ٹیگ کے محفوظات: کان

میں بھی کس امتحان سے نکلا

مئی 31, 2021کلیاتِ شکیب جلالی ۔ غزلیں،شکیب جلالی،غزلمہربان،مکان،کان،گلستان،آسمان،امتحان،خاکدان،درمیانadmin

آگ کے درمیان سے نکلا

میں بھی کس امتحان سے نکلا

پھر ہوا سے سلگ اٹھے پتے

پھر دھواں گلستان سے نکلا

جب بھی نکلا ستارہِ امید

کہر کے درمیان سے نکلا

چاندنی جھانکتی ہے گلیوں میں

کوئی سایہ مکان سے نکلا

ایک شعلہ پھر ایک دھوئیں کی لکیر

اور کیا خاکدان سے نکلا

چاند جس آسمان میں ڈوبا

کب اسی آسمان سے نکلا

یہ گہر جس کو آفتاب کہیں

کس اندھیرے کی کان سے نکلا

شکر ہے اس نے بے وفائی کی

میں کڑے امتحان سے نکلا

لوگ دشمن ہوئے اسی کے شکیبؔ

کام جس مہربان سے نکلا

شکیب جلالی

آنکھ رکھتا ہے تو پہچان مجھے

اگست 4, 2018ناصر کاظمی،برگِ نے،غزلکان،پہچان،پریشان،بیابان،دھیانadmin

قہر سے دیکھ نہ ہر آن مجھے

آنکھ رکھتا ہے تو پہچان مجھے

یک بیک آ کے دکھا دو جھمکی

کیوں پھراتے ہو پریشان مجھے

ایک سے ایک نئی منزل میں

لیے پھرتا ہے ترا دھیان مجھے

سن کے آوازۂ گل کچھ نہ سنا

بس اُسی دن سے ہوے کان مجھے

جی ٹھکانے نہیں جب سے ناصر

شہر لگتا ہے بیابان مجھے

ناصر کاظمی

میں پتھر کے پان بنانے والا تھا

جون 8, 2018افتخار فلک،اذیت،غزلنان،ناران،یونان،کان،پان،پاکستان،تان،سلطان،شیطانadmin

ہر مشکل آسان بنانے والا تھا

میں پتھر کے پان بنانے والا تھا

خوابوں کی تاویل سمجھ سے باہر تھی

جب میں پاکستان بنانے والا تھا

میری موت نے رستہ روکا ورنہ میں

لیّہ کو یونان بنانے والا تھا

حق باہو، حق باہو کہہ کر ایک فقیر

باہو کو سلطان بنانے والا تھا

مجھ ایسا بہلول کہاں سے لاؤ گے

نار سے جو ناران بنانے والا تھا

شہزادی نے جس کی خاطر زہر پیا

اک دیہاتی، نان بنانے والا تھا

آپ نے میرا ہاتھ نہ تھاما ہوتا تو

میں خود کو شیطان بنانے والا تھا

دروازوں کی شاکھ بچانے کی خاطر

دیواروں کے کان بنانے والا تھا

آپ کی اک اک بات غزل میں ڈھال کے میں

آن کی آن میں تان بنانے والا تھا

افتخار فلک

خالی ہوا جہاں جو گئے ہم جہان سے

اکتوبر 7, 2015میر تقی میر،اساتذہ،غزلمہربان،مکان،کان،گمان،امتحان،آسمان،جہان،زبان،شانadmin

دیوان ششم غزل 1890

لے عشق میں گئے دل پر اپنی جان سے

خالی ہوا جہاں جو گئے ہم جہان سے

دل میں مسودے تھے بہت پر حضور یار

نکلا نہ ایک حرف بھی میری زبان سے

ٹک دل سے آئو آنکھوں میں ہے دید کی جگہ

بہتر نہیں مکان کوئی اس مکان سے

اول زمینیوں میں ہو مائل مری طرف

جو حادثہ نزول کرے آسمان سے

یہ وہم ہے کہ آنکھیں مری لگ گئیں کہیں

تم مار ڈالیو نہ مجھے اس گمان سے

کھل جائیں گی تب آنکھیں جو مرجاوے گا کوئی

تم باز نئیں ہو آتے مرے امتحان سے

نامہربانی نے تو تمھاری کیا ہلاک

اب لگ چلیں گے اور کسی مہربان سے

زنبورخانہ چھاتی غم دوری سے ہوئی

وے ہم تلک نہ آئے کبھو کسر شان سے

تاثیر کیا کرے سخن میر یار میں

جب دیکھو لگ رہا ہے کوئی اس کے کان سے

میر تقی میر

مطلق نہیں ہے بند ہماری زبان میں

اکتوبر 7, 2015میر تقی میر،اساتذہ،غزلکمان،کان،آن،آسمان،جہان،جان،دھیان،زبان،شانadmin

دیوان ششم غزل 1850

اسرار دل کے کہتے ہیں پیر و جوان میں

مطلق نہیں ہے بند ہماری زبان میں

رنگینی زمانہ سے خاطر نہ جمع رکھ

سو رنگ بدلے جاتے ہیں یاں ایک آن میں

شاید بہار آئی ہے دیوانہ ہے جوان

زنجیر کی سی آتی ہے جھنکار کان میں

بے وقفہ اس ضعیف پہ جور و ستم نہ کر

طاقت تعب کی کم ہے بہت میری جان میں

اس کے لبوں کے آگے کنھوں نے نہ بات کی

آئی ہے کسر شہد مصفا کی شان میں

چہرہ ہی یار کا رہے ہے چت چڑھا سدا

خورشید و ماہ آتے ہیں کب میرے دھیان میں

اب میرے اس کے عہد میں شاید کہ اٹھ گئی

آگے جو رسم دوستی کی تھی جہان میں

تارے تو یہ نہیں مری آہوں سے رات کی

سوراخ پڑگئے ہیں تمام آسمان میں

ابرو کی طرح اس کی چڑھی ہی رہے ہے میر

نکلی ہے شاخ تازہ کوئی کیا کمان میں

میر تقی میر

کیا عاشق ہونے کا نتیجہ یہ ہوتا ہے جہان کے بیچ

اکتوبر 6, 2015میر تقی میر،اساتذہ،غزلمیدان،کان،انسان،ایران،آن،جہان،حیرانadmin

دیوان پنجم غزل 1593

آج ہمیں بدحالی سی ہے حال نہیں ہے جان کے بیچ

کیا عاشق ہونے کا نتیجہ یہ ہوتا ہے جہان کے بیچ

پایہ اس کی شہادت کا ہے عرش عظیم سے بالاتر

جو مظلوم عشق موا ہے بڑھ کر ٹک میدان کے بیچ

یوں ہی نظر چڑھ رہتی نہیں کچھ حسرت میں تو چشم سفید

دیکھی ہے ہیرے کی دمک میں اس چشم حیران کے بیچ

وہ پرکالہ آتش کا ہے صبح تلک بھڑکا بھی نہ تھا

کیا جانوں کیا پھونک دیا لوگوں نے اس کے کان کے بیچ

وعدے کرو ہو برسوں کے تم دم کا بھروسا ہم کو نہیں

کچھ کا کچھ ہوجاتا ہے یاں اک پل میں اک آن کے بیچ

تبعیّت سے جو فارسی کی میں نے ہندی شعر کہے

سارے ترک بچے ظالم اب پڑھتے ہیں ایران کے بیچ

بندے خداے پاک کے ہم جو میر نہیں تو زیر فلک

پھر یہ تقدس آیا کہاں سے مشت خاک انسان کے بیچ

میر تقی میر

لاگ جی کی جس سے ہو دشمن ہے اپنی جان کا

اکتوبر 6, 2015میر تقی میر،اساتذہ،غزلمیدان،نادان،یرقان،کان،پان،آن،احسان،جان،دیوانadmin

دیوان پنجم غزل 1543

عشق ہو حیوان کا یا انس ہو انسان کا

لاگ جی کی جس سے ہو دشمن ہے اپنی جان کا

عاشق و معشوق کی میں طرفہ صحبت سیر کی

ایک جی مارے ہے مرہون ایک ہے احسان کا

میں خردگم عشق میں اس لڑکے کے آخر ہوا

یہ ثمر لایا نہ دیکھا چاہنا نادان کا

مرنا اس کے عشق میں خالی نہیں ہے حسن سے

رشک کے قابل ہے جو کشتہ ہے اس میدان کا

گر پڑیں گے ٹوٹ کر اکثر ستارے چرخ سے

ہل گیا جو صبح کو گوہر کسی کے کان کا

ہر ورق ہر صفحے میں اک شعرشورانگیز ہے

عرصۂ محشر ہے عرصہ میرے بھی دیوان کا

کیا ملاوے آنکھ نرگس اس کی چشم سرخ سے

زرد اس غم دیدہ کو آزار ہے یرقان کا

بات کرتے جائے ہے منھ تک مخاطب کے جھلک

اس کا لعل لب نہیں محتاج رنگ پان کا

کیا کہوں سارا زمانہ کشتہ و مردہ ہے میر

اس کے اک انداز کا اک ناز کا اک آن کا

میر تقی میر

اب کہتے ہیں خلطہ کیسا جان نہیں پہچان نہیں

اکتوبر 6, 2015میر تقی میر،اساتذہ،غزلمیدان،نادان،کان،پہچان،آسان،احسان،ارمان،جان،دھیانadmin

دیوان چہارم غزل 1462

عالم علم میں ایک تھے ہم وے حیف ہے ان کو گیان نہیں

اب کہتے ہیں خلطہ کیسا جان نہیں پہچان نہیں

کس امید پہ ساکن ہووے کوئی غریب شہر اس کا

لطف نہیں اکرام نہیں انعام نہیں احسان نہیں

ہائے لطافت جسم کی اس کے مر ہی گیا ہوں پوچھو مت

جب سے تن نازک وہ دیکھا تب سے مجھ میں جان نہیں

کیا باتوں سے تسلی ہو دل مشکل عشقی میری سب

یار سے کہنے کہتے ہیں پر کہنا کچھ آسان نہیں

شام و سحر ہم سرزدہ دامن سر بگریباں رہتے ہیں

ہم کو خیال ادھر ہی کاہے ان کو ادھر کا دھیان نہیں

جان کے میں تو آپ بنا ہوں ان لڑکوں میں دیوانہ

عقل سے بھی بہرہ ہے مجھ کو اتنا میں نادان نہیں

پائوں کو دامن محشر میں ناچاری سے ہم کھینچیں گے

لائق اپنی وحشت کے اس عرصے کا میدان نہیں

چاہت میں اس مایۂ جاں کی مرنے کے شائستہ ہوئے

جا بھی چکی ہے دل کی ہوس اب جینے کا ارمان نہیں

شور نہیں یاں سنتا کوئی میر قفس کے اسیروں کا

گوش نہیں دیوار چمن کے گل کے شاید کان نہیں

میر تقی میر

مگر آئے تھے میہمان سے لوگ

اکتوبر 6, 2015میر تقی میر،اساتذہ،غزلمیہمان،نشان،کمان،کان،کاروان،پان،آسمان،زبانadmin

دیوان چہارم غزل 1423

کیا چلے جاتے ہیں جہان سے لوگ

مگر آئے تھے میہمان سے لوگ

قہر ہے بات بات پر گالی

جاں بہ لب ہیں تری زبان سے لوگ

شہر میں گھر خراب ہے اپنا

آتے ہیں یاں اب اس نشان سے لوگ

ایک گردش میں ہیں برابر خاک

کیا جھگڑتے ہیں آسمان سے لوگ

درد دل ان نے کب سنا میرا

لگے رہتے ہیں اس کے کان سے لوگ

بائو سے بھی لچک لہک ہے انھیں

ہیں یہی سبزے دھان پان سے لوگ

شوق میں تیر سے چلے اودھر

ہم خمیدہ قداں کمان سے لوگ

آدمی اب نہیں جہاں میں میر

اٹھ گئے اس بھی کاروان سے لوگ

میر تقی میر

اطفال شہر لائے ہیں آفت جہان پر

اکتوبر 6, 2015میر تقی میر،اساتذہ،غزلنشان،کمان،کان،گمان،آن،آسمان،جہان،جوان،زبان،سانadmin

دیوان دوم غزل 806

کیا کیا نہ لوگ کھیلتے جاتے ہیں جان پر

اطفال شہر لائے ہیں آفت جہان پر

کچھ ان دنوں اشارئہ ابرو ہیں تیزتیز

کیا تم نے پھر رکھی ہے یہ تلوار سان پر

تھوڑے میں دور کھینچے ہے کیا آدم آپ کو

اس مشت خاک کا ہے دماغ آسمان پر

کس پر تھے بے دماغ کہ ابرو بہت ہے خم

کچھ زور سا پڑا ہے کہیں اس کمان پر

کس رنگ راہ پاے نگاریں سے تو چلا

ہونے لگے ہیں خون قدم کے نشان پر

چرچا سا کر دیا ہے مرے شور عشق نے

مذکور اب بھی ہے یہ ہر اک کی زبان پر

پی پی کے اپنا لوہو رہیں گوکہ ہم ضعیف

جوں رینگتی نہیں ہے انھوں کے تو کان پر

یہ وہم ہے کہ اور کا ہے میرے تیں خیال

تو مار ڈالیو نہ مجھے اس گمان پر

کیفیتیں ہزار ہیں اس کام جاں کے بیچ

دیتے ہیں لوگ جان تو ایک ایک آن پر

دامن میں آج میر کے داغ شراب ہے

تھا اعتماد ہم کو بہت اس جوان پر

میر تقی میر

صبح کی بائو نے کیا پھونک دیا کان کے بیچ

اکتوبر 6, 2015میر تقی میر،اساتذہ،غزلمسلمان،کان،پان،انسان،ایمان،بیابان،جان،حیران،دیوان،دربانadmin

دیوان دوم غزل 788

آگ سا تو جو ہوا اے گل تر آن کے بیچ

صبح کی بائو نے کیا پھونک دیا کان کے بیچ

ہم نہ کہتے تھے کہیں زلف کہیں رخ نہ دکھا

اک خلاف آیا نہ ہندو و مسلمان کے بیچ

باوجود ملکیت نہ ملک میں پایا

وہ تقدس کہ جو ہے حضرت انسان کے بیچ

پاسباں سے ترے کیا دور جو ہو ساز رقیب

ہے نہ اک طرح کی نسبت سگ و دربان کے بیچ

جیسی عزت مری دیواں میں امیروں کے ہوئی

ویسی ہی ان کی بھی ہو گی مرے دیوان کے بیچ

ساتھ ہے اس سر عریاں کے یہ وحشت کرنا

پگڑی الجھی ہے مری اب تو بیابان کے بیچ

وے پھری پلکیں اگر کھب گئیں جی میں تو وہیں

رخنے پڑ جائیں گے واعظ ترے ایمان کے بیچ

کیا کہوں خوبی خط دیکھ ہوئی بند آواز

سرمہ گویا کہ دیا ان نے مجھے پان کے بیچ

گھر میں آئینے کے کب تک تمھیں نازاں دیکھوں

کبھو تو آئو مرے دیدئہ حیران کے بیچ

میرزائی کا کب اے میر چلا عشق میں کام

کچھ تعب کھینچنے کو تاب تو ہو جان کے بیچ

میر تقی میر

کتنے اک اشک ہوئے جمع کہ طوفان ہوئے

اکتوبر 6, 2015میر تقی میر،اساتذہ،غزلمہمان،ویران،کان،پریشان،پشیمان،جان،حیران،طوفانadmin

دیوان اول غزل 506

جوش دل آئے بہم دیدئہ گریان ہوئے

کتنے اک اشک ہوئے جمع کہ طوفان ہوئے

کیا چھپیں شہر محبت میں ترے خانہ خراب

گھر کے گھر ان کے ہیں اس بستی میں ویران ہوئے

کس نے لی رخصت پرواز پس از مرگ نسیم

مشت پر باغ میں آتے ہی پریشان ہوئے

سبزہ و لالہ و گل ابر و ہوا ہے مے دے

ساقی ہم توبہ کے کرنے سے پشیمان ہوئے

دیکھتے پھرتے ہیں منھ سب کا سحر آئینے

جلوہ گر ہو کہ یہ تجھ بن بہت حیران ہوئے

دعوی خوش دہنی گرچہ اسے تھا لیکن

دیکھ کر منھ کو ترے گل کے تئیں کان ہوئے

جام خوں بن نہیں ملتا ہے ہمیں صبح کو آب

جب سے اس چرخ سیہ کاسہ کے مہمان ہوئے

اپنے جی ہی نے نہ چاہا کہ پئیں آب حیات

یوں تو ہم میر اسی چشمے پہ بے جان ہوئے

میر تقی میر

بڑی کلول ٹلی ہے جان پر سے

اکتوبر 6, 2015میر تقی میر،اساتذہ،غزلقرآن،کان،انسان،جانadmin

دیوان اول غزل 502

ہمیں غش آگیا تھا وہ بدن دیکھ

بڑی کلول ٹلی ہے جان پر سے

لیا دل اس مخطط رو نے میرا

اٹھالوں میں اسے قرآن پر سے

کہاں ہیں آدمی عالم میں پیدا

خدائی صدقے کی انسان پر سے

تفنگ اس کی چلی آواز پر لیک

گئی ہے میر گولی کان پر سے

میر تقی میر

آرزوے جہان ہوتے ہیں

اکتوبر 6, 2015میر تقی میر،اساتذہ،غزلمیہمان،کان،گلستان،آن،آسمان،بدزبان،جہان،جوانadmin

دیوان اول غزل 336

خوبرو سب کی جان ہوتے ہیں

آرزوے جہان ہوتے ہیں

گوش دیوار تک تو جا نالے

اس میں گل کو بھی کان ہوتے ہیں

کبھو آتے ہیں آپ میں تجھ بن

گھر میں ہم میہمان ہوتے ہیں

دشت کے پھوٹے مقبروں پہ نہ جا

روضے سب گلستان ہوتے ہیں

حرف تلخ ان کے کیا کہوں میں غرض

خوبرو بدزبان ہوتے ہیں

غمزئہ چشم خوش قدان زمیں

فتنۂ آسمان ہوتے ہیں

کیا رہا ہے مشاعرے میں اب

لوگ کچھ جمع آن ہوتے ہیں

میر و مرزا رفیع و خواجہ میر

کتنے اک یہ جوان ہوتے ہیں

میر تقی میر

یہ وہ نہیں متاع کہ ہو ہر دکان میں

اکتوبر 6, 2015میر تقی میر،اساتذہ،غزلمکان،کان،امتحان،آن،آسمان،استخوان،جہان،جان،دکان،زبانadmin

دیوان اول غزل 300

نکلے ہے جنس حسن کسی کاروان میں

یہ وہ نہیں متاع کہ ہو ہر دکان میں

جاتا ہے اک ہجوم غم عشق جی کے ساتھ

ہنگامہ لے چلے ہیں ہم اس بھی جہان میں

یارب کوئی تو واسطہ سرگشتگی کا ہے

یک عشق بھر رہا ہے تمام آسمان میں

ہم اس سے آہ سوز دل اپنا نہ کہہ سکے

تھے آتش دروں سے پھپھولے زبان میں

غم کھینچنے کو کچھ تو توانائی چاہیے

سویاں نہ دل میں تاب نہ طاقت ہے جان میں

غافل نہ رہیو ہم سے کہ ہم وے نہیں رہے

ہوتا ہے اب تو حال عجب ایک آن میں

وے دن گئے کہ آتش غم دل میں تھی نہاں

سوزش رہے ہے اب تو ہر اک استخوان میں

دل نذر و دیدہ پیش کش اے باعث حیات

سچ کہہ کہ جی لگے ہے ترا کس مکان میں

کھینچا نہ کر تو تیغ کہ اک دن نہیں ہیں ہم

ظالم قباحتیں ہیں بہت امتحان میں

پھاڑا ہزار جا سے گریبان صبر میر

کیا کہہ گئی نسیم سحر گل کے کان میں

میر تقی میر

بھیج دے کیوں نہ زلیخا اسے کنعان کے بیچ

اکتوبر 6, 2015میر تقی میر،اساتذہ،غزلمژگان،کنعان،کان،گریان،گریبان،پان،آن،جان،شانadmin

دیوان اول غزل 191

فائدہ مصر میں یوسفؑ رہے زندان کے بیچ

بھیج دے کیوں نہ زلیخا اسے کنعان کے بیچ

تو نہ تھا مردن دشوار میں عاشق کے آہ

حسرتیں کتنی گرہ تھیں رمق اک جان کے بیچ

چشم بد دور کہ کچھ رنگ ہے اب گریہ پر

خون جھمکے ہے پڑا دیدئہ گریان کے بیچ

حال گلزار زمانہ کا ہے جیسے کہ شفق

رنگ کچھ اور ہی ہوجائے ہے اک آن کے بیچ

تاک کی چھائوں میں جوں مست پڑے سوتے ہوں

اینڈتی ہیں نگہیں سایۂ مژگان کے بیچ

جی لیا بوسۂ رخسار مخطط دے کر

عاقبت ان نے ہمیں زہر دیا پان کے بیچ

دعوی خوش دہنی اس سے اسی منھ پر گل

سر تو ٹک ڈال کے دیکھ اپنے گریبان کے بیچ

کرتے ململ کے پہن آتے تو ہو رندوں میں

شیخ صاحب نہ کہیں جفتے پڑیں شان کے بیچ

کان رکھ رکھ کے بہت درد دل میر کو تم

سنتے تو ہو پہ کہیں درد نہ ہو کان کے بیچ

میر تقی میر

ناچار عاشقوں کو رخصت کے پان دے گا

اکتوبر 6, 2015میر تقی میر،اساتذہ،غزلمکان،چھان،نشان،کان،پان،امان،جوان،دان،درمیانadmin

دیوان اول غزل 111

خط منھ پہ آئے جاناں خوبی پہ جان دے گا

ناچار عاشقوں کو رخصت کے پان دے گا

سارے رئیس اعضا ہیں معرض تلف میں

یہ عشق بے محابا کس کو امان دے گا

پاے پر آبلہ سے میں گم شدہ گیا ہوں

ہر خار بادیے کا میرا نشان دے گا

داغ اور سینے میں کچھ بگڑی ہے عشق دیکھیں

دل کو جگر کو کس کو اب درمیان دے گا

نالہ ہمارا ہر شب گذرے ہے آسماں سے

فریاد پر ہماری کس دن تو کان دے گا

مت رغم سے ہمارے پیارے حنا لگائو

پابوس پر تمھارے سر سو جوان دے گا

ہوجو نشانہ اس کا اے بوالہوس سمجھ کر

تیروں کے مارے سارے سینے کو چھان دے گا

اس برہمن پسر کے قشقے پہ مرتے ہیں ہم

ٹک دے گا رو تو گویا جی ہم کو دان دے گا

گھر چشم کا ڈبو مت دل کے گئے پہ رو رو

کیا میر ہاتھ سے تو یہ بھی مکان دے گا

میر تقی میر

جگر مرغ جان سے نکلا

اکتوبر 6, 2015میر تقی میر،اساتذہ،غزلمکان،کان،امتحان،آسمان،جہان،جوان،جان،زبان،شانadmin

