ٹیگ کے محفوظات: کسو

کچھ ہوائے مشکبو کچھ ہم سبُو نے کر دیا

جولائی 24, 2018موجِ خیال، باصر کاظمی، غزلکسو، آرزو، تو، جو، سبوadmin

کچھ تو رُسوا اپنی طرزِ گفتگو نے کر دیا

کچھ ہوائے مشکبو کچھ ہم سبُو نے کر دیا

کیسے کیسے ناقصوں کی بات سننی پڑ گئی

کیا سُبک سَر ہم کو زخمِ چارہ جو نے کر دیا

شہر بھر میں ایک ہی تو رہ گیا تھا ہوش مند

سنتے ہیں اُس کو بھی دیوانہ کسو نے کر دیا

دو قدم چلنا تھا مشکل اُس اندھیرے میں مگر

راہ کو روشن چراغِ آرزو نے کر دیا

اُس نے تو باصرِؔ یونہی پوچھی تھی تیری خیریت

حالِ دل کہہ کر ہمیں شرمندہ تُو نے کر دیا

باصر کاظمی

Rate this:

لکھ دیجیو یا رب اسے قسمت میں عدو کی

اکتوبر 8, 2015مرزا اسد اللہ خان غالب، اساتذہ، غزللہو، کسو، گلو، جو، عدوadmin

دیوانِ غالب ۔ غزل نمبر 198

جس زخم کی ہو سکتی ہو تدبیر رفو کی

لکھ دیجیو یا رب اسے قسمت میں عدو کی

اچّھا ہے سر انگشتِ حنائی کا تصوّر

دل میں نظر آتی تو ہے اک بوند لہو کی

کیوں ڈرتے ہو عشّاق کی بے حوصلگی سے

یاں تو کوئی سنتا نہیں فریاد کسو کی

دشنے نے کبھی منہ نہ لگایا ہو جگر کو

خنجر نے کبھی بات نہ پوچھی ہو گلو کی

صد حیف وہ نا کام کہ اک عمر سے غالب

حسرت میں رہے ایک بتِ عربدہ جو کی

مرزا اسد اللہ خان غالب

Rate this:

کھنچا جائے ہے دل کسو کی طرف

اکتوبر 6, 2015میر تقی میر، اساتذہ، غزلکسو، گفتگو، بو، جستجو، روadmin

دیوان پنجم غزل 1654

نظر کیوں گئی رو و مو کی طرف

کھنچا جائے ہے دل کسو کی طرف

نہ دیکھو کبھی موتیوں کی لڑی

جو دیکھو مری گفتگو کی طرف

اگر آرسی میں صفائی ہے لیک

نہیں کرتی منھ اس کے رو کی طرف

چڑھے نہ کہیں کود یہ مغز میں

نہ کر شانہ تو گل کی بو کی طرف

اسے ڈھونڈتے میر کھوئے گئے

کوئی دیکھے اس جستجو کی طرف

میر تقی میر

Rate this:

خموش دیکھتے رہتے ہیں اس کے رو کو ہم

اکتوبر 6, 2015میر تقی میر، اساتذہ، غزلکسو، گلو، جستجو، خو، روadmin

دیوان چہارم غزل 1440

تجا ہے حیرت عشقی سے گفتگو کو ہم

خموش دیکھتے رہتے ہیں اس کے رو کو ہم

اگرچہ وصل ہے پر ہیں طلب میں سرگرداں

پہ وہم کار ہی جاتے ہیں جستجو کو ہم

اب اپنی جان سے ہیں تنگ دم رکا ہے بہت

ملا ہی دیں گے تری تیغ سے گلو کو ہم

جلا کے خاک کرے وہ کہ رہ کے داغ کرے

لگا دیں آگ سے کیا اپنی گرم خو کو ہم

مرید پیر خرابات یوں نہ ہوتے میر

سمجھتے عارف اگر اور بھی کسو کو ہم

میر تقی میر

Rate this:

کچھ آگئی تھی سرو چمن میں کسو کی طرح

اکتوبر 6, 2015میر تقی میر، اساتذہ، غزلنمو، وضو، کبھو، کسو، گفتگو، اتو، تندخو، جستجو، رفو، رو، سبوadmin

دیوان سوم غزل 1125

یاد آگیا تو بہنے لگیں آنکھیں جو کی طرح

کچھ آگئی تھی سرو چمن میں کسو کی طرح

چسپاں قبا وہ شوخ سدا غصے ہی رہا

چین جبیں سے اس کی اٹھائی اتو کی طرح

گالی لڑائی آگے تو تم جانتے نہ تھے

اب یہ نکالی تم نے نئی گفتگو کی طرح

ہم جانتے تھے تازہ بناے جہاں کو لیک

یہ منزل خراب ہوئی ہے کبھو کی طرح

سرسبز ہم ہوئے نہ تھے جو زرد ہو چلے

اس کشت میں پڑی یہ ہمارے نمو کی طرح

وے دن کہاں کہ مست سرانداز خم میں تھے

سر اب تو جھوجھرا ہے شکستہ سبو کی طرح

تسکین دل کی کب ہوئی سیرچمن کیے

گو پھول دل میں آگئے کچھ اس کے رو کی طرح

آخر کو اس کی راہ میں ہم آپ گم ہوئے

مدت میں پائی یار کی یہ جستجو کی طرح

کیا لوگ یوں ہی آتش سوزاں میں جا پڑے

کچھ ہو گی جلتی آگ میں اس تندخو کی طرح

ڈرتا ہوں چاک دل کو مرے پلکوں سے سیے

نازک نظر پڑی ہے بہت اس رفو کی طرح

دھوتے ہیں اشک خونی سے دست و دہن کو میر

طورنماز کیا ہے جو یہ ہے وضو کی طرح

میر تقی میر

Rate this:

