عرفان صدیقی ۔ غزل نمبر 132

موج گل ہے نہ کہیں آب رواں ہے جاناں

ساتھ ہے کوئی تو عمر گزراں ہے جاناں

ابھی آتا ہے نظر چاند میں چہرہ تیرا

ایک دو پل میں یہ منظر بھی دھواں ہے جاناں

تو جو بولے تو سنوں میں تری آواز کا سچ

ہر طرف خاموشی وہم و گماں ہے جاناں

موسم ہجر سے اس درجہ سبک سار ہے دل

اس پہ اب حرف محبت بھی گراں ہے جاناں

آج تک جو نہ کیا اس کی تلافی کے لیے

اب یہ ذکر لب و رخسار بتاں ہے جاناں

ہم کچھ اس طرح سناتے ہیں کہانی اپنی

کوئی سمجھے کہ حدیث دگراں ہے جاناں

جو کبھی تونے کہا اور نہ کبھی ہم نے سنا

وہی اک لفظ تو سرنامۂ جاں ہے جاناں

عرفان صدیقی