منصور آفاق ۔ غزل نمبر 452

آب رواں میں پھر نئی شامت دکھائی دی

اُس جیسی ایک اور قیامت دکھائی دی

اس کے خیال بھی تھے پرانے ، بہت قدیم

اس کے لباس میں بھی قدامت دکھائی دی

تقریبِ گل میں سرو کئی آئے تھے مگر

ہر سمت تیری رونقء قامت دکھائی دی

پہلے بدن کا معجزہ دیکھا نگاہ نے

پھر گفتگو میں ایک کرامت دکھائی دی

میں نے بھلا دیں ساری گذشتہ کی تلخیاں

تھوڑی سی اُس نظر میں ندامت دکھائی دی

جاری ہے ٹوٹ پھوٹ وجود و شہود میں

کوئی کہیں بھی شے نہ سلامت دکھائی دی

منصور چپ کھڑی تھی کہیں شام کی کرن

چھیڑا توزندگی کی علامت دکھائی دی

منصور آفاق