دیوان اول غزل 38

تیر جو اس کمان سے نکلا

جگر مرغ جان سے نکلا

نکلی تھی تیغ بے دریغ اس کی

میں ہی اک امتحان سے نکلا

گو کٹے سر کہ سوز دل جوں شمع

اب تو میری زبان سے نکلا

آگے اے نالہ ہے خدا کا ناؤں

بس تو نُہ آسمان سے نکلا

چشم و دل سے جو نکلا ہجراں میں

نہ کبھو بحر و کان سے نکلا

مر گیا جو اسیر قید حیات

تنگناے جہان سے نکلا

دل سے مت جا کہ حیف اس کا وقت

جو کوئی اس مکان سے نکلا

اس کی شیریں لبی کی حسرت میں

شہد پانی ہو شان سے نکلا

نامرادی کی رسم میر سے ہے

طور یہ اس جوان سے نکلا

میر تقی میر

باقی رہے نہ قرضِ خموشی زبان پر

نومبر 15, 2013آفتاب اقبال شمیملگان،کان،گمان،جان،زبانadmin

آفتاب اقبال شمیم ۔ غزل نمبر 26

ایسے طلوع قطرہ خون کنج لب سے ہو

باقی رہے نہ قرضِ خموشی زبان پر

کیوں خود پہ رحم کھا کے کہیں اُنگلیوں سے تم

آسودگی کی گرہیں لگاتے ہو جان پر

اے شاہِ صوت! مژدۂ فردا نما سنا

خوش فہمیوں کی آیتیں نازل ہوں کان پر

ہر دم زمینِ عمر سے بے دخلیوں کا خوف

جیسے یہ کشتِ جبر ملی ہو لگان پر

کیا جانئے کہ علم کے کس مرحلے میں ہوں

کیوں جھوٹ کو فروغ دوں سچ کے گمان پر

آفتاب اقبال شمیم

یہ بغیر تاروں کے بلب آن کیسے ہیں

دسمبر 1, 2007منصور آفاق،شعراء،غزلمکان،نشان،کان،گمان،آن،آسمان،خان،زبان،سائبان،ساربانadmin

منصور آفاق ۔ غزل نمبر 390

تیرا چہرہ کیسا ہے میرے دھیان کیسے ہیں

یہ بغیر تاروں کے بلب آن کیسے ہیں

خواب میں اسے ملنے کھیت میں گئے تھے ہم

کارپٹ پہ جوتوں کے یہ نشان کیسے ہیں

بولتی نہیں ہے جو وہ زبان کیسی ہے

یہ جو سنتے رہتے ہیں میرے کان کیسے ہیں

روکتے ہیں دنیا کو میری بات سننے سے

لوگ میرے بارے میں بد گمان کیسے ہیں

کیا ابھی نکلتا ہے ماہ تاب گلیوں میں

کچھ کہو میانوالی آسمان کیسے ہیں

کیا ابھی محبت کے گیت ریت گاتی ہے

تھل کی سسی کیسی ہے پنوں خان کیسے ہیں

کیا قطار اونٹوں کی چل رہی ہے صحرا میں

گھنٹیاں سی بجتی ہیں ، ساربان کیسے ہیں

چمنیوں کے ہونٹوں سے کیا دھواں نکلتا ہے

خالی خالی برسوں کے وہ مکان کیسے ہیں

دیکھتا تھا رم جھم سی بیٹھ کر جہاں تنہا

لان میں وہ رنگوں کے سائبان کیسے ہیں

اب بھی وہ پرندوں کو کیا ڈراتے ہیں منصور

کھیت کھیت لکڑی کے بے زبان کیسے ہیں

منصور آفاق

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: کان

میں بھی کس امتحان سے نکلا

آنکھ رکھتا ہے تو پہچان مجھے

میں پتھر کے پان بنانے والا تھا

خالی ہوا جہاں جو گئے ہم جہان سے

مطلق نہیں ہے بند ہماری زبان میں

کیا عاشق ہونے کا نتیجہ یہ ہوتا ہے جہان کے بیچ

لاگ جی کی جس سے ہو دشمن ہے اپنی جان کا

اب کہتے ہیں خلطہ کیسا جان نہیں پہچان نہیں

مگر آئے تھے میہمان سے لوگ

اطفال شہر لائے ہیں آفت جہان پر

صبح کی بائو نے کیا پھونک دیا کان کے بیچ

کتنے اک اشک ہوئے جمع کہ طوفان ہوئے

بڑی کلول ٹلی ہے جان پر سے

آرزوے جہان ہوتے ہیں

یہ وہ نہیں متاع کہ ہو ہر دکان میں

بھیج دے کیوں نہ زلیخا اسے کنعان کے بیچ

ناچار عاشقوں کو رخصت کے پان دے گا

جگر مرغ جان سے نکلا

باقی رہے نہ قرضِ خموشی زبان پر

یہ بغیر تاروں کے بلب آن کیسے ہیں

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: