ٹیگ کے محفوظات: گاؤں

بے دم ہے پیڑ پیڑ چمن کا چِتاؤں میں

اکتوبر 1, 2017ماجِد نشان، ماجد صدیقی، غزلہواؤں، چھاؤں، چتاؤں، گپھاؤں، گاؤں، صداؤںadmin

ماجد صدیقی ۔ غزل نمبر 9

گھرنے لگے ہم آپ یہ کیسی خزاؤں میں

بے دم ہے پیڑ پیڑ چمن کا چِتاؤں میں

کچھ دودو گردوشور ہی نقصاں رساں نہیں

خبروں کا زہر بھی تو ملا ہے ہواؤں میں

دھن دھونس دھاندلی کے مسلسل داباؤ سے

لرزہ سنائی دینے لگا ہے صداؤں میں

گوشہ کوئی کہ جس میں درندوں سے ہو اماں

ہر شخص چل پڑا ہے پلٹ کر گُپھاؤں میں

اللہ اس کو اور نمو اور تاب دے

یاور وہ پیڑ ہم ہیں مگن جس کی چھاؤں میں

پینچوں کے بل پہ شہ تو ہوا اور مقتدر

ماجِد غلامیوں کے چلن پھر ہیں گاؤں میں

ماجد صدیقی

سپنے سکُھ کی چھاؤں کے

فروری 28, 2017ماجد صدیقی، سخناب، غزلماؤں، چھاؤں، گاؤں، پاؤں، اناؤں، جفاؤں، داؤںadmin

ماجد صدیقی ۔ غزل نمبر 22

نقش بنے صحراؤں کے

سپنے سکُھ کی چھاؤں کے

دیدۂ تر کو مات کریں

دشت میں چھالے پاؤں کے

دیکھیں کیا دکھلاتے ہیں

پتّے آخری داؤں کے

پیڑ اکھڑتے دیکھے ہیں

کِن کِن شوخ اناؤں کے

ابریشم سے جسموں پر

برسیں سنگ جفاؤں کے

خرکاروں کے ہاتھ لگیں

لعل بلکتی ماؤں کے

ماجدؔ دیہہ میں شہری ہم

شہر میں باسی گاؤں کے

ماجد صدیقی

دھوپ جیسے کبھی چھاؤں سے ملے

فروری 27, 2017ماجد صدیقی، سخناب، غزلہواؤں، چھاؤں، ناؤں، گاؤں، داؤںadmin

ماجد صدیقی ۔ غزل نمبر 61

شاہ اِس طرح گداؤں سے ملے

دھوپ جیسے کبھی چھاؤں سے ملے

سیدھے ہاتھوں نہ ملے کُچھ بھی یہاں

جو ملے اوج وہ داؤں سے ملے

آنچ سب میں تھی لہو جلنے کی

جتنے پیغام ہواؤں سے ملے

پُوچھتا کون ہے شہروں میں اُنہیں

ولولے جو ہمیں گاؤں سے ملے

کیا کریں ہم اِسے روشن ماجدؔ!

فیض اب کون سا ناؤں سے ملے

ماجد صدیقی

جیسے افواہ کوئی گاؤں میں

فروری 27, 2017ماجد صدیقی، سخناب، غزلہواؤں، چھاؤں، ناخداؤں، گاؤں، پاؤں، خلاؤں، داؤںadmin

ماجد صدیقی ۔ غزل نمبر 76

زہر پھیلا ہے وُہ فضاؤں میں

جیسے افواہ کوئی گاؤں میں

چھین لی تھی کمان تک جس سے

آ گئے پھر اُسی کے داؤں میں

پھر جلی ہے کوئی چِتا جیسے

بُو ہے بارود کی ہواؤں میں

کشتیٔ آرزو گھری دیکھی

جانے کتنے ہی ناخداؤں میں

نت گھمائے جو دائروں میں ہمیں

کیسی زنجیر ہے یہ پاؤں میں

آگ برسی اُسی پرندے پر

دم بھی جس نے لیا نہ چھاؤں میں

اَب تو ماجدؔ سکونِ دل کے لئے

چل کے رہیے کہیں خلاؤں میں

ماجد صدیقی

بول ہوں جیسے ہونٹوں پر بیواؤں کے

فروری 27, 2017ماجد صدیقی، سخناب، غزلہواؤں، ناؤں، گاؤں، بیواؤں، خداؤں، داؤں، صداؤںadmin

ماجد صدیقی ۔ غزل نمبر 92

دل سے یُوں اٹُھتے ہیں حرف دعاؤں کے

بول ہوں جیسے ہونٹوں پر بیواؤں کے

بُعد نجانے تا بہ نشیمن کتنا ہے

تیور ہیں کچھ اور ہی تُند ہواؤں کے

اب کے آس کا عالم ہی کچھ ایسا ہے

ہاتھ میں سکے جیسے آخری داؤں کے

پل پل چھینیں چہروں سے نم راحت کی

حلق میں اٹکے کنکر خشک صداؤں کے

پیشانی میں عجز کی میخیں اُتری ہیں

اور زباں کی نوک پہ وِرد خداؤں کے

رفتہ رفتہ پیار کا ابجد بھول گئے

شہر میں جو جو لوگ بھی آئے گاؤں کے

ماجدؔ نقش برآب سمجھتے تھے جس کو

نقش کھُدے ہیں دل پر اُس کے ناؤں کے

ماجد صدیقی

رُوٹھا یار مناؤں

فروری 27, 2017ماجد صدیقی، سخناب، غزللہراؤں، لوٹاؤں، مناؤں، چھاؤں، گاؤں، سہلاؤںadmin

ماجد صدیقی ۔ غزل نمبر 108

جان لبوں تک لاؤں

رُوٹھا یار مناؤں

مَیں انگناں میں شب کے

گیت سحر کے گاؤں

تپتے صحراؤں پر

ابر بنوں اور چھاؤں

اُجڑے پیڑ ہیں جتنے

برگ اُنہیں لوٹاؤں

خواہش کے ساحل پر

موجوں سا لہراؤں

دُکھتے جسم کو ماجدؔ

کب تک میں سہلاؤں

ماجد صدیقی

آنچ سی اِک مسلسل ہواؤں میں ہے

فروری 27, 2017ماجد صدیقی، سخناب، غزلہواؤں، فاختاؤں، چھاؤں، گاؤں، اناؤںadmin

ماجد صدیقی ۔ غزل نمبر 121

جان جیسے گھری پھر چتاؤں میں ہے

آنچ سی اِک مسلسل ہواؤں میں ہے

پھر سے غارت ہُوا ہے سکوں دشت کا

کھلبلی پھر نئی فاختاؤں میں ہے

آگ سی کیا یہ رگ رگ میں اُتری لگے

دھوپ کا سا گماں کیوں یہ چھاؤں میں ہے

میرے جینے کے اسباب سب شہر میں

میری تسکیں کا سامان گاؤں میں ہے

آج تک ہم نے بنتی تو دیکھی نہیں

بات ماجدؔ چھپی جو اناؤں میں ہے

ماجد صدیقی

یہ رنگ بھی آ، تجھے دکھاؤں

دسمبر 31, 2016ماجد صدیقی، تمازتیں، غزلمناؤں، گنگناؤں، گاؤں، اُٹھاؤں، بتاؤں، دکھاؤں، سجاؤںadmin

ماجد صدیقی ۔ غزل نمبر 32

تن میں ترے مشعلیں جلاؤں

یہ رنگ بھی آ، تجھے دکھاؤں

چاہت کا وہِسحر تُجھ پہ پھونکوں

رگ رگ میں قیامتیں مچاؤں

تکمیل کروں کبھی تو اپنی

تجھ کو سرِ جسم و جاں سجاؤں

مخفی پسِ لب کلی کلی کے

جو راز ہے، وُہ تجھے بتاؤں

مَیں خود ہی جواب جن کا ٹھہروں

ایسے بھی سوال کُچھ اُٹھاؤں

غنچوں کی چٹک ہو جس پہ شیدا

وُہ زمزمہ اَب کے گنگناؤں

ہر لُطف ہے اِس میں ہر مزہ ہے

ماجدؔ کی غزل ہے کیوں نہ گاؤں

ماجد صدیقی

پھر گیا رُخ کدھر ہواؤں کا

اکتوبر 31, 2016ماجد صدیقی، آغاز، غزلہواؤں، چھاؤں، گاؤں، پاؤں، دعاؤںadmin

ماجد صدیقی ۔ غزل نمبر 54

حُسن اور مقتضی جفاؤں کا

پھر گیا رُخ کدھر ہواؤں کا

وحشتِ غم ہے دل میں یوں جیسے

کوئی میلہ لگا ہو گاؤں کا

سایۂ ابر بھی چمن سے گیا

خوب دیکھا اثر دعاؤں کا

جو گریباں کبھی تھا زیبِ گلو

اَب وہ زیور بنا ہے پاؤں کا

اُن سے نسبت ہمیں ہے یُوں ماجدؔ

ربط جیسے ہو دھوپ چھاؤں کا

ماجد صدیقی

اب کہ ڈوبا ہوں تو سوکھے ہوئے دریاؤں میں

نومبر 4, 2015احمد فراز، شعراء، غزلمسیحاؤں، کلیساؤں، گاؤں، تمناؤں، دریاؤںadmin

احمد فراز ۔ غزل نمبر 62

میں کہ پر شور سمندر تھے مرے پاؤں میں

اب کہ ڈوبا ہوں تو سوکھے ہوئے دریاؤں میں

نامرادی کا یہ عالم ہے کہ اب یاد نہیں

تو بھی شامل تھا کبھی میری تمناؤں میں

دن کے ڈھلتے ہی اُجڑ جاتی ہیں آنکھیں ایسے

جس طرح شام کو بازار کسی گاؤں میں

چاک دل سی کہ نہ سی زخم کی توہین نہ کر

ایسے قاتل تو نہ تھے میرے مسیحاؤں میں

ذکر اُس غیرتِ مریم کا جب آتا ہے فراز

گھنٹیاں بجتی ہیں لفظوں کے کلیساؤں میں

احمد فراز

ایک پَل کو چھاؤں میں ، اور پھر ہَواؤں میں

اکتوبر 25, 2015پروین شاکر، شعراء، غزلہَواؤں، ماؤں، نارساؤں، چتاؤں، گپھاؤں، گاؤں، آزماؤں، آشناؤں، دعاؤں، رہنماؤں، رداؤں، سراؤںadmin

پروین شاکر ۔ غزل نمبر 60

تتلیوں کی بے چینی آبسی ہے پاؤں میں

ایک پَل کو چھاؤں میں ، اور پھر ہَواؤں میں

جن کے کھیت اور آنگن ایک ساتھ اُجڑتے ہیں

کیسے حوصلے ہوں گے اُن غریب ماؤں میں

صورتِ رفو کرتے ، سر نہ یوں کُھلا رکھتے

جوڑ کب نہیں ہوتے ماؤں کی رداؤں میں

آنسوؤں میں کٹ کٹ کر کتنے خواب گرتے ہیں

اِک جو ان کی میّت ا رہی ہے گاؤں میں

اب تو ٹوٹی کشتی بھی آگ سے بچاتے ہیں

ہاں کبھی تھا نام اپنا بخت آزماؤں میں

ابر کی طرح ہے وہ یوں نہ چُھوسکوں لیکن

ہاتھ جب بھی پھیلائے ا گیا دعاؤں میں

جگنوؤں کی شمعیں بھی راستے میں روشن ہیں

سانپ ہی نہیں ہوتے ذات کی گپھاؤں میں

صرف اِس تکبُّر میں اُس نے مجھ کو جیتا تھا

ذکر ہو نہ اس کا بھی کل کو نارساؤں میں

کوچ کی تمنّا میں پاؤں تھک گئے لیکن

سمت طے نہیں ہوتی پیارے رہنماؤں میں

اپنی غم گُساری کو مشتہر نہیں کرتے

اِتنا ظرف ہوتا ہے درد آشناؤں میں

اب تو ہجر کے دُکھ میں ساری عُمر جلنا ہے

پہلے کیا پناہیں تھیں مہرباں چتاؤں میں

ساز و رخت بھجوا دیں حدِّ شہر سے باہر

پھر سُرنگ ڈالیں گے ہم محل سراؤں میں

پروین شاکر

گھنگھرو سایوں کے بجیں ڈھلتی دھوپ کے پاؤں میں

نومبر 17, 2013آفتاب اقبال شمیملیلاؤں، گاؤں، پاؤں، تنہاؤں، خزاؤں، سراؤںadmin

آفتاب اقبال شمیم ۔ غزل نمبر 69

جاتی رُت کا شور ہے بے آواز صداؤں میں

گھنگھرو سایوں کے بجیں ڈھلتی دھوپ کے پاؤں میں

بدن چرائے دھوپ سے نکلی نہر سے سانولی

چھلکے رنگ غروب کے دن دوپہرے گاؤں میں

عکس ابھرتا آنکھ میں کیسے کل کے خواب کا

نیلا کانچ تھا آسماں پیلی زرد خزاؤں میں

سورج جس کا تاج تھا، دنیا جس کا تخت تھی

وہ بھی شامل ہو گیا بالآخر تنہاؤں میں

بیٹھے آمنے سامنے کہنیاں ٹیکے میز پہ

چٹکے چہرے پھول سے شہر کی شام سراؤں میں

گزرا اپنی اوٹ میں دیکھا کس نے زید کو

ہوتی کیوں سرگوشیاں بستی کی لیلاؤں میں

آفتاب اقبال شمیم

تمنا کی تصور زاد دنیاؤں میں رہنا ہے

نومبر 16, 2013آفتاب اقبال شمیمکلیساؤں، گاؤں، پاؤں، دنیاؤں، دریاؤں، صحراؤںadmin

آفتاب اقبال شمیم ۔ غزل نمبر 48

کہیں چھاؤں نہیں لیکن ہمیں چھاؤں میں رہنا ہے

تمنا کی تصور زاد دنیاؤں میں رہنا ہے

ہمیں اگلا سفر شاید کہ لا محدود کر دے گا

وہاں تک اک نہ اک زنجیر کو پاؤں میں رہنا ہے

مناسب ہے ان آنکھوں کا بہا دینا سرابون میں

کہ آخر عمرِ بےمعنی کے صحراؤں میں رہنا ہے

یہی ہم پر کُھلا، ردِّ عقیدہ بھی عقیدہ ہے

کلیساؤں سے باہر بھی کلیساؤں میں رہنا ہے

ہُوا اک بار پھر ناکام منصوبہ بغاوت کا

ابھی اُس کشتِ زارِ جبر کے گاؤں میں رہنا ہے

گرفت ریگ سے کچھ کربلائیں تم بنا لو گے!

رواں رہنے کا پھر بھی عزم دریاؤں میں رہنا ہے

آفتاب اقبال شمیم

گاؤں

مارچ 2, 2012مجید امجد، نظم، روزِ رفتہگاؤںadmin

یہ تنگ و تار جھونپڑیاں گھاس پھوس کی

اب تک جنھیں ہوا نہ تمدن کی چھو سکی

ان جھونپڑوں سے دور اور اس پار کھیت کے

یہ جھاڑیوں کے جھنڈ یہ انبار ریت کے

یہ سادگی کے رنگ میں ڈوبا ہوا جہاں

ہنگامۂ جہاں ہے سکوں آشنا جہاں

یہ دوپہر کو کیکروں کی چھاؤں کے تلے

گرمی سے ہانپتی ہوئی بھینسوں کے سلسلے

ریوڑ یہ بھیڑ بکریوں کے اونگھتے ہوئے

جھک کر ہر ایک چیز کی بو سونگھتے ہوئے

یہ آندھیوں کے خوف سے سہمی ہوئی فضا

جنگل کی جھاڑیوں سے سنکتی ہوئی ہوا

یہ شام کے مناظرِ رنگیں کی خامشی

اور اس میں گونجتی ہوئی جھینگر کی راگنی

بچے غبارِ راہگزر پھانکتے ہوئے

میدان میں مویشیوں کو ہانکتے ہوئے

برفاب کے دفینے اگلتا ہوا کنواں

یہ گھنگھروؤں کی تال پہ چلتا ہوا کنواں

یہ کھیت، یہ درخت، یہ شاداب گرد و پیش

سیلابِ رنگ و بو سے یہ سیراب گرد و پیش

مستِ شباب کھیتیوں کی گلفشانیاں

دوشیزۂ بہار کی اٹھتی جوانیاں

یہ نزہتِ مظاہرِ قدرت کی جلوہ گہ

ہاں ہاں یہ حسنِ شاہدِ فطرت کی جلوہ گہ

دنیا میں جس کو کہتے ہیں گاؤں یہی تو ہے

طوبیٰ کی شاخِ سبز کی چھاؤں یہی تو ہے

مجید امجد

ہم نے ابلاغ سے خلاؤں کو

دسمبر 1, 2007منصور آفاق، شعراء، غزلہواؤں، چھاؤں، گاؤں، پاؤں، خلاؤں، خداؤں، سراؤںadmin

منصور آفاق ۔ غزل نمبر 229

بھردیا اجنبی فضاؤں کو

ہم نے ابلاغ سے خلاؤں کو

آخری سانس تک لڑیں گے ہم

پھر دیوں نے کہا ہواؤں کو

لوگ ابلیس سے بھی بڑھ کے ہیں

پوجتے ہیں کئی خداؤں کو

سانپ بننے لگی ہے شاخِ گل

دھوپ ڈسنے لگی ہے چھاؤں کو

دشتِ غم سے نکال لائے ہیں

چومتے ہیں ہم اپنے پاؤں کو

دے گئی پھر سنبھالاموسیقی

اور دعادی غزل سراؤں کو

اپنے خالی گھڑے لئے منصور

کوئی دریا چلا ہے گاؤں کو

منصور آفاق

بجلی کے ہیں چراغ، ہواؤں کا خوف ختم

دسمبر 1, 2007منصور آفاق، شعراء، غزلہواؤں، فضاؤں، قباؤں، گھٹاؤں، گاؤں، پاؤں، خلاؤں، خداؤں، دعاؤں، سزاؤں، صداؤںadmin

منصور آفاق ۔ غزل نمبر 217

اب آسماں نژاد بلاؤں کا خوف ختم

بجلی کے ہیں چراغ، ہواؤں کا خوف ختم

تلووں تلے لگا لیے سیارے وقت نے

ہر لمحہ سوچتے ہوئے پاؤں کا خوف ختم

بادل بڑے گرجتے ہیں باراں بکف مگر

سینہ نہیں دھڑکتا، خداؤں کا خوف ختم

اک چشمہء شعور پہ اپنی رگوں کے بیچ

ہم شیر مار آئے ہیں ، گاؤں کا خوف ختم

سورج تراش لائے ہیں صحنِ علوم سے

سہمی ہوئی سیاہ فضاؤں کا خوف ختم

ہم نے طلسم توڑ لیا ہے نصیب کا

جادو نگر کی زرد دعاؤں کا خوف ختم

اب شرم سار ہوتی نہیں ہے سنہری دھوپ

پلکوں پہ سرسراتی گھٹاؤں کا خوف ختم

میلوں تلک زمیں میں آنکھیں اتر گئیں

اندھے کنووں میں لٹکی سزاؤں کا خوف ختم

کوہ ندا کے کھل گئے اسرار آنکھ پر

آسیبِ آسماں کی صداؤں کا خوف ختم

اپنالی اپنے عہد نے تہذیب جین کی

اکڑی ہوئی قدیم قباؤں کا خوف ختم

ہم رقص کائنات ہے منصور ذات سے

اندر کے بے کنار خلاؤں کا خوف ختم

منصور آفاق

اداس پھرتے ہیں ہم بیریوں کی چھاؤں میں

جنوری 8, 1972باقی صدیقی، شعراء، غزلہواؤں، فضاؤں، چھاؤں، گاؤں، گداؤں، پاؤں، صداؤںadmin

باقی صدیقی ۔ غزل نمبر 114

خبر کچھ ایسی اڑائی کسی نے گاؤں میں

اداس پھرتے ہیں ہم بیریوں کی چھاؤں میں

نظر نظر سے نکلتی ہیں درد کی ٹیسیں

قدم قدم پہ وہ کانٹے چبھے ہیں پاؤں میں

ہرایک سمت سے اڑ اڑ کے ریت آتی ہے

ابھی ہے زور وہی دشت کی ہواؤں میں

غموں کی بھیڑ میں امید کا وہ عالم ہے

کہ جیسے ایک سخی ہو کئی گداؤں میں

ابھی ہے گوش بر آواز گھر کا سناٹا

ابھی کشش ہے بڑی دور کی صداؤں میں

چلے تو ہیں کسی آہٹ کا آسرا لے کر

بھٹک نہ جائیں کہیں اجنبی فضاؤں میں

دھواں دھواں سی ہے کھیتوں کی چاندنی باقیؔ

کہ آگ شہر کی اب آ گئی ہے گاؤں میں

باقی صدیقی

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: گاؤں

بے دم ہے پیڑ پیڑ چمن کا چِتاؤں میں

سپنے سکُھ کی چھاؤں کے

دھوپ جیسے کبھی چھاؤں سے ملے

جیسے افواہ کوئی گاؤں میں

بول ہوں جیسے ہونٹوں پر بیواؤں کے

رُوٹھا یار مناؤں

آنچ سی اِک مسلسل ہواؤں میں ہے

یہ رنگ بھی آ، تجھے دکھاؤں

پھر گیا رُخ کدھر ہواؤں کا

اب کہ ڈوبا ہوں تو سوکھے ہوئے دریاؤں میں

ایک پَل کو چھاؤں میں ، اور پھر ہَواؤں میں

گھنگھرو سایوں کے بجیں ڈھلتی دھوپ کے پاؤں میں

تمنا کی تصور زاد دنیاؤں میں رہنا ہے

گاؤں

ہم نے ابلاغ سے خلاؤں کو

بجلی کے ہیں چراغ، ہواؤں کا خوف ختم

اداس پھرتے ہیں ہم بیریوں کی چھاؤں میں

Rate this:

Rate this:

Rate this:

Rate this:

Rate this:

Rate this:

Rate this:

Rate this:

Rate this:

Rate this:

Rate this:

Rate this:

Rate this:

Rate this:

Rate this:

Rate this:

Rate this: