ٹیگ کے محفوظات: کہانیاں

نہیں ہے کوئی بھی اپنا مزاج داں لوگو

مئی 31, 2021کلیاتِ شکیب جلالی ۔ غزلیں،شکیب جلالی،غزلکہانیاں،پہیلیاں،پتّیاں،تلخیاں،دھواں،داںadmin

ہر ایک بات ہے منّت کشِ زباں لوگو

نہیں ہے کوئی بھی اپنا مزاج داں لوگو

کچھ اس طرح وہ حقائق کو سن کے چونک اٹھے

بکھر گئیں سرِ محفل پہیلیاں لوگو

مرے لبوں سے کوئی بات بھی نہیں نکلی

مگر تراش ،کیں تم نے کہانیاں لوگو

بہارِ نو بھی انہیں پھر سجا نہیں سکتی

بکھر گئی ہیں جو پھولوں کی پتّیاں لوگو

بڑا زمانہ ہوا آشیاں کو راکھ ہوۓ

مگر نگاہ ہے اب تک دھواں دھواں لوگو

خطا معاف کہ مے سے شکیبؔ منکر ہے

اسے عزیز ہیں دنیا کی تلخیاں لوگو

شکیب جلالی

ہاں میاں داستانیاں تھے ہم

اکتوبر 23, 2015Jaun Elia،جون ایلیا،شعراء،غزلناگہانیاں،نشانیاں،کہانیاں،کمانیاں،آسمانیاں،ارغوانیاں،جہانیاں،جاودانیاں،داستانیاں،درمیانیاںadmin

جون ایلیا ۔ غزل نمبر 57

دل گماں تھا گمانیاں تھے ہم

ہاں میاں داستانیاں تھے ہم

ہم سُنے اور سُنائے جاتے تھے

رات بھرکی کہانیاں تھے ہم

جانے ہم کِس کی بُود کا تھے ثبوت

جانے کِس کی نشانیاں تھے ہم

چھوڑتے کیوں نہ ہم زمیں اپنی

آخرش آسمانیاں تھے ہم

ذرہ بھر بھی نہ تھی نمود اپنی

اور پھر بھی جہانیاں تھے ہم

ہم نہ تھے ایک آن کے بھی مگر

جاوداں، جاودانیاں تھے ہم

روز اِک رَن تھا تیروترکش بِن

تھے کمیں اور کمانیاں تھے ہم

ارغوانی تھا وہ پیالہء ناف

ہم جو تھے ارغوانیاں تھے ہم

نار پستان تھی وہ قتّالہ

اور ہوس درمیانیاں تھے ہم

ناگہاں تھی اک آنِ آن کہ تھی

ہم جو تھے ناگہانیاں تھے ہم

جون ایلیا

اس بے نشاں کی ایسی ہیں چندیں نشانیاں

اکتوبر 6, 2015میر تقی میر،اساتذہ،غزلفشانیاں،مانیاں،نشانیاں،کہانیاں،کاروانیاں،جوانیاں،دانیاں،زبانیاں،سرگرانیاںadmin

دیوان پنجم غزل 1685

تاروں کی جیسے دیکھیں ہیں آنکھیں لڑانیاں

اس بے نشاں کی ایسی ہیں چندیں نشانیاں

پیری ہے اب تو کہیے سو کیا کہیے ہم نشیں

کس رنج و غم میں گذریں ہیں اپنی جوانیاں

ظلم و ستم سے خون کیا پھر ڈبا دیا

برباد کیا گئیں ہیں مری جاں فشانیاں

میں آپ چھیڑچھیڑ کے کھاتا ہوں گالیاں

خوش آگئیں ہیں اس کی مجھے بد زبانیاں

سنتا نہیں ہے شعر بھی وہ حرف ناشنو

دل ہی میں خوں ہوا کیں مری نکتہ دانیاں

باتیں کڈھب رقیب کی ساری ہوئیں قبول

مجھ کو جو ان سے عشق تھا میری نہ مانیاں

مجلس میں تو خفیف ہوئے اس کے واسطے

پھر اور ہم سے اٹھتیں نہیں سرگرانیاں

عالم کے ساتھ جائیں چلے کس طرح نہ ہم

عالم تو کاروان ہے ہم کاروانیاں

سررفتہ سن نہ میر کا گر قصد خواب ہے

نیندیں اچٹتیاں ہیں سنے یہ کہانیاں

میر تقی میر

تم بھی تو ایک رات سنو یہ کہانیاں

اکتوبر 6, 2015میر تقی میر،اساتذہ،غزلفشانیاں،مانیاں،نامہربانیاں،کہانیاں،بانیاں،بدزبانیاں،جوانیاں،جانیاں،دانیاںadmin

دیوان اول غزل 329

کھوویں ہیں نیند میری مصیبت بیانیاں

تم بھی تو ایک رات سنو یہ کہانیاں

کیا آگ دے کے طور کو کی ترک سرکشی

اس شعلے کی وہی ہیں شرارت کی بانیاں

صحبت رکھا کیا وہ سفیہ و ضلال سے

دل ہی میں خوں ہوا کیں مری نکتہ دانیاں

ہم سے تو کینے ہی کی ادائیں چلی گئیں

بے لطفیاں یہی یہی نامہربانیاں

تلوار کے تلے ہی گیا عہد انبساط

مر مر کے ہم نے کاٹی ہیں اپنی جوانیاں

گالی سوائے مجھ سے سخن مت کیا کرو

اچھی لگے ہیں مجھ کو تری بدزبانیاں

غیروں ہی کے سخن کی طرف گوش یار تھے

اس حرف ناشنو نے ہماری نہ مانیاں

یہ بے قراریاں نہ کبھو ان نے دیکھیاں

جاں کاہیاں ہماری بہت سہل جانیاں

مارا مجھے بھی سان کے غیروں میں ان نے میر

کیا خاک میں ملائیں مری جاں فشانیاں

میر تقی میر

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: کہانیاں

نہیں ہے کوئی بھی اپنا مزاج داں لوگو

ہاں میاں داستانیاں تھے ہم

اس بے نشاں کی ایسی ہیں چندیں نشانیاں

تم بھی تو ایک رات سنو یہ کہانیاں

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: