ماجد صدیقی ۔ غزل نمبر 159

آنگنوں سے چاند پھر آگے نکل جانے لگا

دیکھ سارے شہر کا نقشہ بدل جانے لگا

ہم بھلا تصویر کیا کھینچیں گرفتِ وقت کی

سانپ چڑیا کو سلامت ہی نِگل جانے لگا

دل تمّنا کے بر آنے پر ہے یُوں مسرور سا

جس طرح سِکّہ کوئی کھوٹا ہو چل جانے لگا

زور وُہ اب کے دکھایا ہے ہمیں امواج نے

تختۂ جاں تک بدن سے ہے اچھل جانے لگا

چرخ سے وُہ حدّتیں برسیں کہ اَب ایسا لگے

چاندنی سے بھی بدن جیسے ہو جل جانے لگا

چیونٹیوں سا تو بھلا درپے ہے کیوں اِس کوہ کے

کب مزاجِ دہر ہے ماجدؔ بدل جانے لگا

ماجد صدیقی