ٹیگ کے محفوظات: کامل

بھَلا بر وقت کس نے نیّتِ قاتل کو پہچانا

مئی 20, 2021ضامن جعفری،غزلقاتل،کامل،گل،بسمل،ساحلadmin

نہ میں اُس کی نظر سمجھا نہ اُس کے دل کو پہچانا

بھَلا بر وقت کس نے نیّتِ قاتل کو پہچانا

تھی عادت قتل کر نے کی سو اُس نے کر دیا لیکن

نگاہِ واپسیں دیکھی تو پھر بسمل کو پہچانا

تلاشِ عافیت میں کس قدر خوش فہم تھیں موجیں

پٹختی رہ گئیں جب سر، تو پھر ساحل کو پہچانا

سدا انسان خود کو رفعتِ افلاک پر سمجھا

نہ پستی پر نظر ڈالی نہ آب و گِل کو پہچانا

میں ضامنؔ گَردِ مایُوسی میں منزل کھو چُکا ہوتا

غُبارِ راہ نے اِس وحشیِ کامل کو پہچانا

ضامن جعفری

ہمارا کیا ہے بھلا ہم کہاں کے کامل تھے

اگست 4, 2018ناصر کاظمی،دیوانِ ناصر،غزلقابل،قاتل،محفل،کامل،حاصل،شاملadmin

کہاں گئے وہ سخنور جو میرِ محفل تھے

ہمارا کیا ہے بھلا ہم کہاں کے کامل تھے

بھلا ہوا کہ ہمیں یوں بھی کوئی کام نہ تھا

جو ہاتھ ٹوٹ گئے ٹوٹنے کے قابل تھے

حرام ہے جو صراحی کو منہ لگایا ہو

یہ اور بات کہ ہم بھی شریکِ محفل تھے

گزر گئے ہیں جو خوشبوئے رائگاں کی طرح

وہ چند روز مری زِندگی کا حاصل تھے

پڑے ہیں سایہِ گل میں جو سرخرو ہو کر

وہ جاں نثار ہی اے شمع تیرے قاتل تھے

اب اُن سے دُور کا بھی واسطہ نہیں ناصر

وہ ہم نوا جو مرے رتجگوں میں شامل تھے

ناصر کاظمی

قسم کھائی ہوئی توبہ بڑی مشکل سے ٹوٹے گی

اکتوبر 25, 2015قمر جلالوی،شعراء،غزلقاتل،منزل،محمل،مشکل،کامل،ساحلadmin

قمر جلالوی ۔ غزل نمبر 102

غلط ہے شیخ کی ضد ساقی محفل سے ٹوٹے گی

قسم کھائی ہوئی توبہ بڑی مشکل سے ٹوٹے گی

تمھیں رستے میں رہبر چھوڑ دیں گے قافلے والو

اگر ہمت تمھاری دوریِ منزل سے ٹوٹے گی

جو یہ کار نمایاں تو میری سخت جانی کا

بھلا تلوار زورِ بازوئے قاتل سے ٹوٹے گی

نگاہِ قیس ٹکراتی رہے سارباں کب تک

یہ بندش بھی کسی دن پردۂ محمل سے ٹوٹے گی

غرورِ نا خدائی سامنے آ جائے گا اک دن

یہ کشتی یک بہ یک ٹکرا کے جب ساحل سے ٹوٹے گی

قمر اختر شماری کے لئے تیار ہو جاؤ

کہ اب رسمِ محبت اس مہِ کامل سے ٹوٹے گی

قمر جلالوی

کوئی طوفاں ہو گا ناخدا ساحل تو کیا ہو گا

اکتوبر 25, 2015قمر جلالوی،شعراء،غزلقابل،قاتل،کامل،ساحلadmin

قمر جلالوی ۔ غزل نمبر 22

سکوں بہر محبت میں ہمیں حاصل تو کیا ہو گا

کوئی طوفاں ہو گا ناخدا ساحل تو کیا ہو گا

ترے کہنے سے تیرا نام بھی لوں گا محشر میں

مگر مجھ سے اگر پوچھا گیا قاتل تو کیا ہو گا

قفس سے چھوٹ کر صیاد دیکھ آئینگے گلشن بھی

ہمارا آشیاں رہنے کے اب قابل تو کیا ہو گا

سرِ محشر میں اپنے خون سے انکار تو کر دوں

مگر چھینٹے ہوئے تلوار پر قاتل تو کیا ہو گا

قمر کے نام سے شرمانے والے سیر تاروں کی

نکل آیا جو ایسے میں مہِ کامل تو کیا ہو گا

قمر جلالوی

مفت میں مشہور میں لوگوں میں عامل ہو گیا

اکتوبر 25, 2015مصطفٰی خان شیفتہ،اساتذہ،غزلقاتل،مقابل،محفل،کامل،گھائل،بابل،باطل،داخل،سِل،ساحل،شمائل،عاقل،عامل،عادلadmin

مصطفٰی خان شیفتہ ۔ غزل نمبر 36

وہ پری وش عشق کے افسوں سے مائل ہو گیا

مفت میں مشہور میں لوگوں میں عامل ہو گیا

میں نہیں فرہاد، وہ خسرو نہیں، پھر کیا سبب؟

غیر کا مائل جو وہ شیریں شمائل ہو گیا

اشک باری ہم کناری کی ہوس میں رات تھی

قلزمِ گریہ کو اس کا دھیان ساحل ہو گیا

زخم میرے خنجرِ خوں ریز تھے اغیار کو

بے وفائی سے خجل کس وقت قاتل ہو گیا

اہلِ وحشت کو مری شورش سے لازم ہے خطر

میں وہ مجنوں ہوں کہ مجنوں کے مقابل ہو گیا

رشکِ خسرو بے تصرف، نازِ شیریں بے اثر

سینۂ فرہاد مثلِ بے ستوں، سِل ہو گیا

ہے خراشِ ناخنِ غم میں بھی کیا بالیدگی

جو ہلالِ غرہ تھا، سو ماہِ کامل ہو گیا

عید کے دن ذبح کرنا اور بھی اچھا ہوا

حلقۂ اسلام میں وہ شوخ داخل ہو گیا

اس کے اٹھتے ہی یہ ہلچل پڑ گئی بس بزم میں

طورِ روزِ حشر سب کو طورِ محفل ہو گیا

ہوش تو دیکھو کہ سن کر میری وحشت کی خبر

چھوڑ کر دیوانہ پن کو قیس عاقل ہو گیا

ہاتھ اٹھایا اس نے قتلِ بے گنہ سے میرے بعد

طالع اغیار سے جلاد عادل ہو گیا

حسن کے اعجاز نے تیرے مٹایا کفر کو

تیرے آگے نقشِ مانی، نقشِ باطل ہو گیا

میرے مرتے دم جو رویا وہ بڑی تسخیر تھی

آبِ چشمِ یار آبِ چاہِ بابل ہو گیا

ہے عدم میں بھی تلاشِ سرمہ و مشک و نمک

شیفتہ تیغِ نگہ سے کس کی گھائل ہو گیا

مصطفٰی خان شیفتہ

جس دل پہ ناز تھا مجھے وہ دل نہیں رہا

اکتوبر 8, 2015مرزا اسد اللہ خان غالب،اساتذہ،غزلقاتل،محفل،کامل،حائل،حاصل،دل،غافلadmin

دیوانِ غالب ۔ غزل نمبر 104

عرضِ نیازِ عشق کے قابل نہیں رہا

جس دل پہ ناز تھا مجھے وہ دل نہیں رہا

جاتا ہوں داغِ حسرتِ ہستی لیے ہوئے

ہوں شمعِ کشتہ درخورِ محفل نہیں رہا

مرنے کی اے دل اور ہی تدبیر کر کہ میں

شایانِ دست و خنجرِ قاتل نہیں رہا

بر روئے شش جہت درِ آئینہ باز ہے

یاں امتیازِ ناقص و کامل نہیں رہا

وا کر دیے ہیں شوق نے بندِ نقابِ حسن

غیر از نگاہ اب کوئی حائل نہیں رہا

گو میں رہا رہینِ ستم ہاے روزگار

لیکن ترے خیال سے غافل نہیں رہا

دل سے ہوائے کشتِ وفا مٹ گئی کہ واں

حاصل سواے حسرتِ حاصل نہیں رہا

بیدادِ عشق سے نہیں ڈرتا مگر اسدؔ

جس دل پہ ناز تھا مجھے وہ دل نہیں رہا

مرزا اسد اللہ خان غالب

میری خوں ریزی ہی کا مائل ہے

اکتوبر 6, 2015میر تقی میر،اساتذہ،غزلہائل،مائل،کامل،گھائل،اوائل،باطل،جاہل،حاصل،سائل،ساحل،شمائلadmin

دیوان پنجم غزل 1772

سخت بے رحم آہ قاتل ہے

میری خوں ریزی ہی کا مائل ہے

دور مجنوں کا ہو گیا آخر

یاں جنوں کا ابھی اوائل ہے

نکلے اس راہ کس طرح وہ ماہ

نہ تو طالع نہ جذب کامل ہے

مثل صورت ہیں جلوہ کے حیراں

ہائے کیا شکل کیا شمائل ہے

ہاتھ رکھ لیوے تو کہے کہ بس اب

کیا جیے گا بہت یہ گھائل ہے

حق میں اس بت کے بد کہیں کیونکر

وہ ہمارا خداے باطل ہے

سچ ہے راحت تو بعد مرنے کے

پر بڑا واقعہ یہ ہائل ہے

تیغ اگر درمیاں رہے تو رہے

یار میرا جوان جاہل ہے

رو نہیں چشم تر سے اب رکھیے

سیل اسی در کا کب سے سائل ہے

حال ہم ڈوبتوں کا کیا جانے

جس کو دریا پہ سیر ساحل ہے

میر کب تک بحال مرگ جئیں

کچھ بھی اس زندگی کا حاصل ہے

میر تقی میر

یہ دوانہ بائولا عاقل ہے میاں

اکتوبر 6, 2015میر تقی میر،اساتذہ،غزلقائل،قابل،قاتل،منزل،مشکل،کامل،گل،گھائل،باطل،بسمل،جاہل،حامل،حائل،حاصل،دل،سل،سائل،ساحل،شامل،عاقل،غافلadmin

دیوان دوم غزل 904

کیا عبث مجنوں پئے محمل ہے میاں

یہ دوانہ بائولا عاقل ہے میاں

قند کا کون اس قدر مائل ہے میاں

جو ہے ان ہونٹوں ہی کا قائل ہے میاں

ہم نے یہ مانا کہ واعظ ہے ملک

آدمی ہونا بہت مشکل ہے میاں

چشم تر کی خیر جاری ہے سدا

سیل اس دروازے کا سائل ہے میاں

مرنے کے پیچھے تو راحت سچ ہے لیک

بیچ میں یہ واقعہ حائل ہے میاں

دل کی پامالی ستم ہے قہر ہے

کوئی یوں دلتا ہے آخر دل ہے میاں

آج کیا فرداے محشر کا ہراس

صبح دیکھیں کیا ہو شب حامل ہے میاں

دل تڑپتا ہی نہیں کیا جانیے

کس شکار انداز کا بسمل ہے میاں

چاہیے پیش از نماز آنکھیں کھلیں

حیف اس کا وقت جو غافل ہے میاں

رنگ بے رنگی جدا تو ہے ولے

آب سا ہر رنگ میں شامل ہے میاں

سامنے سے ٹک ٹلے تو دق نہ ہو

آسماں چھاتی پر اپنی سل ہے میاں

دل لگی اتنی جہاں میں کس لیے

رہگذر ہے یہ تو کیا منزل ہے میاں

بے تہی دریاے ہستی کی نہ پوچھ

یاں سے واں تک سو جگہ ساحل ہے میاں

چشم حق بیں سے کرو ٹک تم نظر

دیکھتے جو کچھ ہو سب باطل ہے میاں

دردمندی ہی تو ہے جو کچھ کہ ہے

حق میں عاشق کے دوا قاتل ہے میاں

برسوں ہم روتے پھرے ہیں ابر سے

زانو زانو اس گلی میں گل ہے میاں

کہنہ سالی میں ہے جیسے خورد سال

کیا فلک پیری میں بھی جاہل ہے میاں

کیا دل مجروح و محزوں کا گلہ

ایک غمگیں دوسرے گھائل ہے میاں

دیکھ کر سبزہ ہی خرم دل کو رکھ

مزرع دنیا کا یہ حاصل ہے میاں

مستعدوں پر سخن ہے آج کل

شعر اپنا فن سو کس قابل ہے میاں

کی زیارت میر کی ہم نے بھی کل

لاابالی سا ہے پر کامل ہے میاں

میر تقی میر

تم مسیحا نہیں ہوتے ہو تو قاتل ہو جاؤ

جنوری 1, 2012عرفان صدیقی،غزلقابل،قاتل،کامل،حمائل،حائل،حاصل،داخلadmin

عرفان صدیقی ۔ غزل نمبر 8

میرے ہونے میں کسی طور سے شامل ہوجاؤ

تم مسیحا نہیں ہوتے ہو تو قاتل ہو جاؤ

دشت سے دور بھی کیا رنگ دکھاتا ہے جنوں

دیکھنا ہے تو کسی شہر میں داخل ہو جاؤ

جس پہ ہوتا ہی نہیں خونِ دو عالم ثابت

بڑھ کے اک دن اسی گردن میں حمائل ہو جاؤ

وہ ستم گر تمہیں تسخیر کیا چاہتا ہے

خاک بن جاؤ اور اس شخص کو حاصل ہو جاؤ

عشق کیا کارِ ہوس بھی کوئی آسان نہیں

خیر سے پہلے اسی کام کے قابل ہو جاؤ

ابھی پیکر ہی جلا ہے تویہ عالم ہے میاں

آگ یہ روح میں لگ جائے تو کامل ہو جاؤ

میں ہوں یا موجِ فنا اور یہاں کوئی نہیں

تم اگر ہو تو ذرا راہ میں حائل ہو جاؤ

عرفان صدیقی

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: کامل

بھَلا بر وقت کس نے نیّتِ قاتل کو پہچانا

ہمارا کیا ہے بھلا ہم کہاں کے کامل تھے

قسم کھائی ہوئی توبہ بڑی مشکل سے ٹوٹے گی

کوئی طوفاں ہو گا ناخدا ساحل تو کیا ہو گا

مفت میں مشہور میں لوگوں میں عامل ہو گیا

جس دل پہ ناز تھا مجھے وہ دل نہیں رہا

میری خوں ریزی ہی کا مائل ہے

یہ دوانہ بائولا عاقل ہے میاں

تم مسیحا نہیں ہوتے ہو تو قاتل ہو جاؤ

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: