آفتاب اقبال شمیم ۔ غزل نمبر 50

نظر یوں شام آئی، ڈوبتی کرنوں کی چلمن سے

کہ جیسے پیرہن سرکے، کسی کے سانولے تن سے

میں اپنی پستیوں میں رہ ہی لیتا مطمئن ہو کر

مگر یہ آسماں ہٹتا نہیں ہے میرے روزن سے

توقع اُس سے رکھیں معتدل ہی دوست داری کی

وہ جس نے ٹوٹ کر نفرت نہ کی ہو اپنے دشمن سے

مکاں کی تنگیوں میں وسعتوں کی روشنی آئے

ہٹاؤ بھی ذرا یہ پردۂ دیوار، آنگن سے

سفر کا تجربہ، اتلاف مال جاں کے بدلے میں

بطورِ رختِ فردا، ہم بچا لائے ہیں رہزن سے

سفر در پیش ہے شاید خزاں کی خیمہ بستی کا

ہوا ہجرت کی باتیں کر رہی ہے اہل گلشن سے

یہی بےمعنویت، غالباً حاصل ہے جذبوں کا

ہمیشہ راکھ سی اڑتی رہے شعلے کے دامن سے

خلل شاید کبھی ربِ نمُو کی نیند میں آئے

گرائے جا شرر بیداریوں کے چشمِ روشن سے

آفتاب اقبال شمیم