ماجد صدیقی ۔ غزل نمبر 37

کس لئے غیروں کی کشتِ صید میں جھانکا کروں

فرطِ محرومی سے اپنے آپ کو رسوا کروں

ایک ننّھا ہے مرے جی میں بھی شوخ و شنگ سا

پا سکوں فرصت تو اُس کا حال بھی پوچھا کروں

محوِ خوابِ استراحت شہر کا والی رہے

رات بھر اندیشۂ دُزداں سے میں کھانسا کروں

ذوق پابند وسائل ہے جو اتنا ہی تو پھر

کیوں نہ چھلکے بھی پھلوں کے ساتھ اب کھایا کروں

حیف ہے اُس شوخ کی موجودگی میں بھی اگر

خشکئِ آب و ہوائے دہر کا شکوہ کروں

گُل کھلا دیکھوں کوئی ماجد تو جُوں بادِ سحر

کیوں نہ سارے گلستان میں اُس کا میں چرچا کروں

ماجد صدیقی