ٹیگ کے محفوظات: کرامت

بَونے بانس لگا کر صاحبِ قامت ٹھہرے

اگست 31, 2017ماجد صدیقی،اَکھیاں بیچ الاؤ،غزلقیامت،قامت،کرامت،امامت،سلامت،شامتadmin

ماجد صدیقی ۔ غزل نمبر 49

چہرۂ سرو قداں پر داغِ ندامت ٹھہرے

بَونے بانس لگا کر صاحبِ قامت ٹھہرے

اُس کے لیے جو خود شامت ہے بستی بھر کی

جانے کونسی ساعت، ساعتِ شامت ٹھہرے

جس کے طلوع پہ خود سورج بھی شرمندہ ہے

اور وہ کون سا دن ہو گا جو قیامت ٹھہرے

اہلِ نشیمن کو آندھی سے طلب ہے بس اتنی

پیڑ اکھڑ جائے پر شاخ سلامت ٹھہرے

کون یزید کی بیعت سے منہ پھیر دکھائے

کون حسین ہو، دائم جس کی امامت ٹھہرے

خائف ہیں فرعون عصائے قلم سے تیرے

اور بھلا ماجد کیا تیری کرامت ٹھہرے

ماجد صدیقی

ضبط آنکھوں کی مرّوت ہو گئی

اکتوبر 25, 2015اساتذہ،داغ دہلوی،غزلقناعت،قیامت،قسمت،محبت،مدت،مرّوت،نیت،نصیحت،وحشت،کرامت،بدولت،حاجت،خدمت،سےمحبت،صورت،غفلتadmin

