منصور آفاق ۔ غزل نمبر 11

نکھری صبحیں ، بکھری شامیں ، راتیں ہیں سنسان

کیا جانے کس اور گئے ہیں خوابوں کے مہمان

سرمایہ ہیں تیرے سپنے ، حاصل تیرے خواب

تیری یاد کا چہرہ میری ذات کی ہے پہچان

کاش کوئی آ،تاپے اپنی نرم و ملائم شام

روح میں جلتا دیکھوں دن بھر غم کا آتش دان

کس کا چہرہ جنس زدہ ہے ، کس کا جسم غلیظ

کون زمیں کی پیٹھ پہ پھوڑا تُو یا پاکستان

تیس برس کی اک لڑکی کا جیسے کومل جسم

دوبالشت جب ہوجائے منصور سنہری دھان

منصور آفاق