زمرہ جات کے محفوظات: کلیاتِ شکیب جلالی ۔ غزلیں

اپنے حالات سے مجبور ہیں دوست

مئی 31, 2021کلیاتِ شکیب جلالی ۔ غزلیں،شکیب جلالی،غزلمجبور،معذور،چور،رنجورadmin

پاس رہ کر بھی بہت دور ہیں دوست

اپنے حالات سے مجبور ہیں دوست

ترکِ الفت بھی نہیں کر سکتے

ساتھ دینے سے بھی معذور ہیں دوست

گفتگو کے لئے عنواں بھی نہیں

بات کرنے پہ بھی مجبور ہیں دوست

یہ چراغ اپنے لیے رہنے دو

تیری راتیں بھی تو بے نور ہیں دوست

سبھی پژمردہ ہیں محفل میں شکیبؔ

میں پریشان ہوں رنجور ہیں دوست

شکیب جلالی

قربِ منزل کے لیے مر جانا

مئی 31, 2021کلیاتِ شکیب جلالی ۔ غزلیں،شکیب جلالی،غزلمنّور،مر،ور،کر،پیکر،تر،جواہرadmin

چوٹ ہر گام پہ کھا کر جانا

قربِ منزل کے لیے مر جانا

ہم بھی کیا سادہ نظر رکھتے تھے

سنگ ریزوں کو جواہر جانا

مشعلِ درد جو روشن دیکھی

خانہِ دل کو منّور جانا

رشتہِ غم کو رگِ جاں سمجھے

زخمِ خنداں کو گُلِ تر جانا

یہ بھی ہے کارِ نسیمِ سحری

پتّی پتّی کو جُدا کر جانا

اپنے حق میں وہی تلوار بنا

جسے اک پھول سا پیکر جانا

دشمنوں پر کبھی تکیہ کرنا

اپنے سائے سے کبھی ڈر جانا

کاسہِ سرکو نہ دی زخم کی بھیک

ہم کو مجنوں سے بھی کم تر جانا

اس لیے اور بھی خاموش تھے ہم

اہلِ محفل نے سخن ور جانا

شکیب جلالی

لوگ گرویدہ ہوتے جاتے ہیں

مئی 31, 2021کلیاتِ شکیب جلالی ۔ غزلیں،شکیب جلالی،غزلمسکراتے،جگاتے،جاتےadmin

جس قدر خود کو وہ چھپاتے ہیں

لوگ گرویدہ ہوتے جاتے ہیں

جو بھی ہمدرد بن کے آتے ہیں

غم کا احساس ہی جگاتے ہیں

عہدِ ماضی کے زرفِشاں لمحے

شِدّتِ غم میں مسکراتے ہیں

خود کو بدنام کر رہا ہوں میں

ان پہ الزام آئے جاتے ہیں

اجنبی بن کے جی رہا ہوں میں

لوگ مانوس ہوتے جاتے ہیں

شکیب جلالی

ہم گلستاں میں کب سمائے ہیں

مئی 31, 2021کلیاتِ شکیب جلالی ۔ غزلیں،شکیب جلالی،غزلپرائے،آئے،بجھائے،سمائےadmin

دشت و صحرا اگر بسائے ہیں

ہم گلستاں میں کب سمائے ہیں

آپ نغموں کے منتظر ہوں گے

ہم تو فریاد لے کے آئے ہیں

ایک اپنا دیا جلانے کو

تم نے لاکھوں دیئے بجھائے ہیں

کیا نظر آئے گا ابھی ہم کو

یک بیک روشنی سے آئے ہیں

یوں تو سارا چمن ہمارا ہے

پھول جتنے بھی ہیں پرائے ہیں

شکیب جلالی

میری منزل میں نہیں رات کے آثار اب تک

مئی 31, 2021کلیاتِ شکیب جلالی ۔ غزلیں،شکیب جلالی،غزلآثار،دلدار،دیوار،دیدارadmin

دل میں لرزاں ہے ترا شعلہِ رخسار اب تک

میری منزل میں نہیں رات کے آثار اب تک

پھول مُرجھا گئے ، گلدان بھی گِر کر ٹوٹا

کیسی خوشبو میں بسے ہیں در و دیوار اب تک

حسرتِ دادِ نہاں ہے مرے دل میں شاید

یاد آتی ہے مجھے قامتِ دلدار اب تک

وہ اجالے کا کوئی سیلِ رواں تھا، کیا تھا؟

میری آنکھوں میں ہے اک ساعتِ دیدار اب تک

تیشہِ غم سے ہوئی روح تو ٹکڑے ٹکڑے

کیوں سلامت ہے مرے جسم کی دیوار اب تک

شکیب جلالی

رونق جہاں کی انجمن آرائیوں سے ہے

مئی 31, 2021کلیاتِ شکیب جلالی ۔ غزلیں،شکیب جلالی،غزلگہرائیوں،آرائیوں،تنہائیوں،دانائیوں،سائیوںadmin

یہ جلوہ گاہِ ناز تماشائیوں سے ہے

رونق جہاں کی انجمن آرائیوں سے ہے

روتے ہیں دل کے زخم تو ہنستا نہیں کوئی

اتنا تو فائدہ مجھے تنہائیوں سے ہے

دیوانہِ حیات کو اک شغل چاہیئے

نادانیوں سے کام نہ دانائیوں سے ہے

قیدِ بیاں میں آئے جو ناگفتنی نہ ہو

وہ رابطہ جو قلب کی گہرائیوں سے ہے

نادِم نہیں ہوں داغِ فرومائیگی پہ میں

تیرا بھرم بھی میری جبیں سائیوں سے ہے

شکیب جلالی

کیوں شام ہی سے بُجھ گئے محفل کے سب چراغ

مئی 31, 2021کلیاتِ شکیب جلالی ۔ غزلیں،شکیب جلالی،غزللقب،نسب،کب،اب،جب،سب،طلبadmin

روشن ہیں دل کے داغ،نہ آنکھوں کے شب چراغ

کیوں شام ہی سے بُجھ گئے محفل کے سب چراغ

وہ دن نہیں ‘ کرن سے کرن میں لگے جو آگ

وہ شب کہاں ‘ چراغ سے جلتے تھے جب چراغ

تِیرہ ہے خاکداں ‘ تو فلک بے نجوم ہے

لائے کہاں سے مانگ کے دستِ طلب چراغ

روشن ضمیر آج بھی ظلمت نصیب ہیں

تم نے دیے ہیں پوچھ کے نام و نسب چراغ

وہ تیرگی ہے دشتِ وفا میں کہ اَلامَاں !

چمکے جو موجِ ریگ تو پائے لقب چراغ

دن ہو اگر‘ تو رات سے تعبیر کیوں کریں

سورج کو اہلِ ہوش دکھاتے ہیں کب چراغ

اے بادِ تُند! وضع کے پابند ہم بھی ہیں

پتھر کی اوٹ لے کے جلائیں گے اب چراغ

شکیب جلالی

پھانکتی ہے کہاں کی گرد ہَوا

مئی 31, 2021کلیاتِ شکیب جلالی ۔ غزلیں،شکیب جلالی،غزلنورد،گرد،سردadmin

برگِ دل کی طرح ہے زرد ہَوا

پھانکتی ہے کہاں کی گرد ہَوا

دل میں یادوں کا زہر گھول دیا

کتنی قاتل ہے بن کی سرد ہَوا

روز لاتی ہے ان کہے پیغام

شہرِ خوباں سے کوچہ گرد ہَوا

دَم نہ مارے مری طرح جو سہے

اس زمانے کے گرم و سرد ہَوا

میں ہوں شعلہ بجاں، چراغ بدست

کس خلا کی ہے رہ نورد ہَوا

شکیب جلالی

پیروں میں زنجیریں ڈالیں ‘ ہاتھوں میں کشکول دیا

مئی 31, 2021کلیاتِ شکیب جلالی ۔ غزلیں،شکیب جلالی،غزلڈول،کھول،کشکول،گھول،تول،خولadmin

دنیا والوں نے چاہت کا مجھ کو صلہ انمول دیا

پیروں میں زنجیریں ڈالیں ‘ ہاتھوں میں کشکول دیا

اتنا گہرا رنگ کہاں تھا رات کے میلے آنچل کا

یہ کس نے رو رو کے‘ گگن میں اپنا کاجل گھول دیا

یہ کیا کم ہے اس نے بخشا ایک مہکتا درد مجھے

وہ بھی ہیں جن کو رنگوں کا اک چمکیلا خول دیا

مجھ سا بے مایہ‘ اپنوں کی اور تو خاطر کیا کرتا

جب بھی ستم کا پَیکاں آیا‘ میں نے سینہ کھول دیا

بیتے لمحے دھیان میں آ کر مجھ سے سوالی ہوتے ہیں

تونے کس بنجر مٹّی میں من کا امرت ڈول دیا

اشکوں کی اُجلی کلیاں ہوں یا سپنوں کے کندن پھول

اُلفت کی میزان میں مَیں نے جو تھا سب کچھ تول دیا

شکیب جلالی

ہائے انسان کی انگڑائی کا خم

مئی 31, 2021کلیاتِ شکیب جلالی ۔ غزلیں،شکیب جلالی،غزلہم،قلم،آدم،اِرم،بھرم،خمadmin

دیکھتی رہ گئی محرابِ حرم

ہائے انسان کی انگڑائی کا خم

جب بھی اوہام مقابل آئے

مثلِ شمشیر چلی نوکِ قلم

پرِ پرواز پہ یہ راز کھلا

پستیوں سے تھا بلندی کا بھرم

غم کی دیوار گری تھی جن پر

ہم وہ لوگ ہیں اے قصرِ اِرم

چاندنی غارہِ پائے جولاں

کہکشاں جادہِ ابنِ آدم

ایک تارہ بھی نہ پامال ہوا

ایسے گزرے رہِ افلاک سے ہم

شکیب جلالی

میری آنکھوں میں سجا ہے لب و رُخسار کا شہر

مئی 31, 2021کلیاتِ شکیب جلالی ۔ غزلیں،شکیب جلالی،غزلپندار،پیار،اسرار،دلدار،دیوار،رخسار،سرکارadmin

کوئی دیکھے تو سہی یارِ طرحدار کا شہر

میری آنکھوں میں سجا ہے لب و رُخسار کا شہر

دشتِ احساس میں شعلہ سا کوئی لپکا تھا

اسی بنیاد پہ تعمیر ہُوا پیار کا شہر

اُس کی ہر بات میں ہوتا ہے کسی بھید کا رنگ

وہ طلسمات کا پیکر ہے کہ اَسرار کا شہر

میری نظروں میں چراغاں کا سماں رہتا ہے

میں کہیں جاؤں ‘ مرے ساتھ ہے دلدار کا شہر

یوں تری گرم نگاہی سے پگھلتے دیکھا

جس طرح کانچ کا گھر ہو مرے پندار کا شہر

دل کا آفاق سمٹتا ہی چلا جاتا ہے

اور پھیلے گا کہاں تک در و دیوار کا شہر

مسکراتے رہیں سینے کے دہکتے ہوئے داغ

دائم آباد رہے درد کی سرکار کا شہر

شکیب جلالی

جاری رہے گلشن میں بیاں موسمِ گُل کا

مئی 31, 2021کلیاتِ شکیب جلالی ۔ غزلیں،شکیب جلالی،غزلنگراں،گراں،بیاں،رواںadmin

باقی ہے یہی ایک نشاں موسمِ گُل کا

جاری رہے گلشن میں بیاں موسمِ گُل کا

جب پُھول مرے چاکِ گریباں پہ ہنسے تھے

لمحہ وہی گزرا ہے گراں موسمِ گُل کا

نادان گھٹاؤں کے طلب گار ہوئے ہیں

شعلوں کو بنا کر نگراں موسمِ گُل کا

سُوکھے ہوئے پتّوں کے جہاں ڈھیر ملے ہیں

دیکھا تھا وہیں سیلِ رواں موسمِ گُل کا

شکیب جلالی

مُرجھا گئے کھِل کے پُھول یارو

مئی 31, 2021کلیاتِ شکیب جلالی ۔ غزلیں،شکیب جلالی،غزلقبول،پھول،بھول،ببول،دھولadmin

ہم آج ہیں پھر مَلُول یارو

مُرجھا گئے کھِل کے پُھول یارو

گزرے ہیں خزاں نصیب ادھر سے

پیڑوں پہ جمی ہے دُھول یارو

تا حدِّ خیال‘ لالہ و گُل

تا حدِّ نظر‘ ببُول یارو

جب تک کہ ہوس رہی گُلوں کی

کانٹے بھی رہے قبول یارو

ہاں ‘ کوئی خطا نہیں تمھاری

ہاں ‘ ہم سے ہوئی ہے بھول یارو

شکیب جلالی

نہیں ہے کوئی بھی اپنا مزاج داں لوگو

مئی 31, 2021کلیاتِ شکیب جلالی ۔ غزلیں،شکیب جلالی،غزلکہانیاں،پہیلیاں،پتّیاں،تلخیاں،دھواں،داںadmin

ہر ایک بات ہے منّت کشِ زباں لوگو

نہیں ہے کوئی بھی اپنا مزاج داں لوگو

کچھ اس طرح وہ حقائق کو سن کے چونک اٹھے

بکھر گئیں سرِ محفل پہیلیاں لوگو

مرے لبوں سے کوئی بات بھی نہیں نکلی

مگر تراش ،کیں تم نے کہانیاں لوگو

بہارِ نو بھی انہیں پھر سجا نہیں سکتی

بکھر گئی ہیں جو پھولوں کی پتّیاں لوگو

بڑا زمانہ ہوا آشیاں کو راکھ ہوۓ

مگر نگاہ ہے اب تک دھواں دھواں لوگو

خطا معاف کہ مے سے شکیبؔ منکر ہے

اسے عزیز ہیں دنیا کی تلخیاں لوگو

شکیب جلالی

دیوار و در پہ دیکھنا خونِ جگر کا رنگ

مئی 31, 2021کلیاتِ شکیب جلالی ۔ غزلیں،شکیب جلالی،غزلگر،گزر،ثمر،جگر،سحرadmin

کچھ دن اگر یہی رہا دیوار و در کا رنگ

دیوار و در پہ دیکھنا خونِ جگر کا رنگ

بھولا نہیں ہوں مقتلِ امید کا سماں

تحلیل ہو رہا تھا شفق میں سحر کا رنگ

دنیا غریقِ شعبدہِ جام جم ہوئی

دیکھے گا کون خونِ دلِ کو زہ گر کا رنگ

الجھے ہوئے دھوئیں کی فضا میں ہے اک لکیر

کیا پوچھتے ہو شمع سرِ رہ گزر کا رنگ

دامانِ فصل گل پہ خزاں کی لگی ہے چھاپ

ذوقِ نظر پہ بار ہے برگ و ثمر کا رنگ

جمنے لگی شکیبؔ جو پلکوں پہ گردِ شب

آنکھوں میں پھیلنے لگا خوابِ سحر کا رنگ

شکیب جلالی

زخم کِھلتے ہیں ترے گاؤں سے دُور

مئی 31, 2021کلیاتِ شکیب جلالی ۔ غزلیں،شکیب جلالی،غزلکلیساؤں،گاؤں،پیماؤں،آراؤں،دریاؤں،زلیخاؤں،شناساؤں،صحراؤںadmin

میٹھے چشموں سے‘ خُنَک چھاؤں سے دُور

زخم کِھلتے ہیں ترے گاؤں سے دُور

سنگِ منزل نے لہو اُگلا ہے

دُور‘ ہم بادیہ پیماؤں سے دُور

کتنی شمعیں ہیں اسیرِ فانوس

کتنے یوسف ہیں زلیخاؤں سے دُور

کِشتِ امید سلگتی ہی رہی

ابر برسا بھی تو صحراؤں سے دُور

جَورِ حالات‘ بھلا ہو تیرا

چین ملتا ہے شناساؤں سے دُور

جنّتِ فکر بُلاتی ہے چلو

دَیر و کعبہ سے‘ کلیساؤں سے دُور

رقصِ آشفتہ سراں دیکھیں گے

دُور‘ ان انجمن آراؤں سے دُور

جستجو ہے درِّ یکتا کی‘ شکیبؔ

سیپیاں چُنتے ہیں دریاؤں سے دُور

شکیب جلالی

جلتے ہوئے چراغ تہِ آب دیکھتے

مئی 31, 2021کلیاتِ شکیب جلالی ۔ غزلیں،شکیب جلالی،غزلکمخواب،گرداب،آب،احباب،خوابadmin

ساحل سے دُور جب بھی کوئی خواب دیکھتے

جلتے ہوئے چراغ تہِ آب دیکھتے

ہم نے فضول چھیڑ دی زخمِ نہاں کی بات

چُپ چاپ رنگِ خندہِ احباب دیکھتے

غم کی بس ایک موج نے جن کو ڈبو دیا

اے کاش وہ بھی حلقہِ گرداب دیکھتے

بیتے دنوں کے زخم کُریدے ہیں رات بھر

آئی نہ جن کو نیند وہ کیا خواب دیکھتے

کشکولِ شعرِتر لیے پھرتے نہ ہم‘ شکیبؔ

اس ریشمیں بدن پہ جو کمخواب دیکھتے

شکیب جلالی

کلیوں کو نہال کر گئے ہم

مئی 31, 2021کلیاتِ شکیب جلالی ۔ غزلیں،شکیب جلالی،غزلکر،گزر،ٹھہر،اتر،بکھر،بپھرadmin

مانندِ صبا جدھر گئے ہم

کلیوں کو نہال کر گئے ہم

زنجیر بپا اگر گئے ہم

نغموں کی طرح بکھر گئے ہم

سورج کی کرن تھے جانے کیا تھے

ظلمت میں اتر اتر گئے ہم

جب بھی کوئی سنگِ راہ دیکھا

طوفاں کی طرح بپھر گئے ہم

چلنا تھا جہاں محال یارو

اس راہ سے بھی گزر گئے ہم

بن جائیں گی منزلیں وہیں پر

بھولے سے جہاں ٹھہر گئے ہم

ہنس ہنس کے گلے ملے قضا سے

تکمیلِ حیات کر گئے ہم

شکیب جلالی

میرا سایہ ہے جو دیوار پہ جم جائے گا

مئی 31, 2021کلیاتِ شکیب جلالی ۔ غزلیں،شکیب جلالی،غزلگھبرائے،جائے،سمجھائےadmin

مجھ سے ملنے شب غم اور تو کون آئے گا

میرا سایہ ہے جو دیوار پہ جم جائے گا

ٹھہرو ٹھہرو مرے اصنامِ خیالی ٹھہرو

میرا دل گوشہِ تنہائی میں گھبرائے گا

لوگ دیتے رہے کیا کیا نہ دلاسے مجھ کو

زخم گہرا ہی سہی، زخم ہے ، بھر جائے گا

عزم پختہ ہی سہی ترکِ وفا کا لیکن

منتظر ہوں کوئی آ کر مجھے سمجھائے گا

آنکھ جھپکے نہ کہیں، راہ اندھیری ہی سہی

آگے چل کر وہ کسی موڑ پہ مل جائے گا

دل سا انمول رتن کون خریدے گا شکیبؔ

جب بکے گا تو یہ بے دام ہی بک جائے گا

شکیب جلالی

چاند ڈُوبا ہے تو سورج بھی اُبھر آئے گا

مئی 31, 2021کلیاتِ شکیب جلالی ۔ غزلیں،شکیب جلالی،غزلٹہرائے،پھیلائے،آئے،جائےadmin

حُسنِ فردا‘ غمِ امروز سے ضَو پائے گا

چاند ڈُوبا ہے تو سورج بھی اُبھر آئے گا

آندھیوں میں بھی فروزاں ہے چراغِ اُمّید

خاک ڈالے سے یہ شُعلہ کہیں بُجھ جائے گا

کُو بہ کُو دام بچھے ہوں کہ کڑکتی ہو کماں

طائرِ دل‘ پرِ پرواز تو پھیلائے گا

توڑ کر حلقہِ شب‘ ڈال کے تاروں پہ کمند

آدمی عرصہِ آفاق پہ چھا جائے گا

ہم بھی دو چار قدم چل کے اگر بیٹھ گئے

کون پھر وقت کی رفتار کو ٹہرائے گا

راہ میں جس کی‘ دیا خونِ دل و جاں ہم نے

وہ حَسیں دَور بھی آئے گا‘ ضرور آئے گا

شکیب جلالی

مہکی ہوئی وہ چا درِ گُل بار کیا ہوئی!

مئی 31, 2021کلیاتِ شکیب جلالی ۔ غزلیں،شکیب جلالی،غزلہوئی،ملی،بھی،رہیadmin

شاخو! بھری بہار میں رقصِ برہنگی!

مہکی ہوئی وہ چا درِ گُل بار کیا ہوئی!

بے نغمہ و صدا ہے وہ بُت خانہِ خیال

کرتے تھے گفتگو جہاں پتّھر کے ہونٹ بھی

وہ پھر رہے ہیں زخم بہ پا آج دشت دشت

قدموں میں جن کے شاخِ گُلِ تر جھکی رہی

یوں بھی بڑھی ہے وُسعتِ ایوانِ رنگ و بُو

دیوارِ گلستاں درِ زنداں سے جا ملی

رعنائیاں چمن کی تو پہلے بھی کم نہ تھیں

اب کے مگر سجائی گئی شاخِ دار بھی

شکیب جلالی

کسی کی یاد کے جُگنو دھواں اُگلتے ہیں

مئی 31, 2021کلیاتِ شکیب جلالی ۔ غزلیں،شکیب جلالی،غزلمچلتے،چلتے،ڈھلتے،پگھلتے،اگلتےadmin

ہواے شب سے نہ بُجھتے ہیں اور نہ جلتے ہیں

کسی کی یاد کے جُگنو دھواں اُگلتے ہیں

شبِ بہار میں مہتاب کے حسیں سائے

اُداس پآ کے ہمیں ‘ اور بھی مچلتے ہیں

اسیرِ دامِ جنوں ہیں ‘ ہمیں رہائی کہاں

یہ رنگ و بُو کے قفس اپنے ساتھ چلتے ہیں

یہ دل وہ کار گہِ مرگ و زیست ہے کہ جہاں

ستارے ڈوبتے ہیں ‘ آفتاب ڈھلتے ہیں

خود اپنی آگ سے شاید گداز ہوجائیں

پرائی آگ سے کب سنگ دل پگھلتے ہیں

شکیب جلالی

پتھر کے پیرہن سے سراپا نکالیے

مئی 31, 2021کلیاتِ شکیب جلالی ۔ غزلیں،شکیب جلالی،غزلنکالیے،ڈھالیے،ڈالیے،ٹالیے،پالیے،اچھالیے،اجالئے،سنبھالیےadmin

رعنائیِٔ نگاہ کو قالب میں ڈھالیے

پتھر کے پیرہن سے سراپا نکالیے

گزرا ہے دل سے جو رمِ آہو سا اک خیال

لازم ہے اس کے پاؤں میں زنجیر ڈالیے

دل میں پرائے درد کی اک ٹیس بھی نہیں

تخلیق کی لگن ہے تو زخموں کو پالیے

یہ کہر کا ہجوم درِ دل پہ تابہ کے

بامِ یقیں سے ایک نظر اس پہ ڈالیے

احساس میں رچائیے قوسِ قزح کے رنگ

ادراک کی کمند ستاروں پہ ڈالیے

ہاں کوزہ ہائے گل پہ ہے تنقید کیا ضرور

گرہو سکے تو خاک سے خورشید ڈھالیے

امید کی کرن ہو کہیں حسرتوں کے داغ

ہر دم نگار خانہِ دل کو اجالئے

شاید کہ ان کی سمت بڑھے کوئی دستِ شوق

روندے ہوئے گلاب فضا میں اچھالیے

ہاں کوہِ شب کو کاٹ کے لانا ہے جوئے نور

ہاں بڑھ کے آفتاب کا تیشہ سنبھالیے

وجدان کی ترنگ کا مصرف بھی ہو شکیبؔ

شاعر کی عظمتوں کو ہنسی میں نہ ٹالیے

شکیب جلالی

دل کا کنول بجھا تو شہر‘ تیرہ و تار ہو گئے

مئی 31, 2021کلیاتِ شکیب جلالی ۔ غزلیں،شکیب جلالی،غزلہو،کو،بو،تو،سوadmin

پردہِ شب کی اوٹ میں زہرہ جمال کھوگئے

دل کا کنول بجھا تو شہر‘ تیرہ و تار ہو گئے

ایک ہمیں ہی اے سحر‘ نیند نہ آئی رات بھر

زانوئے شب پہ رکھ کر سر‘ سارے چراغ سوگئے

راہ میں تھے ببول بھی‘ رودِ شرر بھی‘ دُھول بھی

جانا ہمیں ضرور تھا‘ گُل کے طواف کوگئے

دیدہ ورو بتائیں کیا‘ تم کو یقیں نہ آئے گا

چہرے تھے جن کے چاند سے‘ سینے میں داغ بوگئے

داغِ شکست دوستو‘ دیکھو کسے نصیب ہو

بیٹھے ہوئے ہیں تیز رَو‘ سُست خرام تو گئے

اہلِ جنوں کے دل شکیبؔ‘ نرم تھے موم کی طرح

تیشہِ یاس جب چلا‘ تودہِ سنگ ہو گئے

شکیب جلالی

اک کارگہِ شیشہ گراں ہیں تری آنکھیں

مئی 31, 2021کلیاتِ شکیب جلالی ۔ غزلیں،شکیب جلالی،غزللباں،نگراں،کہاں،گراں،جاں،خواں،زباںadmin

آئینہِ جذباتِ نہاں ہیں تری آنکھیں

اک کارگہِ شیشہ گراں ہیں تری آنکھیں

سر چشمہِ افکار جواں ہیں تری آنکھیں

تابندہ خیالات کی جاں ہیں تری آنکھیں

اندازِ خموشی میں ہے گفتار کا پہلو

گویا نہ سہی، چپ بھی کہاں ہیں تری آنکھیں

جاؤں گا کہاں توڑ کے زنجیرِ وفا کو

ہر سو مری جانب نگراں ہیں تری آنکھیں

کہنا ہے وہی جس کی توقع ہے تجھے بھی

مت پوچھ مرے دل کی زباں ہیں تری آنکھیں

پلکوں کے جھروکوں سے سبو جھانک رہے ہیں

امید گہِ تشنہ لباں ہیں تری آنکھیں

یوں ہی تو نہیں امڈی چلی آتی ہیں غزلیں

پہلو میں مرے ، زمزمہ خواں ہیں تری آنکھیں

شکیب جلالی

خیمہِ گُل کے پاس ہی‘ دجلہِ خوں بھی چاہیے

مئی 31, 2021کلیاتِ شکیب جلالی ۔ غزلیں،شکیب جلالی،غزلفزوں،جنوں،خوں،دروں،زبوں،سکوںadmin

موجِ صبا رواں ہوئی‘ رقصِ جنوں بھی چاہیے

خیمہِ گُل کے پاس ہی‘ دجلہِ خوں بھی چاہیے

کشمکشِ حیات ہے‘ سادہ دلوں کی بات ہے

خواہشِ مرگ بھی نہیں ‘ زہرِ سکوں بھی چاہیے

ضربِ خیال سے کہاں ٹوٹ سکیں گی بیڑیاں

فکرِ چمن کے ہم رکاب‘ جوشِ جنوں بھی چاہیے

نغمہِ شوق خوب تھا‘ ایک کمی ہے مُطربہ!

شعلہِ لَب کی خیر ہو‘ سوزِ دُروں بھی چاہیے

اتنا کرم تو کیجیے‘ بُجھتا کنول نہ دیجیے

زخمِ جگر کے ساتھ ہی دردِ فزوں بھی چاہیے

دیکھیے ہم کو غور سے‘ پوچھیے اہلِ جور سے

روحِ جمیل کے لیے‘ حالِ زُبوں بھی چاہیے

شکیب جلالی

بدل رہا ہے جنوں زاویے اُڑانوں کے

مئی 31, 2021کلیاتِ شکیب جلالی ۔ غزلیں،شکیب جلالی،غزلچٹانوں،آسمانوں،اڑانوں،خانوں،زمانوںadmin

کہاں رُکیں گے مُسافر نئے زمانوں کے

بدل رہا ہے جنوں زاویے اُڑانوں کے

یہ دل کا زخم ہے‘ اک روز بھر ہی جائے گا

شگاف پُر نہیں ہوتے فقط چٹانوں کے

چھلک چھلک کے بڑھا میری سمت نیند کا جام

پگھل پگھل کے گرے قفل قید خانوں کے

ہَوا کے دشت میں تنہائی کا گزر ہی نہیں

مرے رفیق ہیں مُطرب‘ گئے زمانوں کے

کبھی ہمارے نقوشِ قدم کو ترسیں گے

وہی جو آج ستارے ہیں آسمانوں کے

شکیب جلالی

قریہ قریہ بھٹک رہا ہے جُنوں

مئی 31, 2021کلیاتِ شکیب جلالی ۔ غزلیں،شکیب جلالی،غزلہوں،کہوں،بھروں،جُنوں،خوں،دوںadmin

کون جانے کہاں ہے شہرِ سکوں

قریہ قریہ بھٹک رہا ہے جُنوں

نورِ منزل مجھے نصیب کہاں

میں ابھی حلقہِ غبار میں ہوں

یہ ہے تاکید: سننے والوں کی

واقعہ خوشگوار ہو تو کہوں

کن اندھیروں میں کھو گئی ہے سحر

چاند تاروں پہ مار کر شب خوں

تم جسے نورِ صبح کہتے ہو

میں اسے گردِ شام بھی نہ کہوں

اب تو خونِ جگر بھی ختم ہوا

میں کہاں تک خلا میں رنگ بھروں

جی میں آتا ہے اے رہِ ظلمت

کہکشاں کو مروڑ کر رکھ دوں

شکیب جلالی

کچھ نہیں ہے‘ مگر اس گھر کا مقدّر یادیں

مئی 31, 2021کلیاتِ شکیب جلالی ۔ غزلیں،شکیب جلالی،غزلمقدّر،منظر،معطّر،کر،اکثر،ترadmin

دستکیں دیتی ہیں شب کو درِ دل پر یادیں

کچھ نہیں ہے‘ مگر اس گھر کا مقدّر یادیں

ڈھونڈتی ہیں تری مہکی ہوئی زلفوں کی بہار

چاندنی رات کے زینے سے اتر کر یادیں

عشرتِ رفتہ کو آواز دیا کرتی ہیں

ہر نئے لمحے کی دہلیز پہ جا کر یادیں

رنگ بھرتے ہیں خلاؤں میں ہیولے کیا کیا

پیش کرتی ہیں عجب خواب کا منظر یادیں

نہ کسی زلف کا عنبر‘ نہ گُلوں کی خوشبو

کر گئی ہیں مری سانسوں کو معطّر یادیں

کم نہیں رات کے صحرا سے‘ مرے دل کی فضا

اور آکاش کے تاروں سے فزوں تر یادیں

مشعلِ غم نہ بُجھاؤ‘ کہ شکیبؔ‘ اس کے بغیر

راستہ گھر کا بُھلا دیتی ہیں اکثر یادیں

شکیب جلالی

رات تو کٹ گئی‘ درد کی سیج پر

مئی 31, 2021کلیاتِ شکیب جلالی ۔ غزلیں،شکیب جلالی،غزلکر،گُہر،ٹھہر،پر،بھر،درadmin

اب یہ ویران دن‘ کیسے ہو گا بسر

رات تو کٹ گئی‘ درد کی سیج پر

بس یہیں ختم ہے پیار کی رہ گزر

دوست! اگلا قدم کچھ سمجھ سوچ کر

اس کی آوازِ پا تو بڑی بات ہے

ایک پتّہ بھی کھڑکا نہیں رات بھر

گھر میں طوفان آئے زمانہ ہُوا

اب بھی کانوں میں بجتی ہے زنجیرِ در

اپنا دامن بھی اب تو میسّر نہیں

کتنے ارزاں ہوئے آنسوؤں کے گُہر

یہ شکستہ قدم بھی ترے ساتھ تھے

اے زمانے ٹھہر! اے زمانے ٹھہر!

اپنے غم پر تبسّم کا پردہ نہ ڈال

دوست! ہم ہیں سوار ایک ہی ناؤ پر

شکیب جلالی

بقدرِ ظرف ہر اک آدمی سمندر ہے

مئی 31, 2021کلیاتِ شکیب جلالی ۔ غزلیں،شکیب جلالی،غزلنمی،چاندنی،آدمی،خامشی،زندگیadmin

سمجھ سکو تو یہ تشنہ لبی سمندر ہے

بقدرِ ظرف ہر اک آدمی سمندر ہے

ابھر کے ڈوب گئی کشتیِٔ خیال کہیں

یہ چاند ایک بھنور، چاندنی سمندر ہے

جو داستاں نہ بنے دردِ بیکراں ہے وہی

جو آنکھ ہی میں رہے وہ نمی سمندر ہے

نہ سوچیے تو بہت مختصر ہے سیلِ حیات

جو سوچیے تو یہی زندگی سمندر ہے

تو اس میں ڈوب کے شاید ابھر سکے نہ کبھی

مرے حبیب مری خامشی سمندر ہے

شکیب جلالی

کچھ اس کا بھی سدِّباب یارو

مئی 31, 2021کلیاتِ شکیب جلالی ۔ غزلیں،شکیب جلالی،غزلآب،رکاب،سحاب،سدّباب،سرابadmin

تارے ہیں نہ ماہتاب یارو

کچھ اس کا بھی سدِّباب یارو

آنکھوں میں چتائیں جل رہی ہیں

ہونٹوں پہ ہے آب آب یارو

تاحدِ خیال ریگِ صحرا

تاحدِ نظر سراب یارو

رہبر ہی نہیں ہے ساتھ اپنے

رہزن بھی ہیں ہم رکاب یارو

شعلے سے جہاں لپک رہے ہیں

برسے گا وہیں سحاب یارو

شکیب جلالی

رہتا ہے اپنے نور میں سورج چُھپا ہُوا

مئی 31, 2021کلیاتِ شکیب جلالی ۔ غزلیں،شکیب جلالی،غزللکھا،چھپا،کیا،کھلا،پٹا،اٹاadmin

وہ سامنے تھا پھر بھی کہاں سامنا ہُوا

رہتا ہے اپنے نور میں سورج چُھپا ہُوا

اے روشنی کی لہر‘ کبھی تو پلٹ کے آ

تجھ کو بُلا رہا ہے دریچہ کُھلا ہُوا

سیراب کس طرح ہو زمیں دور دور کی

ساحل نے ہے ندی کو مقیّد کیا ہُوا

اے دوست! چشمِ شوق نے دیکھا ہے بارہا

بجلی سے تیرا نام گھٹا پر لکھا ہُوا

پہچانتے نہیں اسے محفل میں دوست بھی

چہرہ ہو جس کا گردِ اَلَم سے اَٹا ہُوا

اس دَور میں خلوص کا کیا کام اے شکیبؔ

کیوں کر چلے! بساط پہ مہرہ پِٹا ہُوا

شکیب جلالی

میں بھی کس امتحان سے نکلا

مئی 31, 2021کلیاتِ شکیب جلالی ۔ غزلیں،شکیب جلالی،غزلمہربان،مکان،کان،گلستان،آسمان،امتحان،خاکدان،درمیانadmin

آگ کے درمیان سے نکلا

میں بھی کس امتحان سے نکلا

پھر ہوا سے سلگ اٹھے پتے

پھر دھواں گلستان سے نکلا

جب بھی نکلا ستارہِ امید

کہر کے درمیان سے نکلا

چاندنی جھانکتی ہے گلیوں میں

کوئی سایہ مکان سے نکلا

ایک شعلہ پھر ایک دھوئیں کی لکیر

اور کیا خاکدان سے نکلا

چاند جس آسمان میں ڈوبا

کب اسی آسمان سے نکلا

یہ گہر جس کو آفتاب کہیں

کس اندھیرے کی کان سے نکلا

شکر ہے اس نے بے وفائی کی

میں کڑے امتحان سے نکلا

لوگ دشمن ہوئے اسی کے شکیبؔ

کام جس مہربان سے نکلا

شکیب جلالی

لے اُڑی جانے کہاں صرصرِ حالات ہمیں

مئی 31, 2021کلیاتِ شکیب جلالی ۔ غزلیں،شکیب جلالی،غزلنغمات،بات،حالات،خیالات،رات،ساتھ،شکایاتadmin

اب میسّر نہیں فرصت کے وہ دن رات ہمیں

لے اُڑی جانے کہاں صرصرِ حالات ہمیں

آج وہ یُوں نگہِ شوق سے بچ کر گزرے

جیسے یاد آئے کوئی بُھولی ہوئی بات ہمیں

کیسے اُڑتے ہوئے لمحوں کا تعاقب کیجے

دوستو! اب تو یہی فکر ہے دن رات ہمیں

نہ سہی‘ کوئی ہجومِ گُل و لالہ‘ نہ سہی

دشت سے کم بھی نہیں کُنجِ خیالات ہمیں

وہ اگر غیر نہ سمجھے تو کوئی بات کرے

دلِ ناداں سے بہت سی ہیں شکایات ہمیں

دھوپ کی لہر ہے تُو‘ سایہِ دیوار ہیں ہم

آج بھی ایک تعلق ہے ترے ساتھ ہمیں

رنگ و مستی کے جزیروں میں لیے پھرتے ہیں

اس کی پائل سے چُرائے ہوئے نغمات ہمیں

شکیب جلالی

دامن بچا کے گزرو‘ یادوں کی رہ گزر سے

مئی 31, 2021کلیاتِ شکیب جلالی ۔ غزلیں،شکیب جلالی،غزلکدھر،گھر،گزر،پر،درadmin

اس خاکد اں میں اب تک باقی ہیں کچھ شررسے

دامن بچا کے گزرو‘ یادوں کی رہ گزر سے

ہر ہر قدم پہ آنکھیں ‘ تھیں فرشِ راہ، لیکن

وہ روشنی کا ہالا‘ اُترا نہ بام پر سے

کیوں جادہِ وفا پر‘ مشعل بکف کھڑے ہو

اس سیلِ تیرگی میں ‘ نکلے گا کون گھر سے

کس دشت کی صدا ہو‘ اتنا مجھے بتا دو

ہر سُو بچھے ہیں رستے‘ آؤں تو میں کدھر سے

اُجڑا ہُوا مکاں ہے یہ دل‘ جہاں پہ ہر شب

پرچھائیاں لپٹ کر روتی ہیں بام و در سے

شکیب جلالی

کسی کے ہاتھ نہ آئی مگر گلاب کی باس

مئی 31, 2021کلیاتِ شکیب جلالی ۔ غزلیں،شکیب جلالی،غزلقیاس،پیاس،پاس،آس،اُداس،باسadmin

اتر گیا تنِ نازک سے پتّیوں کا لباس

کسی کے ہاتھ نہ آئی مگر گلاب کی باس

اب اپنے جسم کے سائے میں تھک کے بیٹھ رہو

کہیں درخت نہیں راستے میں ‘ دُور نہ پاس

ہزار رنگ کی ظلمت میں لے گئی مجھ کو

بس اک چراغ کی خواہش‘ بس اک شرار کی آس

تمھارے کام نہ آئے گا جو بھی دانا ہے

ہر ایک شخص پہ کیوں کر رہے ہو اپنا قیاس

کسی کی آس تو ٹوٹی‘ کوئی تو ہار گیا

کہ نیم باز دریچوں میں روشنی ہے اُداس

وہ کالے کوس کی دوری اب ایک خواب سی ہے

تم آگئے ہو‘ مگر کب نہ تھے ہمارے پاس

یہ کیا طلسم ہے‘ جب سے کنارِ دریا ہوں

شکیبؔ‘ اور بھی کچھ بڑھ گئی ہے رُوح کی پیاس

شکیب جلالی

اب تو اپنے در و بام بھی‘ جانتے ہیں پرایا مجھے

مئی 31, 2021کلیاتِ شکیب جلالی ۔ غزلیں،شکیب جلالی،غزلملایا،پایا،پرایا،رلایا،سکھایا،سایہadmin

تونے کیا کیا نہ اے زندگی!دشت و دَر میں پھرایا مجھے

اب تو اپنے در و بام بھی‘ جانتے ہیں پرایا مجھے

اور بھی کچھ بھڑکنے لگا‘ میرے سینے کا آتش کدہ

راس تجھ بِن نہ آیا کبھی‘ سبز پیڑوں کا سایہ مجھے

ان نئی کونپلوں سے مرا‘ کیا کوئی بھی تعلق نہ تھا

شاخ سے توڑ کر اے صبا !خاک میں کیوں ملایا مجھے

درد کا دیپ جلتا رہا‘ دل کا سونا پگھلتا رہا

ایک ڈوبے ہوئے چاند نے‘ رات بھرخوں رلایامجھے

اب مرے راستے میں کہیں ‘ خوفِ صحرا بھی حائل نہیں

خشک پتّے نے آوارگی کا قرینہ سکھایا مجھے

مدّتوں رُوئے گُل کی جھلک کو ترستا رہا میں ‘ شکیبؔ

اب جو آئی بہار‘ اس نے صحنِ چمن میں نہ پایا مجھے

شکیب جلالی

میں جو ڈوبا تو نہ ابھروں گا کبھی ساگر سے

مئی 31, 2021کلیاتِ شکیب جلالی ۔ غزلیں،شکیب جلالی،غزلور،گھر،پتھر،باہر،بر،بستر،خاکستر،ساگرadmin

موج غم اس لئے شاید نہیں گزری سر سے

میں جو ڈوبا تو نہ ابھروں گا کبھی ساگر سے

اور دنیا سے بھلائی کا صلہ کیا ملتا

آئنہ میں نے دکھایا تھا کہ پتھر بر سے

کتنی گم سم مرے آنگن سے صبا گزری ہے

اک شرر بھی نہ اڑا روح کی خاکستر سے

پیار کی جو سے گھر گھر ہے چراغاں ورنہ

اک بھی شمع نہ روشن ہو ہوا کے ڈر سے

اڑتے بادل کے تعاقب میں پھرو گے کب تک

درد کی دھوپ میں نکلا نہیں کرتے گھر سے

کتنی رعنائیاں آباد ہیں میرے دل میں

اک خرابہ نظر آتا ہے مگر باہر سے

وادیِٔ خواب میں اس گل کا گزر کیوں نہ ہوا

رات بھر آتی رہی جس کی مہک بستر سے

طعنِ اغیار سنیں آپ خموشی سے شکیبؔ

خود پلٹ جاتی ہے ٹکرا کے صدا پتھر سے

شکیب جلالی

مجھ پہ مائل بہ کرم ہے‘ تو دلِ دریا دے

مئی 31, 2021کلیاتِ شکیب جلالی ۔ غزلیں،شکیب جلالی،غزلٹہرا،پھیلا،جا،دریا،زا،سمجھاadmin

جو بھی ہے طالَبِ یک ذرّہ‘ اُسے صحرا دے

مجھ پہ مائل بہ کرم ہے‘ تو دلِ دریا دے

کب سے ہُوں حسرتیِ یک نگہِ گرم‘ کہ جو

محفلِ شوق کے آداب مجھے سمجھا دے

خلشِ غم سے مری جاں پہ بنی ہے‘ جیسے

ریشمی شال کو کانٹوں پہ کوئی پَھیلا دے

رختِ جاں کوئی لُٹانے ادھر آبھی نہ سکے

ایسے مشکل تو نہیں دشتِ وفا کے جادے

بیتی یادوں کا تقاضا تو بجا ہے‘ لیکن

گردشِ شام و سحَر کیسے کوئی ٹہرا دے

مجھ کو زنداں میں بھی مل جائے گا عنوانِ جُنوں

نکہتِ گُل کو کریں قید خیاباں زادے

شکیب جلالی

ہم بھی سفرِ جاں کا ارادہ نہیں رکھتے

مئی 31, 2021کلیاتِ شکیب جلالی ۔ غزلیں،شکیب جلالی،غزللبادہ،ارادہ،بادہ،جادہ،زیادہ،سادہadmin

اب آپ رہِ دل جو کشادہ نہیں رکھتے

ہم بھی سفرِ جاں کا ارادہ نہیں رکھتے

پینا ہو تو اک جرعہِ زہراب بہت ہے

ہم تشنہ دہن تہمتِ بادہ نہیں رکھتے

اشکوں سے چراغاں ہے شبِ زیست، سو وہ بھی

کوتاہیِٔ مژگاں سے زیادہ نہیں رکھتے

یہ گردِ رہِ شوق ہی جم جائے بدن پر

رسوا ہیں کہ ہم کوئی لبادہ نہیں رکھتے

ہر گام پہ جگنو سا چمکتا ہے جو دل میں

ہم اس کے سوا مشعلِ جادہ نہیں رکھتے

سرخی نہیں پھولوں کی تو زخموں کی شفق ہے

دامانِ طلب ہم کبھی سادہ نہیں رکھتے

شکیب جلالی

کیا کیا نہ رنگ بھر دیے افسونِ شام نے

مئی 31, 2021کلیاتِ شکیب جلالی ۔ غزلیں،شکیب جلالی،غزلکام،انتقام،تھام،خرام،سام،شامadmin

منظر تھا اک اُجاڑ نگاہوں کے سامنے

کیا کیا نہ رنگ بھر دیے افسونِ شام نے

اس حادثے کی‘ نخوتِ ساقی کو کیا خبر

بادہ پیا کہ زہر پیا تشنہ کام نے

چہرے سے اجنبی تھا وہ میرے لیے مگر

سب راز اس کے‘ کہہ دیے طرزِ خرام نے

نکلا نہیں ہوں آج بھی اپنے حصار سے

حدِّ نگاہ آج بھی ہے میرے سامنے

تھے حادثوں کے وار تو کاری‘ مگر مجھے

مرنے نہیں دیا خلشِ انتقام نے

اک سانس کی طناب جو ٹوٹی تو اے شکیبؔ

دوڑے ہیں لوگ جسم کے خیمے کو تھامنے

شکیب جلالی

آگ جب دل میں سلگتی تھی‘ دھواں کیوں نہ ہوا

مئی 31, 2021کلیاتِ شکیب جلالی ۔ غزلیں،شکیب جلالی،غزلمکاں،نگراں،نشاں،کناں،گماں،گراں،ابررواں،جواں،دھواں،عیاںadmin

غمِ اُلفت مرے چہرے سے عیاں کیوں نہ ہُوا

آگ جب دل میں سلگتی تھی‘ دھواں کیوں نہ ہوا

سیلِ غم رُکتا نہیں ضبط کی دیواروں سے

جوشِ گریہ تھا تو میں گریہ کُناں کیوں نہ ہُوا

کہتے ہیں ‘ حُسن خدوخال کا پابند نہیں

ہر حَسیں شے پہ مجھے تیرا گماں کیوں نہ ہُوا

دشت بھی اس کے مکیں ‘ شہر بھی اس میں آباد

تو جہاں آن بسے دل وہ مکاں کیوں نہ ہوا

تو وہی ہے جو مرے دل میں چُھپا بیٹھا ہے

اک یہی راز کبھی مجھ پہ عیاں کیوں نہ ہُوا

یہ سمجھتے ہوئے‘ مقصودِ نظر ہے تُو ہی

میں ترے حُسن کی جانب نگراں کیوں نہ ہُوا

ا س سے پہلے کہ ترے لمس کی خوشبو کھو جائے

تجھ کو پالینے کا ارمان جواں کیوں نہ ہُوا

تپتے صحرا تو مری منزلِ مقصود نہ تھے

میں کہیں ہمسفرِ اَبرِرواں کیوں نہ ہُوا

اجنبی پر تو یہاں لطف سِوا ہوتا ہے

میں بھی اس شہر میں بے نام و نشاں کیوں نہ ہُوا

نارسائی تھی مرے شوق کا حاصل تو‘ شکیبؔ

حائلِ راہ کوئی سنگِ گراں کیوں نہ ہُوا

شکیب جلالی

اگر ہو اہلِ نگاہ یارو‘ چٹان کے آرپار دیکھو

مئی 31, 2021کلیاتِ شکیب جلالی ۔ غزلیں،شکیب جلالی،غزلہار،قطار،گزار،آبشار،آرپار،تار،غبارadmin

ملا نہیں اِذنِ رقص جن کو‘ کبھی تو وہ بھی شرار دیکھو

اگر ہو اہلِ نگاہ یارو‘ چٹان کے آرپار دیکھو

یہ جان لینا‘ وہاں بھی کوئی کسی کی آمد کا منتظر تھا

کسی مکاں کے جو بام و در پر بجھے دِیوں کی قطار دیکھو

اگرچہ بے خانماں ہیں لیکن ہمارا ملنا نہیں ہے مشکل

ادھر ہی صحرا میں دوڑ پڑنا‘ جدھر سے اٹھتا غبار دیکھو

عجب نہیں ہے پہاڑیوں پر شَفَق کا سونا پگھل رہا ہو

مکانِ تیرہ کے رَوزنوں میں یہ نور کے آبشار دیکھو

جو اَبرِ رحمت سے ہو نہ پایا‘ کیا ہے وہ کام آندھیوں نے

نہیں ہے خار و گیاہ باقی‘ چمک اُٹھا رہ گزار‘ دیکھو

وہ راگ خاموش ہو چکا ہے‘ سنانے والا بھی سوچکا ہے

لرز رہے ہیں مگر ابھی تک شکستہ بَربط کے تار‘ دیکھو

اک آہ بھرنا شکیبؔ‘ ہم سے خزاں نصیبوں کو یاد کر کے

کلائیوں میں جو ٹہنیوں کی‘ مہکتی کلیوں کے ہار دیکھو

شکیب جلالی

کاش میں پیڑوں کا سایہ ہوتا

مئی 31, 2021کلیاتِ شکیب جلالی ۔ غزلیں،شکیب جلالی،غزلمہکا،کیا،کالا،کاٹا،گہرا،پھیلا،اکیلا،اترنا،اترا،بھولا،بدلا،تڑپتا،سایہadmin

جلتے صحراؤں میں پھیلا ہوتا

کاش میں پیڑوں کا سایہ ہوتا

تو جو اس راہ سے گزرا ہوتا

تیرا ملبوس بھی کالا ہوتا

میں گھٹا ہوں، نہ پَون ہوں، نہ چراغ

ہم نشیں میرا کوئی کیا ہوتا

زخم عریاں تو نہ دیکھے کوئی

میں نے کچھ بھیس ہی بدلا ہوتا

کیوں سفینے میں چھپاتا دریا

گر تجھے پار اترنا ہوتا

بن میں بھی ساتھ گئے ہیں سائے

میں کسی جا تو اکیلا ہوتا

مجھ سے شفّاف ہے سینہ کس کا

چاند اس جھیل میں اترا ہوتا

اور بھی ٹوٹ کے آتی تری یاد

میں جو کچھ دن تجھے بھولا ہوتا

راکھ کر دیتے جلا کر شعلے

یہ دھواں دل میں نہ پھیلا ہوتا

کچھ تو آتا مری باتوں کا جواب

یہ کنواں اور جو گہرا ہوتا

نہ بکھرتا جو فضا میں نغمہ

سینہِ نَے میں تڑپتا ہوتا

اور کچھ دور تو چلتے مرے ساتھ

اور اک موڑ تو کاٹا ہوتا

تھی مقدّر میں خزاں ہی تو شکیبؔ

میں کسی دشت میں مہکا ہوتا

شکیب جلالی

ہم زندگی کے جاننے والے ہوئے نہیں

مئی 31, 2021کلیاتِ شکیب جلالی ۔ غزلیں،شکیب جلالی،غزلنکالے،چھالے،والے،کالے،پالے،سنبھالےadmin

جب تک غمِ جہاں کے حوالے ہوئے نہیں

ہم زندگی کے جاننے والے ہوئے نہیں

کہتا ہے آفتاب‘ ذرا دیکھنا کہ ہم

ڈُوبے تھے گہری رات میں ‘ کالے ہوئے نہیں

چلتے ہو سینہ تان کے دھرتی پہ کس لیے

تم آسماں تو سر پہ سنبھالے ہوئے نہیں

انمول وہ گُہر ہیں جہاں کی نگاہ میں

دریا کی جو تہوں سے نکالے ہوئے نہیں

طے کی ہے ہم نے صورتِ مہتاب راہِ شب

طولِ سفر سے پاؤں میں چھالے ہوئے نہیں

ڈس لیں تو ان کے زہر کا آسان ہے اُتار

یہ سانپ آستین کے پالے ہوئے نہیں

تیشے کا کام ریشہِ گُل سے لیا‘ شکیبؔ

ہم سے پہاڑ کاٹنے والے ہوئے نہیں

شکیب جلالی

اُونچی ہوں فصیلیں تو ہَوا تک نہیں آتی

مئی 31, 2021کلیاتِ شکیب جلالی ۔ غزلیں،شکیب جلالی،غزلہوا،قضا،گھٹا،پا،حیا،صبا،صدا،ضیاadmin

کیا کہیے کہ اب اس کی صدا تک نہیں آتی

اُونچی ہوں فصیلیں تو ہَوا تک نہیں آتی

شاید ہی کوئی آسکے اس موڑ سے آگے

اس موڑ سے آگے تو قضا تک نہیں آتی

وہ گُل نہ رہے‘ نکہتِ گُل خاک ملے گی

یہ سوچ کے گلشن میں صبا تک نہیں آتی

اس شورِ تلاطم میں کوئی کس کو پکارے

کانوں میں یہاں اپنی صدا تک نہیں آتی

خوددار ہوں ‘ کیوں آؤں درِ اہلِ کرم پر

کھیتی کبھی خود چل کے گھٹا تک نہیں آتی

اس دشت میں قدموں کے نشاں ڈھونڈ رہے ہو

پیڑوں سے جہاں چَھن کے ضیا تک نہیں آتی

یا جاتے ہوئے مجھ سے لپٹ جاتی تھیں شاخیں

یا میرے بلانے سے صبا تک نہیں آتی

کیا خشک ہُوا روشنیوں کا وہ سمندر

اب کوئی کرن‘ آبلہ پا تک نہیں آتی

چُھپ چُھپ کے سدا جھانکتی ہیں خلوتِ گُل میں

مہتاب کی کرنوں کو حیا تک نہیں آتی

یہ کون بتائے عدم آباد ہے کیسا!

ٹوٹی ہوئی قبروں سے صدا تک نہیں آتی

بہتر ہے‘ پلٹ جاؤ سیہ خانہِ غم سے

اس سرد گپھا میں تو ہوا تک نہیں آتی

شکیب جلالی

کیا کیا نہ عکس تیر رہے تھے سراب میں

مئی 31, 2021کلیاتِ شکیب جلالی ۔ غزلیں،شکیب جلالی،غزلماہتاب،کتاب،آفتاب،آب،حباب،خواب،سحاب،سراب،شرابadmin

اتریں عجیب روشنیاں رات خواب میں

کیا کیا نہ عکس تیر رہے تھے سراب میں

کب سے ہیں ایک حرف پہ نظریں جمی ہوئی

وہ پڑھ رہا ہوں جو نہیں لکھا کتاب میں

پانی نہیں کہ اپنے ہی چہرے کو دیکھ لوں

منظر زمیں کے ڈھونڈتا ہوں ماہتاب میں

پھر تیرگی کے خواب سے چونکا ہے راستہ

پھر روشنی سی دوڑ گئی ہے سحاب میں

کب تک رہے گا روح پہ پیراہنِ بدن

کب تک ہوا اسیر رہے گی حباب میں

یوں آئنہ بدست ملی پربتوں کی برف

شرما کے دھوپ لوٹ گئی آفتاب میں

جینے کے ساتھ موت کا ہے ڈر لگا ہوا

خشکی دکھائی دی ہے سمندر کو خواب میں

گزری ہے بار بار مرے سر سے موجِ خشک

ابھرا ہوا ہوں ڈوب کے تصویرِ آب میں

اک یاد ہے کہ چھین رہی ہے لبوں سے جام

اک عکس ہے کہ کانپ رہا ہے شراب میں

چوما ہے میرا نام لبِ سرخ سے شکیبؔ

یا پھول رکھ دیا ہے کسی نے کتاب میں

شکیب جلالی

پیش آتے ہیں رُعونت سے جفا کار یہاں

مئی 31, 2021کلیاتِ شکیب جلالی ۔ غزلیں،شکیب جلالی،غزلمنجدھار،یار،کار،پرخار،بیدار،بازار،جھنکار،دیوار،دشوار،رخسارadmin

عشق پیشہ نہ رہے داد کے حقد ار یہاں

پیش آتے ہیں رُعونت سے جفا کار یہاں

کشتیِ زیست سلامت ہے نہ پتوار یہاں

موج درموج ہیں سو رنگ کے منجدھار یہاں

سرپٹک کر درِ زنداں پہ صبا نے یہ کہا

ہے دریچہ‘ نہ کوئی روزنِ دیوار یہاں

عہد و پیمانِ وفا‘ پیار کے نازک بندھن

توڑ دیتی ہے زر و سیم کی جھنکار یہاں

ننگ و ناموس کے بکتے ہوئے انمول رتن

لَب و رخسار کے سجتے ہوئے بازار یہاں

سرخیِ دامنِ گُل کس کو میّسر آئی؟

اپنے ہی خوں میں نہائے لَب و رُخسار یہاں

ہم سفر چھوٹ گئے‘ راہنما رُوٹھ گئے

یوں بھی آسان ہوئی منزلِ دشوار یہاں

تیرگی ٹوٹ پڑی‘ زور سے بادل گرجا

بجھ گئی سہم کے قندیلِ رُخِ یار یہاں

کتنے طوفان اُٹھے‘ کتنے ستارے ٹوٹے

پھر بھی ڈُوبا نہیں اب تک دلِ بیدار یہاں

میرے زخمِ کفِ پا چومنے آئے گی بہار

میں اگر مر بھی گیا وادیِ پُرخار! یہاں

شکیب جلالی

دریا سے کوئی شخص تو پیاسا پلٹ گیا

مئی 31, 2021کلیاتِ شکیب جلالی ۔ غزلیں،شکیب جلالی،غزلہٹ،لپٹ،چھٹ،ڈٹ،کٹ،گھٹ،پلٹ،الٹ،بٹ،سمٹadmin

ساحل تمام اشکِ ندامت سے اٹ گیا

دریا سے کوئی شخص تو پیاسا پلٹ گیا

لگتا تھا بے کراں مجھے صحرا میں آسماں

پہونچا جو بستیوں میں تو خانوں میں بٹ گیا

یا اتنا سخت جان کہ تلوار بے اثر

یا اتنا نرم دل کہ رگِ گل سے کٹ گیا

بانہوں میں آ سکا نہ حویلی کا اک ستون

پتلی میں میری آنکھ کی صحرا سمٹ گیا

اب کون جائے کوئے ملامت کو چھوڑ کر

قدموں سے آ کے اپنا ہی سایہ لپٹ گیا

گنبد کا کیا قصور اسے کیوں کہوں برا

آیا جدھر سے تیر، ادھر ہی پلٹ گیا

رکھتا ہے خود سے کون حریفانہ کشمکش

میں تھا کہ رات اپنے مقابل ہی ڈٹ گیا

جس کی اماں میں ہوں وہ ہی اکتا گیا نہ ہو

بوندیں یہ کیوں برستی ہیں، بادل تو چھٹ گیا

وہ لمحہِ شعور جسے جانکنی کہیں

چہرے سے زندگی کے نقابیں الٹ گیا

ٹھوکر سے میرا پاؤں تو زخمی ہوا ضرور

رستے میں جو کھڑا تھا وہ کہسار ہٹ گیا

اک حشر سا بپا تھا مرے دل میں اے شکیبؔ

کھولیں جو کھڑکیاں تو ذرا شور گھٹ گیا

شکیب جلالی

سُورج ہوں ‘ میرا رنگ مگر دن ڈھلے بھی دیکھ

مئی 31, 2021کلیاتِ شکیب جلالی ۔ غزلیں،شکیب جلالی،غزلمجھے،ڈوبتے،ڈھلے،تلے،تبصرے،سامنےadmin

مُرجھا کے کالی جھیل میں گرتے ہوئے بھی دیکھ

سُورج ہوں ‘ میرا رنگ مگر دن ڈھلے بھی دیکھ

ہر چند راکھ ہو کے بکھرنا ہے راہ میں

جلتے ہوئے پروں سے اُڑا ہوں ‘ مجھے بھی دیکھ

عالم میں جس کی دھوم تھی‘ اس شاہ کار پر

دیمک نے جو لکھے کبھی وہ تبصرے بھی دیکھ

تو نے کہا نہ تھا کہ میں کشتی پہ بوجھ ہوں

آنکھوں کو اب نہ ڈھانپ‘ مجھے ڈوبتے بھی دیکھ

بچھتی تھیں جس کی راہ میں پھولوں کی چادریں

اب اس کی خاک گھاس کے پیروں تلے بھی دیکھ

کیا شاخِ با ثمر ہے جو تکتا ہے فرش کو

نظریں اُٹھا شکیبؔ‘ کبھی سامنے بھی دیکھ

شکیب جلالی

اپنے ہی اک خیال کا پیکر لگا مجھے

مئی 31, 2021کلیاتِ شکیب جلالی ۔ غزلیں،شکیب جلالی،غزلگھر،پیکر،پتھر،اجاگر،بنجر،بھر،جھالر،سمندر،سندرadmin

اس بت کدے میں تو جو حسیں تر لگا مجھے

اپنے ہی اک خیال کا پیکر لگا مجھے

جب تک رہی جگر میں لہو کی ذرا سی بوند

مٹھی میں اپنی بند سمندر لگا مجھے

مُرجھا گیا جو دل میں اجالے کا سرخ پھول

تاروں بھرا یہ کھیت بھی بنجر لگا مجھے

اب یہ بتا کہ روح کے شعلے کا کیا ہے رنگ

مرمر کا یہ لباس تو سندر لگا مجھے

کیا جانیے کہ اتنی اداسی تھی رات کیوں

مہتاب اپنی قبر کا پتھر لگا مجھے

آنکھوں کو بند کر کے بڑی روشنی ملی

مدھم تھا جو بھی نقش، اجاگر لگا مجھے

یہ کیا کہ دل کے دیپ کی لَو ہی تراش لی

سورج اگر ہے ، کرنوں کی جھالر لگا مجھے

صدیوں میں طے ہوا تھا بیاباں کا راستہ

گلشن کو لوٹتے ہوئے پل بھر لگا مجھے

میں نے ا سے شریکِ سفر کر لیا شکیبؔ

اپنی طرح سے چاند جو بے گھر لگا مجھے

شکیب جلالی

صحرا میں لوگ آئے ہیں دیوار و در کے ساتھ

مئی 31, 2021کلیاتِ شکیب جلالی ۔ غزلیں،شکیب جلالی،غزلنظر،کگر،کھنڈر،بھر،در،زر،شجرadmin

یادیں ہیں اپنے شہر کی اہل سفر کے ساتھ

صحرا میں لوگ آئے ہیں دیوار و در کے ساتھ

منظر کو دیکھ کر پس منظر بھی دیکھیے

بستی نئی بسی ہے پرانے کھنڈر کے ساتھ

سائے میں جان پڑ گئی دیکھا جو غور سے

مخصوص یہ کمال ہے اہلِ نظر کے ساتھ

اک دن ملا تھا بام پہ سورج کہیں جسے

الجھے ہیں اب بھی دھوپ کے ڈورے کگر کے ساتھ

اک یاد ہے کہ دامنِ دل چھوڑتی نہیں

اک بیل ہے کہ لپٹی ہوئی ہے شجر کے ساتھ

اس مرحلے کو موت بھی کہتے ہیں دوستو

اک پل میں ٹوٹ جائیں جہاں عمر بھر کے ساتھ

میری طرح یہ صبح بھی فنکار ہے شکیبؔ

لکھتی ہے آسماں پہ غزل آب زر کے ساتھ

شکیب جلالی

یہ سنّاٹا اگر حد سے بڑھے کہرام ہو جائے

مئی 31, 2021کلیاتِ شکیب جلالی ۔ غزلیں،شکیب جلالی،غزلنام،کہرام،اندام،شام،عامadmin

خموشی بول اُٹّھے‘ ہر نظر پیغام ہو جائے

یہ سنّاٹا اگر حد سے بڑھے کہرام ہو جائے

ستارے مشعلیں لے کر مجھے بھی ڈھونڈنے نکلیں

میں رستہ بھول جاؤں ‘ جنگلوں میں شام ہو جائے

میں وہ آدم گزیدہ ہوں جو تنہائی کے صحرا میں

خود اپنی چاپ سُن کر لرزہ بر اندام ہو جائے

مثال ایسی ہے اس دورِ خرد کے ہوش مندوں کی

نہ ہو دامن میں ذرّہ اور صحرا نام ہو جائے

شکیبؔ! اپنے تعارف کے لیے یہ بات کافی ہے

ہم اس سے بچ کے چلتے ہیں جو رستہ عام ہو جائے

شکیب جلالی

بھولا ہوا تھا دیر سے میں اپنے آپ کو

مئی 31, 2021کلیاتِ شکیب جلالی ۔ غزلیں،شکیب جلالی،غزلملاپ،چھاپ،آپ،الاپ،تھاپadmin

پھر سن رہا ہوں گزرے زمانے کی چاپ کو

بھولا ہوا تھا دیر سے میں اپنے آپ کو

رہتے ہیں کچھ ملول سے چہرے پڑوس میں

اتنا نہ تیز کیجیے ڈھولک کی تھاپ کو

اشکوں کی ایک نہر تھی جو خشک ہو گئی

کیوں کر مٹاؤں دل سے ترے غم کی چھاپ کو

کتنا ہی بے کنار سمندر ہو پھر بھی دوست

رہتا ہے بے قرار ندی کے ملاپ کو

پہلے تو میری یاد سے آئی حیا انہیں

پھر آئنے میں چوم لیا اپنے آپ کو

تعریف کیا ہو قامت دلدار کی شکیبؔ

تجسیم کر دیا ہے کسی نے الاپ کو

شکیب جلالی

مری طرح سے اکیلا دکھائی دیتا ہے

مئی 31, 2021کلیاتِ شکیب جلالی ۔ غزلیں،شکیب جلالی،غزلکیا،پیاسا،پتّا،اونچا،اکیلا،جزیرہ،سنہرا،سایا،شیشہadmin

جہاں تلک بھی یہ صحرا دکھائی دیتا ہے

مری طرح سے اکیلا دکھائی دیتا ہے

نہ اتنی تیز چلے سر پھری ہوا سے کہو

شجر پہ ایک ہی پتّا دکھائی دیتا ہے

برا نہ مانیے لوگوں کی عیب جوئی کا

انہیں تو دن کو بھی سایا دکھائی دیتا ہے

یہ ایک ابر کا ٹکڑا کہاں کہاں برسے

تمام دشت ہی پیاسا دکھائی دیتا ہے

وہیں پہنچ کے گرائیں گے بادباں اپنے

وہ دور کوئی جزیرہ دکھائی دیتا ہے

وہ الوداع کا منظر، وہ بھیگتی پلکیں

پسِ غبار بھی کیا کیا دکھائی دیتا ہے

مری نگاہ سے چھپ کر کہاں رہے گا کوئی

کہ اب تو سنگ بھی شیشہ دکھائی دیتا ہے

سمٹ کے رہ گئے آخر پہاڑ سے قدم بھی

زمیں سے ہر کوئی اونچا دکھائی دیتا ہے

کھلی ہے دل میں کسی کے بدن کی دھوپ شکیبؔ

ہر ایک پھول سنہرا دکھائی دیتا ہے

شکیب جلالی

ہر شے گزشتنی ہے مہ و سال کی طرح

مئی 31, 2021کلیاتِ شکیب جلالی ۔ غزلیں،شکیب جلالی،غزلمال،ڈھال،ڈال،پامال،خال،سال،شالadmin

تیز آندھیوں میں اڑتے پر وبال کی طرح

ہر شے گزشتنی ہے مہ و سال کی طرح

کیوں کر کہوں کہ درپئے آزار ہے وہی

جو آسماں ہے سر پہ مرے ڈھال کی طرح

یوں بے سبب تو کوئی انہیں پوجتا نہیں

کچھ تو ہے پتھروں میں خد و خال کی طرح

کیا کچھ کیا نہ خود کو چھپانے کے واسطے

عریانیوں کو اوڑھ لیا شال کی طرح

اب تک مرا زمین سے رشتہ ہے استوار

رہنِ ستم ہوں سبزہِ پامال کی طرح

میں خود ہی جلوہ ریز ہوں، خود ہی نگاہِ شوق

شفاف پانیوں پہ جھکی ڈال کی طرح

ہر موڑ پر ملیں گے کئی راہ زن شکیبؔ

چلیے چھپا کے غم بھی زر و مال کی طرح

شکیب جلالی

میں اس گلی میں اکیلا تھا اور سائے بہت

مئی 31, 2021کلیاتِ شکیب جلالی ۔ غزلیں،شکیب جلالی،غزللائے،پھڑپھڑائے،پائے،آئے،جمائے،جھلملائے،سائے،سرائےadmin

وہاں کی روشنیوں نے بھی ظلم ڈھائے بہت

میں اس گلی میں اکیلا تھا اور سائے بہت

کسی کے سر پہ کبھی ٹوٹ کرا گرا ہی نہیں

اس آسماں نے ہوا میں قدم جمائے بہت

نہ جانے رت کا تصرف تھا یا نظر کا فریب

کلی وہی تھی مگر رنگ جھلملائے بہت

ہوا کا رخ ہی اچانک بدل گیا ورنہ

مہک کے قافلے صحرا کی سمت آئے بہت

یہ کائنات ہے میری ہی خاک کا ذرہ

میں اپنے دشت سے گزارا تو بھید پائے بہت

جو موتیوں کی طلب نے کبھی اداس کیا

تو ہم بھی راہ سے کنکر سمیٹ لائے بہت

بس ایک رات ٹھہرنا ہے کیا گلہ کیجے

مسافروں کو غنیمت ہے یہ سرائے بہت

جمی رہے گی نگاہوں پہ تیرگی دن بھر

کہ رات خواب میں تارے اتر کے آئے بہت

شکیبؔ کیسی اڑان، اب وہ پر ہی ٹوٹ گئے

کہ زیرِ دام جب آئے تھے ، پھڑپھڑائے بہت

شکیب جلالی

جو کناروں میں سمٹ جائے وہ دریا ہی نہیں

مئی 31, 2021کلیاتِ شکیب جلالی ۔ غزلیں،شکیب جلالی،غزلمیرا،والا،گزرا،ٹھہرا،پھینکا،اترا،بیٹھا،دیکھا،دریا،زینہ،سراپاadmin

غمِ دل حیطہِ تحریر میں آتا ہی نہیں

جو کناروں میں سمٹ جائے وہ دریا ہی نہیں

اوس کی بوندوں میں بکھرا ہوا منظر جیسے

سب کا اس دور میں یہ حال ہے ، میرا ہی نہیں

برق کیوں ان کو جلانے پہ کمر بستہ ہے

مَیں تو چھاؤں میں کسی پیڑ کے بیٹھا ہی نہیں

اک کرن تھام کے میں دھوپ نگر تک پہنچا

کون سا عرش ہے جس کا کوئی زینہ ہی نہیں

کوئی بھولا ہوا چہرہ نظر آئے شاید

آئینہ غور سے تو نے کبھی دیکھا ہی نہیں

بوجھ لمحوں کا ہر اک سر پہ اٹھائے گزرا

کوئی اس شہر میں سستانے کو ٹھہرا ہی نہیں

سایہ کیوں جل کے ہوا خاک تجھے کیا معلوم

تو کبھی آگ کے دریاؤں میں اترا ہی نہیں

موتی کیا کیا نہ پڑے ہیں تہِ دریا لیکن

برف لہروں کی کوئی توڑنے والا ہی نہیں

اس کے پردوں پہ منقش تری آواز بھی ہے

خانہِ دل میں فقط تیرا سراپا ہی نہیں

حائلِ راہ تھے کتنے ہی ہوا کے پر بت

تو وہ بادل کہ مرے شہر سے گزرا ہی نہیں

یاد کے دائرے کیوں پھیلتے جاتے ہیں شکیبؔ

اس نے تالاب میں کنکر ابھی پھینکا ہی نہیں

شکیب جلالی

بہتر ہے خاک ڈالیے ایسی اُڑان پر

مئی 31, 2021کلیاتِ شکیب جلالی ۔ غزلیں،شکیب جلالی،غزلچٹان،نشان،آسمان،اڑان،بادبان،دکان،زبان،سائبانadmin

ہم جنس اگر ملے نہ کوئی آسمان پر

بہتر ہے خاک ڈالیے ایسی اُڑان پر

آ کر گرا تھا کوئی پرندہ لہُو میں تر

تصویر اپنی چھوڑ گیا ہے چٹان پر

پوچھو سمندروں سے کبھی خاک کا پتا

دیکھو ہوا کا نقش کبھی بادبان پر

یارو! میں اس نظر کی بلندی کو کیا کروں

سایہ بھی اپنا دیکھتا ہوں آسمان پر

کتنے ہی زخم ہیں مرے اک زخم میں چھپے

کتنے ہی تیر آنے لگے اک نشان پر

جل تھل ہوئی تمام زمیں آس پاس کی

پانی کی بوند بھی نہ گری سائبان پر

ملبوس خوش نما ہیں مگر جسم کھوکھلے

چھلکے سجے ہوں جیسے پھلوں کی دکان پر

سایہ نہیں تھا نیند کا آنکھوں میں دُور تک

بکھرے تھے روشنی کے نگیں آسمان پر

حق بات آ کے رُک سی گئی تھی کبھی‘ شکیبؔ

چھالے پڑے ہوئے ہیں ابھی تک زبان پر

شکیب جلالی

مُرجھا کے آ گرا ہوں مگر سرد گھاس میں

مئی 31, 2021کلیاتِ شکیب جلالی ۔ غزلیں،شکیب جلالی،غزللباس،مٹھاس،یاس،کلاس،گلاس،گھاس،پیاس،انعکاس،باسadmin

میں شاخ سے اڑا تھا ستاروں کی آس میں

مُرجھا کے آ گرا ہوں مگر سرد گھاس میں

سوچو تو سِلوٹوں سے بھری ہے تمام روح

دیکھو تو اک شکن بھی نہیں ہے لباس میں

صحرا کی بُود و باش ہے‘ اچھی نہ کیوں لگے

سُوکھی ہوئی گلاب کی ٹہنی گلاس میں

چمکے نہیں نظر میں ابھی نقش دُور کے

مصروف ہوں ابھی عملِ اِنعکاس میں

دھوکے سے اس حسیں کو اگر چُوم بھی لیا

پاؤ گے دل کا زہر لَبوں کی مٹھاس میں

تارہ کوئی رِدائے شبِ ابر میں نہ تھا

بیٹھا تھا میں اداس بیابانِ یاس میں

جُوئے روانِ دشت! ابھی سُوکھنا نہیں

ساون ہے دُور اور وہی شدّت ہے پیاس میں

رہتا تھا سامنے ترا چہرہ کھلا ہُوا

پڑھتا تھا میں کتاب یہی ہر کلاس میں

کانٹوں کی باڑ پھاند گیا تھا مگر‘ شکیبؔ

رستہ نہ مل سکا مجھے پھولوں کی باس میں

شکیب جلالی

دوستو‘ پانی کبھی رکتا نہیں ڈھلوان پر

مئی 31, 2021کلیاتِ شکیب جلالی ۔ غزلیں،شکیب جلالی،غزلمیدان،ڈھلوان،گلدان،آتشدان،دالان،دان،ریگستانadmin

درد کے موسم کا کیا ہو گا اثر انجان پر

دوستو‘ پانی کبھی رکتا نہیں ڈھلوان پر

آج تک اس کے تعاقب میں بگولے ہیں رَواں

اَبر کا ٹکڑا کبھی برسا تھا ریگستان پر

میں جو پَربت پر چڑھا‘ وہ اور اُونچا ہو گیا

آسماں جُھکتا نظر آیا مجھے میدان پر

کمرے خالی ہو گئے‘ سایوں سے آنگن بھر گیا

ڈُوبتے سورج کی کرنیں جب پڑیں دالان پر

اب یہاں کوئی نہیں ہے‘ کس سے باتیں کیجیے

یہ مگر چُپ چاپ سی تصویر آتشدان پر

آج بھی شاید کوئی پھولوں کا تحفہ بھیج دے

تتلیاں منڈلا رہی ہیں کانچ کے گلدان پر

بس چلے تو اپنی عریانی کو اس سے ڈھانپ لوں

نیلی چادر سی تنی ہے جو کُھلے میدان پر

وہ خموشی انگلیاں چٹخا رہی تھی‘ اے شکیبؔ

یا کہ بوندیں بج رہی تھیں رات روشن دان پر

شکیب جلالی

گماں گزرتا ہے‘ یہ شخص دوسرا ہے کوئی

مئی 31, 2021کلیاتِ شکیب جلالی ۔ غزلیں،شکیب جلالی،غزلڈوبتا،گیا،آشنا،جگا،دوسرا،دیا،صداadmin

کنارِ آب کھڑا خود سے کہہ رہا ہے کوئی

گماں گزرتا ہے‘ یہ شخص دوسرا ہے کوئی

ہَوا نے توڑ کے پتّہ زمیں پہ پھینکا ہے

کہ شب کی جھیل میں پتّھر گرا دیا ہے کوئی!

بٹا سکے ہیں پڑوسی کسی کا درد کبھی!

یہی بہت ہے کہ چہرے سے آشنا ہے کوئی

درخت راہ بتائیں ہلا ہلا کر ہاتھ

کہ قافلے سے مُسافر بچھڑ گیا ہے کوئی

چُھڑا کے ہاتھ بہت دور بہہ گیا ہے چاند

کسی کے ساتھ سمندر میں ڈُوبتا ہے کوئی

یہ آسمان سے ٹوٹا ہُوا ستارہ ہے

کہ دشتِ شب میں بھٹکتی ہوئی صدا ہے کوئی!

مکان اور نہیں ہے‘ بدل گیا ہے مکیں

افق وہی ہے مگر چاند دوسرا ہے کوئی

فصیلِ جسم پہ تازہ لہو کے چھینٹے ہیں

حُدودِ وقت سے آگے نکل گیا ہے کوئی

شکیبؔ‘ دیپ سے لہرا رہے ہیں پلکوں پر

دیارِ چشم میں کیا آج رَت جگا ہے کوئی!

شکیب جلالی

پستی سے ہم کنار ملے کوہ سار بھی

مئی 31, 2021کلیاتِ شکیب جلالی ۔ غزلیں،شکیب جلالی،غزلوار،گزار،پکار،پار،آبشار،انتظار،تار،سار،شرار،غبارadmin

آیا ہے ہر چڑھائی کے بعد اک اُتار بھی

پستی سے ہم کنار ملے کوہ سار بھی

آخر کو تھک کے بیٹھ گئی اِک مقام پر

کچھ دور میرے ساتھ چلی رہ گزار بھی

دل کیوں دھڑکنے لگتا ہے ابھرے جو کوئی چاپ

اب تو نہیں کسی کا مجھے انتظار بھی

جب بھی سُکوتِ شام میں آیا ترا خیال

کچھ دیر کو ٹھہر سا گیا آبشار بھی

کچھ ہو گیا ہے دھوپ سے خاکستری بدن

کچھ جم گیا ہے راہ کا مجھ پر غبار بھی

اس فاصلوں کے دشت میں رہبر وہی بنے

جس کی نگاہ دیکھ لے صدیوں کے پار بھی

اے دوست‘ پہلے قرب کا نشّہ عجیب تھا

میں سُن سکا نہ اپنے بدن کی پکار بھی

رستہ بھی واپسی کا کہیں بن میں کھو گیا

اوجھل ہوئی نگاہ سے ہرنوں کی ڈار بھی

کیوں رو رہے ہو راہ کے اندھے چراغ کو!

کیا بجھ گیا ہوا سے لہو کا شرار بھی؟

کچھ عقل بھی ہے باعثِ توقیر‘ اے شکیبؔ

کچھ آ گئے ہیں بالوں میں چاندی کے تار بھی

شکیب جلالی

وہ رینگنے لگی کشتی‘ وہ بادبان کُھلا

مئی 31, 2021کلیاتِ شکیب جلالی ۔ غزلیں،شکیب جلالی،غزلمکان،آن،آسمان،بادبان،جہان،جان،زبانadmin

وہ دُوریوں کا رہِ آب پر نشان کُھلا

وہ رینگنے لگی کشتی‘ وہ بادبان کُھلا

مرے ہی کان میں سرگوشیاں سُکوت نے کیں

مرے سوا بھی کسی سے یہ بے زبان کُھلا

سمجھ رہا تھا ستارے جنھیں ‘ وہ آنکھیں ہیں

مری طرف نِگراں ہیں کئی جہان‘ کُھلا

مرا خزانہ ہے محفوظ میرے سینے میں

میں سو رہوں گا یونہی چھوڑ کر مکان کُھلا

ہر آن میرا نیا رنگ ہے یوں ہی‘ نیا چہرہ

وہ بھید ہوں جو کسی سے نہ میری جان‘ کُھلا

جزا کہیں کہ سزا‘ اس کو بال و پَر والے

زمیں سکڑتی گئی‘ جتنا آسمان کُھلا

لہو لہو ہوں سلاخوں سے سر کو ٹکرا کر

شکیبؔ‘ بابِ قفس‘ کیا کہوں ‘ کس آن کُھلا

شکیب جلالی

کبھی چراغ بھی جلتا ہے اس حویلی میں ؟

مئی 31, 2021کلیاتِ شکیب جلالی ۔ غزلیں،شکیب جلالی،غزلمٹھّی،کشتی،گھاٹی،پگڑی،پانی،انگیٹھی،بستی،حویلی،دھرتیadmin

خزاں کے چاند نے پوچھا یہ جُھک کے کھڑکی میں

کبھی چراغ بھی جلتا ہے اس حویلی میں ؟

یہ آدمی ہیں کہ سائے ہیں آدمیت کے

گزر ہُوا ہے مرا کس اُجاڑ بستی میں !

جُھکی چٹان‘ پھسلتی گرفت‘ جُھولتا جسم

میں اب گرا ہی گرا تنگ و تار گھاٹی میں

زمانے بھر سے نرالی ہے آپ کی منطِق

ندی کو پار کیا کس نے الٹی کشتی میں

جلائے کیوں ! اگر اتنے ہی قیمتی تھے خطوط

کریدتے ہو عبث راکھ اب انگیٹھی میں

عجب نہیں جو اُگیں یاں درخت پانی کے

کہ اشک بوئے ہیں شب بھر کسی نے دھرتی میں

مری گرفت میں آ کر نِکل گئی تِتلی

پروں کے رنگ مگر رہ گئے ہیں مُٹھّی میں

چلو گے ساتھ مرے‘ آگہی کی سرحد تک؟

یہ رہ گزار اترتی ہے گہرے پانی میں

میں اپنی بے خبری سے‘ شکیبؔ‘ واقف ہوں

بتاؤ پیچ ہیں کتنے تمھاری پگڑی میں

شکیب جلالی

مگر وہ پھول سا چہرہ نظر نہ آتا تھا

مئی 31, 2021کلیاتِ شکیب جلالی ۔ غزلیں،شکیب جلالی،غزللکھا،نوحہ،چشمہ،گھیرا،ٹکڑا،پھیلا،آتا،بیٹھا،دھبا،رہتا،ساداadmin

وہی جھکی ہوئی بیلیں، وہی دریچہ تھا

مگر وہ پھول سا چہرہ نظر نہ آتا تھا

میں لوٹ آیا ہوں خاموشیوں کے صحرا سے

وہاں بھی تیری صدا کا غبار پھیلا تھا

قریب تیر رہا تھا بطخوں کا ایک جوڑا

میں آب جو کے کنارے اداس بیٹھا تھا

شب سفر تھی قبا تیرگی کی پہنے ہوئے

کہیں کہیں پہ کوئی روشنی کا دھبا تھا

بنی نہیں جو کہیں پر، کلی کی تربت تھی

سنا نہیں جو کسی نے ، ہوا کا نوحہ تھا

یہ آڑی ترچھی لکیریں بنا گیا ہے کون

میں کیا کہوں مرے دل کا ورق تو سادا تھا

میں خاکداں سے نکل کر بھی کیا ہوا آزاد

ہر اک طرف سے مجھے آسماں نے گھیرا تھا

اتر گیا ترے دل میں تو شعر کہلایا

میں اپنی گونج تھا اور گنبدوں میں رہتا تھا

ادھر سے بار ہا گزرا مگر خبر نہ ہوئی

کہ زیرِ سنگ خنک پانیوں کا چشمہ تھا

وہ اس کا عکس بدن تھا کہ چاندنی کا کنول

وہ نیلی جھیل تھی یا آسماں کا ٹکڑا تھا

میں ساحلوں میں اترا کر شکیبؔ کیا لیتا

ازل سے نام مرا پانیوں پہ لکھا تھا

شکیب جلالی

یہ بستیوں کی فضا کیوں دھواں اگلنے لگی

مئی 31, 2021کلیاتِ شکیب جلالی ۔ غزلیں،شکیب جلالی،غزلمچلنے،چلنے،نکلنے،ڈھلنے،پگھلنے،پھسلنے،اگلنے،بدلنے،جلنے،سنبھلنےadmin

شفق جو رُوے سحر پر گلال ملنے لگی

یہ بستیوں کی فضا کیوں دھواں اگلنے لگی

اسی لیے تو ہوا رو پڑی درختوں میں

ابھی میں کھِل نہ سکا تھا کہ رُت بدلنے لگی

اتر کے ناؤ سے بھی کب سفر تمام ہُوا

زمیں پہ پاؤں دھرا تو زمین چلنے لگی

کسی کا جسم اگر چھُو لیا خیال میں بھی

تو پور پور مری‘ مثلِ شمع جلنے لگی

میں ناپتا چلا قدموں سے اپنے سائے کو

کبھی جو دشتِ مسافت میں دھوپ ڈھلنے لگی

مری نگاہ میں خواہش کا شائبہ بھی نہ تھا

یہ برف سی ترے چہرے پہ کیوں پگھلنے لگی

ہَوا چلی سرِ صحرا‘ تو یوں لگا‘ جیسے

ردائے شام مرے دوش سے پھسلنے لگی

کہیں پڑا نہ ہو پَرتَو بہارِ رفتہ کا

یہ سبز بوند سی پلکوں پہ کیا مچلنے لگی

نہ جانے کیا کہا اس نے بہت ہی آہستہ

فضا کی ٹھہری ہوئی سانس پھر سے چلنے لگی

جو دل کا زہر تھا کاغذ پہ سب بکھیر دیا

پھر اپنے آپ طبیعت مری سنبھلنے لگی

جہاں شجر پہ لگا تھا تبر کا زخم‘ شکیبؔ

وہیں پہ دیکھ لے‘ کونپل نئی نکلنے لگی

شکیب جلالی

جتنے اس پیڑ کے پھل تھے‘ پسِ دیوار گرے

مئی 31, 2021کلیاتِ شکیب جلالی ۔ غزلیں،شکیب جلالی،غزلچھتنار،ناچار،کار،پتوار،پرستار،بردار،تلوار،دیوار،دھار،دستارadmin

آ کے پتّھر تو مرے صحن میں دو چار گرے

جتنے اس پیڑ کے پھل تھے‘ پسِ دیوار گرے

ایسی دہشت تھی فضاؤں میں کُھلے پانی کی

آنکھ جھپکی بھی نہیں ‘ ہاتھ سے پتوار گرے

مجھے گرنا ہے تو میں اپنے ہی قدموں میں گروں

جس طرح سایہِ دیوار پہ دیوار گرے

تیرگی چھوڑ گئے دل میں اجالے کے خطوط

یہ ستارے مرے گھر ٹوٹ کے بے کار گرے

کیا ہَوا ہاتھ میں تلوار لیے پھرتی تھی

کیوں مجھے ڈھال بنانے کو یہ چھتنار گرے

دیکھ کر اپنے دروبام‘ لرز جاتا ہوں

میرے ہم سائے میں جب بھی کوئی دیوار گرے

وقت کی ڈور خدا جانے کہاں سے ٹوٹے

کس گھڑی سر پہ یہ لٹکی ہوئی تلوار گرے

ہم سے ٹکرا گئی خود بڑھ کے اندھیرے کی چٹان

ہم سنبھل کر جو بہت چلتے تھے‘ ناچار گرے

کیا کہوں دیدہِ تر‘ یہ تو مرا چہرہ ہے

سنگ کٹ جاتے ہیں ‘ بارش کی جہاں دھار گرے

ہاتھ آیا نہیں کچھ رات کی دلدل کے سوا

ہائے کس موڑ پہ خوابوں کے پرستار گرے

وہ تجلّی کی شعاعیں تھیں کہ جلتے ہوئے تیر

آئنے ٹوٹ گئے‘ آئنہ بردار گرے

دیکھتے کیوں ہو شکیبؔ! اتنی بلندی کی طرف

نہ اٹھایا کرو سر کو کہ یہ دستار گرے

شکیب جلالی

ہرا بھرا بدن اپنا درخت ایسا تھا

مئی 31, 2021کلیاتِ شکیب جلالی ۔ غزلیں،شکیب جلالی،غزللخت،کرخت،تخت،درخت،رخت،سختadmin

گلے ملا نہ کبھی چاند بخت ایسا تھا

ہرا بھرا بدن اپنا درخت ایسا تھا

ستارے سسکیاں بھرتے تھے اوس روتی تھی

فسانہِ جگرِ لخت لخت ایسا تھا

ذرا نہ موم ہوا پیار کی حرارت سے

چٹخ کے ٹوٹ گیا، دل کا سخت ایسا تھا

یہ اور بات کہ وہ لب تھے پھول سے نازک

کوئی نہ سہہ سکے ، لہجہ کرخت ایسا تھا

کہاں کی سیس نہ کی توسنِ تخیّل پر

ہمیں تو یہ بھی سلیماں کے تخت ایسا تھا

ادھر سے گزرا تھا ملکِ سخن کا شہزادہ

کوئی نہ جان سکا ساز و رخت ایسا تھا

شکیب جلالی

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں: