عرفان صدیقی ۔ غزل نمبر 333

حق اُن کے ساتھ حق کی رضا اُن کے ساتھ ہے

تنہا نہیں ہیں وہ کہ خدا اُن کے ساتھ ہے

گل کر دیے ہیں دست جفا نے جہاں چراغ

اُن راستوں میں شمع وفا اُن کے ساتھ ہے

حر آرہے ہیں شمر سے شبیر کی طرف

اس معرکے میں بخت رسا اُن کے ساتھ ہے

کرتے ہیں اہل صبر و رضا اپنی صف درست

دل مطمئن ہیں قبلہ نما اُن کے ساتھ ہے

پیاسا نہ جان اُن کو تو اے نہر کم نصیب

راہ وفا میں آب بقا اُن کے ساتھ ہے

اُن کو سفر میں باد ستم گر کا ڈر نہیں

شہر نبی کی موج صبا اُن کے ساتھ ہے

عرفان صدیقی