جون ایلیا ۔ غزل نمبر 111

ایذا دہی کی داد جو پاتا رہا ہوں میں

ہر ناز آفریں کو ستاتا رہا ہوں میں

اے خوش خرام پاؤں کے چھالے تو گن ذرا

تجھ کو کہاں کہاں نہ پھراتا رہا ہوں میں

تجھ کو خبر نہیں کہ ترا حال دیکھ کر

اکثر ترا مذاق اڑاتا رہا ہوں میں

جس دن سے اعتماد میں آیا ترا شباب

اس دن سے تجھ پہ ظلم ہی ڈھاتا رہا ہوں میں

بیدار کر کے تیرے بدن کی خود آ گہی

تیرے بدن کی عمر گھٹاتا رہا ہوں میں

اک سطر بھی کبھی نہ لکھی میں نے تیرے نام

پاگل تجھی کو یاد بھی آتا رہا ہوں میں

شاید مجھے کسی سے محبت نہیں ہوئی

لیکن یقین سب کو دلاتا رہا ہوں میں

اک حسنِ بے مثال کی تمثیل کے لئے

پرچھائیوں پہ رنگ گراتا رہا ہوں میں

اپنا مثالیہ مجھے اب تک نہ مل سکا

ذروں کو آفتاب بتاتا رہا ہوں میں

کیا مل گیا ضمیرِ ہنر بیچ کر مجھے

اتنا کہ صرف کام چلاتا رہا ہوں میں

کل دوپہر عجیب سی اک بے دلی رہی

بس تیلیاں جلا کے بجھاتا رہا ہوں میں

جون ایلیا