منصور آفاق ۔ غزل نمبر 415

پاؤں کی وحشت بچھاتی جا رہی ہے راستہ

جیپ جنگل میں بناتی جا رہی ہے راستہ

احتراماً چل رہا ہوں میں سڑک کے ساتھ ساتھ

اور سڑک ہے کہ بڑھاتی جا رہی ہے راستہ

اک بڑی اونچی پہاڑی رفتہ رفتہ ہاتھ سے

میرے پاؤں میں گراتی جا رہی ہے راستہ

سوچتا ہوں میری پُر آشوب بستی کس لیے

اپنا دریا سے ملاتی جا رہی ہے راستہ

پیچھے پیچھے پاؤں اٹھتے جا رہے ہیں شوق میں

آگے آگے وہ بتاتی جا رہی ہے راستہ

رہ بناتا جا رہا ہوں وقت میں منصور میں

عمر کی آندھی اڑاتی جا رہی ہے راستہ

منصور آفاق