منصور آفاق ۔ غزل نمبر 498

ہر لمحہ تازہ قتل کا امکان کس لئے

وحشت میں مبتلا ہوا انسان کس لئے

میں سوچتا ہوں دیکھ کے اڑتے ہوئے پرند

لایا ہوں ہفتہ بھر کا یہ سامان کس لئے

شاخیں لدی ہوئی ہیں گلابوں سے غیر کی

خالی ہے میری ذات کا گلدان کس لئے

جنت نما ہیں اہل ستم کی ریاستیں

اپنے دیارِ زندگی ویران، کس لئے

رائج جہاں میں کیوں ہوئی جنگل کی شہریت

کچھ بھیڑیاصفت ہوئے سلطان کس لئے

کیا جانوں کس نے پیٹھ لگائی تھی اس کے ساتھ

پھیلا ہوا پیڑ میں سرطان کس لئے

آخر کہاں گئی ہیں وہ کرنیں وہ گرم دھوپ

ویراں پڑا ہوا ہے یہ دالان کس لئے

آسیب پھر رہا ہے کوئی میرے ساتھ ساتھ

ہونے لگا ہے روزہی نقصان کس لئے

جاتے نہیں ہیں لوٹ کے اپنے ستاروں پر

منصور کائنات کے مہمان کس لئے

منصور آفاق