منصور آفاق ۔ غزل نمبر 391

ایٹمی جنگ میں سوختہ خواب تسخیر کے ہیں

خوف دونوں طرف ایک لمحے کی تا خیر کے ہیں

وقت کی گیلری میں مکمل ہزاروں کی شکلیں

صرف ٹوٹے ہوئے خال و خد میری تصویر کے ہیں

شہر بمبار طیارے مسمار کرتے رہیں گے

شوق دنیا کو تازہ مکانوں کی تعمیر کے ہیں

ایک مقصد بھری زندگی وقت کی قید میں ہے

پاؤں پابند صدیوں سے منزل کی زنجیر کے ہیں

ایک آواز منصور کاغذ پہ پھیلی ہوئی ہے

میرے سناٹے میں شور خاموش تحریر کے ہیں

منصور آفاق