عرفان صدیقی ۔ غزل نمبر 309

کام اس شکوۂ تنہائی سے کیا چلتا ہے

تو اکیلا ہے کہ دُنیا سے جدا چلتا ہے

رنگ آسان ہیں پہچان لیے جاتے ہیں

دیکھنے سے کہیں خوشبو کا پتا چلتا ہے

لہر اُٹّھے کوئی دل میں تو کنارے لگ جائیں

یہ سمندر ہے یہاں حکمِ ہوا چلتا ہے

پاؤں میں خاک کی زنجیر پڑی ہے کب سے

ہم کہاں چلتے ہیں نقشِ کفِ پا چلتا ہے

شہر در شہر دواں ہے مری فریاد کی گونج

مجھ سے آگے مرا رہوارِ صدا چلتا ہے

اس خرابے میں بھی ہوجائے گی دُنیا آباد

ایک معمورہ پسِ سیلِ بلا چلتا ہے

عرفان صدیقی