زمرہ جات کے محفوظات: غزل

درد و الم ہے کلفت و غم ہے رنج و بلا ہے کیا کیا کچھ

اکتوبر 6, 2015میر تقی میر،اساتذہ،غزلہوا،چلا،وفا،کہا،ادا،بلا،جلاadmin

دیوان چہارم غزل 1486

چاہ میں دل پر ظلم و ستم ہے جور و جفا ہے کیا کیا کچھ

درد و الم ہے کلفت و غم ہے رنج و بلا ہے کیا کیا کچھ

عاشق کے مر جانے کے اسباب بہت رسوائی میں

دل بھی لگا ہے شرم و حیا ہے مہر و وفا ہے کیا کیا کچھ

عشق نے دے کر آگ یکایک شہر تن کو پھونک دیا

دل تو جلا ہے دماغ جلا ہے اور جلا ہے کیا کیا کچھ

دل لینے کو فریفتہ کے بہتیرا کچھ ہے یار کنے

غمزہ عشوہ چشمک چتون ناز و ادا ہے کیا کیا کچھ

کیا کیا دیدہ درائی سی تم کرتے رہے اس عالم میں

تم سے آگے سنو ہو صاحب نہیں ہوا ہے کیا کیا کچھ

حسرت وصل اندوہ جدائی خواہش کاوش ذوق و شوق

یوں تو چلا ہوں اکیلا لیکن ساتھ چلا ہے کیا کیا کچھ

کیا کہیے جب میں نے کہا ہے میر ہے مغرور اس پر تو

اپنی زباں مت کھول تو ان نے اور کہا ہے کیا کیا کچھ

میر تقی میر

خدا ہے تو کیا غم ہے دل شاد رہ

اکتوبر 6, 2015میر تقی میر،اساتذہ،غزلرہadmin

دیوان چہارم غزل 1485

غم فوت سے بندے آزاد رہ

خدا ہے تو کیا غم ہے دل شاد رہ

میر تقی میر

الجھائو تھا جو اس کی زلفوں سے سو گیا نہ

اکتوبر 6, 2015میر تقی میر،اساتذہ،غزللگا،نا،یا،کھلا،گیا،آستا،ترا،دوا،درمیا،رہا،رودخا،شاadmin

دیوان چہارم غزل 1484

سر تو بہت بکھیرا پر فائدہ کیا نہ

الجھائو تھا جو اس کی زلفوں سے سو گیا نہ

وے زلفیں عقدہ عقدہ ہیں آفت زمانہ

عقدہ ہمارے دل کا ان سے بھی کچھ کھلا نہ

غنچے کے دل کی کچھ تھی واشد بہار آئی

افسوس ہے کہ موسم گل کا بہت رہا نہ

مرنا ہمارا اس سے کہہ دیکھیں یار جاکر

حال اس کا یہ خبر بھی درہم کرے ہے یا نہ

کن رس بھی حیف اس کو تھا نہ کہا تو کیا کیا

قطعہ لطیفہ بذلہ شعر و غزل ترانہ

بیمارعشق بے کس جیتا رہے گا کیوں کر

احوال گیر کم ہو پہنچے بہم دوا نہ

یوں درمیاں چمن کے لے تو گئے تھے ہم کو

پر فرط بے خودی سے ہم تھے نہ درمیانہ

چھو سکتے بھی نہیں ہیں ہم لپٹے بال اس کے

ہیں شانہ گیر سے جو یہ لڑکے نرم شانہ

وحشت چمن میں ہم کو کل صبح بیشتر تھی

بے اس کے پھول گل سے جی ایک دم لگا نہ

صحبت برآر اپنی لوگوں سے کیونکے ہووے

معقول گو ہم اتنے وے ایسے ہرزہ چا نہ

رگڑے گئے ہیں جبہے ازبسکہ راستوں کے

آئینہ ہو رہا ہے وہ سنگ آستانہ

ہے عینہٖ ابلنا سیلاب رود کا سا

اے میر چشم تر ہے یا کوئی رودخانہ

میر تقی میر

جان عزیز ابھی ہے مری آبرو کے ساتھ

اکتوبر 6, 2015میر تقی میر،اساتذہ،غزلمو،گفتگو،آبرو،آرزو،جو،سبوadmin

دیوان چہارم غزل 1483

حیرت طلب کو کام نہیں ہے کسو کے ساتھ

جان عزیز ابھی ہے مری آبرو کے ساتھ

یک رنگ آشنا ہیں خرابات ہی کے لوگ

سرمیکشوں کے پھوٹتے دیکھے سبو کے ساتھ

قمری کا لوہو پانی ہوا ایک عشق میں

آتا ہے اس کا خون جگر آب جو کے ساتھ

خالی نہیں ہے خواہش دل سے کوئی بشر

جاتے ہیں سب جہان سے یک آرزو کے ساتھ

دم میں ہے دم جہاں تئیں گرم تلاش ہوں

سو پیچ و تاب رہتے ہیں ہر ایک مو کے ساتھ

کیا اضطراب عشق سے میں حرف زن ہوں میر

منھ تک جگر تو آنے لگا گفتگو کے ساتھ

میر تقی میر

پانی ہوا ہے کچھ تو میرا جگر جلا کچھ

اکتوبر 6, 2015میر تقی میر،اساتذہ،غزلماسوا،مزہ،کہا،کیا،بھلا،جلا،حیا،دہا،دوا،دیا،دعاadmin

دیوان چہارم غزل 1482

گرمی سے عاشقی کی آخر کو ہو رہا کچھ

پانی ہوا ہے کچھ تو میرا جگر جلا کچھ

آزردہ دل ہزاروں مرتے ہی ہم سنے ہیں

بیماری دلی کی شاید نہیں دوا کچھ

وارفتہ ہے گلستاں اس روے چمپئی کا

ہے فصل گل پہ گل کا اب وہ نہیں مزہ کچھ

وہ آرسی کے آگے پہروں ہے بے تکلف

منھ سے ہمارے اس کو آتی نہیں حیا کچھ

دل ہی کے غم میں گذرے دس دن جو عمر کے تھے

اچرج ہے اس نگر سے جاتا نہیں دہا کچھ

منھ کر بھی میری جانب سوتا نہیں کبھو وہ

کیا جانوں اس کے جی میں ہے اس طرف سے کیا کچھ

دل لے فقیر کا بھی ہاتھوں میں دل دہی کر

آجائے ہے جہاں میں آگے لیا دیا کچھ

یاروں کی آہ و زاری ہووے قبول کیوں کر

ان کی زباں میں کچھ ہے دل میں ہے کچھ دعا کچھ

ساری وہی حقیقت ملحوظ سب میں رکھیے

کہیے نمود ہووے جو اس کے ماسوا کچھ

حرف و سخن کی اس سے اپنی مجال کیا ہے

ان نے کہا ہے کیا کیا میں نے اگر کہا کچھ

کب تک یہ بدشرابی پیری تو میر آئی

جانے کے ہو مہیا اب کر چلو بھلا کچھ

میر تقی میر

آشنایانہ نہ کی کوئی ادا اپنے ساتھ

اکتوبر 6, 2015میر تقی میر،اساتذہ،غزللگا،ادا،بلا،دوا،دغا،سداadmin

دیوان چہارم غزل 1481

یار صد حیف کہ بیگانہ رہا اپنے ساتھ

آشنایانہ نہ کی کوئی ادا اپنے ساتھ

اتحاد اتنا ہے اس سے کہ ہمیشہ ہے وصال

اپنے مطلوب کو ہے ربط سدا اپنے ساتھ

عہد یہ تھا کہ نہ بے وصل بدن سے جاوے

سو جدا ہوتا ہے کی جی نے دغا اپنے ساتھ

رنج نے رنج بہت کھینچے پہنچ کر ہم تک

اک بلا میں ہے گرفتار بلا اپنے ساتھ

دس گنا دکھنے لگا زخم رکھے مرہم کے

درد کا کام رہی کرتی دوا اپنے ساتھ

وارد شہر ہیں یا دشت میں ہم شوق طلب

ہر زماں پھرتا ہے اے میر لگا اپنے ساتھ

میر تقی میر

بولو نہ بولو بیٹھو نہ بیٹھو کھڑے کھڑے ٹک ہوجائو

اکتوبر 6, 2015میر تقی میر،اساتذہ،غزلہوجائو،جائوadmin

دیوان چہارم غزل 1480

صبر کہاں جو تم کو کہیے لگ کے گلے سے سو جائو

بولو نہ بولو بیٹھو نہ بیٹھو کھڑے کھڑے ٹک ہوجائو

برسے ہے غربت سی غربت گور کے اوپر عاشق کی

ابر نمط جو آئو ادھر تو دیکھ کے تم بھی رو جائو

میر جہاں ہے مقامرخانہ پیدا یاں کا نہ پیدا ہے

آئو یہاں تو دائو نخستیں اپنے تئیں بھی کھو جائو

میر تقی میر

ہوکے فقیر گلی میں کسو کی رنج اٹھائو جا بیٹھو

اکتوبر 6, 2015میر تقی میر،اساتذہ،غزللگا،کھا،بچھا،بنا،جا،سناadmin

دیوان چہارم غزل 1479

جی کی لاگ بلا ہے کوئی دل جینے سے اٹھا بیٹھو

ہوکے فقیر گلی میں کسو کی رنج اٹھائو جا بیٹھو

کیا دیکھو ہو آگا پیچھا عشق اگر فی الواقع ہے

ایک دم اس بے چشم و رو کی تیغ تلے بھی جا بیٹھو

ایک سماں تھا وصل کا اس کے سیج پہ سوئے پھولوں کی

اب ہے زمان فراق بچھونے خار و خسک کے بچھا بیٹھو

کام کی صورت اپنے پیارے کیا بگڑی ہے کیا کہیے

آئو کبھو مدت میں یاں تو اچھے منھ کو بنا بیٹھو

ٹیڑھی چال سے اس کی خائف چپکے کھڑے کیا پھرتے ہو

سیدھی سیدھی دوچار اس کو جرأت کرکے سنا بیٹھو

ٹیڑھی بھویں دشمن پہ کرو ہو عشق و ہوس میں تمیز کرو

یعنی تیغ ستم ایک اس کو چلتے پھرتے لگا بیٹھو

نکلا خط پشت لب اس کا خضر و مسیحا مرنے لگے

سوچتے کیا ہو میر عبث اب زہر منگا کر کھا بیٹھو

میر تقی میر

ساتھ ان کے چل تماشا کرلے جس کو چائو ہو

اکتوبر 6, 2015میر تقی میر،اساتذہ،غزلچائو،گھائو،پچھتائو،بھائو،ستھرائوadmin

دیوان چہارم غزل 1478

رفتن رنگین گل رویاں سے کیا ٹھہرائو ہو

ساتھ ان کے چل تماشا کرلے جس کو چائو ہو

قد جو خم پیری سے ہو تو سرکا دھننا ہیچ ہے

ہوچکا ہونا جو کچھ تھا اب عبث پچھتائو ہو

خون کے سیلاب میں ڈوبے ہوئوں کا کیا شمار

ٹک بہے وہ جدول شمشیر تو ستھرائو ہو

تھی وفا و مہر تو بابت دیارعشق کی

دیکھیں شہر حسن میں اس جنس کا کیا بھائو ہو

گریۂ خونیں سے ہیں رخسار میرے لعل تر

دیدئہ خوں بار یوں ہیں جیسے منھ پر گھائو ہو

میر تقی میر

آسماں آگیا ورے کچھ تو

اکتوبر 6, 2015میر تقی میر،اساتذہ،غزلمرے،ورے،کرے،ارےadmin

دیوان چہارم غزل 1477

جی رکا رکنے سے پرے کچھ تو

آسماں آگیا ورے کچھ تو

جو نہ ہووے نماز کریے نیاز

آدمی چاہیے کرے کچھ تو

طالع و جذب و زاری و زر و زور

عشق میں چاہیے ارے کچھ تو

جینا کیا ہے جہان فانی کا

مرتے جاتے ہیں کچھ مرے کچھ تو

سہمے سہمے نظر پڑیں ہیں میر

اس کے اطوار سے ڈرے کچھ تو

میر تقی میر

مار رکھا بیتابی دل نے ہم سب غم کے ماروں کو

اکتوبر 6, 2015میر تقی میر،اساتذہ،غزلہزاروں،ماروں،کاروں،تاروں،داروںadmin

دیوان چہارم غزل 1476

کام کیے ہیں شوق سے ضائع صبر نہ آیا یاروں کو

مار رکھا بیتابی دل نے ہم سب غم کے ماروں کو

جی تو جلا احباب کا مجھ پر عشق میں اس شعلے کے پر

رو ہی نہیں ہے بات کا ہرگز اپنے جانب داروں کو

آئو نہیں دربستہ یعنی منھ پر اس مہ پارے کے

صبح تلک دیکھا کرتے ہیں محو چشمک تاروں کو

گردش چشم سیہ کاسے سے جمع نہ رکھو خاطر تم

بھوکا پیاسا مار رکھا ہے تم سے ان نے ہزاروں کو

کوہکن و مجنوں و وامق میر آئے تھے صحبت میں

منھ نہ لگایا ہم میں کنھوں نے ایسے ہرزہ کاروں کو

میر تقی میر

رنگ اس کا کہیں یاد نہ دے زنہار اس سے کچھ کام نہ لو

اکتوبر 6, 2015میر تقی میر،اساتذہ،غزلکام،آرام،تھامadmin

دیوان چہارم غزل 1475

آج ہمارا سر دکھتا ہے صندل کا بھی نام نہ لو

رنگ اس کا کہیں یاد نہ دے زنہار اس سے کچھ کام نہ لو

یاد آئے وہ کیا تڑپے ہے کیا بیتابی کرتا ہے

کوئی تسلی پھر ہوتا ہے جب تک دل کو تھام نہ لو

میر کہاں تک بے خوابی وہ میں ہوں ٹک جو سلاتا ہوں

بس جو تمھارا کچھ بھی چلے تو ایک گھڑی آرام نہ لو

میر تقی میر

آتے ہو تمکین سے ایسے جیسے کہیں کو جاتے ہو

اکتوبر 6, 2015میر تقی میر،اساتذہ،غزللاتے،ماتے،گھبراتے،آتے،جاتے،سمجھاتے،شرماتےadmin

دیوان چہارم غزل 1474

ناز کی کوئی یہ بھی ٹھسک ہے جی کاہے کو کڑھاتے ہو

آتے ہو تمکین سے ایسے جیسے کہیں کو جاتے ہو

غیر کی ہمراہی کی عزت جی مارے ہے عاشق کا

پاس کبھو جو آتے ہو تو ساتھ اک تحفہ لاتے ہو

مست نہیں پر بال ہیں بکھرے پیچ گلے میں پگڑی کے

ساختہ ایسے بگڑے رہو ہو تم جیسے مدھ ماتے ہو

پردہ ہم سے کر لیتے ہو جب آتے ہو مجلس میں

آنکھیں سب سے ملاتے ہو کچھ ہم ہی سے شرماتے ہو

سوچ نہیں یہ فقیر ہے اپنا جیب دریدہ دیوانہ

ٹھوکر لگتے دامن کو کس ناز سے تم یاں آتے ہو

رفتۂ عشق کسو کا یارو راہ چلے ہے کس کے کہے

کون رہا ہے آپ میں یاں تم کس کے تئیں سمجھاتے ہو

صبر بلا پر کرتے صاحب بیتابی کا حاصل کیا

کوئی مقلب قلبوں کا ہے میر عبث گھبراتے ہو

میر تقی میر

زہر دیویں کاشکے احباب اس درویش کو

اکتوبر 6, 2015میر تقی میر،اساتذہ،غزلمیش،کافرکیش،اندیش،درویش،ریشadmin

دیوان چہارم غزل 1473

کیا کروں میں صبرکم کو اور رنج بیش کو

زہر دیویں کاشکے احباب اس درویش کو

کھول آنکھیں صبح سے آگے کہ شیر اللہ کے

دیکھتے رہتے ہیں غافل وقت گرگ و میش کو

عشق کے بیتاب کے آزار میں مت کر شتاب

جان دیتے دیر لگتی ہی نہیں دل ریش کو

دشمن اپنا میں تو فکر دوستی ہی میں رہا

اب رکھوں کیوں کر سلامت جان عشق اندیش کو

مختلط ترسا بچوں سے شیرہ خانے میں رہا

کن نے دیکھا مسجدوں میں میر کافرکیش کو

میر تقی میر

اس رو کا مثل آئینہ حیراں ہوا نہ تو

اکتوبر 6, 2015میر تقی میر،اساتذہ،غزلمسلماں،نالاں،ناداں،انساں،حیراںadmin

دیوان چہارم غزل 1472

دل اس کے مو سے لگ کے پریشاں ہوا نہ تو

اس رو کا مثل آئینہ حیراں ہوا نہ تو

صد رنگ بحث رہتی ہے یاں ذی شعور سے

اے وائے عقلمند کہ ناداں ہوا نہ تو

نزدیک حق کے دین تو اسلام بن ہے کفر

اے برہمن دریغ مسلماں ہوا نہ تو

کتنے دنوں کہا تھا دلا ضبط نالہ کر

پھر شب کو ناشکیبی سے نالاں ہوا نہ تو

ہوتا ہے میر روے سخن آدمی کی اور

افسوس اے ستم زدہ انساں ہوا نہ تو

میر تقی میر

یا تجھ کو دل شکستوں سے اخلاص پیار ہو

اکتوبر 6, 2015میر تقی میر،اساتذہ،غزلقرار،مار،پیار،پار،اختیار،بہار،دار،شکار،غبارadmin

دیوان چہارم غزل 1471

تو وہ نہیں کسو کا تہ دل سے یار ہو

یا تجھ کو دل شکستوں سے اخلاص پیار ہو

کیا فکر میں ہو اپنی طرحداری ہی کی تم

ہم دردمند لوگوں کے بیمار دار ہو

مصروف احتیاط رہا کرتے رات دن

دینے میں دل کے اپنا جو کچھ اختیار ہو

دل میں کدر سے آندھی سی اٹھنے لگی ہے اب

نکلے گلے کی راہ تو رفع غبار ہو

کھا زہر مر رہیں کہیں کیا زندگی ہے یہ

زلفیں تنک چھوئیں تو ہمیں مار مار ہو

اے آہوان کعبہ نہ اینڈو حرم کے گرد

کھائو کسو کی تیغ کسو کے شکار ہو

منھ سے لگی گلابی ہوا کچھ شگفتہ تو

تھوڑی شراب اور بھی پی جو بہار ہو

بہتی ہے تیز جدول تیغ جفاے یار

یعنی کہ اک ہی وار لگے کام پار ہو

چھڑیوں سے کر قرار مدار اس کو لایئے

جو میر پھر لڑا نہ کریں بے قرار ہو

میر تقی میر

جو صحن خانہ میں تو ہو در و دیوار عاشق ہو

اکتوبر 6, 2015میر تقی میر،اساتذہ،غزلہار،پرکار،بیمار،بار،بازار،دیوار،دار،زار،زردارadmin

دیوان چہارم غزل 1470

عجب گر تیری صورت کا نہ کوئی یار عاشق ہو

جو صحن خانہ میں تو ہو در و دیوار عاشق ہو

تجھے اک بار اگر دیکھے کوئی بے جا ہو دل اس کا

خرام ناز پر تیرے لٹا گھر بار عاشق ہو

تری چھاتی سے لگنا ہار کا اچھا نہیں لگتا

مباد اس وجہ سے گل رو گلے کا ہار عاشق ہو

ہوا ہے مخترع بے رحم خوں ریزی بھی کرنے میں

نہ مارے جان سے جب تک نہ منت دار عاشق ہو

سزا ہے عشق میں زرد و زبون و زار ہی ہونا

نہ عاشق کہیے ان رنگوں نہ جو بیمار عاشق ہو

پڑے سایہ کسو کا تیرے بستر پر تو تو چونکے

وہی لے کام تجھ سے جو کوئی پرکار عاشق ہو

نہیں بازار گرمی ایک دو خواہندہ پر اس کی

اگر وہ رشک یوسف آوے تو بازار عاشق ہو

غریبوں کی تو پگڑی جامے تک لے ہے اتروا تو

تجھے اے سیم بر لے بر میں جو زردار عاشق ہو

لگو ہو زار باراں رونے چلتے بات چاہت کی

کہیں ان روزوں تم بھی میر صاحب زار عاشق ہو

میر تقی میر

نرمی بھی کاش دیتا خالق ٹک اس کی خو کو

اکتوبر 6, 2015میر تقی میر،اساتذہ،غزلگفتگو،آرزو،جستجو،خو،روadmin

دیوان چہارم غزل 1469

وہ گل سا رو سراہوں یا پیچ دار مو کو

نرمی بھی کاش دیتا خالق ٹک اس کی خو کو

ان گیسوئوں کے حلقے ہیں چشم شوق عاشق

وے آنکھیں دیکھتی ہیں حسرت سے اس کے رو کو

دم کی کشش سے کوشش معلوم تو ہے لیکن

پاتے نہیں ہم اس کی کچھ طرز جستجو کو

آلودہ خون دل سے صد حرف منھ پر آئے

مرغ چمن نہ سمجھا انداز گفتگو کو

دل میر دلبروں سے چاہا کرے ہے کیا کیا

کچھ انتہا نہیں ہے عاشق کی آرزو کو

میر تقی میر

نہ گرم ہوکے بہت آگ ہو کے آب کرو

اکتوبر 6, 2015میر تقی میر،اساتذہ،غزلآب،اضطراب،حجاب،حساب،خواب،خراب،شتابadmin

دیوان چہارم غزل 1468

نہیں ہے تاب تنک تم بھی مت عتاب کرو

نہ گرم ہوکے بہت آگ ہو کے آب کرو

تمھارے عکس سے بھی عکس مجھ کو رشک سے ہے

نہ دیکھو آئینہ منھ سے مرے حجاب کرو

خراب عشق تو سرگشتہ ہوں ہی میں تم بھی

پھرا پھرا کے مجھے گلیوں میں خراب کرو

کہا تھا تم نے کہ ہر حرف پر ہے بوسۂ لب

جو باتیں کی ہیں تو اب قرض کا حساب کرو

ہوا ہے اہل مساجد پہ کام ازبس تنگ

نہ شب کو جاگتے رہنے کا اضطراب کرو

خدا کریم ہے اس کے کرم سے رکھ کر چشم

دراز کھینچو کسو میکدے میں خواب کرو

جہاں میں دیر نہیں لگتی آنکھیں مندتے میر

تمھیں تو چاہیے ہر کام میں شتاب کرو

میر تقی میر

اک نالہ حوصلے سے بس ہے وداع جاں کو

اکتوبر 6, 2015میر تقی میر،اساتذہ،غزلکہاں،کماں،آسماں،جہاں،جاں،داستاں،زباںadmin

دیوان چہارم غزل 1467

دیتی ہے طول بلبل کیا شورش فغاں کو

اک نالہ حوصلے سے بس ہے وداع جاں کو

میں تو نہیں پر اب تک مستانہ غنچے ہوکر

کہتے ہیں مرغ گلشن سے میری داستاں کو

نالاں تو ہیں مجھی سے پر وہ اثر کہاں ہے

گو طائر گلستاں سیکھے مری زباں کو

کیا جانیے کہ کیا کچھ پردے سے ہووے ظاہر

رہتے ہیں دیکھتے ہم ہر صبح آسماں کو

اس چشم سرخ پر ہے وہ ابروے کشیدہ

جوں ترک مست رکھ لے سر کے تلے کماں کو

میری نگاہ میں تو معدوم سب ہیں وے ہی

موجود بھی نہ جانا اس راہ سے جہاں کو

بعد از نماز تھے کل میخانے کے در اوپر

کیا جانے میر واں سے پھر اٹھ گئے کہاں کو

میر تقی میر

رہ رہ گئے مہ و خور آئینہ وار دونوں

اکتوبر 6, 2015میر تقی میر،اساتذہ،غزلقرار،نہار،وار،کنار،کار،اختیار،بار،تار،زارadmin

دیوان چہارم غزل 1466

کیا کیا جھمک گئے ہیں رخسار یار دونوں

رہ رہ گئے مہ و خور آئینہ وار دونوں

تصویر قیس و لیلیٰ ٹک ہاتھ لے کے دیکھو

کیسے ہیں عاشقی کے حیران کار دونوں

دست جنوں نے اب کے کپڑوں کی دھجیاں کیں

دامان و جیب میرے ہیں تار تار دونوں

پر سال کی سی بارش برسوں میں پھر ہوئی تھی

ابر اور دیدئہ تر روتے ہیں زار دونوں

دن ہیں بڑے کبھو کے راتیں بڑی کبھو کی

رہتے نہیں ہیں یکساں لیل و نہار دونوں

دل اور برق ابر و فصل گل ایک سے ہیں

یعنی کہ بے کلی سے ہیں بے قرار دونوں

خوش رنگ اشک خونیں گرتے رہے برابر

باغ و بہار ہیں اب جیب و کنار دونوں

اس شاخ گل سے قد کی کیا چوٹ لگ گئی ہے

جو دل جگر ہوئے ہیں خون ایک بار دونوں

چلتے جو اس کو دیکھا جی اپنے کھنچ گئے ہیں

ہم اور میر یاں ہیں بے اختیار دونوں

میر تقی میر

کیوں کر کہیے بہشتی رو ہے اس خوبی سے حور نہیں

اکتوبر 6, 2015میر تقی میر،اساتذہ،غزلمقدور،منظور،مشہور،معمور،حور،دور،رنجورadmin

دیوان چہارم غزل 1465

کس سے مشابہ کیجے اس کو ماہ میں ویسا نور نہیں

کیوں کر کہیے بہشتی رو ہے اس خوبی سے حور نہیں

شعر ہمارے عالم کے ہر چار طرف کیا دوڑے ہیں

کس وادی آبادی میں یہ حرف و سخن مشہور نہیں

ہم دیکھیں تو دیکھیں اسے پھر پردہ بہتر ہے یعنی

اور کریں نظارہ اس کا ہم کو یہ منظور نہیں

عزت اپنی تہی دستی میں رکھ لی خدا نے ہزاروں شکر

قدر ہے دست قدرت سے یاں حیف ہمیں مقدور نہیں

راہ دور عدم سے آئے بستی جان کے دنیا میں

سویاں گھر اوجڑ ہیں سارے اک منزل معمور نہیں

عشق و جنوں سے اگرچہ تن پر ضعف و نحافت ہے لیکن

وحشت گو ہو عرصۂ محشر مجنوں سے رنجور نہیں

ہجراں میں بھی برسوں ہم نے میر کیا ہے پاس وفا

اب جو کبھو ٹک پاس بلا لے ہم کو وہ تو دور نہیں

میر تقی میر

مروت قحط ہے آنکھیں نہیں کوئی ملاتا یاں

اکتوبر 6, 2015میر تقی میر،اساتذہ،غزللگاتا،ملاتا،آتاadmin

دیوان چہارم غزل 1464

پھرا میں صورت احوال ہر یک کو دکھاتا یاں

مروت قحط ہے آنکھیں نہیں کوئی ملاتا یاں

خرابہ دلی کا دہ چند بہتر لکھنؤ سے تھا

وہیں میں کاش مرجاتا سراسیمہ نہ آتا یاں

محبت دشمن جاں ہے جو میں معلوم یہ کرتا

تو کاہے کو کسو سے میر اپنا دل لگاتا یاں

میر تقی میر

رسوا ہوکر مارے جاویں اس کو بھی بدنام کریں

اکتوبر 6, 2015میر تقی میر،اساتذہ،غزلانعام،آرام،ابرام،ارقام،بدنام،سلام،شامadmin

دیوان چہارم غزل 1463

یوں ناکام رہیں گے کب تک جی میں ہے اک کام کریں

رسوا ہوکر مارے جاویں اس کو بھی بدنام کریں

جن کو خدا دیتا ہے سب کچھ وے ہی سب کچھ دیتے ہیں

ٹوپی لنگوٹی پاس اپنے ہم اس پر کیا انعام کریں

منھ کھولے تو روز ہے روشن زلف بکھیرے رات ہے پھر

ان طوروں سے عاشق کیوں کر صبح کو اپنی شام کریں

خط و کتابت حرف و حکایت صفحہ ورق میں آجاوے

دستے کے دستے کاغذ ہو جو دل کا حال ارقام کریں

شیخ پڑے محراب حرم میں پہروں دوگانہ پڑھتے رہو

سجدہ ایک اس تیغ تلے کا ان سے ہو تو سلام کریں

دل آسودہ ہو تو رہے ٹک در پر ہم سو بار گئے

وہ سو یہی کہہ بھیجے ہے باہر جاویں اب آرام کریں

میل گدائی طبع کو اپنی کچھ بھی نہیں ہے ورنہ میر

دو عالم کو مانگ کے لاویں ہم جو تنک ابرام کریں

میر تقی میر

اب کہتے ہیں خلطہ کیسا جان نہیں پہچان نہیں

اکتوبر 6, 2015میر تقی میر،اساتذہ،غزلمیدان،نادان،کان،پہچان،آسان،احسان،ارمان،جان،دھیانadmin

دیوان چہارم غزل 1462

عالم علم میں ایک تھے ہم وے حیف ہے ان کو گیان نہیں

اب کہتے ہیں خلطہ کیسا جان نہیں پہچان نہیں

کس امید پہ ساکن ہووے کوئی غریب شہر اس کا

لطف نہیں اکرام نہیں انعام نہیں احسان نہیں

ہائے لطافت جسم کی اس کے مر ہی گیا ہوں پوچھو مت

جب سے تن نازک وہ دیکھا تب سے مجھ میں جان نہیں

کیا باتوں سے تسلی ہو دل مشکل عشقی میری سب

یار سے کہنے کہتے ہیں پر کہنا کچھ آسان نہیں

شام و سحر ہم سرزدہ دامن سر بگریباں رہتے ہیں

ہم کو خیال ادھر ہی کاہے ان کو ادھر کا دھیان نہیں

جان کے میں تو آپ بنا ہوں ان لڑکوں میں دیوانہ

عقل سے بھی بہرہ ہے مجھ کو اتنا میں نادان نہیں

پائوں کو دامن محشر میں ناچاری سے ہم کھینچیں گے

لائق اپنی وحشت کے اس عرصے کا میدان نہیں

چاہت میں اس مایۂ جاں کی مرنے کے شائستہ ہوئے

جا بھی چکی ہے دل کی ہوس اب جینے کا ارمان نہیں

شور نہیں یاں سنتا کوئی میر قفس کے اسیروں کا

گوش نہیں دیوار چمن کے گل کے شاید کان نہیں

میر تقی میر

ہم جو عاشق ہیں سو ٹھہرے ہیں گنہگاروں میں

اکتوبر 6, 2015میر تقی میر،اساتذہ،غزلہواداروں،گنہگاروں،گرفتاروں،بیماروں،دیواروںadmin

دیوان چہارم غزل 1461

اب ہوسناک ہی مردم ہیں ترے یاروں میں

ہم جو عاشق ہیں سو ٹھہرے ہیں گنہگاروں میں

کوچۂ یار تو ہے غیرت فردوس ولے

آدمی ایک نہیں اس کے ہواداروں میں

ہوکے بدحال محبت میں کھنچے آخرکار

لوگ اچھے تھے بہت یار کے بیماروں میں

جی گیا ایک دم سرد ہی کے ساتھ اپنا

ہم جو خوش زمزمہ تھے اس کے گرفتاروں میں

اب در باز بیاباں میں قدم رکھیے میر

کب تلک تنگ رہیں شہر کی دیواروں میں

میر تقی میر

چھاتی سے وہ مہ نہ لگا ٹک آکر اس بھی مہینے میں

اکتوبر 6, 2015میر تقی میر،اساتذہ،غزلمہینے،مدینے،کینے،پینے،پسینے،آئینے،جینےadmin

دیوان چہارم غزل 1460

داغ فراق سے کیا پوچھو ہو آگ لگائی سینے میں

چھاتی سے وہ مہ نہ لگا ٹک آکر اس بھی مہینے میں

چاک ہوا دل ٹکڑے جگر ہے لوہو روئے آنکھوں سے

عشق نے کیا کیا ظلم دکھائے دس دن کے اس جینے میں

گوندھ کے گویا پتی گل کی وہ ترکیب بنائی ہے

رنگ بدن کا تب دیکھو جب چولی بھیگے پسینے میں

اس صورت کا ناز نہ تھا کچھ دب چلتا تھا ہم سے بھی

جب تک دیکھا ان نے نہ تھا منھ خوب اپنا آئینے میں

لوگوں میں اسلام کے ہو نہ شہرت اس رسوائی کی

شیخ کو پھیرا گدھے چڑھاکر مکے اور مدینے میں

دل نہ ٹٹولیں کاشکے اس کا سردی مہر تو ظاہر ہے

پاویں اس کو گرم مبادا یار ہمارے کینے میں

میر نے کیا کیا ضبط کیا ہے شوق میں اشک خونیں کو

کہیے جو تقصیر ہوئی ہو اپنا لوہو پینے میں

میر تقی میر

وے اندھیری مینھ برسے جوں کبھو شدت سے یاں

اکتوبر 6, 2015میر تقی میر،اساتذہ،غزلقدرت،مہلت،ملت،مدت،الفت،حیرت،حسرت،شدت،صحبتadmin

دیوان چہارم غزل 1459

ہجر میں روتا ہوں ہر شب میں تو اس صورت سے یاں

وے اندھیری مینھ برسے جوں کبھو شدت سے یاں

کس قدر بیگانہ خو ہیں مردمان شہرحسن

بات کرنا رسم و عادت ہی نہیں الفت سے یاں

اٹھ گئے ہیں جب سے ہم سونا پڑا ہے باغ سب

شور ہنگام سحر کا مہر ہے مدت سے یاں

سر کوئی پھوڑے محبت میں تو بارے اس طرح

مر گیا ہے عشق میں فرہاد جس قدرت سے یاں

دلکشی اس بزم کی ظاہر ہے تم دیکھو تو ہو

لوگ جی دیتے چلے جاتے ہیں کس حسرت سے یاں

صورتوں سے خاکداں یہ عالم تصویر ہے

بولیں کیا اہل نظر خاموش ہیں حیرت سے یاں

فہم حرفوں کے تنافر کا بھی یاروں کو نہیں

اس پہ رکھتے ہیں تنفر سب مری صحبت سے یاں

پنج روزہ عمر کریے عاشقی یا زاہدی

کام کچھ چلتا نہیں اس تھوڑی سی مہلت سے یاں

کیا سرجنگ و جدل ہو بے دماغ عشق کو

صلح کی ہے میر نے ہفتاد و دو ملت سے یاں

میر تقی میر

کہو تم سو دل کا مداوا کریں

اکتوبر 6, 2015میر تقی میر،اساتذہ،غزلمداوا،پیدا،پروا،اچھا،برپا،تمنا،تماشا،رسوا،سوداadmin

دیوان چہارم غزل 1458

تھکے چارہ جوئی سے اب کیا کریں

کہو تم سو دل کا مداوا کریں

گلستاں میں ہم غنچہ ہیں دیر سے

کہاں ہم کو پروا کہ پروا کریں

نہیں چاہتا جی کچھ اب سیر ہیں

ہوس دل کو ہو تو تمنا کریں

بخود جستجو میں نہ اس کی رہے

ہم آپھی ہیں گم کس کو پیدا کریں

غضب ہے یہ انداز رفتار عشق

چلے جائیں جی ہم تماشا کریں

بلا شور ہے سر میں ہم کب تلک

قیامت کا ہنگامہ برپا کریں

کہیں دل کی مرغان گلشن سے کیا

یہ بے حوصلہ ہم کو رسوا کریں

کھپا عشق کا جوش دل میں بھلا

کہ بدنام ہوویں جو سودا کریں

برے حال اس کی گلی میں ہیں میر

جو اٹھ جائیں واں سے تو اچھا کریں

میر تقی میر

ہم جو دیکھیں ہیں تو وے آنکھ چھپا لیتے ہیں

اکتوبر 6, 2015میر تقی میر،اساتذہ،غزلہوا،چھپا،اٹھا،بنا،جا،دوا،دعاadmin

دیوان چہارم غزل 1457

وہ نہیں اب کہ فریبوں سے لگا لیتے ہیں

ہم جو دیکھیں ہیں تو وے آنکھ چھپا لیتے ہیں

کچھ تفاوت نہیں ہستی و عدم میں ہم بھی

اٹھ کے اب قافلۂ رفتہ کو جا لیتے ہیں

نازکی ہائے رے طالع کی نکوئی سے کبھو

پھول سا ہاتھوں میں ہم اس کو اٹھا لیتے ہیں

صحبت آخر کو بگڑتی ہے سخن سازی سے

کیا درانداز بھی اک بات بنا لیتے ہیں

ہم فقیروں کو کچھ آزار تمھیں دیتے ہو

یوں تو اس فرقے سے سب لوگ دعا لیتے ہیں

چاک سینے کے ہمارے نہیں سینے اچھے

انھیں رخنوں سے دل و جان ہوا لیتے ہیں

میر کیا سادے ہیں بیمار ہوئے جس کے سبب

اسی عطار کے لڑکے سے دوا لیتے ہیں

میر تقی میر

رنگ طپیدن کی شوخی سے منھ پر میرے رنگ نہیں

اکتوبر 6, 2015میر تقی میر،اساتذہ،غزلننگ،تنگ،درنگ،رنگ،سنگadmin

دیوان چہارم غزل 1456

جی مارا بیتابی دل نے اب کچھ اچھا ڈھنگ نہیں

رنگ طپیدن کی شوخی سے منھ پر میرے رنگ نہیں

وہ جو خرام ناز کرے ہے ٹھوکر دل کو لگتی ہے

چوٹ کے اوپر چوٹ پڑے ہے دل ہے میرا سنگ نہیں

ہم بھی عالم فقر میں ہیں پر ہم سے جو مانگے کوئی فقیر

ایک سوال میں دو عالم دیں اتنے دل کے تنگ نہیں

ہاتھ پہ ہاتھ دھرے ہو گے کیا میرے طور شتابی ہو

بیٹھا ہوں کھڑے پائوں میں کچھ چلنے میں تو درنگ نہیں

شعرمیر بھی پڑھتا ہے تو اور کسو کا لے کر نام

کیوں کر کہیے اس ناداں کو نام سے میرے ننگ نہیں

میر تقی میر

بیٹھنے پاتے نہیں ہم کہ اٹھا دیتے ہیں

اکتوبر 6, 2015میر تقی میر،اساتذہ،غزللگا،ملا،مزہ،اٹھا،بچھا،بنا،جلا،دعا،دغاadmin

دیوان چہارم غزل 1455

ہم کو کہنے کے تئیں بزم میں جا دیتے ہیں

بیٹھنے پاتے نہیں ہم کہ اٹھا دیتے ہیں

ان طیوروں سے ہوں میں بھی اگر آتی ہے صبا

باغ کے چار طرف آگ لگا دیتے ہیں

گرچہ ملتے ہیں خنک غیرت مہ یہ لڑکے

دل جگر دونوں کو یک لخت جلا دیتے ہیں

دیر رہتا ہے ہما لاش پہ غم کشتوں کی

استخواں ان کے جلے کچھ تو مزہ دیتے ہیں

اس شہ حسن کا اقبال کہ ظالم کے تئیں

ہر طرف سینکڑوں درویش دعا دیتے ہیں

دل جگر ہو گئے بیتاب غم عشق جہاں

جی بھی ہم شوق کے ماروں کے دغا دیتے ہیں

کیونکے اس راہ میں پا رکھیے کہ صاحب نظراں

یاں سے لے واں تئیں آنکھیں ہی بچھا دیتے ہیں

ملتے ہی آنکھ ملی اس کی تو پر ہم بے تہ

خاک میں آپ کو فی الفور ملا دیتے ہیں

طرفہ صناع ہیں اے میر یہ موزوں طبعاں

بات جاتی ہے بگڑ بھی تو بنا دیتے ہیں

میر تقی میر

بہت ہی حال برا ہے اب اضطراب نہیں

اکتوبر 6, 2015میر تقی میر،اساتذہ،غزلپرآب،اضطراب،باب،حساب،خواب،خراب،شرابadmin

دیوان چہارم غزل 1454

بھلا ہوا کہ دل مضطرب میں تاب نہیں

بہت ہی حال برا ہے اب اضطراب نہیں

جگر کا لوہو جو پانی ہو بہ نکلتا تھا

سو ہو چکا کہ مری چشم اب پرآب نہیں

دیار حسن میں دل کی نہیں خریداری

وفا متاع ہے اچھی پہ یاں کے باب نہیں

حساب پاک ہو روز شمار میں تو عجب

گناہ اتنے ہیں میرے کہ کچھ حساب نہیں

گذر ہے عشق کی بے طاقتی سے مشکل آہ

دنوں کو چین نہیں ہے شبوں کو خواب نہیں

جہاں کے باغ کا یہ عیش ہے کہ گل کے رنگ

ہمارے جام میں لوہو ہے سب شراب نہیں

تلاش میر کی اب میکدوں میں کاش کریں

کہ مسجدوں میں تو وہ خانماں خراب نہیں

میر تقی میر

مار رکھا سو ان نے مجھ کو کس ظالم سے جا لڑیاں

اکتوبر 6, 2015میر تقی میر،اساتذہ،غزللڑیاں،کڑیاں،گھڑیاں،بڑیاں،جھڑیاںadmin

دیوان چہارم غزل 1453

دل کی کچھ تقصیر نہیں ہے آنکھیں اس سے لگ پڑیاں

مار رکھا سو ان نے مجھ کو کس ظالم سے جا لڑیاں

ایک نگہ میں مر جاتا ہے عاشق کوچک دل اس کا

زہر بھری کیا کام آتی ہیں گو وے آنکھیں ہوں بڑیاں

عقدے داغ دل کے شاید دست قدرت کھولے گا

ناخن سے تدبیر کے میری کھلتی نہیں یہ گل جھڑیاں

نحس تھے کیا وے وقت و ساعت جن میں لگا تھا دل اپنا

سال پہر ہے اب تو ہم کو ماہ برابر ہیں گھڑیاں

میر بلاے جان رہے ہیں دونوں فراق و وصل اس کے

ہجر کی راتیں وہ بھاری تھیں ملنے کے دن کی یہ کڑیاں

میر تقی میر

آپ میں ہم سے بے خود و رفتہ پھر پھر بھی کیا آتے ہیں

اکتوبر 6, 2015میر تقی میر،اساتذہ،غزللاتے،آتے،اٹھاتےadmin

دیوان چہارم غزل 1452

دل کی لاگ بری ہے ہوتی چنگے بھلے مرجاتے ہیں

آپ میں ہم سے بے خود و رفتہ پھر پھر بھی کیا آتے ہیں

رنگ نہ بدلے چہرہ کیونکر آنکھیں بیٹھی جائیں نہ کیوں

کیسے کیسے غم کھاتے ہیں کیا کیا رنج اٹھاتے ہیں

جی ہی جائے ہے میر جو اپنا دیر کی جانب کیا کریے

یوں تو مزاج طرف کعبے کے بہتیرا ہم لاتے ہیں

میر تقی میر

کہ حالت مجھے غش کی آئی نہیں

اکتوبر 6, 2015میر تقی میر،اساتذہ،غزللڑائی،لائی،اڑائی،آئی،آشنائی،ادائی،جدائی،رہائیadmin

دیوان چہارم غزل 1451

غزل میر کی کب پڑھائی نہیں

کہ حالت مجھے غش کی آئی نہیں

زباں سے ہماری ہے صیاد خوش

ہمیں اب امید رہائی نہیں

کتابت گئی کب کہ اس شوخ نے

بنا اس کی گڈّی اڑائی نہیں

نسیم آئی میرے قفس میں عبث

گلستاں سے دو پھول لائی نہیں

مری دل لگی اس کے رو سے ہی ہے

گل تر سے کچھ آشنائی نہیں

نوشتے کی خوبی لکھی کب گئی

کتابت بھی ایک اب تک آئی نہیں

گلہ ہجر کا سن کے کہنے لگا

ہمارے تمھارے جدائی نہیں

جدا رہتے برسوں ہوئے کیونکے یہ

کنایہ نہیں بے ادائی نہیں

سیہ طالعی میری ظاہر ہے اب

نہیں شب کہ اس سے لڑائی نہیں

میر تقی میر

یاد میں اس خود رو گل تر کی کیسے کیسے بولیں ہیں

اکتوبر 6, 2015میر تقی میر،اساتذہ،غزلہولیں،کھولیں،بولیں،تولیں،دھولیں،رولیں،سولیںadmin

دیوان چہارم غزل 1450

صبح ہوئی گلزار کے طائر دل کو اپنے ٹٹولیں ہیں

یاد میں اس خود رو گل تر کی کیسے کیسے بولیں ہیں

باغ میں جو ہم دیوانے سے جا نکلیں ہیں نالہ کناں

غنچے ہو ہو مرغ چمن کے ساتھ ہمارے ہولیں ہیں

یار ہمارا آساں کیا کچھ سینہ کشادہ ہم سے ملا

خون کریں ہیں جب دل کو وے بند قبا کے کھولیں ہیں

مینھ جو برسے ہے شدت سے دیکھ اندھیری کیا ہے یہ

یعنی تنگ جو ہم آتے ہیں دل کو کھول کے رولیں ہیں

وہ دھوبی کا کم ملتا ہے میل دل اودھر ہے بہت

کوئی کہے اس سے ملتے میں تجھ کو کیا ہم دھولیں ہیں

سرو تو ہے سنجیدہ لیکن پیش مصرع قد یار

ناموزوں ہی نکلے ہے جب دل میں اپنے تولیں ہیں

مرگ کا وقفہ اس رستے میں کیا ہے میر سمجھتے ہو

ہارے ماندے راہ کے ہیں ہم لوگ کوئی دم سولیں ہیں

میر تقی میر

کم اتفاق پڑتے ہیں یہ اتفاق میں

اکتوبر 6, 2015میر تقی میر،اساتذہ،غزلفراق،اتفاق،احتراق،اشتیاق،بلاق،رواق،طاقadmin

دیوان چہارم غزل 1449

ہم سے اسے نفاق ہوا ہے وفاق میں

کم اتفاق پڑتے ہیں یہ اتفاق میں

شاید کہ جان و تن کی جدائی بھی ہے قریب

جی کو ہے اضطراب بہت اب فراق میں

عازم پہنچنے کے تھے دل و عرش تک ولے

آیا قصور اپنے ہی کچھ اشتیاق میں

احراق اپنے قلب کا رونے سے کب گیا

پانی کی چار بوندیں ہیں کیا احتراق میں

تحصیل علم کرنے سے دیکھا نہ کچھ حصول

میں نے کتابیں رکھیں اٹھا گھر کے طاق میں

دم ناک میں بقول زناں عاشقوں کے ہیں

ہلنا بلا ہے موتی کا اس کے بلاق میں

اک نور گرم جلوہ فلک پر ہے ہر سحر

کوئی تو ماہ پارہ ہے میر اس رواق میں

میر تقی میر

پلکوں کی صف کو دیکھ کے بھیڑیں سرک گئیں

اکتوبر 6, 2015میر تقی میر،اساتذہ،غزلچھک،پٹک،پھڑک،اچک،بہک،تلک،تھک،جھپک،دھڑک،سرکadmin

دیوان چہارم غزل 1448

خوبی رو و چشم سے آنکھیں اٹک گئیں

پلکوں کی صف کو دیکھ کے بھیڑیں سرک گئیں

چلتے سمندناز کی شوخی کو اس کے دیکھ

گھوڑوں کی باگیں دست سپہ سے اچک گئیں

ترچھی نگاہیں پلکیں پھریں اس کی پھرپھریں

سو فوجیں جو دو رستہ کھڑی تھیں بہک گئیں

بجلی سا مرکب اس کا کڑک کر چمک گیا

لوگوں کے سینے پھٹ گئے جانیں دھڑک گئیں

محبوب کا وصال نہ ہم کو ہوا نصیب

دل سے ہزار خواہشیں سر کو پٹک گئیں

موقوف طور نور کا جھمکا ترا نہیں

چمکا جہاں تو برق سا آنکھیں جھپک گئیں

وحشت سے بھر رہی تھی بزن گہ جہان کی

جانیں بسان طائر بسمل پھڑک گئیں

گرد رہ اس کی دیکھتے اپنے اٹھی نہ حیف

اب منتظر ہو آنکھیں مندیں یعنی تھک گئیں

بھردی تھی چشم ساقی میں یارب کہاں کی مے

مجلس کی مجلسیں نظر اک کرتے چھک گئیں

کیا میر اس کی نوک پلک سے سخن کرے

سرتیز چھریاں گڑتی جگر دل تلک گئیں

میر تقی میر

اب ہجر یار میں ہیں کیا دل زدہ سفر میں

اکتوبر 6, 2015میر تقی میر،اساتذہ،غزلنظر،گذر،تر،جگر،سفرadmin

دیوان چہارم غزل 1447

کچھ قدر عافیت کی معلوم کی نہ گھر میں

اب ہجر یار میں ہیں کیا دل زدہ سفر میں

ہر لحظہ بے قراری ہر لمحہ آہ و زاری

ہر دم ہے اشکباری نومیدی ہے نظر میں

روتے ہی رہنا اکثر تہ چاہتا ہے سو تو

تاب اب نہیں ہے دل میں نے خون ہے جگر میں

یہ بخت دیکھ گاہے آتا ہے آنکھوں میں بھی

پر نقش اس کے پا کا بیٹھا نہ چشم تر میں

کیا راہ چلنے سے ہے اے میر دل مکدر

تو ہی نہیں مسافر ہے عمر بھی گذر میں

میر تقی میر

محزوں ہوویں مفتوں ہوویں مجنوں ہوویں رسوا ہوں

اکتوبر 6, 2015میر تقی میر،اساتذہ،غزلپیدا،تنہا،جا،دریا،رسواadmin

دیوان چہارم غزل 1446

دل کے گئے بے دل کہلائے آگے دیکھیے کیا کیا ہوں

محزوں ہوویں مفتوں ہوویں مجنوں ہوویں رسوا ہوں

عشق کی رہ میں پائوں رکھا سو رہنے لگے کچھ رفتہ سے

آگے چل کر دیکھیں ہم اب گم ہوویں یا پیدا ہوں

خار و خس الجھے ہیں آپھی بحث انھوں سے کیا رکھیں

موج زن اپنی طبع رواں سے جب ہم جیسے دریا ہوں

ہم بھی گئے جاگہ سے اپنی شوق میں اس ہرجائی کے

عشق کا جذبہ کام کرے تو پھر ہم دونوں یک جا ہوں

کوئی طرف یاں ایسی نہیں جو خالی ہووے اس سے میر

یہ طرفہ ہے شورجرس سے چار طرف ہم تنہا ہوں

میر تقی میر

نکلی ہے مگر تازہ کوئی شاخ کماں میں

اکتوبر 6, 2015میر تقی میر،اساتذہ،غزلفغاں،کماں،خزاں،رواں،زباںadmin

دیوان چہارم غزل 1445

ہے وضع کشیدہ کا جو شور اس کے جہاں میں

نکلی ہے مگر تازہ کوئی شاخ کماں میں

ہر طور میں ہم حرف و سخن لاگ سے دل کی

کیا کیا کہیں ہیں مرغ چمن اپنی زباں میں

کیا بائو نے بھی دست تطاول کو دیا طول

پھیلے پڑے ہیں پھول ہی سب اب کے خزاں میں

خوش رنگ ہے کس مرتبہ انہار کا پانی

خوناب مری چشم کا ہے آب رواں میں

روئو مرے احوال پہ جوں ابر بہت میر

بے طاقتی بجلی کی سی ہے آہ و فغاں میں

میر تقی میر

اتنا ہے کہ طپش سے دل کی سر پر وہ دھمّال نہیں

اکتوبر 6, 2015میر تقی میر،اساتذہ،غزلمال،چال،وصّال،جنجال،جال،دھمّال،سالadmin

دیوان چہارم غزل 1444

ضعف دماغ سے کیا پوچھو ہو اب تو ہم میں حال نہیں

اتنا ہے کہ طپش سے دل کی سر پر وہ دھمّال نہیں

گاہے گاہے اس میں ہم نے منھ اس مہ کا دیکھا تھا

جیسا سال کہ پر کا گذرا ویسا بھی یہ سال نہیں

بالوں میں اس کے دل الجھا تھا خوب ہوا جو تمام ہوا

یعنی گیا جب پیچ سے جی ہی تب پھر کچھ جنجال نہیں

ایسی متاع قلیل کے اوپر چشم نہ کھولیں اہل نظر

آنکھ میں آوے جو کچھ ہووے دنیا اتنی مال نہیں

سرو چماں کو سیر کیا تھا کبک خراماں دیکھ لیا

اس کا سا انداز نہ پایا اس کی سی یہ چال نہیں

دل تو ان میں پھنس جاتا ہے جی ڈوبے ہے دیکھ ادھر

چاہ زنخ گو چاہ نہیں ہے بال اس کے گو جال نہیں

کب تک دل کے ٹکڑے جوڑوں میر جگر کے لختوں سے

کسب نہیں ہے پارہ دوزی میں کوئی وصّال نہیں

میر تقی میر

کس کس ناز سے وے آتے پر آنکھ نہ ان سے ملاتے ہم

اکتوبر 6, 2015میر تقی میر،اساتذہ،غزلملاتے،ماتے،کھاتے،آتے،بندھاتےadmin

دیوان چہارم غزل 1443

صبر بہت تھا ایک سمیں میں جا سے اپنی نہ جاتے ہم

کس کس ناز سے وے آتے پر آنکھ نہ ان سے ملاتے ہم

کعبے سے کر نذر اٹھے سو خرج راہ اے وائے ہوئے

ورنہ صنم خانے میں جا زنار گلے سے بندھاتے ہم

ہاتھی مست بھی آوے چلا تو اس سے منھ کو پھیر نہ لیں

پھرتے ہیں سرمست محبت مے ناخوردہ ماتے ہم

ہائے جوانی وہ نہ گلے لگتا تو خشم عشقی سے

نعل جڑی جاتی چھاتی پر گل ہاتھوں پر کھاتے ہم

عشق تو کارخوب ہے لیکن میر کھنچے ہے رنج بہت

کاش کے عالم ہستی میں بے عشق و محبت آتے ہم

میر تقی میر

رحلت کرنے سے آگے مجھ کو دیکھتے آتے جاتے تم

اکتوبر 6, 2015میر تقی میر،اساتذہ،غزللگاتے،لاتے،پاتے،آتے،اٹھاتے،جاتے،دکھاتےadmin

دیوان چہارم غزل 1442

چاہیے یوں تھا بگڑی صحبت آپھی آ کے بناتے تم

رحلت کرنے سے آگے مجھ کو دیکھتے آتے جاتے تم

چلتے کہا تھا جائو سفر کر آئوگے تو ملیے گا

وعدئہ وصل نہ ہوتا تو پھر کس کو جیتا پاتے تم

کیا دن تھے وے دیکھتے تم کو نیچی نظر میں کرلیتا

شرما شرما لوگوں سے جب آنکھیں مجھ کو دکھاتے تم

بستر پر میں مردہ سا تھا جان سی مجھ میں آجاتی

کیا ہوتا جو رنجہ قدم کر میرے سرہانے آتے تم

دل کے اوپر ہاتھ رکھے ہی شام و سحر یاں گذرے ہے

حال یہ تھا تو دل عاشق کا ہاتھ میں ٹک تو لاتے تم

خاک ہے اصل طینت آدم چاہیے اس کو عجز کرے

بات کی تہ کو کچھ پاتے تو اتنا سر نہ اٹھاتے تم

چہرہ زرد بجا ہے سارا عشق میں غم کا مارا ہوں

رنگ یہ دیکھا ہوتا تو دل میر کہیں نہ لگاتے تم

میر تقی میر

آجاویں جو یہ ہرجائی تو بھی نہ جاویں جا سے ہم

اکتوبر 6, 2015میر تقی میر،اساتذہ،غزلوفا،پیا،پا،جا،حیاadmin

دیوان چہارم غزل 1441

عشق بتوں سے اب نہ کریں گے عہد کیا ہے خدا سے ہم

آجاویں جو یہ ہرجائی تو بھی نہ جاویں جا سے ہم

گریۂ خونیں ٹک بھی رہے تو خاک سی منھ پر اڑتی ہے

شام و سحر رہتے ہیں یعنی اپنے لہو کے پیاسے ہم

اس کی نہ پوچھو دوری میں ان نے پرسش حال ہماری نہ کی

ہم کو دیکھو مارے گئے ہیں آکر پاس وفا سے ہم

چپکے کیا انواع اذیت عشق میں کھینچی جاتی ہے

دل تو بھرا ہے اپنا تو بھی کچھ نہیں کہتے حیا سے ہم

کیا کیا عجز کریں ہیں لیکن پیش نہیں کچھ جاتا میر

سر رگڑے ہیں آنکھیں ملیں ہیں اس کے حنائی پا سے ہم

میر تقی میر

خموش دیکھتے رہتے ہیں اس کے رو کو ہم

اکتوبر 6, 2015میر تقی میر،اساتذہ،غزلکسو،گلو،جستجو،خو،روadmin

دیوان چہارم غزل 1440

تجا ہے حیرت عشقی سے گفتگو کو ہم

خموش دیکھتے رہتے ہیں اس کے رو کو ہم

اگرچہ وصل ہے پر ہیں طلب میں سرگرداں

پہ وہم کار ہی جاتے ہیں جستجو کو ہم

اب اپنی جان سے ہیں تنگ دم رکا ہے بہت

ملا ہی دیں گے تری تیغ سے گلو کو ہم

جلا کے خاک کرے وہ کہ رہ کے داغ کرے

لگا دیں آگ سے کیا اپنی گرم خو کو ہم

مرید پیر خرابات یوں نہ ہوتے میر

سمجھتے عارف اگر اور بھی کسو کو ہم

میر تقی میر

کاش رہتے کسو طرف مر ہم

اکتوبر 6, 2015میر تقی میر،اساتذہ،غزلمر،کیدھر،گھر،اکثر،بر،برابر،ترadmin

دیوان چہارم غزل 1439

حال زخم جگر سے ہے درہم

کاش رہتے کسو طرف مر ہم

دلبروں کو جو بر میں کھینچا ٹک

اس ادا سے بہت ہوئے برہم

آپ کو اب کہیں نہیں پاتے

بے خودی سے گئے ہیں کیدھر ہم

دیر و کعبہ گئے ہیں ہم اکثر

یعنی ڈھونڈا ہے اس کو گھر گھر ہم

کہہ سکے کون ہم کو ناہموار

اب تو ہیں خاک سے برابر ہم

کوفت سی کوفت اپنے دل پر ہے

چھاتی کوٹا کیے ہیں اکثر ہم

ابر کرتا ہے اب کمی سی میر

دیکھیں ہیں سوے دیدئہ تر ہم

میر تقی میر

کانپا کرے ہے جی سو ٹھہرا کے رہ گئے ہم

اکتوبر 6, 2015میر تقی میر،اساتذہ،غزلمرجھا،کھا،ٹھہرا،پچھتا،جا،شرماadmin

دیوان چہارم غزل 1438

ایک آدھ دن سنوگے سنّا کے رہ گئے ہم

کانپا کرے ہے جی سو ٹھہرا کے رہ گئے ہم

واشد ہوئی سو اپنی پژمردگی سے بدتر

موسم گئے کے گل سے مرجھا کے رہ گئے ہم

پرداغ دل کو لے کر آخر کیا کنارہ

اس باغ سے گلی میں جا جا کے رہ گئے ہم

سوز دروں نے ہم کو پردے میں مار رکھا

جوں شمع آپ ہی کو کھا کھا کے رہ گئے ہم

حیرت سے عاشقی کی پوچھا تھا دوستوں نے

کہہ سکتے کچھ تو کہتے شرما کے رہ گئے ہم

اے وائے دل گئے پر جی بھی گیا ہمارا

یعنی کہ میر برسوں پچھتا کے رہ گئے ہم

میر تقی میر

آن لگے ہیں گور کنارے اس کی گلی میں جا جا ہم

اکتوبر 6, 2015میر تقی میر،اساتذہ،غزلہاہا،لالا،کھا،بابا،جاadmin

دیوان چہارم غزل 1437

ظلم ہوئے ہیں کیا کیا ہم پر صبر کیا ہے کیا کیا ہم

آن لگے ہیں گور کنارے اس کی گلی میں جا جا ہم

ہاہا ہی ہی کر ٹالے گا اس کا غرور دو چنداں ہے

گھگھیانے کا اب کیا حاصل یوں ہی کرے ہیں ہاہا ہم

اب حیرت ہے کس کس جاگہ پنبہ و مرہم رکھنے کی

قد تو کیا ہے سرو چراغاں داغ بدن پر کھا کھا ہم

سیر خیال جنوں کا کریے صرف کریں تا ہم پر سب

پتھر آپ گلی کوچوں میں ڈھیر کیے ہیں لالا ہم

میر فقیر ہوئے تو اک دن کیا کہتے ہیں بیٹے سے

عمر رہی ہے تھوڑی اسے اب کیوں کر کاٹیں بابا ہم

میر تقی میر

پائوں کا رکھنا گرچہ ادھر کو عار سے ہے پر آئو تم

اکتوبر 6, 2015میر تقی میر،اساتذہ،غزللائو،پائو،آئو،جائوadmin

دیوان چہارم غزل 1436

صبر کیا جاتا نہیں ہم سے رہ کے جدا نہ ستائو تم

پائوں کا رکھنا گرچہ ادھر کو عار سے ہے پر آئو تم

جس کے تئیں پروا ہو کسو کی آنا جانا اس کا ہے

نیک ہو یا بد حال ہمارا تم کو کیا ہے جائو تم

چپ ہیں کچھ جو نہیں کہتے ہم کار عشق کے حیراں ہیں

سوچو حال ہمارا ٹک تو بات کی تہ کو پائو تم

میر کو وحشت ہے گی قیامت واہی تباہی بکتے ہیں

حرف و حکایت کیا مجنوں کی دل میں کچھ مت لائو تم

میر تقی میر

اپنی آنکھوں سے اسے یاں جلوہ گر دیکھیں گے ہم

اکتوبر 6, 2015میر تقی میر،اساتذہ،غزلقدر،کر،گھر،گر،پر،ادھر،بپھرadmin

دیوان چہارم غزل 1435

یارب اس محبوب کو پھر اک نظر دیکھیں گے ہم

اپنی آنکھوں سے اسے یاں جلوہ گر دیکھیں گے ہم

میں کہا دیکھو ادھر ٹک تم تو میں بھی جان دوں

ہنس کے بولے یہ تری باتیں ہیں پر دیکھیں گے ہم

پاس ظاہر سے اسے تو دیکھنا دشوار ہے

جائیں گے مجلس میں تو ایدھر ادھر دیکھیں گے ہم

یوں نہ دیں گے دل کسو سیمیں بدن زر دوست کو

ابتداے عشق میں اپنا بھی گھر دیکھیں گے ہم

کام کہتے ہیں سماجت سے کبھو لیتے ہیں لوگ

ایک دن اس کے کنے جاکر بپھر دیکھیں گے ہم

راہ تکتے تکتے اپنی آنکھیں بھی پتھرا چلیں

یہ نہ جانا تھا کہ سختی اس قدر دیکھیں گے ہم

شورش دیوانگی اس کی نہیں جائے گی لیک

ایک دو دن میر کو زنجیر کر دیکھیں گے ہم

میر تقی میر

ہے آج عید صاحب میرے لگے گلے تم

اکتوبر 6, 2015میر تقی میر،اساتذہ،غزلہلے،مرحلے،ڈھلے،گلے،بھلے،تلے،دلےadmin

دیوان چہارم غزل 1434

پوشاک تنگ پہنے بارے کہاں چلے تم

ہے آج عید صاحب میرے لگے گلے تم

اس نازکی سے گذرے کس کے خیال میں شب

مرجھائے پھول سے ہو جو کچھ ملے دلے تم

کیا ظلم ہے کہ کھینچے شمشیر وہ کہے ہے

آزردہ ہوں گا پھر میں جاگہ سے جو ہلے تم

کم پائی اس قدر ہے منزل ہے دور اتنی

طے کس طرح کروگے یارو یہ مرحلے تم

اکثر نڈھال ہیں ہم پر یوں نہیں وہ کہتا

کیا ہے کہ جاتے ہو گے کچھ اتنے ہی ڈھلے تم

یہ جانتے نہ تھے ہم ایسے برے ہوئے ہو

ہونٹوں پہ جان آئی تم بن گئے بھلے تم

قربانی اس کی ٹھہری پر یہ طرح نہ چھوڑی

تکتے ہو میر اودھر تلوار کے تلے تم

میر تقی میر

سب سے گلی کوچوں میں ملو ہو پھرتے رہو ہو گھر گھر تم

اکتوبر 6, 2015میر تقی میر،اساتذہ،غزلکر،گھر،ٹھوکر،پتھر،پر،اکثر،بہترadmin

دیوان چہارم غزل 1433

شاید ہم سے ضد رکھتے ہو آتے نہیں ٹک ایدھر تم

سب سے گلی کوچوں میں ملو ہو پھرتے رہو ہو گھر گھر تم

کیا رکھیں یہ تم سے توقع خاک سے آ کے اٹھائوگے

راہ میں دیکھو افتادہ تو اور لگائو ٹھوکر تم

اس سے زیادہ ہوتا نہ ہو گا دنیا میں بھی نچلاپن

سون کسے بیٹھے رہتے ہو حال ہمارا سن کر تم

لطف و مہر و خشم و غضب ہم ہر صورت میں راضی ہیں

حق میں ہمارے کر گذرو بھی جو کچھ جانو بہتر تم

رنگ ہمارا جیسا اب ہے کاہے کو آگے ایسا تھا

پاؤں میں مہندی اپنے لگا کر آفت لائے سر پر تم

لوگ صنم کہتے تھے تم کو ان سمجھے تھے ہم محظوظ

سختی سی سختی کھینچی گئی یعنی نکلے پتھر تم

چپکے سے کچھ آجاتے ہو آنکھیں بھر بھر لاتے ہو

میر گذرتی کیا ہے دل پر کڑھا کرو ہو اکثر تم

میر تقی میر

راہ خرابے سے نکلی نہ گھر کی بستی میں کیوں کر جاویں ہم

اکتوبر 6, 2015میر تقی میر،اساتذہ،غزلمر،ور،کر،گھرadmin

دیوان چہارم غزل 1432

بن میں چمن میں جی نہیں لگتا یارو کیدھر جاویں ہم

راہ خرابے سے نکلی نہ گھر کی بستی میں کیوں کر جاویں ہم

کیسی کیسی خرابی کھینچی دشت و در میں سر مارا

خانہ خراب کہاں تک پھریے ایسا ہو گھر جاویں ہم

عشق میں گام اول اپنے جی سے گذرنا پیش آیا

اس میدان میں رکھ کے قدم کیا مرنے سے ڈر جاویں ہم

خواہ نماز خضوع سے ہووے خواہ نیاز اک سوے دل

وقت رہا ہے بہت کم اب تو بارے کچھ کر جاویں ہم

کب تک میر فراق میں اس کے لوہو پی پی جیتے رہیں

بس چلتا نہیں آہ اپنا کچھ ورنہ ابھی مر جاویں ہم

میر تقی میر

دل اٹھاتا نہیں اپنا کہ گرفتار ہیں ہم

اکتوبر 6, 2015میر تقی میر،اساتذہ،غزلہمadmin

دیوان چہارم غزل 1431

شور سے طائر گلزار کے بیزار ہیں ہم

دل اٹھاتا نہیں اپنا کہ گرفتار ہیں ہم

میر تقی میر

اب دماغ اڑتا ہے باتوں میں کہ ہوں بیمار دل

اکتوبر 6, 2015میر تقی میر،اساتذہ،غزلبیمار،بسیارadmin

دیوان چہارم غزل 1430

مت کرو شور و فغاں سے طائرو آزار دل

اب دماغ اڑتا ہے باتوں میں کہ ہوں بیمار دل

رنج و غم بھی کھینچنے کے دن تو یارو ہوچکے

اب نہیں جاتی اٹھائی کلفت بسیار دل

میر تقی میر

دیوانہ دل بلا زدہ دل بے قرار دل

اکتوبر 6, 2015میر تقی میر،اساتذہ،غزلقرار،مار،بہار،بار،درکنارadmin

دیوان چہارم غزل 1429

کھنچتا ہے اس طرف ہی کو بے اختیار دل

دیوانہ دل بلا زدہ دل بے قرار دل

سمجھا بھی تو کہ دل کسے کہتے ہیں دل ہے کیا

آتا ہے جو زباں پہ تری بار بار دل

آزردہ خاطری کا ہماری نہ کر عجب

اک عمر ہم رہا کیے ہیں مار مار دل

واشد فسردگی سے تری اس چمن میں ہے

دل جو کھلا تو جیسے گل بے بہار دل

میر اس کے اشتیاق ہم آغوشی میں نہ پوچھ

جاتا ہے اب تو جی ہی رہا درکنار دل

میر تقی میر

دل وہی بے قرار ہے تا حال

اکتوبر 6, 2015میر تقی میر،اساتذہ،غزلقرار،یار،اشکبار،خمار،روزگار،شعار،عارadmin

دیوان چہارم غزل 1428

حال تو حال زار ہے تا حال

دل وہی بے قرار ہے تا حال

بڑھتی ہے حال کی خرابی روز

گرچہ کچھ روزگار ہے تا حال

خستہ جانی نے ننگ خلق کیا

پر اسے مجھ سے عار ہے تا حال

حال فکر سخن میں کچھ نہ رہا

شعر میرا شعار ہے تا حال

حال مستی جوانی تھی سو گئی

میر اس کا خمار ہے تا حال

آنکھیں بدحالی سے ٹھہرتیں نہیں

شوق دیدار یار ہے تا حال

غم سے حالانکہ خون دل سوکھا

چشم تر اشکبار ہے تا حال

میر تقی میر

نزدیک ہے کہ کہیے اب ہائے ہائے اے دل

اکتوبر 6, 2015میر تقی میر،اساتذہ،غزلکرے،کسے،گہے،اے،بہے،بے،تہ،جلے،رہےadmin

دیوان چہارم غزل 1427

دل تو گداز سب ہے کس کو کوئی کہے دل

نزدیک ہے کہ کہیے اب ہائے ہائے اے دل

اس عشق میں نکالے میں نے بھی نام کیا کیا

خانہ خراب و رسوا بے دین اور بے دل

جوں ابر رویئے کیا دل برق سا ہے بے کل

رکھے ہی رہیے اکثر ہاتھ اس پہ جو رہے دل

دل گوکہ داغ و خوں ہے رہتی ہے لاگ تجھ سے

انصاف کر کہ جا کر دکھلاویں پھر کسے دل

دل کے ثبات سے ہم نومید ہو رہے ہیں

اب وہ سماں ہے خوں ہو رخسار پر بہے دل

عاشق کہاں ہوئے ہم پانچوں حواس کھوئے

اس مخمصے میں ازبس حیراں ہے کیا کرے دل

جاتا ہے کیا کھنچا کچھ دیکھ اس کو ناز کرتا

آتا نہیں ہمیں خوش انداز بے تہ دل

ہم دردمند اپنا سوز دروں ہے بے حد

یارب ہمارے اوپر کس مرتبے جلے دل

اے میر اسے ہے نسبت کن حلقہ حلقہ مو سے

بیتاب کچھ ہے گاہے پرپیچ ہے گہے دل

میر تقی میر

ہوا کاغذ نمط گو رنگ تیرا زرد کیا حاصل

اکتوبر 6, 2015میر تقی میر،اساتذہ،غزلگرد،زرد،سردadmin

دیوان چہارم غزل 1426

غم مضموں نہ خاطر میں نہ دل میں درد کیا حاصل

ہوا کاغذ نمط گو رنگ تیرا زرد کیا حاصل

ہوئے صید زبوں ہم منتظر ہی خاک جی دے کر

سواری سے کسو کی گو اٹھی اب گرد کیا حاصل

بلا ہے سوزسینہ میر لوں ہوجائے گی جل کر

اگر دل سے اٹھی تیرے یہ آہ سرد کیا حاصل

میر تقی میر

یوں بے دم ہے اب پہلو میں جوں صید بسمل ہے دل

اکتوبر 6, 2015میر تقی میر،اساتذہ،غزلقابل،قاتل،منزل،مشکل،بیدل،بسمل،حاصلadmin

دیوان چہارم غزل 1425

عشق کی چوٹیں پے درپے جو اٹھائی گئیں گھائل ہے دل

یوں بے دم ہے اب پہلو میں جوں صید بسمل ہے دل

خون ہوا ہے چاک ہوا ہے جلتے جلتے داغ ہوا

خواہش اس کو کیا ہے بارے کس کے لیے بیدل ہے دل

عشق کی بجلی آ کے گری سو داغ ہوا ہے سر تا سر

کیا رووے جوں ابر کوئی اس مزرع کا حاصل ہے دل

یوں تو گرہ سینے میں ہمارے درد و غم کی ہوکے رہا

کس سے ظاہر کرتے جاکر کام بہت مشکل ہے دل

آنکھوں کی دیکھا دیکھی ہرگز دل کو اس سے نہ لگنا تھا

جیسی سزا پہنچاوے کوئی اب اس کے قابل ہے دل

عمر انساں راہ تو ہے تشویش سے طے ہوتی ہے ولے

دل کے تئیں پہنچے جو کوئی چین کی پھر منزل ہے دل

شہد لب سے اس کے چپکا جی کا صرفہ کچھ نہ کیا

میر جو دیکھا اپنے حق میں کیا زہر قاتل ہے دل

میر تقی میر

لیکن ہزار حیف نہ ٹھہری ہواے گل

اکتوبر 6, 2015میر تقی میر،اساتذہ،غزلہواے،لائے،وفاے،پاے،جاےadmin

دیوان چہارم غزل 1424

بلبل نے کل کہا کہ بہت ہم نے کھائے گل

لیکن ہزار حیف نہ ٹھہری ہواے گل

رعنا جوان شہر کے رہتے ہیں گل بسر

سر پر ہمارے داغ جنوں کے ہیں جاے گل

دل لوٹنے پہ مرغ چمن کے نہ کی نظر

بے درد گل فروش سبد بھر کے لائے گل

حیف آفتاب میں پس دیوار باغ ہیں

جوں سایہ وا کشیدہ ہوئے ہم نہ پاے گل

بوے گل و نواے خوش عندلیب میر

آئی چلی گئی یہی کچھ تھی وفاے گل

میر تقی میر

مگر آئے تھے میہمان سے لوگ

اکتوبر 6, 2015میر تقی میر،اساتذہ،غزلمیہمان،نشان،کمان،کان،کاروان،پان،آسمان،زبانadmin

دیوان چہارم غزل 1423

کیا چلے جاتے ہیں جہان سے لوگ

مگر آئے تھے میہمان سے لوگ

قہر ہے بات بات پر گالی

جاں بہ لب ہیں تری زبان سے لوگ

شہر میں گھر خراب ہے اپنا

آتے ہیں یاں اب اس نشان سے لوگ

ایک گردش میں ہیں برابر خاک

کیا جھگڑتے ہیں آسمان سے لوگ

درد دل ان نے کب سنا میرا

لگے رہتے ہیں اس کے کان سے لوگ

بائو سے بھی لچک لہک ہے انھیں

ہیں یہی سبزے دھان پان سے لوگ

شوق میں تیر سے چلے اودھر

ہم خمیدہ قداں کمان سے لوگ

آدمی اب نہیں جہاں میں میر

اٹھ گئے اس بھی کاروان سے لوگ

میر تقی میر

دل کے مرض عشق سے بیمار ہیں ہم لوگ

اکتوبر 6, 2015میر تقی میر،اساتذہ،غزلہموار،گنہگار،گرفتار،پریدار،پرکار،بیمار،تیار،خریدار،دیوار،سزاوار،طلبگارadmin

دیوان چہارم غزل 1422

اس رنگ سے جو زرد زبوں زار ہیں ہم لوگ

دل کے مرض عشق سے بیمار ہیں ہم لوگ

کیا اپنے تئیں پستی بلندی سے جہاں کی

اب خاک برابر ہوئے ہموار ہیں ہم لوگ

مقصود تو حاصل ہے طلب شرط پڑی ہے

وہ مطلب عمدہ ہے طلبگار ہیں ہم لوگ

خوں ریز ہی لڑکوں سے لڑا رہتے ہیں آنکھیں

گر قتل کریں ہم کو سزاوار ہیں ہم لوگ

دل پھنس رہے ہیں دام میں زلفوں کے کسو کی

تنگ اپنے جیوں سے ہیں گرفتار ہیں ہم لوگ

بازار کی بھی جنس پہ جی دیتے ہیں عاشق

سر بیچتے پھرتے ہیں خریدار ہیں ہم لوگ

ان پریوں سے لڑکوں ہی کے جھپٹے میں دل آئے

بے ہوش و خرد جیسے پریدار ہیں ہم لوگ

در پر کسو کے جا کے کھڑے ہوں تو کھڑے ہیں

حیرت زدئہ عشق ہیں دیوار ہیں ہم لوگ

جاتے ہیں چلے قافلہ در قافلہ اس راہ

چلنے میں تردد نہیں تیار ہیں ہم لوگ

مارے ہی پڑیں کچھ کہیں عشاق تو شاید

حیرت سے ہیں چپ تس پہ گنہگار ہیں ہم لوگ

گو نیچی نظر میر کی ہو آنکھیں تو ٹک دیکھ

کیا دل زدگاں سادہ میں پرکار ہیں ہم لوگ

میر تقی میر

نہ ایسا کھلا گل نزاکت سے اب تک

اکتوبر 6, 2015میر تقی میر،اساتذہ،غزلہمت،منت،مدت،نزاکت،وحشت،حسرت،خجلت،دولت،صورتadmin

دیوان چہارم غزل 1421

رہا پھول سا یار نزہت سے اب تک

نہ ایسا کھلا گل نزاکت سے اب تک

لبالب ہے وہ حسن معنی سے سارا

نہ دیکھا کوئی ایسی صورت سے اب تک

سلیماں ؑ سکندر کہ شاہان دیگر

نہ رونق گئی کس کی دولت سے اب تک

کرم کیا صفت ہے نہ ہوں گو کریماں

سخن کرتے ہیں ان کی ہمت سے اب تک

سبب مرگ فرہاد کا ہو گیا تھا

نگوں ہے سرتیشہ خجلت سے اب تک

ہلا تو بھی لب کو کہ عیسیٰ ؑکے دم کی

چلی جائے ہے بات مدت سے اب تک

عقیق لب اس کے کبھو دیکھے تھے میں

بھرا ہے دہن آب حسرت سے اب تک

گئی عمر ساری مجھے عجز کرتے

نہ مانی کوئی ان نے منت سے اب تک

نہ ہو گو جنوں میرجی کو پر ان کی

طبیعت ہے آشفتہ وحشت سے اب تک

میر تقی میر

سر مارے ہیں اپنے در و دیوار سے اب تک

اکتوبر 6, 2015میر تقی میر،اساتذہ،غزلیار،پیار،آزار،بیمار،تلوار،دیوار،رخسارadmin

دیوان چہارم غزل 1420

وحشت ہے ہمیں بھی وہی گھر بار سے اب تک

سر مارے ہیں اپنے در و دیوار سے اب تک

مرتے ہی سنا ان کو جنھیں دل لگی کچھ تھی

اچھا بھی ہوا کوئی اس آزار سے اب تک

جب سے لگی ہیں آنکھیں کھلی راہ تکے ہیں

سوئے نہیں ساتھ اس کے کبھو پیار سے اب تک

آیا تھا کبھو یار سو مامول ہم اس کے

بستر پہ گرے رہتے ہیں بیمار سے اب تک

بدعہدیوں میں وقت وفات آن بھی پہنچا

وعدہ نہ ہوا ایک وفا یار سے اب تک

ہے قہر و غضب دیکھ طرف کشتے کے ظالم

کرتا ہے اشارت بھی تو تلوار سے اب تک

کچھ رنج دلی میر جوانی میں کھنچا تھا

زردی نہیں جاتی مرے رخسار سے اب تک

میر تقی میر

اور آسماں غبار سر رہ گذار عشق

اکتوبر 6, 2015میر تقی میر،اساتذہ،غزلگذار،اعتبار،دیار،رازدار،شکارadmin

دیوان چہارم غزل 1419

نزدیک عاشقوں کے زمیں ہے قرارعشق

اور آسماں غبار سر رہ گذار عشق

مقبول شہر ہی نہیں مجنوں ضعیف و زار

ہے وحشیان دشت میں بھی اعتبارعشق

گھر کیسے کیسے دیں کے بزرگوں کے ہیں خراب

القصہ ہے خرابۂ کہنہ دیارعشق

گو ضبط کرتے ہوویں جراحت جگر کے زخم

روتا نہیں ہے کھول کے دل رازدارعشق

مارا پڑے ہے انس ہی کرنے میں ورنہ میر

ہے دورگرد وادی وحشت شکارعشق

میر تقی میر

ہیں فن عشق کے بھی مشکل بہت دقائق

اکتوبر 6, 2015میر تقی میر،اساتذہ،غزللائق،خلائق،دقائق،شقائق،شائقadmin

دیوان چہارم غزل 1418

دل کا مطالعہ کر اے آگہ حقائق

ہیں فن عشق کے بھی مشکل بہت دقائق

چھاتی جلوں کے آگے کھنچتا ہے بیشتر دل

ایک آشنا ہے مجھ سے اس باغ میں شقائق

ہے راستی کہ انساں مشتق ہے انس ہی سے

بیماری دوستی کی ہے دشمن خلائق

جی سارے تن کا کھنچ کر آنکھوں میں آرہا ہے

کس مرتبے میں ہم بھی ہیں دیکھنے کے شائق

کل میرجی نے ضائع اپنے تئیں کیا ہے

یہ کام تھا نہ ان کی شائستگی کے لائق

میر تقی میر

کچھ کہتے ہیں سر الٰہی کچھ کہتے ہیں خدا ہے عشق

اکتوبر 6, 2015میر تقی میر،اساتذہ،غزلمزہ،بلا،جدا،خدا،سزاadmin

دیوان چہارم غزل 1417

لوگ بہت پوچھا کرتے ہیں کیا کہیے میاں کیا ہے عشق

کچھ کہتے ہیں سر الٰہی کچھ کہتے ہیں خدا ہے عشق

عشق کی شان ارفع اکثر ہے لیکن شانیں عجائب ہیں

گہ ساری ہے دماغ و دل میں گاہے سب سے جدا ہے عشق

کام ہے مشکل الفت کرنا اس گلشن کے نہالوں سے

بوکش ہوکر سیب ذقن کا غش نہ کرے تو سزا ہے عشق

الفت سے پرہیز کیا کر کلفت اس میں قیامت ہے

یعنی درد و رنج و تعب ہے آفت جان بلا ہے عشق

میر خلاف مزاج محبت موجب تلخی کشیدن ہے

یار موافق مل جاوے تو لطف ہے چاہ مزہ ہے عشق

میر تقی میر

نگاہیں ہیں میری نظر کی طرف

اکتوبر 6, 2015میر تقی میر،اساتذہ،غزلہنر،نظر،تر،جگر،خبرadmin

دیوان چہارم غزل 1416

نظر کیا کروں اس کے گھر کی طرف

نگاہیں ہیں میری نظر کی طرف

چھپاتے ہیں منھ اپنا کامل سے سب

نہیں کوئی کرتا ہنر کی طرف

بڑی دھوم سے ابر آئے گئے

نہ کوئی ہوا چشم تر کی طرف

اندھادھند روتے ہیں آنکھوں سے خون

نہیں دیکھتے ہم جگر کی طرف

رہا بے خبر گرچہ ہجراں میں میر

رہے گوش اس کی خبر کی طرف

میر تقی میر

پلکیں نہ ہوئی تھیں مری خوناب سے واقف

اکتوبر 6, 2015میر تقی میر،اساتذہ،غزلآداب،اسباب،تاب،خوناب،خوابadmin

دیوان چہارم غزل 1415

میں آگے نہ تھا دیدئہ پرآب سے واقف

پلکیں نہ ہوئی تھیں مری خوناب سے واقف

پتھر تو بہت لڑکوں کے کھائے ہیں ولیکن

ہم اب بھی جنوں کے نہیں آداب سے واقف

ہم ننگ خلائق یہ عجب ہے کہ نہیں ہیں

اس عالم اسباب میں اسباب سے واقف

شب آنکھیں کھلی رہتی ہیں ہم منتظروں کی

جوں دیدئہ انجم نہیں ہیں خواب سے واقف

بل کھائے انھیں بالوں کو ہم جانیں ہیں یا میر

ہیں پیچ و غم و رنج و تب و تاب سے واقف

میر تقی میر

حرف و سخن جو بایک دیگر رہتے تھے سو اب موقوف

اکتوبر 6, 2015میر تقی میر،اساتذہ،غزلڈھب،کب،اب،جب،سبadmin

دیوان چہارم غزل 1414

آج ہمارا سر پھرتا ہے باتیں جتنی سب موقوف

حرف و سخن جو بایک دیگر رہتے تھے سو اب موقوف

کس کو دماغ رہا ہے یاں آٹھ پہر کی منت کا

ربط اخلاص سے دن گذرے ہے خلطہ اس سے سب موقوف

اس کی گلی میں آمد و شد کی گھات ہی میں ہم رہتے تھے

اب جو شکستہ پا ہو بیٹھے ڈھب کرنے کے ڈھب موقوف

وہ جو مانع ہو تو کیا ہے شوق کمال کو پہنچا ہے

وقفہ ہو گا تب ملنے میں ہم بھی کریں گے جب موقوف

حلقے پڑے ہیں چشم تر میں سوکھے ایسے تم نہ رہے

رونا کڑھنا عشق میں اس کے میر کروگے کب موقوف

میر تقی میر

عشق نے کیا ہمیں دکھائے داغ

اکتوبر 6, 2015میر تقی میر،اساتذہ،غزلچھپائے،کھائے،آئے،دکھائے،دھلائےadmin

دیوان چہارم غزل 1413

دل جگر دونوں پر جلائے داغ

عشق نے کیا ہمیں دکھائے داغ

دل جلے ہم نہیں رہے بیکار

زخم کاری اٹھائے کھائے داغ

جل گئے دیکھ گرمی اغیار

آئے اس کوچے سے تو آئے داغ

احتیاطاً صراحی مے سے

ہم نے سجادے کے دھلائے داغ

دیکھے دامن کے نیچے کے سے دیے

میر نے گر تلے چھپائے داغ

میر تقی میر

دریغ و درد و صد افسوس صد ہزار دریغ

اکتوبر 6, 2015میر تقی میر،اساتذہ،غزلدریغadmin

دیوان چہارم غزل 1412

ہمارے آگے چمن سے گئی بہار دریغ

دریغ و درد و صد افسوس صد ہزار دریغ

میر تقی میر

تلووں تک وہ داغ گیا ہے سب مجھ کو کھا جیسے شمع

اکتوبر 6, 2015میر تقی میر،اساتذہ،غزلشمعadmin

دیوان چہارم غزل 1411

ایک ہی گل کا صرف کیا ہے میں نے سراپا جیسے شمع

تلووں تک وہ داغ گیا ہے سب مجھ کو کھا جیسے شمع

میر تقی میر

ایسی شے کا زیاں کھینچے تو دانا ہووے نامحظوظ

اکتوبر 6, 2015میر تقی میر،اساتذہ،غزلمحظوظ،نامحظوظadmin

دیوان چہارم غزل 1410

عشق ہمارا جی مارے ہے ہم ناداں ہیں کیا محظوظ

ایسی شے کا زیاں کھینچے تو دانا ہووے نامحظوظ

پانی منھ میں بھر آتا تھا اس کے عقیق لب دیکھے

اب ہے تشنہ کام جدائی میر وگرنہ تھا محظوظ

میر تقی میر

سو تو بہا تھا خوں ہو آگے پہلے دائو ہی ہارے شرط

اکتوبر 6, 2015میر تقی میر،اساتذہ،غزلشرطadmin

دیوان چہارم غزل 1409

دل کا لگانا جی کھوتا ہے اس کو جگر ہے پیارے شرط

سو تو بہا تھا خوں ہو آگے پہلے دائو ہی ہارے شرط

میر تقی میر

بے خبر مت رہو خبر ہے شرط

اکتوبر 6, 2015میر تقی میر،اساتذہ،غزلتر،خبرadmin

دیوان چہارم غزل 1408

دل لگی کے تئیں جگر ہے شرط

بے خبر مت رہو خبر ہے شرط

عشق کے دو گواہ لا یعنی

زردی رنگ و چشم تر ہے شرط

میر تقی میر

خودنما خودرائے و خودسر خودغرض

اکتوبر 6, 2015میر تقی میر،اساتذہ،غزلخودغرضadmin

دیوان چہارم غزل 1407

کیا کہوں کیسا ہے دلبر خودغرض

خودنما خودرائے و خودسر خودغرض

میر تقی میر

ان ہی رنگوں ہوتا ہے اس صید طرفہ دل کا رقص

اکتوبر 6, 2015میر تقی میر،اساتذہ،غزلرقصadmin

دیوان چہارم غزل 1406

طائر دل کی طپش سینے میں جانو تم بسمل کا رقص

ان ہی رنگوں ہوتا ہے اس صید طرفہ دل کا رقص

میر تقی میر

بستر پہ گرے رہتے ہیں بیمار سے ناخوش

اکتوبر 6, 2015میر تقی میر،اساتذہ،غزلیار،پیار،انکار،بیمار،بستار،خار،دیوارadmin

دیوان چہارم غزل 1405

رہتے ہیں بہت دل کے ہم آزار سے ناخوش

بستر پہ گرے رہتے ہیں بیمار سے ناخوش

جانا جو مقرر ہے مرا دار فنا سے

اس بستی کے میں ہوں در و دیوار سے ناخوش

ہمواری سے ہیں نرم و خشن ایک سے دونوں

خوش ہیں نہ گل تر سے نہ ہم خار سے ناخوش

سررشتۂ دل بند نہیں زلف و کمر میں

کیا جانیے ہم کس لیے ہیں یار سے ناخوش

ہے عشق میں صحبت مری خوباں کی عجب کچھ

اقرار سے بیزار ہیں انکار سے ناخوش

خوش رہتے ہیں احباب بہم ربط کیے سے

رہتے ہو تمھیں ایک مرے پیار سے ناخوش

اک بات کا بھی لوگوں میں پھپّٹ اسے کرنا

ہم ہیں گے بہت میر کے بستار سے ناخوش

میر تقی میر

کچھ اس کی ہم نے پائی نہ رفتار کی روش

اکتوبر 6, 2015میر تقی میر،اساتذہ،غزلمار،یار،گلزار،گنہگار،اظہار،بیمار،رفتارadmin

دیوان چہارم غزل 1404

اس کا خیال آوے ہے عیار کی روش

کچھ اس کی ہم نے پائی نہ رفتار کی روش

کیا چال ہے گی زہر بھری روزگار کی

سب اس گزندے کی ہے سیہ مار کی روش

وہ رفت و خیز گرم تو مدت سے ہوچکی

رہتے ہیں اب گرے پڑے بیمار کی روش

جاتے ہیں رنگ و بوے گل و آب جو چلے

آئی نہ خوش ہمیں تو یہ گلزار کی روش

مائل ہوا ہے سرو گلستاں کا دل بہت

کچھ آگئی تھی اس میں قد یار کی روش

زندان میں جہاں کے بہت ہیں خراب حال

کرتے ہیں ہم معاش گنہگار کی روش

یوں سر بکھیرے عشق میں پھرتے نہیں ہیں میر

اظہار بھی کریں ہیں تو اظہار کی روش

میر تقی میر

منھ کرے ٹک ادھر بہار اے کاش

اکتوبر 6, 2015میر تقی میر،اساتذہ،غزلقرار،کنار،پیار،بہار،تار،روزگار،شعارadmin

دیوان چہارم غزل 1403

نکلے پردے سے روے یار اے کاش

منھ کرے ٹک ادھر بہار اے کاش

کچھ وسیلہ نہیں جو اس سے ملوں

شعر ہو یار کا شعار اے کاش

کہیں اس بحر حسن سے بھر جائے

موج ساں میری بھی کنار اے کاش

برق ساں ہو چکوں تڑپ کر میں

یوں ہی آوے مجھے قرار اے کاش

اعتمادی نہیں ہے یاری غیر

یار سے ہم سے ہووے پیار اے کاش

آوے سررشتۂ جنوں کچھ ہاتھ

ہو گریبان تار تار اے کاش

میر جنگل تمام بس جاوے

بن پڑے ہم سے روزگار اے کاش

میر تقی میر

بہ گیا خون ہو جگر افسوس

اکتوبر 6, 2015میر تقی میر،اساتذہ،غزلہنر،نظر،گھر،جگرadmin

دیوان چہارم غزل 1402

اب نہیں ہوتی چشم تر افسوس

بہ گیا خون ہو جگر افسوس

دیدنی ہے یہ خستہ حالی لیک

ایدھر اس کی نہیں نظر افسوس

عیب ہی عیب میرے ظاہر ہیں

مجھ کو آیا نہ کچھ ہنر افسوس

میر ابتر بہت ہے دل کا حال

یعنی ویراں پڑا ہے گھر افسوس

میر تقی میر

گویا کہ جا رہا کسو سوزندہ نار پاس

اکتوبر 6, 2015میر تقی میر،اساتذہ،غزلہزار،مزار،چار،یار،شکارadmin

دیوان چہارم غزل 1401

کل ہاتھ جا رہا تھا دل بے قرار پاس

گویا کہ جا رہا کسو سوزندہ نار پاس

کس جد و کد سے حیف ہے مجھ کو کیا شکار

ٹھہرا نہ پھر وہ صیدفگن اس شکار پاس

اس گل بغیر پہروں ہیں بلبل سے نالہ کش

کرتے ہیں اپنی اور سے تو ہم ہزار پاس

خوشحال وے جو حال کہیں دلبروں سے دیر

رویا نہ میں تو ایک گھڑی اپنے یار پاس

دوری میں جس کی مر گئے رک رک کے میر ہم

نکلا نہ وہ سو ہو کے ہمارے مزار پاس

میر تقی میر

حال پرسی بھی نہ کی آن کے بیمار کے پاس

اکتوبر 6, 2015میر تقی میر،اساتذہ،غزلگنہگار،بیمار،بار،دوچار،دیوار،دار،سزاوارadmin

دیوان چہارم غزل 1400

مدت ہجر میں کیا کریے بیاں یار کے پاس

حال پرسی بھی نہ کی آن کے بیمار کے پاس

حق یہ ہے خواہش دل ہے مری تو آجاتا

جب کہ خوں ریزی کو بٹھلائیں مجھے دار کے پاس

در اسیری کا کھلا منھ پہ ہمارے کیا تنگ

مر ہی رہیے گا قفس کے در و دیوار کے پاس

آنا اس کا تو دم قتل ضروری ہے ولے

کون آتا ہے کسو خوں کے سزاوار کے پاس

پایئے یار اکیلا تو غم دل کہیے

سو تو بیٹھا ہی اسے پاتے ہیں دوچار کے پاس

منھ پہ ناخن کے خراشوں سے لگا دل بہنے

چشمے نکلے ہیں نئے چشم جگر بار کے پاس

میں تو تلوار تلے اس کے لیے بیٹھا میر

وہ کھڑا بھی نہ ہوا آ کے گنہگار کے پاس

میر تقی میر

ٹھہری ہے جان سی بھی شے کیا چیز

اکتوبر 6, 2015میر تقی میر،اساتذہ،غزلچیزadmin

دیوان چہارم غزل 1399

دوستاں حسن و خوبی ہے کیا چیز

ٹھہری ہے جان سی بھی شے کیا چیز

میر تقی میر

دل کا بیٹھا نہیں غبار ہنوز

اکتوبر 6, 2015میر تقی میر،اساتذہ،غزلقرار،روزگار،غبارadmin

دیوان چہارم غزل 1398

خاک ہوکر اڑیں ہیں یار ہنوز

دل کا بیٹھا نہیں غبار ہنوز

نہ جگر میں ہے خوں نہ دل میں خوں

درپئے خوں ہے روزگار ہنوز

دست بر دل ہوں مدتوں سے میر

دل ہے ویسا ہی بے قرار ہنوز

میر تقی میر

کچھ پذیرا نہیں نیاز ہنوز

اکتوبر 6, 2015میر تقی میر،اساتذہ،غزلنیاز،گداز،احتراز،باز،جانمازadmin

دیوان چہارم غزل 1397

وہ مخطط ہے محو ناز ہنوز

کچھ پذیرا نہیں نیاز ہنوز

کیا ہوا خوں ہوا کہ داغ ہوا

دل ہمارا نہیں گداز ہنوز

سادگی دیکھ اس جفاجو سے

ہم نہیں کرتے احتراز ہنوز

ایک دن وا ہوئی تھی اس منھ پر

آرسی کی ہے چشم باز ہنوز

معتبر کیا ہے میر کی طاعت

رہن بادہ ہے جانماز ہنوز

میر تقی میر

نہ گیا دل سے روے یار ہنوز

اکتوبر 6, 2015میر تقی میر،اساتذہ،غزلقرار،مردکار،یار،انتظار،اعتبار،برآر،غبارadmin

دیوان چہارم غزل 1396

گرچہ آتے ہیں گل ہزار ہنوز

نہ گیا دل سے روے یار ہنوز

بے قراری میں ساری عمر گئی

دل کو آتا نہیں قرار ہنوز

خاک مجنوں جہاں ہے صحرا میں

واں سے اٹھتا ہے اک غبار ہنوز

کب سے ہے وہ خلاف وعدہ ولے

دل کو اس کا ہے اعتبار ہنوز

قیس و فرہاد پر نہیں موقوف

عشق لاتا ہے مردکار ہنوز

برسوں گذرے ہیں اس سے ملتے ولے

صحبت اس سے نہیں برآر ہنوز

عشق کرتے ہوئے تھے بے خود میر

اپنا ان کو ہے انتظار ہنوز

میر تقی میر

ہر دم نئی ہے میری گریباں دری ہنوز

اکتوبر 6, 2015میر تقی میر،اساتذہ،غزلہری،پری،تری،جادوگری،دلبری،دری،سرسریadmin

دیوان چہارم غزل 1395

دیوانگی کی ہے وہی زور آوری ہنوز

ہر دم نئی ہے میری گریباں دری ہنوز

سر سے گیا ہے سایۂ لطف اس کا دیر سے

آنکھوں ہی میں پھرے ہے مری وہ پری ہنوز

شوخی سے زارگریہ کی خوں چشم میں نہیں

ویسی ہی ہے مژہ کی بعینہ تری ہنوز

کب سے نگاہ گاڑے ہے یاں روز آفتاب

ہم دیکھے ہیں جہاں کے تئیں سرسری ہنوز

مبہوت ہو گیا ہے جہاں اک نظر کیے

جاتی نہیں ان آنکھوں سے جادوگری ہنوز

ابر کرم نے سعی بہت کی پہ کیا حصول

ہوتی نہیں ہماری زراعت ہری ہنوز

مدت سے میر بے دل و دیں دلبروں میں ہے

کرتا نہیں ہے اس کی کوئی دلبری ہنوز

میر تقی میر

پیدا ہے عشق کشتے کا اس کے نشاں ہنوز

اکتوبر 6, 2015میر تقی میر،اساتذہ،غزلناتواں،نشاں،آسماں،جاں،داستاں،رواں،زباںadmin

دیوان چہارم غزل 1394

ہے زیرخاک لاشۂ عاشق طپاں ہنوز

پیدا ہے عشق کشتے کا اس کے نشاں ہنوز

گردش سے اس کی خاک برابر ہوئی ہے خلق

استادہ روے خاک پہ ہے آسماں ہنوز

اس تک پہنچنے کا تو نہیں حال کچھ ولے

جاتے ہیں گرتے پڑتے بھی ہم ناتواں ہنوز

پروانہ جل کے خاک ہوا پھر اڑا کیا

اے شمع تیری رہتی نہیں ہے زباں ہنوز

چندیں ہزار جانیں گئیں اس کی راہ میں

ایک آدھ تو بھی مر رہے ہیں نیم جاں ہنوز

مدت ہوئی کہ خوار ہو گلیوں میں مر گئے

قصہ ہمارے عشق کا ہے داستاں ہنوز

لخت جگر کے غم میں کہ تھا لعل پارہ میر

رخسار زرد پر ہے مرے خوں رواں ہنوز

میر تقی میر

اور نیچی نظر کریں کیوں کر

اکتوبر 6, 2015میر تقی میر،اساتذہ،غزلنظر،گذر،اثر،تر،خبر،زبر،سحرadmin

دیوان چہارم غزل 1393

بزم میں منھ ادھر کریں کیوں کر

اور نیچی نظر کریں کیوں کر

یوں بھی مشکل ہے ووں بھی مشکل ہے

سر جھکائے گذر کریں کیوں کر

رازپوشی عشق ہے منظور

آنکھیں رو رو کے تر کریں کیوں کر

مست و بے خود ہم اس کے در پہ گئے

لوگ اس کو خبر کریں کیوں کر

سو رہا بال منھ پہ کھول کے وہ

ہم شب اپنی سحر کریں کیوں کر

مہ فلک پر ہے وہ زمیں پر آہ

ان کو زیر و زبر کریں کیوں کر

دل نہیں دردمند اپنا میر

آہ و نالے اثر کریں کیوں کر

میر تقی میر

پر حیف میں نہ دیکھا بالیں سے سر اٹھا کر

اکتوبر 6, 2015میر تقی میر،اساتذہ،غزللگا،کہا،کھا،پا،ا،اٹھا،بناadmin

دیوان چہارم غزل 1392

اس رفتہ پاس اس کو لائے تھے لوگ جا کر

پر حیف میں نہ دیکھا بالیں سے سر اٹھا کر

سن سن کے درد دل کو بولا کہ جاتے ہیں ہم

تو اپنی یہ کہانی بیٹھا ہوا کہا کر

آگے زمیں کی تہ میں ہم سے بہت تھے تو بھی

سر پر زمین اٹھالی ہم بے تہوں نے آ کر

میرے ہی خوں میں ان نے تیغہ نہیں سلایا

سویا ہے اژدہا یہ بہتیرے مجھ سے کھا کر

دل ہاتھ آگیا تھا لطف قضا سے میرے

افسوس کھو چلا ہوں ایسے گہر کو پا کر

جو وجہ کوئی ہو تو کہنے میں بھی کچھ آوے

باتیں کرو ہو بگڑی منھ کو بنا بنا کر

اب تو پھرو ہو بے غم تب میر جانیں گے ہم

اچھے رہو گے جب تم دل کو کہیں لگا کر

میر تقی میر

فراق ایسا نہیں ہوتا کہ پھر آتے نہیں جاکر

اکتوبر 6, 2015میر تقی میر،اساتذہ،غزللاکر،کر،جاکرadmin

دیوان چہارم غزل 1391

جدائی تا جدائی فرق ہے ملتے بھی ہیں آکر

فراق ایسا نہیں ہوتا کہ پھر آتے نہیں جاکر

اگرچہ چپ لگی ہے عاشقی کی مجھ کو حیرت سے

کبھو احوال پرسی تو کرو دل ہاتھ میں لاکر

جو جانوں تجھ میں بلبل تہ نہیں تو کیوں زباں دیتا

زباں کر بند سارے باغ میں مجھ کو نہ رسوا کر

فلک نے باغ سے جوں غنچۂ نرگس نکالا ہے

کہیں کیا جانوں کیا دیکھوں گا چشم بستہ کو وا کر

سبد پھولوں بھرے بازار میں آئے ہیں موسم میں

نکل کر گوشۂ مسجد سے تو بھی میر سودا کر

میر تقی میر

کاے میر کچھ کہیں ہم تجھ کو عتاب کر کر

اکتوبر 6, 2015میر تقی میر،اساتذہ،غزلکباب،پرآب،حجاب،حساب،خراب،شراب،عتابadmin

دیوان چہارم غزل 1390

یہ لطف اور پوچھا مجھ سے خطاب کر کر

کاے میر کچھ کہیں ہم تجھ کو عتاب کر کر

چھاتی جلی ہے کیسی اڑتی جو یہ سنی ہے

واں مرغ نامہ بر کا کھایا کباب کر کر

خوں ریزی سے کچھ آگے تشہیر کر لیا تھا

اس دل زدے کو ان نے مارا خراب کر کر

گنتی میں تو نہ تھا میں پر کل خجل ہوا وہ

کچھ دوستی کا میری دل میں حساب کر کر

روپوش ہی رہا وہ مرنے تک اپنے لیکن

منھ پر نہ رکھا اس کے کچھ میں حجاب کر کر

مستی و بے خودی میں آسودگی بہت تھی

پایا نہ چین میں نے ترک شراب کر کر

کیا جانیے کہ دل پر گذرے ہے میر کیا کیا

کرتا ہے بات کوئی آنکھیں پرآب کر کر

میر تقی میر

آج لہو آنکھوں میں آیا درد و غم سے رو رو کر

اکتوبر 6, 2015میر تقی میر،اساتذہ،غزلکھو،ٹھو،دو،رو،سوadmin

دیوان چہارم غزل 1389

کل سے دل کی کل بگڑی ہے جی مارا بے کل ہوکر

آج لہو آنکھوں میں آیا درد و غم سے رو رو کر

ایک سجود خلوص دل سے آہ کیا نہ جوانی میں

سر مارے ہیں محرابوں میں یوں ہی وقت کو اب کھو کر

جیب دریدہ خاک ملوں کے حال سے کیا آگاہی تمھیں

راہ چلو ہو نازکناں دامن کو لگا کر تم ٹھوکر

ایک تو ہم تو ہوتے نہیں ہیں سر بہتیرا مار چکے

اب بہتر ہے تیغ ستم کی جلد لگا کر تو دوکر

جی ہی ملا جاتا ہے اپنا میر سماں یہ دیکھے سے

آنکھیں ملتے اٹھتے ہیں بستر سے دلبر جب سو کر

میر تقی میر

چشم سیاہ ملاکر یوں ہی مجھ کو خانہ سیاہ نہ کر

اکتوبر 6, 2015میر تقی میر،اساتذہ،غزلناف،وآہ،باللہ،راہ،سیاہadmin

دیوان چہارم غزل 1388

تجھ کو ہے سوگند خدا کی میری اور نگاہ نہ کر

چشم سیاہ ملاکر یوں ہی مجھ کو خانہ سیاہ نہ کر

عشق و محبت یاری میں اک لطف رکھے ہے کرنا ضبط

چھاتی پہ جو ہو کوہ الم کا تو بھی نالہ وآہ نہ کر

مانگ پناہ خدا سے بندے دل لگنا اک آفت ہے

عشق نہ کر زنہار نہ کر واللہ نہ کر باللہ نہ کر

گھاس ہے میخانے کی بہتر ان شیخوں کے مصلے سے

پائوں نہ رکھ سجادے پہ ان کے اس جادے سے راہ نہ کر

میر نہ ہم کہتے تھے تجھ سے حال نہیں کچھ رہنے کا

چاہ بلاے جان و دل ہے آ جانے دے چاہ نہ کر

میر تقی میر

ستم سا ستم ہو گیا اس میں ہم پر

اکتوبر 6, 2015میر تقی میر،اساتذہ،غزلہم،قلم،قدم،قسم،خمadmin

دیوان چہارم غزل 1387

کیا صبر ہم نے جو اس کے ستم پر

ستم سا ستم ہو گیا اس میں ہم پر

لکھا جو گیا اس کو کیا نقل کریے

سخن خونچکاں تھے زبان قلم پر

جھکے ٹک جدھر جھک گئے لوگ اودھر

رہی درمیاں تیغ ابرو کے خم پر

سخن زن ہوں ہر چند وے مست آنکھیں

نہیں اعتماد ان کے قول و قسم پر

جگر ہے سزا میر اس رنج کش کو

گیا دو قدم جو ہمارے قدم پر

میر تقی میر

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: