ہوتا نہیں وہ دوستی دشمن کبھو

ہوں تو نالاں زیر دیوار چمن پر ضعف سے

گوش زد گل کے نہیں ہوتا مرا شیون کبھو

دل مگر ان جامہ زیبوں کو دیا ہے میر نے

اس طرح پھرتے نہ تھے وے چاک پیراہن کبھو

میر تقی میر

کس قدر مغرور ہے اللہ تو

اکتوبر 6, 2015میر تقی میر،اساتذہ،غزلہمراہ،ماہ،ناف،واہ!،اللہ،آہ،آگاہ،خواہ،راہadmin

دیوان دوم غزل 912

ملتفت ہوتا نہیں ہے گاہ تو

کس قدر مغرور ہے اللہ تو

مجھ سے کتنے جان سے جاتے رہے

کس کی میت کے گیا ہمراہ تو

بے خودی رہتی ہے اب اکثر مجھے

حال سے میرے نہیں آگاہ تو

اس کے دل میں کام کرنا کام ہے

یوں فلک پر کیوں نہ جا اے آہ تو

فرش ہیں آنکھیں ہی تیری راہ میں

آہ ٹک تو دیکھ کر چل راہ تو

جی تلک تو منھ نہ موڑیں تجھ سے ہم

کر جفا و جور خاطر خواہ تو

کاہش دل بھی دو چنداں کیوں نہ ہو

آنکھ میں آوے نہ دو دو ماہ تو

دل دہی کیا کی ہے یوں ہی چاہیے

اے زہے تو آفریں تو واہ تو

میر تو تو عاشقی میں کھپ گیا

مت کسی کو چند روز اب چاہ تو

میر تقی میر

برہم زدہ شہر ہے جہاں تو

اکتوبر 6, 2015میر تقی میر،اساتذہ،غزلمکاں،نشاں،پاسباں،آسماں،جہاں،جواں،جاں،دہاں،زباںadmin

دیوان دوم غزل 911

سب حال سے بے خبر ہیں یاں تو

برہم زدہ شہر ہے جہاں تو

اس تن پہ نثار کرتے لیکن

اپنی بھی نظر میں ٹھہرے جاں تو

برباد نہ دے کہیں سراسر

رہتی نہیں شمع ساں زباں تو

کیا اس کے گئے ہے ذکر دل کا

ویران پڑا ہے یہ مکاں تو

کیا کیا نہ عزیز خوار ہوں گے

ہونے دو اسے ابھی جواں تو

غنچہ لگے منھ تمھارے لیکن

صحبت کا اسے بھی ہو دہاں تو

کیا اس سے رکھیں امید بہبود

پھرتا ہے خراب آسماں تو

یہ طالع نارسا بھی جاگیں

سو جائے ٹک اس کا پاسباں تو

مت تربت میر کو مٹائو

رہنے دو غریب کا نشاں تو

میر تقی میر

نہ ہو گلچین باغ حسن ظالم زرد ہو گا تو

اکتوبر 6, 2015میر تقی میر،اساتذہ،غزلفرد،گرد،پرورد،زرد،سردadmin

دیوان دوم غزل 910

نہ مائل آرسی کا رہ سراپا درد ہو گا تو

نہ ہو گلچین باغ حسن ظالم زرد ہو گا تو

یہ پیشہ عشق کا ہے خاک چھنوائے گا صحرا کی

ہزار اے بے وفا جوں گل چمن پرورد ہو گا تو

غبار اٹھنے لگے گا تیری اس نازک طبیعت سے

بسان گردباد آخر بیاباں گرد ہو گا تو

علاقہ دل کا لکھوائے گا دفتر ہاتھ سے تیرے

تجرد کے جریدوں میں قلم سا فرد ہو گا تو

نہ یک دم صبح تک بھی آنکھ لگنے دے گا دل جلنا

یہی پھر میر سا سرگرم آہ سرد ہو گا تو

میر تقی میر

کاہے کو یوں کھڑے ہو وحشی سے بیٹھ جائو

اکتوبر 6, 2015میر تقی میر،اساتذہ،غزللگائو،لائو،چھپائو،پائو،اٹھائو،جائو،دکھائوadmin

دیوان دوم غزل 909

اتنا کہا نہ ہم سے تم نے کبھو کہ آئو

کاہے کو یوں کھڑے ہو وحشی سے بیٹھ جائو

یہ چاند کے سے ٹکڑے چھپتے نہیں چھپائے

ہر چند اپنے منھ کو برقع میں تم چھپائو

دوچار تیر یارو اس سے بھلی ہے دوری

تم کھینچ کھینچ مجھ کو اس پلے پر نہ لائو

ہو شرم آنکھ میں تو بھاری جہاز سے ہے

مت کرکے شوخ چشمی آشوب سا اٹھائو

اب آتے ہو تو آئو ہر لحظہ جی گھٹے ہے

پھر لطف کیا جو آکر آدھا بھی تم نہ پائو

تھی سحر یا نگہ تھی ہم آپ کو تھے بھولے

اس جادوگر کو یارو پھر بھی تنک دکھائو

بارے گئے سو گذرے جی بھر بھر آتے ہیں کیا

آئندہ میر صاحب دل مت کہیں لگائو

میر تقی میر

اس آتش خاموش کا ہے شور جہاں میں

اکتوبر 6, 2015میر تقی میر،اساتذہ،غزلمکاں،نشاں،جہاں،جواں،دکاں،رواں،زباںadmin

دیوان دوم غزل 908

معلوم نہیں کیا ہے لب سرخ بتاں میں

اس آتش خاموش کا ہے شور جہاں میں

یوسفؑ کے تئیں دیکھ نہ کیوں بند ہوں بازار

یہ جنس نکلتی نہیں ہر اک کی دکاں میں

یک پرچۂ اشعار سے منھ باندھے سبھوں کے

جادو تھا مرے خامے کی گویا کہ زباں میں

یہ دل جو شکستہ ہے سو بے لطف نہیں ہے

ٹھہرو کوئی دم آن کے اس ٹوٹے مکاں میں

میں لگ کے گلے خوب ہی رویا لب جو پر

ملتی تھی طرح اس کی بہت سرو رواں میں

کیا قہر ہوا دل جو دیا لڑکوں کو میں نے

چرچا ہے یہی شہر کے اب پیر و جواں میں

وے یاسمن تازہ شگفتہ میں کہاں میر

پائے گئے لطف اس کے جو پائوں کے نشاں میں

میر تقی میر

کھو گئے دنیا سے تم ہو اور اب دنیا ہو میاں

اکتوبر 6, 2015میر تقی میر،اساتذہ،غزلناپیدا،پرچھا،پردہ،برپا،دنیا،دریا،رسوا،سودا،صحراadmin

دیوان دوم غزل 907

کیا کہیں پایا نہیں جاتا ہے کچھ تم کیا ہو میاں

کھو گئے دنیا سے تم ہو اور اب دنیا ہو میاں

مت حنائی پائوں سے چل کر کہیں جایا کرو

دلی ہے آخر نہ ہنگامہ کہیں برپا ہو میاں

دل جہاں کھویا گیا کھویا گیا پھر دیکھیے

کون مرتا ہے جیے ہے کون ناپیدا ہو میاں

دل کو لے کر صاف یوں آنکھیں ملاتا ہے کوئی

تب تلک ہی لطف ہے جب تک کہ کچھ پردہ ہو میاں

ایک جنبش میں ترے ابرو کی ٹل جاتی ہے بھیڑ

درمیاں آوے اگر تلوار تو پرچھا ہو میاں

برسوں تک چھایا رہا ہے چشم تر پر ابر سا

پاٹ دامن کا نچوڑوں کوئی تو دریا ہو میاں

شہر میں تو موسم گل میں نہیں لگتا ہے جی

یا گریباں کوہ کا یا دامن صحرا ہو میاں

مدعی عشق تو ہیں عزلتی شہر لیک

جب گلی کوچوں میں کوئی اس طرح رسوا ہو میاں

گفتگو اتنی پریشاں حال کی یہ درہمی

میر کچھ دل تنگ ہے ایسا نہ ہو سودا ہو میاں

میر تقی میر

چھاتیاں سلگیں ہیں ایسی کہ جلے جاتے ہیں

اکتوبر 6, 2015میر تقی میر،اساتذہ،غزلملے،چلے،ڈھلے،پھلے،بھلے،تلے،جلے،رلےadmin

دیوان دوم غزل 906

کیا کہیں آتش ہجراں سے گلے جاتے ہیں

چھاتیاں سلگیں ہیں ایسی کہ جلے جاتے ہیں

گوہرگوش کسو کا نہیں جی سے جاتا

آنسو موتی سے مرے منھ پہ ڈھلے جاتے ہیں

یہی مسدود ہے کچھ راہ وفا ورنہ بہم

سب کہیں نامہ و پیغام چلے جاتے ہیں

بارحرمان و گل و داغ نہیں اپنے ساتھ

شجر باغ وفا پھولے پھلے جاتے ہیں

حیرت عشق میں تصویر سے رفتہ ہی رہے

ایسے جاتے ہیں جو ہم بھی تو بھلے جاتے ہیں

ہجر کی کوفت جو کھینچے ہیں انھیں سے پوچھو

دل دیے جاتے ہیں جی اپنے ملے جاتے ہیں

یاد قد میں ترے آنکھوں سے بہیں ہیں جوئیں

گر کسو باغ میں ہم سرو تلے جاتے ہیں

دیکھیں پیش آوے ہے کیا عشق میں اب تو جوں سیل

ہم بھی اس راہ میں سر گاڑے چلے جاتے ہیں

پُرغباری جہاں سے نہیں سدھ میر ہمیں

گرد اتنی ہے کہ مٹی میں رلے جاتے ہیں

میر تقی میر

سو لطف کیوں نہ جمع ہوں اس میں مزہ نہیں

اکتوبر 6, 2015میر تقی میر،اساتذہ،غزللگا،مزہ،وفا،کیا،گلہ،اٹھا،بجا،توا،حیا،خدا،رہاadmin

دیوان دوم غزل 905

لذت سے درد کی جو کوئی آشنا نہیں

سو لطف کیوں نہ جمع ہوں اس میں مزہ نہیں

ہر آن کیا عوض ہے دعا کا بدی ولے

تم کیا کرو بھلے کا زمانہ رہا نہیں

روے سخن جو ہے تو مرا چشم دل کی اور

تم سے خدانخواستہ مجھ کو گلہ نہیں

تلوار ہی کھنچا کی ترے ہوتے بزم میں

بیٹھا ہے کب تو آ کے کہ فتنہ اٹھا نہیں

مل دیکھے ایسے دلبر ہرجائی سے کوئی

بے جا نہیں ہے دل جو ہمارا بجا نہیں

ہو تم جو میرے حیرتی فرط شوق وصل

کیا جانو دل کسو سے تمھارا لگا نہیں

آئینے پر سے ٹک نہیں اٹھتی تری نظر

اس شوق کش کے منھ سے تجھے کچھ حیا نہیں

رنگ اور بو تو دلکش و دلچسپ ہیں کمال

لیکن ہزار حیف کہ گل میں وفا نہیں

تیرستم کا تیرے ہدف کب تلک رہوں

آخر جگر ہے لوہے کا کوئی توا نہیں

ان نے تو آنکھیں موند لیاں ہیں ادھر سے واں

ایک آدھ دن میں دیکھیے یاں کیا ہے کیا نہیں

اٹھتے ہو میر دیر سے تو کعبے چل رہو

مغموم کاہے کو ہو تمھارے خدا نہیں

میر تقی میر

یہ دوانہ بائولا عاقل ہے میاں

اکتوبر 6, 2015میر تقی میر،اساتذہ،غزلقائل،قابل،قاتل،منزل،مشکل،کامل،گل،گھائل،باطل،بسمل،جاہل،حامل،حائل،حاصل،دل،سل،سائل،ساحل،شامل،عاقل،غافلadmin

دیوان دوم غزل 904

کیا عبث مجنوں پئے محمل ہے میاں

یہ دوانہ بائولا عاقل ہے میاں

قند کا کون اس قدر مائل ہے میاں

جو ہے ان ہونٹوں ہی کا قائل ہے میاں

ہم نے یہ مانا کہ واعظ ہے ملک

آدمی ہونا بہت مشکل ہے میاں

چشم تر کی خیر جاری ہے سدا

سیل اس دروازے کا سائل ہے میاں

مرنے کے پیچھے تو راحت سچ ہے لیک

بیچ میں یہ واقعہ حائل ہے میاں

دل کی پامالی ستم ہے قہر ہے

کوئی یوں دلتا ہے آخر دل ہے میاں

آج کیا فرداے محشر کا ہراس

صبح دیکھیں کیا ہو شب حامل ہے میاں

دل تڑپتا ہی نہیں کیا جانیے

کس شکار انداز کا بسمل ہے میاں

چاہیے پیش از نماز آنکھیں کھلیں

حیف اس کا وقت جو غافل ہے میاں

رنگ بے رنگی جدا تو ہے ولے

آب سا ہر رنگ میں شامل ہے میاں

سامنے سے ٹک ٹلے تو دق نہ ہو

آسماں چھاتی پر اپنی سل ہے میاں

دل لگی اتنی جہاں میں کس لیے

رہگذر ہے یہ تو کیا منزل ہے میاں

بے تہی دریاے ہستی کی نہ پوچھ

یاں سے واں تک سو جگہ ساحل ہے میاں

چشم حق بیں سے کرو ٹک تم نظر

دیکھتے جو کچھ ہو سب باطل ہے میاں

دردمندی ہی تو ہے جو کچھ کہ ہے

حق میں عاشق کے دوا قاتل ہے میاں

برسوں ہم روتے پھرے ہیں ابر سے

زانو زانو اس گلی میں گل ہے میاں

کہنہ سالی میں ہے جیسے خورد سال

کیا فلک پیری میں بھی جاہل ہے میاں

کیا دل مجروح و محزوں کا گلہ

ایک غمگیں دوسرے گھائل ہے میاں

دیکھ کر سبزہ ہی خرم دل کو رکھ

مزرع دنیا کا یہ حاصل ہے میاں

مستعدوں پر سخن ہے آج کل

شعر اپنا فن سو کس قابل ہے میاں

کی زیارت میر کی ہم نے بھی کل

لاابالی سا ہے پر کامل ہے میاں

میر تقی میر

رہا دیکھ اپنا پرایا ہمیں

اکتوبر 6, 2015میر تقی میر،اساتذہ،غزللگایا،کھایا،پایا،پرایا،آیا،جلایا،دلایاadmin

دیوان دوم غزل 903

جنوں نے تماشا بنایا ہمیں

رہا دیکھ اپنا پرایا ہمیں

سدا ہم تو کھوئے گئے سے رہے

کبھو آپ میں تم نے پایا ہمیں

یہی تا دم مرگ بیتاب تھے

نہ اس بن تنک صبر آیا ہمیں

شب آنکھوں سے دریا سا بہتا رہا

انھیں نے کنارے لگایا ہمیں

ہمارا نہیں تم کو کچھ پاس رنج

یہ کیا تم نے سمجھا ہے آیا ہمیں

لگی سر سے جوں شمع پا تک گئی

سب اس داغ نے آہ کھایا ہمیں

جلیں پیش و پس جیسے شمع و پتنگ

جلا وہ بھی جن نے جلایا ہمیں

ازل میں ملا کیا نہ عالم کے تیں

قضا نے یہی دل دلایا ہمیں

رہا تو تو اکثر الم ناک میر

ترا طور کچھ خوش نہ آیا ہمیں

میر تقی میر

بہت ان نے ڈھونڈا نہ پایا ہمیں

اکتوبر 6, 2015میر تقی میر،اساتذہ،غزللگایا،پایا،اٹھایا،بھایا،جتایا،خدایا،دکھایا،رلایا،سایہadmin

دیوان دوم غزل 902

محبت نے کھویا کھپایا ہمیں

بہت ان نے ڈھونڈا نہ پایا ہمیں

پھرا کرتے ہیں دھوپ میں جلتے ہم

ہوا ہے کہے تو کہ سایہ ہمیں

گہے تر رہیں گاہ خوں بستہ تھیں

ان آنکھوں نے کیا کیا دکھایا ہمیں

بٹھا اس کی خاطر میں نقش وفا

نہیں تو اٹھالے خدایا ہمیں

ملے ڈالے ہے دل کوئی عشق میں

یہ کیا روگ یارب لگایا ہمیں

ہوئی اس گلی میں تو مٹی عزیز

ولے خواریوں سے اٹھایا ہمیں

جوانی دوانی سنا کیا نہیں

حسینوں کا ملنا ہی بھایا ہمیں

نہ سمجھی گئی دشمنی عشق کی

بہت دوستوں نے جتایا ہمیں

کوئی دم کل آئے تھے مجلس میں میر

بہت اس غزل پر رلایا ہمیں

میر تقی میر

بدوضع یاں کے لڑکے کیا خوش معاملے ہیں

اکتوبر 6, 2015میر تقی میر،اساتذہ،غزلقافلے،مساہلے،معاملے،گلے،آملے،آبلے،حوصلے،دلے،صلےadmin

دیوان دوم غزل 901

دل لے کے کیسے کیسے جھگڑے مجادلے ہیں

بدوضع یاں کے لڑکے کیا خوش معاملے ہیں

گھبرانے لگتیاں ہیں رک رک کے تن میں جانیں

کرتے ہیں جو وفائیں ان ہی کے حوصلے ہیں

کیا قدر تھی سخن کی جب یاں بھی صحبتیں تھیں

ہر بات جائزہ ہے ہر بیت پر صلے ہیں

جب کچھ تھی جہت مجھ سے تب کس سے ملتے تھے تم

اطراف کے یہ بے تہ اب تم سے آملے ہیں

تھا واجب الترحم مظلوم عشق تھا میں

اس کشتۂ ستم کو تم سے بہت گلے ہیں

سوز دروں سے کیونکر میں آگ میں نہ لوٹوں

جوں شیشۂ حبابی سب دل پر آبلے ہیں

میں جی سنبھالتا ہوں وہ ہنس کے ٹالتا ہے

یاں مشکلیں ہیں ایسی واں یہ مساہلے ہیں

اندیشہ زاد رہ کا رکھیے تو ہے مناسب

چلنے کو یاں سے اکثر تیار قافلے ہیں

پانچوں حواس گم ہیں ہر اک کے اس سمیں میں

کیا میر جی ہی تنہا ان روزوں دہ دلے ہیں

میر تقی میر

پلک سے پلک آشنا ہی نہیں

اکتوبر 6, 2015میر تقی میر،اساتذہ،غزلہوا،وفا،انتہا،آشنا،حیا،خدا،دواadmin

دیوان دوم غزل 900

فراق آنکھ لگنے کی جا ہی نہیں

پلک سے پلک آشنا ہی نہیں

گلہ عشق کا بدو خلقت سے ہے

غم دل کو کچھ انتہا ہی نہیں

محبت جہاں کی تہاں ہوچکی

کچھ اس روگ کی بھی دوا ہی نہیں

دکھایا کیے یار اس رخ کا سطح

کہیں آرسی کو حیا ہی نہیں

وہ کیا کچھ نہیں حسن کے شہر میں

نہیں ہے تو رسم وفا ہی نہیں

چمن محو اس روے خوش کا ہے سب

گل تر کی اب وہ ہوا ہی نہیں

نہیں دیر اگر میر کعبہ تو ہے

ہمارے کوئی کیا خدا ہی نہیں

میر تقی میر

عاشقی میں بلائیں کیا کیا ہیں

اکتوبر 6, 2015میر تقی میر،اساتذہ،غزلہوائیں،ادائیں،بلائیں،بنائیں،جائیں،دعائیںadmin

دیوان دوم غزل 899

جور کیا کیا جفائیں کیا کیا ہیں

عاشقی میں بلائیں کیا کیا ہیں

خوب رو ہی فقط نہیں وہ شوخ

حسن کیا کیا ادائیں کیا کیا ہیں

فکر تعمیر دل کسو کو نہیں

ایسی ویسی بنائیں کیا کیا ہیں

گہ نسیم و صبا ہے گاہ سموم

اس چمن میں ہوائیں کیا کیا ہیں

شور ہے ترک شیخ کا لیکن

چپکے چپکے دعائیں کیا کیا ہیں

منظر دیدہ قصر دل اے میر

شہر تن میں بھی جائیں کیا کیا ہیں

میر تقی میر

پہ جوش دل میں کبھو آگیا تو طوفاں ہیں

اکتوبر 6, 2015میر تقی میر،اساتذہ،غزلمہماں،مسلماں،نمایاں،ایماں،بداماں،جاں،حیراں،ساماں،طوفاںadmin

دیوان دوم غزل 898

اگرچہ اب کے ہم اے ابر خشک مژگاں ہیں

پہ جوش دل میں کبھو آگیا تو طوفاں ہیں

صنم پرستی میں اے راہباں نہ کی تقصیر

تم اہل صومعہ سے پوچھو وے مسلماں ہیں

کریں انھوں پہ بھلا کس طرح نظر گستاخ

بتان شہر ہمارے تو دین و ایماں ہیں

چمن میں جاکے بھرو تم گلوں سے جیب و کنار

ہم اپنے دل ہی کے ٹکڑوں سے گل بداماں ہیں

رہے ہیں دیکھ جو تصویر سے ترے منھ کو

ہماری آنکھ سے ظاہر ہے یہ کہ حیراں ہیں

رہا ہے کون سا پردہ ترے ستم کا شوخ

کہ زخم سینہ ہمارے سبھی نمایاں ہیں

شبیہ شکل سا ہے حال ضبط عشق کے بیچ

کہ رنگ روپ ہے سب کچھ ولیک بے جاں ہیں

بنے تو عزت عشاق میں نہ کر تقصیر

کہ ایسے لوگ پیارے عزیز مہماں ہیں

جو ابر دشت میں برسے تو ہم اڑاویں خاک

وہ میر آب ہے ہم یاں کے میر ساماں ہیں

میر تقی میر

سو سو کہیں تونے مجھے منھ پر نہ لایا ایک میں

اکتوبر 6, 2015میر تقی میر،اساتذہ،غزللگایا،لایا،چھایا،آیا،اٹھایا،بہایا،بھایا،خدایا،سایہadmin

دیوان دوم غزل 897

اے مجھ سے تجھ کو سو ملے تجھ سا نہ پایا ایک میں

سو سو کہیں تونے مجھے منھ پر نہ لایا ایک میں

عالم کی میں نے سیر کی مجھ کو جو خوش آیا سو تو

سب سے رہا محظوظ تو تجھ کو نہ بھایا ایک میں

یہ جوش غم ہوتے بھی ہیں یوں ابرتر روتے بھی ہیں

چشم جہاں آشوب سے دریا بہایا ایک میں

تھا سب کو دعویٰ عشق کا لیکن نہ ٹھہرا کوئی بھی

دانستہ اپنی جان سے دل کو اٹھایا ایک میں

ہیں طالب صورت سبھی مجھ پر ستم کیوں اس قدر

کیا مجرم عشق بتاں یاں ہوں خدایا ایک میں

بجلی سے یوں چمکے بہت پر بات کہتے ہوچکے

جوں ابر ساری خلق پر ہوں اب تو چھایا ایک میں

سو رنگ وہ ظاہر ہوا کوئی نہ جاگہ سے گیا

دل کو جو میرے چوٹ تھی طاقت نہ لایا ایک میں

اس گلستاں سے منفعت یوں تو ہزاروں کو ہوئی

دیکھا نہ سرو و گل کا یاں ٹک سر پہ سایہ ایک میں

رسم کہن ہے دوستی ہوتی بھی ہے الفت بہم

میں کشتنی ٹھہرا جو ہوں کیا دل لگایا ایک میں

جن جن نے دیکھا تھا اسے بے خود ہوا چیتا بھی پھر

پر میر جیتے جی بخود ہرگز نہ آیا ایک میں

میر تقی میر

دل کہاں وقت کہاں عمر کہاں یار کہاں

اکتوبر 6, 2015میر تقی میر،اساتذہ،غزلیار،گار،اظہار،بیمار،تلوار،تار،خوار،خار،خریدار،دستار،سزاوارadmin

دیوان دوم غزل 896

باغ گو سبز ہوا اب سر گلزار کہاں

دل کہاں وقت کہاں عمر کہاں یار کہاں

تم تو اب آنے کو پھر کہہ چلے ہو کل لیکن

بے کل ایسا ہی رہا شب تو یہ بیمار کہاں

دل کی خواہش ہو کسو کو تو کمی دل کی نہیں

اب یہی جنس بہت ہے پہ خریدار کہاں

خاک یاں چھانتے ہی کیوں نہ پھرو دل کے لیے

ایسا پہنچے ہے بہم پھر کوئی غم خوار کہاں

دم زدن مصلحت وقت نہیں اے ہمدم

جی میں کیا کیا ہے مرے پر لب اظہار کہاں

شیخ کے آنے ہی کی دیر ہے میخانے میں پھر

سبحہ سجادہ کہاں جبہ و دستار کہاں

ہم سے ناکس تو بہت پھرتے ہیں جی دیتے ولے

زخم تیغ اس کے اٹھانے کا سزاوار کہاں

تونے بھی گرد رخ سرخ نکالا خط سبز

باغ شاداب جہاں میں گل بے خار کہاں

خبط نے عقل کے سر رشتے کیے گم سارے

اب جو ڈھونڈو تو گریباں میں کوئی تار کہاں

گوکہ گردن تئیں یاں کوئی لہو میں بیٹھے

ہاتھ اٹھاتا ہے جفا سے وہ ستم گار کہاں

ڈوبا لوہو میں پڑا تھا ہمگی پیکر میر

یہ نہ جانا کہ لگی ظلم کی تلوار کہاں

میر تقی میر

ایک عالم میں ہیں ہم وے پہ جدا رہتے ہیں

اکتوبر 6, 2015میر تقی میر،اساتذہ،غزللگا،لا،نہا،نما،ا،بکا،بھلا،جا،جداadmin

دیوان دوم غزل 895

اتفاق ایسا ہے کڑھتے ہی سدا رہتے ہیں

ایک عالم میں ہیں ہم وے پہ جدا رہتے ہیں

برسے تلوار کہ حائل ہو کوئی سیل بلا

پیش کچھ آئو ہم اس کوچے میں جا رہتے ہیں

کام آتا ہے میسر کسے ان ہونٹوں سے

بابت بوسہ ہیں پر سب کو چما رہتے ہیں

دشت میں گرد رہ اس کی اٹھے ہے جیدھر سے

وحش و طیر آنکھیں ادھر ہی کو لگا رہتے ہیں

کیا تری گرمی بازار کہیں خوبی کی

سینکڑوں آن کے یوسف سے بکا رہتے ہیں

بسترا خاک رہ اس کی تو ہے اپنا لیکن

گریۂ خونیں سے لوہو میں نہا رہتے ہیں

کیوں اڑاتے ہو بلایا ہمیں کب کب ہم آپ

جیسے گردان کبوتر یہیں آ رہتے ہیں

حق تلف کن ہیں بتاں یاد دلائوں کب تک

ہر سحر صحبت دوشیں کو بھلا رہتے ہیں

یاد میں اس کے قد و قامت دلکش کی میر

اپنے سر ایک قیامت نئی لا رہتے ہیں

میر تقی میر

رہتی ہے میرے خلق کے تلوار درمیاں

اکتوبر 6, 2015میر تقی میر،اساتذہ،غزلیار،گلزار،گنہگار،گرفتار،بار،تلوار،تکرار،تار،خریدار،دیوار،دیدار،سردار،سزاوارadmin

دیوان دوم غزل 894

جب سے ہے اس کی ابروے خمدار درمیاں

رہتی ہے میرے خلق کے تلوار درمیاں

برپا ہوا ہجوم سے اک حشر تازہ واں

آیا جہاں کہیں قدم یار درمیاں

اس کام جاں میں ہم میں ہوا ہے حجاب چشم

یوں رہیے آہ کب تئیں دیوار درمیاں

سو بار اس سے فتنے جہاں میں اٹھے ولے

دیکھی نہ ہم نے وہ کمر اک بار درمیاں

کیا کہیے آہ جی کو قیامت ہے انتظار

آتا نہ کاش وعدئہ دیدار درمیاں

رکھ دی ہے کتنے روزوں سے تلوار یار نے

کوئی نہیں ہے خوں کا سزاوار درمیاں

ثابت ہے ساری خلق کے اوپر کہ تو ہے ایک

حاجت نہیں جو آوے یہ تکرار درمیاں

آیا کیے دماغ کے اعضا میں یہ فتور

ٹھہرے قشون کیا نہیں سردار درمیاں

بازار میں دکھائی ہے کب ان نے جنس حسن

جو بک نہیں گئے ہیں خریدار درمیاں

دیکھیں چمن جو سینۂ پر داغ سے بڑھیں

بیداد ہے یہ قطعۂ گلزار درمیاں

کھنچنے نہ پائی اس کی تو تلوار بھیڑ میں

مارا گیا عبث یہ گنہگار درمیاں

اب کے جنوں کے بیچ گریباں کا ذکر کیا

کہیے بھی جو رہا ہو کوئی تار درمیاں

کتنے دنوں سے میر کا نالہ نہیں سنا

شاید نہیں ہے اب وہ گرفتار درمیاں

میر تقی میر

دیوانے کو جو خط لکھوں بتلائو کیا لکھوں

اکتوبر 6, 2015میر تقی میر،اساتذہ،غزلماجرا،کیا،خدا،دوا،دعاadmin

دیوان دوم غزل 893

دل کو لکھوں ہوں آہ وہ کیا مدعا لکھوں

دیوانے کو جو خط لکھوں بتلائو کیا لکھوں

کیا کیا لقب ہیں شوق کے عالم میں یار کے

کعبہ لکھوں کہ قبلہ اسے یا خدا لکھوں

حیراں ہو میرے حال میں کہنے لگا طبیب

اس دردمند عشق کی میں کیا دوا لکھوں

وحشت زدوں کو نامہ لکھوں ہوں نہ کس طرح

مجنوں کو اس کے حاشیے پر میں دعا لکھوں

کچھ روبرو ہوئے پہ جو سلجھے تو سلجھے میر

جی کے الجھنے کا اسے کیا ماجرا لکھوں

میر تقی میر

جی چاہتا ہے جا کے کسو اور مر رہیں

اکتوبر 6, 2015میر تقی میر،اساتذہ،غزلمر،نظر،کر،گھر،پر،اگر،اتر،خبر،سحرadmin

دیوان دوم غزل 892

یوں قیدیوں سے کب تئیں ہم تنگ تر رہیں

جی چاہتا ہے جا کے کسو اور مر رہیں

اے کاش ہم کو سکر کی حالت رہے مدام

تا حال کی خرابی سے ہم بے خبر رہیں

رہتے ہیں یوں حواس پریشاں کہ جوں کہیں

دو تین آ کے لوٹے مسافر اتر رہیں

وعدہ تو تب ہو صبح کا جب ہم بھی جاں بلب

جیسے چراغ آخر شب تا سحر رہیں

آوارگی کی سب ہیں یہ خانہ خرابیاں

لوگ آویں دیکھنے کو بہت ہم جو گھر رہیں

ہم نے بھی نذر کی ہے کہ پھریے چمن کے گرد

یارب قفس کے چھوٹنے تک بال و پر رہیں

ان دلبروں کی آنکھ نہیں جاے اعتماد

جب تک رہیں یہ چاہیے پیش نظر رہیں

فردا کی فکر آج نہیں مقتضاے عقل

کل کی بھی دیکھ لیویں گے کل ہم اگر رہیں

تیغ و تبر رکھا نہ کرو پاس میر کے

ایسا نہ ہو کہ آپ کو ضائع وے کر رہیں

میر تقی میر

ہم لوگ تیرے اوپر سو جی سے مر رہے ہیں

اکتوبر 6, 2015میر تقی میر،اساتذہ،غزلمر،نظر،گھر،گذر،پہر،پر،اتر،بھر،تر،خبر،در،سرadmin

دیوان دوم غزل 891

گو جان کر تجھے سب تعبیر کر رہے ہیں

ہم لوگ تیرے اوپر سو جی سے مر رہے ہیں

کھنچتا چلا ہے اب تو تصدیق کو تصور

ہر لحظہ اس کے جلوے پیش نظر رہے ہیں

نکلے ہوس جو اب بھی ہو وارہی قفس سے

شائستۂ پریدن دوچار پر رہے ہیں

کل دیکھتے ہمارے بستے تھے گھر برابر

اب یہ کہیں کہیں جو دیوار و در رہے ہیں

کیا آج ڈبڈبائی دیکھو ہو تم یہ آنکھیں

جوں چشمہ یوں ہی برسوں ہم چشم تر رہے ہیں

نے غم ہے ہم کو یاں کا نے فکر کچھ ہے واں کا

صدقے جنوں کے کیا ہم بے درد سر رہے ہیں

پاس ایک دن بھی اپنا ان نے نہیں کیا ہے

ہم دور اس سے بے دم دو دو پہر رہے ہیں

کیا یہ سراے فانی ہے جاے باش اپنی

ہم یاں مسافرانہ آکر اتر رہے ہیں

ایسا نہ ہو کہ چھیڑے یک بار پھوٹ بہیے

ہم پکے پھوڑے کے اب مانند بھر رہے ہیں

اس میکدے میں جس جا ہشیار چاہیے تھے

رحمت ہے ہم کو ہم بھی کیا بے خبر رہے ہیں

گو راہ عشق میں ہو شمشیر کے دم اوپر

وسواس کیا ہے ہم تو جی سے گذر رہے ہیں

چل ہم نشیں بنے تو ایک آدھ بیت سنیے

کہتے ہیں بعد مدت میر اپنے گھر رہے ہیں

میر تقی میر

کیا جانیے کدھر کو گیا کچھ خبر نہیں

اکتوبر 6, 2015میر تقی میر،اساتذہ،غزلہنر،نظر،گھر،پر،بر،تر،جگر،خبر،سحرadmin

دیوان دوم غزل 890

کوچے میں تیرے میر کا مطلق اثر نہیں

کیا جانیے کدھر کو گیا کچھ خبر نہیں

ہے عاشقی کے بیچ ستم دیکھنا ہی لطف

مر جانا آنکھیں موند کے یہ کچھ ہنر نہیں

کب شب ہوئی زمانے میں جو پھر ہوا نہ روز

کیا اے شب فراق تجھی کو سحر نہیں

ہر چند ہم کو مستوں سے صحبت رہی ہے لیک

دامن ہمارا ابر کے مانند تر نہیں

گلگشت اپنے طور پہ ہے سو تو خوب یاں

شائستۂ پریدن گلزار پر نہیں

کیا ہو جے حرف زن گذر دوستی سے آہ

خط لے گیا کہ راہ میں پھر نامہ بر نہیں

آنکھیں تمام خلق کی رہتی ہیں اس کی اور

مطلق کسو کو حال پہ میرے نظر نہیں

کہتے ہیں سب کہ خون ہی ہوتا ہے اشک چشم

راتوں کو گر بکا ہے یہی تو جگر نہیں

جاکر شراب خانے میں رہتا نہیں تو پھر

یہ کیا کہ میر جمعے ہی کی رات گھر نہیں

میر تقی میر

بھاگوں ہوں دور سب سے میں کس کا آشنا ہوں

اکتوبر 6, 2015میر تقی میر،اساتذہ،غزلہوا،لگا،چلا،کیا،آشنا،اٹھا،بکا،دبا،رکاadmin

دیوان دوم غزل 889

بیگانہ وضع برسوں اس شہر میں رہا ہوں

بھاگوں ہوں دور سب سے میں کس کا آشنا ہوں

پوچھا کیے ہیں مجھ سے گل برگ لب کو تیرے

بلبل کے ہاتھ جب میں گلزار میں لگا ہوں

اب کارشوق دیکھوں پہنچے مرا کہاں تک

قاصد کے پیچھے میں بھی بے طاقت اٹھ چلا ہوں

تجھ سے متاع خوش کا کیونکر نہ ہوں معرف

یوسفؑ کے ہاتھ پیارے کچھ میں نہیں بکا ہوں

گل پھول کوئی کب تک جھڑ جھڑ کے گرتے دیکھے

اس باغ میں بہت اب جوں غنچہ میں رکا ہوں

کیا کیا کیا تامل اس فکر میں گیا گھل

سمجھا نہ آپ کو میں کیا جانیے کہ کیا ہوں

ہوتا ہے گرم کیا تو اے آفتاب خوبی

ایک آدھ دم میں میں تو شبنم نمط ہوا ہوں

پیری سے جھکتے جھکتے پہنچا ہوں خاک تک میں

وہ سرکشی کہاں ہے اب تو بہت دبا ہوں

مجھ کو بلا ہے وحشت اے میر دور اس سے

جاگہ سے جب اٹھا ہوں آشوب سا اٹھا ہوں

میر تقی میر

لے گئے پیش فلک اس مہ کا ایسا رو کہاں

اکتوبر 6, 2015میر تقی میر،اساتذہ،غزلمو،نیکو،آنسو،ابرو،بو،روadmin

دیوان دوم غزل 888

گر کوئی اعمیٰ کہے کچھ پر کہاں وہ تو کہاں

لے گئے پیش فلک اس مہ کا ایسا رو کہاں

گل کو کیا نسبت ہے تجھ سے میں نہ مانوں زینہار

رنگ اگر بالفرض تیرا سا ہوا یہ بو کہاں

عشق لاتا ہے بروے کار مجنوں سا کبھو

بید بہتیرے کھڑے ہیں وے پریشاں مو کہاں

دیکھیاں کجیاں کمانوں کی بھی خم محراب کے

پر دلوں کو کھینچتے ہیں جیسے وے ابرو کہاں

سنبل آپھی آپ پیچ و تاب یوں کھایا کرے

یار کی سی زلف کے وے حلقہ حلقہ مو کہاں

آگے یہ آنکھیں گلے کی ہار ہی رہتی تھیں روز

اب جگر میں خوں نہیں وے سہرے سے آنسو کہاں

میر سچ کہتا تھا جنت ہو نصیب اس کے تئیں

حور کا چہرہ کہاں اس کا رخ نیکو کہاں

میر تقی میر

الا کھینچ بغل میں تجھ کو دیر تلک ہم پیار کریں

اکتوبر 6, 2015میر تقی میر،اساتذہ،غزلہموار،ہار،پیار،انکار،اظہار،بار،بستار،خوار،عارadmin

دیوان دوم غزل 887

آج ہمارے گھر آیا تو کیا ہے یاں جو نثار کریں

الا کھینچ بغل میں تجھ کو دیر تلک ہم پیار کریں

خاک ہوئے برباد ہوئے پامال ہوئے سب محو ہوئے

اور شدائد عشق کی رہ کے کیسے ہم ہموار کریں

زردی رخ رونا ہر دم کا شاہد دو جب ایسے ہوں

چاہت کا انصاف کرو تم کیونکر ہم انکار کریں

باغ میں اب آجاتے ہیں تو صرفہ اپنا چپ میں ہے

خوبی بیاں کر تیری ہم کیا گل کو گلے کا ہار کریں

شیوہ اپنا بے پروائی نومیدی سے ٹھہرا ہے

کچھ بھی وہ مغرور دبے تو منت ہم سو بار کریں

ہم تو فقیر ہیں خاک برابر آ بیٹھے تو لطف کیا

ننگ جہاں لگتا ہو ان کو واں وے ایسی عار کریں

پتا پتا گلشن کا تو حال ہمارا جانے ہے

اور کہے تو جس سے اے گل بے برگی اظہار کریں

کیا ان خوش ظاہر لوگوں سے ہم یہ توقع رکھتے تھے

غیر کو لے کر پاس یہ بیٹھیں ہم کو گلیوں میں خوار کریں

میر جی ہیں گے ایک جو آئے کیا ہم ان سے درد کہیں

کچھ بھی جو سن پاویں تو یہ مجلس میں بستار کریں

میر تقی میر

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: