عرفان صدیقی ۔ غزل نمبر 235

قدم اُٹھے تو گلی سے گلی نکلتی رہی

نظر دیئے کی طرح چوکھٹوں پہ جلتی رہی

کچھ اَیسی تیز نہ تھی اُس کے اِنتظار کی آنچ

یہ زندگی ہی مری برف تھی پگھلتی رہی

سروں کے پھول سرِ نوکِ نیزہ ہنستے رہے

یہ فصل سوکھی ہوئی ٹہنیوں پہ پھلتی رہی

ہتھیلیوں نے بچایا بہت چراغوں کو

مگر ہوا ہی عجب زاویے بدلتی رہی

دیارِ دِل میں کبھی صبح کا گجر نہ بجا

بس ایک دَرد کی شب ساری عمر ڈھلتی رہی

میں اَپنے وقت سے آگے نکل گیا ہوتا

مگر زمیں بھی مرے ساتھ ساتھ چلتی رہی

عرفان صدیقی