ٹیگ کے محفوظات: کرن

روزن سے میرے آتی کوئی بھی کرن نہیں

جون 1, 2021یاور ماجد،آنکھ بھر آسمان،غزلچھنن،کرن،گگن،زن،سخن،شکنadmin

جاتی اندھیر پن کی یہاں سے گھٹن نہیں

روزن سے میرے آتی کوئی بھی کرن نہیں

دِن بھر کی شورشوں کے دباؤ کے شور سے

شب کے لِباسِ حبس میں کوئی شکن نہیں

کیوں روشنی گروں کی زبانیں ہیں سوختہ

کیوں لوَ کسی چراغ کی بھی سینہ زن نہیں

اندھے خلا کی کھائی میں گرتا ہی جاؤں میَں

پیروں تلے زمیں نہیں سر پر گگن نہیں

اک نغمہ خامشی کا بنی جائے زندگی

اک رقص ہے کہ جس میں کوئی چھن چھنن نہیں

یاوؔر ہی بس ہے عاجز و ناچیز و خاکسار

ورنہ یہاں پہ کون خدائے سُخن نہیں

یاور ماجد

آنکھ بھر آسمان ۔ فہرست

ہمارے بانکپن کا تذکرہ ہے

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلکرن،پیرہن،انجمن،بانکپن،بدن،دہن،طرزسخنadmin

وہ زنداں یا چمن کا تذکرہ ہے

ہمارے بانکپن کا تذکرہ ہے

مرے حُسنِ سماعت پر نہ جاؤ

کسی غنچہ دہن کا تذکرہ ہے

سیاہ زلفوں کی زنجیروں میں پنہاں

نئی اُجلی کرن کا تذکرہ ہے

زبانِ خار و خس تک بات پہنچے

بہاریں پیرہن کا تذکرہ ہے

دھواں دینے لگے ہیں لالہ و گُل

کسی شعلہ بدن کا تذکرہ ہے

ابھی دریادلی کا ذکر ہو گا

ابھی تشنہ دہن کا تذکرہ ہے

دیارِ کہکشاں سے شہرِ گُل تک

ہماری انجمن کا تذکرہ ہے

شکیبؔ! اہلِ زباں کی محفلوں میں

ترے طرزِسخن کا تذکرہ ہے

شکیب جلالی

ندائے وقت ہے دار و رَسن پَہ پابندی

مئی 20, 2021ضامن جعفری،غزلچمن،کرن،پیرہن،بانکپن،بدن،رسنadmin

عَبَث ہے حَرف و قَلم یا سُخن پَہ پابندی

ندائے وقت ہے دار و رَسن پَہ پابندی

بَہار وقت کی آواز سُن کر آتی ہے

خَزاں کے بَس کی نہیں ہے چمن پَہ پابندی

مقابلے پَہ ہے خُورشیدِ وقت کے ظُلمت

یہ کیا لگائے گی ایک اِک کرَن پَہ پابندی

لگا سکا ہے بَھلا کون اَزَل سے تا اِیں دَم

شبابِ فِکر تِرے بانکپَن پَہ پابندی

دَرونِ ذات کو گر کر دِیا نَظَر انداز

نَہ دے گی کام فقط پَیرَہَن پَہ پابندی

شعورِ وقت کا ضامنؔ! خطاب رُوح سے ہے

بَلا سے اس کی لگے گر بدن پَہ پابندی

ضامن جعفری

سخن کدہ مری طرزِ سخن کو ترسے گا

اگست 4, 2018ناصر کاظمی،دیوانِ ناصر،غزلفن،کفن،کرن،الوطن،سمن،سخنadmin

زباں سخن کو سخن بانکپن کو ترسے گا

سخن کدہ مری طرزِ سخن کو ترسے گا

نئے پیالے سہی تیرے دَور میں ساقی

یہ دَور میری شرابِ کہن کو ترسے گا

مجھے تو خیر وطن چھوڑ کر اماں نہ ملی

وطن بھی مجھ سے غریب الوطن کو ترسے گا

انہی کے دم سے فروزاں ہیں ملتوں کے چراغ

زمانہ صحبتِ اربابِ فن کو ترسے گا

بدل سکو تو بدل دو یہ باغباں ورنہ

یہ باغ سایہِ سرو و سمن کو ترسے گا

ہوائے ظلم یہی ہے تو دیکھنا اِک دن

زمین پانی کو سورج کرن کو ترسے گا

ناصر کاظمی

تیری گلی گلی کی خیر اے مرے دل رُبا وطن

اگست 4, 2018ناصر کاظمی،دیوانِ ناصر،غزلوطن،کفن،کرن،بن،بدن،تھکن،سخنadmin

تو ہے دلوں کی روشنی تو ہے سحر کا بانکپن

تیری گلی گلی کی خیر اے مرے دل رُبا وطن

وہ تو بس ایک موج تھی آئی اِدھر اُدھر گئی

آنکھوں میں ہے مگر ابھی رات کے خواب کی تھکن

پھر وہی دشتِ بے اماں پھر وہی رنجِ رائِگاں

دل کو جگا کے سو گئی تیرے خیال کی کرن

آیا گیا نہ میں کہیں صبح سے شام ہو گئی

جلنے لگے ہیں ہاتھ کیوں ٹوٹ رہا ہے کیوں بدن

کس سے کہوں کوئی نہیں سو گئے شہر کے مکیں

کب سے پڑی ہے راہ میں میت شہرِ بے کفن

میکدہ بجھ گیا تو کیا رات ہے میری ہمنوا

سایہ ہے میرا ہم سبو چاند ہے میرا ہم سخن

دل ہے مرا لہو لہو تاب نہ لا سکے گا تو

اے مرے تازہ ہمنشیں تو مرا ہم سبو نہ بن

ناصر کاظمی

گل کیا غبارِ بوئے سمن کو ترس گئے

اگست 4, 2018ناصر کاظمی،برگِ نے،غزلچبھن،کفن،کرن،تن،سمن،سخنadmin

مدت ہوئی کہ سیرِ چمن کو ترس گئے

گل کیا غبارِ بوئے سمن کو ترس گئے

ہاں اے سکوتِ تشنگیٔ درد کچھ تو بول

کانٹے زباں کے آبِ سخن کو ترس گئے

دل میں کوئی صدا ہے نہ آنکھوں میں کوئی رنگ

تن کے رفیق صحبتِ تن کو ترس گئے

اِس عہدِ نو میں قدرِ متاعِ وفا نہیں

اس رسم و راہِ عہدِ کہن کو ترس گئے

منزل کی ٹھنڈکوں نے لہو سرد کر دیا

جی سُست ہے کہ پاؤں چبھن کو ترس گئے

اندھیر ہے کہ جلوۂ جاناں کے باوجود

کوچے نظر کے ایک کرن کو ترس گئے

ناصر کاظمی

کہاں کھپائیں گے اب جان فکر و فن میں لوگ

جولائی 24, 2018چمن کوئی بھی ہو،باصر کاظمی،غزلفن،چمن،وطن،کوہکن،کرن،انجمن،بھولپن،دہن،سخنadmin

مگن ہوئے ہیں کسی اور ہی لگن میں لوگ

کہاں کھپائیں گے اب جان فکر و فن میں لوگ

وہی ہیں رنگ خزاں اور بہار کے لیکن

کچھ اور دیکھنے جاتے ہیں اب چمن میں لوگ

بدل دیے ہیں زمانے نے عشق کے انداز

سو دیکھ پائیں گے کیا قیس و کوہکن میں لوگ

ترس گئے ہیں مرے کان حرفِ شیریں کو

لیے ہوئے ہیں بڑی تلخیاں دہن میں لوگ

اگرچہ نعمتیں حاصل ہیں دو جہاں کی اِنہیں

اداس رہتے ہیں یارب مرے وطن میں لوگ

کہی تھی تو نے تو ہر بات صاف صاف مگر

نجانے سمجھے ہیں کیا اپنے بھولپن میں لوگ

میں کیا بتاؤں تجھے خوب جانتا ہے تو

شریک ہوتے ہیں کیوں تیری انجمن میں لوگ

دکھائی دی تھی جو اِتنی طویل رات کے بعد

تلاش کرتے رہے مہر اُس کرن میں لوگ

مرے سُخن میں سُخن بولتا ہے ناصِر کا

مجھے بھی پائیں گے ہر محفلِ سخن میں لوگ

باصر کاظمی

جیسے ہربات میں ہو تیرے بدن کی خوشبو

فروری 27, 2017ماجد صدیقی،سخناب،غزلچمن،کرن،ان،بن،بدن،سمنadmin

ماجد صدیقی ۔ غزل نمبر 37

لفظ در لفظ ہے یُوں اب کے سخن کی خوشبو

جیسے ہربات میں ہو تیرے بدن کی خوشبو

اذن کی آنچ سے بے ساختہ دہکے ہوئے گال

جسم امڈی ہوئی جس طرح چمن کی خوشبو

نقش ہے یاد پہ ٹھہرے ہوئے ہالے کی طرح

وصل کے چاند کی اک ایک کرن کی خوشبو

گلشنِ تن سے ترے لوٹ کے بھی ساتھ رہی

کُنج در کُنج تھی کیا سرو و سمن کی خوشبو

تجھ سے دوری تھی کچھ اس طرح کی فاقہ مستی

جیسے مُدّت سے نہ آئے کبھی اَن کی خوشبو

ذکرِ جاناں سے ہے وُہ فکر کا عالم ماجدؔ!

جیسے آغاز میں باراں کے ہو بن کی خوشبو

ماجد صدیقی

پُھول آنگن میں کِھلے ہیں نہ چمن میں اب کے

اکتوبر 25, 2015پروین شاکر،شعراء،غزلچمن،کرن،بدن،تھکنadmin

پروین شاکر ۔ غزل نمبر 111

کیسی بے چہرہ رُتیں آئیں وطن میں اب کے

پُھول آنگن میں کِھلے ہیں نہ چمن میں اب کے

برف کے ہاتھ ہی ، ہاتھ آئیں گے ، اے موجِ ہوا

حِدتیں مجھ میں ، نہ خوشبو کے بدن میں ، اب کے

دُھوپ کے ہاتھ میں جس طرح کُھلے خنجر ہوں

کُھردرے لہجے کی نوکیں ہیں کرن میں اب کے

دل اُسے چاہے جسے عقل نہیں چاہتی ہے

خانہ جنگی ہے عجب ذہن و بدن میں اب کے

جی یہ چاہے، کوئی پھر توڑ کے رکھ دے مجھ کو

لذتیں ایسی کہاں ہوں گی تھکن میں اب کے

پروین شاکر

بارش کی ہَوا میں بن سمیٹے

اکتوبر 25, 2015پروین شاکر،شعراء،غزلفن،چبھن،وطن،کرن،گہن،پھن،بن،بھولپن،بانکپن،بدن،تھکن،رن،شِکنadmin

