عرفان صدیقی ۔ غزل نمبر 166

تول مت مجھ کو کہ پاسنگ بہت ہے مجھ میں

میں بھی سونا ہوں مگر زنگ بہت ہے مجھ میں

آؤ میں تم کو تمہارے کئی چہرے دکھلاؤں

آئنہ خانہ ہوں‘ نیرنگ بہت ہے مجھ میں

میرا دشمن مرے سینے سے اترتا ہی نہیں

غالباً حوصلۂ جنگ بہت ہے مجھ میں

اس نے کیا سوچ کے چھیڑا تھا‘ میں کیا بول اٹھا

تار کوئی غلط آہنگ بہت ہے مجھ میں

اتنی افسردہ نہ ہو کوچۂ قاتل کی ہوا

چھو کے تو دیکھ‘ ابھی رنگ بہت ہے مجھ میں

عرفان صدیقی