آفتاب اقبال شمیم ۔ غزل نمبر 15

یہی کہ سہم اٹھاؤ اجاڑ عمروں کا

صحیح ہوا ہے نہ ہو گا بگاڑ عمروں کا

تجھے پتہ تو چلے اصل واقعہ کیا ہے

غبار چہرۂ ہستی سے جھاڑ عمروں کا

پڑی ہیں بیڑیاں پاؤں میں اپنے ہونے کی

رواں ہوں پشت پہ لا دے پہاڑ عمروں کا

سفر بھی ہونے نہ ہونے کا اک تسلسل ہے

یہاں لگا، وہاں خیمہ اکھاڑ عمروں کا

یہاں سے دیکھ تماشا ہجوم رفتہ کا

بدن سے جامۂ نازیب پھاڑ عمروں کا

نہ ہو یہ وقت پیامِ بقا کے آنے کا!

لہذا کھول کے رکھو کواڑ عمروں کا

آفتاب اقبال شمیم