داغ دہلوی ۔ غزل نمبر 42

حسن کی تم پر حکومت ہو گئی

ضبط آنکھوں کی مرّوت ہو گئی

یہ نہ پوچھو کیوں یہ حالت ہو گئی

خود بدولت کی بدولت ہو گئی

لے گئے آنکھوں ہی آنکھوں میں وہ دل

ہوشیاری اپنی غفلت ہو گئی

وہ جو تجھ سے دوستی کرنے لگا

مجھ کو دشمن سےمحبت ہو گئی

اس قدر بھی سادگی اچھی نہیں

عاشقوں کی پاک نیت ہو گئی

مان کر دل کا کہا پچھتائے ہم

عمر بھر کو اب نصیحت ہو گئی

کیا عجب ہے گر ترا ثانی نہیں

اچھی صورت ایک صورت ہو گئی

غیر بھی روتے ہیں تیرے عشق میں

کیا مری قسمت کی قسمت ہو گئی

اس کی مژگاں پر ہوا قربان دل

تیر تکّوں پر قناعت ہو گئی

جب ریاست اپنی آبائی مٹی

نوکری کی ہم کو حاجت ہو گئی

شاعروں کی بھی طبیعت ہے ولی

جو نئی سوجھی کرامت ہو گئی

تیری زلفوں کا اثر تجھ پر نہیں

دیکھتے ہی مجھ کو وحشت ہو گئی

کھیل سمجھے تھے لڑکپن کو تیرے

بیٹھتے اٹھتے قیامت ہو گئی

مفت پیتے ہیں وہ ہر قسم کی

جن کو مے خانے کی خدمت ہو گئی

میرے دل سے غم ترا کیوں‌دور ہو

پاس رہنے کی محبت ہو گئی

کہتے ہیں کب تک کوئی گھبرا نہ جائے

دل میں رہتے رہتے مدت ہو گئی

نقشہ بگڑا رہتے رہتے غصّہ ناک

کٹ کھنی قاتل کی صورت ہو گئی

داغ کا دم ہے غنیمت بزم میں

دو گھڑی کو گرم محبت ہو گئی

داغ دہلوی

جس سے پیار رکھے ہے کچھ یہ اس کے سر پر شامت ہے

اکتوبر 6, 2015میر تقی میر،اساتذہ،غزلقامت،ملامت،ندامت،کرامت،سلامت،شامتadmin

دیوان پنجم غزل 1776

عشق بلاانگیز مفتن یہ تو کوئی قیامت ہے

جس سے پیار رکھے ہے کچھ یہ اس کے سر پر شامت ہے

موسم گل میں توبہ کی تھی واعظ کے میں کہنے سے

اب جو رنگ بہار کے دیکھے شرمندہ ہیں ندامت ہے

شیخ کی ادنیٰ حرکت بھی میں خرق عادت جانوں ہوں

مسجد سے میخانے آیا یہ بھی اس کی کرامت ہے

ایک طرف میں عشق کیا تھا رسوائی یہ کہاں سے ہوئی

اب جو گھر سے نکل آتا ہوں چاروں طرف سے ملامت ہے

تو ہی کر انصاف صبا ٹک باغوں باغوں پھرے ہے تو

روے گل اس کا ساروہے سرو کا ایسا قامت ہے

صبح کو خورشید اس کے گھر پر طالع ہوکر آتا ہے

دیکھ لیا جو ان نے کبھو تو اس سادہ کی شامت ہے

چھوڑو اس اوباش کا ملنا ورنہ سر کٹوائوگے

چاہ رہو گے بہتیروں کو سر جو میر سلامت ہے

میر تقی میر

نگاہ چشم ادھر تونے کی قیامت کی

اکتوبر 6, 2015میر تقی میر،اساتذہ،غزلقیامت،محبت،مدت،کرامت،الفت،اشارت،طاعتadmin

دیوان اول غزل 443

خبر نہ تھی تجھے کیا میرے دل کی طاقت کی

نگاہ چشم ادھر تونے کی قیامت کی

انھوں میں جوکہ ترے محو سجدہ رہتے ہیں

نہیں ہے قدر ہزاروں برس کی طاعت کی

اٹھائی ننگ سمجھ تم نے بات کے کہتے

وفا و مہر جو تھی رسم ایک مدت کی

رکھیں امید رہائی اسیر کاکل و زلف

مری تو باتیں ہیں زنجیر صرف الفت کی

رہے ہے کوئی خرابات چھوڑ مسجد میں

ہوا منائی اگر شیخ نے کرامت کی

سوال میں نے جو انجام زندگی سے کیا

قد خمیدہ نے سوے زمیں اشارت کی

نہ میری قدر کی اس سنگ دل نے میر کبھو

ہزار حیف کہ پتھر سے میں محبت کی

میر تقی میر

لکھنؤ میں بھی بتوں کا قد و قامت ہے وہی

جنوری 10, 2012عرفان صدیقی،غزلقیامت،قامت،ملامت،ندامت،کرامت،سلامتadmin

عرفان صدیقی ۔ غزل نمبر 236

ہر جگہ فتنۂ محشر کی علامت ہے وہی

لکھنؤ میں بھی بتوں کا قد و قامت ہے وہی

بات کرنے لگے سناٹے تو معلوم ہُوا

اَب بھی خاموش زَبانوں میں کرامت ہے وہی

کون ہم خانہ خرابوں کو کرے گا برباد

جو اِس آشوب میں غارت ہے سلامت ہے وہی

آستیں پر کوئی دھبّہ تو نہیں ہے، لیکن

اُس کی آنکھوں میں بہرحال ندامت ہے وہی

کم سے کم ایک رَوایت تو اَبھی زِندہ ہے

سر وہی ہوں کہ نہ ہوں، سنگِ ملامت ہے وہی

موجِ خوں ہو کہ ترے شہر کی دِلدار ہَوا

یار، جو سر سے گزر جائے قیامت ہے وہی

عرفان صدیقی

اُس جیسی ایک اور قیامت دکھائی دی

دسمبر 1, 2007منصور آفاق،شعراء،غزلقیامت،قامت،قدامت،ندامت،کرامت،سلامت،علامتadmin

منصور آفاق ۔ غزل نمبر 452

آب رواں میں پھر نئی شامت دکھائی دی

اُس جیسی ایک اور قیامت دکھائی دی

اس کے خیال بھی تھے پرانے ، بہت قدیم

اس کے لباس میں بھی قدامت دکھائی دی

تقریبِ گل میں سرو کئی آئے تھے مگر

ہر سمت تیری رونقء قامت دکھائی دی

پہلے بدن کا معجزہ دیکھا نگاہ نے

پھر گفتگو میں ایک کرامت دکھائی دی

میں نے بھلا دیں ساری گذشتہ کی تلخیاں

تھوڑی سی اُس نظر میں ندامت دکھائی دی

جاری ہے ٹوٹ پھوٹ وجود و شہود میں

کوئی کہیں بھی شے نہ سلامت دکھائی دی

منصور چپ کھڑی تھی کہیں شام کی کرن

چھیڑا توزندگی کی علامت دکھائی دی

منصور آفاق

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: کرامت

بَونے بانس لگا کر صاحبِ قامت ٹھہرے

ضبط آنکھوں کی مرّوت ہو گئی

جس سے پیار رکھے ہے کچھ یہ اس کے سر پر شامت ہے

نگاہ چشم ادھر تونے کی قیامت کی

لکھنؤ میں بھی بتوں کا قد و قامت ہے وہی

اُس جیسی ایک اور قیامت دکھائی دی

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: