ٹیگ کے محفوظات: پاسباں

اور اس پر عجز دکھلائے گلی کا پاسباں کیا کیا

اپریل 30, 2017ماجد صدیقی،آنگن آنگن رات،غزلمحرومیاں،پاسباں،آستاں،زباںadmin

ماجد صدیقی ۔ غزل نمبر 7

ہمارے آپ کے، ہونے لگے ہر شب، زیاں کیا کیا

اور اس پر عجز دکھلائے گلی کا پاسباں کیا کیا

غلامانِ غرض سے، حال اِس پونجی کا، مت پُوچھو

بسا رکھے ہیں ماتھوں میں، نجانے آستاں کیا کیا

صدی کے نصف تک پر تو، اُنہی کا راج دیکھا ہے

نجانے اِس سے آگے ہیں ابھی محرومیاں کیا کیا

کبھی اشکوں کبھی حرفوں میں، از خود ڈھلنے لگتے ہیں

لئے پھرتی ہے ماجدؔ آبلے، اپنی زباں کیا کیا

ماجد صدیقی

گھروندا بے نشاں ہونے لگا ہے

اپریل 29, 2017ماجد صدیقی،آنگن آنگن رات،غزلنشاں،گلستاں،پاسباں،آشیاں،داستاں،زباں،شہاںadmin

ماجد صدیقی ۔ غزل نمبر 80

بس اتنا سا زیاں ہونے لگا ہے

گھروندا بے نشاں ہونے لگا ہے

غبارہ پھٹ کے رہ جانے کا قّصہ

ہماری داستاں ہونے لگا ہے

وُہ بھگدڑ کارواں میں ہے کہ جیسے

لُٹیرا پاسباں ہونے لگا ہے

رُکا تھا لفظ جو ہونٹوں پہ آ کر

وُہ اَب زخمِ زباں ہونے لگا ہے

نظر میں جو بھی منظر ہے سکوں کا

بکھرتا آشیاں ہونے لگا ہے

جو تھا منسوب کل تک گیدڑوں سے

اَب اندازِ شہاں ہونے لگا ہے

نظر میں تھا جو چنگاری سا ماجدؔ

وُہ گل اَب گلستاں ہونے لگا ہے

ماجد صدیقی

تن گیا آسماں کماں جیسا

اپریل 29, 2017ماجد صدیقی،آنگن آنگن رات،غزلکماں،گلستاں،پاسباں،امتحاں،زباںadmin

ماجد صدیقی ۔ غزل نمبر 89

ابروئے چشم دشمناں جیسا

تن گیا آسماں کماں جیسا

جبر کے موسموں سے زنگ آلود

جو بھی تھا برگ، تھا زباں جیسا

بھُولنے پر بھی دھیان جابر کا

پاس رہتا ہے پاسباں جیسا

جو بھی ہوتا ہے دن طلوع یہاں

سر پہ آتا ہے امتحاں جیسا

ہے نظر میں جو خواب سا ماجدؔ

ہے کوئی سروِ گلستاں جیسا

ماجد صدیقی

ہے خاکِ تن ہوا و ہوا خوں فشاں ہنوز

اکتوبر 25, 2015مصطفٰی خان شیفتہ،اساتذہ،غزلفشاں،فغاں،مہرباں،مغاں،نہاں،نشاں،کہکشاں،کارواں،پاسباں،آسماں،آشیاں،امتحاں،ارمغاں،جاں،خزاںadmin

مصطفٰی خان شیفتہ ۔ غزل نمبر 52

ہم بے نشان اور وفا کا نشاں ہنوز

ہے خاکِ تن ہوا و ہوا خوں فشاں ہنوز

بیت الحزن میں نغمۂ شادی بلند ہے

نکلا ہی بابِ مصر سے ہے کارواں ہنوز

صبحِ شبِ وصال نیِ صبح ہے، مگر

پرویں ہنوز جلوہ گر و کہکشاں ہنوز

ہرگز ابھی شکایتِ دشمن نہ چاہئے

ہم پر بھی یار خوب نہیں مہرباں ہنوز

کیوں کر کہیں کہ چھٹ گئے ہم بندِ جسم سے

اس زلفِ پیچ پیچ میں الجھی ہے جاں ہنوز

جو بات میکدے میں ہے اک اک زبان پر

افسوس مدرسے میں ہے بالکل نہاں ہنوز

ضبط و شکیب یاں ہے نقابِ جمال میں

بے وجہ واں نہیں ہے سرِ امتحاں ہنوز

مدت ہوئی بہارِ جہاں دیکھتے ہوئے

دیکھا نہیں کسی نے گلِ بے خزاں ہنوز

اکثر ہوا ہے مجھ کو سفر در وطن مگر

لایا نہ دوستوں کے لئے ارمغاں ہنوز

اک شب ہوا تھا جلوہ نما چرخ پر وہ ماہ

مدہوش ہیں ملائکۂ آسماں ہنوز

نا آشنا رقیب سے ہے آشنا ابھی

نا آشنا ہے لب سے ہمارے فغاں ہنوز

آشفتہ زلف، چاک قبا، نیم باز چشم

ہیں صحبتِ شبانہ کے ظاہر نشاں ہنوز

اے موجۂ نسیم ذرا اور ٹھہر جا

ہے خاک پر ہماری وہ دامن فشاں ہنوز

مے خانے میں تمام جوانی بسر ہوئی

لیکن ملا نہ منصبِ پیرِ مغاں ہنوز

اے تابِ برق تھوڑی سی تکلیف اور بھی

کچھ رہ گئے ہیں خار و خسِ آشیاں ہنوز

آتا ہوں میں وہیں سے ذرا صبر شیفتہ

سونے کے قصد میں بھی نہیں پاسباں ہنوز

مصطفٰی خان شیفتہ

مجھ کو خبر نہیں مری مٹی کہاں کی ہے

اکتوبر 25, 2015اساتذہ،داغ دہلوی،غزلمہرباں،نوجواں،ناگہاں،وہاں،کہاں،کارواں،پاسباں،آسماں،امتحاں،بیاں،جہاں،خواں،زباںadmin

داغ دہلوی ۔ غزل نمبر 47

کعبے کی ہے ہوس کبھی کوئے بتاں کی ہے

مجھ کو خبر نہیں مری مٹی کہاں کی ہے

سن کر مرا فسانہ انہیں لطف آگیا

سنتا ہوں اب کہ روز طلب قصہ خواں کی ہے

پیغامبر کی بات پر آپس میں رنج کیا

میری زباں کی ہے نہ تمہاری زباں کی ہے

کچھ تازگی ہو لذتِ آزار کے لئے

ہر دم مجھے تلاش نئے آسماں کی ہے

جانبر بھی ہو گئے ہیں بہت مجھ سے نیم جان

کیا غم ہے اے طبیب جو پوری وہاں کی ہے

حسرت برس رہی ہے ہمارے مزار پر

کہتے ہیں سب یہ قبر کسی نوجواں کی ہے

وقتِ خرامِ ناز دکھا دو جدا جدا

یہ چال حشر کی یہ روش آسماں کی ہے

فرصت کہاں کہ ہم سے کسی وقت تو ملے

دن غیر کا ہے رات ترے پاسباں کی ہے

قاصد کی گفتگو سے تسلی ہو کس طرح

چھپتی نہیں وہ بات جو تیری زباں کی ہے

جورِ رقیب و ظلمِ فلک کا نہیں خیال

تشویش ایک خاطرِ نا مہرباں کی ہے

سن کر مرا فسانہء غم اس نے یہ کہا

ہو جائے جھوٹ سچ یہی خوبی بیاں کی ہے

دامن سنبھال باندھ کمر آستیں چڑھا

خنجر نکال دل میں اگر امتحاں کی ہے

ہر ہر نفس میں دل سے نکلنے لگا غبار

کیا جانے گردِ راہ یہ کس کارواں کی ہے

کیونکر نہ آتے خلد سے آدم زمین پر

موزوں وہیں وہ خوب ہے جو سنتے جہاں کی ہے

تقدیر سے یہ پوچھ رہا ہوں کہ عشق میں

تدبیر کوئی بھی ستمِ ناگہاں کی ہے

اردو ہے جس کا نام ہمیں جانتے ہیں داغ

ہندوستاں میں دھوم ہماری زباں کی ہے

داغ دہلوی

وہ کون سی زمیں ہے جہاں آسماں نہیں

اکتوبر 25, 2015اساتذہ،داغ دہلوی،غزلنشاں،پاسباں،آسماں،امتحان،زباںadmin

داغ دہلوی ۔ غزل نمبر 40

دنیا میں آدمی کو مصیبت کہاں‌ نہیں

وہ کون سی زمیں ہے جہاں آسماں نہیں

کس طرح جان دینے کے اقرار سے پھروں

میری زبان ہے یہ تمہاری زباں نہیں

اے موت تو نے دیر لگائی ہے کس لیئے

عاشق کا امتحان ہے تیرا امتحان نہیں

تنہا بھی جب رہے تو وہ رہتے ہیں‌ہوشیار

خود اپنے پاسباں‌ ہیں اگر پاسباں نہیں

ایسا خط اُن کو راہ میں‌ ملتا ہے روز ایک

جس میں‌کسی کا نام کسی کا نشاں نہیں

داغ دہلوی

رہی نہ طرزِ ستم کوئی آسماں کے لئے

اکتوبر 8, 2015مرزا اسد اللہ خان غالب،اساتذہ،غزلفشاں،پاسباں،آسماں،آستاں،آشیاں،امتحاں،بیکراں،بیاں،جہاں،جاوداں،خاں،داں،زباںadmin

دیوانِ غالب ۔ غزل نمبر 209

نویدِ امن ہے بیدادِ دوست جاں کے لئے

رہی نہ طرزِ ستم کوئی آسماں کے لئے

بلا سے!گر مژۂ یار تشنۂ خوں ہے

رکھوں کچھ اپنی ہی مژگانِخوں فشاں کے لئے

وہ زندہ ہم ہیں کہ ہیں روشناسِ خلق اے خضر

نہ تم کہ چور بنے عمرِ جاوداں کے لئے

رہا بلا میں بھی، میں مبتلائے آفتِ رشک

بلائے جاں ہے ادا تیری اک جہاں کے لئے

فلک نہ دور رکھ اُس سے مجھے، کہ میں ہی نہیں

دراز دستئِ قاتل کے امتحاں کے لئے

مثال یہ مری کوشش کی ہے کہ مرغِ اسیر

کرے قفس میں فراہم خس آشیاں کے لئے

گدا سمجھ کے وہ چپ تھا، مری جو شامت آئے

اٹھا اور اٹھ کے قدم میں نے پاسباں کے لئے

بہ قدرِ شوق نہیں ظرفِ تنگنائے غزل

کچھ اور چاہیے وسعت مرے بیاں کے لئے

دیا ہے خلق کو بھی، تا اسے نظر نہ لگے

بنا ہے عیش تجمُّل حسین خاں کے لئے

زباں پہ بارِ خدایا! یہ کس کا نام آیا

کہ میرے نطق نے بوسے مر ی زباں کے لئے

نصیرِ دولت و دیں اور معینِ ملّت و ملک

بنا ہے چرخِ بریں جس کے آستاں کے لئے

زمانہ عہد میں اُس کے ہے محوِ آرائش

بنیں گے اور ستارے اب آسماں کے لئے

ورق تمام ہوا اور مدح باقی ہے

سفینہ چاہیے اس بحرِ بیکراں کے لئے

ادائے خاص سے غالب ہوا ہے نکتہ سرا

صلائے عام ہے یارانِ نکتہ داں کے لئے

مرزا اسد اللہ خان غالب

ہم سخن کوئی نہ ہو اور ہم زباں کوئی نہ ہو

اکتوبر 8, 2015مرزا اسد اللہ خان غالب،اساتذہ،غزلپاسباں،خواں،زباںadmin

دیوانِ غالب ۔ غزل نمبر 149

رہیے اب ایسی جگہ چل کر جہاں کوئی نہ ہو

ہم سخن کوئی نہ ہو اور ہم زباں کوئی نہ ہو

بے در و دیوار سا اک گھر بنایا چاہیے

کوئی ہم سایہ نہ ہو اور پاسباں کوئی نہ ہو

پڑیے گر بیمار تو کوئی نہ ہو بیمار دار @

اور اگر مر جائیے تو نوحہ خواں کوئی نہ ہو

@قدیم لفظ ’بیماردار‘ ہی تھا بعد میں لفظ ’تیماردار‘ استعمال کیا جانے لگا توجدید نسخوں میں اس لفظ کو تیماردار لکھا گیا۔

مرزا اسد اللہ خان غالب

بن گیا رقیب آخر، تھا جو رازداں اپنا

اکتوبر 8, 2015مرزا اسد اللہ خان غالب،اساتذہ،غزلہمزباں،مکاں،پاسباں،آسماں،آستاں،امتحاں،خونچکاں،رازداںadmin

دیوانِ غالب ۔ غزل نمبر 72

ذکر اس پری وش کا، اور پھر بیاں اپنا

بن گیا رقیب آخر، تھا جو رازداں اپنا

مے وہ کیوں بہت پیتے بز مِ غیر میں یا رب

آج ہی ہوا منظور اُن کو امتحاں اپنا

منظر اک بلندی پر اور ہم بنا سکتے

عرش سے اُدھر ہوتا، کاشکے مکاں اپنا

دے وہ جس قد ر ذلت ہم ہنسی میں ٹالیں گے

بارے آشنا نکلا، ان کا پاسباں، اپنا

در دِ دل لکھوں کب تک، جاؤں ان کو دکھلادوں

انگلیاں فگار اپنی، خامہ خونچکاں اپنا

گھستے گھستے مٹ جاتا، آپ نے عبث بدلا

ننگِ سجدہ سے میرے، سنگِ آستاں اپنا

تا کرے نہ غمازی، کرلیا ہے دشمن کو

دوست کی شکایت میں ہم نے ہمزباں اپنا

ہم کہاں کے دانا تھے، کس ہنر میں یکتا تھے

بے سبب ہوا غالب دشمن آسماں اپنا

مرزا اسد اللہ خان غالب

اب کیسے لوگ آئے زمیں آسماں کے بیچ

اکتوبر 6, 2015میر تقی میر،اساتذہ،غزلگلستاں،پاسباں،آسماں،آستاں،آشیاں،استخواں،دودماں،رواں،زباںadmin

دیوان چہارم غزل 1370

آگے تو رسم دوستی کی تھی جہاں کے بیچ

اب کیسے لوگ آئے زمیں آسماں کے بیچ

میں بے دماغ عشق اٹھا سو چلا گیا

بلبل پکارتی ہی رہی گلستاں کے بیچ

تحریک چلنے کی ہے جو دیکھو نگاہ کر

ہیئت کو اپنی موجوں میں آب رواں کے بیچ

کیا میل ہو ہما کی پس از مرگ میری اور

ہے جاے گیر عشق کی تب استخواں کے بیچ

کیا جانوں لوگ کہتے ہیں کس کو سرور قلب

آیا نہیں یہ لفظ تو ہندی زباں کے بیچ

طالع سے بن گئی کہ ہم اس مہ کنے گئے

بگڑی تھی رات اس کے سگ و پاسباں کے بیچ

اتنی جبین رگڑی کہ سنگ آئینہ ہوا

آنے لگا ہے منھ نظر اس آستاں کے بیچ

خوگر ہوئے ہیں عشق کی گرمی سے خار و خس

بجلی پڑی رہی ہے مرے آشیاں کے بیچ

اس روے برفروختہ سے جی ڈرے ہے میر

یہ آگ جا لگے گی کسو دودماں کے بیچ

میر تقی میر

ساتھ اس کارواں کے ہم بھی ہیں

اکتوبر 6, 2015میر تقی میر،اساتذہ،غزلناتواں،ڈھان،واں،کارواں،گلستاں،پاسباں،آستاں،بان،جواں،خانداں،زباںadmin

دیوان سوم غزل 1185

رفتگاں میں جہاں کے ہم بھی ہیں

ساتھ اس کارواں کے ہم بھی ہیں

شمع ہی سر نہ دے گئی برباد

کشتہ اپنی زباں کے ہم بھی ہیں

ہم کو مجنوں کو عشق میں مت بوجھ

ننگ اس خانداں کے ہم بھی ہیں

جس چمن زار کا ہے تو گل تر

بلبل اس گلستاں کے ہم بھی ہیں

نہیں مجنوں سے دل قوی لیکن

یار اس ناتواں کے ہم بھی ہیں

بوسہ مت دے کسو کے در پہ نسیم

خاک اس آستاں کے ہم بھی ہیں

گو شب اس در سے دور پہروں پھریں

پاس تو پاسباں کے ہم بھی ہیں

وجہ بیگانگی نہیں معلوم

تم جہاں کے ہو واں کے ہم بھی ہیں

مر گئے مر گئے نہیں تو نہیں

خاک سے منھ کو ڈھانکے ہم بھی ہیں

اپنا شیوہ نہیں کجی یوں تو

یار جی ٹیڑھے بانکے ہم بھی ہیں

اس سرے کی ہے پارسائی میر

معتقد اس جواں کے ہم بھی ہیں

میر تقی میر

برہم زدہ شہر ہے جہاں تو

اکتوبر 6, 2015میر تقی میر،اساتذہ،غزلمکاں،نشاں،پاسباں،آسماں،جہاں،جواں،جاں،دہاں،زباںadmin

دیوان دوم غزل 911

سب حال سے بے خبر ہیں یاں تو

برہم زدہ شہر ہے جہاں تو

اس تن پہ نثار کرتے لیکن

اپنی بھی نظر میں ٹھہرے جاں تو

برباد نہ دے کہیں سراسر

رہتی نہیں شمع ساں زباں تو

کیا اس کے گئے ہے ذکر دل کا

ویران پڑا ہے یہ مکاں تو

کیا کیا نہ عزیز خوار ہوں گے

ہونے دو اسے ابھی جواں تو

غنچہ لگے منھ تمھارے لیکن

صحبت کا اسے بھی ہو دہاں تو

کیا اس سے رکھیں امید بہبود

پھرتا ہے خراب آسماں تو

یہ طالع نارسا بھی جاگیں

سو جائے ٹک اس کا پاسباں تو

مت تربت میر کو مٹائو

رہنے دو غریب کا نشاں تو

میر تقی میر

جی رندھ گیا ہے ظالم اب رحم کر کہاں تک

اکتوبر 6, 2015میر تقی میر،اساتذہ،غزلنشاں،یاں،کہاں،گلستاں،پاسباں،آسماں،آشیاں،استخواں،جہاں،جاںadmin

دیوان دوم غزل 844

سو خونچکاں گلے ہیں لب سے مری زباں تک

جی رندھ گیا ہے ظالم اب رحم کر کہاں تک

ملنے میں میرے گاہے ٹک تن دیا نہ ان نے

حاضر رہا ہوں میں تو اپنی طرف سے جاں تک

ہر چند میں نے سر پر اس رہ کی خاک ڈالی

لیکن نہ پہنچیں آنکھیں اس پائوں کے نشاں تک

ان ہڈیوں کا جلنا کوئی ہما سے پوچھو

لاتا نہیں ہے منھ وہ اب میرے استخواں تک

اس کی گلی کے سگ سے کی ہے موافقت میں

اس راہ سے بھی پہنچیں شاید کہ پاسباں تک

ابربہار نے شب دل کو بہت جلایا

تھا برق کا چمکنا خاشاک آشیاں تک

اس مہ کے گوش تک تو ہرگز نہیں پہنچتی

گو آہ بے سرایت جاتی ہے آسماں تک

قید قفس میں مرنا کب شوق کا ہے مانع

پہنچیں گے مشت پر بھی اڑ کر یہ گلستاں تک

ہونا جہاں کا اپنی آنکھوں میں ہے نہ ہونا

آتا نظر نہیں کچھ جاوے نظر جہاں تک

جاتی ہیں خط کے پیچھے جوں مہر آنکھیں میری

اب کارشوق میرا پہنچا ہے میر یاں تک

میر تقی میر

آتی نہیں ہے تو بھی شکایت زباں تلک

اکتوبر 6, 2015میر تقی میر،اساتذہ،غزلیاں،کہاں،گلستاں،پاسباں،آسماں،آشیاں،زباںadmin

دیوان دوم غزل 840

حالانکہ کام پہنچ گیا کب کا جاں تلک

آتی نہیں ہے تو بھی شکایت زباں تلک

اس رشک مہ کے دل میں نہ مطلق کیا اثر

ہرچند پہنچی میری دعا آسماں تلک

جو آرزو کی اس سے سو دل میں ہی خوں ہوئی

نومید یوں بسر کرے کوئی کہاں تلک

کھینچا کیے وہ دور بہت آپ کو سدا

ہمسائے ہم موا کیے آئے نہ یاں تلک

بلبل قفس میں اس لب و لہجہ پہ یہ فغاں

آواز ایک ہو رہی ہے گلستاں تلک

پچھتائے اٹھ کے گھر سے کہ جوں نو دمیدہ پر

جانا بنا نہ آپ کو پھر آشیاں تلک

ہم صحبتی یار کو ہے اعتبار شرط

اپنی پہنچ تو میر نہیں پاسباں تلک

میر تقی میر

نہ اس دیار میں سمجھا کوئی زباں میری

اکتوبر 6, 2015میر تقی میر،اساتذہ،غزلفغاں،کہاں،کارواں،پاسباں،بدگماں،جہاں،دوستاں،داں،رہرواں،رائیگاں،زباںadmin

دیوان اول غزل 463

رہی نگفتہ مرے دل میں داستاں میری

نہ اس دیار میں سمجھا کوئی زباں میری

برنگ صوت جرس تجھ سے دور ہوں تنہا

خبر نہیں ہے تجھے آہ کارواں میری

ترے نہ آج کے آنے میں صبح کے مجھ پاس

ہزار جاے گئی طبع بدگماں میری

وہ نقش پاے ہوں میں مٹ گیا ہو جو رہ میں

نہ کچھ خبر ہے نہ سدھ ہے گی رہرواں میری

شب اس کے کوچے میں جاتا ہوں اس توقع پر

کہ ایک دوست ہے واں خواب پاسباں میری

اسی سے دور رہا اصل مدعا جو تھا

گئی یہ عمرعزیز آہ رائیگاں میری

ترے فراق میں جیسے خیال مفلس کا

گئی ہے فکر پریشاں کہاں کہاں میری

نہیں ہے تاب و تواں کی جدائی کا اندوہ

کہ ناتوانی بہت ہے مزاج داں میری

رہا میں در پس دیوار باغ مدت لیک

گئی گلوں کے نہ کانوں تلک فغاں میری

ہوا ہوں گریۂ خونیں کا جب سے دامن گیر

نہ آستین ہوئی پاک دوستاں میری

دیا دکھائی مجھے تو اسی کا جلوہ میر

پڑی جہان میں جاکر نظر جہاں میری

میر تقی میر

پر مل چلا کرو بھی کسو خستہ جاں سے تم

اکتوبر 6, 2015میر تقی میر،اساتذہ،غزلمکاں،کہاں،پاسباں،امتحاں،جہاں،جاں،داستاں،رواں،زباںadmin

دیوان اول غزل 278

جانا کہ شغل رکھتے ہو تیر و کماں سے تم

پر مل چلا کرو بھی کسو خستہ جاں سے تم

ہم اپنی چاک جیب کو سی رہتے یا نہیں

پھاٹے میں پائوں دینے کو آئے کہاں سے تم

اب دیکھتے ہیں خوب تو وہ بات ہی نہیں

کیا کیا وگرنہ کہتے تھے اپنی زباں سے تم

تنکے بھی تم ٹھہرتے کہیں دیکھے ہیں تنک

چشم وفا رکھو نہ خسان جہاں سے تم

جائو نہ دل سے منظر تن میں ہے جا یہی

پچھتائوگے اٹھوگے اگر اس مکاں سے تم

قصہ مرا سنوگے تو جاتی رہے گی نیند

آرام چشم مت رکھو اس داستاں سے تم

کھل جائیں گی پھر آنکھیں جو مر جائے گا کوئی

آتے نہیں ہو باز مرے امتحاں سے تم

جتنے تھے کل تم آج نہیں پاتے اتنا ہم

ہر دم چلے ہی جاتے ہو آب رواں سے تم

رہتے نہیں ہو بن گئے میر اس گلی میں رات

کچھ راہ بھی نکالو سگ و پاسباں سے تم

میر تقی میر

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: پاسباں

اور اس پر عجز دکھلائے گلی کا پاسباں کیا کیا

گھروندا بے نشاں ہونے لگا ہے

تن گیا آسماں کماں جیسا

ہے خاکِ تن ہوا و ہوا خوں فشاں ہنوز

مجھ کو خبر نہیں مری مٹی کہاں کی ہے

وہ کون سی زمیں ہے جہاں آسماں نہیں

رہی نہ طرزِ ستم کوئی آسماں کے لئے

ہم سخن کوئی نہ ہو اور ہم زباں کوئی نہ ہو

بن گیا رقیب آخر، تھا جو رازداں اپنا

اب کیسے لوگ آئے زمیں آسماں کے بیچ

ساتھ اس کارواں کے ہم بھی ہیں

برہم زدہ شہر ہے جہاں تو

جی رندھ گیا ہے ظالم اب رحم کر کہاں تک

آتی نہیں ہے تو بھی شکایت زباں تلک

نہ اس دیار میں سمجھا کوئی زباں میری

پر مل چلا کرو بھی کسو خستہ جاں سے تم

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: