آفتاب اقبال شمیم ۔ غزل نمبر 56

جو چوب و خِشت بہم ہوں تو ایک گھر بن جائے

گھروں کو جوڑ دیا جائے تو نگر بن جائے

ہر ابتلائے زمیں دُور ہو بھی سکتی ہے

یہ اژدہام اگر ایک ہی بشر بن جائے

خدا نصیب کرے بادِ سازگار اِسے

یہ چوب خشک کا پیکر کبھی شجر بن جائے

سفر بھی ختم نہ ہو، منزلیں بھی ساتھ چلیں

اگر یہ راہگزر تیری رہگزر بن جائے

مجھے بھی مژدہ ملے میری تاج پوشی کا

محبتوں کی قلم رو کہیں اگر بن جائے

آفتاب اقبال شمیم