عرفان صدیقی ۔ غزل نمبر 37

بھرا ہے اشک ندامت سے جام پانی کا

قبول تشنہ دلاں ہو سلام پانی کا

زیارت در خیمہ نہ تھی نصیب فرات

سو آج تک ہے سفر ناتمام پانی کا

رگ گلو نے بجھائی ہے تیغ ظلم کی پیاس

کیا ہے خون شہیداں نے کام پانی کا

علم ہوا سر نیزہ جو ایک مشکیزہ

شجر لگا سر صحرائے شام پانی کا

اگر وہ تشنگئ لازوال یاد رہے

کبھی نہ آئے زبانوں پہ نام پانی کا

اُسے تلاش نہ کر دشت کربلا میں کہ ہے

ہمارے دیدۂ تر میں قیام پانی کا

عرفان صدیقی