پروین شاکر ۔ غزل نمبر 107

من تھکنے لگا ہے تن سمیٹے

بارش کی ہَوا میں بن سمیٹے

ایسا نہ ہو ، چاند بھید پا لے

پیراہنِ گُل شِکن سمیٹے

سوتی رہی آنکھ دن چڑھے تک

دُلہن کی طرح تھکن سمیٹے

گُزرا ہے چمن سے کون ایسا

بیٹھی ہے ہوا بدن سمیٹے

شاخوں نے کلی کو بد دُعا دی

بارش ترا بھولپن سمیٹے

آنکھوں کے طویل رتجگوں پر

چاند آیا بھی تو گہن سمیٹے

احوال مرا وہ پوچھتا تھا

لہجے میں بڑی چبھن سمیٹے

اندر سے شکست وہ بھی نکلا

لیکن وہی بانکپن سمیٹے

شام آئے تو ہم بھی گھر کو لوٹیں

چڑیوں کی طرح تھکن سمیٹے

خود جنگ سے دست کش تھے ہم لوگ

جذبات میں ایک رن سمیٹے

آنکھوں کے چراغ ہم بجھا دیں

سُورج بھی مگر کرن سمیٹے

بس پیار سے مِل رہے ہیں کچھ لوگ

چمکیلے بدن میں پھن سمیٹے

پھر ہونے لگی ہوں ریزہ ریزہ

آئے…۔۔مجھے میرا فن سمیٹے

غیروں کے لیے بکھر گئی ہوں

اب مجھ کو مِرا وطن سمیٹے

پروین شاکر

رات بھر جاگی ہوئی جیسے دُلہن کی خوشبو

اکتوبر 25, 2015پروین شاکر،شعراء،غزلوطن،کرن،گہن،بدن،دمن،دُلہن،سخن،شکنadmin

پروین شاکر ۔ غزل نمبر 42

آج ملبوس میں ہے کیسی تھکن کی خوشبو

رات بھر جاگی ہوئی جیسے دُلہن کی خوشبو

پیرہن میرا مگر اُس کے بدن کی خوشبو

اُس کی ترتیب ہے ایک ایک شکن کی خوشبو

موجہ ءِ گُل کو ابھی اِذنِ تکلم نہ ملے

پاس آتی ہے کسی نرم سخن کی خوشبو

قامتِ شعر کی زیبائی کا عالم مت پُوچھ

مہربان جب سے ہے اُس سرد بدن کی خوشبو

ذکر شاید کسی خُورشید بدن کا بھی کرے

کُو بہ کُو پھیلی ہُوئی میرے گہن کی خوشبو

عارضِ گُل کو چُھوا تھا کہ دھنک سی بکھری

کِس قدر شوخ ہے ننھی سی کرن کی خوشبو

کِس نے زنجیر کیا ہے رمِ آہو چشماں

نکہتِ جاں ہے انہیں دشت و دمن کی خوشبو

اِس اسیری میں بھی ہر سانس کے ساتھ آتی ہے

صحنِ زنداں میں انہیں دشت وطن کی خوشبو

پروین شاکر

وہ رنگ رنگ میں اُترا، کرن کرن میں رہا

اکتوبر 25, 2015پروین شاکر،شعراء،غزلوطن،کرن،انجمن،بَن،بدنadmin

پروین شاکر ۔ غزل نمبر 28

وہ عکسِ موجہ ءِ گل تھا، چمن چمن میں رہا

وہ رنگ رنگ میں اُترا، کرن کرن میں رہا

وہ نام حاصلِ فن ہوکے میرے فن میں رہا

کہ رُوح بن کے مری سوچ کے بدن میں رہا

سکونِ دل کے لیے میں کہاں کہاں نہ گئی

مگر یہ دل، کہ سدا اُس کی انجمن میں رہا

وہ شہر والوں کے آگے کہیں مہذب تھا

وہ ایک شخص جو شہروں سے دُور بَن میں رہا

چراغ بجھتے رہے اور خواب جلتے رہے

عجیب طرز کا موسم مرے وطن میں رہا

پروین شاکر

باطن کی چمک سانولے پن میں بھی وہی ہے

جنوری 15, 2012عرفان صدیقی،غزلوطن،کرن،پن،بن،تن،ختن،سخنadmin

عرفان صدیقی ۔ غزل نمبر 347

احوال ترا شامِ بدن میں بھی وہی ہے

باطن کی چمک سانولے پن میں بھی وہی ہے

وحشت کے لیے شہر مناسب نہیں ورنہ

آہو تو مری جان ختن میں بھی وہی ہے

آباد نہیں اس سے فقط وصل کی بستی

وہ پھول ہے اور ہجر کے بن میں بھی وہی ہے

اک موج سے شاداب ہیں یہ دونوں کنارے

جو ہے مرے من میں ترے تن میں بھی وہی ہے

یہ راز کھلا روزنِ زنداں کی بدولت

سورج میں ہے جو بات کرن میں بھی وہی ہے

مٹّی ہی میں ملنا ہے تو اس شہر سے کیوں جائیں

مٹّی تو میاں ارضِ وطن میں بھی وہی ہے

تنہا ہوں سو اے میرے حریفو مری پہچان

رن میں بھی وہی بزمِ سخن میں بھی وہی ہے

عرفان صدیقی

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: کرن

روزن سے میرے آتی کوئی بھی کرن نہیں

ہمارے بانکپن کا تذکرہ ہے

ندائے وقت ہے دار و رَسن پَہ پابندی

سخن کدہ مری طرزِ سخن کو ترسے گا

تیری گلی گلی کی خیر اے مرے دل رُبا وطن

گل کیا غبارِ بوئے سمن کو ترس گئے

کہاں کھپائیں گے اب جان فکر و فن میں لوگ

جیسے ہربات میں ہو تیرے بدن کی خوشبو

پُھول آنگن میں کِھلے ہیں نہ چمن میں اب کے

بارش کی ہَوا میں بن سمیٹے

رات بھر جاگی ہوئی جیسے دُلہن کی خوشبو

وہ رنگ رنگ میں اُترا، کرن کرن میں رہا

باطن کی چمک سانولے پن میں بھی وہی ہے

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: