عرفان صدیقی ۔ غزل نمبر 200

سوائے خاک مری دسترس میں کچھ بھی نہیں

کہ فرق حاصلِ عشق و ہوس میں کچھ بھی نہیں

یہ کون مجھ کو پسِ جشنِ شب پکارتا ہے

وہ ہوک ہے کہ صدائے جرس میں کچھ بھی نہیں

میں کارِ عشق سے ترکِ وفا سے باز آیا

سب اس کے ہاتھ میں ہے میرے بس میں کچھ بھی نہیں

ذرا سے لمسِ شرر سے عجب کمال کیا

میں سوچتا تھا مرے خار و خس میں کچھ بھی نہیں

نوائے درد پہ آتا ہے رنگ صدیوں میں

ابھی مرے سخن نیم رس میں کچھ بھی نہیں

عرفان صدیقی