زمرہ جات کے محفوظات: غزل

گھر بگاڑیں گے ہزاروں کے، سنورنے والے

اکتوبر 25, 2015اساتذہ،داغ دہلوی،غزلمرنے،نکھرنے،ابھرنے،سنورنےadmin

داغ دہلوی ۔ غزل نمبر 43

ایک تو حسن بلا اس پہ بناوٹ آفت

گھر بگاڑیں گے ہزاروں کے، سنورنے والے

حشر میں لطف ہو جب ان سے ہوں دو باتیں

وہ کہیں کون ہو تم، ہم کہیں مرنے والے

غسل میت کو شہیدوں کو ترے کیا حاجت

بے نہائے بھی نکھرتے ہیں نکھرنے والے

حضرتِ داغ جہاں بیٹھ گئے، بیٹھ گئے

اور ہوں گے تری محفل سے ابھرنے والے

داغ دہلوی

ضبط آنکھوں کی مرّوت ہو گئی

اکتوبر 25, 2015اساتذہ،داغ دہلوی،غزلقناعت،قیامت،قسمت،محبت،مدت،مرّوت،نیت،نصیحت،وحشت،کرامت،بدولت،حاجت،خدمت،سےمحبت،صورت،غفلتadmin

داغ دہلوی ۔ غزل نمبر 42

حسن کی تم پر حکومت ہو گئی

ضبط آنکھوں کی مرّوت ہو گئی

یہ نہ پوچھو کیوں یہ حالت ہو گئی

خود بدولت کی بدولت ہو گئی

لے گئے آنکھوں ہی آنکھوں میں وہ دل

ہوشیاری اپنی غفلت ہو گئی

وہ جو تجھ سے دوستی کرنے لگا

مجھ کو دشمن سےمحبت ہو گئی

اس قدر بھی سادگی اچھی نہیں

عاشقوں کی پاک نیت ہو گئی

مان کر دل کا کہا پچھتائے ہم

عمر بھر کو اب نصیحت ہو گئی

کیا عجب ہے گر ترا ثانی نہیں

اچھی صورت ایک صورت ہو گئی

غیر بھی روتے ہیں تیرے عشق میں

کیا مری قسمت کی قسمت ہو گئی

اس کی مژگاں پر ہوا قربان دل

تیر تکّوں پر قناعت ہو گئی

جب ریاست اپنی آبائی مٹی

نوکری کی ہم کو حاجت ہو گئی

شاعروں کی بھی طبیعت ہے ولی

جو نئی سوجھی کرامت ہو گئی

تیری زلفوں کا اثر تجھ پر نہیں

دیکھتے ہی مجھ کو وحشت ہو گئی

کھیل سمجھے تھے لڑکپن کو تیرے

بیٹھتے اٹھتے قیامت ہو گئی

مفت پیتے ہیں وہ ہر قسم کی

جن کو مے خانے کی خدمت ہو گئی

میرے دل سے غم ترا کیوں‌دور ہو

پاس رہنے کی محبت ہو گئی

کہتے ہیں کب تک کوئی گھبرا نہ جائے

دل میں رہتے رہتے مدت ہو گئی

نقشہ بگڑا رہتے رہتے غصّہ ناک

کٹ کھنی قاتل کی صورت ہو گئی

داغ کا دم ہے غنیمت بزم میں

دو گھڑی کو گرم محبت ہو گئی

داغ دہلوی

باعث ترک ملاقات بتاتے بھی نہیں

اکتوبر 25, 2015اساتذہ،داغ دہلوی،غزلماتے،آتے،اٹھاتے،بتاتے،جاتے،سماتے،سناتے،ستاتےadmin

داغ دہلوی ۔ غزل نمبر 41

عذر آنے میں بھی ہے اور بلاتے بھی نہیں

باعث ترک ملاقات بتاتے بھی نہیں

منتظر ہیں دمِ رخصت کہ یہ مر جائے تو جائیں

پھر یہ احسان کہ ہم چھوڑ کے جاتے بھی نہیں

سر اٹھاؤ تو سہی آنکھ ملاؤ تو سہی

نشۂ مے بھی نہیں نیند کے ماتے بھی نہیں

کیا کہا؟، پھر تو کہو، “ہم نہیں سنتے تیری“

نہیں سنتے تو ہم ایسوں کو سناتے بھی نہیں

خوب پردہ ہے کہ چلمن سے لگے بیٹھے ہیں

صاف چھپتے بھی نہیں سامنے آتے بھی نہیں

مجھ سے لاغر تری آنکھوں میں کھٹکتے تو رہے

تجھ سے نازک مری نظروں میں سماتے بھی نہیں

دیکھتے ہی مجھے محفل میں یہ ارشاد ہوا

کون بیٹھا ہے اسے لوگ اٹھاتے بھی نہیں

ہو چکا قطع تعلق تو جفائیں کیوں ہوں

جن کو مطلب نہیں رہتا وہ ستاتے بھی نہیں

زیست سے تنگ ہو اے داغ تو کیوں جیتے ہو؟

جان پیاری بھی نہیں، جان سے جاتے بھی نہیں

داغ دہلوی

وہ کون سی زمیں ہے جہاں آسماں نہیں

اکتوبر 25, 2015اساتذہ،داغ دہلوی،غزلنشاں،پاسباں،آسماں،امتحان،زباںadmin

داغ دہلوی ۔ غزل نمبر 40

دنیا میں آدمی کو مصیبت کہاں‌ نہیں

وہ کون سی زمیں ہے جہاں آسماں نہیں

کس طرح جان دینے کے اقرار سے پھروں

میری زبان ہے یہ تمہاری زباں نہیں

اے موت تو نے دیر لگائی ہے کس لیئے

عاشق کا امتحان ہے تیرا امتحان نہیں

تنہا بھی جب رہے تو وہ رہتے ہیں‌ہوشیار

خود اپنے پاسباں‌ ہیں اگر پاسباں نہیں

ایسا خط اُن کو راہ میں‌ ملتا ہے روز ایک

جس میں‌کسی کا نام کسی کا نشاں نہیں

داغ دہلوی

کسی سے آج بگڑی ہے کہ وہ یوں بَن کے بیٹھے ہیں

اکتوبر 25, 2015اساتذہ،داغ دہلوی،غزلمَن،مدفن،چتون،ٹھن،بن،بَن،تَن،دُشمنadmin

داغ دہلوی ۔ غزل نمبر 39

بھنویں تنتی ہیں، خنجر ہاتھ میں ہے، تَن کے بیٹھے ہیں

کسی سے آج بگڑی ہے کہ وہ یوں بَن کے بیٹھے ہیں

دلوں‌ پر سیکڑوں سّکے ترے جوبن کے بیٹھے ہیں

کلیجوں پر ہزاروں تیر اس چتون کے بیٹھے ہیں

الٰہی کیوں نہیں‌ اُٹھتی قیامت ماجرا کیا ہے

ہمارے سامنے پہلو میں‌ وہ دُشمن کے بیٹھے ہیں

یہ گستاخی یہ چھیڑ اچھی نہیں‌ ہے اے دلِ ناداں

ابھی پھر سے روٹھ جائیں‌ گے ابھی وہ مَن کے بیٹھے ہیں

اثر ہے جذب الفت میں تو کھنچ کر آ ہی جائیں گے

ہمیں‌ پرواہ نہیں ہم سے اگر وہ تَن کے بیٹھے ہیں

سبک ہو جائیں گے گر جائیں‌گے وہ بزمِ دشمن میں

کہ جب تک گھر میں بیٹھے ہیں تو لاکھوں مَن کے بیٹھے ہیں

فسوں ہے یا دعا ہے یہ معّما کھُل نہیں سکتا

وہ کچھ پڑھتے ہوئے، آگے میرے مدفن کے بیٹھے ہیں

بہت رویا ہوں میں‌جب سے یہ میں‌ نے خواب دیکھا ہے

کہ آپ آنسو بہائے سامنے دُشمن کے بیٹھے ہیں

یہ اُٹھنا بیٹھنا محفل میں اُن کا رنگ لائے گا

قیامت بن کے اُٹھیں گے بھبوکا بن کے بیٹھے ہیں

کسی کی شامت آئیگی کسی کی جان جائیگی

کسی کی تاک میں وہ بام پر بن ٹھن کے بیٹھے ہیں

قسم دے کر اُنہیں سے پوچھ لو تم رنگ ڈھنگ اُس کے

تمہاری بزم میں‌ کچھ دوست بھی دُشمن کے بیٹھے ہیں

داغ دہلوی

ہم بھی دیکھیں تو اسے دیکھ کے کیا کہتے ہیں

اکتوبر 25, 2015اساتذہ،داغ دہلوی،غزلکہا،کیا،برا،جداadmin

داغ دہلوی ۔ غزل نمبر 38

بت کو بت اور خدا کو جو خدا کہتے ہیں

ہم بھی دیکھیں تو اسے دیکھ کے کیا کہتے ہیں

ہم تصور میں بھی جو بات ذرا کہتے ہیں

سب میں اڑ جاتی ہے ظالم اسے کیا کہتے ہیں

جو بھلے ہیں وہ بروں کو بھی بھلا کہتے ہیں

نہ برا سنتے ہیں اچھے نہ برا کہتے ہیں

وقت ملنے کا جو پوچھا تو کہا کہہ دیں گے

غیر کا حال جو پوچھا تو کہا کہتے ہیں

نہیں ملتا کسی مضمون سے ہمارا مضمون

طرز اپنی ہے جدا سب سے جدا کہتے ہیں

پہلے تو داغ کی تعریف ہوا کرتی تھی

اب خدا جانے وہ کیوں اس کو برا کہتے ہیں

داغ دہلوی

نہیں‌معلوم وہ کیا کرتے ہیں‌ کیا ہوتے ہیں

اکتوبر 25, 2015اساتذہ،داغ دہلوی،غزلکیا،بنا،جدا،خفا،خطاadmin

داغ دہلوی ۔ غزل نمبر 37

ہائے دو دل جو کبھی مل کے جدا ہوتے ہیں

نہیں‌معلوم وہ کیا کرتے ہیں‌ کیا ہوتے ہیں

جی میں آئے تو کبھی فاتحہ دلوا دینا

آخری وقت ہے ہم تم سے جدا ہوتے ہیں

دیکھیں مسجد ہو کہ مے خانہ ہو پہلے آباد

دونوں دیوار بہ دیوار بنا ہوتے ہیں

دوست دشمن ہیں سبھی بزم میں‌ دیکھیں کیا ہو

کس سے خوش ہوتے ہیں وہ کس سے خفا ہوتے ہیں

پار ہوتی ہیں‌کلیجے سے نگاہیں اُن کی

قدر انداز کے کب تیر خطا ہوتے ہیں

داغ دہلوی

کر چکیں میرے دل میں گھر آنکھیں

اکتوبر 25, 2015اساتذہ،داغ دہلوی،غزلقدر،مگر،نظر،کر،گھر،گر،پر،بشر،در،سحرadmin

داغ دہلوی ۔ غزل نمبر 36

کیوں چراتے ہو دیکھ کر آنکھیں

کر چکیں میرے دل میں گھر آنکھیں

چشمِ نرگس کو دیکھ لیں پھر ہم

تم دکھا دو جو اک نظر آنکھیں

ہے دوا انکی آتشِ رخسار

سینکتے ہیں اس آگ پر آنکھیں

کوئی آسان ہے تیرا دیدار

پہلے بنوائے تو بشر آنکھیں

جلوۂ یار کی نہ تاب ہوئی

ٹوٹ آئیں ہیں کس قدر آنکھیں

دل کو تو گھوَنٹ گھوَنٹ کر رکھا

مانتی ہی نہیں مگر آنکھیں

نہ گئی تاک جھانک کی عادت

لئے پھرتی ہیں در بہ در آنکھیں

ناوک و نیشتر تری پلکیں

سحرِ پرداز و فتنہ گر آنکھیں

یہ نرالا ہے شرم کا انداز

بات کرتے ہو ڈھانک کر آنکھیں

خاک پر کیوں ہو نقشِ پا تیرا

ہم بچھائیں زمین پر آنکھیں

نوحہ گر کون ہے مقدر میں

رونے والوں میں ہیں مگر آنکھیں

یہی رونا ہے گر شبِ غم کا

پھوٹ جائیں گی تا سحر آنکھیں

حالَ دل دیکھنا نہیں آتا

دل کی بنوائیں چارہ گر آنکھیں

داغ آنکھیں نکالتے ہیں وہ

انکو دیدو نکال کر آنکھیں

داغ دہلوی

ناز والے نیاز کیا جانیں

اکتوبر 25, 2015اساتذہ،داغ دہلوی،غزلفراز،نماز،نواز،نیاز،باز،درازadmin

داغ دہلوی ۔ غزل نمبر 35

ساز، یہ کینہ ساز کیا جانیں

ناز والے نیاز کیا جانیں

کب کسی در کی جُبّہ سائی کی

شیخ صاحب نماز کیا جانیں

جو رہِ عشق میں قدم رکھیں

وہ نشیب و فراز کیا جانیں

پوچھئے مے کشوں سے لطفِ شراب

یہ مزہ پاک باز کیا جانیں

حضرتِ خضر جب شہید نہ ہوں

لطفِ عمرِ دراز کیا جانیں

جو گزرتے ہیں داغ پر صدمے

آپ بندہ نواز کیا جانیں

داغ دہلوی

مر گئے لاکھوں اسی ارمان میں

اکتوبر 25, 2015اساتذہ،داغ دہلوی،غزلنقصان،انسان،ارمان،سامانadmin

داغ دہلوی ۔ غزل نمبر 34

حضرت دل آپ ہیں جس دھیان میں

مر گئے لاکھوں اسی ارمان میں

گر فرشتہ وش ہوا کوئی تو کیا

آدمیت چاہئے انسان میں

جس نے دل کھویا اسی کو کچھ ملا

فائدہ دیکھا اسی نقصان میں

کسی نے ملنے کا کیا وعدہ کہ داغ

آج ہو تم اور ہی سامان میں

داغ دہلوی

جو نہ ملتے تھے سب ملیں گے آپ

اکتوبر 25, 2015اساتذہ،داغ دہلوی،غزلاب،جب،سب،طلبadmin

داغ دہلوی ۔ غزل نمبر 33

مہرباں ہو کے جب ملیں گے آپ

جو نہ ملتے تھے سب ملیں گے آپ

آپ کیوں‌خاک میں‌ملاتے ہیں

ہم مصیبت طلب ملیں گے آپ

کارواں کی تلاش کیا اے دل

آ کے منزل پہ سب ملیں گے آپ

ایک تو وعدہ اور اُس پہ قسم

یہ یقیں ہے کہ اب ملیں گے آپ

داغ اک آدمی ہے گرما گرم

خوش بہت ہوں گے جب ملیں گے آپ

داغ دہلوی

پروانے دیکھتے ہیں تماشائے باغِ داغ

اکتوبر 25, 2015اساتذہ،داغ دہلوی،غزلچراغ،باغ،دماغ،داغ،سراغadmin

داغ دہلوی ۔ غزل نمبر 32

مانندِ گل ہیں‌ میرے جگر میں‌ چراغِ داغ

پروانے دیکھتے ہیں تماشائے باغِ داغ

مرگِ عدو سے آپ کے دل میں چھپُا نہ ہو

میرے جگر میں اب نہیں ملتا سراغِ داغ

دل میں قمر کے جب سے ملی ہے اسے جگہ

اس دن سے ہو گیا ہے فلک پر دماغِ داغ

تاریکیِ لحد سے نہیں دل جلے کو خوف

روشن رہے گا تا بہ قیامت چراغِ داغ

مولا نے اپنے فضل و کرم سے بچا لیا

رہتا وگرنہ ایک زمانے کو داغِ داغ

داغ دہلوی

گر نہ تھی دل میں تو لب پر تیرے آئی کیوں کر

اکتوبر 25, 2015اساتذہ،داغ دہلوی،غزلہےَپرائی،میں‌صفائی،پائی،آئی،بُرائی،برائی،دُہائی،رہائیadmin

داغ دہلوی ۔ غزل نمبر 31

تو نے کی غیر سے کل میری بُرائی کیوں کر

گر نہ تھی دل میں تو لب پر تیرے آئی کیوں کر

نہ کہوں گا نہ کہوں گا نہ کہوں گا ہر گز

جا کے اُس بزم میں شامت میری آئی کیوں ‌کر

کھُل گئی بات جب اُن کی تو وہ یہ پوچھتے ہیں

منہ سے نکلی ہوئی ہوتی ہےَپرائی کیوں کر

داد خواہوں سے وہ کہتے ہیں‌کہو ہم بھی تو سنیں

دو گے تم حشر میں سب مل کے دُہائی کیوں کر

وہ یہاں آئیں وہاں‌غیر کا گھر ہو برباد

اس طرح سے ہو صفائی میں‌صفائی کیوں کر

آئینہ دیکھ کے وہ کہنے لگے آپ ہی آپ

ایسے اچھے کی کرے کوئی بُرائی کیوں کر

اُس نے صدقے میں‌کیئے آج ہزاروں آزاد

دیکھئے ہوتی ہے عاشق کی رہائی کیوں کر

داغ کو مہر کہا اشک کو دریا تم نے

اور پھر کرتے ہیں چھوٹوں‌ کی برائی کیوں کر

داغ کل تک تو دعا آپ کی مقبول نہ تھی

آج منہ مانگی مراد آپ نے پائی کیوں‌ کر

داغ دہلوی

دنیا میں مخمس کا ہمارے نہ کھلا بند

اکتوبر 25, 2015اساتذہ،داغ دہلوی،غزلہوا،مرا،کھلا،پاadmin

داغ دہلوی ۔ غزل نمبر 30

دل میں ہے غم و رنج و الم، حرص و ہوا بند

دنیا میں مخمس کا ہمارے نہ کھلا بند

موقوف نہیں دام و قفس پر ہی اسیری

ہر غم میں گرفتار ہوں ہر فکر میں پابند

اے حضرت دل !جائیے، میرا بھی خدا ہے

بے آپ کے رہنے کا نہیں کام مرا بند

دم رکتے ہی سینہ سے نکل پڑتے ہیں آنسو

بارش کی علامت ہے جو ہوتی ہے ہوا بند

کہتے تھے ہم ۔ اے داغ وہ کوچہ ہے خطرناک

چھپ چھپ کے مگر آپ کا جانا نہ ہوا بند

داغ دہلوی

جھوٹی قسم سے آپ کا ایمان تو گیا

اکتوبر 25, 2015اساتذہ،داغ دہلوی،غزلقربان،پہچان،ایمان،احسان،جان،سامانadmin

داغ دہلوی ۔ غزل نمبر 29

خاطر سے یا لحاظ سے میں مان تو گیا

جھوٹی قسم سے آپ کا ایمان تو گیا

دل لے کے مفت کہتے ہیں کہ کام کا نہیں

اُلٹی شکایتیں ہوئیں، احسان تو گیا

دیکھا ہے بُت کدے میں جو اے شیخ، کچھ نہ پوچھ

ایمان کی تو یہ ہے کہ ایمان تو گیا

افشائے رازِ عشق میں گو ذلتیں ہوئیں

لیکن اُسے جتا تو دیا، جان تو گیا

گو نامہ بر سے خوش نہ ہوا، پر ہزار شکر

مجھ کو وہ میرے نام سے پہچان تو گیا

بزمِ عدو میں صورت پروانہ دل میرا

گو رشک سے جلا تیرے قربان تو گیا

ہوش و ہواس و تاب و تواں داغ جا چکے

اب ہم بھی جانے والے ہیں سامان تو گیا

داغ دہلوی

اس بت کو دیکھتے ہی بس ایمان پھر گیا

اکتوبر 25, 2015اساتذہ،داغ دہلوی،غزلمیرا،نگہبان،نادان،آن،ایمان،بیابانadmin

داغ دہلوی ۔ غزل نمبر 28

کعبے کی سمت جا کے مرا دھیان پھر گیا

اس بت کو دیکھتے ہی بس ایمان پھر گیا

محشر میں داد خواہ جو اے دل نہ تو ہوا

تو جان لے یہ باتھ سے میرا پھر گیا

چھپ کر کہاں گئے تھے وہ شب کو کہ میرے گھر

سو بار آ کے ان کا نگہبان پھر گیا

رونق جو آ گئی پسینے سے موت کے

پانی ترے مریض پر اک آن پھر گیا

گریے نے ایک دم میں بنا دی وہ گھر کی شکل

میری نظر میں صاف بیابان پھر گیا

لائے تھے کوئے یار سے ہم داغ کو ابھی

لو اس کی موت آئی وہ نادان پھر گیا

داغ دہلوی

وہ ہاتھ مل کے کہتے ہیں کیا یار مر گیا

اکتوبر 25, 2015اساتذہ،داغ دہلوی،غزلیار،گرفتار،انکار،اشعار،دیدارadmin

داغ دہلوی ۔ غزل نمبر 27

کس نے کہا کہ داغ وفا دار مر گیا

وہ ہاتھ مل کے کہتے ہیں کیا یار مر گیا

دام بلائے عشق کی وہ کشمکش رہی

ایک اک پھڑک پھڑک کے گرفتار مر گیا

آنکھیں کھلی ہوئی پس مرگ اس لئے

جانے کوئی کہ طالب دیدار مر گیا

جس سے کیا ہے آپ نے اقرار جی گیا

جس نے سنا ہے آپ سے انکار مر گیا

کس بیکسی سے داغ نے افسوس جان دی

پڑھ کر ترے فراق کے اشعار مر گیا

داغ دہلوی

تجھ پر آتا ہے مجھے پیار یہ کیا

اکتوبر 25, 2015اساتذہ،داغ دہلوی،غزلپیار،آزار،اشعار،اغیار،بیمار،بیزار،خبردار،خریدار،دلدار،دشوار،سرکارadmin

داغ دہلوی ۔ غزل نمبر 26

تو ہے مشہور دل آزار یہ کیا

تجھ پر آتا ہے مجھے پیار یہ کیا

جانتا ہوں کہ میری جان ہے تو

اور میں جان سے بیزار یہ کیا

پاؤں‌ پر اُنکے گِرا میں‌ تو کہا

دیکھ ہُشیار خبردار یہ کیا

تیری آنکھیں تو بہت اچھی ہیں

سب انہیں کہتے ہیں بیمار یہ کیا

کیوں مرے قتل سے انکار یہ کیوں

اسقدر ہے تمہیں دشوار یہ کیا

سر اُڑاتے ہیں وہ تلواروں سے

کوئی کہتا نہیں سرکار یہ کیا

ہاتھ آتی ہے متاعِ الفت

ہاتھ ملتے ہیں خریدار یہ کیا

خوبیاں کل تو بیاں ہوتی تھیں

آج ہے شکوۂ اغیار یہ کیا

وحشتِ دل کے سوا اُلفت میں

اور ہیں سینکڑوں آزار یہ کیا

ضعف رخصت نہیں دیتا افسوس

سامنے ہے درِ دلدار یہ کیا

باتیں سنیے تو پھڑک جائیے گا

گرم ہیں‌ داغ کے اشعار یہ کیا

داغ دہلوی

تمام رات قیامت کا انتظار کیا

اکتوبر 25, 2015اساتذہ،داغ دہلوی،غزلقرار،پیار،افتخار،انتظار،اختیار،اعتبار،شرمسار،غبارadmin

داغ دہلوی ۔ غزل نمبر 25

غضب کیا تیرے وعدے کا اعتبار کیا

تمام رات قیامت کا انتظار کیا

کسی طرح جو نہ اس بت نے اعتبار کیا

مری وفا نے مجھے خوب شرمسار کیا

وہ دل کو تاب کہاں ہے کہ ہو مال اندیش

انہوں نے وعدہ کیا اس نے اعتبار کیا

نہ اس کے دل سے مٹایا کہ صاف ہو جاتا

صبا نے خاک پریشاں مرا غبار کیا

تری نگاہ کے تصور میں ہم نے اے قاتل

لگا لگا کے گلے سے چھری کو پیار کیا

ہوا ہے کوئی مگر اس کا چاہنے والا

کہ آسماں نے ترا شیوہ اختیار کیا

نہ پوچھ دل کی حقیقت مگر یہ کہتے ہیں

وہ بے قرار رہے جس نے بے قرار کیا

وہ بات کر جو کبھی آسماں سے ہو نہ سکے

ستم کیا تو بڑا تو نے افتخار کیا

داغ دہلوی

بو سے لینے کے لئے کعبے میں پتھر رکھ دیا

اکتوبر 25, 2015اساتذہ،داغ دہلوی،غزلکیونکر،پتھر،پر،پرور،سرadmin

داغ دہلوی ۔ غزل نمبر 24

آئینہ تصویر کا تیرے نہ لے کر رکھ دیا

بو سے لینے کے لئے کعبے میں پتھر رکھ دیا

ہم نے ان کے سامنے اول تو خنجر رکھ دیا

پھر کلیجا رکھ دیا دل رکھ دیا سر رکھ دیا

زندگی میں پاس سے دم بھر نہ ہوتے تھے جدا

قبر میں تنہا مجھے یاروں نے کیونکر رکھ دیا

دیکھئے اب ٹھوکریں کھاتی ہے کس کس کی نگاہ

روزن دیوار میں ظالم نے پتھر رکھ دیا

زلف خالی ہاتھ خالی کس جگہ ڈھونڈیں اسے

تم نے دل لے کر کہاں اے بندہ پرور رکھ دیا

داغ کی شامت جو آئی اضطراب شوق میں

حال دل کمبخت نے سب ان کے منہ پر رکھ دیا

داغ دہلوی

وعدہ ایسا کوئی جانے کہ مقرر آیا

اکتوبر 25, 2015اساتذہ،داغ دہلوی،غزلمقرر،میسر،کیونکر،کر،گھر،اکثر،بھر،خنجر،سکندر،ساغرadmin

داغ دہلوی ۔ غزل نمبر 23

خواب میں بھی نہ کسی شب وہ ستم گر آیا

وعدہ ایسا کوئی جانے کہ مقرر آیا

مجھ سے مے کش کو کہاں صبر، کہاں کی توبہ

لے لیا دوڑ کے جب سامنے ساغر آیا

غیر کے روپ میں بھیجا ہے جلانے کو مرے

نامہ بر ان کا نیا بھیس بدل کر آیا

سخت جانی سے مری جان بچے گی کب تک

ایک جب کُند ہوا دوسرا خنجر آیا

داغ تھا درد تھا غم تھا کہ الم تھا کچھ تھا

لے لیا عشق میں جو ہم کو میسر آیا

عشق تاثیر ہی کرتا ہے کہ اس کافر نے

جب مرا حال سنا سنتے ہی جی بھر آیا

اس قدر شاد ہوں گویا کہ ملی ہفت اقلیم

آئینہ ہاتھ میں آیا کہ سکندر آیا

وصل میں ہائے وہ اترا کے مرا بول اٹھنا

اے فلک دیکھ تو یہ کون مرے گھر آیا

راہ میں وعدہ کریں جاؤں میں گھر پر تو کہیں

کون ہے، کس نے بلایا اسے، کیونکر آیا

داغ کے نام سے نفرت ہے، وہ جل جاتے ہیں

ذکر کم بخت کا آنے کو تو اکثر آیا

داغ دہلوی

پھر بھی یہ کہوں جلوہ جاناں نہیں دیکھا

اکتوبر 25, 2015اساتذہ،داغ دہلوی،غزلنالاں،پریشان،پشیماں،جاناں،دیوانadmin

داغ دہلوی ۔ غزل نمبر 22

کیا ذوق ہے کہ شوق ہے سو مرتبہ دیکھوں

پھر بھی یہ کہوں جلوہ جاناں نہیں دیکھا

محشر میں وہ نادم ہوں خدا یہ نہ دکھائے

آنکھوں نے کبھی اس کو پشیماں نہیں دیکھا

ہر چند ترے ظلم کی کچھ حد نہیں ظالم

پر ہم نے کسی شخص کو نالاں نہیں دیکھا

ملتا نہیں ہم کو دل گم گشتہ ہمارا

تو نے تو کہیں اے غم جاناں نہیں دیکھا

لو اور سنو کہتے ہیں وہ دیکھ کے مجھ کو

جو حال سنا تھا وہ پریشان نہیں دیکھا

کیا پوچھتے ہو کون ہے یہ کسی کی ہے شہرت

کیا تم نے کبھی داغ کا دیوان نہیں دیکھا

داغ دہلوی

برائی دیکھی، بھلائی دیکھی، عذاب دیکھا، ثواب دیکھا

اکتوبر 25, 2015اساتذہ،داغ دہلوی،غزلثواب،جواب،حجاب،خراب،عذابadmin

داغ دہلوی ۔ غزل نمبر 21

ہماری آنکھوں نے بھی تماشا عجب عجب انتخاب دیکھا

برائی دیکھی، بھلائی دیکھی، عذاب دیکھا، ثواب دیکھا

نہ دل ہی ٹھہرا، نہ آنکھ جھپکی، نہ چین پایا، نہ خواب آیا

خدا دکھائے نہ دشمنوں کو، جو دوستی میں عذاب دیکھا

نظر میں ہے تیری کبریائی، سما گئی تیری خود نمائی

اگر چہ دیکھی بہت خدائی، مگر نہ تیرا جواب دیکھا

پڑے ہوئے تھے ہزاروں پردے کلیم دیکھوں تو جب بھی خوش تھے

ہم اس کی آنکھوں کے صدقے جس نے وہ جلوہ یوں بے حجاب دیکھا

یہ دل تو اے عشق گھر ہے تیرا، جس کو تو نے بگاڑ ڈالا

مکاں سے تالا دیکھا، تجھی کو خانہ خراب دیکھا

جو تجھ کو پایا تو کچھ نہ پایا، یہ خاکداں ہم نے خاک پایا

جو تجھ کو دیکھا تو کچھ نہ دیکھا، تمام عالم خراب دیکھا

داغ دہلوی

نہ تھا رقیب تو آخر وہ نام کس کا تھا

اکتوبر 25, 2015اساتذہ،داغ دہلوی،غزلمقام،نام،کلام،کام،اہتمام،تمام،شام،غلامadmin

داغ دہلوی ۔ غزل نمبر 20

تمھارے خط میں نیا اک سلام کس کا تھا

نہ تھا رقیب تو آخر وہ نام کس کا تھا

وہ قتل کر کے مجھے ہر کسی سے پوچھتے ہیں

یہ کام کس نے کیا ہے، یہ کام کس کا تھا

وفا کریں گے، نباہیں گے، بات مانیں گے

تمھیں بھی یاد ہے کچھ، یہ کلام کس کا تھا

رہا نہ دل میں وہ بےدرد اور درد رہا

مقیم کون ہوا ہے، مقام کس کا تھا

نہ پوچھ گچھ تھی کسی کی وہاں نہ آؤ بھگت

تمھاری بزم میں کل اہتمام کس کا تھا

تمام بزم جسے سن کے رہ گئی مشتاق

کہو، وہ تذکرۂ نا تمام کس کا تھا

گزر گیا وہ زمانہ، کہوں تو کس سے کہوں

خیال دل کو مرے صبح و شام کس کا تھا

ہر اک سے کہتے ہیں کیا داغ بے وفا نکلا

یہ پوچھے ان سے کوئی وہ غلام کس کا تھا

داغ دہلوی

دل ملا کر مجھی سے ملنا تھا

اکتوبر 25, 2015اساتذہ،داغ دہلوی،غزلمجھی،مدّعی،آدمی،جی،خوشی،سبھیadmin

داغ دہلوی ۔ غزل نمبر 19

تم کو کیا ہر کسی سے ملنا تھا

دل ملا کر مجھی سے ملنا تھا

پوچھتے کیا ہو کیوں لگائی دیر

اک نئے آدمی سے ملنا تھا

مل کے غیروں سے بزم میں یہ کہا

مجھ کو آ کر سبھی سے ملنا تھا

عید کو بھی خفا خفا ہی رہے

آج کے دن خوشی سے ملنا تھا

آپ کا مجھ سے جی نہیں‌ملتا

اس محبت پہ جی سے ملنا تھا

تم تو اُکھڑے رہے تمہیں اے داغ

ہر طرح مدّعی سے ملنا تھا

داغ دہلوی

یاں تلک روئے کہ سر دکھنے لگا

اکتوبر 25, 2015اساتذہ،داغ دہلوی،غزلنظر،اگر،ادہار،بصر،سرadmin

داغ دہلوی ۔ غزل نمبر 18

دل کے نالوں سے جگر دکھنے لگا

یاں تلک روئے کہ سر دکھنے لگا

دور تھی از بسکہ راہِ انتظار

تھک کے ہر پائے نظر دکھنے لگا

روتے روتے چشم کا ہر گوشہ یاں

تجھ بن اے نور بصر دکھنے لگا

درد یہ ہے ہاتھ اگر رکھا ادھر

واں سے تب سرکا ادہار دکھنے لگا

مت کراہ انشا نہ کر افشائے راز

دل کو دکھنے دے اگر دکھنے لگا

داغ دہلوی

یاد آتا ہے ہمیں ہائے زمانہ دل کا

اکتوبر 25, 2015اساتذہ،داغ دہلوی،غزلفسانہ،لگانا،مانا،جلانا،زمانہ،ستاناadmin

داغ دہلوی ۔ غزل نمبر 17

اچھی صورت پہ غضب ٹوٹ کے آنا دل کا

یاد آتا ہے ہمیں ہائے زمانہ دل کا

تم بھی چوم لو، بے ساختہ پیار آ جائے

میں سناؤں جو کبھی دل سے فسانہ دل کا

ان حسینوں کا لڑکپن ہی رہے یا اللہ

ہوش آتا ہے تو آتا ہے ستانا دل کا

پوری مہندی بھی لگانی نہیں آئی اب تک

کیوں کر آیا تجھے غیروں سے لگانا دل کا

حور کی شکل ہو تم، نور کے پتلے ہو تم

اور اس پر تمہیں آتا ہے جلانا دل کا

بعد مدت کے یہ اے داغ سمجھ میں آیا

وہی دانا ہے، کہا جس نے نہ مانا دل کا

داغ دہلوی

اب آ چکا ہے لبوں پر معاملہ دل کا

اکتوبر 25, 2015اساتذہ،داغ دہلوی،غزلفیصلہ،مشغلہ،معاملہ،ولولہ،گلہ،آبلہ،حوصلہ،سلسلہ،غلہadmin

داغ دہلوی ۔ غزل نمبر 16

زباں ہلاؤ تو ہو جائے فیصلہ دل کا

اب آ چکا ہے لبوں پر معاملہ دل کا

خدا کے واسطے کر لو معاملہ دل کا

کہ گھر کے گھر ہی میں ہو جائے فیصلہ دل کا

تم اپنے ساتھ ہی تصویر اپنی لے جاؤ

نکال لیں گے کوئی اور مشغلہ دل کا

قصور تیری نگہ کا ہے کیا خطا اس کی

لگاوٹوں نے بڑھا یا ہے حوصلہ دل کا

شباب آتے ہی اسے کاش موت بھی آتی

ابھارتا ہے اسی سن میں ولولہ دل کا

جو منصفی ہے جہاں میں تو منصفی تیری

اگر معاملہ ہے تو معاملہ دل کا

ملی بھی ہے کبھی عاشقی کی داد دنیا میں

ہوا بھی ہے کبھی کم بخت فیصلہ دل کا

ہماری آنکھ میں بھی اشک گرم ایسے ہیں

کہ جن کے آگے بھرے پانی آبلہ دل کا

ہوا نہ اس سے کوئی اور کانوں کان خبر

الگ الگ ہی رہا سب معاملہ دل کا

اگر چہ جان پہ بن بن گئی محبت میں

کسی کے منہ پر نہ رکھا غلہ دل کا

ازل سے تا بہ ابد عشق ہے اس کے لئے

ترے مٹائے مٹے گا نہ سلسلہ دل کا

کچھ اور بھی تجھے اے داغ بات آتی ہے

وہی بتوں کی شکایت وہی گلہ دل کا

داغ دہلوی

کہتا ہوں برا ہو عاشقی کا

اکتوبر 25, 2015اساتذہ،داغ دہلوی،غزلہنسی،کبھی،کسی،آدمی،اسی،جی،عاشقیadmin

داغ دہلوی ۔ غزل نمبر 15

بنتی ہے بری کبھی جو دل پر

کہتا ہوں برا ہو عاشقی کا

ماتم سے مرے وہ دل میں خوش ہیں

منہ پر نہیں نام بھی ہنسی کا

اتنا ہی تو بس کسر ہے تم میں

کہنا نہیں مانتے کسی کا

ہم بزم میں ان کی چپکے بیٹھے

منہ دیکھتے ہیں ہر آدمی کا

جو دم ہے وہ ہے بسا غنیمت

سارا سودا ہے جیتے جی کا

آغاز کو کون پوچھتا ہے

انجام اچھا ہو آدمی کا

روکیں انہیں کیا کہ ہے غنیمت

آنا جانا کبھی کبھی کا

ایسے سے جو داغ نے نباہی

سچ ہے کہ یہ کام تھا اسی کا

داغ دہلوی

یوں گھر نہ تباہ ہو کسی کا

اکتوبر 25, 2015اساتذہ،داغ دہلوی،غزلہنسی،کلی،کبھی،کسی،آدمی،اسی،جی،خوشی،زندگی،عاشقیadmin

داغ دہلوی ۔ غزل نمبر 14

اب دل ہے مقام بے کسی کا

یوں گھر نہ تباہ ہو کسی کا

کس کس کو مزا ہے عاشقی کا

تم نام تو لو بھلا کسی کا

پھر دیکھتے ہیں عیش آدمی کا

بنتا جو فلک میر خوشی کا

گلشن میں ترے لبوں نے گویا

رس چوم لیا کلی کلی کا

لیتے نہیں بزم میں مرا نام

کہتے ہیں خیال ہے کسی کا

جیتے ہیں کسی کی آس پر ہم

احسان ہے ایسی زندگی کا

بنتی ہے بری کبھی جو دل پر

کہتا ہوں برا ہو عاشقی کا

ماتم سے مرے وہ دل میں خوش ہیں

منہ پر نہیں نام بھی ہنسی کا

اتنا ہی تو بس کسر ہے تم میں

کہنا نہیں مانتے کسی کا

ہم بزم میں ان کی چپکے بیٹھے

منہ دیکھتے ہیں ہر آدمی کا

جو دم ہے وہ ہے بسا غنیمت

سارا سودا ہے جیتے جی کا

آغاز کو کون پوچھتا ہے

انجام اچھا ہو آدمی کا

روکیں انہیں کیا کہ ہے غنیمت

آنا جانا کبھی کبھی کا

ایسے سے جو داگ نے نباہی

سچ ہے کہ یہ کام تھا اسی کا

داغ دہلوی

اڑا نہ لے کوئی انداز مسکرانے کا

اکتوبر 25, 2015اساتذہ،داغ دہلوی،غزلمسکرانے،چڑھانے،ٹھکانے،آنےadmin

داغ دہلوی ۔ غزل نمبر 13

سبب کھلا یہ ہمیں اُن کے منہ چھپانے کا

اڑا نہ لے کوئی انداز مسکرانے کا

طریق خوب ہے یہ عمر کے بڑھانے کا

کہ منتظر رہوں‌ تا حشر اُن کے آنے کا

چڑھاؤ پھول میری قبر پر جو آئے ہو

کہ اب زمانہ گیا تیوری چڑھانے کا

جفائیں کرتے ہیں تھم تھم کے اس خیال سے وہ

گیا تو پھر یہ نہیں میرے ہاتھ آنے کا

سمائیں اپنی نگاہوں میں ایسے ویسے کیا

رقیب ہی سہی ہو آدمی ٹھکانے کا

تمہیں رقیب نے بھیجا کھلا ہوا پرچہ

نہ تھا نصیب لفافہ بھی آدھ آنے کا

داغ دہلوی

گستاخیوں کرے لب خاموش نقش پا

اکتوبر 25, 2015اساتذہ،داغ دہلوی،غزلہوش،مدہوش،گوش،آغوش،خاموشadmin

داغ دہلوی ۔ غزل نمبر 12

دیکھو جو مسکراکے تم آغوش نقش پا

گستاخیوں کرے لب خاموش نقش پا

پائی مرے سراغ سے دشمن نے راہ دوست

اے بیخودی مجھے نہ رہا ہوش نقش پا

میں خاکسار عشق ہوں آگاہ راز عشق

میری زباں سے حال سنے گوش نقش پا

آئے بھی وہ چلے بھی گئے مری راہ سے

میں نا مراد والہ و مدہوش نقش پا

یہ کون میرے کوچہ سے چھپ کر نکل گیا

خالی نہیں ہے فتنوں سے آغوش نقش پا

یہ داغ کی تو خاک نہیں کوئے یار میں

اک نشہ وصال ہے آغوش نقش پا

داغ دہلوی

یا نبی خوب ہوا خوب ہوا خوب ہوا

اکتوبر 25, 2015اساتذہ،داغ دہلوی،غزلمحبوب،مطلوب،ایوب،خوب،غوبadmin

داغ دہلوی ۔ غزل نمبر 11

تو جو اللہ کا محبوب ہوا خوب ہوا

یا نبی خوب ہوا خوب ہوا خوب ہوا

شب معراج یہ کہتے تھے فرشتے باہم

سخن طالب و مطلوب ہوا خوب ہوا

حشر میں امت عاصی کا ٹھکانا ہی نہ تھا

بخشوانا تجھے مر غوب ہوا خوب ہوا

تھا سبھی پیش نظر معرکہ کرب و بلا

صبر میں ثانی ایوب ہوا خوب ہوا

داغ ہے روز قیامت مری شرم اسکے ہاتھ

میں گناہوں سے جو محبوب ہوا خوب ہوا

داغ دہلوی

تمہیں قسم ہے ہمارے سر کی ہمارے حق میں‌ کمی نہ کرنا

اکتوبر 25, 2015اساتذہ،داغ دہلوی،غزلہنسی،کمی،کبھی،تہی،خوشیadmin

داغ دہلوی ۔ غزل نمبر 10

ستم ہے کرنا جفا ہے کرنا نگاہ الفت کبھی نہ کرنا

تمہیں قسم ہے ہمارے سر کی ہمارے حق میں‌ کمی نہ کرنا

ہماری میت پہ تم جو آنا تو چار آنسو گرا کے جانا

ذرا رہے پاس آبرو بھی کہیں ہماری ہنسی نہ کرنا

کہاں کا آنا کہاں کا جانا وہ جانتے ہی نہیں‌ یہ رسمیں

وہاں ہے وعدے کی بھی یہ صورت کبھی تو کرنا کبھی نہ کرنا

لیئے تو چلتے ہیں‌حضرت دل تمہیں بھی اس انجمن میں‌لیکن

ہمارے پہلو میں‌بیٹھ کر تم ہمیں سے پہلو تہی نہ کرنا

نہیں ہے کچھ قتل انکا آسان یہ سخت جان ہیں‌ بڑے بلا کے

قضا کو پہلے شریک کرنا یہ کام اپنے خوشی نہ کرنا

داغ دہلوی

پڑی آنکھ جس کوہ پر طور نکلا

اکتوبر 25, 2015اساتذہ،داغ دہلوی،غزلمنصور،مشہور،ناسور،دور،طورadmin

داغ دہلوی ۔ غزل نمبر 9

جہاں تیرے جلوہ سے معمور نکلا

پڑی آنکھ جس کوہ پر طور نکلا

یہ سمجھے تھے ہم ایک چرکہ ہے دل پر

دبا کر جو دیکھا تو ناسور نکلا

نہ نکلا کوئی بات کا اپنی پورا

مگر ایک نکلا تو منصور نکلا

وجود و عدم دونوں گھر پاس نکلے

نہ یہ دور نکلا نہ وہ دور نکلا

سمجھتے تھے ہم داغ گمنام ہو گا

مگر وہ تو عالم میں مشہور نکلا

داغ دہلوی

کہیں ہم نے پتہ پایا نہ ہر گز آج تک تیرا

اکتوبر 25, 2015اساتذہ،داغ دہلوی،غزلملک،مشترک،نمک،یک،تک،دیکadmin

داغ دہلوی ۔ غزل نمبر 8

یہاں بھی تو وہاں بھی تو زمیں تیری فلک تیرا

کہیں ہم نے پتہ پایا نہ ہر گز آج تک تیرا

صفات و ذات میں یکتا ہے تو اے واحد مطلق

نہ کوئی تیرا ثانی کوئی مشترک تیرا

جمال احمد و یوسف کو رونق تو نے بخشی ہے

ملاحت تجھ سے شیریں حسن شیریں میں نمک تیرا

ترے فیض و کرم سے نار و نور آپس میں یکدل ہیں

ثنا گر یک زبان ہر ایک ہے جن و ملک تیرا

نہ جلتا طور کیونکر کس طرح موسی نہ غش کھاتے

کہاں یہ تاب و طاقت جلوہ دیکھئے مر دیک تیرا

دعا یہ ہے کہ وقت مرگ اسکی مشکل آساں ہو

زباں پر داغ کے نام آئے یا رب یک بہ یک تیرا

داغ دہلوی

محروم رہ نہ جائے کل یہ غلام تیرا

اکتوبر 25, 2015اساتذہ،داغ دہلوی،غزلمقام،نام،کلام،تمام،عام،غلامadmin

داغ دہلوی ۔ غزل نمبر 7

یا رب ہے بخش دینا بندے کو کام تیرا

محروم رہ نہ جائے کل یہ غلام تیرا

جب تک ہے دل بغل میں ہر دم ہو یاد تیری

جب تک زباں ہے منہ میں‌جاری ہو نام تیرا

ایمان کی کہیں گے ایمان ہے ہمارا

احمد رسول تیرا مصحف کلام تیرا

ہے تو ہی دینے والا پستی سے دے بلندی

اسفل مقام میرا اعلٰی مقام تیرا

محروم کیوں‌رہوں میں جی بھر کے کیوں نہ لوں میں

دیتا ہے رزق سب کو ہے فیض عام تیرا

یہ “داغ“ بھی نہ ہو گا تیرے سوا کسی کا

کونین میں‌ہے جو کچھ وہ ہے تمام تیرا

داغ دہلوی

ایسے آنے سے تو بہتر تھا نہ آنا تیرا

اکتوبر 25, 2015اساتذہ،داغ دہلوی،غزلٹھکانا،آنا،جاناadmin

داغ دہلوی ۔ غزل نمبر 6

لے چلا جان مری روٹھ کے جانا تیرا

ایسے آنے سے تو بہتر تھا نہ آنا تیرا

تو جو اے زلف پریشان رہا کرتی ہے

کس کے اجڑے ہوئے دل میں ہے ٹھکانا تیرا

اپنی آنکھوں میں کوند گئی بجلی سی

ہم نہ سمجھے کہ یہ آنا ہے کہ جانا تیرا

داغ دہلوی

وہ کچھ نہیں کہتا ہے کہ میں کچھ نہیں‌ کہتا

اکتوبر 25, 2015اساتذہ،داغ دہلوی،غزلمیں‌لکھا،کہنا،کہتا،کلیجا،ایسا،زیباadmin

داغ دہلوی ۔ غزل نمبر 5

یہ قول کسی کا ہے کہ میں کچھ نہیں‌ کہتا

وہ کچھ نہیں کہتا ہے کہ میں کچھ نہیں‌ کہتا

سُن سُن کے تیرے عشق میں اغیار کے طعنے

میرا ہی کلیجا ہے کہ میں کچھ نہیں‌ کہتا

اُن کا یہی سننا ہے کہ وہ کچھ نہیں‌سنتے

میرا یہی کہنا ہے کہ میں کچھ نہیں‌ کہتا

خط میں وہ مجھے اوّل تو سنائی ہیں ہزاروں

آخر میں‌لکھا ہے کہ میں کچھ نہیں‌ کہتا

پھٹتا ہے جگر دیکھ کے قاصد کی مصیبت

پوچھو تو یہ کہتا ہے کہ میں کچھ نہیں‌ کہتا

یہ خوب سمجھ لیجئے غماّز وہی ہے

جو آپ سے کہتا ہے کہ میں کچھ نہیں‌ کہتا

تم کو یہی شایاں ہے کہ تم دیتے ہو دشنام

مجھ کو یہی زیبا ہے کہ میں کچھ نہیں‌ کہتا

مشتاق بہت ہیں مرے کہنے کے پر اے داغ

یہ وقت ہی ایسا ہے کہ میں کچھ نہیں کہتا

داغ دہلوی

وہ کچھ نہیں کہتا ہے کہ میں کچھ نہیں کہتا

اکتوبر 25, 2015اساتذہ،داغ دہلوی،غزللکھا،کہنا،کہتا،کلیجا،ایسا،زیباadmin

داغ دہلوی ۔ غزل نمبر 4

یہ قول کسی کا ہے کہ میں کچھ نہیں کہتا

وہ کچھ نہیں کہتا ہے کہ میں کچھ نہیں کہتا

سن سن کے ترے عشق میں اغیار کے طعنے

میرا ہی کلیجا ہے کہ میں کچھ نہیں کہتا

ان کا یہی سننا ہے کہ وہ کچھ نہیں سنتے

میرا یہی کہنا ہے کہ میں کچھ نہیں کہتا

خط میں مجھے اوّل تو سنائی ہیں ہزاروں

آخر میں یہ لکھا ہے کہ میں کچھ نہیں کہتا

پھٹتا ہے جگر دیکھ کے قاصد کی مصیبت

پوچھوں تو یہ کہتا ہے کہ میں کچھ نہیں کہتا

یہ خوب سمجھ لیجئے غمار وہی ہے

جو آپ سے کہتا ہے کہ میں کچھ نہیں کہتا

تم کو یہی شایاں ہے کہ تم دیتے ہو دشنام

مجھ کو یہی زیبا ہے کہ میں کچھ نہیں کہتا

مشتاق بہت ہیں مرے کہنے کے پر اے داغؔ

یہ وقت ہی ایسا ہے کہ میں کچھ نہیں کہتا

داغ دہلوی

مرا مرنا بھی تو میری خوشی سے ہو نہیں سکتا

اکتوبر 25, 2015اساتذہ،داغ دہلوی،غزلہی،کسی،جی،خوشی،دشمنی،شرمندگیadmin

داغ دہلوی ۔ غزل نمبر 3

محبت میں کرے کیا کچھ کسی سے ہو نہیں سکتا

مرا مرنا بھی تو میری خوشی سے ہو نہیں سکتا

کیا ہے وعدہ فردا انہوں نے دیکھئے کیا ہو

یہاں صبر و تحمل آج ہی سے ہو نہیں سکتا

چمن میں ناز بلبل نے کیا جب اپنے نالے پر

چٹک کر غنچہ بولا کیا کسی سے ہو نہیں سکتا

نہ رونا ہے طریقہ کا نہ ہنسنا ہے سلیقےکا

پریشانی میں کوئی کا جی سے ہو نہیں سکتا

ہوا ہوں اس قدر محبوب عرض مدعا کر کے

اب تو عذر بھی شرمندگی سے ہو نہیں سکتا

خدا جب دوست ہے اے داغ کیا دشمن سے اندیشہ

ہمارا کچھ کسی کی دشمنی سے ہو نہیں سکتا

داغ دہلوی

کبھی جان صدقے ہوتی، کبھی دل نثار ہوتا

اکتوبر 25, 2015اساتذہ،داغ دہلوی،غزلقرار،مزار،نثار،یار،افتخار،اختیار،اعتبار،بار،خوار،خوشگوارadmin

داغ دہلوی ۔ غزل نمبر 2

عجب اپنا حال ہوتا، جو وصال یار ہوتا

کبھی جان صدقے ہوتی، کبھی دل نثار ہوتا

کوئی فتنہ تا قیامت نہ پھر آشکار ہوتا

ترے دل پہ کاش ظالم مجھے اختیار ہوتا

جو تمہاری طرح تم سے کوئی جھوٹے وعدے کرتا

تمہیں منصفی سے کہہ دو تمہیں اعتبار ہوتا

غمِ عشق میں مزا تھا جو اسے سمجھ کے کھاتے

یہ وہ زہر ہے کہ آخر مے خوشگوار ہوتا

یہ مزہ تھا دل لگی کا، کہ برابر ٓاگ لگتی

نہ تجھے قرار ہوتا، نہ مجھے قرار ہوتا

یہ مزا ہے دشمنی میں، نہ ہے لطف دوستی میں

کوئی غیر غیر ہوتا، کوئی یار یار ہوتا

ترے وعدے پر ستمگر، ابھی اور صبر کرتے

مگر اپنی زندگی کا، ہمیں اعتبار ہوتا

یہ وہ دردِ دل نہیں ہے کہ ہو چارہ ساز کوئی

اگر ایک بار مٹتا تو ہزار بار ہوتا

گئے ہوش تیرے زاہد جو وہ چشمِ مست دیکھی

مجھے کیا الٹ نہ دینے جو نہ بادہ خوار ہوتا

مجھے مانتے سب ایسا کہ عدو بھی سجدے کرتے

درِ یار کعبہ بنتا جو مرا مزار ہوتا

تمہیں ناز ہو نہ کیونکر کہ لیا ہے داغ کا دل

یہ رقم نہ ہاتھ لگتی نہ یہ افتخار ہوتا

داغ دہلوی

کچھ ٹھکانہ نظر نہیں آتا

اکتوبر 25, 2015اساتذہ،داغ دہلوی،غزلمانا،ٹھکانہ،جانا،خزانہadmin

داغ دہلوی ۔ غزل نمبر 1

وہ زمانہ نظر نہیں آتا

کچھ ٹھکانہ نظر نہیں آتا

دل نے اس بزم میں بٹھا تو دیا

اٹھ کے جانا نظر نہیں آتا

رہئے مشتاق جلوہ دیدار

ہم نے مانا نظر نہیں آتا

لے چلو مجھکو رہروان عدم

یہاں ٹھکانہ نظر نہیں آتا

دل پر آرزو لٹا اے داغ

وہ خزانہ نظر نہیں آتا

داغ دہلوی

شوقِ خیال تازہ ہے یعنی عذاب چاہیے

اکتوبر 23, 2015Jaun Elia،جون ایلیا،شعراء،غزلنصاب،جواب،حساب،خراب،سراب،شراب،عذابadmin

جون ایلیا ۔ غزل نمبر 237

مجھ کو شبِ وجود میں تابشِ خواب چاہیے

شوقِ خیال تازہ ہے یعنی عذاب چاہیے

آج شکستِ ذات کی شام ہے مجھ کو آج شام

صرف شراب چاہیے ، صرف شراب چاہیے

کچھ بھی نہیں ہے ذہن میں کچھ بھی نہیں سو اب مجھے

کوئی سوال چاہیے کوئی جواب چاہیے

اس سے نبھے گا رشتۂِ سودوزیاں بھی کیا بھلا

میں ہوں بَلا کا بدحساب اس کو حساب چاہیے

امن و امانِ شہرِ دل خواب و خیال ہے ابھی

یعنی کہ شہرِ دل کا حال اور خراب چاہیے

جانِ گماں ہمیں تو تم صرف گمان میں رکھو

تشنہ لبی کو ہر نفس کوئی سراب چاہیے

کھل تو گیا ہے دل میں ایک مکتبِ حسرت و امید

جون اب اس کے واسطے کوئی نصاب چاہیے

جون ایلیا

ہجر میں کرنا ہے کیا یہ تو بتاتے جائیے

اکتوبر 23, 2015Jaun Elia،جون ایلیا،شعراء،غزللگاتے،لرکھڑاتے،پلاتے،آتے،بہاتے،بھلاتے،بتاتے،جلاتے،جاتےadmin

جون ایلیا ۔ غزل نمبر 236

ہجر کی آنکھوں سے آنکھیں ملاتے جائیے

ہجر میں کرنا ہے کیا یہ تو بتاتے جائیے

بن کے خوشبو کی اداسی رہیے دل کے باغ میں

دور ہوتے جائیے نزدیک آتے جائیے

جاتے جاتے آپ اتنا کام تو کیجیے مرا

یاد کا سر و ساماں جلاتے جائیے

رہ گئی امید تو برباد ہو جاؤں گا میں

جائیے تو پھر مجھے سچ مچ بھلاتے جائیے

زندگی کی انجمن کا بس یہی دستور ہے

بڑھ کے ملیے اور مل کر دور جاتے جائیے

آخری رشتہ تو ہم میں اک خوشی اک غم کا تھا

مسکراتے جائیے آنسو بہاتے جائیے

وہ گلی ہے اک شرابی چشم کافر کی گلی

اس گلی میں جائیے تو لرکھڑاتے جائیے

آپ کو جب مجھ سے شکوا ہی نہیں کوئی تو پھر

آگ ہی دل میں لگانی ہے لگاتے جائیے

کوچ ہے خوابوں سے تعبیروں کی سمتوں میں تو پھر

جائیے پر دم بہ دم برباد جاتے جائیے

آپ کا مہمان ہوں میں آپ میرے میزبان

سو مجھے زہرِ مروت تو پلاتے جائیے

ہے سرِ شب اور مرے گھر میں نہیں کوئی چراغ

آگ تو اس گھر میں جانا نہ لگاتے جائیے

جون ایلیا

خزاں سے کچھ نہیں ہوتا ، بہار دل میں رہے

اکتوبر 23, 2015Jaun Elia،جون ایلیا،شعراء،غزلنگار،وار،انتظار،بہار،خار،غبارadmin

جون ایلیا ۔ غزل نمبر 235

فراق کیا ہے اگر ، یادِ یار دل میں رہے

خزاں سے کچھ نہیں ہوتا ، بہار دل میں رہے

گزار روز و شبِ وصل اک نگار کے ساتھ

وہ ہے ایک شبِ انتظار ،دل میں رہے

تو اپنی ذات کے باہر نہ بکھریو زنہار

فضا کو صاف رکھیو ، غبار دل میں رہے

نہ ہو اگر نہیں دیوار ہائے نقش و نگار

خیالِ پرتوِ نقش و نگار ، دل میں رہے

لبوں کا یہ ہے کہ رشتہ سبھی سے ہے انکا

بنے نہ جس سے لبوں کی وہ خار دل میں رہے

تو بیچ دے سرِ بازار ہوش دل اپنا

ہو اک خیال جو دیوانہ وار دل میں رہے

جون ایلیا

جو کچھ ہے یہاں آگ لگانے کے لیے ہے

اکتوبر 23, 2015Jaun Elia،جون ایلیا،شعراء،غزلفسانے،لگانے،کمانے،گنوانے،جمانے،جانے،رُلانےadmin

جون ایلیا ۔ غزل نمبر 234

اک دل ہے جو جو ہر لمحہ جلانے کے لیے ہے

جو کچھ ہے یہاں آگ لگانے کے لیے ہے

اک بات ہی کہنی ہے مجھے تجھ سے، بس اک بات

اس شہر میں تُو صرف گنوانے کے لیے ہے

ہر شخص مری ذات سے جانے کے لیے تھا

تُو بھی تو مری ذات سے جانے کے لیے ہے

جو رنگ ہیں سہہ لے انہیں جو رنگ ہیں سہہ لے

یاں جو بھی ہنر ہے وہ کمانے کے لیے ہے

بودش جو ہے وہ ایک تماشہ ہے گماں کا

ہے جو بھی حقیقت وہ فسانے کے لیے ہے

ہنسنے سے کبھی خوش نہیں ہوتا ہے میرا دل

یاں مجھ کو ہنسانا بھی رُلانے کے لیے ہے

قاتل کو مرے مجھ سے نہیں ہے کوئی پَرخاش

قاتل تو مرا رنگ جمانے کے لیے ہے

جون ایلیا

اک دم سے بُھولنا اسے پھر ابتدا سے ہے

اکتوبر 23, 2015Jaun Elia،جون ایلیا،شعراء،غزلہوا،فضا،آشنا،ابتدا،جا،صباadmin

جون ایلیا ۔ غزل نمبر 233

بے انتہائی شیوہ ہمارا سدا سے ہے

اک دم سے بُھولنا اسے پھر ابتدا سے ہے

یہ شام جانے کتنے ہی رشتوں کی شام ہو

اک حُزن دل میں نکہتِ موجِ صبا سے ہے

دستِ شجر کی تحفہ رسانی ہے تا بہ دل

اس دم ہے جو بھی دل میں مرے وہ ہوا سے ہے

جیسے کوئی چلا بھی گیا ہو اور آئے بھی

احساس مجھ کو کچھ یہی ہوتا فضا سے ہے

دل کی سہولتیں ہیں عجب ، مشکلیں عجب

ناآشنائی سی عجب اک آشنا سے ہے

اس میں کوئی گِلہ ہی روا ہے نہ گفتگو

جو بھی یہاں کسی کا سخن ہے وہ جا سے ہے

جون ایلیا

مجھے فرقت سکھائی جا رہی ہے

اکتوبر 23, 2015Jaun Elia،جون ایلیا،شعراء،غزللائی،مچائی،چلائی،نبھائی،ڈھائی،کھائی،گنوائی،پائی،آزمائی،جلائی،خدائی،دُہائی،سکھائی،سجائیadmin

جون ایلیا ۔ غزل نمبر 232

تری قیمت گھٹائی جا رہی ہے

مجھے فرقت سکھائی جا رہی ہے

یہ ہے تعمیرِ دنیا کا زمانہ

حویلی دل کی ڈھائی جا رہی ہے

وہ شے جو صرف ہندوستان کی تھی

وہ پاکستان لائی جا رہی ہے

کہاں کا دین۔۔کیسا دین۔۔کیا دین

یہ کیا گڑ بڑ مچائی جا رہی ہے

شعورِ آدمی کی سر زمیں تک

خدا کی اب دُہائی جا رہی ہے

بہت سی صورتیں منظر میں لا کر

تمنا آزمائی جا رہی ہے

مجھے اب ہوش آتا جا رہا ہے

خدا تیری خدائی جا رہی ہے

نہیں معلوم کیا سازش ہے دل کی

کہ خود ہی مات کھائی جا رہی ہے

***

نئی خواہش رچائی جا رہی ہے

تیری فرقت منائی جا رہی ہے

ہے ویرانی کی دھوپ اور ایک آنگن

اور اس پر لُو چلائی جا رہی ہے

نبھائی تھی نہ ہم نے جانے کس سے

کہ اب سب سے نبھائی جا رہی ہے

کہاں لذت وہ سوزِ جستجو کی

یہاں ہر چیز پائی جا رہی ہے

سُن اے سورج جدائی موسموں کے

میری کیاری جلائی جا رہی ہے

بہت بدحال ہیں بستی، تیرے لوگ

تو پھر تُو کیوں سجائی جا رہی ہے

خوشا احوال اپنی زندگی کا

سلیقے سے گنوائی جا رہی ہے

جون ایلیا

پِیا جی کی سواری جا رہی ہے

اکتوبر 23, 2015Jaun Elia،جون ایلیا،شعراء،غزلہماری،ہاری،قراری،ماری،واری،گزاری،پیاری،انتظاری،بُردباری،سنواری،سواری،سُدھاری،عماریadmin

جون ایلیا ۔ غزل نمبر 231

چلو بادِ بہاری جا رہی ہے

پِیا جی کی سواری جا رہی ہے

شمالِ جاودانِ سبز جاں سے

تمنا کی عماری جا رہی ہے

فغاں اے دشمنی دارِ دل و جاں

مری حالت سُدھاری جا رہی ہے

جو اِن روزوں مراغم ہے وہ یہ ہے

کہ غم سے بُردباری جا رہی ہے

ہے سینے میں عجب اک حشر برپا

کہ دل سے بے قراری جا رہی ہے

میں پیہم ہار کر یہ سوچتا ہے

وہ کیا شہ ہے جو ہاری جا رہی ہے

دل اُس کے رُوبرو ہے اور گُم صُم

کوئی عرضی گزاری جا رہی ہے

وہ سید بچہ ہو اور شیخ کے ساتھ

میاں عزت ہماری جا رہی ہے

ہے برپا ہر گلی میں شورِ نغمہ

مری فریاد ماری جا رہی ہے

وہ یاد اب ہو رہی ہے دل سے رُخصت

میاں پیاروں کی پیاری جا رہی ہے

دریغا ! تیری نزدیکی میاں جان

تری دوری پہ واری جا رہی ہے

بہت بدحال ہیں بستی ترے لوگ

تو پھر تُو کیوں سنواری جا رہی ہے

تری مرہم نگاہی اے مسیحا!

خراشِ دل پہ واری جا رہی ہے

خرابے میں عجب تھا شور برپا

دلوں سے انتظاری جا رہی ہے

جون ایلیا

یعنی جاناں دل کا تقاضا آہ بھی ہے فریاد بھی ہے

اکتوبر 23, 2015Jaun Elia،جون ایلیا،شعراء،غزلفرہاد،فریاد،آزاد،استاد،دادadmin

جون ایلیا ۔ غزل نمبر 230

ہے رنگِ ایجاد بھی دل میں اور زخم ایجاد بھی ہے

یعنی جاناں دل کا تقاضا آہ بھی ہے فریاد بھی ہے

تیشہ ناز نے میری انا کے خوں کی قبا پہنائی مجھے

میں جو ہوں پرویز ہوں اک جو ظالم فرہاد بھی ہے

منحصر اس کی منشا پر ہے کس طور اس سے پیش آؤں

قید میری بانہوں میں وہ ہو کر وہ قاتل آزاد بھی ہے

جون جدا تو رہنا ہو گا تجھ کو اپنے یاروں بیچ

یار ہی تو یاروں کا نہیں ہے یاروں کا استاد بھی ہے

ساری ردیفیں بھی حاضر ہیں پھر ساری ترکیبیں بھی

اور تمہیں کیا چاہیئے یارو، حاصل میری داد بھی ہے

جون ایلیا

میں نے خود سے نباہ کر لی ہے

اکتوبر 23, 2015Jaun Elia،جون ایلیا،شعراء،غزلکر،گزر،بھر،خبر،سِپر،سرadmin

جون ایلیا ۔ غزل نمبر 229

آخری بار آہ کر لی ہے

میں نے خود سے نباہ کر لی ہے

اپنے سر اک بلا تو لینی تھی

میں نے وہ زُلف اپنے سر لی ہے

دن بھلا کس طرح گزاروگے

وصل کی شب بھی اب گزر لی ہے

جاں نثاروں پہ وار کیا کرنا

میں نے بس ہاتھ میں سِپر لی ہے

جو بھی مانگو اُدھار دوں گا میں

اُس گلی میں دکان کر لی ہے

میرا کشکول کب سے خالی تھا

میں نے اُس میں شراب بھر لی ہے

اور تو کچھ نہیں کیا میں نے

اپنی حالت تباہ کر لی ہے

شیخ آیا تھا محتسب کو لئے

میں نے بھی ان کی وہ خبر لی ہے

جون ایلیا

یہ اداسی کہاں سے آتی ہے

اکتوبر 23, 2015Jaun Elia،جون ایلیا،شعراء،غزلاداسی،باسی،سیadmin

جون ایلیا ۔ غزل نمبر 228

روح پیاسی کہاں سے آتی ہے

یہ اداسی کہاں سے آتی ہے

ایک زندانِ بے دلی اور شام

یہ صبا سی کہاں سے آتی ہے

تو ہے پہلو میں پھر تری خوشبو

ہو کے باسی کہاں سے آتی ہے

جون ایلیا

یہ دنیا اب تمہاری ہو گئی ہے

اکتوبر 23, 2015Jaun Elia،جون ایلیا،شعراء،غزلکزاری،گزاری،بھاری،تمہاری،خواری،روزگاری،سواری،طاریadmin

جون ایلیا ۔ غزل نمبر 227

عجب حالت ہماری ہو گئی ہے

یہ دنیا اب تمہاری ہو گئی ہے

سخن میرا اداسی ہے سرِ شام

جو خاموشی پہ طاری ہو گئی ہے

بہت ہی خوش ہے دل اپنے کیے پر

زمانے بھر میں خواری ہو گئی ہے

وہ نازک لب ہے اب جانے ہی والا

مری آواز بھاری ہو گئی ہے

دل اب دنیا پہ لعنت کر کہ اس کی

بہت خدمت گزاری ہو گئی ہے

یقیں معزور ہے اب اور گماں بھی

بڑی بے روزگاری ہو گئی ہے

وہ اک بادِ شمالی رنگ جو تھی

شمیم اس کی سواری ہو گئی ہے

مرے پاس آکے خنجر بھونک دے تُو

بہت نیزہ کزاری ہو گئی ہے

جون ایلیا

ہے دستِ فتنہ اور گریبانِ فتنہ ہے

اکتوبر 23, 2015Jaun Elia،جون ایلیا،شعراء،غزلگریبان،پنہان،پستان،آن،جان،جانان،درمان،سامان،طغیانadmin

جون ایلیا ۔ غزل نمبر 226

کیوں غم کریں جو شہر میں طوفانِ فتنہ ہے

ہے دستِ فتنہ اور گریبانِ فتنہ ہے

درمانِ فتنہ کے لئے ہے سر بہ جیب کیوں

فتنی اٹھا کہ فتنی ہی درمانِ فتنہ ہے

لب وا ہوئے کہ فتنہ فضا تا فضا پڑا

یہ جنبشِ نفس ہے کہ طغیانِ فتنہ ہے

بےجان ہیں یہ سارے بدن ہائے رقصِ شب

ہائے وہ اک بدن جو بدن جانِ فتنہ ہے

مت جا قریب پاسِ نشیب و فراز ہے

یہ پہلوئے فساد ہے، پستانِ فتنہ ہے

بھاگ اپنے سائے سے کہ بنایا گیا ہے یہ

سائے میں ایک پرتوِ پنہانِ فتنہ ہے

اس کے بدن میں کیسے اماں مل گئی تجھے

جو تشنگی کی جان ہے، جانانِ فتنہ ہے

آثار تک نہیں کسی فتنے کے دور تک

فارغ نہ بیٹھو کہ یہی آنِ فتنہ ہے

نکلا بھی جونؔ وقت پہ سورج گیا بھی ڈوب

آں سوئے کہکشاں کوئی سامانِ فتنہ ہے

جون ایلیا

خونیں جگروں ، سینہ فگاروں سے گلہ ہے

اکتوبر 23, 2015Jaun Elia،جون ایلیا،شعراء،غزلفگاروں،ماروں،گزاروں،اشاروں،دیاروں،سہاروں،شماروںadmin

جون ایلیا ۔ غزل نمبر 225

یارو نگہ یار کو ، یاروں سے گلہ ہے

خونیں جگروں ، سینہ فگاروں سے گلہ ہے

جاں سے بھی گئے ، بات بھی جاناں کی نہ سمجھی

جاناں کو بہت عشق کے ماروں سے گلہ ہے

اب وصل ہو یا ہجر ، نہ اب تک بسر آیا

اک لمحہ ، جسے لمحہ شماروں سے گلہ ہے

اڑتی ہے ہر اک شور کے سینے سے خموشی

صحراؤں پر شور دیاروں سے گلہ ہے

بیکار کی اک کارگزاری کے حسابوں

بیکار ہوں اور کار گزاروں سے گلہ ہے

میں آس کی بستی میں گیا تھا سو یہ پایا

جو بھی ہے اسے اپنے سہاروں سے گلہ ہے

بے فصل اشاروں سے ہوا خون جنوں کا

ان شوخ نگاہوں کے اشاروں سے گلہ ہے

جون ایلیا

دل کواب دل دہی سے خطرہ ہے

اکتوبر 23, 2015Jaun Elia،جون ایلیا،شعراء،غزلہی،لبی،مجھی،مصحفی،نمی،چاندنی،کمی،گہی،آدمی،امروہوی،دہی،سانولی،سبھیadmin

جون ایلیا ۔ غزل نمبر 224

عیشِ اُمید ہی سے خطرہ ہے

دل کواب دل دہی سے خطرہ ہے

ہے کچھ ایسا کہ اس کی جلوت میں

ہمیں اپنی کمی سے خطرہ ہے

جس کے آغوش کا ہوں دیوانہ

اس کے آغوش ہی سے خطرہ ہے

یاد کی دھوپ تو ہے روز کی بات

ہاں مجھے چاندنی سے خطرہ ہے

ہے عجب کچھ معاملہ درپیش

عقل کو آ گہی سے خطرہ ہے

شہر غدار جان لے کہ تجھے

ایک امروہوی سے خطرہ ہے

ہے عجب طورِ حالتِ گریہ

کہ مژہ کو نمی سے خطرہ ہے

حال خوش لکھنو کا دلّی کا

بس انہیں مصحفی سے خطرہ ہے

آسمانوں میں ہے خدا تنہا

اور ہر آدمی سے خطرہ ہے

میں کہوں کس طرح یہ بات اس سے

تجھ کو جانم مجھی سے خطرہ ہے

آج بھی اے کنارِ بان مجھے

تیری اک سانولی سے خطرہ ہے

ان لبوں کا لہو نہ پی جاؤں

اپنی تشنہ لبی سے خطرہ ہے

جون ہی تو ہے جون کے درپے

میر کو میر ہی سے خطرہ ہے

اب نہیں کوئی بات خطرے کی

اب سبھی کو سبھی سے خطرہ ہے

جون ایلیا

جو گئی پلک تلک تھا وہ خیال اب نہیں ہے

اکتوبر 23, 2015Jaun Elia،جون ایلیا،شعراء،غزلملال،مثال،خیال،سوال،سال،غزالadmin

جون ایلیا ۔ غزل نمبر 223

کسی حال میں نہیں ہوں کوئی حال اب نہیں ہے

جو گئی پلک تلک تھا وہ خیال اب نہیں ہے

میں سکون پا سکوں گا یہ گماں بھی کیوں کیا تھا

ہے یہی ملال کیا کم کہ ملال اب نہیں ہے

نہ رہے اب اس کے دل میں خلشِ شکستِ وعدہ

کہ یہاں کوئی حسابِ مہ و سال اب نہیں ہے

یہ دیارِ دید کیا ہے گئے دشتِ دل سے بھی ہم

کہ ختن زمین میں بھی وہ غزال اب نہیں ہے

جو لیے لیے پھری ہے تجھے روز اک نگر میں

مرے دل ترے نگر میں وہ مثال اب نہیں ہے

لبِ پُرسوال لے کے ہمیں کُوبہ کُو ہے پِھرنا

ہو کوئی جواب برلب یہ سوال اب نہیں ہے

جون ایلیا

کس نے عذاب جاں سہا کون عذاب جاں میں ہے

اکتوبر 23, 2015Jaun Elia،جون ایلیا،شعراء،غزلہاں،گزشتگاں،آسماں،اماں،امتحاں،جاں،دلاں،زماںadmin

جون ایلیا ۔ غزل نمبر 222

ایک گماں کا حال ہے اور فقط گماں میں ہے

کس نے عذاب جاں سہا کون عذاب جاں میں ہے

لمحہ بہ لمحہ دم بہ دم آن بہ آن رم بہ رم

میں بھی گزشتگاں میں ہوں تو بھی گزشتگاں میں ہے

آدم و ذات کبریا کرب میں ہیں جدا جدا

کیا کہوں ان کا ماجرا جو بھی ہے امتحاں میں ہے

شاخ سے اڑ گیا پرند ہے دل شام درد مند

صحن میں ہے ملال سا حزن سا آسماں میں ہے

خودمیں بھی بےاماں ہوں میں،تجھ میں بھی بےاماں ہوں میں

کون سہے گا اس کا غم وہ جو مری اماں میں ہے

کیسا حساب کیا حساب حالت حال ہے عذاب

زخم نفس نفس میں ہے زہر زماں زماں میں ہے

اس کا فراق بھی زیاں اس کا وصال بھی زیاں

ایک عجیب کشمکش حلقہ بے دلاں میں ہے

بود نبود کا حساب میں نہیں جانتا مگر

سارے وجود کی نہیں میرے عدم کی ہاں میں ہے

جون ایلیا

اُس کی خوشبو، نفس نفس میں ہے

اکتوبر 23, 2015Jaun Elia،جون ایلیا،شعراء،غزلہوس،قفس،نفس،بس،جرس،دسترسadmin

جون ایلیا ۔ غزل نمبر 221

اب جنوں کب کسی کے بس میں ہے

اُس کی خوشبو، نفس نفس میں ہے

حال اس صید کا سنایئے کیا ؟

جس کا صیاد خود قفس میں ہے

کیا ہے گر زندگی کا بس نہیں چلا

زندگی کب کسی کے بس میں ہے

غیر سے رہیو تُو ذرا ہشیار

وہ ترے جسم کی ہوس میں ہے

پاشکستہ پڑا ہوں مگر

دل کسی نغمہِ جرس میں ہے

جون ہم سب کی دسترس میں ہیں

وہ بھلا کس کی دسترس میں ہے

جون ایلیا

از زمیں تا بہ آسماں خوں ہے

اکتوبر 23, 2015Jaun Elia،جون ایلیا،شعراء،غزلفشاں،میزبان،نمازیاں،چکا،کشاں،گلستاں،گرفتگاں،آسماں،امتحاں،تہاں،درمیاں،رائیگاں،رخاںadmin

جون ایلیا ۔ غزل نمبر 220

زیرِ محراب ابرواں خوں ہے

از زمیں تا بہ آسماں خوں ہے

ایک بسمل کا رقصِ رنگ تھا آج

سرِ مقتل جہاں تہاں خوں ہے

زخم کے خرمنوں کا مژدہ ہو

آب۔ کشت بلا کشاں خوں ہے

سادہ پوشانِ عیدِ شوق، نوید

آبِ حوض نمازیاں خوں ہے

باب ہے حسرتوں کی محنت گاہ

دل یارانہ خوں فشاں خوں ہے

زخم انگیز ہے خراشِ امید

ہے دیدار۔ گل رخاں خوں ہے

ہو گئے باریاب اہل غرض

روئے دہلیز و آسماں خوں ہے

دل خونیں ہے میزباں

عمدہ خوانِ میزبان خوں ہے

فصل آئی ہے رنگِ مستوں کی

تابہ دیوارِ گلستاں خوں ہے

ہر تماشائی مدعی ٹھہرا

پر تو زخمِ خوں چکا خوں ہے

میں ہوں بے داغ دامناں محتاط

نفسِ خوں گرفتگاں خوں ہے

غنچہ ہا زخم، زخم ہا الماس

شبنم باغ امتحاں خوں ہے

اس طرف کوہکن ادھر شیریں

اور دونوں کے درمیاں خوں ہے

بے دلوں کو نہ چھیڑیو کہ یہ قوم

امتِ شوق رائیگاں خوں ہے

جون ایلیا

با صد ہزار رنگ، وہ بے غازہ ہے، سو ہے

اکتوبر 23, 2015Jaun Elia،جون ایلیا،شعراء،غزلآوازہ،تازہ،خمیازہ،دروازہ،طنازہ،غمّازہ،غازہadmin

جون ایلیا ۔ غزل نمبر 219

بے یک نگاہ بے شوق بھی، اندازہ ہے، سو ہے

با صد ہزار رنگ، وہ بے غازہ ہے، سو ہے

ہوں شامِ حال یک طرفہ کا امیدِ مست

دستک؟ سو وہ نہیں ہے، پہ دروازہ ہے، سو ہے

آواز ہوں جو ہجرِ سماعت میں ہے سکوت

پر اس سکوت پر بھی اک آوازہ ہے، سو ہے

اک حالتِ جمال پر جاں وارنے کو ہوں

صد حالتی میری، میری طنازہ ہے، سو ہے

شوقِ یقیں گزیدہ ہے اب تک یقیں مرا

یہ بھی کسی گمان کا خمیازہ ہے، سو ہے

ا خلوتِ وصال میں یہ حسرتِ وصال

اک خواہشِ وصال کی غمّازہ ہے، سو ہے

تھی یک نگاہِ شوق میری تازگی رُبا

اپنے گماں میں اب بھی کوئی تازہ ہے، سو ہے

جون ایلیا

ہے آگ جامہ زیب۔۔دھواں بے لباس ہے

اکتوبر 23, 2015Jaun Elia،جون ایلیا،شعراء،غزلہوں۔۔فغاں،مکاں،کہاں،جہاں،جاں،رواں،زیاں،زیب۔۔دھواںadmin

جون ایلیا ۔ غزل نمبر 218

بخشش ہوا یقین۔۔گماں بے لباس ہے

ہے آگ جامہ زیب۔۔دھواں بے لباس ہے

ہے یہ فضا ہزار لباسوں کا اک لباس

جو بے لباس ہے وہ کہاں بے لباس ہے

ملبوس تار تارِ نفس ہے زیانِ سود

سُودِ زیان یہ ہے کہ زیاں بے لباس ہے

محمل نشینِ رنگ! کوئی پوستینِ رنگ

ریگِ رواں ہوں۔۔ریگِ رواں بے لباس ہے

اب پارہ پارہ پوششِ گفتار بھی نہیں

ہیں سانس بے رفو سو زیاں بے لباس ہے

صد جامہ پوش جس کا ہے جسم برہنہ ابھی

خلوت سرائے جاں میں وہ جاں بے لباس ہے

ہے دل سے ہر نفس ہوسِ دید کا سوال

خلوت ہے وہ کہاں۔۔وہ جہاں بے لباس ہے

ہے بُود اور نبود میں پوشش نہ پیرہن

یاراں مکین کیا کہ مکاں بے لباس ہے

تُو خود ہی دیکھ رنگِ بدن اپنا جوش رنگ

تُو اپنے ہر لباس میں جاں بے لباس ہے

غم کی برہنگی کو کہاں سے جُڑے لباس

میں لب سیے ہوئے ہوں۔۔فغاں بے لباس ہے

جون ایلیا

زندگی اک زیاں کا دفتر ہے

اکتوبر 23, 2015Jaun Elia،جون ایلیا،شعراء،غزلہاں،کہاں،گماں،آئیندگاں،آسماں،جاں،داستاں،زیاںadmin

جون ایلیا ۔ غزل نمبر 217

نہ تو دل کا نہ جاں کا دفتر ہے

زندگی اک زیاں کا دفتر ہے

پڑھ رہا ہوں میں کاغذاتِ وجود

اور نہیں اور ہاں کا دفتر ہے

کوئی سوچے تو سوزِ کربِ جاں

سارا دفتر گماں کا دفتر ہے

ہم میں سے کوئی تو کرے اصرار

کہ زمیں، آسماں کا دفتر ہے

ہجر تعطیلِ جسم و جاں ہے میاں

وصل، جسم اور جاں کا دفتر ہے

ہے جو بود اور نبود کا دفتر

آخرش یہ کہاں کا دفتر ہے

جو حقیقت ہے دم بدم کی یاد

وہ تو اک داستاں کا دفتر ہے

ہو رہا ہے گزشتگاں کا حساب

اور آئیندگاں کا دفتر ہے

جون ایلیا

کہ مجھ کو یاد فرمایا گیا ہے

اکتوبر 23, 2015Jaun Elia،جون ایلیا،شعراء،غزلیاد،آزاد،افتاد،ایجاد،بنیاد،برباد،داد،شادadmin

جون ایلیا ۔ غزل نمبر 216

بجا ارشاد فرمایا گیا ہے

کہ مجھ کو یاد فرمایا گیا ہے

عنایت کی ہیں ناممکن امدیں

کرم ایجاد فرمایا گیا ہے

ہیں ہم اب اور زد ہے حادثوں کی

ہمیں آزاد فرمایا گیا ہے

ذرا اس کی پراحوالی تو دیکھیں

جسے برباد فرمایا گیا ہے

نسیمِ سبزگی تھے ہم، سو ہم کو

غبار افتاد فرمایا گیا ہے

سند بخشی ہے عشقِ بے غرض کی

بہت ہی شاد فرمایا گیا ہے

سلیقے کو لبِ فریاد تیرے

ادا کی داد فرمایا گیا ہے

کہاں ہم اور کہاں حسنِ سرِ بام

ہمیں بنیاد فرمایا گیا ہے

جون ایلیا

سو پیہم گنگنایا جا رہا ہے

اکتوبر 23, 2015Jaun Elia،جون ایلیا،شعراء،غزللایا،مسکرایا،گنوایا،گنگنایا،بُھلایا،بِچھایا،جلایا،جایاadmin

جون ایلیا ۔ غزل نمبر 215

گِلے سے باز آیا جا رہا ہے

سو پیہم گنگنایا جا رہا ہے

نہیں مطلب کسی پہ طنز کرنا

ہنسی میں مسکرایا جا رہا ہے

وہاں اب میں کہاں اب تو وہاں سے

مرا سامان لایا جا رہا ہے

عجب ہے ایک حالت سی ہوا میں

ہمیں جیسے گنوایا جا رہا ہے

اب اس کا نام بھی کب یاد ہو گا

جسے ہر دَم بُھلایا جا رہا ہے

چراغ اس طرح روشن کر رہا ہوں

کہ جیسے گھر جلایا جا رہا ہے

بَھلا تم کب چلے تھے یوں سنبھل کر

کہاں سے اُٹھ کے جایا جا رہا ہے

تو کیا اب نیند بھی آنے لگی ہے

تو بستر کیوں بِچھایا جا رہا ہے

جون ایلیا

رہیو بہم خود میں یہاں، شہر بگولوں کا ہے

اکتوبر 23, 2015Jaun Elia،جون ایلیا،شعراء،غزلمیاں،مکاں،یہاں،کہاں،گماں،آندھیاں،آشفتگاں،درمیاں،زیاںadmin

جون ایلیا ۔ غزل نمبر 214

اے نفس آشفتگاں! شہر بگولوں کا ہے

رہیو بہم خود میں یہاں، شہر بگولوں کا ہے

دھول ہے ساری زمیں، دھند ہے سب آسماں

شکل کی صورت کہاں؟ شہر بگولوں کا ہے

گرد کی شکلیں سی دو ہونے کو ہیں ہمکنار

بیچ میں ہیں آندھیاں، شہر بگولوں کا ہے

گرد ہیں تعمیر کی ساری فلک بوسیاں

گرد میں ہوُ کا مکاں، شہر بگولوں کا ہے

ہیں اسی دم رُوبرُو، پھر نہ کوئی میں نہ توُ

اُس پہ وعدے بھی جاں ؟ شہر بگولوں کا ہے

اب سے ہے جو اب تلک، سود میں ہے وہ پلک

کس کا زیاں، کیا زیاں، شہر بگولوں کا ہے

ایک نفس ہی سہی، اس کی ہوس ہی سہی

رشتہ ہو اک درمیاں، شہر بگولوں کا ہے

دھند ہے بکھراو ہے، دھول ہے اندھیاو ہے

خود سے لگا چل میاں، شہر بگولوں کا ہے

ہائیں یہ آشفتگی، پائے نہ جاو گے پھر

شہر یہ آشفتگاں، شہر بگولوں کا ہے

وہم گماں کا گماں، عیشِ یقیں ہے یہاں

یہ بھی گماں ہے گماں، شہر بگولوں کا ہے

جون ایلیا

وہ رنگِ رُخ ہے کہ خود غازہ مست رہتا ہے

اکتوبر 23, 2015Jaun Elia،جون ایلیا،شعراء،غزلاندازہ،باندازہ،دروازہ،غازہadmin

جون ایلیا ۔ غزل نمبر 212

مہک سے اپنی گَلِ تازہ مست رہتا ہے

وہ رنگِ رُخ ہے کہ خود غازہ مست رہتا ہے

نگاہ سے کبھی گزرا نہیں وہ مست انداز

مگر خیال سے، اندازہ مست رہتا ہے

کہاں سے ہے رَسدِ نشہ، اس کی خلوت میں

کہ رنگ مست کا اندازہ مست رہتا ہے

یہاں کبھی کوئی آیا نہیں مگر سرِ شام

بس اک گمان سے دروازہ مست رہتا ہے

مجھے خیال کی مستی میں کس کا اندازہ

خدا نہیں جو باندازہ مست رہتا ہے

جون ایلیا

میرے دل سے غبار اٹھتا ہے

اکتوبر 23, 2015Jaun Elia،جون ایلیا،شعراء،غزلہزار،نثار،وار،یار،کوہسار،پیار،پکار،اعتبار،بار،خاکسار،غبارadmin

جون ایلیا ۔ غزل نمبر 211

بزم سے جب نگار اٹھتا ہے

میرے دل سے غبار اٹھتا ہے

میں جو بیٹھا ہوں تو وہ خوش قامت

دیکھ لو! بار بار اٹھتا ہے

تیری صورت کو دیکھ کر مری جاں

خود بخود دل میں پیار اٹھتا ہے

اس کی گُل گشت سے روش بہ روش

رنگ ہی رنگ یار اٹھتا ہے

تیرے جاتے ہی اس خرابے سے

شورِ گریہ ہزار اٹھتا ہے

کون ہے جس کو جاں عزیز نہیں؟

لے ترا جاں نثار اٹھتا ہے

صف بہ صف آ کھڑے ہوئے ہیں غزال

دشت سے خاکسار اٹھتا ہے

ہے یہ تیشہ کہ ایک شعلہ سا

بر سرِ کوہسار اٹھتا ہے

کربِ تنہائی ہے وہ شے کہ خدا

آدمی کو پکار اٹھتا ہے

تو نے پھر کَسبِ زَر کا ذکر کیا

کہیں ہم سے یہ بار اٹھتا ہے

لو وہ مجبورِ شہر صحرا سے

آج دیوانہ وار اٹھتا ہے

اپنے ہاں تو زمانے والوں کا

روز ہی اعتبار اٹھتا ہے

جون اٹھتا ہے، یوں کہو، یعنی

میر و غالب کا یار اٹھتا ہے

جون ایلیا

ساری دنیا فقط کہانی ہے

اکتوبر 23, 2015Jaun Elia،جون ایلیا،شعراء،غزلفانی،مانی،کہانی،کمانی،گنوانی،پرانی،آزمانی،داستانیadmin

جون ایلیا ۔ غزل نمبر 210

دل کو اک بات کہہ سنانی ہے

ساری دنیا فقط کہانی ہے

تو میری جان داستان تھا کبھی

اب تیرا نام داستانی ہے

سہہ چکے زخمِ التفات تیرا

اب تیری یاد آزمانی ہے

اک طرف دل ہے، اک طرف دنیا

یہ کہانی بہت پرانی ہے

تھا سوال ان کی اداس آنکھوں کا

زندگی کیا نہیں گنوانی ہے

کیا بتاؤں میں اپنے پاسِ انا

میں نے ہنس ہنس کر ہار مانی ہے

ہوس انگیز ہے بدن میرا

ہائے میری ہوس کہ فانی ہے

زندگی کس طرح سے گزاروں میں

مجھ کو روزی نہیں کمانی ہے

جون ایلیا

باقی کو کیا کرنا ہے

اکتوبر 23, 2015Jaun Elia،جون ایلیا،شعراء،غزلچرچا،ڈرنا،کرنا،گزرنا،اُبھرنا،اترنا،بکھرنا،بھرنا،سُدھرناadmin

جون ایلیا ۔ غزل نمبر 209

مجھ کو تو گِر کے مرنا ہے

باقی کو کیا کرنا ہے

شہر ہے چہروں کی تمثیل

سب کا رنگ اترنا ہے

وقت ہے وہ ناٹک جس میں

سب کو ڈرا کر ڈرنا ہے

میرے نقشِ ثانی کو

مجھ میں ہی سے اُبھرنا ہے

کیسی تلافی کیا تدبیر

کرنا ہے اور بھرنا ہے

جو نہیں گزرا ہے اب تک

وہ لمحہ تو گزرنا ہے

اپنے گماں کا رنگ تھا میں

اب یہ رنگ بکھرنا ہے

ہم دو پائے ہیں سو ہمیں

میز پہ جا کر چرنا ہے

چاہے ہم کچھ بھی کر لیں

ہم ایسوں کو سُدھرنا ہے

ہم تم ہیں اک لمحہ کے

پھر بھی وعدہ کرنا ہے

جون ایلیا

زندگی حالتِ جدائی ہے

اکتوبر 23, 2015Jaun Elia،جون ایلیا،شعراء،غزلوفائی،کمائی،کھائی،پائی،آئی،بھلائی،جدائیadmin

جون ایلیا ۔ غزل نمبر 208

لمحے لمحے کی نارسائی ہے

زندگی حالتِ جدائی ہے

مردِ میدان ہوں اپنی ذات کا میں

میں نے سب سے شکست کھائی ہے

اک عجب حال ہے کہ اب اس کو

یاد کرنا بھی بے وفائی ہے

اب یہ صورت ہے جانِ جاں کہ تجھے

بھولنے میں مری بھلائی ہے

خود کو بھولا ہوں، اُس کو بھولا ہوں

عمر بھر کی یہی کمائی ہے

میں ہنر مندِ رنگ ہوں میں نے

خون تھوکا ہے داد پائی ہے

جانے یہ تیرے وصل کے ہنگام

تیری فرقت کہاں سے آئی ہے

جون ایلیا

وصل ہے اور فراق طاری ہے

اکتوبر 23, 2015Jaun Elia،جون ایلیا،شعراء،غزلواری،گزاری،انتطاری،تمھاری،سواری،طاریadmin

جون ایلیا ۔ غزل نمبر 207

بے قراری سی بے قراری ہے

وصل ہے اور فراق طاری ہے

جو گزاری نہ جا سکی ہم سے

ہم نے وہ زندگی گزاری ہے

بن تمہارے کبھی نہیں آئی

کیا مری نیند بھی تمھاری ہے

اس سے کہیو کہ دل کی گلیوں میں

رات دن تیری انتطاری ہے

ایک مہک سمت دل سے آئی تھی

میں یہ سمجھا تری سواری ہے

خوش رہے تو کہ زندگی اپنی

عمر بھر کی امید واری ہے

جون ایلیا

بس اک دیوار ہے اور بے دری ہے

اکتوبر 23, 2015Jaun Elia،جون ایلیا،شعراء،غزلہری،نوکری،بہتری،بھری،دریadmin

جون ایلیا ۔ غزل نمبر 206

گماں کی اک پریشاں منظری ہے

بس اک دیوار ہے اور بے دری ہے

اگرچہ زہر ہے دنیا کی ہر بات

میں پی جاؤں اسی میں بہتری ہے

تُو اے بادِ خزاں اس گُل سے کہیو

کہ شاخ اُمید کی اب تک ہری ہے

گلی میں اس نگارِ ناشنو کی

فغاں کرنا ہماری نوکری ہے

کوئی لہکے خیابانِ صبا میں

یہاں تو آگ سینے میں بھری ہے

جون ایلیا

کہ ہر نفس، نفسِ آخرِ بہاراں ہے

اکتوبر 23, 2015Jaun Elia،جون ایلیا،شعراء،غزلنگاراں،نامداراں،یاراں،بہاراں،داراں،رازداراں،سوگواراںadmin

جون ایلیا ۔ غزل نمبر 205

غبارِ محمل گل پر ہجوم یاراں ہے

کہ ہر نفس، نفسِ آخرِ بہاراں ہے

بتاؤ وجد کروں یا لبِ سخن کھولوں

ہوں مستِ راز اور انبوہ رازداراں ہے

مٹا ہوا ہوں شباہت پہ نامداروں کی

چلا ہوں کہ یہی وضعِ نامداراں ہے

چلا ہوں پھر سرِ کوئے دراز مژگاں

مرا ہنر زخم تازہ داراں ہے

یہی وقت کہ آغوش دار رقص کروں

سرورِ نیم شبی ہے صفِ نگاراں ہے

ہوا ہے وقت کہیں سے علیم کو لاؤ

ہے ایک شخص جو کمبخت یارِ یاراں ہے

فراق یار کو ٹھیرا لیا ہے عذرِ ہوس

کوئی بتاؤ یہی رسمِ سوگواراں ہے

جون ایلیا

میرا اک زخم شام کرتا ہے

اکتوبر 23, 2015Jaun Elia،جون ایلیا،شعراء،غزلکرتا،گزرتا،بھرتا،سنورتا،سُدھرتا،سدھرتاadmin

جون ایلیا ۔ غزل نمبر 204

رنگ بادِ صبا میں بھرتا ہے

میرا اک زخم شام کرتا ہے

سب یہی پوچھتے ہیں مجھ سے کہ تو

کیوں سدھارے نہیں سدھرتا ہے

روز شام و سحر کی راہوں سے

ایک انبوہ کیوں گزرتا ہے ؟

آئینے تیرے سامنے وہ شخص

اب بھلا کیوں نہیں سنورتا ہے

ایلیا جون کچھ نہیں کرتا

صرف خوشبو میں رنگ بھرتا ہے

جون ایلیا

دھوپ آنگن میں پھیل جاتی ہے

اکتوبر 23, 2015Jaun Elia،جون ایلیا،شعراء،غزلہلاتی،آتی،اڑاتی،جگاتی،جاتی،دکھاتی،ستاتیadmin

جون ایلیا ۔ غزل نمبر 203

ایک ہی مژدہ صبح لاتی ہے

دھوپ آنگن میں پھیل جاتی ہے

رنگ موسم ہے اور باد صبا

شہر کوچوں میں خاک اڑاتی ہے

فرش پر کاغذ اڑتے پھرتے ہیں

میز پر گرد جمتی جاتی ہے

سوچتا ہوں کہ اس کی یاد آخر

اب کسے رات بھر جگاتی ہے

میں بھی اذن نواگری چاہوں

بے دلی بھی تو لب ہلاتی ہے

سو گئے پیڑ جاگ اٹھی خوشبو

زندگی خواب کیوں دکھاتی ہے

اس سراپا وفا کی فرقت میں

خواہش غیر کیوں ستاتی ہے

آپ اپنے سے ہم سخن رہنا

ہمنشیں! سانس پھول جاتی ہے

کیا ستم ہے کہ اب تری صورت

غور کرنے پہ یاد آتی ہے

کون اس گھر کی دیکھ بھال کرے

روز اک چیز ٹوٹ جاتی ہے

جون ایلیا

تیرے ساتھ تری یاد آئی، تو کیا سچ مچ آئی ہے

اکتوبر 23, 2015Jaun Elia،جون ایلیا،شعراء،غزلہرجائی،کائی،پہنچائی،آئی،اڑائی،آئی،بنائی،شرمائیadmin

جون ایلیا ۔ غزل نمبر 202

تو بھی چپ ہے، میں بھی چپ ہوں، یہ کیسی تنہائی ہے

تیرے ساتھ تری یاد آئی، تو کیا سچ مچ آئی ہے

شاید وہ دن پہلا دن تھا، پلکیں بوجھل ہونے کا

مجھ کو دیکھتے ہی اس کی انگڑائی شرمائی ہے

اس دن پہلی بار ہوا تھا مجھ کو رفاقت کا احساس

جب اس کے ملبوس کی خوشبو گھر پہنچانے آئی ہے

حسن سے عرضِ شوق نہ کرنا حسن کو زک پہنچانا ہے

ہم نے عرضِ شوق نہ کر کے حسن کو زک پہنچائی ہے

ہم کو اور تو کچھ نہیں سوجھا البتہ اس کے دل میں

سوزِ رفاقت پیدا کر کے اس کی نیند اڑائی ہے

ہم دونوں مل کر بھی دلوں کی تنہائی میں بھٹکیں گے

پاگل کچھ تو سوچ یہ تو نے کیسی شکل بنائی ہے

عشقِ پیچاں کی صندل پر جانے کس دن بیل چڑھے

کیاری میں پانی ٹھیرا ہے، دیواروں پر کائی ہے

حسن کے جانے کتنے چہرے، حسن کے جانے کتنے نام

عشق کا پیشہ حسن پرستی، عشق بڑا ہرجائی ہے

آج بہت دن بعد میں اپنے کمرے تک آ نکلا تھا

جوں ہی دروازہ کھولا ہے اس کی خوشبو آئی ہے

ایک تو اتنا حبس ہے پھر میں سانسیں روک کے بیٹھا ہوں

ویرانی نے جھاڑو دے کر گھر کی دھول اڑائی ہے

جون ایلیا

یہ تو آشوب ناک صورت ہے

اکتوبر 23, 2015Jaun Elia،جون ایلیا،شعراء،غزلفرصت،وحشت،اذیت،خوبصورت،سلامت،شکایت،صورت،ضرورت،عادت،غنیمتadmin

جون ایلیا ۔ غزل نمبر 201

کوئی حالت نہیں یہ حالت ہے

یہ تو آشوب ناک صورت ہے

انجمن میں کیا یہ میری خاموشی

بردباری نہیں ہے وحشت ہے

طنز پیرایہ ءِ تبسم میں

اس تکلف کی کیا ضرورت ہے

تجھ سے یہ گا ہ گاہ کا شکوہ

جب تلک ہے بسا غنیمت ہے

گرم جوشی اور اس قدر کیا بات!

کیا تمہیں مجھ سے کچھ شکایت ہے

تو بھی اے شخص کیا کرے آخر

مجھ کو سر پھوڑنے کی عادت ہے

اب نکل آؤ اپنے اندر سے

گھر میں سامان کی ضرورت ہے

ہم نے جانا تو ہم نے یہ جانا

جو نہیں ہے وہ خوبصورت ہے

خواہشیں دل کا ساتھ چھوڑ گئیں

یہ اذیت بڑی اذیت ہے

لوگ مصروف جانتے ہیں مجھے

ہاں مرا غم ہی میری فرصت ہے

آج کا دن بھی عیش سے گذرا

سر سے پا تک بدن سلامت ہے

جون ایلیا

کیاری میں پانی ٹھہرا ھے دیواروں پر کائی ہے

اکتوبر 23, 2015Jaun Elia،جون ایلیا،شعراء،غزلکائی،ھرجائی،آئی،اڑائیadmin

جون ایلیا ۔ غزل نمبر 200

عشق پیچاں کی صندل پر جانے کس دن بیل چڑھے

کیاری میں پانی ٹھہرا ھے دیواروں پر کائی ہے

حسن کے جانے کتنے چہرے حسن کے جانے کتنے نام

عشق کا پیشہ حسن پرستی عشق بڑا ھرجائی ہے

آج بہت دن بعد میں اپنے کمرے تک آ نکلا تھا

جوں ھی دروازہ کھولا ھے اس کی خوشبو آئی ہے

ایک تو اتنا حبس ھے پھر میں سانسیں روکے بیٹھا ہوں

ویرانی نے جھاڑو دے کے گھر میں دھول اڑائی ہے

جون ایلیا

تیرے بدن کی جدائی بہت ستاتی ہے

اکتوبر 23, 2015Jaun Elia،جون ایلیا،شعراء،غزلآتی،بلاتی،ستاتیadmin

جون ایلیا ۔ غزل نمبر 199

کسی لباس کی خوشبو جب اڑ کے آتی ہے

تیرے بدن کی جدائی بہت ستاتی ہے

ترے گلاب ترستے ہیں تیری خوشبو کو

تیری سفید چنبیلی تجھے بلاتی ہے

تیرے بغیر مجھے چین کیسے پڑتا

مرے بغیر تجھے نیند کیسے آتی ہے

جون ایلیا

بس کوئی دم نہ بھرنے والے تھے

اکتوبر 23, 2015Jaun Elia،جون ایلیا،شعراء،غزلمرنے،بکھرنے،بھرنے،سنوارنےadmin

جون ایلیا ۔ غزل نمبر 198

وہ جو کیا کچھ نہ کرنے والے تھے

بس کوئی دم نہ بھرنے والے تھے

تھے گلے اور گرد باد کی شام

اور ہم سب بکھرنے والے تھے

وہ جو آتا تو اس کی خوشبو میں

آج ہم رنگ بھرنے والے تھے

صرف افسوس ہے یہ طنز نہیں

تم نہ سنوارے ، سنوارنے والے تھے

یوں تو مرنا ہے اک بار مگر

ہم کئی بار مرنے والے تھے

جون ایلیا

بلا کی حالتِ شوریدگی میں آئے تھے

اکتوبر 23, 2015Jaun Elia،جون ایلیا،شعراء،غزلکمی،زندگی،سبزگی،سرخوشی،شوریدگی،صدیadmin

جون ایلیا ۔ غزل نمبر 197

وہ اہلِ حال جو خود رفتگی میں آئے تھے

بلا کی حالتِ شوریدگی میں آئے تھے

کہاں گئے کبھی ان کی خبر تو لے ظالم

وہ بےخبر جو تیری زندگی میں آئے تھے

گلی میں اپنی گِلہ کر ہمارے آنے کا

کہ ہم خوشی میں نہیں سرخوشی میں آئے تھے

کہاں چلے گئے اے فصلِ رنگ و بُو وہ لوگ

جو زرد زرد تھے اور سبزگی میں آئے تھے

نہیں ہے جن کے سبب اپنی جانبری ممکن

وہ زخم ہم کو گزشتہ صدی میں آئے تھے

تمہیں ہماری کمی کا خیال کیوں آتا

ہزار حیف ہم اپنی کمی میں آئے تھے

جون ایلیا

پاؤں پھسلا تو آسمان میں تھے

اکتوبر 23, 2015Jaun Elia،جون ایلیا،شعراء،غزلچٹان،آسمان،اُڑان،اُٹھان،دھیان،درمیان،شانadmin

جون ایلیا ۔ غزل نمبر 196

ہم کو سودا تھا سر کے مان میں تھے

پاؤں پھسلا تو آسمان میں تھے

ہے ندامت لہو نہ رویا دل

زخم دل کے کسی چٹان میں تھے

میرے کتنے ہی نام اور ہم نام

میرے اور میرے درمیان میں تھے

میرا خود پر سے اِعتماد اُٹھا

کتنے وعدے مری اُٹھان میں تھے

تھے عجب دھیان کے در و دیوار

گرتے گرتے بھی اپنے دھیان میں تھے

واہ! اُن بستیوں کے سنّاٹے

سب قصیدے ہماری شان میں تھے

آسمانوں میں گر پڑے یعنی

ہم زمیں کی طرف اُڑان میں تھے

جون ایلیا

ہم میں کچھ دلدار تھے ہم کون تھے ہم کون تھے

اکتوبر 23, 2015Jaun Elia،جون ایلیا،شعراء،غزلہم،آزار،بیزار،دلدار،دشوارadmin

جون ایلیا ۔ غزل نمبر 195

ہم جان و دل سے یار تھے ہم کون تھے ہم کون تھے

ہم میں کچھ دلدار تھے ہم کون تھے ہم کون تھے

آسان تھے سب کے لیئے جیسے سخن لب کے لئے

اپنے لئے دشوار تھے ہم کون تھے ہم کون تھے

اپنے سے ہم کو بیر تھا، خود اپنا آپا غیر تھا

اپنے سے ہم بیزار تھے ہم کون تھے ہم کون تھے

ہم کون تھے ہم کون تھے ، اندر سے تھےگلزار ہم

باہر سے ہم تھے ہم کون تھے ہم کون تھے

رنگیں اداؤں کے لئے، شیریں نواؤں کے لئے

ہم سر بہ سر آزار تھے ہم کون تھے ہم کون تھے

جون ایلیا

وہ خون بھی تھوکے گا تو پرواہ نہ کریں گے

اکتوبر 23, 2015Jaun Elia،جون ایلیا،شعراء،غزلپرواہ،اچھا،انشا،بالا،جھگڑاadmin

جون ایلیا ۔ غزل نمبر 194

سوچا ہے کہ اب کارِ مسیحا نہ کریں گے

وہ خون بھی تھوکے گا تو پرواہ نہ کریں گے

اس بار وہ تلخی ہے کہ روٹھے بھی نہیں ہم

اب کہ وہ کر لیتی ہے کہ جھگڑا نہ کریں گے

یاں اس کے سلیقے کے ہیں آثار تو کیا ہم

اس پر بھی یہ کمرا تہ و بالا نہ کریں گے

اب نغمہ طرازانِ برا فروختہ اے شہر!

واسوخت کہیں گے غزل انشا نہ کریں گے

ایسا ہے کہ سینے میں سلگتی ہیں خراشیں

اب سانس بھی ہم لیں گے تو اچھا نہ کریں گے

جون ایلیا

اب ہم بھی کسی شخص کی پرواہ نہ کریں گے

اکتوبر 23, 2015Jaun Elia،جون ایلیا،شعراء،غزلچہکا،پرواہ،اصلا،تمنا،سوچا،غصہadmin

جون ایلیا ۔ غزل نمبر 193

اخلاق نہ برتیں گے مدارا نہ کریں گے

اب ہم بھی کسی شخص کی پرواہ نہ کریں گے

کچھ لوگ کئی لفظ غلط بول رہے ہیں

اصلاح مگر ہم بھی اب اصلا نہ کریں گے

کم گوئی کہ اک وصف حماقت ہے ہر طور

کم گوئی کو اپنائیں گے چہکا نہ کریں گے

اب سہل پسندی کو بنائیں گے وتیرہ

تا دیر کسی باب میں سوچا نہ کریں گے

غصہ بھی ہے تہذیب تعلق کا طلب گار

ہم چپ ہیں، بھرے بیٹھے ہیں، غصہ نہ کریں گے

کل رات بہت غور کیا ہے سو ہم اے جون

طے کر کے اٹھے ہیں کہ تمنا نہ کریں گے

جون ایلیا

ہر طرف ہو رہی ہے یہی گفتگو، تم کہاں جاؤ گے ہم کہاں جائیں گے

اکتوبر 23, 2015Jaun Elia،جون ایلیا،شعراء،غزللہو،لکھنؤ،کو،گفتگو،آرزو،جستجو،دہو،سبوadmin

جون ایلیا ۔ غزل نمبر 192

ہے بکھرنے کو یہ محفل رنگ و بو، تم کہاں جاؤ گے ہم کہاں جائیں گے

ہر طرف ہو رہی ہے یہی گفتگو، تم کہاں جاؤ گے ہم کہاں جائیں گے

ہر متاع نفس نذر آہنگ کی، ہم کو یاراں ہوس تھی بہت رنگ کی

گل زمیں سے ابلنے کو ہے اب لہو، تم کہاں جاؤ گے ہم کہاں جائیں گے

اول شب کا مہتاب بھی جا چکا صحن میخانہ سے اب افق میں کہیں

آخر شب ہے، خالی ہیں جام و سبو، تم کہاں جاؤ گے، ہم کہاں جائیں گے

کوئی حاصل نہ تھا آرزو کا مگر، سانحہ یہ ہے کہ اب آرزو بھی نہیں

وقت کی اس مسافت میں بے آرزو، تم کہاں جاؤ گے، ہم کہاں جائیں گے

کس قدر دور سے لوٹ کر آئے ہیں، یوں کہو عمر برباد کر آئے ہیں

تھا سراب اپنا سرمایہ جستجو، تم کہاں جاؤ گے، ہم کہاں جائیں گے

اک جنوں تھا کہ آباد ہو شہر جاں، اور آباد جب شہر جاں ہو گیا

ہیں یہ سرگوشیاں در بہ در کو بہ کو، تم کہاں جاؤ گے، ہم کہاں جائیں گے

دشت میں رقص شوق بہار اب کہاں، باد پیمائی دیوانہ وار اب کہاں

بس گزرنے کو ہے موسم ہائے دہو، تم کہاں جاؤ گے، ہم کہاں جائیں گے

ہم ہیں رسوا کن دلی و لکھنؤ ، اپنی کیا زندگی اپنی کیا آبرو

میر دلی سے نکلے گئے لکھنؤ، تم کہاں جاؤ گے، ہم کہاں جائیں گے

جون ایلیا

صرف زندہ رہے ہم تو مر جائیں گے

اکتوبر 23, 2015Jaun Elia،جون ایلیا،شعراء،غزلمر،پر،بکھر،خبرadmin

جون ایلیا ۔ غزل نمبر 191

بےدلی کیا یونہی دن گذر جائیں گے

صرف زندہ رہے ہم تو مر جائیں گے

رقص ہے رنگ پر رنگ ہم رقص ہے

سب بچھڑ جائیں گے، سب بکھر جائیں گے

یہ خراباتیانِ خرد باختہ

صبح ہوتے ہی سب کام پر جائیں گے

کتنے دلکش ہو تم، کتنے دل جو ہیں ہم

کیا ستم ہے کہ ہم لوگ مر جائیں گے

ہے غنیمت کہ اَسرارِ ہستی سے ہم

بے خبر آئیں گے، بے خبر جائیں گے

جون ایلیا

زخم کھاتے چلے گئے ہوں گے

اکتوبر 23, 2015Jaun Elia،جون ایلیا،شعراء،غزللہلہاتے،لڑکھڑاتے،کھاتے،آتے،آزماتے،بھاتےadmin

جون ایلیا ۔ غزل نمبر 190

ہم جو گاتے چلے گئے ہوں گے

زخم کھاتے چلے گئے ہوں گے

تھا ستم بار بار کا ملنا

لوگ بھاتے چلے گئے ہوں گے

دور تک باغ اس کی یادوں کے

لہلہاتے چلے گئے ہوں گے

فکر اپنے شرابیوں کی نہ کر

لڑکھڑاتے چلے گئے ہوں گے

ہم خود آزار تھے سو لوگوں کو

آزماتے چلے گئے ہوں گے

ہم جو دنیا سے تنگ آئے ہیں

تنگ آتے چلے گئے ہوں گے

جون ایلیا

اپنے ہی آپ تک گئے ہوں گے

اکتوبر 23, 2015Jaun Elia،جون ایلیا،شعراء،غزللٹک،چھلگ،کمک،کھٹک،اٹک،بہک،تک،تھک،سمکadmin

جون ایلیا ۔ غزل نمبر 189

گھر سے ہم گھر تلک گئے ہوں گے

اپنے ہی آپ تک گئے ہوں گے

ہم جو اب آدمی ہیں پہلے کبھی

جام ہوں گے چھلگ گئے ہوں گے

وہ بھی اب ہم سے تھک گیا ہو گا

ہم بھی اب اس سے تھک گئے ہوں گے

شب جو ہم سے ہوا معاف کرو

نہیں پی تھی بہک گئے ہوں گے

کتنے ہی لوگ حرص شہرت میں

دار پر خود لٹک گئے ہوں گے

شکر ہے اس نگاہ کم کا میاں

پہلے ہی ہم کھٹک گئے ہوں گے

ہم تو اپنی تلاش میں اکثر

از سما تا سمک گئے ہوں گے

اس کا لشکر جہاں تہاں یعنی

ہم بھی بس بے کمک گئے ہوں گے

جون ، اللہ اور یہ عالم

بیچ میں ہم اٹک گئے ہوں گے

جون ایلیا

پہنچے گی جو نہ اس تک ہم اس خبر میں ہوں گے

اکتوبر 23, 2015Jaun Elia،جون ایلیا،شعراء،غزلنظر،کمر،کھنڈر،گھر،بیشتر،تر،خبر،دَر،سفر،سرadmin

جون ایلیا ۔ غزل نمبر 188

جب ہم کہیں نہ ہوں گے تب شہر بھر میں ہوں گے

پہنچے گی جو نہ اس تک ہم اس خبر میں ہوں گے

تھک کر گریں گے جس دم بانہوں میں تیری آ کر

اُس دَم بھی کون جانے ہم کس سفر میں ہوں گے

اے جانِ عہد و پیماں۔۔ہم گھر بسائیں گے ہاں

تُو اپنے گھر میں ہو گا۔۔ہم اپنے گھر میں ہوں گے

میں لے کے دل کے رشتے گھر سے نکل چکا ہوں

دیوار و دَر کے رشتے۔۔دیوار و دَر میں ہوں گے

تجھ عکس کے سوا بھی اے حُسن وقتِ رخصت

کچھ اور عکس بھی تو اس چشمِ تر میں ہوں گے

ایسے سراب تھے وہ ایسے تھے کچھ کہ اب بھی

میں آنکھ بند کر لوں تب بھی نظر میں ہوں گے

اس کے نقوشِ پا کو راہوں میں ڈھونڈنا کیا

جو اس کے زیر پا تھے وہ میرے سر میں ہوں گے

وہ بیشتر ہیں جن کو کل کا خیال کم ہے

تُو رُک سکے تو ہم بھی ان بیشتر میں ہوں گے

آنگن سے وہ جو پچھلے دالان تک بسے تھے

جانے وہ میرے سائے اب کِس کھنڈر میں ہوں گے

یہ تو کمر عجب ہے اِک سوچ ہے جو اَب ہے

اب جانے ہاتھ میرے کِس کمر میں ہوں گے

جون ایلیا

جانے کیسے لوگ ہوں گے جو اس کو بھاتے ہوں گے

اکتوبر 23, 2015Jaun Elia،جون ایلیا،شعراء،غزلبھاتے،جاتےadmin

جون ایلیا ۔ غزل نمبر 187

کتنے عیش اڑاتے ہوں گے کتنے اتراتے ہوں گے

جانے کیسے لوگ ہوں گے جو اس کو بھاتے ہوں گے

اس کی یاد کی باد صبا میں اور تو کیا ہوتا ہو گا

یوں ہی میرے بال ہیں بکھرے اور بکھر جاتے ہوں گے

یارو! کچھ تو ذکر کرو تم اس کی قیامت بانہوں کا

وہ جو سمٹتے ہوں گے ان میں وہ تو مر جاتے ہوں گے

جون ایلیا

غم تو جانے تھے رائیگاں اُن کے

اکتوبر 23, 2015Jaun Elia،جون ایلیا،شعراء،غزلگماں،آسماں،اماں،خواں،رائیگاںadmin

جون ایلیا ۔ غزل نمبر 186

خود سے رشتے رہے کہاں اُن کے

غم تو جانے تھے رائیگاں اُن کے

مست اُن کو گماں میں رہنے دے

خانہ برباد ہیں گماں اُن کے

یار سُکھ نیند ہو نصیب اُن کو

دُکھ یہ ہے دُکھ ہیں بے اماں اُن کے

کتنی سر سبز تھی زمیں اُن کی

کتنے نیلے تھے آسماں اُن کے

نوحہ خوانی ہے کیا ضرور انہیں

ان کے نغمے ہیں نوحہ خواں اُن کے

جون ایلیا

یہ ہنر کِس کو دکھایا میں نے

اکتوبر 23, 2015Jaun Elia،جون ایلیا،شعراء،غزلڈھونڈا،کیا،گزارا،اِکھٹا،دیکھا،دکھایا،سمجھاadmin

جون ایلیا ۔ غزل نمبر 185

کر لیا خود کو جو تنہا میں نے

یہ ہنر کِس کو دکھایا میں نے

وہ جو تھا اس کو مِلا کیا مجھ سے

اس کو تو خواب ہی سمجھا میں نے

دل جلانا کوئی حاصل تو نہ تھا

آخرِ کار کیا کیا میں نے

دیکھ کر اس کو ہُوا مست ایسا

پھر کبھی اسکو نہ دیکھا میں نے

شوقِ منزل تھا بُلاتا مجھ کو

راستہ تک نہیں ڈھونڈا میں نے

اک پلک تجھ سے گزر کر ، تاعمر

خود ترا وقت گزارا میں نے

اب کھڑا سوچ رہا ہوں لوگو!

کیوں کیا تم کو اِکھٹا میں نے

جون ایلیا

وہ کون تھا جسے دیکھا نہیں کبھی میں نے

اکتوبر 23, 2015Jaun Elia،جون ایلیا،شعراء،غزللی،لکھی،کی،کبھی،پروری،تھی،جی،رکھی،رخی،سنیadmin

جون ایلیا ۔ غزل نمبر 184

گنوائی کس کی تمنا میں زندگی میں نے

وہ کون تھا جسے دیکھا نہیں کبھی میں نے

ترا خیال تو ہے پر ترا وجود نہیں

ترے لئے تو یہ محفل سجائی تھی میں نے

ترے عدم کو گوارا نہ تھا وجود مرا

سو اپنی بیخ کنی میں کمی نہ کی میں نے

ہیں تیری ذات سے منسوب صد فسانہ ءِ عشق

اور ایک سطر بھی اب تک نہیں لکھی میں نے

خود اپنے عشوہ و انداز کا شہید ہوں میں

خود اپنی ذات سے برتی ہے بے رخی میں نے

مرے حریف مری یکہ تازیوں پہ نثار

تمام عمر حلیفوں سے جنگ کی میں نے

خراشِ نغمہ سے سینہ چھلا ہوا میرا

فغاں کہ ترک نہ کی نغمہ پروری میں نے

دوا سے فائدہ مقصود تھا ہی کب کہ فقط

دوا کے شوق میں صحت تباہ کی میں نے

زبانہ زن تھا جگر سوز تشنگی کا عذاب

سو جوفِ سینہ میں دوزخ انڈیل لی میں نے

سرورِ مے پہ بھی غالب رہا شعور مرا

کہ ہر رعایتِ غم ذہن میں رکھی میں نے

غمِ شعور کوئی دم تو مجھ کو مہلت دے

تمام عمر جلایا ہے اپنا جی میں نے

علاج یہ ہے کہ مجبور کر دیا جاؤں

وگرنہ یوں تو کسی کی نہیں سنی میں نے

رہا میں شاہدِ تنہا نشینِ مسندِ غم

اور اپنے کربِ انا سے غرض رکھی میں نے

جون ایلیا

جانا تھا کس سمت کو جانے بس بے اٹکل چل نکلے

اکتوبر 23, 2015Jaun Elia،جون ایلیا،شعراء،غزلہلچل،مقتل،کل،اٹکل،جنگلadmin

جون ایلیا ۔ غزل نمبر 183

باد بہاری کے چلتے ہی لہری پاگل چل نکلے

جانا تھا کس سمت کو جانے بس بے اٹکل چل نکلے

جو ہلچل مارے تھے، ان کو دوش نہ دو نردوش ہیں وہ

دوش ہمیں دو، اس بستی سے ہم بے ہلچل چل نکلے

پاس ادب کی حد ہوتی ہے ہم پہلے ہی کہتے تھے

کل تک جن کو پاس تھا ان کا وہ ان سے کل چل نکلے

کچھ مت پوچھو حیف آتا ہے وحشت کے بے حالوں پر

وحشت جب پر حال ہوئی تو چھوڑ کے جنگل چل نکلے

خون بھی اپنا سیر طلب تھا ہم بھی موجی رنگ کے تھے

یوں بھی تھا نزدیک ہی مقتل سوئے مقتل چل نکلے

جون ایلیا

وہ سوراخوں سے کالے ناگ نکلے

اکتوبر 23, 2015Jaun Elia،جون ایلیا،شعراء،غزللاگ،ناگ،ڈاگ،گھاگ،آگ،بھاگ،جھاگadmin

جون ایلیا ۔ غزل نمبر 182

دھرم کی بانسری سے راگ نکلے

وہ سوراخوں سے کالے ناگ نکلے

رکھو دیر و حرم کو اب مقفّل

کئی پاگل یہاں سے بھاگ نکلے

وہ گنگا جل ہو یا آبِ زمزم

یہ وہ پانی ہیں جن سے آگ نکلے

خدا سے لے لیا جنت کا وعدہ

یہ زاہد تو بڑے ہی گھاگ نکلے

ہے آخر آدمیت بھی کوئی شے

ترے دربان تو بُل ڈاگ نکلے

یہ کیا انداز ہے اے نکتہ چینو

کوئی تنقید تو بے لاگ نکلے

پلایا تھا ہمیں امرت کسی نے

مگر منہ سے لہو کے جھاگ نکلے

جون ایلیا

جی نہیں لگ رہا کئی دن سے

اکتوبر 23, 2015Jaun Elia،جون ایلیا،شعراء،غزلمنا،بےواسطہ،رہا،سکا،صباadmin

جون ایلیا ۔ غزل نمبر 181

غم ہے بے ماجرا کئی دن سے

جی نہیں لگ رہا کئی دن سے

بے شمیمِ ملال و حیراں ہے

خیمہ گاہِ صبا کئی دن سے

دل محلے کی اس گلی میں بَھلا

کیوں نہیں غُل مچا کئی دن سے

وہ جو خوشبو ہے اس کے قاصد کو

میں نہیں مِل سکا کئی دن سے

اس سے بھی اور اپنے آپ سے بھی

ہم ہیں بےواسطہ کئی دن سے

جون ایلیا

وہ خوشبو لوٹ آئی ہے سفر سے

اکتوبر 23, 2015Jaun Elia،جون ایلیا،شعراء،غزلپر،بھر،بر،تر،رہگزر،سفرadmin

جون ایلیا ۔ غزل نمبر 180

مہک اٹھا ہے آنگن اس خبر سے

وہ خوشبو لوٹ آئی ہے سفر سے

جدائی نے اُسے دیکھا سرِبام

دریچے پر شفق کے رنگ برسے

میںِاس دیوار پر چڑھ تو گیا تھا

اُتارے کون اب دیوار پر سے

گلہ ہے ایک گلی سے شہرِدل کی

میں لڑتاِپھر رہا ہوں شہر بھر سے

اسے دیکھے زمانے بھر کا یہ چاند

ہماری چاندنی سائے کو ترسے

میرے مانند گذرا کر میری جان

کبھی تو خود بھی اپنی رہگزر سے

جون ایلیا

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: