ترے اسیرِ جفا کی ہے داستاں خاموش

سکونِ قلب گریزاں ہے ہر فغاں خاموش

تری جفا پہ بھلا کس کو جراتِ فریاد

زمیں تھی محوِ تماشا و آسماں خاموش

شبِ فراق کے ماروں کو دیکھ کر مایوس

چلا فَلَک سے ستاروں کا کارواں خاموش

بیانِ غم پہ مرے سب رہے ترے ہمساز

ہر ایک گوش بر آواز و ہر زباں خاموش

شکست و فتح و نشیب و فراز کے ہمراز

یہ زخمہائے جگر مثلِ کہکشاں خاموش

جفائے یار لباسِ وفا میں تھی ملبوس

سو لے کے آگئے ضامنِؔ یہ ارمغاں خاموش

ضامن جعفری