ٹیگ کے محفوظات: یارانہ

بڑا مہنگا پڑا یارانۂ دل

جولائی 24, 2018موجِ خیال،باصر کاظمی،غزلمیخانہ،ویرانہ،یارانہ،کاشانہ،پیمانہ،افسانہ،دیوانہadmin

خوب تھا رہتے جو بیگانۂ دل

بڑا مہنگا پڑا یارانۂ دل

ایک وہ جس کا ہے دل دیوانہ

ایک میں ہوں کہ ہوں دیوانۂ دل

خاک تو پہلے بھی اُڑتی تھی مگر

تجھ سے آباد تھا ویرانۂ دل

آج وہ گھر ہے کھنڈر سا ویراں

جس پہ تحریر تھا کاشانۂ دل

اک ذرا لہر اٹھی اور چھلکا

کیا بھرا رہتا تھا پیمانۂ دل

ابھی باقی ہے طلب آنکھوں میں

ہے ادھورا ابھی افسانۂ دل

جس قدر پی سکو پی لو باصرِؔ

بند ہونے کو ہے میخانۂ دل

باصر کاظمی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

صحّت کا ایک پہلو مریضانہ چاہیے

مارچ 5, 2012فردا،مجید امجد،غزلمریضانہ،مستانہ،نذرانہ،یارانہ،جانا،جداگانہ،رفیقانہadmin

مجید امجد ۔ غزل نمبر 188

ہر وقت فکرِ مرگِ غریبانہ چاہیے

صحّت کا ایک پہلو مریضانہ چاہیے

دنیائے بے طریق میں جس سمت بھی چلو

رستے میں اک سلامِ رفیقانہ چاہیے

آنکھوں میں امڈے روح کی نزدیکیوں کے ساتھ

ایسا بھی ایک دور کا یارانہ چاہیے

کیا پستیوں کی ذلتیں، کیا عظمتوں کے فوز

اپنے لیے عذاب جداگانہ چاہیے

اب دردِ شش بھی سانس کی کوشش میں ہے شریک

اب کیا ہو، اب تو نیند کو آ جانا چاہیے

روشن ترائیوں سے اترتی ہوا میں آج

دو چار گام لغزشِ مستانہ چاہیے

امجد ان اشکبار زمانوں کے واسطے

اک ساعتِ بہار کا نذرانہ چاہیے

مجید امجد

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

یہ دیئے بے فائدہ یہ آئینہ خانہ غلط

دسمبر 1, 2007منصور آفاق،شعراء،غزلمرجھانا،یارانہ،کاشانہ،ٹکرانا،پہچانا،پیمانہ،پگھلانا،افسانہ،آنا،بہلانا،تڑپانا،جانا،جرمانہ،خانہ،سلجھانا،سمجھانا،سنولاناadmin

منصور آفاق ۔ غزل نمبر 200

آنسوئوں کے عکس دیواروں پہ بکھرانا غلط

یہ دیئے بے فائدہ یہ آئینہ خانہ غلط

وہ پرندوں کے پروں سے نرم، بادل سے لطیف

یہ چراغِ طور کے جلووں سے سنولانا غلط

جاگ پڑتے ہیں دریچے اور بھی کچھ چاپ سے

اس گلی میں رات کے پچھلے پہر جانا غلط

درد کے آتش فشاں تھم، کانپتی ہیں دھڑکنیں

یہ مسلسل دل کے کہساروں کا پگھلانا غلط

کون واشنگٹن کو دے گا ایک شاعر کا پیام

قیدیوں کو بے وجہ پنجروں میں تڑپانا غلط

ان دنوں غم ہائے جاناں سے مجھے فرصت نہیں

اے غمِ دوراں ترا فی الحال افسانہ غلط

ایک دل اور ہر قدم پر لاکھ پیمانِ وفا

اپنے ماتھے کو ہر اک پتھر سے ٹکرانا غلط

ایک تجریدی تصور ہے یہ ساری کائنات

ایسے الجھے مسئلے بے کار۔ سلجھانا غلط

وقت کا صدیوں پرانا فلسفہ بالکل درست

یہ لب و عارض غلط، یہ جام و پیمانہ غلط

کیا بگڑتا اوڑھ لیتا جو کسی تتلی کی شال

شاخ پر کھلنے سے پہلے پھول مرجھانا غلط

کچھ بھروسہ ہی نہیں کالے سمندر پر مجھے

چاند کا بہتی ہوئی کشتی میں کاشانہ غلط

زندگی کیا ہے۔ ٹریفک کا مسلسل اژدہام

اس سڑک پر سست رفتاری کا جرمانہ غلط

جس کے ہونے اور نہ ہونے کی کہانی ایک ہے

اُس طلسماتی فضا سے دل کو بہلانا غلط

منہ اندھیرے چن کے باغیچے سے کچھ نرگس کے پھول

یار بے پروا کے دروازے پہ دھر آنا غلط

پھر کسی بے فیض سے کر لی توقع فیض کی

پھر کسی کو ایسا لگتا ہے کہ پہچانا غلط

زندگی جس کے لیے میں نے لگا دی داؤ پر

وہ تعلق واہمہ تھا، وہ تھا یارانہ غلط

میں انا الحق کہہ رہا ہوں اور خود منصور ہوں

مجھ سے اہل معرفت کو بات سمجھانا غلط

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