ہمیں کھو دیا ہے تری جستجو نے

اکتوبر 6, 2015میر تقی میر، اساتذہ، غزلچپو، کسو، گفتگو، آرزو، بو، جستجو، خوبرو، دو، سوadmin

دیوان دوم غزل 997

الٰہی کہاں منھ چھپایا ہے تو نے

ہمیں کھو دیا ہے تری جستجو نے

جو خواہش نہ ہوتی تو کاہش نہ ہوتی

ہمیں جی سے مارا تری آرزو نے

نہ بھائیں تجھے میری باتیں وگرنہ

رکھی دھوم شہروں میں اس گفتگو نے

رقیبوں سے سر جوڑ بیٹھو ہو کیونکر

ہمیں تو نہیں دیتے ٹک پائوں چھونے

پھر اس سال سے پھول سونگھا نہ میں نے

دوانہ کیا تھا مجھے تیری بو نے

مداوا نہ کرنا تھا مشفق ہمارا

جراحت جگر کے لگے دکھنے دونے

کڑھایا کسو کو کھپایا کسو کو

برائی ہی کی سب سے اس خوبرو نے

وہ کسریٰ کہ ہے شور جس کا جہاں میں

پڑے ہیں گے اس کے محل آج سونے

تری چال ٹیڑھی تری بات روکھی

تجھے میر سمجھا ہے یاں کم کسو نے

میر تقی میر

Rate this:

رہے خنجر ستم ہی کے گلو پاس

اکتوبر 6, 2015میر تقی میر، اساتذہ، غزلکبھو، کسو، گلو، تو، جو، رو، عدوadmin

دیوان دوم غزل 821

گئے جس دم سے ہم اس تندخو پاس

رہے خنجر ستم ہی کے گلو پاس

قیامت ہے نہ اے سرمایۂ جاں

نہ ہووے وقت مرنے کے بھی تو پاس

رلایا ہم نے پہروں رات اس کو

کہا یہ قصۂ غم جس کسو پاس

کہیں اک دور کی سی کچھ تھی نسبت

رکھا تھا آئینے کو اس کے رو پاس

دل اے چشم مروت کیوں نہ خوں ہو

تجھے ہم جب نہ تب دیکھیں عدو پاس

یہی گالی یہی جھڑکی یہی چھیڑ

نہ کچھ میرا کیا تونے کبھو پاس

چل اب اے میر بس اس سرو قد بن

بہت رویا چمن کی آب جو پاس

میر تقی میر

Rate this:

گویا وفا ہے عہد میں اس کے کبھو کی بات

اکتوبر 6, 2015میر تقی میر، اساتذہ، غزلمو، کبھو، کسو، گو، خو، رو، روبروadmin

دیوان دوم غزل 782

کیا پوچھتے ہو آہ مرے جنگجو کی بات

گویا وفا ہے عہد میں اس کے کبھو کی بات

اس باغ میں نہ آئی نظر خرمی مری

گر سبز بھی ہوا ہوں تو جیسے کسو کی بات

آئینہ پانی پانی رہا اس کے سامنے

کہیے جہاں کہوں یہ تو ہے روبرو کی بات

سر گل نے پھر جھکا کے اٹھایا نہ شرم سے

گلزار میں چلی تھی کہیں اس کے رو کی بات

حرمت میں مے کی کہنے سے واعظ کے ہے فتور

کیا اعتبار رکھتی ہے اس پوچ گو کی بات

ہم سوختوں میں آتش سرکش کا ذکر کیا

چل بھی پڑی ہے بات تو اس تند خو کی بات

کیا کوئی زلف یار سے حرف و سخن کرے

رکھتی ہے میر طول بہت اس کے مو کی بات

میر تقی میر

Rate this:

روئے نہ ہم کبھو ٹک دامن پکڑ کسو کا

اکتوبر 6, 2015میر تقی میر، اساتذہ، غزللہو، چو، کو، کبھو، کسو، گفتگو، بو، تھو، جو، رفوadmin

دیوان اول غزل 92

ہے حال جاے گریہ جان پرآرزو کا

روئے نہ ہم کبھو ٹک دامن پکڑ کسو کا

جاتی نہیں اٹھائی اپنے پہ یہ خشونت

اب رہ گیا ہے آنا میرا کبھو کبھو کا

اس آستاں سے کس دن پرشور سر نہ پٹکا

اس کی گلی میں جاکر کس رات میں نہ کوکا

شاید کہ مند گئی ہے قمری کی چشم گریاں

کچھ ٹوٹ سا چلا ہے پانی چمن کی جو کا

اپنے تڑپنے کی تو تدبیر پہلے کرلوں

تب فکر میں کروں گا زخموں کے بھی رفو کا

دانتوں کی نظم اس کے ہنسنے میں جن نے دیکھی

پھر موتیوں کی لڑ پر ان نے کبھو نہ تھوکا

یہ عیش گہ نہیں ہے یاں رنگ اور کچھ ہے

ہر گل ہے اس چمن میں ساغر بھرا لہو کا

بلبل غزل سرائی آگے ہمارے مت کر

سب ہم سے سیکھتے ہیں انداز گفتگو کا

گلیاں بھری پڑی ہیں اے باد زخمیوں سے

مت کھول پیچ ظالم اس زلف مشک بو کا

وے پہلی التفاتیں ساری فریب نکلیں

دینا نہ تھا دل اس کو میں میر آہ چوکا

میر تقی میر

Rate this: