ٹیگ کے محفوظات: ڈھل

صحرا میں گلاب پل رہے ہیں

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلچل،ڈھل،پل،بدل،جلadmin

آدابِ چمن بدل رہے ہیں

صحرا میں گلاب پل رہے ہیں

دنیا کی حقیقتیں وہی ہیں

اندازِ نظر بدل رہے ہیں

آمد ہے کس اسیرِ نو کی

زنداں میں چراغ جل رہے ہیں

ہمّت نے جواب دے دیا ہے

دیوانے پھر بھی چل رہے ہیں

ہونٹوں پہ ہنسی اور آنکھ پْرنم

پانی سے چراغ جل رہے ہیں

آشائیں غُروب ہو رہی ہیں

امید کے سایے ڈھل رہے ہیں

وہ راہ، شکیبؔ، کب ہے اپنی

جس راہ پہ لوگ چل رہے ہیں

شکیب جلالی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

وہی ننھے ننھے پودے تھے گھنے درخت کل کے

جولائی 24, 2018موجِ خیال،باصر کاظمی،غزلچل،نکل،چھل،ڈھل،کل،جل،سنبھلadmin

دمِ صبح آندھیوں نے جنہیں رکھ دیا مسل کے

وہی ننھے ننھے پودے تھے گھنے درخت کل کے

نئے ساتھیوں کی دُھن میں تیری دوستی کو چھوڑا

کوئی تجھ سا بھی نہ پایا تِرے شہر سے نکل کے

وہی رسمِ کم نگاہی وہی رات کی سیاہی

مرے شہر کے چراغو یہاں کیا کرو گے جل کے

نئے خواب میری منزل تہِ آب میرا ساحل

تمہیں کیا ملے گا یارو مرے ساتھ ساتھ چل کے

سرِ شام آج کوئی مرے دل سے کہہ رہا ہے

کوئی چاند بھی تو نکلے کوئی جام بھی تو چھلکے

یہ جو گھر لٹا لٹا ہے یہ جو دل بجھا بجھا ہے

اِسی دل میں رہ گئے ہیں کئی آفتاب ڈھل کے

یہ مشاہدہ ہے میرا رہِ زندگی میں باصرِؔ

وہی منہ کے بَل گرا ہے جو چلا سنبھل سنبھل کے

باصر کاظمی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

وُہ کہ ڈسا جانے والا ہے، سنبھل جاتا ہے

جولائی 31, 2017ماجد صدیقی،دِل دِل کرب کمان،غزلنکل،ڈھل،کل،اگل،بدل،جل،سنبھلadmin

ماجد صدیقی ۔ غزل نمبر 37

سانپ کہاں ہے اِتنا پتہ جب چل جاتا ہے

وُہ کہ ڈسا جانے والا ہے، سنبھل جاتا ہے

اُس کی غرض تو بس سانسیں پی جانے تک ہے

جس کو نگلے دریا اُسے، اُگل جاتا ہے

گود کھلاتی خاک بھی کھسکے پَیروں تلے سے

سرپر ٹھہرا بپھرا امبر بھی ڈھل جاتا ہے

پانی پر لہروں کے نقش کہاں ٹھہرے ہیں

منظر آتی جاتی پل میں بدل جاتا ہے

دُشمن میں یہ نقص ہے جب بھی دکھائی دے تو

رگ رگ میں اِک تُند الاؤ جل جاتا ہے

جس کا تخت ہِلا ہے ذرا سا اپنی جگہ سے

آج نہیں جاتا وہ شخص تو کل جاتا ہے

اِس جانب سے ماجد اُس جانب کے افق تک

ساکن چاند بھی چُپ چُپ دُور نکل جاتا ہے

ماجد صدیقی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

فراز اب ذرا لہجہ بدل کے دیکھتے ہیں

نومبر 4, 2015احمد فراز،شعراء،غزلمل،چل،نکل،ڈھل،اچھل،بدل،جلadmin

احمد فراز ۔ غزل نمبر 76

ابھی کچھ اور کرشمے غزل کے دیکھتے ہیں

فراز اب ذرا لہجہ بدل کے دیکھتے ہیں

جدائیاں تو مقدر ہیں پھر بھی جان سفر

کچھ اور دور ذرا ساتھ چل کے دیکھتے ہیں

رہ وفا میں حریف خرام کوئی تو ہو

سو اپنے آپ سے آگے نکل کے دیکھتے ہیں

تو سامنے ہے تو پھر کیوں یقیں نہیں آتا

یہ بار بار جو آنکھوں کو مل کے دیکھتے ہیں

یہ کون لوگ ہیں موجود تیری محفل میں

جو لالچوں سے تجھے، مجھ کو جل کے دیکھتے ہیں

یہ قرب کیا ہے کہ یک جاں ہوئے نہ دور رہے

ہزار ایک ہی قالب میں ڈھل کے دیکھتے ہیں

نہ تجھ کو مات ہوئی ہے نہ مجھ کو مات ہوئی

سو اب کے دونوں ہی چالیں بدل کے دیکھتے ہیں

یہ کون ہے سر ساحل کے ڈوبنے والے

سمندروں کی تہوں سے اچھل کے دیکھتے ہیں

ابھی تلک تو نہ کندن ہوئے نہ راکھ ہوئے

ہم اپنی آگ میں ہر روز جل کے دیکھتے ہیں

بہت دنوں سے نہیں ہے کچھ اسکی خیر خبر

چلو فراز کوئے یار چل کے دیکھتے ہیں

احمد فراز

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

مجھے گماں بھی نہ ہو اور تم بدل جانا

نومبر 2, 2015احمد فراز،شعراء،غزلمل،محل،ڈھل،بدل،جل،سنبھلadmin

احمد فراز ۔ غزل نمبر 13

جو چل سکو تو کوئی ایسی چال چل جانا

مجھے گماں بھی نہ ہو اور تم بدل جانا

یہ شعلگی ہو بدن کی تو کیا کیا جائے

سو لازمی تھا ترے پیرہن کا جل جانا

تمہیں کرو کوئی درماں، یہ وقت آ پہنچا

کہ اب تو چارہ گروں کو بھی ہاتھ مل جانا

ابھی ابھی تو جدائی کی شام آئی تھی

ہمیں عجیب لگا زندگی کا ڈھل جانا

سجی سجائی ہوئی موت زندگی تو نہیں

مورّخوں نے مقابر کو بھی محل جانا

یہ کیا کہ تو بھی اسی ساعتِ زوال میں ہے

کہ جس طرح ہے سبھی سورجوں کو ڈھل جانا

ہر ایک عشق کے بعد اور اس کے عشق کے بعد

فراز اتنا بھی آساں نہ تھا سنبھل جانا

احمد فراز

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

دیکھوں تو نظر بدل رہا ہے

اکتوبر 25, 2015پروین شاکر،شعراء،غزلمچل،مَل،چل،ڈھل،بہل،بدلadmin

پروین شاکر ۔ غزل نمبر 116

سوچوں تو وہ ساتھ چل رہا ہے

دیکھوں تو نظر بدل رہا ہے

کیوں بات زباں سے کہہ کے کھوئی

دل آج بھی ہاتھ مَل رہا ہے

راتوں کے سفر میں وہم ساتھا

یہ میں ہوں کہ چاند چل رہا ہے

ہم بھی ترے بعد جی رہے ہیں

اور تُو بھی کہیں بہل رہا ہے

سمجھا کے ابھی گئی ہیں سکھیاں

اور دل ہے کہ پھر مچل رہا ہے

ہم ہی بُرے ہو گئےِ_کہ تیرا

معیارِ وفا بدل رہا ہے

پہلی سی وہ روشنی نہیں اب

کیا درد کا چاند ڈھل رہا ہے

پروین شاکر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

کیا جی تدرو کا جو ترے آگے چل سکے

اکتوبر 6, 2015میر تقی میر،اساتذہ،غزلمل،چل،نکل،ڈھل،ٹل،ابل،جل،جھل،سنبھلadmin

دیوان اول غزل 586

تیرا خرام دیکھے تو جا سے نہ ہل سکے

کیا جی تدرو کا جو ترے آگے چل سکے

اس دل جلے کی تاب کے لانے کو عشق ہے

فانوس کی سی شمع جو پردے میں جل سکے

کہتا ہے کون تجھ کو کہ اے سینہ رک نہ جا

اتنا تو ہو کہ آہ جگر سے نکل سکے

گر دوپہر کو اس کو نکلنے دے نازکی

حیرت سے آفتاب کی پھر دن نہ ڈھل سکے

کیا اس غریب کو ہو سرسایۂ ہما

جو اپنی بے دماغی سے مکھی نہ جھل سکے

ہے جاے حیف بزم جہاں مل لے اے پتنگ

اپنے اپر جو کوئی گھڑی ہاتھ مل سکے

ہے وہ بلاے عشق کہ آئے سو آئے ہے

کلول نہیں ہے ایسی محبت کہ ٹل سکے

کس کو ہے آرزوے افاقت فراق میں

ایسا تو ہو کہ کوئی گھڑی جی سنبھل سکے

مت ابر چشم کم سے مری چشم تر کو دیکھ

چشمہ ہے یہ وہ جس سے کہ دریا ابل سکے

کہتا ہے وہ تو ایک کی دس میر کم سخن

اس کی زباں کے عہدے سے کیونکر نکل سکے

تغئیرقافیہ سے یہ طرحی غزل کہوں

تا جس میں زور کچھ تو طبیعت کا چل سکے

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

اگرچہ جان جاتی ہے چلی لیکن تغافل کر

اکتوبر 6, 2015میر تقی میر،اساتذہ،غزلڈھل،کھل،گل،گھل،بلبل،تامل،تحمل،تغافل،غلadmin

دیوان اول غزل 208

یہ عشق بے اجل کش ہے بس اے دل اب توکل کر

اگرچہ جان جاتی ہے چلی لیکن تغافل کر

سفر ہستی کا مت کر سرسری جوں باد اے رہرو

یہ سب خاک آدمی تھے ہر قدم پر ٹک تامل کر

سن اے بے درد گلچیں غارت گلشن مبارک ہے

پہ ٹک گوش مروت جانب فریاد بلبل کر

نہ وعدہ تیرے آنے کا نہ کچھ امید طالع سے

دل بیتاب کو کس منھ سے کہیے ٹک تحمل کر

یہ کیا جانوں کہ کیوں رونے لگا رونے سے رہ کر میں

مگر یہ جانتا ہوں مینھ گھر آتا ہے پھر کھل کر

مرے پاس اس کی خاک پا کو بیماری میں رکھا تھا

نہ آیا سر مرا بالیں پہ اودھر جو گیا ڈھل کر

تجلی جلوہ ہیں کچھ بام و در غم خانے کے میرے

وہ رشک ماہ آیا ہم نشیں بس اب دیا گل کر

تری خاموشی سے قمری ہوا شور جنوں رسوا

ہلاٹک طوق گردن کو بھی ظالم باغ میں غل کر

گداز عاشقی کا میر کے شب ذکر آیا تھا

جو دیکھا شمع مجلس کو تو پانی ہو گئی گھل کر

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

راتوں کو روتے روتے ہی جوں شمع گل گیا

اکتوبر 6, 2015میر تقی میر،اساتذہ،غزلچل،نکل،ڈھل،گل،جل،رل،سنبھلadmin

دیوان اول غزل 39

گرمی سے میں تو آتش غم کی پگھل گیا

راتوں کو روتے روتے ہی جوں شمع گل گیا

ہم خستہ دل ہیں تجھ سے بھی نازک مزاج تر

تیوری چڑھائی تونے کہ یاں جی نکل گیا

گرمی عشق مانع نشوونما ہوئی

میں وہ نہال تھا کہ اگا اور جل گیا

مستی میں چھوڑ دیر کو کعبے چلا تھا میں

لغزش بڑی ہوئی تھی ولیکن سنبھل گیا

ساقی نشے میں تجھ سے لنڈھا شیشۂ شراب

چل اب کہ دخت تاک کا جوبن تو ڈھل گیا

ہر ذرہ خاک تیری گلی کی ہے بے قرار

یاں کون سا ستم زدہ ماٹی میں رل گیا

عریاں تنی کی شوخی سے دیوانگی میں میر

مجنوں کے دشت خار کا داماں بھی چل گیا

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

نکلا ہی نہ جی ورنہ کانٹا سا نکل جاتا

اکتوبر 6, 2015میر تقی میر،اساتذہ،غزلمل،نکل،ڈھل،ٹل،پگھل،بہل،بدل،جل،سنبھلadmin

دیوان اول غزل 21

مر رہتے جو گل بن تو سارا یہ خلل جاتا

نکلا ہی نہ جی ورنہ کانٹا سا نکل جاتا

پیدا ہے کہ پنہاں تھی آتش نفسی میری

میں ضبط نہ کرتا تو سب شہر یہ جل جاتا

میں گریۂ خونیں کو روکے ہی رہا ورنہ

اک دم میں زمانے کا یاں رنگ بدل جاتا

بن پوچھے کرم سے وہ جو بخش نہ دیتا تو

پرسش میں ہماری ہی دن حشر کا ڈھل جاتا

استادہ جہاں میں تھا میدان محبت میں

واں رستم اگر آتا تو دیکھ کے ٹل جاتا

وہ سیر کا وادی کے مائل نہ ہوا ورنہ

آنکھوں کو غزالوں کی پائوں تلے مل جاتا

بے تاب و تواں یوں میں کا ہے کو تلف ہوتا

یاقوتی ترے لب کی ملتی تو سنبھل جاتا

اس سیم بدن کو تھی کب تاب تعب اتنی

وہ چاندنی میں شب کی ہوتا تو پگھل جاتا

مارا گیا تب گذرا بوسے سے ترے لب کے

کیا میر بھی لڑکا تھا باتوں میں بہل جاتا

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

کوچۂ بند باہر تو نکل کر دیکھیں

نومبر 16, 2013آفتاب اقبال شمیمنکل،ڈھل،اُچھل،بدل،جل،سنبھلadmin

آفتاب اقبال شمیم ۔ غزل نمبر 41

کثرتِ جلوۂ امکان کو چل کر دیکھیں

کوچۂ بند باہر تو نکل کر دیکھیں

اپنی پس ماندگیاں ، راحتیں لگتی ہیں جنہیں

تکیۂ عادت تکرار بدل کر دیکھیں

جنبشِ لطف سے دستار نہ گر جائے کہیں

بام سے منظر دنیا کو سنبھل کر دیکھیں

پا فتادہ سرِ دریا ہوں کھڑا برسوں سے

اور لہریں مجھے دریا سے اُچھل کر دیکھیں

گرمیِٔ مے سے ہوں شفاف یہ سیسہ آنکھیں

آؤ اِس شعلۂ شب تاب میں جل کر دیکھیں

زندگی کوئی کلیشے تو نہیں جینے کا

اسکی صد زاویہ راہوں میں نکل کر دیکھیں

عمرِ کوتاہ گزرنے کو ہے آؤ! آؤ!

اسکے ہر نور میں ہر نار میں ڈھل کر دیکھیں

آفتاب اقبال شمیم

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

دل کی حالت سنبھل چلی ہے

اپریل 3, 2012فیض احمد فیض،زنداں نامہ،غزلڈھل،ٹل،پل،بہل،بدل،سنبھلadmin

فیض احمد فیض ۔ غزل نمبر 9

بات بس سے نکل چلی ہے

دل کی حالت سنبھل چلی ہے

اب جنوں حد سے بڑھ چلا ہے

اب طبیعت بہل چلی ہے

اشک خونناب ہو چلے ہیں

غم کی رنگت بدل چلی ہے

یا یونہی، بجھ رہی ہیں شمعیں

یا شبِ ہجر ٹل چلی ہے

لاکھ پیغام ہو گئے ہیں

جب صبا ایک پل چلی ہے

جاو اب سو رہو ستارو

درد کی رات ڈھل چلی ہے

فیض احمد فیض

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

دل تھا کہ پھر بہل گیا، جاں تھی کہ پھر سنبھل گئی

اپریل 3, 2012فیض احمد فیض،زنداں نامہ،غزلمچل،نکل،ڈھل،بدل،سنبھلadmin

فیض احمد فیض ۔ غزل نمبر 5

شامِ فراق، اب نہ پوچھ، آئی اور آکے ٹل گئی

دل تھا کہ پھر بہل گیا، جاں تھی کہ پھر سنبھل گئی

بزمِ خیال میں ترے حسن کی شمع جل گئی

درد کا چاند بجھ گیا، ہجر کی رات ڈھل گئی

جب تجھے یاد کرلیا، صبح مہک مہک اٹھی

جب ترا غم جگا لیا، رات مچل مچل گئی

دل سے تو ہر معاملہ کرکے چلے تھے صاف ہم

کہنے میں ان کے سامنے بات بدل بدل گئی

آخرِ شب کے ہمسفر فیض نجانے کیا ہوئے

رہ گئی کس جگہ صبا، صبح کدھر نکل گئی

جناح ہسپتال کراچی

فیض احمد فیض

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

کہ چھو رہا ہوں تجھے اور پگھل رہا ہوں میں

جنوری 7, 2012عرفان صدیقی،غزلچل،نکل،ڈھل،پگھل،بدلadmin

عرفان صدیقی ۔ غزل نمبر 163

بدن کے دونوں کناروں سے جل رہا ہوں میں

کہ چھو رہا ہوں تجھے اور پگھل رہا ہوں میں

تجھی پہ ختم ہے جاناں مرے زوال کی رات

تو اب طلوع بھی ہوجا کہ ڈھل رہا ہوں میں

بلا رہا ہے مرا جامہ زیب ملنے کو

تو آج پیرہنِ جاں بدل رہا ہوں میں

غبارِ راہ گزر کا یہ حوصلہ بھی تو دیکھ

ہوائے تازہ ترے ساتھ چل رہا ہوں میں

میں خواب دیکھ رہا ہوں کہ وہ پکارتا ہے

اور اپنے جسم سے باہر نکل رہا ہوں میں

عرفان صدیقی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

پھر اس کے بعد زمانوں کو روند چل چل کے

دسمبر 1, 2007منصور آفاق،شعراء،غزلہل،مل،مچل،ماحصل،محل،چل،ڈھل،کنول،پگھل،ابل،ازل،بل،جل،خلل،سنبھل،عمل،غزلadmin

منصور آفاق ۔ غزل نمبر 580

تُو پہلے لوح پہ لکھا ہوا بدل چل کے

پھر اس کے بعد زمانوں کو روند چل چل کے

اکیلا دیکھ کے تالاب کے کنارے پر

تسلی دینے مجھے آ گیا کنول چل کے

مجھے دکھا نہ دہکتے ہوئے پہر کا جلال

جا اپنی شام کی عبرت سرا میں ڈھل چل کے

صداؤں سے وہ سفینہ پلٹ نہیں سکتا

اِسی جزیرہ وحشت میں ہاتھ مل چل کے

نکال دشتِ تعلق سے اپنی تنہائی

کسی حبیب کے گھر جا، ذرا سنبھل چل کے

وہ سنگ زاد پگھلتا نہیں مگر پھر بھی

اسے سنا کوئی جلتی ہوئی غزل چل کے

طلوعِ حسن کی ساعت پہ تبصرہ کیا ہو

نکل رہا ہے کوئی آسماں کے بل چل کے

مزاجِ خانہء درویش کو خراب نہ کر

چراغ! اپنے حریمِ حرم میں جل چل کے

فسادِ خلقِ خدا پہ امید صبحوں کی

بغاوتوں کی کرن ہیں تماشے ہلچل کے

رکی ہے چرخ کی چرخی کسی خرابی سے

نکال وقت کے پہیے سے اب خلل چل کے

مثالِ تیر لپکتے ہوئے تعاقب میں

ابد میں ہو گیا پیوست خود ازل چل کے

اب اس کے بعد کہانی ترے کرم کی ہے

خود آ گیا ہے یہاں تک تو بے عمل چل کے

ندی کی پیاس بجھا ریت کے سمندر سے

کسی پہاڑ کی چوٹی سے پھر ابل چل کے

سنا ہے کھڑکیاں کھلتی ہیں چاند راتوں میں

کسی کو دیکھ مرے دل، کہیں مچل چل کے

مجھے بھی آتے دنوں کا شعور حاصل ہو

پڑھوں کہیں پہ گذشتہ کا ماحصل چل کے

بس ایک فون کی گھنٹی، بس ایک ڈور کی بیل

کسی کی آگ میں پتھر بدن !پگھل چل کے

عجب ہے حسنِ تناسب کی داستاں منصور

بنا ہے ‘ تاج محل‘ موت کا محل چل کے

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

یہ کہاں تک آ گئے ہیں ساتھ چل کے آئینے

دسمبر 1, 2007منصور آفاق،شعراء،غزلہل،چل،نکل،چھل،ڈھل،پگھل،بدل،سنبھلadmin

منصور آفاق ۔ غزل نمبر 568

دیکھتا ہوں خواب میں تیرے محل کے آئینے

یہ کہاں تک آ گئے ہیں ساتھ چل کے آئینے

میں نے دیواروں پہ تیری شکل کیا تصویر کی

آ گئے کمرے میں آنکھوں سے نکل کے آئینے

آدمی نے اپنی صورت پر تراشے دیوتا

آپ اپنی ہی عبادت کی، بدل کے آئینے

ساڑھی کے شیشوں میں میرا لمسِ تازہ دیکھ کر

تیرے شانوں سے نظر کے ساتھ ڈھلکے آئینے

آخری نقطے تلک دیکھا تھا اپنی آنکھ میں

اور پھر دھندلا گئے تھے ہلکے ہلکے آئینے

ایک سورج ہے ترے مد مقابل آج رات

دیکھ اس کو دیکھ لیکن کچھ سنبھل کے آئینے

سینہء شب میں حرارت تھی کچھ اتنی چاند کی

پارہ پارہ ہو گئے ہیں دو پگھل کے آئینے

پھر برہنہ شخصیت ہونے لگی دونوں طرف

جب شرابوں سے بھرے کچھ دیر چھلکے آئینے

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

کھلے گلے کی پہن کر قمیض ململ کی

دسمبر 1, 2007منصور آفاق،شعراء،غزلململ،منگل،چھل،چاول،ڈھل،کمبل،کاجل،پیتل،تھل،جنگلadmin

منصور آفاق ۔ غزل نمبر 463

گرا کے پھول اٹھائے کوئی کڑی تھل کی

کھلے گلے کی پہن کر قمیض ململ کی

ابھی تو پاؤں میں باقی ہے ہجر کا ہفتہ

پڑی ہے راہ ابھی ایک اور منگل کی

حنائی ہاتھ پہ شاید پلیٹ رکھی تھی

ہوا کے جسم سے خوشبو اٹھی تھی چاول کی

بچھی ہوئی ہیں سحر خیزیوں تلک آنکھیں

ملی ہوئی ہے شبوں سے لکیر کاجل کی

لیا ہے شام کا شاور ابھی ابھی کس نے

گلی میں آئی ہے خوشبو کہاں سے جل تھل کی

شفق کے لان میں صدیوں سے شام کی لڑکی

بجا رہی ہے مسلسل پرات پیتل کی

نکھر نکھر گیا کمرے میں رنگ کا موسم

ذرا جو شال بدن کے گلاب سے ڈھلکی

کسی کو فتح کیا میں نے پیاس کی رت میں

اڑے جو کارک تو شمپین جسم پر چھلکی

چھتوں پہ لوگ اٹھائے ہوئے تھے بندوقیں

تمام شہر پہ اتری تھی رات جنگل کی

جھلس گیا تھا دسمبر کی رات میں منصور

وہ سرسراتی ہوئی آگ تیرے کمبل کی

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

ہر سائے کے ساتھ نہ ڈھل

جنوری 8, 1972شعراء،غزلہل،مل،چل،ڈھل،بل،بادل،جلadmin

باقی صدیقی ۔ غزل نمبر 13

اپنی دھوپ میں بھی کچھ جل

ہر سائے کے ساتھ نہ ڈھل

لفظوں کے پھلوں پہ نہ جا

دیکھ سروں پر چلتے ہل

دنیا برف کا تودہ ہے

جتنا جل سکتا ہے جل

غم کی نہیں آواز کوئی

کاغذ کالے کرتا چل

بن کے لکیریں ابھرے ہیں

ماتھے پر راہوں کے بل

میں نے تیرا ساتھ دیا

میرے منہ پر کالک مل

آس کے پھول کھلے باقیؔ

دل سے گزرا پھر بادل

باقی صدیقی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

چن پرتے کد، امبروں ڈَھل کے

جون 1, 1963وِتّھاں ناپدے ہتھ،غزلمل،چل،نکل،ڈھل،گھل،بھلadmin

ماجد صدیقی (پنجابی کلام) ۔ غزل نمبر 89

کی ہویا، توُں نہ آئیوں وَل کے

چن پرتے کد، امبروں ڈَھل کے

کل دے دعویدار، عشقے دے

بہہ گئے اج، سواہ منہ مل کے

بے سمتے سہئی، ٹُرپئے آں تے

ہن کی مڑنا، دُور نکل کے

بِڑکاں تے، کن لاندا رہناں

واواں ہتھ، سنہیوڑے گھل کے

جیون پندھ سی، دُوں قدماں دا

کٹیا تُدھ، پر نال نہ چل کے

ماجدُ ایہہ گل، جانے کیہڑا

اج کی اے، کی ہوسی بھل کے

ماجد صدیقی (پنجابی کلام)

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

شاید اوہنوں روکے، بّتی اگلے چوک دے سگنل دی

جون 1, 1963وِتّھاں ناپدے ہتھ،غزلڈھل،کل،کھل،پاگل،راول،سگنلadmin

ماجد صدیقی (پنجابی کلام) ۔ غزل نمبر 14

ایس ائی آس تے نسدا جاواں، دھڑکن سُندا پل پل دی

شاید اوہنوں روکے، بّتی اگلے چوک دے سگنل دی

تھوہراں نُوں کھُل دے کے جنّھے، کومل پھُل زنجیرے نیں

باگ کنارے، واڑاں لاؤن دی، سوچ سی ایہہ کِس پاگل دی

کِیہ کہوئیے، کد وڈیاں اپنے، قولاں دی لج رکھنی ایں

نکیاں ہوندیاں توں پئے تکئیے‘ حالت ایہو، اج کل دی

شام دے ویہڑے اودھر، جھوٹ تسلیاں آؤندی فجر دیاں

ایدھر، مارُو پِیڑ کسے وی، دارُو توں پئی نئیں کَھل دی

چار چفیرے کِھلرے تھل نے، ہور اَسن کِیہہ دینا ایں

سِر تے آ کے رُک گئی جیہڑی اوہ دُھپ تے ہُن نئیں ڈھل دی

گلی گلی وچ جتھے، میریاں لختاں، یُوسف بنیاں نیں

ہے بازارِ مصر دا ماجد، یا ایہہ نگری راول دی

ماجد صدیقی (پنجابی کلام)

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