منصور آفاق ۔ غزل نمبر 150

برف کی شال میں لپٹی ہوئی صرصر کی طرح

زندگی مجھ سے ملی پچھلے دسمبر کی طرح

کس طرح دیکھنا ممکن تھا کسی اور طرف

میں نے دیکھا تھا اُسے آخری منظر کی طرح

ہاتھ رکھ ، لمس بھری تیز نظر کے آگے

چیرتی جاتی ہے سینہ مرا خنجر کی طرح

بارشیں اس کا لب و لہجہ پہن لیتی تھیں

شور کرتی تھی وہ برسات میں جھانجر کی طرح

کچی مٹی کی مہک اوڑھ کے اِتراتی تھی

میں پہنتا تھا اسے گرم سمندر کی طرح

پلو گرتا ہوا ساڑھی کا اٹھا کر منصور

چلتی ہے چھلکی ہوئی دودھ کی گاگر کی طرح

منصور آفاق