جہاں میں ہُوں ہر اِک بے آسرا محسوس ہوتا ہے

زمیں زیرِ قَدَم سَر پَر خدا محسوس ہوتا ہے

شَجَر کی یاد نے پوچھا ہے ہم سے دَشتِ غُربَت میں

نہیں ہے سَر پہ اَب سایہ تَو کیا محسوس ہوتا ہے

میں کِس رَستے سے تجھ تَک آؤں کہ تُو دَنگ رہ جائے

ہر اِک رَستے پہ کوئی نقشِ پا محسوس ہوتا ہے

ہمارے شعر سُن کر اُن پہ خاموشی سی ہے طاری

سکوتِ ذات میں شورِ اَنا محسوس ہوتا ہے

جُدا ہو راہ و منزل سَب کی اُس کو بِھیڑ کہتے ہیں

نہ جانے آپ کو کیوں قافلہ محسوس ہوتا ہے

کسی کو جب غزل میری سُناتا ہے کوئی ضامنؔ

وہ کہتا ہے یہ کوئی دِل جَلا محسوس ہوتا ہے

ضامن جعفری