لگتا ہے یہ دل، تخت نشیں ہونے لگا ہے

اپریل 30, 2017ماجد صدیقی،آنگن آنگن رات،غزلمبیں،نشیں،کہیں،جبیں،زمیںadmin

ماجد صدیقی ۔ غزل نمبر 61

جب سے وُہ بدن، اپنے قریں ہونے لگا ہے

لگتا ہے یہ دل، تخت نشیں ہونے لگا ہے

وُہ پاس ہے جس دم سے، منوّر ہے نظر اور

آنگن ہے کہ خود، ماہِ مبیں ہونے لگا ہے

پھر دیکھ پرندوں کی اُڑانوں میں، ٹھٹھک ہے

کُچھ سانحہ، پھر زیرِ زمیں، ہونے لگا ہے

قشقہ ہے غلامی کا یہی، نام ہمارے

ظلمت کا عَلم، زیبِ جبیں ہونے لگا ہے

ماجدؔ ہو طلب، گرگ سے کیا، لُطف و کرم کی

سوچو تو بھلا، ایسا کہیں ہونے لگا ہے

ماجد صدیقی

شاخ کو، پھر ہے تبر، یاد آیا

اپریل 30, 2017ماجد صدیقی،آنگن آنگن رات،غزلنگر،گھر،تبر،ترا،در،سفرadmin

ماجد صدیقی ۔ غزل نمبر 62

جس سے لرزاں تھی وُہ ڈر، یاد آیا

شاخ کو، پھر ہے تبر، یاد آیا

حبس سانسوں میں، جہاں بھی اُترا

مُجھ کو ہجرت کا، سفر یاد آیا

چاند تھا جن کا، چراغاں مَیں تھا

پھر نہ وُہ بام، نہ در یاد آیا

زخم سا محو، جو دل سے ٹھہرا

کیوں اچانک، وُہ نگر یاد آیا

کیسی سازش یہ صبا نے، کی ہے

کیوں قفس میں، گلِ ترا یاد آیا

بُوند جب، ابر سے بچھڑی ماجدؔ

مُجھ کو چھوڑا ہُوا گھر، یاد آیا

ماجد صدیقی

غارت گر ہی شاید سب سے اچّھا ہے

اپریل 30, 2017ماجد صدیقی،آنگن آنگن رات،غزللگتا،کا،اچّھا،اترا،ساadmin

ماجد صدیقی ۔ غزل نمبر 63

جیسا بھی چاہے حصہ لے لیتا ہے

غارت گر ہی شاید سب سے اچّھا ہے

دُھوپ میں کون، کسی کو لے کر ساتھ چلے

چھاتا جس کے ہاتھ ہے سایہ اُس کا ہے

ہاتھ میں لانے، پھر اپنی ہریالی کو

پتّا پیڑ سے، بہتی نہر میں اُترا ہے

شہر میں اُڑتی گرد سے ہو کر آنے پر

چہرہ تو کیا دل بھی مَیلا لگتا ہے

اوٹ میں شب کی ماجدؔ، کچھ کچھ اور لگے

چور بھی ظاہر میں تو شخص ہمیں سا ہے

ماجد صدیقی

مّدتوں سے وُہ کبوتر کبھی آئے، نہ گئے

اپریل 30, 2017ماجد صدیقی،آنگن آنگن رات،غزللائے،چلائے،چھپائے،آئے،بنائے،جلائے،سنائے،سکھائے،سجائےadmin

ماجد صدیقی ۔ غزل نمبر 64

جن کے لائے ہوئے سندیس، بھُلائے نہ گئے

مّدتوں سے وُہ کبوتر کبھی آئے، نہ گئے

ہم نے کشتی کے اُلٹنے کی، خبر تو دے دی

اِس سے آگے تھے جو احوال، سُنائے نہ گئے

جس میں خود پھول بنے رہتے تھے، اہلِ خانہ

اَب کے اُس کُنج میں، گلدان سجائے نہ گئے

جانے بارش، نہ پرندوں کی برستی کیا کیا

تِیر ترکش میں جو باقی تھے، چلائے نہ گئے

کب منانے اُنہیں آئے گا، بچھڑنے والا

وُہ جنہیں، ضبط کے آداب سکھائے نہ گئے

آنکھ میں کرب اُتر آیا، شراروں جیسا

اشک روکے تھے مگر، زخم چھپائے نہ گئے

وُہ کہ تھا بادِ صبا، دے گیا جاتے جاتے

وُہ بگولے، کہ تصّور میں بھی لائے نہ گئے

اُس کے جانے سے، چھتیں گھر کی اُڑی ہوں جیسے

سر سلامت تھے جو، ژالوں سے بچائے نہ گئے

دل میں گر ہیں تو ارادے ہیں، بقا کے ماجدؔ

یہ وُہ خیمے ہیں، جو دشمن سے جلائے نہ گئے

ماجد صدیقی

سازشوں کا وُہی نشانہ رہا

اپریل 30, 2017ماجد صدیقی،آنگن آنگن رات،غزلنہ،نشانہ،بہانہ،تازیانہ،زمانہadmin

ماجد صدیقی ۔ غزل نمبر 65

جس شجر پر بھی آشیانہ رہا

سازشوں کا وُہی نشانہ رہا

آنکھ اُٹھی نہیں اِدھر سے اُدھر

سر پہ اپنے وُہ تازیانہ رہا

اُس جنوں کو سلام جس کے طفیل

ہم سے مانوس اِک زمانہ رہا

ہم سے مالی کا مثل بچّوں کے

پھل نہ پکنے کا ہی بہانہ رہا

ہم کہاں کے ہیں محترم ماجدؔ

کیا ہے اپنا بھرم رہا نہ رہا

ماجد صدیقی

تو بھی ہمیں نہ جنّتِ فردا پہ ٹال دے

اپریل 30, 2017ماجد صدیقی،آنگن آنگن رات،غزلڈھال،ڈال،کمال،ٹال،جمالadmin

ماجد صدیقی ۔ غزل نمبر 66

جاناں! کبھی تو مژدۂ لطفِ وصال دے

تو بھی ہمیں نہ جنّتِ فردا پہ ٹال دے

ہم گمرہی میں، غیر مگر راستی میں فرد

دیتا ہے وُہ، جسے بھی، جو اوجِ کمال دے

سجنے لگے شرر جو سرِ شاخِ آرزو

ایسا ثمر تو باغ میں کوئی نہ ڈال دے

اتنا تو بخش دے ہمیں اخفائے دردِ دل

حدّت وُہ دے جو اشک کو آہوں میں ڈھال دے

ایسا کوئی نہیں کہ جو یُوسف کہے تجھے

چاہے سخن کو جتنا بھی ماجدؔ جمال دے

ماجد صدیقی

ڈھونڈھتے، روز کا رزق ہم تھک گئے

اپریل 30, 2017ماجد صدیقی،آنگن آنگن رات،غزلہم،قلم،قدم،کرم،صنمadmin

ماجد صدیقی ۔ غزل نمبر 67

جمع کرتے بدن کی یہ نم، تھک گئے

ڈھونڈھتے، روز کا رزق ہم تھک گئے

یوں لگے، ڈھیل توبہ کی دیتے ہوئے

ہم پہ ہوتے رہے جو، کرم تھک گئے

ایک انساں، نہ سجدوں سے باز آ سکا

پُوجے جانے سے، کیا کیا صنم تھک گئے

آرزو جستجو اور محرومیاں

اس مسلسل سفر سے، قدم تھک گئے

ہیں کُچھ ایسی ہی ماجدؔ حکایاتِ غم

لکھتے لکھتے جنہیں، سب قلم تھک گئے

ماجد صدیقی

پّتے نے یوں بھی، پریت نبھائی ہوا کے ساتھ

اپریل 30, 2017ماجد صدیقی،آنگن آنگن رات،غزلہوا،آشنا،خدا،ردا،صباadmin

ماجد صدیقی ۔ غزل نمبر 68

ٹہنی سے جھڑ کے رقص میں آیا، ادا کے ساتھ

پّتے نے یوں بھی، پریت نبھائی ہوا کے ساتھ

وُہ بھی بزعمِ خویش ہے، کیا کُشتۂ وفا

چل دی ہے مغویہ جو، کسی آشنا کے ساتھ

خم ہے جو سر تو، کاسۂ دستِ دُعا بلند

کیا کچھ ہے لین دین ہمارا، خُدا کے ساتھ

جن کے سروں کوڈھانپ کے، ہم تم ہیں سرخرو

درکار جھونپڑے بھی اُنہیں ہیں، رِدا کے ساتھ

ژالوں نے جب سے، کھِلتے شگوفے دئیے بکھیر

ماجدؔ نجانے کد ہے مجھے کیوں، صبا کے ساتھ

ماجد صدیقی

مگر یکساں رہے کب تک، زمانے کی ہوا جاناں

اپریل 30, 2017ماجد صدیقی،آنگن آنگن رات،غزلہوا،چلا،آسرا،دوسرا،دیا،صباadmin

ماجد صدیقی ۔ غزل نمبر 69

تمہارے ٹھاٹھ بھی، اپنی جگہ سارے، بجا جاناں

مگر یکساں رہے کب تک، زمانے کی ہوا جاناں

ہماری آن جائے، ربطِ باہم میں کہ جاں جائے

نہیں ہٹ کر اب اس سے، کوئی رستہ دوسرا جاناں

جہاں بھی تم نے دیکھا والہانہ، ہم یہی سمجھے

کماں سے تیر نکلا، اور نشیمن کو چلا جاناں

اَب اُس تنکے کو بھی، مُٹھی میں دریا نے کیا اپنی

ازل سے ڈوبنے والوں کا تھا جو، آسرا جاناں

مہک کا اور صبا کا تھا ملن، گاہے ملاپ اپنا

دلانے یاد آتی ہے ہمیں، کیا کچھ صبا جاناں

اُسی کی بُھربُھری بنیاد سے چمٹا ہے اب تک یہ

وُہی جو قول ماجدؔ کو، کبھی تم نے دیا جاناں

ماجد صدیقی

کنارِ شام پرندے، شجر پہ اُترے ہیں

اپریل 30, 2017ماجد صدیقی،آنگن آنگن رات،غزلنگر،نظر،در،رہگزر،شجرadmin

ماجد صدیقی ۔ غزل نمبر 70

تھکن سے چُور ارادے، جگر پہ اُترے ہیں

کنارِ شام پرندے، شجر پہ اُترے ہیں

بِھنک ملی ہے کہاں سے اِنہیں، ضیافت کی

عجیب زاغ ہیں جو، بام و در پہ اُترے ہیں

کوئی بھی کنکری کم از شرر، نہیں جس کی

قدم ہمارے، یہ کس رہگزر پہ، اُترے ہیں

وُہ چاہتوں کے کبوتر، جو ہم نے بھیجے تھے

بھٹک کے جانے کہاں، کس نگر پہ اُترے ہیں

وہ دیکھ فکر کو ماجد، نئی جلا دینے

فضا سے اور بگولے، نظر پہ اُترے ہیں

ماجد صدیقی

سمجھتی ہے یہ نکتہ ساری دُنیا، ہم نہیں کہتے

اپریل 30, 2017ماجد صدیقی،آنگن آنگن رات،غزلنقشہ،کا،تماشا،خاصا،دنیاadmin

ماجد صدیقی ۔ غزل نمبر 71

تمہارے خُلق میں فتنے ہیں کیا کیا، ہم نہیں کہتے

سمجھتی ہے یہ نکتہ ساری دُنیا، ہم نہیں کہتے

ہوئے ہیں زرد پتے لفظ کیا کیا کچھ، نہ وعدوں کے

تمہاری شاخِ لب کا ہے یہ خاصا، ہم نہیں کہتے

نہیں زیبا بڑوں کو کاٹنا ڈوریں پتنگوں کی

چھتوں پر ہے، مگر ایسا ہی نقشہ، ہم نہیں کہتے

نظر آتا ہے، چھّتا خیر کا لپٹا ہوا شر میں

کہو کیسا ہے یہ طُرفہ تماشا، ہم نہیں کہتے

کسی غنچے کو بھی، مہلت ملے ہرگز نہ کھلنے کی

وطیرہ ہے یہ ماجدؔ، حبسِ شب کا، ہم نہیں کہتے

ماجد صدیقی

تیرا میرا سات

اپریل 30, 2017ماجد صدیقی،آنگن آنگن رات،غزلگھات،پات،بات،درجات،ذات،ساتadmin

ماجد صدیقی ۔ غزل نمبر 72

پورا چاند اور رات

تیرا میرا سات

خوشبُو تک میں بھی

کیا کچھ ہیں درجات

کون کرے تسلیم

سچے حرف کی ذات

اِک ناد ر تصویر

پیڑ سے جھڑتے پات

کاشانوں کے پاس

سانپ لگائیں گھات

نشتر جیسی تیز

ماجد ؔ تیری بات

ماجد صدیقی

یاد سے محو ہوئے چاہنے والے کیا کیا

اپریل 29, 2017ماجد صدیقی،آنگن آنگن رات،غزلنکالے،چھالے،والے،بھالے،جالے،سنبھالےadmin

ماجد صدیقی ۔ غزل نمبر 73

پڑ گئے ذہن پہ نسیان کے تالے کیا کیا

یاد سے محو ہوئے چاہنے والے کیا کیا

رسیاں اُن کے لئے جیسے فلک بھیجے گا

ہاتھ لہراتے رہے ڈوبنے والے کیا کیا

کب کوئی سانپ دبا لے، کوئی شاہیں آلے

چونچ پر پڑنے لگے خوف کے چھالے کیا کیا

جانے والے، ہیں بس اتنے سا پتہ چھوڑ گئے

دیکھ لے بند کواڑوں پہ ہیں جالے کیا کیا

چاہتیں وقفِ غرض، نیّتیں نفرت والی

تخت ہم نے بھی وراثت میں سنبھالے کیا کیا

کب سے شہباز ہیں جو، محو اسی فکر میں ہیں

چیونٹیوں نے بھی یہاں، پَر ہیں نکالے کیا کیا

سَر اُٹھانے کی ہوئی جب بھی جسارت ہم سے

ہم پہ ماجدؔ نہ تنے طیش کے بھالے کیا کیا

ماجد صدیقی

ساون در و دیوار کو نم کرنے لگا ہے

اپریل 29, 2017ماجد صدیقی،آنگن آنگن رات،غزلقلم،نم،کرم،بھسم،ستمadmin

ماجد صدیقی ۔ غزل نمبر 74

پھر وقت ہمیں اشک بہم کرنے لگا ہے

ساون در و دیوار کو نم کرنے لگا ہے

تعمیر کا شیدا ہے پیمبر بھی فنا کا

انسان یہ کیا طُرفہ ستم کرنے لگا ہے

اے کاش کہ وہ نوعیتِ بخشش بھی سمجھ لے

ہم پر جو سخی لُطف و کرم کرنے لگا ہے

دریا نے بھی لو کام جلانے کا سنبھالا

بپھرا ہے تو کھلیان بھسم کرنے لگا ہے

چھیڑا نہ کبھی مانی و بہزاد نے جس کو

وُہ کاج بھی ماجدؔ کا قلم کرنے لگا ہے

ماجد صدیقی

نگہت و نُور کے سانچوں میں، نِت ڈھلتا ہوں

اپریل 29, 2017ماجد صدیقی،آنگن آنگن رات،غزللڑتا،ڈھلتا،کرتا،جاتا،رہتاadmin

ماجد صدیقی ۔ غزل نمبر 75

پھولوں سا کھلتا ہوں دیپ سا جلتا ہوں

نگہت و نُور کے سانچوں میں، نِت ڈھلتا ہوں

پت جھڑ سے پِٹ جانے والی بیلوں کے

دیواروں پر نقش بناتا رہتا ہوں

کھیل کھیل میں، ناؤ بنا کر کاغذ کی

پانی کی فطرت پہچانا کرتا ہوں

تنہائی سے اپنا بَیر چُکانے کو

چڑیا جیسا، آئینے سے لڑتا ہوں

ہاتھ میں نادانوں کے، ڈور سے بندھ کر مَیں

کیا کیا اُڑتا، کیا کیا نوچا جاتا ہوں

ماجد صدیقی

سُنا جائے نہ ہم سے شور پتّوں کی دُہائی کا

اپریل 29, 2017ماجد صدیقی،آنگن آنگن رات،غزلچنائی،کمائی،پارسائی،دہائی،رہائی،صفائیadmin

ماجد صدیقی ۔ غزل نمبر 76

پھِرا ہے جب سے موسم ٹہنیوں کی بے ردائی کا

سُنا جائے نہ ہم سے شور پتّوں کی دُہائی کا

ہم اُن آبادیوں میں، منتظر ہیں سر چھپانے کے

نمٹنے میں نہ آئے کام ہی جن کی چُنائی کا

لگاتے کچھ تو جنّت بھی ہمارے ہاتھ آ جاتی

مگر حصہ خدا کے نام کرتے، کس کمائی کا

ہمارے نام تھا منسوب جانے جرم کس کس کا

نہ تھا آساں کچھ ایسا، مرحلہ اپنی صفائی کا

مجھے اک عمر، جس شاطر نے پابندِ قفس رکھا

وُہی اَب منتظم بھی ہے مرے جشن رہائی کا

کہے پیراہنِ بے داغ، بگلے کا یہی ماجد

وہی ہے پارسا دعویٰ جسے ہے پارسائی کا

ماجد صدیقی

جُگ بیت گئے ماجدؔ، اِس جاں پہ عذاب آئے

اپریل 29, 2017ماجد صدیقی،آنگن آنگن رات،غزلگلاب،جواب،سحاب،شباب،شتاب،عذابadmin

ماجد صدیقی ۔ غزل نمبر 77

پتھر کے تلے اگتے اور زیرِ عتاب آئے

جُگ بیت گئے ماجدؔ، اِس جاں پہ عذاب آئے

پھر اِذن دیا اُس نے، اظہارِ غم دل کا

پھر شاخِ لب و جاں پر، کھِلنے کو گلاب آئے

مائل ہوں جو شفقت پر اور جانیں، برسنا بھی

کھیتوں پہ لئے بوندیں ایسی، نہ سحاب آئے

ایوان نشینوں سے کیا آس، مُرادوں کی

کٹیاؤں کو پہلے بھی کب ایسے جواب آئے

جب بادِ صبا تک نے، لی ذات بدل اپنی

پودوں کے قد و رُخ پر، کیا رنگِ شباب آئے

جس طور لپکتی ہیں لینے کو، ہمیں موجیں

اُس پار کا ساحل بھی، اے کاش! شتاب آئے

ماجد صدیقی

بے بسی اپنا مقدُور ہی جان لیں

اپریل 29, 2017ماجد صدیقی،آنگن آنگن رات،غزلٹھان،آن،احساں،بہتان،تاوان،جانadmin

ماجد صدیقی ۔ غزل نمبر 78

بن پڑے گر تو یہ ہار بھی مان لیں

بے بسی اپنا مقدُور ہی جان لیں

ہاں نمونے کی مخلوق ہیں اِک ہمیں

ہر کسی کا جو، سر اپنے بُہتان لیں

ہم کہ تشنہ تھل ایسے ہیں، بہرِ سکوں

اوس تک کا بھی کیونکر نہ احساں لیں

اے جفا جُو! ہم انساں ہیں پُتلے نہیں

کیا پتہ، کس گھڑی؟ دل میں کیا ٹھان لیں

عیش پر جو لگا اُن کے، ضِد ہے اُنہیں

اپنے ذمّے ہمِیں وُہ بھی تاوان لیں

ناز ماجدؔ ہمیں کیا ہو پرواز پر

وُہ جو شاہین ہیں جانے کب آن لیں

ماجد صدیقی

خُشکیاں اپنے یہاں کی اور ہیں، نم اور ہے

اپریل 29, 2017ماجد صدیقی،آنگن آنگن رات،غزلنم،جم،خم،رم،سمadmin

ماجد صدیقی ۔ غزل نمبر 79

بانجھ ہے برکھا پون،آنکھوں کا موسم اور ہے

خُشکیاں اپنے یہاں کی اور ہیں، نم اور ہے

خون میں اُترے فقط، گمراہی افکار سے

دی نہ جائے اور جاں لیوا ہو جو، سَم اور ہے

ناتوانوں کے کوائف، جام میں کر لے کشید

ہم ہوئے جس عہد میں، اِس عہد کا جم اور ہے

چیت کی رُت میں، غزالوں کے بدن کی شاعری

اور ہے، اور خوف میں اُلجھا ہوا رم، اور ہے

میں بھی دے بیٹھا ہوں دل ماجدؔ، مگر یہ جان کر

ابروؤں کا اور ہے، دیوار کا خم اور ہے

ماجد صدیقی

گھروندا بے نشاں ہونے لگا ہے

اپریل 29, 2017ماجد صدیقی،آنگن آنگن رات،غزلنشاں،گلستاں،پاسباں،آشیاں،داستاں،زباں،شہاںadmin

ماجد صدیقی ۔ غزل نمبر 80

بس اتنا سا زیاں ہونے لگا ہے

گھروندا بے نشاں ہونے لگا ہے

غبارہ پھٹ کے رہ جانے کا قّصہ

ہماری داستاں ہونے لگا ہے

وُہ بھگدڑ کارواں میں ہے کہ جیسے

لُٹیرا پاسباں ہونے لگا ہے

رُکا تھا لفظ جو ہونٹوں پہ آ کر

وُہ اَب زخمِ زباں ہونے لگا ہے

نظر میں جو بھی منظر ہے سکوں کا

بکھرتا آشیاں ہونے لگا ہے

جو تھا منسوب کل تک گیدڑوں سے

اَب اندازِ شہاں ہونے لگا ہے

نظر میں تھا جو چنگاری سا ماجدؔ

وُہ گل اَب گلستاں ہونے لگا ہے

ماجد صدیقی

ہماری اُس سے مگر، آشنائیاں نہ گئیں

اپریل 29, 2017ماجد صدیقی،آنگن آنگن رات،غزلکمائیاں،آشنائیاں،بتائیاں،دہائیاں،ردائیاںadmin

ماجد صدیقی ۔ غزل نمبر 81

بجا کہ اُس میں جو تھیں کج ادائیاں، نہ گئیں

ہماری اُس سے مگر، آشنائیاں نہ گئیں

کہا تھا اُس نے، بالآخر وُہ آئے گا، لیکن

ہمیں سے ہجر کی رَتیاں، بِتائیاں نہ گئیں

جوان جن سے، دُعاؤں کے طشت میں نکلے

اُن آنگنوں میں، اُن ہی کی، کمائیاں نہ گئیں

کئے ہزار طلب، آسماں سے ابر اِس نے

زمیں کے سر سے مگر، بے ردائیاں نہ گئیں

کلی سے گُل بھی ہوئے ہم، مگر چٹخنے سی

لب و زبان سے ماجد، دُہائیاں نہ گئیں

ماجد صدیقی

جان بدن میں ٹوٹ چلی ہے ہر جانب

اپریل 29, 2017ماجد صدیقی،آنگن آنگن رات،غزلہری،چلی،پھولی،اگی،بھری،رہیadmin

ماجد صدیقی ۔ غزل نمبر 82

بچوں کی سی حیرانی ہے ہر جانب

جان بدن میں ٹوٹ چلی ہے ہر جانب

جھپٹے گی جانے کن غافل چوزوں پر

چیل ریا کی گھوم رہی ہے ہر جانب

ساون رُت کے جھاڑوں جھنکاروں جیسی

خاموشی کی فصل اُگی ہے ہر جانب

کون ہے جو دیکھے، الہڑ آشاؤں کی

مانگ میں کیا کیا راکھ بھری ہے ہر جانب

زوروں پر ہے فصل نئے آسیبوں کی

ڈائن ڈائن گود ہری ہے ہر جانب

ماجدؔ خوف سے کیا کیا چہرے زرد ہوئے

دیکھ عجب سرسوں پھولی ہے ہر جانب

ماجد صدیقی

مل بیٹھے ہیں جھیل کنارے چندا، رات اور مَیں

اپریل 29, 2017ماجد صدیقی،آنگن آنگن رات،غزللائے،کنارے،اترے،بھالے،سمجھےadmin

ماجد صدیقی ۔ غزل نمبر 83

اپنی اپنی دھن میں نکلے چندا، رات اور مَیں

مل بیٹھے ہیں جھیل کنارے چندا، رات اور مَیں

اپنے ہاتھوں سورج کھو کر، سو گئے کیونکر لوگ

اتنی ساری بات نہ سمجھے چندا، رات اور مَیں

ایک ذرا سی پَو پھٹنے پر، باہم غیر ہوئے

ہم آپس کے دیکھے بھالے چندا، رات اور مَیں

اک دوجے سے پُختہ کرنے، کچھ لمحوں کا ساتھ

زینہ زینہ خاک پہ اُترے چندا، رات اور مَیں

تاب نظر کی، آنکھ کا کاجل اور سخن کا نُور

ماجدؔ چہروں چہروں لائے چندا، رات اور مَیں

ماجد صدیقی

یاد تا دیر کریں گے خس و خاشاک مجھے

اپریل 29, 2017ماجد صدیقی،آنگن آنگن رات،غزلچالاک،افلاک،ادراک،خاک،خاشاکadmin

ماجد صدیقی ۔ غزل نمبر 84

اِن کی خاطر ہی ملا دیدۂ نمناک مجھے

یاد تا دیر کریں گے خس و خاشاک مجھے

ٹوٹنا چاہوں اُفق سے نہ ستاروں جیسا

اِتنی عجلت سے بُلائے نہ ابھی خاک مجھے

جب کبھی اِن سے اُجالوں کی ضمانت چاہی

کر گئے اور سیہ روز یہ افلاک مجھے

مَیں کہ سادہ تھا ابھی کورے ورق جیسا ہوں

ہاتھ آئی نہ کہیں صُحبتِ چالاک مجھے

مجھ پہ کھُل پائی نہ جوہڑ کی سیاست ماجدؔ

گرچہ تھا رفعتِ ہر کوہ کا ادراک مجھے

ماجد صدیقی

ورنہ، اور گماں تھا سب کا، بھیس بدلنے والوں پر

اپریل 29, 2017ماجد صدیقی،آنگن آنگن رات،غزلچوپالوں،ڈھالوں،والوں،بالوں،سالوں،غزالوںadmin

ماجد صدیقی ۔ غزل نمبر 85

ایک ہمیں نے شور مچایا گِرگٹ جیسی چالوں پر

ورنہ، اور گماں تھا سب کا، بھیس بدلنے والوں پر

پنگھٹ پنگھٹ پانی جیسے جال بچھے اَن دیکھے سے

کون کہے پڑ جانے کو ہے کیا اُفتاد غزالوں پر

کام میں لا کر عمریں بھی اب کون سمیٹے گا اُس کو

پھیل چکی ہے جو بے سمتی نصف صدی کے سالوں پر

کب تک وقت کے ننگے سچ کو ڈھانپو گے نادانی سے

کب تک لیپ چڑھاؤ گے تم چاندی جیسے بالوں پر

پہلے جو اعصاب میں تھا، اُترا وُہ زور زبانوں میں

راہزنوں کے چرچے ہی باقی ہیں اَب چوپالوں پر

عزم نہ ہو تو لوہا بھی کب کاٹے ماجدؔ لوہے کو

ہاتھ نہیں اُٹھ پاتے اپنے اور الزام ہے ڈھالوں پر

ماجد صدیقی

اُمیدوں کی ٹھِٹھڑی کُونجیں کون سے دیس سُدھار چلیں

اپریل 29, 2017ماجد صدیقی،آنگن آنگن رات،غزلمار،یار،بار،بازار،سدھارadmin

ماجد صدیقی ۔ غزل نمبر 86

ایک ذرا سی رُت بدلی تو سب کی سب اُس پار چلیں

اُمیدوں کی ٹھِٹھڑی کُونجیں کون سے دیس سُدھار چلیں

لے جائے کس اور نجانے عمر یہ بھُول بھلّیوں کی

کہنے کو کچھ دوشیزائیں مل کر ہیں بازار چلیں

ظاہر میں میدان سکوں کا جو اِس دل کے ہاتھ رہا

ٹِک ٹِک شور مچاتی گھڑیاں وُہ میدان بھی مار چلیں

ہر حیلہ ناکام رہا بیمار کی جان بچانے کو

چلنے کو تو رُک رُک جاتی سانسیں سو سو بار چلیں

جی داری کے فیض سے زندہ ہیں ورنہ ہر آنگن سے

طعن کی کیا کیا کنکریاں ہم پر بھی ماجدؔ یار چلیں

ماجد صدیقی

انسانوں نے چکّھا ماس انسانوں کا

اپریل 29, 2017ماجد صدیقی،آنگن آنگن رات،غزلکمانوں،انسانوں،تاوانوں،حیوانوںadmin

ماجد صدیقی ۔ غزل نمبر 87

ایسا تو اِتلاف، نہ دیکھا جانوں کا

انسانوں نے چکّھا ماس انسانوں کا

حد سے بڑھ کر شائستہ بھی ٹھیک نہیں

انساں، رُوپ بھرے گا یُوں حیوانوں کا

ترکش بھی، کَس بل بھی جس کے پاس ہے وُہ

زور نہ جتلائے کیوں، تیر کمانوں کا

ضعف نہ جائے گا جب تک، جانے کا نہیں

ماجدؔ کھٹکا ہے جو ہمیں تاوانوں کا

ماجد صدیقی

اِتنا اوچھا بھی مجھ پہ وار نہ کر

اپریل 29, 2017ماجد صدیقی،آنگن آنگن رات،غزلوار،کاروبار،انتظار،استوار،اعتبار،سوارadmin

