ٹیگ کے محفوظات: ہلا

تو ایک بار تو مل، سب گلے مٹا دُوں گا

اگست 4, 2018ناصر کاظمی،دیوانِ ناصر،غزلہلا،مٹا،کیا،بچھا،بھلا،جگا،دعا،سزا،صداadmin

جو گفتنی نہیں وہ بات بھی سنا دُوں گا

تو ایک بار تو مل، سب گلے مٹا دُوں گا

مجال ہے کوئی مجھ سے تجھے جدا کر دے

جہاں بھی جائے گا تو میں تجھے صدا دُوں گا

تری گلی میں بہت دیر سے کھڑا ہوں مگر

کسی نے پوچھ لیا تو جواب کیا دُوں گا

مری خموش نگاہوں کو چشمِ کم سے نہ دیکھ

میں رو پڑا تو دلوں کے طبق ہلا دُوں گا

یونہی اداس رہا میں تو دیکھنا اِک دِن

تمام شہر میں تنہائیاں بچھا دُوں گا

بہ پاسِ صحبتِ دیرینہ کوئی بات ہی کر

نظر ملا تو سہی میں تجھے دُعا دُوں گا

بلاؤں گا نہ ملوں گا نہ خط لکھوں گا تجھے

تری خوشی کے لیے خود کو یہ سزا دُوں گا

وہ درد ہی نہ رہا ورنہ اے متاعِ حیات

مجھے گماں بھی نہ تھا میں تجھے بھلا دُوں گا

ابھی تو رات ہے کچھ دیر سو ہی لے ناصر

کوئی بلائے گا تو میں تجھے جگا دُوں گا

ناصر کاظمی

دل کی آواز سنا دی ہم نے

اگست 4, 2018ناصر کاظمی،دیوانِ ناصر،غزلہلا،ہوا،لگا،چھپا،پلا،بجھا،جگا،سناadmin

سرِ مقتل بھی صدا دی ہم نے

دل کی آواز سنا دی ہم نے

پہلے اِک روزنِ در توڑا تھا

اب کے بنیاد ہلا دی ہم نے

پھر سرِ صبح وہ قصہ چھیڑا

دِن کی قندیل بجھا دی ہم نے

آتشِ غم کے شرارے چن کر

آگ زِنداں میں لگا دی ہم نے

رہ گئے دستِ صبا کملا کر

پھول کو آگ پلا دی ہم نے

آتشِ گل ہو کہ ہو شعلہِ ساز

جلنے والوں کو ہوا دی ہم نے

کتنے اَدوار کی گم گشتہ نوا

سینہِ نے میں چھپا دی ہم نے

دمِ مہتاب فشاں سے ناصر

آج تو رات جگا دی ہم نے

ناصر کاظمی

دھیان کی شمع جلا کر دیکھو

اگست 4, 2018ناصر کاظمی،برگِ نے،غزلہلا،گرا،ا،اٹھا،جلا،جاadmin

حسن کو دل میں چھپا کر دیکھو

دھیان کی شمع جلا کر دیکھو

کیا خبر کوئی دفینہ مل جائے

کوئی دیوار گرا کر دیکھو

فاختہ چپ ہے بڑی دیر سے کیوں

سرو کی شاخ ہلا کر دیکھو

کیوں چمن چھوڑ دیا خوشبو نے

پھول کے پاس تو جا کر دیکھو

نہر کیوں سو گئی چلتے چلتے

کوئی پتھر ہی گرا کر دیکھو

دل میں بیتاب ہیں کیا کیا منظر

کبھی اِس شہر میں آ کر دیکھو

ان اندھیروں میں کرن ہے کوئی

شب زدو آنکھ اُٹھا کر دیکھو

ناصر کاظمی

کیوں ہے یہ شور بپا غور سے سن

اگست 4, 2018ناصر کاظمی،برگِ نے،غزلہلا،لگا،نما،نوا،ندا،وفا،کیا،پا،ا،اٹھا،بلا،بپا،جدا،خدا،درا،دعا،ذرا،سرا،صفا،صبا،صداadmin

سازِ ہستی کی صدا غور سے سن

کیوں ہے یہ شور بپا غور سے سن

دن کے ہنگاموں کو بیکار نہ جان

شب کے پردوں میں ہے کیا غور سے سن

چڑھتے سورج کی ادا کو پہچان

ڈوبتے دن کی ندا غور سے سن

کیوں ٹھہر جاتے ہیں دریا سرِ شام

روح کے تار ہلا غور سے سن

یاس کی چھاؤں میں سونے والے

جاگ اور شورِ درا غور سے سن

ہر نفس دامِ گرفتاری ہے

نو گرفتارِ بلا غور سے سن

دل تڑپ اُٹھتا ہے کیوں آخرِ شب

دو گھڑی کان لگا غور سے سن

اِسی منزل میں ہیں سب ہجر و وصال

رہروِ آبلہ پا غور سے سن!

اِسی گوشے میں ہیں سب دیر و حرم

دل صنم ہے کہ خدا غور سے سن

کعبہ سنسان ہے کیوں اے واعظ

ہاتھ کانوں سے اُٹھا غور سے سن

موت اور زیست کے اَسرار و رموز

آ مری بزم میں آ غور سے سن

کیا گزرتی ہے کسی کے دل پر

تو بھی اے جانِ وفا غور سے سن

کبھی فرصت ہو تو اے صبحِ جمال

شب گزیدوں کی دعا غور سے سن

ہے یہی ساعتِ ایجاب و قبول

صبح کی لے کو ذرا غور سے سن

کچھ تو کہتی ہیں چٹک کر کلیاں

کیا سناتی ہے صبا غور سے سن

برگِ آوارہ بھی اک مطرِب ہے

طائرِ نغمہ سرا غور سے سن

رنگ منّت کشِ آواز نہیں

گُل بھی ہے ایک نوا غور سے سُن

خامشی حاصلِ موسیقی ہے

نغمہ ہے نغمہ نما غور سے سن

آئنہ دیکھ کے حیران نہ ہو

نغمۂ آبِ صفا غور سے سن

عشق کو حسن سے خالی نہ سمجھ

نالۂ اہلِ وفا غور سے سن

دل سے ہر وقت کوئی کہتا ہے

میں نہیں تجھ سے جدا غور سے سن

ہر قدم راہِ طلب میں ناصر

جرسِ دل کی صدا غور سے سن

ناصر کاظمی

نظر میں کیا یہ الاؤ جلا دئیے تُو نے

دسمبر 31, 2016ماجد صدیقی،تمازتیں،غزلہلا،منا،کھلا،اٹھا،بھلا،جلا،سکھاadmin

ماجد صدیقی ۔ غزل نمبر 29

جو سو چکے تھے وُہ جذبے جگا دئیے تُو نے

نظر میں کیا یہ الاؤ جلا دئیے تُو نے

شگفتِ تن سے، طلوعِ نگاہِ روشن سے

تمام رنگ رُتوں کے بھلا دئیے تُو نے

تھا پور پور میں دیپک چھُپا کہ لمس ترا

چراغ سے رگ و پے میں جلا دئیے تُو نے

لباسِ ابر بھی اُترا مِہ بدن سے ترے

حجاب جو بھی تھے حائل اُٹھا دئیے تُو نے

ذرا سے ایک اشارے سے یخ بدن کو مرے

روانیوں کے چلن سب سِکھا دئیے تُو نے

کسی بھی پل پہ گماں اب فراق کا نہ رہا

خیال و خواب میں وہ گُل کھلا دئیے تُو نے

جنم جنم کے تھے سُرتال جن میں خوابیدہ

کُچھ ایسے تار بھی اب کے ہلا دئیے تُو نے

سخن میں لُطفِ حقائق سمو کے اے ماجدؔ

یہ کس طرح کے تہلکے مچا دئیے تُو نے

ماجد صدیقی

یہ مشعلیں بھی جلا کے دیکھو

دسمبر 31, 2016ماجد صدیقی،تمازتیں،غزلہلا،فضا،آزما،اٹھا،بڑھا،بجا،جلا،جگا،سجاadmin

ماجد صدیقی ۔ غزل نمبر 41

آنکھوں میں مری سما کے دیکھو

یہ مشعلیں بھی جلا کے دیکھو

ہے جسم سے جسم کا سخن کیا

یہ بزم کبھی سجا کے دیکھو

پیراک ہوں بحرِ لطفِ جاں کا

ہاں ہاں مجھے آزما کے دیکھو

اُترو بھی لہُو کی دھڑکنوں میں

کیا رنگ ہیں اِس فضا کے دیکھو

مخفی ہے جو خوں کی حِدتّوں میں

وہ حشر کبھی اٹُھا کے دیکھو

بے رنگ ہیں فرطِ خواب سے جو

لمحے وہ کبھی جگا کے دیکھو

بہلاؤ نہ محض گفتگو سے

یہ ربط ذرا بڑھا کے دیکھو

ملہار کے سُر ہیں جس میں پنہاں

وُہ سازِ طرب بجا کے دیکھو

طُرفہ ہے بہت نگاہِ ماجدؔ

یہ شاخ کبھی ہلا کے دیکھو

ماجد صدیقی

اَب اپنے آپ کو یوں عُمر بھر سزا دوں گا

اکتوبر 31, 2016ماجد صدیقی،آغاز،غزلہلا،نیا،کیا،بہا،سنا،سا،سزاadmin

ماجد صدیقی ۔ غزل نمبر 4

یہ ٹھان لی ہے کہ دل سے تجھے بھُلا دوں گا

اَب اپنے آپ کو یوں عُمر بھر سزا دوں گا

ہُوا یہ سایۂ ابلق بھی اَب جو نذرِ خزاں

تو راہ چلتے مسافر کو اور کیا دوں گا

سموم عام کروں گا اِسی کے ذرّوں سے

فضائے دہر کو اَب پیرہن نیا دوں گا

وہ کیا ادا ہے مجھے جس کی بھینٹ چڑھنا ہے

یہ فیصلہ بھی کسی روز اَب سُنا دوں گا

سزا سُناؤ تو اِس جُرم زیست کی مُجھ کو

صلیبِ درد کی بُنیاد تک ہلا دوں گا

ہر ایک شخص کا حق کچھ نہ کچھ ہے مجھ پہ ضرور

میں اپنے قتل کا کس کس کو خوں بہا دوں گا

جو سانس ہے تو یہی آس ہے کہ اب ماجدؔ

شبِ سیاہ کو بھی رُوپ چاند سا دوں گا

ماجد صدیقی

تو نے جسے ستایا تو نے جسے دغا دی

اکتوبر 25, 2015قمر جلالوی،شعراء،غزلہلا،لگا،جگمگا،دغا،زاadmin

قمر جلالوی ۔ غزل نمبر 91

میں کون ہوں بتا دوں او بھولنے کی عادی

تو نے جسے ستایا تو نے جسے دغا دی

مجھ تشنہ لب کی ساقی تشنہ لبی بڑھا دی

دے کر ذرا سا پانی اک آگ سی لگا دی

ایسی بھی کیا جفائیں برہم ہو نظمِ الفت

تو نے تو فقرِ دل کی بنیاد ہی ہلا دی

جب چاہا رخ پہ چن لی اس سے مہ جبیں نے افشاں

جب چاہا دن میں دنیا تاروں سے جگمگا دی

اہلِ چمن نے اتنا پوچھا نہ بوئے گل سے

آوارہ پھر رہی ہے کیوں اے حسین زادی

قمر جلالوی

اغلال و سلاسل ٹک اپنی بھی ہلا جاوے

اکتوبر 6, 2015میر تقی میر،اساتذہ،غزلہلا،لگا،مٹا،نہا،چلا،چھپا،چبا،کہا،گھرا،پا،اٹھا،بتا،دلا،رہا،سہاadmin

دیوان پنجم غزل 1781

یارب کوئی دیوانہ بے ڈھنگ سا آجاوے

اغلال و سلاسل ٹک اپنی بھی ہلا جاوے

خاموش رہیں کب تک زندان جہاں میں ہم

ہنگامہ قیامت کا شورش سے اٹھا جاوے

کب عشق کی وادی ہے سر کھینچنے کی جاگہ

ہو سیل بھلا سا تو منھ موڑ چلا جاوے

عاشق میں ہے اور اس میں نسبت سگ و آہو کی

جوں جوں ہو رمیدہ وہ توں توں یہ لگا جاوے

افسوس کی جاگہ ہے یاں باز پسیں دم میں

ہو روبرو آئینہ وہ منھ کو چھپا جاوے

ان نو خطوں سے میری قسمت میں تو تھی خواری

کس طرح لکھا میرا کوئی آ کے مٹا جاوے

دیکھ اس کو ٹھہر رہنا ثابت قدموں سے ہو

اس راہ سے آوے تو ہم سے نہ رہا جاوے

کہیے جہاں کرتا ہو تاثیر سخن کچھ بھی

وہ بات نہیں سنتا کیا اس سے کہا جاوے

یہ رنگ رہے دیکھیں تاچند کہ وہ گھر سے

کھاتا ہوا پان آکر باتوں کو چبا جاوے

ہم دیر کے جنگل میں بھولے پھرے ہیں کب کے

کعبے کا ہمیں رستہ خضر آ کے بتا جاوے

ہاتھوں گئی خوباں کے کچھ شے نہیں پھر ملتی

کیونکر کوئی اب ان سے دل میرا دلا جاوے

یہ ذہن و ذکا اس کا تائید ادھر کی ہے

ٹک ہونٹ ہلے تو وہ تہ بات کی پا جاوے

یوں خط کی سیاہی ہے گرد اس رخ روشن کے

ہر چار طرف گاہے جوں بدر گھرا جاوے

کیا اس کی گلی میں ہے عاشق کسو کی رویت

آلودئہ خاک آوے لوہو میں نہا جاوے

ہے حوصلہ تیرا ہی جو تنگ نہیں آتا

کس سے یہ ستم ورنہ اے میر سہا جاوے

میر تقی میر

ضعف اتنا تھا کہے بات ڈھلا جاتا تھا

اکتوبر 6, 2015میر تقی میر،اساتذہ،غزلہلا،ملا،چلا،ڈھلا،جلاadmin

دیوان چہارم غزل 1327

دل سنبھالے کہیں میں کل جو چلا جاتا تھا

ضعف اتنا تھا کہے بات ڈھلا جاتا تھا

بے دماغی کا سماں دیکھنے کی کس کو تاب

آنکھیں ملتا تھا جو وہ جی ہی ملا جاتا تھا

سوزش دل کے سبب مرگ نہ تھی عاشق کی

اپنی غیرت میں وہ کچھ آپھی جلا جاتا تھا

ہلہلاوے ہے حقیری سے مجھے اب وہ بھی

جس شکستے سے نہ جاگہ سے ہلا جاتا تھا

میر کو واقعہ کیا جانیے کیا تھا درپیش

کہ طرف دشت کے جوں سیل چلا جاتا تھا

میر تقی میر

پر بعد نماز اٹھ کر میخانہ چلا جاتا

اکتوبر 6, 2015میر تقی میر،اساتذہ،غزلہلا،لکھا،چلا،کیا،کھا،ا،بکا،جلاadmin

دیوان چہارم غزل 1319

مستانہ اگرچہ میں طاعت کو لگا جاتا

پر بعد نماز اٹھ کر میخانہ چلا جاتا

بازار میں ہو جانا اس مہ کا تماشا تھا

یوسفؑ بھی جو واں ہوتا تو اس پہ بکا جاتا

دیکھا نہ ادھر ورنہ آتا نہ نظر پھر میں

جی مفت مرا جاتا اس شوخ کا کیا جاتا

شب آہ شرر افشاں ہونٹوں سے پھری میرے

سر کھینچتا یہ شعلہ تو مجھ کو جلا جاتا

کیا شوق کی باتوں کی تحریر ہوئی مشکل

تھے جمع قلم کاغذ پر کچھ نہ لکھا جاتا

آنکھیں مری کھلتیں تو اس چہرے ہی پر پڑتیں

کیا ہوتا یکایک وہ سر پر مرے آجاتا

سبزے کا ہوا روکش خط رخ جاناں کے

جو ہاتھ مرے چڑھتا تو پان کو کھا جاتا

ہے شوق سیہ رو سے بدنامی و رسوائی

کیوں کام بگڑ جاتا جو صبر کیا جاتا

تھا میر بھی دیوانہ پر ساتھ ظرافت کے

ہم سلسلہ داروں کی زنجیر ہلا جاتا

میر تقی میر

دل ساری رات جیسے کوئی ملا کیا ہے

اکتوبر 6, 2015میر تقی میر،اساتذہ،غزلہلا،ملا،چلا،پلا،پھلا،بھلا،جلا،رلا،علیadmin

دیوان دوم غزل 1030

کس غم میں مجھ کو یارب یہ مبتلا کیا ہے

دل ساری رات جیسے کوئی ملا کیا ہے

ان چار دن سے ہوں میں افسردہ کچھ وگرنہ

پھوڑا سا دل بغل میں برسوں جلا کیا ہے

اس گل کی اور اپنا تب منھ کیا ہے میں نے

جب آشنا لبوں سے صلِّ علیٰ کیا ہے

دل داغ کب نہ دیکھا جی بار کب نہ پایا

کیا کیا نہال خواہش پھولا پھلا کیا ہے

تڑپا ہے ایسا ایسا جو غش رہا ہے مجھ کو

دل اک بغل میں جی کا دشمن پلا کیا ہے

کیا خاک میں ہمیں کو ان نے نیا ملایا

ٹیڑھی ہی چال گردوں اکثر چلا کیا ہے

چلتا نہیں ہے دل پر کچھ اس کے بس وگرنہ

عرش آہ عاجزاں سے اکثر ہلا کیا ہے

ہم گو نہ ہوں جہاں میں آخر جہاں تو ہو گا

تونے بدی تو کی ہے ظالم بھلا کیا ہے

ہے منھ پہ میر کے کیا گرد ملال تازہ

یہ خاک میں ہمیشہ یوں ہی رلا کیا ہے

میر تقی میر

اپنی زنجیر ہلا دیتے ہیں

جنوری 8, 1972باقی صدیقی،شعراء،غزلہلا،کیا،گرا،پا،اٹّھا،بڑھا،سناadmin

باقی صدیقی ۔ غزل نمبر 129

یوں بھی ہونے کا پتا دیتے ہیں

اپنی زنجیر ہلا دیتے ہیں

پہلے ہر بات پہ ہم سوچتے تھے

اب فقط ہاتھ اٹّھا دیتے ہیں

قافلہ آج کہاں ٹھہرے گا

کیا خبر آبلہ پا دیتے ہیں

بعض اوقات ہوا کے جھونکے

لو چراغوں کی بڑھا دیتے ہیں

دل میں جب بات نہیں رہ سکتی

کسی پتھر کو سنا دیتے ہیں

ایک دیوار اٹھانے کے لئے

ایک دیوار گرا دیتے ہیں

سوچتے ہیں سر ساحل باقیؔ

یہ سمندر ہمیں کیا دیتے ہیں

باقی صدیقی

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: ہلا

تو ایک بار تو مل، سب گلے مٹا دُوں گا

دل کی آواز سنا دی ہم نے

دھیان کی شمع جلا کر دیکھو

کیوں ہے یہ شور بپا غور سے سن

نظر میں کیا یہ الاؤ جلا دئیے تُو نے

یہ مشعلیں بھی جلا کے دیکھو

اَب اپنے آپ کو یوں عُمر بھر سزا دوں گا

تو نے جسے ستایا تو نے جسے دغا دی

اغلال و سلاسل ٹک اپنی بھی ہلا جاوے

ضعف اتنا تھا کہے بات ڈھلا جاتا تھا

پر بعد نماز اٹھ کر میخانہ چلا جاتا

دل ساری رات جیسے کوئی ملا کیا ہے

اپنی زنجیر ہلا دیتے ہیں

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: