منصور آفاق ۔ غزل نمبر 279

در کوئی جنتِ پندار کا وا کرتا ہوں

آئینہ دیکھ کے میں حمد و ثنا کرتا ہوں

رات اور دن کے کناروں کے تعلق کی قسم

وقت ملتے ہیں تو ملنے کی دعا کرتا ہوں

وہ ترا، اونچی حویلی کے قفس میں رہنا

یاد آئے تو پرندوں کو رہا کرتا ہوں

پہلے خود آپ بناتا ہوں تماشا اپنا

پھر تماشائی کا کردار ادا کرتا ہوں

پوچھتا رہتا ہوں موجوں سے گہر کی خبریں

اشکِ گم گشتہ کا دریا سے پتہ کرتا ہوں

کبھی آنکھوں سے بھری راہ گزر مجھ پہ گراں

دشت پیمائی کبھی آبلہ پا کرتا ہوں

مجھ سے منصور کسی نے تو یہ پوچھا ہوتا

ننگے پاؤں میں ترے شہر میں کیا کرتا ہوں

منصور آفاق