منصور آفاق ۔ غزل نمبر 344

مناسب اتنا نہیں اعتدال کمرے میں

ہرا بھرا کوئی قالین ڈال کمرے میں

کسی ستم زدہ روزن سے آتو سکتی تھی

ذرا سی دیر کو صبحِ وصال کمرے میں

لٹک رہاتھا دریچے میں بھیڑیے کا بت

دکھائی دیتا تھا کوئی غزال کمرے میں

بس اس لئے کہ سپاہی بہت زیادہ تھے

تھی تاج پوشی کی تقریب ہال کمرے میں

اسے بھی زاویے سیدھے کمر کے کرنے تھے

مجھے بھی آیا تھا یہ ہی خیال کمرے میں

بلٹ پروف محافظ تھے ہر طرف لیکن

گزر رہے تھے حکومت کے سال کمرے میں

ہر ایک شے میں اداسی ہے شام کی منصور

اتر رہا ہے نظر سے ملال کمرے میں

منصور آفاق