ماجد صدیقی ۔ غزل نمبر 88

اپنے اِحساں جتا کے خوار نہ کر

اِتنا اوچھا بھی مجھ پہ وار نہ کر

ظلمتوں میں مجھ ایسے ذرّوں کے

جگمگانے کا انتظار نہ کر

مَیں کہ ہوں راندۂ ازل، مجھ پر

کر مگر اتنا اعتبار نہ کر

تو خُدا ہے، تو اپنے بندوں سا

لینے دینے کا کاروبار نہ کر

تُو کہ ابرِ کرم ہے، ربط کرم

چوٹیوں ہی سے استوار نہ کر

لے حقیقت کی کچھ خبر ماجدؔ

واہمے، ذہن پر سوار نہ کر

ماجد صدیقی

تن گیا آسماں کماں جیسا

اپریل 29, 2017ماجد صدیقی،آنگن آنگن رات،غزلکماں،گلستاں،پاسباں،امتحاں،زباںadmin

ماجد صدیقی ۔ غزل نمبر 89

ابروئے چشم دشمناں جیسا

تن گیا آسماں کماں جیسا

جبر کے موسموں سے زنگ آلود

جو بھی تھا برگ، تھا زباں جیسا

بھُولنے پر بھی دھیان جابر کا

پاس رہتا ہے پاسباں جیسا

جو بھی ہوتا ہے دن طلوع یہاں

سر پہ آتا ہے امتحاں جیسا

ہے نظر میں جو خواب سا ماجدؔ

ہے کوئی سروِ گلستاں جیسا

ماجد صدیقی

آہن صفت درخت بھی، ریشوں میں بٹ گئے

اپریل 29, 2017ماجد صدیقی،آنگن آنگن رات،غزلنمٹ،چھٹ،ڈٹ،پلٹ،بٹ،سمٹadmin

ماجد صدیقی ۔ غزل نمبر 90

آروں سے موج موج کے، کیا کیا نہ کٹ گئے

آہن صفت درخت بھی، ریشوں میں بٹ گئے

دیکھا ہمیں قفس میں، تو پوچھی نہ خیر بھی

جھونکے مہک کے آئے اور آ کر، پلٹ گئے

مُٹھی میں بند جیسے، مہاجن کی سیم و زر

کھیتوں کے حق میں ابر، کچھ ایسے سمٹ گئے

سیلاب نے جب اپنے قدم، تیز کر لئے

بادل بھی آسمان سے، اِتنے میں چھٹ گئے

جتنے ہرے شجر تھے، لرزنے لگے تمام

خاشاک تھے کہ سامنے دریا کے ڈٹ گئے

جانے نہ دیں گے، رزق کے بن باس پر کبھی

بچّے کچھ ایسے باپ سے ماجدؔ، چمٹ گئے

ماجد صدیقی

کس مغوی طیّارے میں محصور ہوئے ہم آپ

اپریل 29, 2017ماجد صدیقی،آنگن آنگن رات،غزلمقہور،محصور،چور،دورadmin

ماجد صدیقی ۔ غزل نمبر 91

آنکھ تلک جھپکانے سے معذور ہوئے ہم آپ

کس مغوی طیّارے میں محصور ہوئے ہم آپ

آتے وقت کا آئینہ ہی شاید کچھ بتلائے

مکر و ریا کے کن زخموں سے چُور ہوئے ہم آپ

عیاروں کے جذبۂ خیر و فلاح کی سازش سے

کون کہے مقصد سے کتنی دُور ہوئے ہم آپ

صَید ہوئے جس خیر میں لپٹی، شر کا اَب کے برس

ایسے تو ماجدؔ نہ کبھی مقہور ہوئے ہم آپ

ماجد صدیقی

پھُول مرضی کے کسی کو نہ کھلانے دینا

اپریل 29, 2017ماجد صدیقی،آنگن آنگن رات،غزلکھلانے،بہانے،بنانے،جلانے،سہانے،سرہانےadmin

ماجد صدیقی ۔ غزل نمبر 92

آگ ہونٹوں پہ نہ دل کی کبھی آنے دینا

پھُول مرضی کے کسی کو نہ کھلانے دینا

چکھنے دینا نہ کبھی لمحۂ موجود کا رس

جب بھی دینا ہمیں تم خواب سُہانے دینا

جس کی تعمیر میں کاوش کا مزہ اُس کو مِلے

تُم نہ بالک کو گھروندا وُہ بنانے دینا

روشنی جس کے مکینوں کو بصیرت بخشے

ایسی کٹیا میں دیا تک نہ جلانے دینا

راندۂ خلق ہے، جو پاس تمہارا نہ کرے

درس اب یہ بھی کسی اور بہانے دینا

سنگ ہو جاؤ گے حق بات ہے جس میں ماجدؔ

ایسی آواز نہ تم شہ کے سرہانے دینا

ماجد صدیقی

ہم تم جس کو جھُوٹ کہیں وُہ اُس کو سچ ٹھہرائے گا

اپریل 29, 2017ماجد صدیقی،آنگن آنگن رات،غزللہرائے،لوٹائے،چکائے،ٹھہرائے،پچھتائے،پائے،آئے،سنائےadmin

ماجد صدیقی ۔ غزل نمبر 93

آنکھ دِکھا کر بس اتنا سا اپنا زور جتائے گا

ہم تم جس کو جھُوٹ کہیں وُہ اُس کو سچ ٹھہرائے گا

کون کہے بیوپاری، سودا اغوا ہونے والی کا

کن کن سنگدلوں کے آگے کس کس طور چُکائے گا

کاش اُنہیں جتلا پائے تُو، اصل بھی اپنے ناتے کی

جھنڈا جن کی کاروں پر، اے دیس! ترا لہرائے گا

اپنے جیسے ہی لگتے ہیں چَوک پہ بیٹھے راج مجھے

مول گجر دم سیٹھ کوئی جن کا آ کر ٹھہرائے گا

اِترائے گا جب بھی کبھی بیٹھے گا اپنے جیسوں میں

کون ستم گر ہے جو اپنی کرنی پر پچھتائے گا

شور زمینِ فکر ہے جس کی اور سینے میں زور بہت

کرنے کو اچّھا بھی کرے تو، کیا اچّھا کر پائے گا

چھید ہوئے جاتے ہیں جِس کشتی میں، اُس کے کھینے کو

دُور فرازِ عرش سے جانے، کون فرشتہ آئے گا

زورِ ہوا سے ٹہنیاں ٹوٹیں، پات جھڑے جن پیڑوں کے

کون سخی ایسا، جو اِن کے یہ زیور لوٹائے گا

خوشیوں پر رنجیدہ، اِک دُوجے کے رنج پہ جو خو ش ہیں

تو کیا اُن سِفلوں کو ماجدؔ دل کا حال سُنائے گا

ماجد صدیقی

پتہ بتائے کوئی، کب کسی دفینے کا

مارچ 31, 2017ماجد صدیقی،غزل،غزل سرامہینے،مدینے،نگینے،پسینے،دفینے،سفینےadmin

ماجد صدیقی ۔ غزل نمبر 1

یہ انتظار ہی عنواں ہے اَب تو جینے کا

پتہ بتائے کوئی، کب کسی دفینے کا

بدک کے ثقلِ سماعت سے اہلِ مکّہ کی

جو اہلِ حق ہے مسافر ہے اَب مدینے کا

یقیں اُنہیں بھی خُدا پر ہے بہرِ رزق جنہیں

ہے آسرا کسی پتّھر، کسی نگینے کا

بہ دَورِ نو کسی تنخواہ دار کے گھر کا

حیات، ہفتۂ آخر لگے مہینے کا

ہَوا نے دی سرِ ساحل یہی خبر آ کر

کھُلا نہیں تھا ابھی بادباں سفینے کا

تُو خاک زاد ہے اور جان لے کہ اے ماجدؔ

گُہر نہیں کوئی قطرہ ترے پسینے کا

ماجد صدیقی

ساتھ دنوں کے ہر شکلِ احوال گئی

مارچ 31, 2017ماجد صدیقی،غزل،غزل سراڈھال،ڈال،کھال،ٹال،احوال،حال،سالadmin

ماجد صدیقی ۔ غزل نمبر 2

ہم نے کھیلی وقت سے جو بھی چال گئی

ساتھ دنوں کے ہر شکلِ احوال گئی

ڈھانپنے والے تھے ہم جس سے سر اپنا

اُس سودے میں ساتھ ہی اپنی کھال گئی

خواہش، لُطف کی آخری حد چھُو لینے کی

چھین کے ہم سے کیا کیا ماہ و سال گئی

دیکھا رنگ اور رُوپ دلائے جس نے اِنہیں

پیڑوں کو آثار میں وُہ رُت ڈھال گئی

ہمیں چِڑانے باغ سے آتی تھی جو صبا

آخر ہم سے بھی ہو کر بے حال گئی

اُس چنچل کی بات کچھ ایسی پیچاں تھی

رگ رگ میں جو سو سو گرہیں ڈال گئی

ماجدؔ بات ہماری لیکھ سنورنے کی

ہر جاتی رُت اگلی رُت پر ٹال گئی

ماجد صدیقی

قدم قدم ہے مرا پل صراط پر جیسے

مارچ 31, 2017ماجد صدیقی،غزل،غزل سرانگر،نظر،پر،بھر،سحر،شجرadmin

ماجد صدیقی ۔ غزل نمبر 3

ہُوا ہے درپئے جاں اَب تو ہر سفر جیسے

قدم قدم ہے مرا پل صراط پر جیسے

سُجھا رہی ہیں یہی نامرادیاں اپنی

رہیں گے آنکھ میں کنکر یہ عمر بھر جیسے

سفر میں ہُوں پہ وُہ خدشات ہیں کہ لگتا ہے

جھُلس رہا ہو سرِ راہ ہر نگر جیسے

کہیں تو بات بھلا دل کی جا کے کس سے کہیں

بچھڑ کے رہ گئے سارے ہی ہم نظر جیسے

لپک رہا ہوں مسلسل مگر نہ ہاتھ آئے

کٹی پتنگ ہو اُمید کی سحر جیسے

دہن دہن سے زباں جھڑ گئی ہے یُوں ماجدؔ

خزاں کے دور میں بے برگ ہوں شجر جیسے

ماجد صدیقی

وُہ مہرباں تھا تو دل کو گمان کیا کیا تھے

مارچ 31, 2017ماجد صدیقی،غزل،غزل سرانشان،گمان،امتحان،زیان،زبان،سائبانadmin

ماجد صدیقی ۔ غزل نمبر 4

ہمارے زیرِ قدم آسمان کیا کیا تھے

وُہ مہرباں تھا تو دل کو گمان کیا کیا تھے

چمن کو راس فضا جن دنوں تھی موسم کی

شجر شجر پہ تنے سائبان کیا کیا تھے

کھُلا زمین کے قدموں تلے سے کھنچنے سے

کہ اوجِ فرق کے سُود و زیان کیا کیا تھے

یہ بھید وسعتِ صحرا میں ہم پہ جا کے کھُلا

کہ شہرِ درد میں ہم بے زبان کیا کیا تھے

ہمیں ہی مل نہ سکا، وُہ بہر قدم ورنہ

مہ و گلاب سے اُس کے نشان کیا کیا تھے

نہ سرخرو کبھی جن سے ہوئے تھے ہم ماجدؔ

دل و نگاہ کے وُہ امتحان کیا کیا تھے

ماجد صدیقی

دشت پر سے بادل کو لے اُڑے ہوا جیسے

مارچ 31, 2017ماجد صدیقی،غزل،غزل سراہوا،مدّعا،کربلا،بیسوا،جھنجھنا،خدا،صداadmin

ماجد صدیقی ۔ غزل نمبر 5

ہو چلی ہے ہر آشا یُوں گریز پا جیسے

دشت پر سے بادل کو لے اُڑے ہوا جیسے

کھِل نہیں سکی اُس کے سامنے کلی دل کی

دب گیا ہے ہونٹوں میں حرفِ مدّعا جیسے

چشم و لب کے آنگن میں ہو غرض کا موسم تو

بن کے بیٹھ رہتا ہے ہر کوئی خُدا جیسے

حال ہے کچھ ایسا ہی آج کے مؤرخ کا

داستاں لکھے اپنی کوئی بیسوا جیسے

رو پڑا ہے کیوں، دیکھو، ہاتھ میں سے بچّے کے

گِر گیا ہے، لگتا ہے، پھر سے جھنجھنا جیسے

اِس زمیں کا ہر خطّہ حرص کے حوالوں سے

یُوں لگے کہ ہونا ہو دشتِ کربلا جیسے

دل کی بات بھی ماجدؔ کھوکھلی ہوئی ایسی

زیرِ آب سے اُٹھے موجۂ صدا جیسے

ماجد صدیقی

جب بھی دیکھا ہے پیڑوں کے تن پر دریدہ قبا اور تھی

مارچ 31, 2017ماجد صدیقی،غزل،غزل سرافضا،قبا،آشنا،بہا،صبا،صداadmin

ماجد صدیقی ۔ غزل نمبر 6

ہم بہاروں کے طالب تھے لیکن رُتوں کی رضا اور تھی

جب بھی دیکھا ہے پیڑوں کے تن پر دریدہ قبا اور تھی

وُہ کہ جس کو تقاضا رہا ہم سے اظہارِ آزار کا

دل کو لائے زباں پر تو اُس انجمن کی فضا اور تھی

ہم تو ہر بات کو اُس کی، اخلاص کا رنگ دیتے رہے

ہم کو احساس ہی کب یہ تھا نیّتِ آشنااور تھی

اِس عجوبے کو ہم کیا کہیں جب چمن ہی قفس بن گیا

ساتھ لاتی تھی اپنے جو نزہت کبھی وہ صبا اور تھی

ساتھ لیکر جو چلتے تھے اوروں کو وہ رہنما اور تھے

کان میں گھولتی تھی جو رس ہمسری کا، صدااور تھی

سنگ دل تھے جو، اِس کو وُہی راکھ کا ڈھیر سمجھا کئے

دل کی ماجدؔ وگرنہ بہ ایں بے بسی بھی بہا اور تھی

ماجد صدیقی

تمام بستی میں ایک سا اضطراب دیکھا

مارچ 31, 2017ماجد صدیقی،غزل،غزل سراانتساب،اجتناب،احتساب،اضطراب،ثواب،خضاب،سرابadmin

ماجد صدیقی ۔ غزل نمبر 7

ہُوا ہے سچ مچ یہی کہ مَیں نے یہ خواب دیکھا

تمام بستی میں ایک سا اضطراب دیکھا

خُدا سے بھی ہے سلوک میرا معاوضے کا

کِیا ہے میں نے وُہی جو کارِ ثواب دیکھا

بھرا ہے کیا کیا نجانے چھالوں میں اپنے پانی

بہ دشتِ اُمید جانے کیا کیا سراب دیکھا

چھڑا جو قّصہ کبھی غلاموں کی منفعت کا

سخن میں آقاؤں کے نہ کیا اجتناب دیکھا

کسی عمارت پہ لوحِ کم مائیگاں نہ لٹکے

بڑے بڑوں ہی کے نام یہ انتساب دیکھا

پہنچ میں آیا جو بچّۂ میش بھیڑئیے کی

ندی کنارے اُسی کا ہے احتساب دیکھا

نہ بچ سکا تو بھی خود فریبی کی دلکشی سے

ترے بھی بالوں میں اب کے ماجدؔ خضاب دیکھا

ماجد صدیقی

حال مخالف تھے سب کے سب دریا میں

مارچ 31, 2017ماجد صدیقی،غزل،غزل سراکوکب،کب،اب،جب،سب،شبadmin

ماجد صدیقی ۔ غزل نمبر 8

ہم نے اُتارا جس دم مرکب دریا میں

حال مخالف تھے سب کے سب دریا میں

جب سے کنارے اُس کے تُجھ سے ملن ٹھہرا

اُترے آس کے کیا کیا کوکب دریا میں

ہر تنکے ہر پیڑ کو جو جتلاتا تھا

زور نہیں وہ پہلا سا اب دریا میں

ہاتھ میں چپّو تان لئے تو ڈرنا کیا

عمر کٹے یا کٹ جائے شب دریا میں

رنج نظر کا آخر آنکھ میں تیرے گا

لاش دبی رہتی ہے بھلا کب دریا میں

چاہت نے اسباب نہ دیکھے تھے ماجدؔ

کھُرتی خاک لئے اُتری جب دریا میں

ماجد صدیقی

آنچ کِن کِن منظروں کی آنکھ تک آنے لگی

مارچ 31, 2017ماجد صدیقی،غزل،غزل سراچھانے،آنے،اترانے،بہلانے،جانے،سہلانے،شرمانےadmin

ماجد صدیقی ۔ غزل نمبر 9

وحشتِ انسان کیا کیا رنگ دکھلانے لگی

آنچ کِن کِن منظروں کی آنکھ تک آنے لگی

دیکھئے اگلی رُتوں میں سرخروئی کو ہوا

کس طرح بے پیرہن شاخوں کو سہلانے لگی

کتنی چیزوں سے ہٹا کر، جانے ماں کی مامتا

دھیان بچّے کا، اُسے باتوں سے بہلانے لگی

لو بحقِ امن اپنی نغمگی کے زعم میں

فاختہ بھی دشتِ وحشت میں ہے اِترانے لگی

ظلمتِ شب کچھ بتا اُٹھی ہے کیسی چیخ سی

جبر کی ڈائن کِسے کّچا چبا جانے لگی

جھینپنا کیا، سچ اگر نکلی ہے، پّلے باندھ کر

وقت کی مریم، بھلا کاہے کو شرمانے لگی

دم بخود اتنا بھی ہو ماجدؔ نہ جلتی دُھوپ سے

آسماں پر دیکھ وُہ بدلی سی اک چھانے لگی

ماجد صدیقی

ہوئی ہے مدّت ہی ہاتھ میں وہ کتاب آئے

مارچ 31, 2017ماجد صدیقی،غزل،غزل سراماہتاب،کتاب،جواب،شتاب،عتاب،عذابadmin

ماجد صدیقی ۔ غزل نمبر 10

وُہ رُوئے روشن، وُہ حسن کا انتخاب آئے

ہوئی ہے مدّت ہی ہاتھ میں وہ کتاب آئے

سوال جو بھی کرو گے اس گنبدِ فلک میں

تمہارا اپنا کہا ہی بن کر جواب آئے

وُہ گل بہ شاخِ نظر ہو یا آس کا ثمر ہو

جِسے بھی آنا ہے پاس اپنے شتاب آئے

کھِنچا کھنچا سا لگے وُہ سانسوں میں بسنے والا

برس ہوئے ہیں ہمِیں پہ اِک یہ عتاب آئے

جھُلانے آئیں نہ رات کی رانیوں سی نیندیں

نہ لوریوں کو کہیں کوئی ماہتاب آئے

فلک سے اُتری ہے برق کب بُوند بُوند ماجدؔ

زدستِ انساں ہی خاک پر ہر عذاب آئے

ماجد صدیقی

ہر ایک آنکھ جہاں آنسوؤں کا جھرنا ہے

مارچ 31, 2017ماجد صدیقی،غزل،غزل سرامکرنا،نکھرنا،کرنا،جھرنا،سدھرناadmin

ماجد صدیقی ۔ غزل نمبر 11

وہاں فلک پہ ستاروں نے کیا ابُھرنا ہے

ہر ایک آنکھ جہاں آنسوؤں کا جھرنا ہے

نجانے کتنے درندوں کی ہیں کمیں گاہیں

وُہ گھاٹیاں کہ جنہیں ہم نے پار کرنا ہے

کسی نگاہ میں آئے کب اُس کی پامالی

وُہ حسن عید کے دن ہی جِسے نکھرنا ہے

یہ دور وُہ ہے کہ ہر شب کسی خبر نے ہمیں

ہوا کے دوش پہ آ کر اداس کرنا ہے

سکھا دئیے ہیں جو کرتب کسی مداری نے

اَب اُن سے بڑھ کے بھی بندر نے کیا سُدھرنا ہے

ہمیں ہے اُس سے تقاضائے لُطفِ جاں ماجدؔ

وُہ جس کی خُوہی ہر اک بات سے مُکرنا ہے

ماجد صدیقی

کھِل اُٹھا ہے حاصلِ شر دیکھ کر

مارچ 31, 2017ماجد صدیقی،غزل،غزل سراگر،پیکر،پتھر،در،زر،سر،شرadmin

ماجد صدیقی ۔ غزل نمبر 12

وُہ مرے ٹُوٹے ہوئے پر دیکھ کر

کھِل اُٹھا ہے حاصلِ شر دیکھ کر

حرفِ حق پر ہے گماں کُچھ اور ہی

ہاتھ میں بچّوں کے پتھر دیکھ کر

کیا کہوں کھٹکا تھا کس اِنکار کا

کیوں پلٹ آیا ہُوں وُہ در دیکھ کر

آنکھ میں رقصاں ہے کیا سیندھور سا

آ رہا ہوں کس کا پیکر دیکھ کر

بال آنے پر جُڑے شیشہ کہاں

کہہ رہا ہے آئنہ گر، دیکھ کر

یاد آتا ہے وُہ کم آمیز کیوں

جیب میں مزدور کی زر دیکھ کر

دیکھنا ماجدؔ، دیا بن باس کیا

موج کو دریا نے خود سر دیکھ کر

ماجد صدیقی

بگھیا میں کچھ پھُول کھلائے ہم نے بھی

مارچ 31, 2017ماجد صدیقی،غزل،غزل سراکھلائے،جلائے،جگائے،دہرائے،دکھائے،سہلائےadmin

ماجد صدیقی ۔ غزل نمبر 13

ناز لبوں پر اُس کے لائے ہم نے بھی

بگھیا میں کچھ پھُول کھلائے ہم نے بھی

یاد دلا کر خاصے دُور کے دن اُس کو

کیا کیا کچُھ قصّے دُہرائے ہم نے بھی

حیف! کہ رکھتا تھا جو بھیس خدائی کا

اُس جوگی کو ہاتھ دکھائے ہم نے بھی

شہر میں، سُن کر، اُس چنچل کے آنے کی

پلکوں پر کچھ دیپ جلائے ہم نے بھی

دل میں، جن کے ہوتے سانجھ سویرا ہو

کچھ ایسے ارمان جگائے ہم نے بھی

اَب جو مِلے تو ماجدؔ اُس کو اوڑھ ہی لیں

کب سے انگ نہیں سہلائے ہم نے بھی

ماجد صدیقی

دیکھ اعلان یہی آج کے اخبار میں ہے

مارچ 31, 2017ماجد صدیقی،غزل،غزل سراوار،آثار،اخبار،بیدار،تار،زارadmin

ماجد صدیقی ۔ غزل نمبر 14

مُبتلا عدل بھی اب جبر کے آزار میں ہے

دیکھ اعلان یہی آج کے اخبار میں ہے

ابر تا دیر نہ اَب بانجھ رہے گا شاید

حبس کا رنگ یہی موسمی آثار میں ہے

اَب کے اِس جال سے مشکل ہی سے نکلے شاید

صُبحِ اُمید کہ دامانِ شب تار میں ہے

ہر کہیں شور بھی، چیخیں بھی اُٹھیں گی لیکن

کُونج وُہ جس کو بچھڑنا ہے ابھی ڈار میں ہے

آگہی کرب ہے اور اِس کا مداوا مشکل

خار پیوست عجب دیدۂ بیدار میں ہے

کیا خبر صدق سے بر آئے بالآخر ماجدؔ!

یہ جو موہوم سی اُمید دلِ زار میں ہے

ماجد صدیقی

تنِ عریاں پہ قبا لاگے ہے

مارچ 31, 2017ماجد صدیقی،غزل،غزل سراہوا،قبا،چتا،وفا،کہا،خداadmin

ماجد صدیقی ۔ غزل نمبر 15

مہرباں جب وُہ ذرا لاگے ہے

تنِ عریاں پہ قبا لاگے ہے

ساتھ لے آئے قفس تک خوشبُو

سنگدل کیا یہ ہوا لاگے ہے

عجز نے دن وُہ دکھائے کہ ہمیں

اَب تو انساں بھی خدا لاگے ہے

آنکھ کھلتے سرِ اخبار سحر

حرف در حرف چِتا لاگے ہے

جو بھی لاتا ہوں زباں پر اکثر

کیوں وُہ پہلے سے کہا لاگے ہے

جُز کسی سادہ منش کے ماجدؔ

کون پابندِ وفا لاگے ہے

ماجد صدیقی

کیا کیا نہ ہمیں خیال آئے

مارچ 31, 2017ماجد صدیقی،غزل،غزل سراچال،بھال،جلال،خیال،زوالadmin

ماجد صدیقی ۔ غزل نمبر 16

محتاج کو جب سے ٹال آئے

کیا کیا نہ ہمیں خیال آئے

کیا یہ بھی اثر ہے بددُعا کا

سُورج کو جو نت زوال آئے

ہے نام کا بھی جو شیرِ بیشہ

گیدڑ کی اُسے نہ چال آئے

ہے جس کے قلم میں عدلِ دوراں

کیونکر نہ اُسے جلال آئے

اُس شخص سے خیر کی طلب کیا

ماجدؔ، جِسے دیکھ بھال آئے

ماجد صدیقی

اچّھا ہے یہی آج کا اخبار نہ دیکھا

مارچ 31, 2017ماجد صدیقی،غزل،غزل سراآزار،اخبار،بیدار،خونخوار،دوچار،سرشارadmin

ماجد صدیقی ۔ غزل نمبر 17

منصور حقیقت کا سرِ دار نہ دیکھا

اچّھا ہے یہی آج کا اخبار نہ دیکھا

ہر فرد کو اِس عہد میں آزارِ بقا ہے

ہے کون جِسے مرگ سے دوچار نہ دیکھا

اِس دورِ منّور میں سرِ ارض ہے جیسا

انسان کو ایسا کبھی خونخوار نہ دیکھا

خدشوں نے جہاں دی نہ مری آنکھ بھی لگنے

اُس شہر کا اِک شخص بھی بیدار نہ دیکھا

ہوتا ہے ہر اِک پھُول مہک بانٹ کے جیسا

انسان کو ایسا کبھی سرشار نہ دیکھا

اک بار جو لاحق ہو دل و جان کو ماجدؔ

جاتا ہوا وُہ روگ، وُہ آزار نہ دیکھا

ماجد صدیقی

کہ طوق ڈالا ہے میری گردن میں بندگی کا

مارچ 31, 2017ماجد صدیقی،غزل،غزل سراگمرہی،آشتی،بندگی،برابری،درندگی،دشمنی،سخنوریadmin

ماجد صدیقی ۔ غزل نمبر 18

ملا ہے فیضان یہ خداؤں کی برتری کا

کہ طوق ڈالا ہے میری گردن میں بندگی کا

بدستِ انساں عَلَم جہاں امن کا گڑا ہے

لٹک رہا ہے وہیں پرندہ بھی آشتی کا

کُھلی فضاؤں کی راہ جو بھی کوئی سجھائے

اُسی پہ آنے لگا ہے الزام گمُرہی کا

پڑے نہ زد جس پہ بات ساری مفاد کی ہے

جواز سیدھا سا ایک ہی تو ہے دشمنی کا

دلوں کے اندر ہی پائے جاتے ہیں نقش ایسے

نشان ماتھوں پہ کب ملا ہے درندگی کا

نہ تا ابد غرقِ نیل ہو کر بھی باز آئے

ہُوا ہے لپکا جسے خدا سے برابری کا

نظر کا آشوب جب تلک ہے نہ جا سکے گا

ہمیں لگا ہے جو روگ ماجدؔ سخنوری کا

ماجد صدیقی

موسم پیار کی وادی کا

مارچ 31, 2017ماجد صدیقی،غزل،غزل سراہادی،فریادی،منادی،وادی،آزادی،شہزادیadmin

ماجد صدیقی ۔ غزل نمبر 19

مظہر ہے بربادی کا

موسم پیار کی وادی کا

تھامیں پیٹ کی پوجا کو

دامن ہم کس ہادی کا

لو پھر بستی سہم گئی

سُن کر ڈھول منادی کا

اِک اِک سُوکھا پیڑ لگے

ہاتھ کسی فریادی کا

حرفِ دُعا کب ہوتا ہے

بول کسی شہزادی کا

ماجدؔ اک اک لفظ تِرا

پرچم ہے آزادی کا

ماجد صدیقی

نہیں رقیب تو رہ میں مری سماج سہی

مارچ 31, 2017ماجد صدیقی،غزل،غزل سراآج،باج،تاج،رواج،راج،سماجadmin

ماجد صدیقی ۔ غزل نمبر 20

مجھے ہی ضبطِ تمنّائے دل کی لاج سی

نہیں رقیب تو رہ میں مری سماج سہی

زبان سے بھی کہو بات جو نگاہ میں ہے

جو حشر دل پہ گزرنا ہے کل وُہ آج سہی

کسی کے نام تو ہونا ہے اِس ریاست کو

خُدا کے بعد تمہارا ہی دل پہ راج سہی

ستم کا نام نہ دیں ہم کسی ستم کو بھی

یہ اہتمام بھی اَب شہر کا رواج سہی

کرو نہ شاخِ بدن سے سروں کے پھُول جُدا

سدا بہار تمہارے ہی سر کا تاج سہی

ہلا نہ لب بھی ستم گرکے سامنے ماجدؔ

جہاں ہیں اور وہاں یہ بھی ایک باج سہی

ماجد صدیقی

سال بہ سال نہ کیونکر میں بھی سالگرہ منواؤں

مارچ 31, 2017ماجد صدیقی،غزل،غزل سرالہراؤں،للچاؤں،منواؤں،کھاؤں،ٹھہراؤں،جاؤں،سہلاؤںadmin

ماجد صدیقی ۔ غزل نمبر 21

’’مان مجھے‘‘ کی ہانک لگاؤں وقت کا شہ کہلاؤں

سال بہ سال نہ کیونکر میں بھی سالگرہ منواؤں

قطرہ ہوں اور دل میں دیکھو دُھن ہے کیا البیلی

بادل بن کر اِک اِک پیاسے کھیت پہ میں لہراؤں

مَیں تیرا ممنون ہوں سُن اے درد رسان زمانے!

گھڑیالوں سا گنگ رہوں گر میں بھی چوٹ نہ کھاؤں

ریت اور کنکر تو ہر رُت میں گرم ہوا برسائے

رات کی رانی عام کہاں میں جس سے تن سہلاؤں

عرش سے اُترا کون فرشتہ میری سُننے آئے

مَیں جو عادل تک کو بھی اکثر مجرم ٹھہراؤں

جان بھی جاتی ہے تو جائے پر یہ کب ممکن ہے

مَیں اور وقت کے پِیروں کے پس خوردے کو للچاؤں

جانے کس کے قرب سے ماجدؔ لاگا روگ یہ مجھ کو

ہر دم ایک ہی خبط ہے میں جھُوٹے کے گھر تک جاؤں

ماجد صدیقی

وُہ ماجرا سرِ دیوار ہے رقم دیکھا

مارچ 31, 2017ماجد صدیقی،غزل،غزل سراقلم،نم،بھرم،بھسم،جنم،رقم،صنمadmin

ماجد صدیقی ۔ غزل نمبر 22

لب و زباں پہ اُترتے جسے ہے کم دیکھا

وُہ ماجرا سرِ دیوار ہے رقم دیکھا

وُہ دل بھی سنگ سے کمتر ہے کب کہ جس نے کبھی

کوئی خُدا، نہ پسِ آرزو، صنم دیکھا

شبِ الم کے تصّور سے یوں لگے جیسے

اِسی حیات میں اِک اور ہو جنم دیکھا

ستم کو نام دیا اَب کے جو ستمگر نے

کسی بھی جھُوٹ کا کھُلتے نہ یوں بھرم دیکھا

ملا فروغ جہاں بھی سکوں کے نغموں کو

وُہ شاخ راکھ ہوئی، آشیاں بھسم دیکھا

کبھی بہ حسنِ سلامت ہمیں نہ یاد آیا

وُہ شخص جس کو بچھڑتے بہ چشمِ نم دیکھا

ہوا کی چھیڑ بھی ماجدؔ تھی شاخِ بالا سے

نہ جھُک سکا جو کہیں سر وُہی قلم دیکھا

ماجد صدیقی

جو برگ بھی تھا سلگتی زبان جیسا تھا

مارچ 31, 2017ماجد صدیقی،غزل،غزل سراچٹان،کمان،گمان،آسمان،امتحان،اڑان،زبانadmin

ماجد صدیقی ۔ غزل نمبر 23

گُماں بہار پہ دیپک کی تان جیسا تھا

جو برگ بھی تھا سلگتی زبان جیسا تھا

وُہ دن بھی تھے کہ نظر سے نظر کے ملنے پر

کسی کا سامنا جب امتحان جیسا تھا

یہ کیا ہُوا کہ سہارے تلاش کرتا ہے

وُہ پیڑ بھی کہ چمن میں چٹان جیسا تھا

کسی پہ کھولتے کیا حالِ آرزو، جس کا

کمال بِکھرے پروں کی اُڑان جیسا تھا

تنی تھی گرچہ سرِ ناؤ سائباں جیسی

سلوک موج کا لیکن کمان جیسا تھا

کہاں گیا ہے وُہ سرچشمۂ دُعا اپنا

کہ خاک پر تھا مگر آسمان جیسا تھا

نظر میں تھا ہُنرِ ناخُدا، جبھی ماجدؔ

یقین جو بھی تھا دل کو گمان جیسا تھا

ماجد صدیقی

میرا تو سب شہر سے اِک جیسا ناتا ہے

مارچ 31, 2017ماجد صدیقی،غزل،غزل سراچنتا،ناتا،آشا،بہلاتا،جھوٹا،جھپٹا،سناٹاadmin

ماجد صدیقی ۔ غزل نمبر 24

کون نہیں اور کون، کہوں، مجھ کو بھاتا ہے

میرا تو سب شہر سے اِک جیسا ناتا ہے

وقت ہمیں بھی اَب وہ لاڈ دلائے جیسے

نوکر مالک کے بچّے کو بہلاتا ہے

جس کے مُنہ پر جھُوٹ ہے سچّا اُس کو جانو

سچ کہتا ہے جو بھی شخص وُہی جھُوٹا ہے

رُت، جو پھُول لُٹے ہیں شاید پھر لوٹا دے

دل میں باقی ہے تو ایک یہی آشا ہے

ہونٹ ہی حرف و صوت سے کچھ محروم نہیں ہیں

آنکھوں تک میں بھی اِک جیسا سناٹا ہے

کشتی کے پتوار نہ جل ہی سے جل جائیں

ہر راہرو کے ذہن میں ایک یہی چِنتا ہے

کانوں میں پھنکار سی اِک پہنچی ہے، کہیں سے

چڑیوں پر پھر شاید سانپ کہیں جھپٹا ہے

ماجد صدیقی

جھونکے سے جانے کیا اپنا ناتا ہے

مارچ 31, 2017ماجد صدیقی،غزل،غزل سراناتا،گاتا،آتا،اتراتا،بہلاتا،بھاتا،دکھاتاadmin

ماجد صدیقی ۔ غزل نمبر 25

کُنجِ قفس تک بھی خوشبو سی لاتا ہے

جھونکے سے جانے کیا اپنا ناتا ہے

پِٹوا کر سہلائے یُوں ہر پنیچ ہمیں

بالغ جیسے بچّے کو بہلاتا ہے

ظالم کے ہتھے جو بھی اِک بار چڑھے

جیون بھرُوہ اُس کے ہی گُن گاتا ہے

پنچھی سوچیں اَب وُہ ایکا کرنے کی

جو ایکا مرگِ انبوہ دکھاتا ہے

سینت کے رکھے صید نہ اپنا زورآور

شیر کے من کو تازہ خون ہی بھاتا ہے

جس کے سر تھا خون کسی کا شخص وُہی

اَب قبروں پر پھول چڑھانے آتا ہے

ماجدؔ بھی کیا سادہ ہے اخلاص پہ جو

رہ رہ کر اِس دَور میں بھی اِتراتا ہے

ماجد صدیقی

ڈنک چبھو کر جیسے اژدر بھُول گیا

مارچ 31, 2017ماجد صدیقی،غزل،غزل سراچر،کر،گر،آذر،افسر،اژدر،درadmin

ماجد صدیقی ۔ غزل نمبر 26

کرنی کر کے ہے یوں آمر بھُول گیا

ڈنک چبھو کر جیسے اژدر بھُول گیا

جان پہ سچ مچ کی بن آتی دیکھی تو

جتنی شجاعت تھی شیرِ نر بھُول گیا

خلق سے خالق کٹ سا گیا ہے یُوں جیسے

اپنے تراشیدہ بُت آذر بھُول گیا

دُھوپ سے جھُلسے ننگے سر جب دیکھے تو

خوف کے مارے شاہ بھی افسر بھُول گیا

گزرے دنوں کی سنُدر یاد کی آمد کو

چھوڑ کے جیسے دل یہ، کھُلے در بھُول گیا

جسم پہ جمتی گرد ہی شاید بتلائے

وقت ہمیں کس طاق میں رکھ کر بھُول گیا

اُس کی سرونُما قامت ہے یا ماجدؔ

چھیڑ کے تان کوئی نغمہ گر بھُول گیا

ماجد صدیقی

جھُوٹ کی کھاد سے ہر فصل اُگائی جائے

مارچ 31, 2017ماجد صدیقی،غزل،غزل سراکمائی،کرائی،اگائی،بھائی،بتائی،بسائی،دہائیadmin

ماجد صدیقی ۔ غزل نمبر 27

کیوں نہ تدبیر کوئی ایسی لڑائی جائے

جھُوٹ کی کھاد سے ہر فصل اُگائی جائے

ایک سے طور ہیں اِس شہر کے تیور اِک سے

عمر بیتے کہ یہاں رات بتائی جائے

بات سیدھی ہے حدِ سنگ دلی سے آگے

ساتھ یوسف کے کہاں تک کوئی بھائی جائے

دید کو جس کی فلک تک سے فرشتے اُتریں

ایسی بستی بھی کہیں کوئی بسائی جائے

جو بھی قیمت ہے کسی کی وہ جبیں پر لِکھ لے

یہ منادی بھی سرِ شہر کرائی جائے

راہ ایسی کوئی بتلا مرے واعظ! جس میں

رائیگاں عمر کی پچھلی نہ کمائی جائے

شور کٹیاؤں میں کیسا ہی مچا لے ماجدؔ

قصر تک شاہ کے، تیری نہ دُہائی جائے

ماجد صدیقی

کس کے ہاتھوں آ لگا مجھ کو یہ پتّھر دیکھنا

مارچ 31, 2017ماجد صدیقی،غزل،غزل سراکر،گر،پتّھر،پر،برابر،شرadmin

ماجد صدیقی ۔ غزل نمبر 28

کون سا الزام آیا ہے مرے سر، دیکھنا

کس کے ہاتھوں آ لگا مجھ کو یہ پتّھر دیکھنا

خستوں نے کس قدر قامت تمہاری پست کی

رازقو! یہ فرق بھی دل میں اُتر کر دیکھنا

کرچیوں کی شکل میں پلکوں تلک جو آ گیا

یہ مرا دل ہے اسے بھی آئنہ گر! دیکھنا

پھُول سا ہر صبح رکھ لینا اُسے پیشِ نظر

چاند سا ہر دم اُسے اپنے برابر دیکھنا

گھونسلوں میں پھیلتی اِک آبشارِ نغمگی

اور پھر زیرِ شجر بکھرے ہوئے پر دیکھنا

حفظِ جاں کے عُذر کے ہوتے نجانے کس طرف

لے گئی انساں کو ماجدؔ، قوتِ شر دیکھنا

ماجد صدیقی

جینے کا ہر لمحہ شب آثار لگا ہے

مارچ 31, 2017ماجد صدیقی،غزل،غزل سراآثار،اخبار،بیمار،بیدار،خوار،شہوارadmin

ماجد صدیقی ۔ غزل نمبر 29

قلب و نظر کو جانے کیا آزار لگا ہے

جینے کا ہر لمحہ شب آثار لگا ہے

انساں بھی آواز نہ یُوں لوٹائے، جیسے

پتّھر پتّھر جنگل کا غم خوار لگا ہے

اُس کو جانے رات گئے کیا فکر لگی تھی

بستی بھر میں چور ہی اِک بیدار لگا ہے

صَرف ہوا ہے جو بھی بحقِ پست مقاماں

حرف وُہی اپنا دُرِّ شہوار لگا ہے

اِک اِک ذہن تھا ایک ہی روگ کی زد میں جیسے

شہر کا شہر ہی اِک جیسا بیمار لگا ہے

ماجدؔ شہر میں ہر سُو جیسے سب اچّھا تھا

جس کو دیکھا سرکاری اخبار لگا ہے

ماجد صدیقی

دلوائے بارود ہمیں بیگانوں سے

مارچ 31, 2017ماجد صدیقی،غزل،غزل سرامکانوں،کمانوں،کانوں،کاشانوں،بیگانوں،زمانوں،شریانوںadmin

ماجد صدیقی ۔ غزل نمبر 30

فصل اُٹھے جو بھی اپنے کھلیانوں سے

دلوائے بارود ہمیں بیگانوں سے

سچ مچ کا سچ جس نے سرِ دربار کہا

تیر نہ کیا کیا اُس پر چلے کمانوں سے

ہم وُہ لوگ ہیں آج کے دور میں بھی جن کا

رشتہ ہے پتّھر کے گئے زمانوں سے

جھونپڑیوں سے اُٹھ کر آنے والوں کے

طَور بدلتے ہیں کب نئے مکانوں سے

آجر سوچے، دیکھ کے تن مزدوروں کے

کتنا سونا نکلے گا اِن کانوں سے

باغ پہ اِک وُہ رُت بھی آئی تھی جس میں

پنچھی تک چمٹے دیکھے کاشانوں سے

جائے گا کب حبس کا موسم یُوں ماجدؔ

جب تک آگ نہ پھُوٹے گی شریانوں سے

ماجد صدیقی

سدا رہیں گے نہ ایک جیسے رُتوں کے انداز دیکھ لینا

مارچ 31, 2017ماجد صدیقی،غزل،غزل سراآواز،انداز،درباز،راز،شہبازadmin

ماجد صدیقی ۔ غزل نمبر 31

فضائے دوراں کبھی تو ہو گی دلوں کی دمساز دیکھ لینا

سدا رہیں گے نہ ایک جیسے رُتوں کے انداز دیکھ لینا

یہ بات سورج کے ایک دوبار پھر کے آنے پہ منحصر ہے

کلی چھپائے جِسے، ہوا کے لبوں پہ وُہ راز دیکھ لینا

چمن میں تُندی ذرا سی بھی جسکے زمزموں میں درآئی اُس پر

کھُلے نہیں گر تو کُچھ دنوں میں قفس کے درباز دیکھ لینا

پکڑ کے زندہ ہی جس درندے کو تم سِدھانے کی سوچتے ہو

بدل سکے گا نہ سیدھے ہاتھوں وُہ اپنے انداز دیکھ لینا

فقط دبکنے سے فاختاؤں کو کیاضمانت ملے اماں کی

ہنر دکھائے گا اِس طرح تو کچھ اور شہباز دیکھ لینا

رواں دواں ہے نمِ زمیں سا، نمو کا پیغام جس میں ماجدؔ

صدا بصحرا کبھی نہ ہو گی مری یہ آواز دیکھ لینا

ماجد صدیقی

کم نہیں کسبِ خسارہ میں مگر انسان بھی

مارچ 31, 2017ماجد صدیقی،غزل،غزل سراپہچان،آسان،امکان،انسان،جان،ریحانadmin

ماجد صدیقی ۔ غزل نمبر 32

عرش تک سے اِس پہ ارزانی ہیں گو احسان بھی

کم نہیں کسبِ خسارہ میں مگر انسان بھی

ہے ہمیں کیوں اُس بدن پر حکمرانی کا یقیں

جس کے ملنے کا نہیں باقی کوئی امکان بھی

سرو کا تو کیا جو لرزاں بھی ہو شورِ سیل سے

خاک پر دِبکے ملے ہیں سنبل و ریحان بھی

آبجو میں اور ہے پودا سرِ ساحل کچھ اور

سانس لینا دہر میں مشکل بھی ہے آسان بھی

باپ روزی کے لئے نکلا وطن سے دُور تو

مڑ کے بچّوں کی نہ اُس سے ہو سکی پہچان بھی

سحرِ سے فرصت مِلے دل کے تو ماجدؔ دیکھنا

کچھ تقاضے تجھ سے رکھتی ہے بدن میں جان بھی

ماجد صدیقی

دیکھنے سے جن کے مائیں مر گئیں اِس شہر میں

مارچ 31, 2017ماجد صدیقی،غزل،غزل سراملیں،نہیں،نگیں،کھلیں،کرچیاں،گئیں!،جلیںadmin

ماجد صدیقی ۔ غزل نمبر 33

عصمتوں کی دھجّیاں کیا کیا اُڑیں اِس شہر میں

دیکھنے سے جن کے مائیں مر گئیں اِس شہر میں

کون کہہ سکتا ہے کس کی استراحت کے سبب

جاگتے جسموں میں جانیں تک جلیں اِس شہر میں

اوٹ میں نامنصفی کی جانے کیا کیا چاہتیں

موت کی آغوش میں سوئی ملیں اِس شہر میں

اِس قدر ارزاں تو یہ جنسِ گراں دیکھی نہیں

سنگ کے بھاؤ تُلے جتنے نگیں اِس شہر میں

ضرب سے حرفِ گراں کی جابجا بکھری ملیں

دل کے آئینوں کی کیا کیا کرچیاں اِس شہر میں

دیکھنے میں تو نظر آتی ہیں سب پلکیں کھُلی

جاگتی اِک آنکھ بھی لیکن نہیں اِس شہر میں

وحشتوں کے جانے کن کن ناخنوں سے کُو بہ کُو

مینڈھیاں ماجدؔ حیاؤں کی کھُلیں اِس شہر میں

ماجد صدیقی

کاغذی پھُول ہی پودوں پہ سجائے جائیں

مارچ 31, 2017ماجد صدیقی،غزل،غزل سرالائے،چلائے،جلائے،سکھائے،ستائے،سجائےadmin

ماجد صدیقی ۔ غزل نمبر 34

عیب موسم کے اب اِس طرح چھپائے جائیں

کاغذی پھُول ہی پودوں پہ سجائے جائیں

کھُل کے رہ جائے بھرم اہلِ ستم کا جن سے

لفظ ایسے کبھی ہونٹوں پہ نہ لائے جائیں

ہاتھ اِک خلق کے جیبوں کی طرف جن سے بڑھیں

سارے کرتب وُہ بندریا کو سکھائے جائیں

کیا خبر ذلّتِ پیہم ہی جگا دے اِن کو

شہر کے لوگ نہ کیوں اور ستائے جائیں

جرمِ غفلت کی یہی ایک سزا ہے اَب تو

اپنے پُتلے ہی سرِ عام جلائے جائیں

سادگی اوڑھ کے چہروں پہ بظاہر ماجدؔ

کھوٹ جن جن میں ہے سِکّے وُہ چلائے جائیں

ماجد صدیقی

خاک میں اشک بھلے مِل جائے

مارچ 31, 2017ماجد صدیقی،غزل،غزل سراکملائے،کھلائے،جائے،دکھلائے،سہلائےadmin

ماجد صدیقی ۔ غزل نمبر 35

صدیوں اپنی جوت جگائے

خاک میں اشک بھلے مِل جائے

ساون، کُوڑے کرکٹ میں بھی

اپنے ڈھب کے پھُول کھلائے

دید خُدا کی، چودھویں جس کی

وُہ چندا کب مُکھ دکھلائے

اِک پل پھُول سا کِھلنے والا

چہرہ، دُوجی پل کملائے

پیڑ وُہ تازہ دم کیا ہو گا

اُڑتی گرد جِسے سہلائے

ماجدؔ ہر اُمید کا پیکر

چاند کی صورت گھٹتا جائے

ماجد صدیقی

یہ دل اُس کا یہی پہلو نہ جانے

مارچ 31, 2017ماجد صدیقی،غزل،غزل سراگلرو،پہلو،آہو،آنسو،تو،خو،سوadmin

ماجد صدیقی ۔ غزل نمبر 36

شکن کیا تھی، سرِ ابرو، نہ جانے

یہ دل اُس کا یہی پہلو نہ جانے

سماعت پر کسی حرفِ گراں کے

اُبل پڑتے ہیں کیوں آنسو، نہ جانے

لہو کس گھاٹ پر اُس کا بہے گا

یہ نکتہ تشنہ لب آہو نہ جانے

وُہی رُت، حبس تھا جس سے کہے یہ

چلیں کیوں آندھیاں ہر سُو، نہ جانے

الاؤ دل کے جانے اِک زمانہ

مگر یہ بات وُہ گلرُو نہ جانے

یہی نا آگہی خاصہ ہے اُس کا

کوئی فرعون اپنی خُو نہ جانے

یہاں مجرم ہے جو بھی منکسر ہے

یہی اِک بات ماجدؔ تُو نہ جانے

ماجد صدیقی

دل میں تھے جذبوں کے جو انبار جلے

مارچ 31, 2017ماجد صدیقی،غزل،غزل سراوار،پار،پتوار،آثار،آزار،انبارadmin

ماجد صدیقی ۔ غزل نمبر 37

شہر جلے چاہت کے سب بازار جلے

دل میں تھے جذبوں کے جو انبار جلے

لُو جس جانب سے آئی ہے پرافشاں

کون کہے یہ، کتنے نگر اُس پار جلے

رُت بدلی تو آگ میں سُرخ گلابوں کی

کیا کیا بھنورے ہیں پروانہ وار جلے

کوئی ستارہ، کوئی شرر کہتا ہے جنہیں

آنکھوں میں لَو دیتے وُہ آزار جلے

بعدِ فنا بھی وُہ جو کسی کی زیر ہوئیں

صدیوں تک اُن نسلوں کے آثار جلے

ماجدؔ جی جب آنچ بھنور کی پہنچی تو

پانی میں بھی کشتی کے پتوار جلے

ماجد صدیقی

پڑے گا تا عُمر اَب یہی کاروبار کرنا

مارچ 31, 2017ماجد صدیقی،غزل،غزل سراوار،کاروبار،پار،آشکار،بار،سوارadmin

ماجد صدیقی ۔ غزل نمبر 38

شجر سے گرتا ہر ایک پتّا شمار کرنا

پڑے گا تا عُمر اَب یہی کاروبار کرنا

قفس سے جاتی ہوئی ہواؤ، ستمگروں پر

ہماری حالت کُچھ اور بھی آشکار کرنا

یہی تأمّل کا درس ہے اُس کی کامرانی

عقاب سیکھے فضا میں رُک رُک کے وار کرنا

بنامِ خوبی جو ہم سے منسوب ہے، وفا کا

یہ دشت بھی ہے ہمیں اکیلے ہی پار کرنا

ہیں اِس پہ پہلے ہی کتنے احسان مُحسنوں کے

نظر کو ایسے میں اور کیا زیر بار کرنا

طلب اِسی زندگی میں جنّت کی ہے تو ماجدؔ

نہ خبط اعصاب پر کوئی بھی سوار کرنا

ماجد صدیقی

شور سُورج سے بچھڑ کر دن بھی کچھ ایسا کرے

مارچ 31, 2017ماجد صدیقی،غزل،غزل سراکیا،اچّھا،ایسا،بینا،جھانکا،سوچا،سایاadmin

ماجد صدیقی ۔ غزل نمبر 39

گر کے پتّا شاخ سے جس طرح واویلا کرے

شور سُورج سے بچھڑ کر دن بھی کچھ ایسا کرے

تھے ہمِیں وُہ گُل جو گلدانوں میں بھی مہکا کئے

کون ہے ورنہ جو نُچ کر بھی سلوک اچّھا کرے

خواب تک میں بھی یہی رہتی ہے جانے آس کیوں

چاند جیسے ابر سے، کھڑکی سے وُہ جھانکا کرے

التفات ہم پر ہے یُوں اہلِ کرم کا جس طرح

دشت پر بھٹکا ہُوا بادل کوئی سایا کرے

فکر ہو بھی تو رعایا کو خود اپنی فکر ہو

شاہ کو کیا ہے پڑی ایسی کہ وہ سوچا کرے

کیا کہیں کتنی اپھل ہے نوکری اِس دَور کی

آدمی اِس سے تو دانے بھُون کر بیچا کرے

مُکھ دمک اُٹھیں سبھی تو رقص پر موقوف کیا

ہو گیا ایسا تو ماجدؔ جانے کیا سے کیا کرے

ماجد صدیقی

وقت نجانے اور ابھی کیا کیا منظر دکھلائے گا

مارچ 31, 2017ماجد صدیقی،غزل،غزل سراہنر،منظر،نگر،گہر،در،سفر،سحرadmin

ماجد صدیقی ۔ غزل نمبر 40

سچ کہنے پر شہر بدر ہوتے، بُوذرؓ دکھلائے گا

وقت نجانے اور ابھی کیا کیا منظر دکھلائے گا

اِک اِک گوشۂ شہر سے تو ہم خاک جبیں پر مَل لائے

خواہش کا عفریت ہمیں اَب کون سا در دکھلائے گا

سُورج کی پہلی کرنوں کے ساتھ دمکتے اِک جیسے

کون مُبارک دن ایسا، جو سارے نگر دکھلائے گا

راہبروں کی سنگ دلی سے بچ نہ سکا جو دبنے سے

کون سا ایسا عزم ہمیں مائل بہ سفر دکھلائے گا

ہم بھاڑے کے وُہ مزدور ہیں پیٹ کا یہ تنّور جنہیں

دریاؤں کی تہہ میں چھپُا اِک ایک گہر دکھلائے گا

دُور لگے وُہ وقت ابھی جب ٹھہری رات کے آنگن میں

پھیکا پڑ کے چاند ہمیں آثارِ سحر دکھلائے گا

ہاں وُہ شہر کہ جس کا اِک اِک باسی اُونچا سُنتا ہو

ماجدؔ ایسے شہر میں تو کیا رنگِ ہُنر دکھلائے گا

ماجد صدیقی

خلق جِسے کمزور کا استحصال کہے

مارچ 31, 2017ماجد صدیقی،غزل،غزل سراڈال،آل،اقبال،استحصال،بال،حال،سالadmin

ماجد صدیقی ۔ غزل نمبر 41

زورآور اُس فن کو اپنی ڈھال کہے

خلق جِسے کمزور کا استحصال کہے

دیکھ رہی ہے ہاتھ دُعا کا بن بن کر

بادل سے کیا اور چمن کی آل کہے

رُخصت ہوتے اُس سے وُہی کُچھ مَیں نے کہا

پیڑ سے جو کچھ ٹوُٹ کے گرتی ڈال کہے

اور بھی کیوں لوٹے جا کر انگاروں پر

کون کسی سے اپنے دل کا حال کہے

یہ بھی کسی کے دل کا نقشہ ہو شاید

تُو جس کو شیشے میں آیا بال کہے

آپ کے حق میں اگلے دن اچّھے ہوں گے

بات یہی ہم سے ہر گزرا سال کہے

دل کی بات تجھی سے جیسا کہتا ہو

فیض کہے ماجدؔ یا وُہ اقبال کہے

ماجد صدیقی

درپیش ہیں اِس دل کو زیاں اور طرح کے

مارچ 31, 2017ماجد صدیقی،غزل،غزل سرانشاں،کماں،رواں،زیاں،زباں،شہاںadmin

ماجد صدیقی ۔ غزل نمبر 42

رکھتا ہے کرم پر بھی گماں اور طرح کے

درپیش ہیں اِس دل کو زیاں اور طرح کے

اس دشتِ طلب میں کہ بگولے ہی جہاں ہیں

آتے ہیں نظر سروِ رواں اور طرح کے

تھا پیڑ جہاں قبر سی کھائی ہے وہاں اَب

سیلاب نے چھوڑے ہیں نشاں اور طرح کے

دل کا بھی کہا، خوف سے کٹنے کے نہ مانے

کرتی ہے ادا لفظ، زباں اور طرح کے

لگتا ہے کہ جس ہاتھ میں اَب کے یہ تنی ہے

دکھلائے کمالات کماں اور طرح کے

ہم لوگ فقط آہ بہ لب اور ہیں ماجدؔ

دربار میں آدابِ شہاں اور طرح کے

ماجد صدیقی

کند ہو چکے جو بھی وُہ مراد بر آئے

مارچ 31, 2017ماجد صدیقی،غزل،غزل سرانگر،ور،بھر،بر،سحرadmin

ماجد صدیقی ۔ غزل نمبر 43

راحتوں کی صورت بھی بس یہی نظر آئے

کند ہو چکے جو بھی وُہ مراد بر آئے

ہے یہی بساط اپنی نام پر خداؤں کے

معبدوں میں جا نکلے، جا کے آہ بھر آئے

یہ بھی دن دکھا ڈالے حُسن کی اداؤں نے

پھوُل تک سے وحشت ہو چاند تک سے ڈر آئے

ہم سے بھی کوئی پوچھے کُچھ دلوں کی ویرانی

گھوم پھر کے ہم بھی تو ہیں نگر نگر آئے

یوں تو آٹھ پہروں میں نت ہی دن چڑھے ماجدؔ

جس طرح کی ہم چاہیں جانے کب سحر آئے

ماجد صدیقی

اُسی کا تِیر آخر کو لگا ہے جا نشانے پر

مارچ 31, 2017ماجد صدیقی،غزل،غزل سرانشانے،ٹھکانے،آزمانے،آشیانے،جھلانے،زمانےadmin

ماجد صدیقی ۔ غزل نمبر 44

رہا تیّار جو جاں تک پہ اپنی کھیل جانے پر

اُسی کا تِیر آخر کو لگا ہے جا نشانے پر

سکوں کی نیند سو سو کر گنوا کر وقت ہاتھوں سے

نہ جب کُچھ بن پڑے تو لعنتیں بھیجو زمانے پر

شجر کا عجز کیا تھا، رسّیاں تھیں ناتواں کتنی

کھُلے اسرار سارے پِینگ کو خود ہی جھُلانے پر

سرِ شاخِ تمّنا کونپلیں دیکھی ہیں جس دم بھی

گھرے چیلوں کے جھُرمٹ جانے کیا کیا آشیانے پر

نمائش کو سہی پر حسن بھی کب چین سے بیٹھے

کوئی تتلی نہ دیکھی پُر سکوں اپنے ٹھکانے پر

بدلتی ہے نظر، دل کس طرح بے زار ہوتے ہیں

پتہ چلتا ہے ماجدؔ یہ کسی کو آزمانے پر

ماجد صدیقی

مسند سے وُہ شخص نہیں ہے جانے کا

مارچ 31, 2017ماجد صدیقی،غزل،غزل سراکھلانے،کھانے،کاشانے،افسانے،بیگانے،جانے،دہرانے،سہلانےadmin

ماجد صدیقی ۔ غزل نمبر 45

ڈھنگ جِسے آئے سب کو بہلانے کا

مسند سے وُہ شخص نہیں ہے جانے کا

ویسا ہی، کنکر ہو جیسے کھانے میں

بزم میں تھا احساس کسی بیگانے کا

کام نہ کیونکر ہم بھی یہی اَب اپنا لیں

ساری اچّھی قدریں بیچ کے کھانے کا

وُہ چنچل جب بات کرے تو، گُر سیکھے

بادِصبا بھی اُس سے پھُول کھِلانے کا

پُوچھتے کیا ہو پیڑ تلک جب ٹُوٹ گرے

حال کہیں کیا ہم اپنے کاشانے کا

آیا ہے وُہ دَور کہ باغ میں پھُولوں کو

گرد بھی کرتب دِکھلائے سہلانے کا

جوڑتے ہو کیوں سُوکھے پتّے شاخوں سے

حاصل کیا؟ پچھلی باتیں دہرانے کا

ماجدؔ ہر کردار ہی جس کا شاطر ہے

جانے کیا عنوان ہو اُس افسانے کا

ماجد صدیقی

مختصر یہی جانو، جانگسل ہے جو منظر وہ مرے ہُنر میں ہے

مارچ 31, 2017ماجد صدیقی،غزل،غزل سراہنر،وخر،تر،در،رہگزر،سفرadmin

ماجد صدیقی ۔ غزل نمبر 46

درد جاں بہ جاں اُترا، کرب کُو بہ کُو پھیلا، سب مری نظر میں ہے

مختصر یہی جانو، جانگسل ہے جو منظر وہ مرے ہُنر میں ہے

آنچ ہے جو سانسوں میں آخرش وُہ پُھونکے گی ہر سلاخ زنداں کی

کشت میں تمّنا کے پھول ہی اُگائے گی نم جو چشم تر میں ہے

کب تلک چھپائے گی بھینچ کر ورق اپنے وقت کی لغت آخر

فرق کیوں نہ آئے گا سامنے نگاہوں کے، وُہ جو اسپ وخر میں ہے

روک لو گے دریا کو پر جو نم سمائے گی خاک میں وہ کیا ہو گی

اُس کا کیا کرو گے تم زور جو کرن ایسا فکر کے سفر میں ہے

جو خبر بھی آتی ہے ساتھ اپنے لاتی ہے بات اِس قدریعنی

قافلہ اُمیدوں کا اب تلک یونہی لپٹا گردِ رہگزر میں ہے

طشتِ وقت میں ماجدؔ رکھکے جب بھی دیکھوں تو دل یہی کہے مجھ سے

اِک عجیب سی رفعت دُور دُور تک پھیلی اپنے بام و در میں ہے

ماجد صدیقی

اوج کو اپنے چھُو کر مہ آرزو، ماہِ کامل کی مانند گھٹنے لگا

مارچ 31, 2017ماجد صدیقی،غزل،غزل سرالپٹنے،گھٹنے،پلٹنے،الٹنے،بٹنے،جھپٹنےadmin

ماجد صدیقی ۔ غزل نمبر 47

دیکھنا اَب کے پھر دیکھتے دیکھتے سائباں چاندنی کا سمٹنے لگا

اوج کو اپنے چھُو کر مہ آرزو، ماہِ کامل کی مانند گھٹنے لگا

تُو بھی اُمید کو دے نیا پیرہن جان لے تو بھی کچھ موسموں کا سخن

دیکھ لے اے دلِ زار! تیرے لئے وقت تازہ ورق ہے اُلٹنے لگا

دوستی دشمنی کے لبادوں میں پھر، کر دکھانے پہ ہے اور ہی کچھ مُصر

وقت آکاس بیلوں کے بہروپ میں سبز اشجار سے پھر لپٹنے لگا

پھر فضاؤں میں اُبھرے گی اِک چیخ سی کان جس پر دھرے گا نہ ہرگز کوئی

حرص کازاغ بالک پہ اُمید کے ہے نئی آن سے پھر جھپٹنے لگا

چھین لے گا بالآخر بہ فکرِمتیں، دیکھنا اُن کے پیروں تلے کی زمیں

ناتوانوں سے گرچہ ستمگار کی چپقلش کا ہے پانسہ پلٹنے لگا

دیکھ ماجدؔ سکوں کی نئی صورتیں پل کی پل میں نظر میں جھلکنے لگیں

زخم آہوں میں کافور ہونے لگے دردِ دل آنسوؤں میں ہے بٹنے لگا

ماجد صدیقی

جو برگ ہے پہلو میں لئے خوفِ خزاں ہے

مارچ 31, 2017ماجد صدیقی،غزل،غزل سرانشاں،کاہکشاں،جہاں،خزاں،رواںadmin

ماجد صدیقی ۔ غزل نمبر 48

پیڑوں میں بھی پہلی سی طراوت وُہ کہاں ہے

جو برگ ہے پہلو میں لئے خوفِ خزاں ہے

مت پوچھ کہ ہے کیسے ستاروں سے مرتّب

آنکھوں کے اُفق پر جو سجی کاہکشاں ہے

سیلاب سا منظر ہے نظر جائے جدھر بھی

گھیراؤ میں موجوں کے ہے جو شخص جہاں ہے

اُس برگ سی تازہ ہے تمّنائے بقا بھی

جو ٹُوٹ کے ٹہنی سے سرِآب، رواں ہے

رنگین ہے صدیوں سے جو انساں کے لہو سے

ہر ہاتھ میں کیسا یہ تصادم کا نشاں ہے

ماجد صدیقی

پپڑی سا ہر اک لب پہ جما شورِ فغاں ہے

مارچ 31, 2017ماجد صدیقی،غزل،غزل سرافغاں،کماں،کراں،بیاں،سماںadmin

ماجد صدیقی ۔ غزل نمبر 49

وُہ خوف کہ ہر جسم میں دبکی ہوئی جاں ہے

پپڑی سا ہر اک لب پہ جما شورِ فغاں ہے

برتر ہے ہر اِک بزم میں مختار ہے جو بھی

ہونٹوں پہ سجا اُس کے عجب زورِ بیاں ہے

کیا جانئے کچھ بھی تو معانی نہیں رکھتی

وُہ خامشی پھیلی جو کراں تا بہ کراں ہے

اِک ایک نگہ تیر، ہمیں دیکھنے والی

جو طاق بھی ابرو کا نظر آئے کماں ہے

ہر عہد کے آنگن میں بہلنے کو ہمارے

جس سمت نظر جائے کھلونوں کا سماں ہے

ماجد صدیقی

جس سے مرے پیکر پہ بھی سائل کا گماں ہے

مارچ 31, 2017ماجد صدیقی،غزل،غزل سراگماں،گراں،سگاں،عیاںadmin

ماجد صدیقی ۔ غزل نمبر 50

دیکھو تو یہ کیا لفظ مرے زیبِ زباں ہے

جس سے مرے پیکر پہ بھی سائل کا گماں ہے

رکھنے کو مرے کاسۂ اُمید کو خالی

جس سمت بھی جاتا ہوں وہیں شورِ سگاں ہے

یہ کیسا غضب ہے کہ جو خوشبو سا سبک تھا

وُہ خون بھی رگ رگ میں رُکا سنگِ گراں ہے

چھینی مرے قدموں سے یہ کس رُت نے روانی

قامت پہ یہ کیوں برف کے تودے سا گُماں ہے

کیا بزم میں مَیں حالِ دلِ زار چھپاؤں

ہونٹوں میں دباؤں بھی تو آنکھوں سے عیاں ہے

ماجد صدیقی

سُبکیاں ہی ہاتھ آئیں حالِ دل سُنانے میں

مارچ 31, 2017ماجد صدیقی،غزل،غزل سراچبانے،کمانے،گنگنانے،جگانے،زمانے،سنانے،سرہانےadmin

ماجد صدیقی ۔ غزل نمبر 51

دوسروں کے دروازے جا کے کھٹکھٹانے میں

سُبکیاں ہی ہاتھ آئیں حالِ دل سُنانے میں

سو تو مَیں گیا لیکن دشت کی عطا کردہ

سب تھکن اُتر آئی ہاتھ کے سرہانے میں

اِک لُغت نگل بیٹھا ناقبول لفظوں کی

میں جِسے تعّرض تھا کنکری چبانے میں

صَرف ہو گئیں کیا کیا سِیٹیوں کی آوازیں

سعد کو سُلانے میں چور کو جگانے میں

قربتوں کی لذّت تھی جو بھی، پر نکلنے پر

کھیت کھیت جا بکھری روزیاں کمانے میں

تیر پر قضا کے بھی دشت میں نظر رکھنا

ندّیاں لگا لیں گی اپنے گنگنانے میں

تذکرے وفاؤں کے کر کے، یار لوگوں کو

لے چلا ہے تُو ماجدؔ کون سے زمانے میں

ماجد صدیقی

یہ ڈر ہے ڈوب نہ جائے صدائے انسانی

مارچ 31, 2017ماجد صدیقی،غزل،غزل سراپانی،انسانی،ثانی،رانی،عُریانیadmin

ماجد صدیقی ۔ غزل نمبر 52

دُھوئیں کی دُھول کی ہر سمت ہے وُہ طغیانی

یہ ڈر ہے ڈوب نہ جائے صدائے انسانی

بہ دوشِ ابر بھی کب اِس قدر فراواں ہے

رُکا ہوا پسِ مژگاں ہے جس قدر پانی

وفا و قرض کے مکر و ریا کے پتّوں سے

چھپائے آج بھی انسان تن کی عُریانی

یہاں ہے جو بھی شہِ وقت، سوچتا ہے یہی

نہیں ہے اُس کا تہِ آسماں کوئی ثانی

غزل سرا ہوں کہ ماجدؔ طوالتِ شب میں

ادا کرے ہے یہی فرض رات کی رانی

ماجد صدیقی

کس نے اتنی رات گئے بیدار کیا

مارچ 31, 2017ماجد صدیقی،غزل،غزل سرانادار،پار،آثار،انکار،بیدار،زار،سنگھارadmin

ماجد صدیقی ۔ غزل نمبر 53

خدشوں نے پھر ذہن پہ جیسے وار کیا

کس نے اتنی رات گئے بیدار کیا

وسعتِ شب کو بڑھتا دیکھ کے ہم نے بھی

اپنا اک اک حرف سحر آثار کیا

موسم گل میں گلشن سے جو آئے تھے

اُن جھونکوں نے اور بھی کچھ بے زار کیا

آخر اک دن ناز عجائب گھر کا بنے

ہم نے جن تختوں پر دریا پار کیا

کچھ بھی نہیں جس گھر میں اُس کے تحفّظ نے

گھر والوں کو اور بھی ہے نادار کیا

ماتھے پر مزدور کے دیکھ، مشقّت نے

کن شفاف نگینوں سے سنگھار کیا

ماجدؔ سمت سفر کی ٹیڑھی تھی ورنہ

چلنے سے کب ہم نے تھا انکار کیا

ماجد صدیقی

اَب نام ہمارے کوئی سوغات نہ آئے

مارچ 31, 2017ماجد صدیقی،غزل،غزل سراکرامات،پات،برسات،جذبات،ذات،رات،سوغاتadmin

ماجد صدیقی ۔ غزل نمبر 54

خوشبُو بھی صبا اُس کی لئے سات نہ آئے

اَب نام ہمارے کوئی سوغات نہ آئے

جو لہر بھی اُٹھتی ہو بھلے دل میں اُٹھے وُہ

ہونٹوں پہ مگر تُندیٔ جذبات نہ آئے

اک بار جھنجھوڑا ہو جِسے ابر و ہوا نے

اُس پیڑ پہ پھر لوٹ کے پھل پات نہ آئے

دیکھی تھی نشیمن کے اُجڑنے سے جو پہلے

ایسی بھی گلستاں میں کوئی رات نہ آئے

جو یاد بھی آئے، تو لرزتا ہے بدن تک

آنکھوں میں کہیں پھر وُہی برسات نہ آئے

ہر کوہ یہ کہتا ہے کہ آگے کبھی اُس کے

تیشے میں ہے جو لطفِ کرامات نہ آئے

کرنے کو شفاعت بھی یہ اچّھا ہے کہ ماجدؔ

نیّت ہے بُری جس کی وُہ بد ذات نہ آئے

ماجد صدیقی

اُس کو پاگل ہی کہو رات کو جو رات کہے

مارچ 31, 2017ماجد صدیقی،غزل،غزل سرامناجات،نظرمات،پات،رات،صدماتadmin

ماجد صدیقی ۔ غزل نمبر 55

خلقتِ شہر سے کیوں ایسی بُری بات کہے

اُس کو پاگل ہی کہو رات کو جو رات کہے

جاننا چاہو جو گلشن کی حقیقت تو سُنو

بات وُہ شاخ سے نُچ کر جو جھڑا پات کہے

اِس سے بڑھ کر بھی ہو کیا غیر کی بالادستی

جیت جانے کو بھی جب اپنی نظرمات کہے

کون روکے گا بھلا وقتِ مقرّر پہ اُسے

بات ہر صبح یہی جاتی ہوئی رات کہے

بس میں انساں کے کہاں آئے ترفّع اس سا

وقت ہر آن جو اپنی سی مناجات کہے

منحرف حرف سے کاغذ بھی لگے جب ماجدؔ

کس سے جا کر یہ قلم شّدتِ صدمات کہے

ماجد صدیقی

ہر قدم پر ہیں کیا کیا نئی تتلیاں

مارچ 31, 2017ماجد صدیقی،غزل،غزل سرانشاں،پتیاں،آشامیاں،تتلیاں،دھجیاںadmin

ماجد صدیقی ۔ غزل نمبر 56

خواہش لمس میں جن کے جاتی ہے جاں

ہر قدم پر ہیں کیا کیا نئی تتلیاں

اے ہوا! بارآور ہوئی ہٹ تِری

لے اُڑا لے گلِ زرد کی پتیاں

صحنِ گلشن میں گرداں ہیں جو چار سُو

جانے کِن عہد ناموں کی ہیں دھجیاں

پُوچھتے کیا ہو تم بس میں انسان کے

کِن درندوں کی ہیں خون آشامیاں

آئنہ، روز دکھلائے ماجدؔ ہمیں

سیلِ آلام کے جانے، کیا کیا نشاں

ماجد صدیقی

مُجھ کو ٹھہرائے وُہ، آشنا کس لئے

مارچ 31, 2017ماجد صدیقی،غزل،غزل سراقبا،آشنا،بپا،خفا،خداadmin

ماجد صدیقی ۔ غزل نمبر 57

خاک سے ربط رکھے ہوا کس لئے

مُجھ کو ٹھہرائے وُہ، آشنا کس لئے

اِک ہی مسلک کے باوصف اُلجھے ہیں جو

درمیاں اُن کے آئے خُدا کس لئے

لو ہمِیں آپ سے حق نہیں مانگے

آپ کرتے ہیں محشر بپا کس لئے

جب چھُپائے نہ چھپتی ہوں عریانیاں

کوئی تن پر سجائے قبا کس لئے

جاں چھڑکتے تھے جن پر کبھی، کچھ کہو

اُن سے ٹھہرے ہو ماجدؔ خفا کس لئے

ماجد صدیقی

پل پل ترسے آنکھ جِسے وُہ چاند کنارِ بام نہیں

مارچ 31, 2017ماجد صدیقی،غزل،غزل سرانام،کہرام،اصنام،بام،خام،دامadmin

ماجد صدیقی ۔ غزل نمبر 58

جگنو جگنو حرف نِکھارے روشن پھر بھی نام نہیں

پل پل ترسے آنکھ جِسے وُہ چاند کنارِ بام نہیں

پانی کی پھنکار یہی ہے تو کب خیر کناروں کی

دریا زور دکھائے گا یہ محض خیالِ خام نہیں

کس کسکے ہونٹوں پر پرکھیں روشن حرف دکھاوے کے

شہر میں ایسا کون ہے جس کی بغلوں میں اصنام نہیں

خوشوں ہی میں سحر ہے وُہ جو پر نہ مکّرر کُھلنے دے

فصلوں پر پھیلانے کو اب ہاتھ کسی کے دام نہیں

ایک سی چُپ ہر سمت ہے چاہے سانپ نگل لے چڑیا کو

کچھ ہو جائے ہونے کو برپا ہی کہیں کہرام نہیں

اَب وُہ دَور ہے برسوں جس میں اسکے سِکے چلتے ہیں

آج کے مشکیزوں میں ماجدؔپہلے جیسا چام نہیں

ماجد صدیقی

بچّوں سا ہمیں آئے اظہارِ ہُنر کرنا

مارچ 31, 2017ماجد صدیقی،غزل،غزل سراہنر،نگر،نظر،بدر،سفر،شررadmin

ماجد صدیقی ۔ غزل نمبر 59

جگنو سے سرِمژگاں دہکا کے سحر کرنا

بچّوں سا ہمیں آئے اظہارِ ہُنر کرنا

کوندا سا دلا دینا آنکھوں کی چمک جیسا

ہونٹوں کو تبّسم سے ہمرنگِ شرر کرنا

جاں ہو کہ خیالوں کی بے نام سی بستی وُہ

تم زیرِ نگیں اپنے اِک ایک نگر کرنا

کر ڈالیں تمنّا کو دل ہی سے الگ، لیکن

شاہوں سا ہمیں آئے کب شہر بدر کرنا

ہیں جتنی خراشیں بھی دی ہیں یہ اِسے کس نے

اِس شیشۂ دل پر بھی بھولے سے نظر کرنا

ہم لوگ ہیں وُہ ماجدؔ بالائے زمیں جِن کے

لِکھا ہے نصیبوں میں کولہو کا سفر کرنا

ماجد صدیقی

کون کہے یہ رنج نظر کا کب جا کر کم ہونا ہے

مارچ 31, 2017ماجد صدیقی،غزل،غزل سرامدغم،کم،جم،خم،رم،سم،ضمadmin

ماجد صدیقی ۔ غزل نمبر 60

جب تک گرد گُلوں پر ہے اِن آنکھوں کو نم ہونا ہے

کون کہے یہ رنج نظر کا کب جا کر کم ہونا ہے

رفتہ رفتہ اندر سے دیمک سا اُنہیں جو چاٹ سکے

ایمانوں میں زہر ریا کا اور ابھی ضم ہونا ہے

جانے کب تک ٹوہ لگانے اِک اِک جابر موسم کی

دل کو ساغر میں ڈھلنا ہے اور ہمیں جم ہونا ہے

ایک خُدا سے ہٹ کر بھی کچھ قادر راہ میں پڑتے ہیں

جن کی اُونچی دہلیزوں پر اِس سر کو خم ہونا ہے

آگے کی یہ بات کہاں بتلائے لُغت اُمیدوں کی

کان میں پڑنے والے کن کن لفظوں کو سم ہونا ہے

اور طرح سے بدلے دیکھے اَبکے گھاٹ مچانوں میں

تیروں پر تحریر جہاں ہر آہو کا رَم ہونا ہے

دل کو جو بھی آس لگی وُہ خوابِ جِناں بن جائے گی

دریاؤں کو جیسے ماجدؔ بحر میں مدغم ہونا ہے

ماجد صدیقی

زور آور ہے وہ فرمان اُسی کے ہیں

مارچ 31, 2017ماجد صدیقی،غزل،غزل سرافرمان،ارمان،جان،دسترخوان،سامان،شانadmin

ماجد صدیقی ۔ غزل نمبر 61

جتنے رستے ہیں آسان اُسی کے ہیں

زور آور ہے وہ فرمان اُسی کے ہیں

اِک اِک سانس بندھا ہے اُس کی ڈوری میں

یہ پیکر یہ دل اور جان اُسی کے ہیں

وہ چاہے جو صورت اِن کو دے ڈالے

دل میں ہیں جتنے ارمان اُسی کے ہیں

پہنچا ہے جو تتلی تتلی پھُولوں تک

راحت کے سارے سامان اُسی کے ہیں

چھاپ ہے اُس کی ہر اُمید کے خوشے پر

ہر موسم کے دسترخوان اُسی کے ہیں

ہم جیسوں سے آنکھ ملائیں کب ماجدؔ

شہر میں ہیں جو جو ذی شان اُسی کے ہیں

ماجد صدیقی

آئنوں میں جابجا اِک بال سا آنے لگا

مارچ 31, 2017ماجد صدیقی،غزل،غزل سراڈھانے،کہلانے،پچتانے،آنے،بہلانے،سستانےadmin

ماجد صدیقی ۔ غزل نمبر 62

جانے کیسا واہمہ ہر دل کو دہلانے لگا

آئنوں میں جابجا اِک بال سا آنے لگا

اپنی اپنی سی فراغت ہر کسی کی ہے یہاں

مکھیوں کو پھانس کر مکڑا بھی سستانے لگا

دیکھنے میں فاختہ بھی تو کُچھ ایسی کم نہ تھی

باز ہی کیوں معتبر، جنگل میں کہلانے لگا

لا کے وڈیو سے کھلونے، کھیل یہ بھی دیکھئے

آج کا بچّہ ہے دادی جی کو بہلانے لگا

گھس گیا ابلیس سا اِک شخص ہر اِک شخص میں

کون ہے جو اَب کئے پر اپنے پچتانے لگا

جو بھی زور آور ہے ماجدؔ اُس کا خاصہ ہے یہی

دیکھ لے دریا کناروں کو ہے خود ڈھانے لگا

ماجد صدیقی

فغاں کی طرز وُہی ہم بھی اختیار کریں

مارچ 31, 2017ماجد صدیقی،غزل،غزل سرافگار،نثار،آشکار،انتظار،اختیار،بار،شمارadmin

ماجد صدیقی ۔ غزل نمبر 63

جِسے پسند جہاں بھر کے شہر یار کریں

فغاں کی طرز وُہی ہم بھی اختیار کریں

ہوئے ہیں پھول بھی آمادۂ شرارت کیا

ہمِیں سے ذکر تمہارا جو بار بار کریں

جو مصلحت کو پسِ حرف دَب کے رہ جائے

وُہ بات کیوں نہ زمانے پہ آشکار کریں

ہمیں یہ کرب کہ کیوں اُن سے ربط ہے اپنا

اُنہیں یہ آس کہ ہم جان و دل نثار کریں

لبوں پہ عکس ہے جو آئنہ اِنہی کا ہے

زباں کے زخم بھلا اور کیا شمار کریں

یہ رات کوہ نہیں کٹ سکے جو تیشوں سے

سحر کی دُھن ہے تو کُچھ اور انتظار کریں

کھُلا ہے ہم پہ تمّنا کا حال جب ماجدؔ

تو ایسے کانچ سے کیا انگلیاں فگار کریں

ماجد صدیقی

کہ جو گفتنی ہے، زبان پر نہ کوئی بھی شہر میں لا سکے

مارچ 31, 2017ماجد صدیقی،غزل،غزل سرالا،چڑھا،کھا،بنا،جلا،دکھا،دباadmin

ماجد صدیقی ۔ غزل نمبر 64

جو مِلے تو والیٔ شہر کو یہی بات ہم بھی بتا سکے

کہ جو گفتنی ہے، زبان پر نہ کوئی بھی شہر میں لا سکے

جو ٹلا عقاب تو برق نے ہیں چڑھائے تیر سرِکماں

ہے کوئی کہ جور سے فاختہ کو جو آسماں کے بچا سکے

ہے یہی تو اُس کا کمالِ فن، کہ ہے راستی میں وُہ پُرفتن

نہ بچا کوئی سرِانجمن، جو فریب اُس کا نہ کھا سکے

سبھی کشتیاں سرِ آب ہیں کہ جو مبتلائے عذاب ہیں

جو بُکا کسی کی سُنے بھی تو کوئی کیا کرشمہ دکھا سکے

جو نہیں ہے ابرِ کرم کہیں تو فلک سے بھیج وُہ آگ ہی

کہ جو کشتِ جاں میں بسی ہوئی نمِ آرزو ہی جلا سکے

ہوئے شل جو وار سے غیر کے اُنہی بازوؤں کی کمان پر

یہ ہمِیں تھے تیرِ سخن تلک کسی طَور جو نہ چڑھا سکے

سبھی مصلحت کے اسیر تھے کوئی تھا نہ ہم ساخسارہ جُو

ہمِیں ایکِماجدؔ سادہ دل‘ نہ ابال دل کا دبا سکے

ماجد صدیقی

ہم میں ہے جو اِس قدر بھی سادگی اچّھی نہیں

مارچ 31, 2017ماجد صدیقی،غزل،غزل سراڈری،بھربھری،بری،تہی،دلی،سادگیadmin

ماجد صدیقی ۔ غزل نمبر 65

جنگلوں میں میش کی سی بے بسی اچّھی نہیں

ہم میں ہے جو اِس قدر بھی سادگی اچّھی نہیں

دل میں تُو اہلِ ریا کے بیج چاہت کے نہ بو

اِس غرض کو یہ زمیں ہے بُھربھُری،اچّھی نہیں

ہر سفر ہے آن کا بَیری اور اُس کے سامنے

اور جو کچھ ہو سو ہو پہلو تہی اچّھی نہیں

ظرفِ انساں ہی کے سارے رنگ ہیں بخشے ہوئے

چیز اپنی ذات میں کوئی بُری، اچّھی نہیں

ہو کے رہ جاتی ہے اکثر یہ عذابِ جان بھی

ہوں جہاں اندھے سبھی، دیدہ وری اچّھی نہیں

کچھ دنوں سے تجھ کو لاحق ہے جو ماجدؔ دمبدم

جان لے مشکل میں ایسی بے دلی اچّھی نہیں

ماجد صدیقی

جو گئے ہیں وُہ نہیں لوٹ کے آنے والے

مارچ 31, 2017ماجد صدیقی،غزل،غزل سراآنے،بچھانے،بجھانے،جلانے،دکھانےadmin

ماجد صدیقی ۔ غزل نمبر 66

جھڑکے شاخوں سے تہِ خاک سمانے والے

جو گئے ہیں وُہ نہیں لوٹ کے آنے والے

بارشِ سنگ سے دوچار تھا انساں کل بھی

کم نہیں آج بھی زندوں کو جلانے والے

آئے مشکیزۂ خالی سے ہوا دینے کو

تھے بظاہر جو لگی آگ بُجھانے والے

ضُعف کس کس نے نہیں خُلق ہمارا سمجھا

ہم کہ آنکھیں تھے بہ ہر راہ بچھانے والے

صدق جذبوں میں بھی پہلا سا نہیں ہے ماجدؔ

اب نہیں خضر بھی وُہ، راہ دکھانے والے

ماجد صدیقی

رنج سا اِک نظر میں اُبھرنے لگا

مارچ 31, 2017ماجد صدیقی،غزل،غزل سرامکرنے،ابھرنے،اترنے،بھرنے،سدھرنےadmin

ماجد صدیقی ۔ غزل نمبر 67

جب بھی موسم ذرا سا نکھرنے لگا

رنج سا اِک نظر میں اُبھرنے لگا

آنکھ میں پھر کسی یاد کا عکس ہے

چاند ہے جھیل میں پھر اُترنے لگا

ہم اُسے کس طرح معتبر جان لیں

بات تک سے جو اپنی مُکرنے لگا

وحشتوں کی سکڑتی حدیں دیکھ کر

شیر پنجرے میں از خود سدھرنے لگا

آئنے پر جو دل کے لگے بال سا

زخم ماجدؔ کہاں ہے وُہ بھرنے لگا

ماجد صدیقی

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: