ٹیگ کے محفوظات: کہسار

لے گئی ہیں دور تڑپیں سایۂ دیوار کو

اکتوبر 6, 2015میر تقی میر،اساتذہ،غزلہشیار،یار،کہسار،بیمار،خار،دیوار،دیدارadmin

دیوان اول غزل 400

دیکھتا ہوں دھوپ ہی میں جلنے کے آثار کو

لے گئی ہیں دور تڑپیں سایۂ دیوار کو

باب صحت ہے وگرنہ کون کہتا ہے طبیب

جلد اٹھائو میرے دروازے سے اس بیمار کو

حشر پہ موقوف تھا سو تو نظر آیا نہ یاں

کیا بلا درپیش آئی وعدئہ دیدار کو

وے جو مست بے خودی ہیں عیش کرتے ہیں مدام

میکدے میں دہر کے مشکل ہے ٹک ہشیار کو

نقش شیریں یادگار کوہکن ہے اس میں خوب

ورنہ کیا ہے بے ستوں دیکھا ہے میں کہسار کو

کس قدر الجھیں ہیں میرے تار دامن کے کہ اب

پائوں میں گڑ کر نہیں چبھنے کی فرصت خار کو

ہے غبار میر اس کے رہگذر میں یک طرف

کیا ہوا دامن کشاں آتے بھی یاں تک یار کو

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

دی ہم نے زبردستی لبِ یار پہ دستک

دسمبر 1, 2007منصور آفاق،شعراء،غزلچہکار،یار،کہسار،گلزار،گنہگار،پندار،پتوار،آزار،اسرار،اظہار،بیدار،بار،خار،خریدار،دلدار،دیوار،رخسار،زار،سیار،غارadmin

منصور آفاق ۔ غزل نمبر 260

ہونٹوں بھری رکھ دی درِ انکارِ پہ دستک

دی ہم نے زبردستی لبِ یار پہ دستک

اک شام پلٹ آئے ہیں یہ بات الگ ہے

دی پاؤں نے برسوں رہِ پُر خار پہ دستک

پھر رات کی رانی کا محل سامنے مہکے

پھر صبح کی چڑیوں بھری چہکار پہ دستک

کاندھے پہ کوئی بھیدوں بھری پوٹلی رکھ کر

دیتا ہے پھر امکان ابد زار پہ دستک

دم بھر کو نئی صبح کا اعلانیہ سن کر

دی اہلِ قفس نے گل و گلزار پہ دستک

بازار سے گزرا تو چہکتی ہوئی رت کی

تصویر نے دی جیبِ خریدار پہ دستک

کچھ ہاتھ کہیں اور سے آیا ہی نہیں ہے

دینا پڑی پھر عرشِ کرم بار پہ دستک

ممکن ہے ملاقات ہو آسیبِ بدن سے

اچھی طرح دے کمرئہ اسرار پہ دستک

ہے فرض یہی تجھ پہ یہی تیری عبادت

دے خاک نسب ! خانہء سیار پہ دستک

درویش فقیری ہی کہیں بھول نہ جائے

یہ کون ہے دیتا ہے جو پندار پہ دستک

وہ دیکھیے دینے لگا پھر اپنے بدن سے

اک تازہ گنہ، چشم گنہگار پہ دستک

اٹھ دیکھ کوئی درد نیا آیا ہوا ہے

وہ پھر ہوئی دروازئہ آزار پہ دستک

دشنام گلابوں کی طرح ہونٹوں پہ مہکیں

درشن کے لیے دے درِ دلدار پہ دستک

برسوں سے کھڑا شخص زمیں بوس ہوا ہے

یہ کیسی سمندر کی تھی کہسار پہ دستک

پانی مجھے مٹی کی خبر دینے لگے ہیں

اک سبز جزیرے کی ہے پتوار پہ دستک

افسوس ضروری ہے مرا بولنا دو لفظ

پھر وقت نے دی حجرۂ اظہار پہ دستک

مایوسی کے عالم میں محبت کا مسافر

در چھوڑ کے دینے لگا دیوار پہ دستک

دی جائے سلگتی ہوئی پُر شوق نظر سے

کچھ دیر تو اس کے لب و رخسار پہ دستک

اب اور گنی جاتی نہیں مجھ سے یہ قبریں

اب دینی ضروری ہے کسی غار پہ دستک

منصور بلایا ہے مجھے خواب میں اس نے

دی نیند نے پھر دیدۂ بیدار پہ دستک

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

دیکھ پڑتی ہوئی دیوار کے سینے میں دراڑ

دسمبر 1, 2007منصور آفاق،شعراء،غزلمسمار،یار،کہسار،کردار،گرفتار،پندار،آزار،اسرار،بیدار،دلدار،دیوار،زنگار،زرتار،سالارadmin

منصور آفاق ۔ غزل نمبر 255

ساعتِ دیدۂ انکار کے سینے میں دراڑ

دیکھ پڑتی ہوئی دیوار کے سینے میں دراڑ

ایک ہی لفظ سے بھونچال نکل آیا ہے

پڑ گئی ہے کسی کہسار کے سینے میں دراڑ

کوئی شے ٹوٹ گئی ہے مرے اندر شاید

آ گئی ہے مرے پندار کے سینے میں دراڑ

چاٹتی جاتی ہے رستے کی طوالت کیا کیا

ایک بنتی ہوئی دلدار کے سینے میں دراڑ

تم ہی ڈالو گے مرے شاہ سوارو آخر

موت کی وادیِ اسرار کے سینے میں دراڑ

کھلکھلاتی ہوئی اک چشمِ سیہ نے ڈالی

آ مری صحبتِ آزار کے سینے میں دراڑ

رو پڑا خود ہی لپٹ کر شبِ غم میں مجھ سے

تھی کہانی ترے کردار کے سینے میں دراڑ

روندنے والے پہاڑوں کو پلٹ آئے ہیں

دیکھ کر قافلہ سالار کے سینے میں دراڑ

صبح کی پہلی کرن ! تجھ پہ تباہی آئے

ڈال دی طالعِ بیدار کے سینے میں دراڑ

کل شبِ ہجر میں طوفان کوئی آیا تھا

دیدۂ نم سے پڑی یار کے سینے میں دراڑ

غم کے ملبے سے نکلتی ہوئی پہلی کونپل

دیکھ باغیچہء مسمار کے سینے میں دراڑ

لفظ کی نوکِ سناں سے بھی کہاں ممکن ہے

وقت کے خانہء زنگار کے سینے میں دراڑ

بس قفس سے یہ پرندہ ہے نکلنے والا

نہ بڑھا اپنے گرفتار کے سینے میں دراڑ

شام تک ڈال ہی لیتے ہیں اندھیرے منصور

صبح کے جلوۂ زرتار کے سینے میں دراڑ

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