منصور آفاق ۔ غزل نمبر 312

دریچوں سے سیہ پردوں کو سرکاتا ہوا میں

پسند آیا ،ہوا میں دھوپ پھیلاتا ہوا میں

وہی ہوں میں مجھے پہچان دن کی روشنی میں

وہی تیرے مسلسل خواب میں آتا ہوا میں

کسی منہ زور تتلی کا تعاقب کر رہا ہوں

یہ خوشبو کی طرح پھولوں میں چکراتا ہوا میں

تمنا ہے رہوں جاگیر میں اپنی ہمیشہ

زمیں پر گفتگو کے پھول مہکاتا ہوا میں

جہاں کوکس لئے منصوردیتا ہوں دکھائی

کہیں آتا ہوا میں اور کہیں جاتا ہوا میں

منصور آفاق