گو بیاباں میں ہوں اور بے بس و بے یار ہوں میں

بختِ خوابیدہ غنیمت ہے کہ بیدار ہوں میں

شانِ مصروفیت آوارگی میں بھی تھی کچھ

گھر میں ہر چند کہ مصروف ہوں بیکار ہوں میں

اُسی طوفان کی اک لہر مری ناؤ بنی

تم اُدھر ڈھونڈ رہے ہو مجھے اِس پار ہوں میں

مٹ گئے سینکڑوں اقرار حمایت کے تری

آج بھی گونج رہا ہے جو وہ انکار ہوں میں

میرے بارے میں کبھی فرض نہ کر لینا کچھ

سرِ تسلیم کبھی ہوں کبھی تلوار ہوں میں

باصر کاظمی